MEMORANDUM TA’ SPJEGAZZJONI

(1) Ir-Regolament tal-Kunsill (UE) Nru 267/2012 tat-23 ta' Marzu 2012 dwar il-miżuri restrittivi kontra l-Iran jagħti effett lill-miżuri previsti fid-Deċiżjoni 2010/413/PESK.

(2) Fl-24 ta’ Novembru 2013, iċ-Ċina, Franza, il-Ġermanja, il-Federazzjoni Russa, ir-Renju Unit u l-Istati Uniti, appoġġati mir-Rappreżentanta Għolja tal-Unjoni Ewropea għall-Affarijiet Barranin u l-Politika ta’ Sigurtà laħqu ftehim mal-Iran dwar Pjan ta’ Azzjoni Konġunt li jistabbilixxi approċċ biex tintlaħaq soluzzjoni komprensiva fit-tul għall-kwistjoni nukleari Iranjana. Ġie miftiehem li l-proċess li wassal għal din is-soluzzjoni komprensiva jinkludi, bħala l-ewwel pass, miżuri inizjali li dwarhom kien hemm qbil reċiproku biex jittieħdu miż-żewġ naħat għal perjodu ta’ sitt xhur u li jiġġeddu permezz ta’ kunsens reċiproku.

(3) Bħala parti minn dan l-ewwel pass, l-Iran għandha tieħu għadd ta’ miżuri volontarji kif speċifikat fil-Pjan ta’ Azzjoni Konġunt. Min-naħa tagħhom l-E3/UE+3 se jieħdu għadd ta’ miżuri volontarji li jkunu jinkludu s-sospensjoni temporanja tal-UE tal-miżuri restrittivi  li ġejjin:

– il-projbizzjoni fuq il-provvediment ta’ assigurazzjoni u riassigurazzjoni u trasport għal żejt mhux raffinat Iranjan.

– il-projbizzjoni fuq l-importazzjoni, ix-xiri, jew it-trasport ta’ prodotti petrokimiċi Iranjani u fuq il-provvista ta’ servizzi relatati.

– il-projbizzjoni fuq il-kummerċ fid-deheb u metalli prezzjużi mal-Gvern tal-Iran, il-korpi pubbliċi tiegħu u l-Bank Ċentrali tal-Iran, jew persuni u entitajiet li jaġixxu f’isimhom.

(4) Barra minn hekk, il-Pjan ta’ Azzjoni Konġunt jipprevedi wkoll iż-żieda b’għaxar darbiet tal-limiti tal-awtorizzazzjoni fir-rigward tat-trasferimenti ta’ fondi lejn u mill-Iran.

(5) Hija meħtieġa aktar azzjoni mill-Unjoni sabiex jiġu implimentati dawn il-miżuri.

(6) Ir-Rappreżentanta Għolja tal-Unjoni għall-Affarijiet Barranin u l-Politika ta’ Sigurtà u l-Kummissjoni Ewropea jipproponu li jemendaw ir-Regolament (UE) Nru 267/2012 kif meħtieġ.

2013/0452 (NLE)

Proposta Konġunta għal

REGOLAMENT TAL-KUNSILL

li jemenda r-Regolament (UE) Nru 267/2012 dwar miżuri restrittivi kontra l-Iran

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 215 tiegħu,

Wara li kkunsidra d-Deċiżjoni tal-Kunsill 2010/413/PESK tas-26 ta' Lulju 2010 dwar miżuri restrittivi kontra l-Iran u li tħassar il-Pożizzjoni Komuni 2007/140/PESK [1],

Wara li kkunsidra l-proposta konġunta mir-Rappreżentanta Għolja tal-Unjoni għall-Affarijiet Barranin u l-Politika ta' Sigurtà u mill-Kummissjoni Ewropea,

Billi:

(1)       Ir-Regolament tal-Kunsill (UE) Nru 267/2012[2] jagħti effett lill-miżuri previsti fid-Deċiżjoni 2010/413/PESK.

(2)       Fl-24 ta’ Novembru 2013, iċ-Ċina, Franza, il-Ġermanja, il-Federazzjoni Russa, ir-Renju Unit u l-Istati Uniti,(l-E3/UE+3) appoġġati mir-Rappreżentanta Għolja tal-Unjoni Ewropea għall-Affarijiet Barranin u l-Politika ta’ Sigurtà laħqu ftehim mal-Iran dwar Pjan ta’ Azzjoni Konġunt li jiddefinixxi approċċ biex tintlaħaq soluzzjoni komprensiva fit-tul għall-kwistjoni nukleari Iranjana. Ġie miftiehem li l-proċess li wassal għal din is-soluzzjoni komprensiva jkun jinkludi, bħala l-ewwel pass, miżuri inizjali li dwarhom kien hemm qbil reċiproku biex jittieħdu miż-żewġ naħat għal perjodu ta’ sitt xhur u li jiġġeddu permezz ta’ kunsens reċiproku.

(3)       Bħala parti minn dan l-ewwel pass, l-Iran għandha tieħu għadd ta’ miżuri volontarji kif speċifikat fil-Pjan ta’ Azzjoni Konġunt. Min-naħa tagħhom l-E3/UE+3 se jieħdu għadd ta’ miżuri volontarji li jkunu jinkludu s-sospensjoni temporanja tal-UE tal-miżuri restrittivi  li ġejjin:

– il-projbizzjoni fuq il-provvediment ta’ assigurazzjoni u riassigurazzjoni u trasport għal żejt mhux raffinat Iranjan.

– il-projbizzjoni fuq l-importazzjoni, ix-xiri, jew it-trasport ta’ prodotti petrokimiċi Iranjani u fuq il-provvista ta’ servizzi relatati.

– il-projbizzjoni fuq il-kummerċ fid-deheb u metalli prezzjużi mal-Gvern tal-Iran, il-korpi pubbliċi tiegħu u l-Bank Ċentrali tal-Iran, jew persuni u entitajiet li jaġixxu f’isimhom.

(4)       Barra minn hekk, il-Pjan ta’ Azzjoni Konġunt jipprevedi wkoll iż-żieda b’għaxar darbiet tal-limiti tal-awtorizzazzjoni fir-rigward tat-trasferimenti ta’ fondi lejn u mill-Iran.

(5)       Din il-miżura taqa’ fil-kamp ta' applikazzjoni tat-Trattat u għalhekk teħtieġ azzjoni regolatorja fil-livell tal-Unjoni sabiex tiġi implimentata, b'mod partikolari bl-għan li tiġi żgurata l-applikazzjoni uniformi tagħha mill-operaturi ekonomiċi fl-Istati Membri kollha.

(6)       Ir-Regolament (UE) Nru 267/2012 għandu għalhekk jiġi emendat kif meħtieġ,

ADOTTA DAN IR-REGOLAMENT:

Artikolu 1

Ir-Regolament (UE) Nru 267/2012 huwa emendat kif ġej:

(1) Fl-Artikolu 11, jiżdiedu l-paragrafi 3 u 4 li ġejjin:

'3. L-applikazzjoni tal-projbizzjoni fil-punt (c) tal-paragrafu 1 se tiġi sospiża fir-rigward ta’ prodotti elenkati fl-Anness XI.

4. L-applikazzjoni tal-projbizzjoni fil-paragrafu 1(d) se tiġi sospiża sa fejn jikkonċerna l-provvediment ta' assigurazzjoni u ta' riassigurazzjoni relatati mal-importazzjoni, ix-xiri, jew it-trasport ta’ prodotti elenkati fl-Anness XI.'

(2) Fl-Artikolu 13, jiddaħħal il-paragrafu 3 li ġej:

'3. L-applikazzjoni tal-projbizzjonijiet fil-paragrafu (1)(a), (b), (c) u (d) se tiġi sospiża.'

(3) Fl-Artikolu 15, jiddaħħal il-paragrafu 3 li ġej:

'3. L-applikazzjoni tal-projbizzjonijiet fil-punt (c) tal-paragrafu 1 se tiġi sospiża fir-rigward ta’ prodotti elenkati fl-Anness XI.

(4) Jiddaħħal l-Artikolu 28b li ġej:

'Artikolu 28b

1. B’deroga mill-Artikolu 23(2) u (3), l-awtoritajiet kompetenti jistgħu jawtorizzaw, taħt il-kundizzjonijiet li huma jikkunsidraw xierqa, ir-rilaxx ta’ riżorsi ekonomiċi jew li jagħmlu disponibbli fondi jew riżorsi ekonomiċi, direttament jew indirettament, lill-Ministeru għaż-Żejt, kif elenkat fl-Anness IX, wara li jkun ġie ddeterminat li l-fondi jew ir-riżorsi ekonomiċi huma meħtieġa għall-eżekuzzjoni ta’ kuntratti għall-importazzjoni, ix-xiri, jew it-trasport ta’ prodotti petrokimiċi, kif elenkati fl-Anness V, li joriġinaw mill-Iran jew li ġew impurtati mill-Iran.

2. L-Istati Membri kkonċernati se jinfurmaw lill-Istati Membri l-oħra u lill-Kummissjoni, fi żmien erba’ (4) ġimgħat, bl-awtorizzazzjonijiet mogħtija skont dan l-Artikolu.'

(5) L-Artikolu 30 huwa emendat kif ġej:

(a) fil-paragrafu 3(a):

(i) ir-referenza għal 'EUR 100 000' tinbidel għal 'EUR 1 000 000';

(i) ir-referenza għal 'EUR40 000' tinbidel għal 'EUR 400 000';

(b) fil-paragrafu 3(b):

(i) ir-referenza għal 'EUR 100 000' tinbidel għal 'EUR 1 000 000';

(ii) ir-referenza għal 'EUR 40 000' tinbidel għal 'EUR 400 000';

(c) fil-paragrafu 3(c) ir-referenza għal 'EUR 10 000' tinbidel għal 'EUR 100 000'.

(6) L-Artikolu 30a huwa emendat kif ġej:

(a) fil-paragrafu 1(b) ir-referenza għal 'EUR 40 000' tinbidel għal 'EUR 400 000';

(b) fil-paragrafu 1(c) ir-referenza għal 'EUR 40 000' tinbidel għal 'EUR 400 000'.

(7) Fl-Artikolu 37b, jiddaħħal il-paragrafu 3 li ġej:

'3. L-applikazzjoni tal-projbizzjoni fil-paragrafu 1 se tiġi sospiża.'

(8) L-Anness I u l-Anness II ta’ dan ir-Regolament huma miżjuda bħala l-Annessi XI u XII rispettivament.

Artikolu 2

Dan ir-Regolament se jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament se jorbot fl-intier tiegħu u japplika direttament fl-Istati Membri kollha.

Magħmul fi Brussell,

                                                                       Għall-Kunsill

                                                                       Il-President

[1]               ĠU L 195, 27.7.2010, p. 39.

[2]               Ir-Regolament tal-Kunsill (UE) Nru 267/2012 tat-23 ta' Marzu 2012 dwar miżuri restrittivi kontra l-Iran u li jħassar ir-Regolament (UE) Nru 961/2010 (ĠU L 88, 24.3.2012, p. 1).

ANNESS I

“ANNESS XI

Lista ta’ prodotti msemmija fl-Artikolu 11(3)

Kodiċi NM || Deskrizzjoni

2709 00 || Żjut minerali (petroleum) u żjut miksubin minn minerali bituminużi, mhux raffinati"

ANNESS II

"ANNESS XII

Lista ta’ prodotti msemmija fl-Artikolu 15(3)

Kodiċi NM || Deskrizzjoni

7106 || Fidda (inkluża fidda miksija bid-deheb jew bil-platinu), mhux maħduma jew f’għamliet semimanifatturati, jew f’għamla ta’ trab

7108 || Deheb (inkluż deheb miksi bil-platinu), mhux maħdum jew f’għamla semimanifatturata, jew f’għamla ta’ trab

7109 || Metalli ta’ valur baxx jew fidda, miksijin bid-deheb, mhux maħdumin aktar ħlief semimanifatturati

7110 || Platinu, f’għamliet mhux maħdumin jew semi-manifatturati, jew f’għamla ta’ trab

7111 || Metalli ta' valur baxx, fidda jew deheb, miksijin bil-platinu, mhux maħdumin aktar ħlief semi-manifatturati

7112 || Skart u fdal ta’ metall prezzjuż jew ta’ metall miksi b’metall prezzjuż; skart u fdal ieħor li fih metall prezzjuż jew komposti ta’ metall prezzjuż, ta’ tip użat l-aktar għall-irkupru ta’ metall prezzjuż"