KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Il-Prevenzjoni tar-Radikalizzazzjoni għat-Terroriżmu u l-Estremiżmu Vjolenti: It-Tisħiħ tar-Reazzjoni tal-UE /* COM/2013/0941 final */
Komunikazzjoni mill-Kummissjoni lill-Parlament
Ewropew, lill-Kunsill, lill-Kumitat Ekonomiku u Soċjali Ewropew u
lill-Kumitat tar-Reġjuni Il-Prevenzjoni tar-Radikalizzazzjoni
għat-terroriżmu u l-Estremiżmu Vjolenti: It-Tisħiħ
tar-Reazzjoni tal-UE 1. Introduzzjoni 1.1
Xejriet
u sfidi Peress li
l-istrateġija tal-UE biex tiġi miġġielda
r-radikalizzazzjoni u r-reklutaġġ ġiet aġġornata
l-aħħar fl-2008, ix-xejriet, il-mezzi u t-tendenzi
tar-radikalizzazzjoni evolvew u twessgħu. L-ewwel nett,
it-terroriżmu fl-Ewropa issa jsib l-ispirazzjoni tiegħu f'varjetà
aktar wiesgħa ta' ideoloġiji, kif muri mir-rapport TE-Sat tal-Europol
tal-2013. Dawn jinkludu ideoloġiji nazzjonalisti u separatisti, dawk
ispirati mill-Al Qaida, ideoloġiji tax-xellug vjolenti, anarkisti,
u tal-lemin. It-tieni nett,
attivitajiet terroristi u estremisti vjolenti fl-UE mhumiex id-dominju
esklussiv ta' organizzazzjonijiet ċentralizzati u ġerarkiċi.
It-theddida evolviet progressivament biex tinkludi gruppi iżgħar
ibbażati fl-UE, ċelloli, u atturi solitarji li joperaw b'inqas
restrizzjonijiet u b'mod iktar imprevedibbli. Huma jippjanaw attakki
b'direzzjoni limitata jew mingħajr ebda direzzjoni minn xi
organizzazzjoni, biex b'hekk jagħmlu l-prevenzjoni iktar diffiċli. Ħafna
terroristi li jippjanaw attakki fuq art Ewropea jkunu Ewropej huma stess.
Attakki bħal dawn jikkawżaw iktar minn telf ta' ħajjiet u
ħsara ekonomika; jistgħu jiżirgħu
ż-żerriegħa tas-separazzjoni bejn il-komunitajiet fl-Ewropa,
biex b'hekk iżidu opinjonijiet reazzjonarji u estremisti f'partijiet
oħrajn tas-soċjetà. Dan jikkontribwixxi għall-ħolqien
tal-estremiżmu, li jipperpetwa ċirku vizzjuż ta'
radikalizzazzjoni, aggressjoni, u reazzjonijiet vjolenti. L-Ewropa hija
wkoll direttament affettwata minn attività terrorista madwar id-dinja.
L-Ewropej jistgħu jkunu vittmi ta' attakki, bħal ma wrew
biċ-ċar l-atroċitajiet riċenti f'Nairobi. Iżda
jistgħu wkoll ikunu l-awturi ta' dawn l-attakki. Ħafna drabi
mpoġġija fuq it-triq għar-radikalizzazzjoni fl-Ewropa minn
propaganda estremista jew minn rekluti, l-Ewropej jivvjaġġaw barra
minn xtuthom biex jitħarrġu u jiġġieldu f'żoni ta'
kumbattiment, u fil-proċess isiru iktar radikali. Armati
b'ħiliet ta' kumbatt akkwistati riċentement, ħafna minn dawn
"il-ġellieda barranin" Ewropej jistgħu jpoġġu
theddida għas-sigurtà tagħna mar-ritorn tagħhom minn żona
ta' kunflitt. Fit-terminu twil jistgħu jaġixxu bħala katalisti
għat-terroriżmu. Il-fenomenu tal-ġellieda barranin mhuwiex
wieħed ġdid, iżda hekk kif qed ikompli l-ġlied fis-Sirja,
in-numru ta' estremisti li jivvjaġġaw biex jieħdu sehem
fil-kunflitt qed jiżdied. U hekk kif in-numru ta' ġellieda barranin
Ewropej qed jiżdied, hekk ukoll tiżdied it-theddida għas-sigurtà
tagħna. Gruppi
terroristiċi u estremisti qed jikkapitalizzaw fuq l-avvanzi
fit-teknoloġija biex isibu modi ġodda biex jimpenjaw ruħhom ma'
żgħażagħ li mhumiex affettwati, billi jieħdu
vantaġġ minn siti ta' netwerking soċjali, kanali tal-vidjos
onlajn u chat rooms radikali. Qed iferrxu l-propaganda tagħhom b'mod iktar
wiesa', iktar rapidu, u iktar effettiv. Tekniki ta'
nfurzar tal-liġi tradizzjonali mhumiex biżżejjed biex jiġu
trattati xejriet fir-radikalizzazzjoni li qed jevolvu, u għalhekk metodu
iktar wiesa' huwa meħtieġ biex tiġi evitata u
miġġielda r-radikalizzazzjoni. Dan
il-metodu iktar wiesa' li jirrispondi għax-xejriet fir-radikalizzazzjoni
jrid jimpenja s-soċjetà kollha kemm hi. Din
il-Komunikazzjoni tindirizza r-radikalizzazzjoni fil-forom kollha tagħha u
tidentifika ż-żoni li jkopru spettru wiesa' ta' miżuri biex
tiġi evitata u miġġielda r-radikalizzazzjoni
għat-terroriżmu u l-estremiżmu vjolenti. 1.2
Approċċ
u għan ġenerali L-Istati Membri
huma responsabbli biex jiddisinjaw u jimplimentaw miżuri mmirati biex
jipprevjenu u jiġġieldu r-radikalizzazzjoni, u l-azzjonijiet ewlenin
huma, u għandhom jibqgħu, fuq livelli nazzjonali u lokali. Ċerti
Stati Membri għamlu ħafna xogħol f'dan il-qasam, u jistgħu
jaqsmu l-esperjenza tagħhom ma' Stati Membri oħra interessati. Bit-tħassib
li qiegħed jikber dwar ir-radikalizzazzjoni onlajn u ż-żieda
notevoli fi gruppi estremisti pubbliċi fl-Ewropa, iktar u iktar Stati
Membri qed jiffaċċjaw theddid mir-radikalizzazzjoni. Madwar l-UE,
ir-riskju tar-radikalizzazzjoni li twassal għall-vjolenza estremista qed
jiżdied, u l-Istati Membri jibbenefikaw billi jżidu l-isforzi
tagħhom biex jirrispondu effettivament għal dawn l-isfidi. Ir-radikalizzazzjoni
taqsam fruntieri nazzjonali b'ħafna modi. Pereżempju, l-użu ta'
chat rooms, midja soċjali, u għodod onlajn oħra ħafna drabi
għandu dimensjoni internazzjonali. It-tip ta' theddid li l-Istati Membri
jiffaċċjaw hu ħafna drabi simili, allura jista' jkun effettiv
kieku tittieħed azzjoni fuq livell ta' UE. Il-Kummissjoni
Ewropea digà qed tappoġġja l-Istati Membri fl-isforzi tagħhom
biex jiġi evitat u miġġieled l-estremiżmu. Fl-2011,
il-Kummissjoni stabbilixxiet in-Netwerk ta' Sensibilizzazzjoni dwar
ir-Radikalizzazzjoni (RAN), li jlaqqa' flimkien iktar minn 700 espert u
prattikant minn madwar l-Ewropa. L-RAN jiġbor kompetenzi u
jiffaċilita l-iskambju ta' ideat dwar suġġetti li jvarjaw
mill-għoti tas-setgħa ta' atturi lokali sal-organizzazzjoni ta'
konferenzi internazzjonali, biex b'hekk iġib flimkien il-kompetenzi fuq
kull livell. Din
il-Komunikazzjoni tistipula kif il-Kummissjoni Ewropea, b'kollaborazzjoni
mar-Rappreżentant Għoli tal-Unjoni għall-Affarijiet Barranin u
l-Politika ta' Sigurtà (Rappreżentant Għoli) u bl-appoġġ
tal-Koordinatur għal Kontra t-Terroriżmu tal-UE (CTC), tista'
tappoġġja l-isforzi tal-Istati Membri biex tiġi prevista
r-radikalizzazzjoni. Magħha l-Kummissjoni tirrispondi
għall-konklużjonijiet ta' Ġunju 2013, u tikkontribwixxi
għall-eżerċizzju iktar wiesa' li bih tiġi
aġġornata l-Istrateġija tal-UE Kontra r-Radikalizzazzjoni u
r-Reklutaġġ għat-Terroriżmu. Il-kapitolu segwenti
jiddefinixxi għaxar oqsma fejn L-Istati Membri u l-UE jistgħu
jieħdu aktar azzjoni biex jipprevjenu r-radikalizzazzjoni f'pajjiżhom
u barra minn xtuthom. L-azzjonijiet
ippreżentati f'din il-Komunikazzjoni jirriflettu l-impenn tal-UE sabiex
jiġu żgurati s-sigurtà u r-rispett tad-drittijiet u l-libertajiet
fundamentali taċ-ċittadini tal-UE, kif minqux fil-Karta
tad-Drittijiet Fundamentali tal-UE, inklużi l-libertà tal-espressjoni u
l-informazzjoni, ta' għaqda u ta' assoċjazzjoni, u r-rispett
għad-diversità lingwistika, kulturali u reliġjuża. 2.
Il-Prevenzjoni tar-Radikalizzazzjoni Il-Kummissjoni,
bl-appoġġ tar-Rappreżentant Għoli u s-CTC, u b'input
sinifikanti mill-RAN, identifikat għaxar oqsma li l-Istati Membri u l-UE
jistgħu jikkonsidraw bħala parti mill-isforzi tagħhom biex
tiġi ttrattata r-radikalizzazzjoni f'pajjiżhom u barra minn xtuthom.
Din it-taqsima tinkludi spjegazzjonijiet qosra dwar kif dawn l-ideat
jistgħu jżidu l-valur mal-isforzi tal-Istati Membri biex tiġi
evitata r-radikalizzazzjoni, u tiddefinixxi f'kull każ kif il-Kummissjoni
tista' tappoġġja l-Istati Membri interessati. L-RAN ġabar
kollezzjoni ta' metodi u l-aħjar prattiki minn ġewwa l-UE li
l-Kummissjoni qed tpoġġi onlajn sabiex takkumpanja din
il-Komunikazzjoni. Din il-kollezzjoni tinkludi firxa wiesgħa ta' prattiki
li jindirizzaw aktar l-azzjonijiet proposti f'din il-Komunikazzjoni.[1] L-azzjonijiet
definiti fit-taqsimiet li ġejjin huma intenzjonati li jiġu
implimentati billi jintużaw ir-riżorsi ta' programmi eżistenti
taħt il-Qafas Finanzjarju Pluriennali 2014-2020. Se jkunu ffinanzjati fi
ħdan il-baġit ippjanat u b'mod konformi mal-objettivi tal-programmi.
F'każ li jkun hemm bżonn iktar riżorsi umani, jerġa'
jiġi mqassam persunal eżistenti. Kull missjoni assenjata lil
aġenzija deċentralizzata taqa' taħt il-mandat kurrenti ta' dik
l-aġenzija u tkun akkomodata taħt ir-riżorsi tagħha
għall-perjodu 2014-2020. L-inizjattivi proposti mhux se jinvolvu kostijiet
addizzjonali għall-baġit tal-UE. 2.1
L-Istati
Membri jibbenefikaw minn strateġiji nazzjonali li qed jiżviluppaw
biex tiġi evitata r-radikalizzazzjoni Għalkemm
it-terroriżmu ma affettwax l-Istati Membri kollha direttament, it-theddida
hija persistenti u l-attakki terroristi huma imprevedibbli. It-terroriżmu
jista' jolqot kullimkien fi kwalunkwe ħin. Huwa għalhekk
kruċjali li naħdmu flimkien biex nagħmlu dak li nistgħu
biex nantiċipaw din it-theddida. Numru ta' Stati
Membri diġà implimentaw miżuri sabiex tiġi evitata
r-radikalizzazzjoni, kemm internament u kemm esternament. Iżda metodi
komprensivi taħt il-fergħa tal-Istrateġija tal-UE ta' Kontra
t-Terroriżmu mmirati biex jindirizzaw r-radikalizzazzjoni u
r-reklutaġġ mhumiex użati ħafna. Ċerti Stati Membri
għandhom metodi bħal dawn, iżda oħrajn m'għandhomx.
L-istrateġiji li jintużaw huma bbażati fuq kooperazzjoni
orizzontali u vertikali bejn il-partijiet ikkonċernati mil-livell lokali
għal-livell internazzjonali. Prevenzjoni effettiva tfisser l-involviment
ta' organizzazzjonijiet mhux governattivi, ħaddiema f'kuntatt dirett,
servizzi tas-sigurtà u esperti fil-qasam. Dawn l-istrateġiji
jirrikjedu l-bini ta' fiduċja fi ħdan u bejn il-komunitajiet,
il-promozzjoni ta' fehim aħjar tas-sensittivitajiet u l-problemi ta'
xulxin, l-impenn f'taqsimiet differenti tas-soċjetà, u ħafna aktar.
Il-ġabra ta' dawn l-aspetti differenti kollha flimkien tnaqqas ir-riskju
ta' radikalizzazzjoni, u tirriżulta f'ċans akbar li jitwaqqfu
l-proċessi li jwasslu għall-estremiżmu u l-vjolenza. Kif identifikat
mill-RAN, prerekwiżit għal prevenzjoni effettiva hu li aktar Stati
Membri jintroduċu strateġiji biex jipprevjenu l-estremiżmu
vjolenti u t-terroriżmu kemm ġewwa u kemm barra l-UE, ibbażati
fuq l-analiżi u l-ispeċifikazzjonijiet tat-theddid tagħhom
stess. Strateġiji nazzjonali jistgħu jorbtu mal-istrateġija
riveduta tal-UE u jistgħu jikkonsidraw kooperazzjoni bejn l-Istati Membri
u atturi rilevanti oħra, sabiex jiġu identifikati modi innovattivi
biex jiġu evitati u miġġielda r-radikalizzazzjoni u
l-estremiżmu vjolenti. Il-Kummissjoni,
b'kollaborazzjoni mar-Rappreżentant Għoli u bl-appoġġ
tas-CTC, tista' wkoll tappoġġja l-Istati Membri fl-iżvilupp u
l-implimentazzjoni tal-istrateġiji tagħhom, tinkoraġġixxi
l-iżvilupp ta' proġetti ġodda, u tiffaċilita
l-kooperazzjoni ġewwa l-UE u lil hinn minnha. 2.2
Il-konsolidazzjoni
ta' għarfien espert dedikat għall-prevenzjoni tar-radikalizzazzjoni Hemm massa kbira
ta' għarfien espert u l-aħjar prattika ġewwa l-UE u lil hinn
minnha. Dawk li jfasslu l-politika u partijiet oħra interessati fl-Istati
Membri għandu jkollhom aċċess għal din il-bażi tal-għarfien
u jibnu b'mod attiv fuqha. It-twaqqif tal-RAN kien pass lejn dik id-direzzjoni;
id-djalogi strutturati li rawwem għandhom jitkomplew u r-repożitorju
tal-aħjar prattiċi li kien inġabar bħala riżultat
għandu jiġi żviluppat aktar. L-UE għandha tkompli
tgħin biex titqawwa l-kooperazzjoni bejn dawk li jfasslu l-politika,
l-akkademiċi, l-imsieħba privati, u l-fora internazzjonali. Sabiex
jintlaħaq dan, il-Kummissjoni tipproponi li jissaħħaħ
ir-rwol tas-segretarjat tal-RAN u tagħmlu iktar bħala fus
tal-għarfien sal-2015, billi tikkonċentra l-għarfien espert
dedikat biex jiġu evitati u miġġielda r-radikalizzazzjoni
għat-terroriżmu u l-estremiżmu vjolenti. Barra mir-rwol
loġistiku tiegħu, il-ħidmiet prinċipali jkunu: -
Primarjament
jirrispondi għal rikjesti għal appoġġ minn Stati Membri u l-Kummissjoni
fl-isforzi tagħhom biex jimplimentaw il-proposti dwar il-prevenzjoni
tar-radikalizzazzjoni; -
Ilaqqa'
l-għarfien espert fil-qasam tal-prevenzjoni tar-radikalizzazzjoni,
inkluż il-ġbir flimkien u t-tixrid tal-aħjar prattika, u
jgħin b'mod attiv biex tieħu forma l-aġenda ta' riċerka; -
Iservi
bħala ċentru ta' koordinazzjoni għal inizjattivi ta' prevenzjoni
ġewwa u barra l-UE. Is-segretarjat
tal-RAN se jkun immexxi fuq bażi ta' żmien limitat wara
l-ħruġ ta' tender. 2.3
Allinjament
aħjar tax-xogħol tan-Netwerk ta' Sensibilizzazzjoni dwar
ir-Radikalizzazzjoni mal-bżonnijiet tal-Istati Membri L-RAN kellu
suċċess fl-iżvilupp ta' għodod għall-indirizzar
tal-isfidi tar-radikalizzazzjoni. Ir-repożitorju onlajn tal-aħjar
prattiki huwa eżempju tajjeb ta' dan ix-xogħol. Eżempju
ieħor huwa l-faċilità tat-tagħlim elettroniku li tippermetti
skambju remot ta' informazzjoni u ideat fost membri tan-netwerk. L-RAN beda
wkoll jindirizza fenomeni speċifiċi f'sessjonijiet ta' ħidma u
proġetti dedikati. Riċentement lesta xogħol fuq impenn ma'
ġellieda barranin, billi ffoka fuq il-prevenzjoni, komunikazzjoni,
ir-riabilitazzjoni u r-reintagrazzjoni. Dan huwa suġġett li dejjem
qed isir iktar rilevanti hekk kif il-kunflitt fis-Sirja ma juri l-ebda sinjal
li jbatti. F'Jannar 2013
il-Kummissjoni żammet konferenza ta' livell għoli li fiha esperti
tal-RAN iltaqgħu ma' dawk li jfasslu l-politika mill-Istati Membri biex
jabbozzaw rakkomandazzjonijiet biex jiġi miġġieled
l-estremiżmu vjolenti. Dan kien l-ewwel pass biex tingħalaq id-diskrepanza
bejn l-RAN u dawk li jfasslu l-politika tal-Istati Membri, u l-Kummissjoni se
tkompli taħdem biex tingħalaq din id-diskrepanza. Skont
l-esperjenza miġbura mill-RAN, il-Kummissjoni se: -
Torganizza
konferenza oħra ta' livell għoli f'nofs l-2014; -
Tagħti
struzzjonijiet lill-RAN biex jiffoka fuq l-appoġġ lill-Istati Membri
fl-implimentazzjoni tal-miżuri ssuġġeriti f'din
il-Komunikazzjoni; -
Tilqa'
l-inizjattivi tal-Istati Membri biex joħolqu pjattaformi nazzjonali –
bbażati fuq il-mudell tal-RAN kull fejn ikun xieraq – immirati biex
jipprovdu gwida aktar dettaljata għal dawk li jfasslu l-politika
nazzjonali u lokali u partijiet interessati li mhumiex statutorji; -
Tappoġġja
konferenza dwar ġellieda barranin fis-Sirja li għandha ssir kmieni
fl-2014 u mmexxija mill-RAN. Din il-konferenza se tlaqqa' flimkien
rappreżentanti tas-setturi rilevanti kollha (infurzar tal-liġi, kura
tas-saħħa, eċċ.) mill-ibliet fl-UE fejn ġellieda
barranin qed jikkawżaw l-ikbar tħassib. Prattikanti lokali u esperti
nazzjonali se jaqsmu prattiki u jiskambjaw ideat dwar il-prevenzjoni ta'
ġellieda potenzjali milli jmorru s-Sirja u jimpenjaw ruħhom ma'
ġellieda barranin wara li jirritornaw. 2.4
It-taħriġ
ta' prattikanti biex jipprevjenu r-radikalizzazzjoni Skont
l-esperjenza mill-RAN, atturi lokali għandhom bżonn ikunu
mgħammra b'mod xieraq biex jirrikonoxxu mġieba radikalizzata. Dan
jgħodd speċjalment għal dawk li huma f'kuntatt dirett ma'
individwi f'riskju ta' radikalizzazzjoni. Dawn il-ħaddiema f'kuntatt
dirett jinkludu ħaddiema soċjali, edukaturi, ħaddiema fil-kura
tas-saħħa, pulizija, persunal tal-ħabs, u persunal
tal-probation. Għalkemm dawn il-professjonisti mhumiex kollha persunal
tas-sigurtà, it-taħriġ u l-għarfien tagħhom tal-bżonnijiet
tal-individwi f'riskju jfissru li huma fl-aħjar pożizzjoni biex
jirrikonoxxu dawk l-individwi fil-proċess li jkunu radikalizzati.
Iżda ħaddiema f'kuntatt dirett mhux dejjem ikollhom fehim tajjeb
tal-proċess tar-radikalizzazzjoni jew għarfien ta' kif jirrispondu
għalih. It-taħriġ huwa għalhekk bżonnjuż biex
jgħinhom jirrikonoxxu u jinterpretaw is-sinjali tar-radikalizzazzjoni, u
biex jgħinhom jiġġudikaw jekk intervent ikunx xieraq jew le. Madwar
l-Ewropa, korsjiet u taħriġ diġà ġew żviluppati biex
jitqajmu għarfien u fehim fost ħaddiema li għandhom kuntatt
dirett ma' individwi jew gruppi f'riskju. Iżda kif it-theddida tkompli
tevolvi, qed isir iktar ċar li huwa meħtieġ metodu iktar
komprensiv ġewwa u fost is-setturi. Metodu bħal dan għandu jibni
fuq it-taħriġ eżistenti u jinkorpora l-aktar ħsibijiet
riċenti. Ċerti Stati Membri waqqfu programmi ta' taħriġ
għal varjetà ta' setturi, iżda oħrajn jillimitaw il-programmi
ta' taħriġ tagħhom għall-gruppi destinatarji iktar
tradizzjonali, bħall-persunal ta' nfurzar tal-liġi u l-persunal
tal-ħabs. Xejriet riċenti fir-radikalizzazzjoni jirrikjedu li moduli
ta' taħriġ jiġu estiżi għal setturi oħrajn,
bħas-servizzi soċjali, il-kura tas-saħħa, u l-edukazzjoni. Il-Kummissjoni
se: -
B'kontribut mill-Istati Membri, se tagħti
d-dmir lill-RAN li jwaqqaf programm Ewropew biex "jiġu
mħarrġa dawk li jħarrġu", billi jiġi offrut kemm
taħriġ speċifiku għas-settur u kemm taħriġ
transsettorjali; -
Fejn ikun xieraq, tagħti d-dmir lill-RAN li
jmexxi l-korsijiet ta' taħriġ li tiżviluppa; -
B'appoġġ mill-RAN, taħdem
mal-Kulleġġ tal-Pulizija Ewropew (CEPOL) biex jiġi
żviluppat modulu ta' taħriġ għall-professjonisti
tal-infurzar tal-liġi dwar kif jiġi rikonoxxut u evitat
il-proċess tar-radikalizzazzjoni. 2.5
L-Istati
Membri jibbenefikaw minn "strateġiji ta' ħruġ" biex
jgħinu individwi jħallu warajhom l-estremiżmu vjolenti Anke xi
ħadd li ġie radikalizzat sal-punt tal-estremiżmu vjolenti jew
it-terroriżmu jista' jirrinunzja l-vjolenza u l-ideoloġija
tagħha. "L-Istrateġiji ta' ħruġ" jistgħu
jgħinu r-radikali jiddiżimpenjaw (jirrinunzjaw il-vjolenza mingħajr
ma jċedu l-ideoloġija li mibnija fuqha) u jwaqqfu r-radikalizzazzjoni
(jirrinunzjaw kemm il-vjolenza u kemm l-ideoloġija mibnija fuqha). Dawn
l-istrateġiji jvarjaw fl-ambizzjoni, mill-iskoraġġament
tal-estremisti mill-vjolenza għar-reintegrazzjoni tal-eks radikali
fis-soċjetà. Kull radikali huwa individwu bil-motivazzjonijiet u
r-raġunament tiegħu, għalhekk il-programmi ta' ħruġ
għandhom ikunu mfassla għall-bżonnijiet individwali. L-istrateġiji
ta' ħruġ ġeneralment jiddependu fuq superviżjoni individwali
li tikkonsisti f'appoġġ psikoloġiku u servizz ta' konsulenza.
Dan huwa kombinat ma' appoġġ soċjali u ekonomiku biex tiġi
ffaċilitata l-integrazzjoni mill-ġdid. Is-superviżuri jridu
jippossjedu l-kompetenzi professjonali speċifiċi, ikunu
mħarrġa b'mod adegwat, u jkunu appoġġjati minn prattikanti
oħrajn. L-istrateġiji
ta' ħruġ għandhom ikunu nkorporati fil-kuntest soċjetali
iktar wiesa'. Strateġiji bħal dawn għandhom jimpenjaw
ruħhom ma' familji u komunitajiet, li jkunu ħafna drabi fl-aħjar
pożizzjoni biex jikkontribwixxu għad-deradikalizzazzjoni, billi
jinkoraġġixxu d-diskussjoni ta' kwistjonijiet diffiċli, billi
jelenkaw għajnuna mill-komunità aktar wiesgħa, u billi jibqgħu
attenti għal kambjamenti ta' tħassib fl-imġiba. Esperjenzi
mill-RAN urew li awtoritajiet nazzjonali u lokali jistgħu jibbenefikaw
mill-appoġġ ta' impenn akbar ma' familji, billi jgħinuhom jifhmu
u jisfidaw ir-radikalizzazzjoni tal-qraba tagħhom, jew, fejn possibbli,
jipprevjenuha. Servizzi ta' konsulenza, hotlines, u netwerks ta'
appoġġ lokali jistgħu jipprovdu appoġġ kruċjali
f'ċirkostanzi diffiċli. B'metodu
bħal dan, l-istrateġiji ta' żvilupp iridu jkunu diżinjati u
implimentati b'kollaborazzjoni ma' varjetà wiesgħa ta' partijiet
interessati tal-istat u mhux tal-istat. Dan huwa magħruf bħala
l-approċċ ta' aktar minn aġenzija waħda. L-isforzi biex
jiġu promossi l-istrateġiji ta' ħruġ jistgħu
jużaw kollaborazzjoni transsettorjali bejn l-awtoritajiet rilevanti
bħall-pulizija, is-servizzi tal-ħabs u tal-probation, dawk li
jipprovdu s-servizzi soċjali, l-iskejjel, eċċ. Għandhom
jieħdu perspettiva fit-tul, billi jieħdu in konsiderazzjoni fatturi
soċjoekonomiċi moħbija, u billi jkollhom riżorsi dedikati għad-dispożizzjoni
tagħhom. Sabiex
tgħin lill-Istati Membri jiżviluppaw programmi ta' ħruġ
bħal dawn, il-Kummissjoni, b'kooperazzjoni mill-qrib mal-Istati Membri, se
tqabbad l-RAN jiġbor l-informazzjoni u għarfien espert biex
tappoġġjhom, fuq talba tagħhom stess, fl-istabbiliment ta'
programmi effettivi ta' deradikalizzazzjoni u diżimpenn. Appoġġ
bħal dan jinkludi: -
L-organizzazzjoni
ta' gruppi ta' ħidma madwar l-UE mal-Istati Membri biex jiġu
esplorati programmi differenti ta' deradikalizzazzjoni u diżimpenn u biex
jiġu diskussi mekkaniżmi ta' referenza għal familji,
komunitajiet, u ħaddiema b'kuntatt dirett; -
It-twaqqif
ta' taħriġ għal prattikanti lokali li jgħinu individwi
jiddiżimpenjaw u jwaqqfu r-radikalizzazzjoni; -
Il-ħidma,
fuq talba ta' kull Stat Membru, mal-amministrazzjoni ċentrali u
l-awtoritajiet lokali tiegħu biex jiġi appoġġjat it-twaqqif
ta' programmi nazzjonali ta' deradikalizzazzjoni jew diżimpenn. 2.6
Kooperazzjoni
iktar mill-qrib mas-soċjetà ċivili u s-settur privat biex jiġu
indirizzati l-isfidi ffaċċjati onlajn It-teknoloġija tal-komunikazzjoni moderna
toffri aċċess mingħajr preċedent għall-informazzjoni.
Ir-radikalizzaturi qed jieħdu vantaġġ minn dan billi jużaw
għodod onlajn biex jibgħatu l-messaġġi ta' mibegħda
tagħhom b'mod iktar effettiv minn qatt qabel. Barra minn hekk, l-utenti
tal-internet tal-lum jistgħu jaċċessaw materjal estremist
fil-privatezza tad-djar tagħhom. Barra minn hekk, individwi radikalizzati
jistgħu jikkomunikaw faċilment ma' nies f'riskju ta'
radikalizzazzjoni. Rivisti, bħall-Inspire tal-Al Qaida
fil-Peniżola Għarbija, li hija ppubblikata onlajn, juru stampa mhux
reali tal-ħajja bħala terrorist. Vidjos promozzjonali għal
gruppi bħal Al-Shabab huma faċli biex jinsabu. Anke vidjos
grafiċi li juru atti ta' terroriżmu jistgħu jinsabu fuq
pjattaformi tal-internet tradizzjonali popolari. Jista' jsir aktar sabiex tiġi pprevenuta din
il-propaganda perikoluża milli tipprolifera u tilħaq l-udjenza
destinatarja tagħha, u sabiex tittieħed azzjoni fuqha. L-Istati
Membri u l-fornituri tas-servizz jikkooperaw fuq bażi ad hoc biex
jitneħħa materjal illeċitu, iżda peress li ħafna
websajts estremisti huma bbażati barra l-UE din hija biċċa
xogħol diffiċli. Id-Direttiva dwar Servizzi tal-Midja
Awdjoviżivi diġà tobbliga l-awtoritajiet f'kull pajjiż tal-UE li
jiżguraw li s-servizzi awdjoviżivi ma jkollhomx l-ebda
inċitament għall-mibegħda bbażat fuq razza, sess,
reliġjon jew nazzjonalità. L-azzjonijiet kollha meħuda taħt din
id-Direttiva jridu jirrispettaw id-drittijiet fundamentali, inkluż
id-dritt għal-libertà tal-espressjoni. Il-ġlieda kontra l-propaganda estremista
tfisser iktar minn projbizzjoni jew tneħħija ta' kontenut illegali
biss. Irid jinfirex messaġġ pożittiv u ffokat bir-reqqa, u jrid
jinfirex 'il bogħod biżżejjed biex joffri lill-utenti vulnerabbli
tal-internet alternattiva aċċessibbli faċilment
għall-propaganda terrorista. Il-Kummissjoni tinsab lesta li toffri
appoġġ lill-Istati Membri, pajjiżi terzi, is-settur privat,
is-soċjetà ċivili, u l-individwi fl-isforzi tagħhom biex
jinħoloq counter-messaging onlajn u biex kontenut illegali jinżamm
mill-aċċess pubbliku. Sabiex jintlaħaq dan, il-Kummissjoni se
tieħu l-azzjonijiet li ġejjin: -
Twaqqaf
forum b'persuni prinċipali fl-industrija biex jiddiskutu l-kobor
tal-problema, il-passi li qed jieħdu l-partijiet interessati, u
l-opportunitajiet għal kooperazzjoni iktar mill-qrib. Il-parteċipanti
jiddiskutu firxa wiesgħa ta' kwistjonijiet, inklużi l-modi kif
il-pubbliku jsibha iktar faċli jimmarka materjal offensiv jew
potenzjalment illegali, biex jiġi promoss il-ħolqien ta'
kontronarrativi onlajn, u biex isiru disponibbli messaġġi
alternattivi aċċessibbli faċilment li jistimolaw ħsieb
kritiku. Dan il-forum ikollu laqgħat regolari ta' livell għoli u
tekniku, u jirrapporta dwar l-attivitajiet tiegħu; -
Tkompli
tinkoraġġixxi l-gruppi tal-komunità, iċ-ċittadini,
il-vittmi u l-eks estremisti biex jiżviluppaw kontronarrativi. Bħala
parti minn dan l-isforz il-Kummissjoni se tqabbad lill-RAN biex jiżviluppa
kontronarrativi onlajn mingħand eks terroristi u vittmi tat-terroriżmu.
L-għan huwa li tiġi prodotta varjetà ta' vidjos u messaġġi
onlajn li jolqtu n-nies f'riskju. L-ilħiq u l-impatt ta' dawn il-vidjos se
jiġi mkejjel, u għandu jiġi prodott rapport
għall-Kummissjoni u l-Istati Membri dwar il-kontronarrativi onlajn
effettivi. 2.7
L-għoti
tas-setgħa lill-vittmi biex jgħin fl-evitatar tar-radikalizzazzjoni Il-vittmi ta'
vjolenza estremista jsofru ħsara kbira u jkollhom bżonn ikunu
appoġġjati fl-irkupru tagħhom. Jekk jingħataw tip ta'
appoġġ tajjeb, jistgħu jagħżlu li jitkellmu kontra
l-estremiżmu vjolenti u t-terroriżmu. Preċiżament għax
is-sofferenza tagħhom hija daqshekk personali u diretta, huma xhieda
kredibbli għall-aħħar, u l-impatt tagħhom huwa akbar minn
dak li kwalunkwe organizzazzjoni statutorja tista' tispera li tilħaq.
Jistgħu jġibu lura d-dar il-konsegwenzi veri tat-terroriżmu u
l-estremiżmu vjolenti u jifformaw bilanċ iktar effettiv
għall-propaganda unilaterali tal-estremisti. Il-Kummissjoni
hija impenjata li tgħin il-vittmi tat-terroriżmu u l-vjolenza
estremista, u se: -
Tkompli
ssaħħaħ id-drittijiet tal-vittmi u tappoġġja l-gruppi
u n-netwerks, kemm ġewwa l-UE u lil hinn minnha; -
Tiffinanzja
proġetti li jippermettu l-vittmi jgħidu l-istejjer tagħhom, kemm
bħala parti mill-irkupru tagħhom u kemm bħala parti mill-isforz
biex jinħolqu kontronarrativi ġodda; -
Iżżid
l-għarfien pubbliku dwar is-sitwazzjoni tal-vittmi billi tikkommemora Jum
il-Vittmi fil-11 ta' Marzu kull sena, u billi twaqqaf wirjiet iddedikati
għall-istejjer tal-vittmi. 2.8
Jista'
jsir aktar biex iż-żgħażagħ jiġu
mħeġġa jaħsbu b'mod kritiku dwar il-messaġġi
estremisti In-nies
jiġu influwenzati l-aktar fl-adolexxenza u kmieni fil-ħajja adulta, u
ħafna mill-valuri u l-attitudnijiet li jiżviluppaw f'dan l-istadju
jibqgħu magħhom għall-maġġoranza ta' ħajjithom.
Għalhekk mhux sorprendenti, li dawk l-iktar f'riskju minn propaganda
radikali huma adolexxenti u adulti żgħażagħ. Fil-passat,
l-aċċess għal materjal estrem seta' jiġi kkontrollat
aħjar minn ġenituri, għalliema, u mexxejja tal-komunità.
Madankollu, b'teknoloġiji ġodda u l-firxa ta' dan il-materjal, dan
m'għadux il-każ. Iż-żgħażagħ
ħafna drabi jużaw l-internet waħedhom, meta ma jkun hemm
ħadd jikkritika l-materjal ħażin. Dan iżid il-periklu li
l-messaġġ jieħu l-ħajja u jwassal iż-żgħażagħ
għall-vjolenza. Iżda hekk kif iż-żgħażagħ
jistgħu jkunu esposti għal materjal dannuż onlajn, hekk ukoll
jistgħu jsibu kontronarrativi pożittivi. Hemm bżonn li
jittieħdu passi biex iż-żgħażagħ jiġu
nkuraġġuti ma jibqgħux passivi iżda jaħsbu b'mod
kritiku, biex jisfidaw l-opinjonijiet estremisti u jagħżlu fosthom.
L-RAN identifika djalogu interkulturali u skambji personali bejn
iż-żgħażagħ bħala metodu prinċipali biex
tinbena reżiljenza għall-propaganda estremista. Impenn ċiviku u
parteċipazzjoni fil-komunitajiet jgħinu wkoll fil-bini ta'
attitudnijiet pożittivi. L-RAN
għaraf li l-edukazzjoni, it-taħriġ, u s-setturi tax-xogħol
taż-żgħażagħ ħafna drabi jkunu fl-aħjar
pożizzjoni biex jgħinu ż-żgħażagħ
jiżviluppaw ħiliet ta' ħsieb kritiku. Sabiex jitkabbar l-impatt
tal-isforzi ta' kontra r-radikalizzazzjoni, dawk li jfasslu l-politika
tal-Istati Membri fl-oqsma tal-edukazzjoni, l-attivitajiet
għaż-żgħażagħ informali, u s-sigurtà jistgħu
jikkooperaw iktar mill-viċin biex jiġu żviluppati programmi
iktar effettivi. Sabiex
jintlaħaq dan, il-Kummissjoni se tieħu l-azzjonijiet li ġejjin: -
Tappoġġja
l-Istati Membri billi tidentifika u tqassam programmi ddisinjati biex jitrawmu
ħiliet ta' ħsieb kritiku. L-espożizzjoni ta' difetti fi
propaganda estremista u terrorista tinkoraġġixxi
ż-żgħażagħ jisfidaw l-opinjonijiet li din il-propaganda
tippreżenta. L-attività tal-Kummissjoni dwar il-litteriżmu medjatiku
ġewwa l-Programm Ewropa Kreattiva toffri l-Istati Membri u l-esperti modi
kif jiżviluppaw għodod effettivi f'dan il-qasam; -
Tuża
Erasmus+, il-programm ta' finanzjament tal-UE għal kooperazzjoni
fl-edukazzjoni, it-taħriġ, iż-żgħażagħ, u
l-isport biex toffri opportunitajiet sostanzjali fl-2014-2020
għall-mobilità tal-istudenti u l-għalliema u biex tappoġġja
sħubiji bejn partijiet interessati. Dan iżid il-livelli ta'
ħiliet, ikabbar il-kwalità tat-tgħalim, jimmodernizza l-edukazzjoni u
s-sistemi ta' taħriġ u fl-aħħar mill-aħħar
jgħin liż-żgħażagħ fl-iżvilupp
tar-reżiljenza tagħhom għal opinjonijiet estremisti; -
Tappoġġja
gruppi lokali u tal-komunità li jaħdmu ma' eks estremisti vjolenti u
mal-vittmi tal-vjolenza biex turi ż-żgħażagħ li hemm
naħa oħra tal-istorja. Il-Kummissjoni se tqabbad ukoll lill-RAN
bit-twaqqif ta' ġabra ta' prattikanti, vittmi tat-terroriżmu, u eks
terroristi għall-benefiċċju ta' skejjel interessati fl-indirizzar
ta' dawn il-kwistjonijiet b'mod iktar dettaljat. 2.9
Għandha
titwettaq iktar riċerka fix-xejriet tar-radikalizzazzjoni u l-evalwazzjoni
ta' prattiki eżistenti Ma nistgħux
niżviluppaw reazzjoni immirata tajjeb għal sfidi emerġenti ta'
estremiżmu vjolenti sakemm ma nifhmux x'imexxi l-proċess.
Riċerka mwettqa fuq livell ta' UE tista' żżid mal-valur meta
l-għan tagħha jkun li titraċċa u tanalizza xejriet
wiesgħin fir-radikalizzazzjoni. Il-Kummissjoni bħalissa qed
tiffinanzja riċerka fil-motivazzjonijiet ta' atturi solitarji u
għalfejn iduru għall-vjolenza, iċ-ċaqliq minn moderazzjoni
għal estremiżmu vjolenti, u l-ħolqien ta' gwida
għall-evalwazzjoni tal-impatt ta' programmi li jindirizzaw
r-radikalizzazzjoni. Hemm bżonn ta' iktar riċerka biex nifhmu kif u
għalfejn in-nies jirradikalizzaw jew jidderadikalizzaw. Din
ir-riċerka għandha tindirizza r-rwoli tal-ideoloġija, tekniki
ġodda ta' reklutaġġ fuq l-internet, u mudelli. Biex
tappoġġja iktar riċerka l-Kummissjoni se: -
Tuża
l-programm Orizzont 2020 biex tiffinanzja riċerka f'Soċjetajiet
Siguri, sforz kollaborattiv li jinkludi riċerka fir-radikalizzazzjoni u
r-reklutaġġ; -
Tuża
s-sorsi ta' fondi Reżilienza għad-Diżastri u Ġlieda kontra
l-Kriminalita u t-Terroriżmu (li fil-futur se jkun Fond għas-Sigurtà
Interna) biex tiġi ffinanzjata iktar riċerka dwar modi biex tiġi
indirizzata r-radikalizzazzjoni. -
Taħdem
ma' persuni li jfasslu l-politika nazzjonali, l-RAN, u r-riċerkaturi, biex
tiżgura li r-riċerka tibqa' mmirata. 2.10
Ħidma
iktar mill-qrib ma' pajjiżi msieħba biex tiġi evitata u
miġġielda r-radikalizzazzjoni kemm ġewwa u kemm barra l-UE Flimkien ma'
azzjonijiet meħuda internament, l-UE u l-Istati Membri tagħha
għandhom jippromwovu inizjattivi f'pajjiżi terzi, b'enfasi
partikolari fuq pajjiżi fraġli jew affettwati minn kunflitt,
pajjiżi fi tranżizzjoni jew dawk karatterizzati minn governanza
dgħajfa. Il-vulnerabbilità għar-radikalizzazzjoni ma tiqafx
fil-fruntieri tal-UE; huwa magħruf sew li l-proċess
tar-radikalizzazzjoni jiġri wkoll barra mill-Unjoni, f'kampijiet ta'
taħriġ tat-terroriżmu u f'żoni ta' kunflitt. Għalhekk,
flimkien ma' dawn il-miżuri interni, l-UE u l-Istati Membri tagħha
għandhom jinkoraġġixxu pajjiżi msieħba biex
jieħdu miżuri tagħhom stess. Peress
li hemm konnezzjoni ċara bejn dimensjonijiet interni u esterni,
il-Kummissjoni se taħdem iktar mill-viċin mar-Rappreżentant
Għoli u s-CTC biex tiżgura li l-aspetti interni u esterni
tar-reazzjoni Ewropew dwar il-Prevenzjoni tar-Radikalizzazzjoni huma allineati
sew. Dawn l-aspetti għandhom bżonn jindirizzaw il-prioritajiet
it-tajba u jkunu nformati sew minn analiżi tar-riskju meħuda jew
għodod ta' valutazzjoni tal-kunflitt oħrajn użati f'pajjiżi
terzi. Fl-istess ħin, trid tingħata attenzjoni speċjali
lid-dimensjonijiet transnazzjonali u transkontinentali tal-programmi u
l-proġetti li jindirizzaw ir-radikalizzazzjoni. Għal
dan l-għan, il-Kummissjoni u r-Rappreżentant Għoli se
jieħdu l-azzjonijiet li ġejjin: -
Iżidu l-isforzi ta' bini ta' kapaċità
esterni li jiffokaw fuq il-prevenzjoni u l-ġlieda kontra r-radikalizzazzjoni
u jkunu ċerti li dan ix-xogħol huwa integrat fil-pjanijiet ta'
azzjoni u fid-djalogi politiċi bejn l-UE u l-pajjiżi msieħba
tagħha. Xogħol estern imwettaq biex tiġi evitata
r-radikalizzazzjoni sar komponent dejjem iktar importanti tal-kooperazzjoni ta'
kontra t-terroriżmu tal-UE, u huwa ppjanat iktar investiment f'dan
il-qasam, speċjalment taħt l-Istrument għall-Istabbiltà. L-UE se
tappoġġja proġetti dwar il-Ġlieda Kontra l-Estremiżmu
Vjolenti (CVE) fil-Qarn tal-Afrika u fl-Asja tan-Nofsinhar. Huwa ppjanat
iffinanzjar addizzjonali għal dawn l-attivitajiet fl-Afrika tal-Punent.
L-UE timmira wkoll li tniedi proġetti permezz taċ-Ċentru
Internazzjonali ta' Eċċellenza għall-Ġlieda Kontra
l-Estremiżmu Vjolenti f'Abu Dhabi (iċ-Ċentru Hedaya) biex
tiżviluppa, fost affarijiet oħra, programmi ta' taħriġ
interni biex taqsam ħiliet speċifiċi għas-settur ma'
prattikanti f'kuntatt dirett f'pajjiżi msieħba; -
Tenfasizza r-rabtiet bejn programmi ta' edukazzjoni
u sigurtà ffinanzjati permezz ta' strumenti ta' assistenza esterni biex it-tfal
u ż-żgħażagħ f'pajjiżi terzi jiġu
mħeġġa jiżviluppaw ħsieb kritiku mill-istadji bikrija
tal-edukazzjoni tagħhom u għalhekk iżżommhom milli jsiru
vittmi tar-radikalizzazzjoni, il-vjolenza estremista jew it-terroriżmu; -
Tappoġġja l-midja bħala attur
prinċipali biex jissaħħaħ id-djalogu ma' organizzazzjoniet
tas-soċjetà ċivili, awtoritajiet lokali, atturi tas-settur privat,
akkademiċi, organizzazzjonijiet reġjonali jew internazzjonali
f'pajjiżi terzi fil-prevenzjoni u l-ġlieda kontra r-radikalizzazzjoni;
-
Tgħin fit-tiswir tal-Fond Globali
għall-Impenn u r-Reżilienza tal-Komunità riċentement imniedi
mill-Forum Globali Kontra t-Terroriżmu. Dan il-Fond jappoġġja
inizjattivi ta' kontra r-radikalizzazzjoni fuq livell lokali u jopera
parzjalment ma' riżorsi privati; -
Tinkorpora strateġiji biex tiġi evitata
r-radikalizzazzjoni u l-estremiżmu vjolenti f'għodod u strumenti ta'
kooperazzjoni ta' żvilupp tradizzjonali, partikolarment fi stati
fraġli bit-tendenza għal estremiżmu vjolenti; -
Tistabbilixxi netwerks esterni biex tippromwovi
strateġiji preventivi bejn delegazzjonijiet tal-UE u ambaxxati tal-Istati
Membri tal-UE f'reġjuni ta' priorità, u tiżgura li d-delegazzjonijiet
jistgħu jidentifikaw opportunitajiet biex jappoġġjaw impenn
tas-soċjetà ċivili u proġetti tas-CVE. Il-Kummissjoni u
r-Rappreżentant Għoli se jappoġġjaw ukoll delegazzjonijiet
tal-UE biex jistħarrġu attitudnijiet lejn l-UE u jivvalutaw kif
il-messaġġi tal-UE qed jiġu rċevuti f'pajjiżi ta'
priorità. 3. It-Triq ’il Quddiem Din
il-Komunikazzjoni identifikat azzjonijiet li l-Istati Membri u l-UE
jistgħu jieħdu biex jevitaw u jiġġieldu r-radikalizzazzjoni
b'mod iktar effettiv. Il-Kummissjoni, b'kollaborazzjoni mar-Rappreżentant
Għoli u bl-appoġġ tal-Koordinatur għal Kontra
t-Terroriżmu, toffri lill-Istati Membri għodod u appoġġ
għax-xogħol tagħhom. Din
il-Komunikazzjoni hija maħsuba wkoll biex iddaħħal
il-viżjonijiet tal-Kummissjoni għar-reviżjoni
tal-Istrateġija biex jiġu Miġġielda r-Radikalizzazzjoni u
r-Reklutaġġ għat Terroriżmu tal-UE, li għandha
tiġi mibdija fl-2014. Il-Kummissjoni,
b'ħidma mar-Rappreżentant Għoli u l-Koordinatur għal Kontra
t-Terroriżmu, se tippreżenta rapport dwar l-implimentazzjoni
tal-azzjonijiet differenti li jinsabu f'din il-Komunikazzjoni lejn
l-aħħar tal-2015. *** [1] http://ec.europa.eu/dgs/home-affairs/what-we-do/networks/radicalisation_awareness_network/index_en.htm.