RAPPORT TAL-KUMMISSJONI LILL-PARLAMENT EWROPEW U LILL-KUNSILL Evalwazzjoni tal-Qafas Ewropew tal-Kwalifiki (EQF) Implimentazzjoni tar-Rakkomandazzjoni tal-Parlament Ewropew u tal-Kunsill dwar l-Istabbiliment tal-Qafas Ewropew tal-Kwalifiki għal Tagħlim tul il-ħajja /* COM/2013/0897 final */
1.
Introduzzjoni Il-Qafas Ewropew
tal-Kwalifiki (QEK)[1] jippromwovi t-tagħlim
tul il-ħajja u jtejjeb il-mobbiltà, l-impjegabbiltà u l-integrazzjoni
soċjali tal-istudenti u tal-ħaddiema billi joħloq qafas Ewropew
ta’ referenza għas-sistema ta’ kwalifiki. Il-QEK jiffaċilita l-komparabbiltà
u r-rikonoxximent ta’ kwalifiki ta’ miljuni ta’ gradwati li qed ifittxu
opportunitajiet ta’ tagħlim ulterjuri jew li jidħlu fis-suq
tax-xogħol fl-Ewropa kull sena. Pereżempju, fl-2012, ir-Repubblika
Ċeka tat 900 tip ta’ kwalifika vokazzjonali lil kważi 150 000
student. Fl-istess sena, ingħataw madwar 69 000 tip ta’ kwalifika
rregolata lil madwar 16,8 miljun student fir-Renju Unit. Il-QEK jirrappreżenta
approċċ ġdid għall-kooperazzjoni Ewropea dwar il-kwalifiki.
Huwa jintroduċi tmien livelli ta’ referenza deskritti f’termini ta’
eżiti ta’ tagħlim, li jkopru l-forom u l-livelli kollha ta’
kwalifiki. Din l-attenzjoni fuq it-tagħlim tpoġġi lill-istudent fiċ-ċentru,
u hija importanti meta l-kwalifiki jiġu kkomparati u rikonoxxuti minn
pajjiżi differenti u minn kuntesti ta’ tagħlim differenti. Il-Kummissjoni ilha
żmien twil tenfasizza l-importanza li tiġi appoġġjata
l-komparabbiltà tal-ħiliet u tal-kwalifiki fl-UE kollha, speċjalment
fil-kuntest tal-livelli għoljin tal-qgħad tal-lum, peress li dan jagħmilha
eħfef biex l-istudenti u l-ħaddiema jiċċaqilqu bejn
il-pajjiżi u jimxu minn impjieg għal ieħor. Il-possibbiltà li
l-istudenti u l-ħaddiema jippreżentaw il-ħiliet u l-kwalifiki li
jkunu kisbu f’ambjenti ta’ tagħlim formali, informali u mhux formali, hija
partikolarment importanti fil-kuntest tal-inizjattivi ewlenin Ewropa 2020 “Żgħażagħ
Attivi”, l-“Aġenda għal Ħiliet u Impjiegi Ġodda” u
l-“Aġenda Diġitali”, kif ukoll il-Pakkett tal-Impjiegi “Lejn irkupru
li jwassal għall-ħolqien abbundanti ta’ impjiegi” u
r-rakkomandazzjoni tal-Kunsill dwar il-validazzjoni ta’ tagħlim mhux
formali u informali. Sabiex tappoġġja din il-ħidma u
tiżgura li l-ħiliet u l-kwalifiki jistgħu jiġu rikonoxxuti
faċilment bejn fruntiera u oħra, il-Kummissjoni ħabbret
l-intenzjoni tagħha li toħloq “Żona Ewropea
għall-Ħiliet u l-Kwalifiki” bħala parti mill-inizjattiva “Reviżjoni
tal-Edukazzjoni”[2] . Il-QEK qed jistimula
lill-gvernijiet nazzjonali biex jagħmlu r-rikonoxximent tal-kwalifiki
eħfef u iktar trasparenti: 36 pajjiż ipparteċipaw b’mod
volontarju fil-QEK (28 Stat Membru tal-UE, ħames pajjiżi kandidati u
l-Liechtenstein, in-Norveġja u l-Iżvizzera). Dan ir-rapport
jippreżenta l-esperjenza tal-QEK sa issa u jiddiskuti implikazzjonijiet possibbli
għall-futur. Huwa jiddiskuti jekk ir-rakkomandazzjoni fil-forma attwali tagħha
tistax tlaħħaq mal-isfidi ġodda kkawżati mit-tibdiliet
soċjoekonomiċi u teknoloġiċi mgħaġġla u jekk
hix trawwem tagħlim flessibbli. Din l-evalwazzjoni qed issir fi żmien
ta’ importanza partikolari, sabiex tindirizza l-qgħad għoli u
l-għadd dejjem jiżdied ta’ opportunitajiet ta’ tagħlim u
kwalifiki disponibbli. L-isfidi jinkludu n-numru dejjem jiżdied ta’
kwalifiki offruti minn fornituri privati, iktar kwalifiki internazzjonali, u l-fenomenu
riċenti ta' Korsijiet Onlajn Miftuħa Massivi (Massive Open Online
Courses (MOOCs)), li għandhom il-potenzjal li jilħqu ħafna
studenti. Din l-evalwazzjoni, flimkien mal-Europass u l-evalwazzjonijiet EQAVET
u r-rapport ta’ progress dwar l-assigurazzjoni tal-kwalità fl-edukazzjoni għolja,
se jgħinu biex jiġu identifikati l-isfidi għaż-Żona
Ewropea tal-Ħiliet u l-Kwalifiki u possibbilment anke punti fejn din
tista' titjieb. 2. Eżiti
u impatt 2.1. Il-karatteristiċi ewlenin tal-QEK L-elementi li ġejjin huma fil-qalba tal-QEK: •
Tmien livelli ta’ referenza
Ewropej definiti f’termini ta’
eżiti ta’ tagħlim u kapaċi jaqbdu t-tipi u l-livelli kollha ta’
kwalifiki madwar l-Ewropa. Livelli QEK 5, 6, 7 u 8 huma kompatibbli
mad-deskrizzjonijiet ta’ kwalifiki ta’ ċikli qosra u t-tliet ċikli
tal-Qafas għall-Kwalifiki taż-Żona Ewropea ta’ Edukazzjoni Għolja
(QF-EHEA);[3] •
Approċċ dwar
l-eżiti ta’ tagħlim. Id-deskritturi
tal-livell huma espressi f’termini ta’ għarfien, ħiliet u kompetenzi
u mhumiex marbuta ma’ elementi tal-kuntest tat-tagħlim, bħall-perjodu
ta’ żmien tat-tagħlim jew il-lokalità; •
Prinċipji komuni
għall-assigurazzjoni tal-kwalità fl-edukazzjoni għolja u l-edukazzjoni u
t-taħriġ vokazzjonali fil-kuntest tal-QEK. Twaqqaf Grupp Konsultattiv
(AG) għall-QEK u ġew stabbiliti Punti Nazzjonali ta’ Koordinazzjoni
fl-Istati Membri sabiex jimplimentaw il-QEK. Il-Grupp Konsultattiv jiżgura koerenza
kumplessiva u jippromwovi trasparenza tal-proċess ta’ sistemi ta’
kwalifiki relatati mal-QEK. Fir-rwol tiegħu li jappoġġja r-referenzjar
fl-2009 tal-QEK, il-Grupp Konsultattiv adotta għaxar kriterji u
proċeduri għar-referenzjar tal-livelli nazzjonali tal-kwalifiki mal-QEK[4]. Dawn għenu sabiex jiġi stabbilit approċċ komuni
għall-preżentazzjoni ta’ riżultati ta’ referenzjar
għall-partijiet ikkonċernati. Il-pajjiżi kollha jużaw dawn
il-kriterji biex jistrutturaw ir-rapporti nazzjonali ta’ referenzjar
tagħhom. Xi kriterji (b’mod partikolari l-kriterji 3 u 4) jistgħu
jiġu interpretati b’modi differenti u jeħtieġu kjarifikazzjoni
ulterjuri biex jiżguraw koerenza kumplessiva dwar il-proċess ta’
referenzjar. L-appoġġ
tal-NCPs u, flimkien ma’ awtoritajiet nazzjonali rilevanti oħrajn, jiggwidaw
ir-relazzjoni bejn is-sistemi nazzjonali ta’ kwalifiki u l-QEK u jippromwovu
l-kwalità u t-trasparenza ta’ dik ir-relazzjoni. 2.2. Inħaffu l-implimentazzjoni:
meħtieġ sens ġdid ta’ urġenza Ir-rakkomandazzjoni
tinkludi żewġ dati ta’ mira: •
2010: L-Istati Membri għandhom jirrelataw is-sistemi
nazzjonali ta’ kwalifiki tagħhom mal-QEK, b’mod partikolari billi jirreferenzjaw
il-livelli tal-kwalifiki tagħhom mal-QEK u, fejn neċessarju, jiżviluppaw
oqfsa nazzjonali ta’ kwalifiki (NQFs); •
2012: iċ-ċertifikati ta’ kwalifiki, id-diplomi
u d-dokumenti “Europass” kollha ġodda maħruġa mill-awtoritajiet
kompetenti għandhom jinkludu referenza ċara għal-livell tal-QEK
rilevanti. Il-pass importanti tal-2010 Sal-2010, erba’ Stati Membri rreferenzjaw
is-sistemi nazzjonali ta’ kwalifiki tagħhom. Fl-2008, tlieta minnhom
kellhom diġà stabbilit NQF. Sa Ġunju 2013, għoxrin Stat Membru ppreżentaw
ir-rapporti nazzjonali tagħhom dwar ir-referenzjar mal-QEK. Il-pajjiżi
li baqa’ (tmien Stati Membri, erba’ pajjiżi kandidati u n-Norveġja)
qed jippjanaw li jiffinalizzaw ir-referenzjar tagħhom fl-2013-14. Sal-aħħar tal-2010 || FR, IE, MT, UK 2011 || BE-vl, CZ, DK, EE, LT, LV, NL, PT 2012 || AT, DE, HR, LU 2013 || BG, IT, PL, SI Għar-referenzjar || Stati Membri: BE-fr, BE-de, EL, ES, FI, HU, KY, RO, SE, SK, Pajjiżi kandidati: IS, ME, MK, TK Pajjiż taż-ŻEE: NO Tabella
1 — Ħarsa
ġenerali tal-implimentazzjoni tal-ewwel pass importanti tar-Rakkomandazzjoni
tal-QEK, Settembru 2013 It-tabella turi li r-Rakkomandazzjoni
tiġġenera riformi – pereżempju, l-iżvilupp ta’ NQFs
komprensivi bbażati fuq eżiti ta’ tagħlim — li jirrikjedu impenn
politiku u tekniku sinifikanti minn diversi partijiet ikkonċernati. Tali
żviluppi jieħdu ż-żmien. Għaldaqstant, minkejja
l-impenn nazzjonali qawwi għall-QEK, id-dewmien fl-implimentazzjoni tiegħu
jsir viżibbli. Sabiex jiġi evitat dewmien ulterjuri, il-pajjiżi
kollha għandhom jiffinalizzaw il-proċessi ta’ referenzjar
tagħhom sal-aħħar tal-2014 u jimplimentaw ir-rakkomandazzjoni
iktar malajr. Il-Kummissjoni se ssaħħaħ il-monitoraġġ
tagħha tal-implimentazzjoni tal-QEK fil-livell nazzjonali, jekk
neċessarju permezz ta’ skambji bilaterali, sabiex tgħin
lill-pajjiżi individwali jegħlbu l-isfidi speċifiċi
tagħhom. Għandu jiġi nnutat li rapport ta’
referenzjar huwa stampa tas-sistema ta’ kwalifiki ta’ pajjiż, filwaqt li
r-referenzjar huwa proċess kontinwu ta’ riflessjoni dwar sistemi ta’
kwalifiki li jinbidlu. Għalhekk, il-pajjiżi għandhom regolarment
jirrevedu r-rapporti ta’ referenzjar tagħhom u jinfurmaw lill-Grupp
Konsultattiv dwar kull tibdil u dwar kif irrispondew għall-kummenti
tal-partijiet ikkonċernati. Il-Grupp Konsultattiv għandu jistabbilixxi
kriterji u proċeduri għas-segwitu ta’ żviluppi fis-sistemi
nazzjonali ta’ kwalifiki u l-impatt tagħhom fuq ir-referenzjar. Il-pass importanti tal-2012 It-tieni
pass importanti għandu l-benefiċċju li jġib il-QEK
direttament għand l-istudenti, il-ħaddiema, l-istituzzjonijiet
tal-edukazzjoni u tat-taħriġ u għal min iħaddem.
L-inklużjoni tal-livelli tal-QEK dwar il-kwalifiki u s-supplimenti huwa
pass kbir ’il quddiem lejn il-faċilitazzjoni ta’ tqabbil aħjar
tal-kwalifiki madwar il-fruntieri. In-nuqqas li jintlaħaq
il-pass importanti ta’ referenzjar ikkawża dewmien sinifikanti sabiex
jintlaħaq dan it-tieni pass importanti. Sal-2012, pajjiż wieħed
biss inkluda l-livelli tal-QEK fis-supplimenti Europass tiegħu.
Żewġ pajjiżi inkludew il-livelli tal-QEK fil-bażijiet tad-dejta
tal-kwalifiki tagħhom. Sa Settembru 2013, tliet pajjiżi
ħarġu kwalifiki li rreferenzjaw livell tal-QEK u ħames
pajjiżi bdew jinkludu livelli tal-QEK fis-supplimenti Europass
tagħhom. Sitt pajjiżi oħra qed jippjanaw li jibdew jagħmlu
dan fl-2013-2014. || L-aħħar tal-2012 || Sett. 2013 Livell tal-QEK inkluż f’ċertifikati u diplomi ġodda || || CZ, DK, LT Livell tal-QEK inkluż fis-supplimenti Europass– Suppliment tad-Diplomi (ds) u/jew Suppliment taċ- Ċertifikati (cs) || FR (cs) || CZ (cs), DK (ds), EE (ds), IE (ds) Livell tal-QEK inkluż fil-bażijiet tad-dejta nazzjonali tal-kwalifiki || FR, UK || CZ, DK, Tabella 2: Ħarsa ġenerali tal-implimentazzjoni tat-tieni pass
importanti tar-Rakkomandazzjoni għall-QEK Issa qed jagħfas iż-żmien biex
jintlaħaq it-tieni pass importanti. L-inklużjoni tal-livell tal-QEK u
d-deskrizzjoni ċara tal-eżiti tat-tagħlim akkwistati jagħtu
għodda qawwija lill-individwi biex jikkomunikaw aħjar il-livell u
l-varjetà tal-ħiliet u l-kwalifiki tagħhom. Dan huwa importanti speċjalment
fi żminijiet ta’ kriżi. Issa sar urġenti li jiżdied
ix-xogħol fuq livell nazzjonali sabiex jiġi żgurat li
sal-aħħar tal-2014, tal-inqas kwart tal-kwalifiki kollha
maħruġa fl-Ewropa jinkludu referenza għall-QEK. Il-pajjiżi jindirizzaw it-tieni pass
importanti b’modi differenti. Il-biċċa l-kbira tal-awtoritajiet
nazzjonali qed jikkunsidraw soluzzjonijiet tekniċi sabiex jintużaw
sistematikament fil-livell nazzjonali. Oħrajn iħallu f’idejn
l-istituzzjonijiet li joħorġu l-kwalifiki biex jiddeċiedu jekk u
kif jinkludu livelli QEK f’bażijiet ta’ dejta ta’ ċertifikati,
diplomi, supplimenti Europass u bażijiet ta’ dejta ta’ kwalifiki. B’mod
ġenerali, il-pajjiżi jaqblu li huwa meħtieġ
approċċ komuni tal-UE sabiex jiġi żgurat l-istess livell
ta’ trasparenza lill-istudenti u lill-ħaddiema kollha. Il-Grupp
Konsultattiv għandu jiżviluppa tali approċċ komuni. 2.3 Sistema koerenti L-istruttura ta’ tmien
livelli tal-QEK hija applikabbli għal sistemi nazzjonali ta’ kwalifiki u
għall-ħtiġijiet tal-partijiet ikkonċernati.
Il-biċċa l-kbira tal-pajjiżi għandhom jew inkella qed
jiżviluppaw NQFs li jkopru t-tipi u l-livelli kollha ta’ kwalifiki
fl-edukazzjoni formali u s-sistemi ta’ taħriġ. L-għadd ta’
livelli ta' NQF jiddependi fuq il-ħtiġijiet nazzjonali. Il-prinċipji u
l-arkitettura ġenerali tal-QEK – id-definizzjoni ta’ ‘kwalifika’ u
l-livelli bbażati fuq eżiti ta’ tagħlim – jagħmluha iktar
faċli li jiġu kkomparati l-kwalifiki. Madankollu, għandhom
jiġu kkunsidrati ftit kwistjonijiet sostanzjali għal titjib futur:
Filwaqt li l-QEK
għandu l-għan li jkun punt ta’ riferenza għall-kwalifiki
kollha fl-Ewropa irrispettivament minn liema korp ikun ħariġhom,
ħafna NQFs huma limitati għal kwalifiki mogħtija minn
istituzzjonijiet pubbliċi ta’ edukazzjoni u ta’ taħriġ.
Ftit NQFs biss ikopru kwalifiki mogħtija barra s-sistemi formali,
pereżempju fis-settur privat, li ħafna drabi huma importanti
għas-suq tax-xogħol. Sfida ewlenija hija li jiġi
żgurat li l-kwalifiki kollha fl-NQFs, inklużi dawk miksuba
permezz ta’ tagħlim mhux formali u informali, ikunu affidabbli u
jissodisfaw ir-rekwiżiti bażiċi tal-kwalità. Il-Grupp
Konsultattiv għandu jipprovdi gwida dwar kriterji komuni li
għandhom jiġu kkunsidrati għall-inklużjoni
tal-kwalifiki fl-NQFs.
Il-karatteristiki tal-QEK
attwali jistgħu ma jkunux adattati għal żviluppi
ġodda. Prattiki ġodda bħal tagħlim imħallat qed
jintużaw iktar ta’ spiss. L-MOOCs huma żvilupp riċenti
fl-edukazzjoni mill-bogħod, u jippermettu li jiġi organizzat
tagħlim madwar il-fruntieri u fiż-żoni kollha tal-ħin,
kull fejn hemm konnessjoni tal-internet.
Il-kwalifiki
saru jingħataw ukoll minn korpi internazzjonali u kumpaniji
multinazzjonali f’diversi pajjiżi fl-Ewropa u lil hinn. Xi pajjiżi
inkludewhom fl-NQFs tagħhom, iżda mhux dejjem bl-istess livell tal-QEK.
Dawn il-kwistjonijiet jitolbu li jkun hemm approċċ koerenti meta jsir
referenzjar mal-QEK mill-pajjiżi kollha sabiex tiġi evitata
l-konfużjoni għal min iħaddem u għad-detenturi
tal-kwalifiki.
Id-deskritturi
tal-livell tal-QEK għal ‘għarfien’ u ‘ħiliet’ jaqblu
mad-deskritturi nazzjonali. Madankollu, id-deskrittur tal-‘kompetenza’
huwa iktar problematiku peress li d-deskrittur inkluż
fl-Anness II mhux konsistenti għalkollox mad-definizzjoni ta’
‘kompetenza’ fl-Anness I. Id-deskrittur ta’ ‘kompetenza’ għandu
għaldaqstant jiġi kkjarifikat.
Il-prinċipji komuni dwar
l-assigurazzjoni tal-kwalità għenu pajjiżi li għaddejjin
minn proċess ta’ referenzjar. Għalkemm kienu intenzjonati li
jindirizzaw biss edukazzjoni vokazzjonali u taħriġ u kwalifiki
ta’ edukazzjoni għolja, ovvjament huma rilevanti għal kwalifiki
oħra wkoll. Il-potenzjal tagħhom li jipprovdu gwida għal-livelli
kollha u t-tipi kollha ta’ kwalifiki għandu jsir espliċitu.
Xi kwistjonijiet
oħra diskussi iktar fil-fond fil-livell Ewropew huma relatati mal-kwalifiki
fil-livell 2-3 tal-QEK – kwalifiki tat-tluq mill-edukazzjoni obbligatorja
u fil-livell 3-5 tal-QEK – li jinkludu kwalifiki meta student
jispiċċa mill-iskola obbligatorja u li jagħtu aċċess
għal edukazzjoni għolja u kwalifiki Master fis-snajja’.
Skont
il-Konvenzjoni ta’ Lisbona dwar ir-Rikonoxximent, il-kwalifiki li jkollu student
meta jispiċċa mill-edukazzjoni obbligatorja li jagħtu
aċċess għal edukazzjoni għolja, kumplessivament huma
ekwivalenti, u jagħtu aċċess għal edukazzjoni għolja
fl-Ewropa kollha u lil hinn. Il-fatt li dawn il-kwalifiki jiġu relatati
ma’ livelli tal-QEK differenti jissuġġerixxi differenza fil-livell
tal-eżiti tat-tagħlim miksuba, li tista’ tippreżenta ostakli
għall-mobbiltà ta’ dawk l-istudenti li jispiċċaw l-iskola
obbligatorja li jixtiequ jkollhom aċċess għal edukazzjoni
għolja f’pajjiż ieħor. F’xi każijiet,
kwalifiki nazzjonali bl-istess isem/titlu jvarjaw fil-kontenut u fil-kumplessità.
F’każijiet oħra, il-pajjiżi għandhom interpretazzjonijiet
differenti dwar kif l-eżiti tat-tagħlim jidħlu l-aħjar
f’livell tal-QEK. Dawn id-differenzi, anke jekk leġittimi, mhumiex se
jinftiehmu minn persuni li għalihom it-titlu tal-kwalifika jibqa’ simili u
għaldaqstant għandu jippreżenta kwalifika simili. L-iskambjar
ta’ informazzjoni u l-ħruġ ta’ gwida fil-livell Ewropew għandu
jkompli jkollu l-għan li jagħmel id-deċiżjonijiet ta’
referenzjar miftiehma u fdati.
Id-disinn tal-QEK huwa kompatibbli b’mod
sħiħ mal-QF-EHEA. Qed tiġi żgurata koerenza
fl-implimentazzjoni, b’mod partikolari minħabba li l-Kunsill tal-Ewropa
(CoE) jipparteċipa f’laqgħat tal-Grupp Konsultattiv u tal-NCP u
l-Kummissjoni tattendi laqgħat QF-EHEA. Din il-koerenza
għamlitha possibbli għall-biċċa l-kbira
tal-pajjiżi li jwettqu r-referenzjar tal-QEK tagħhom u
l-awtoċertifikazzjoni tal-QF-EHEA fi proċess uniku, u li
jippreżentaw rapport uniku li jindirizza l-kriterji
taż-żewġ proċessi. Diversi pajjiżi li
pparteċipaw f’Bologna li mhumiex QEK, żviluppaw ukoll NQFs
tat-tagħlim tul il-ħajja bbażati fuq l-eżiti
tat-tagħlim. Ikun utli li jiġu evalwati l-opinjonijiet
tal-pajjiżi dwar il-valur miżjud ta’ żewġ oqfsa ġenerali
Ewropej ta’ kwalifiki.
2.4 Il-QEK bħala
għodda ċentrali għar-rikonoxximent tal-kwalifiki u
għall-iżgurar tat-trasparenza Il-QEK jirrelata mal-livelli u t-tipi kollha ta’
kwalifiki. Il-koerenza bejn il-QEK u politiki u għodod Ewropej oħra[5] li għandhom l-għan li jtejbu t-trasparenza tal-ħiliet u
kwalifiki (bħal pereżempju QF-EHEA, Europass, ECTS, ECVET, id-Direttiva 2005/36,
ESCO, validazzjoni ta’ tagħlim informali u mhux formali) kif ukoll oqfsa u
prinċipji li jiżguraw il-kwalità (EQAVET u ESG) hija fundamentali
għall-effettività u l-impatt tagħhom. Dawn kollha jiffaċilitaw
il-moviment ħieles tal-persuni u jippromwovu tagħlim tul il-ħajja,
u xi wħud jaqsmu l-approċċ tal-eżiti tat-tagħlim. Il-QEK u s-sistemi Ewropej għat-trasferiment
u l-akkumulazzjoni tal-krediti, jiġifieri l-ECTS u l-ECVET, huma koerenti
fil-prinċipji sottostanti tagħhom, iżda għadhom mhux
allinjati għalkollox fl-implimentazzjoni prattika tagħhom. L-ECTS jintuża
f’madwar 75 % tal-korsijiet ta’ edukazzjoni ogħla. Filwaqt li
l-biċċa l-kbira tal-programmi issa huma deskritti f’termini ta’
eżiti ta’ tagħlim intenzjonati, l-isfida hija li jiġu
estiżi l-eżiti tat-tagħlim għad-disinn u l-valutazzjoni
tal-programm. Ir-reviżjoni li għaddejja tal-gwida tal-ECTS se
tipprovdi gwida Ewropea addizzjonali. L-ECVET hija bbażata b’mod
sħiħ fuq eżiti tat-tagħlim, iżda għadha fi stadju
iktar bikri ta’ implimentazzjoni. Il-prinċipji komuni tal-QEK dwar
l-assigurazzjoni tal-kwalità huma b’mod ġenerali kompatibbli
mal-istandards u l-linji gwida Ewropej (European standards and guidelines (ESG))
u mal-EQAVET. Madankollu, il-prinċipji tat-tliet għodod kollha
jirreferu għall-assigurazzjoni tal-kwalità fl-edukazzjoni u
t-taħriġ b’mod ġenerali biss, u ma jipprovdux gwida
speċifika għall-iżgurar tal-kwalità tal-approċċ
tal-eżiti tat-tagħlim, il-kwalifi u l-oqfsa tal-kwalifiki. L-evalwazzjonijiet
li għaddejjin tal-QEK, l-EQAVET u r-reviżjoni tal-ESG għandhom
jintużaw sabiex jiġi identifikat fejn jistgħu jintlaħqu
sinerġiji oħra bejn l-oqfsa ta’ kwalifiki Ewropej u arranġamenti
tal-assigurazzjoni tal-kwalità. Il-QEK huwa konsistenti mal-Konvenzjoni ta’
Lisbona dwar ir-Rikonoxximent (LRC),[6] li tiffaċilita r-rikonoxximent ta’ kwalifiki fi u
l-aċċess għall-edukazzjoni għolja fl-Ewropa. It-test
sussidjarju tal-LRC dwar l-użu ta’ oqfsa ta’ kwalifiki fir-rikonoxximent
ta’ kwalifiki barranin, adottat f’Ġunju 2013 jinkoraġġixxi
rabtiet iktar mill-qrib bejn l-oqfsa tal-kwalifiki u r-rikonoxximent
tal-kwalifiki għall-finijiet ta’ tagħlim ulterjuri. Madankollu,
il-prattiki tar-rikonoxximent fil-livell istituzzjonali rarament jikkunsidraw
l-oqfsa tal-kwalifiki u ż-żieda fit-trasparenza miġjuba
mill-oqfsa Ewropej. Teżisti inqas koerenza mad-Direttiva dwar
ir-rikonoxximent ta’ kwalifiki professjonali. Id-direttiva taħdem
b’ħames livelli u kriterji ta’ input bħall-perjodu ta’ żmien
għar-rikonoxximent tal-kwalifiki fis-suq tax-xogħol, filwaqt li l-QEK
għandu tmien livelli bbażati fuq l-eżiti tat-tagħlim. Dan
ikkawża inċertezza fost il-partijiet ikkonċernati.
Għaldaqstant, id-direttiva l-ġdida[7] tipprevedi sinerġiji mal-QEK. Hija żżomm is-sistema ta’
ħames livelli ta’ inputs, iżda tagħmel possibbli l-istabbiliment
ta’ ‘oqfsa komuni ta’ taħriġ’ li jippermettu lill-pajjiżi biex
jaqblu dwar livelli minimi ta’ għarfien, ħiliet u kompetenzi marbuta
mal-livelli tal-QEK. Abbażi ta’ dan, il-pajjiżi awtomatikament se
jkunu jistgħu jirrikonoxxu kwalifiki professjonali. Ir-rakkomandazzjoni tipprevedi rabta mill-qrib
mal-Europass. Is-supplimenti Europass għandhom jirreferu għal-livell tal-QEK
korrispondenti, iżda dan rarament jiġri minħabba
l-implimentazzjoni limitata tat-tieni pass importanti tal-QEK. Fl-aħħar nett, jeżistu rabtiet
mill-qrib bejn l-iżvilupp tal-Klassifikazzjoni Ewropea tal-Ħiliet,
Kompetenzi, Kwalifiki u Okkupazzjonijiet multilingwi (European multilingual
Skills, Competences, Qualifications and Occupations classification (ESCO)) u l-QEK.
Il-kwalifiki li huma relatati mal-QEK se jkunu inklużi indirettament
fl-ESCO. Dan se jsir permezz tal-portal tal-QEK, li se jorbot flimkien
il-bażijiet tad-dejta nazzjonali dwar il-kwalifiki. Il-kwalifiki internazzjonali
li mhumiex inklużi fl-NQFs se jiġu inklużi direttament fl-ESCO.
L-approċċ tal-eżiti tat-tagħlim użat fil-QEK u l-ESCO
għandu jiġi kkoordinat. 2.5 Governanza Il-QEK huwa rregolat mill-Grupp Konsultattiv u
l-NCPs (taqsima 2.1). Il-Grupp Konsultattiv huwa kompost minn rappreżentanti ta’: ·
36 pajjiż (28 Stat Membru, ħames
pajjiżi kandidati, il-Liechtenstein, in-Norveġja u l-Iżvizzera);
·
L-imsieħba soċjali Ewropej (ETUC,
BusinessEurope, UAEPME, CEEP); ·
L-organizzazzjonijiet umbrella Ewropej li
jagħtu l-kwalifiki (Eurochambres, EUCIS-LLL, EUA); kif ukoll ·
partijiet ikkonċernati oħra (servizzi
Pubbliċi tal-Impjiegi, l-Unjoni Ewropea tal-Istudenti, iċ-Ċentru
Ewropew tal-Voluntiera, il-Forum Ewropew taż-Żgħażagħ).
Il-Kunsill tal-Unjoni Ewropea (CoE)
jipparteċipa fil-Grupp Konsultattiv sabiex tiġi żgurata koerenza
bejn il-QEK u l-QF-EHEA. Is-Cedefop u l-Fondazzjoni Ewropea
tat-taħriġ jappoġġjaw il-Grupp Konsultattiv. Il-Grupp Konsultattiv jipprovdi gwida effettiva
għall-proċessi nazzjonali ta’ referenzjar u jibni fiduċja u
ftehim fost il-pajjiżi parteċipanti. Il-mandat tiegħu ġie
estiż fl-2012 sabiex jimmonitorja l-implimentazzjoni tar-rakkomandazzjoni
tal-Kunsill dwar il-validazzjoni ta’ tagħlim mhux formali u informali[8]. Dan għandu l-għan li jsaħħaħ iktar
ir-rabtiet bejn l-oqfsa tal-kwalifiki u l-arranġamenti ta’ validazzjoni,
li għadhom iridu jiġu żviluppati f’ħafna pajjiżi. L-NCPs ġew
stabbiliti f’36 pajjiż. Huma
jinsabu f’diversi stabbilimenti istituzzjonali, inklużi ministeri,
aġenziji nazzjonali, awtoritajiet nazzjonali tal-kwalifiki,
istituzzjonijiet edukattivi tar-riċerka u ċentri edukattivi
tal-informazzjoni. L-effettività tagħhom b’mod ġenerali tiddependi fuq kemm huma marbuta
mill-qrib mal-governanza nazzjonali tal-proċess tal-NQF/QEK.
L-NCPs jiffukaw
il-biċċa l-kbira tal-attivitajiet tagħhom fuq il-komunikazzjoni
mal-partijiet ikkonċernati, iżda huma jsibuha bħala sfida li
jikkomunikaw mal-imsieħba
soċjali għandhom nuqqas fil-kompetenza tal-komunikazzjoni mal-pubbliku iktar wiesa’.
L-awtoritajiet nazzjonali għandhom jivvalutaw kif l-NCPs jistgħu
jikkomunikaw aħjar ma’ varjetà ta’ partijiet ikkonċernati u kif
jistabbilixxu strateġiji ta’ komunikazzjoni. Għalkemm fl-aħħar tliet snin l-NCPs
użaw biss madwar 75 % tal-baġit disponibbli tagħhom
minħabba diffikultajiet organizzazzjonali inizjali u tibdil fl-iskedi ta’
referenzjar, l-attivitajiet tagħhom kienu kkunsidrati kruċjali
għall-implimentazzjoni tal-QEK fil-livell nazzjonali. Il-portal tal-QEK jikkomunika dwar l-QEK u
r-riżultati tal-proċessi nazzjonali ta’ referenzjar. Huwa jippermetti
li jiġu kkomparati livelli nazzjonali ta’ kwalifiki mal-QEK u li ssir
riċerka dwar il-kwalifiki. Il-funzjoni ta’ tqabbil turi informazzjoni dwar
disgħa minn għoxrin pajjiż li rreferenzjaw. Ir-riċerka dwar
il-kwalifiki individwali se tkun possibbli biss fl-aħħar tal-2013.
Teżisti sfida sinifikanti minħabba li l-bażijiet tad-dejta
nazzjonali tal-kwalifiki għadhom ma jeżistux fil-pajjiżi kollha
u li dawk eżistenti ma jkoprux il-kwalifiki kollha fl-NQFs. Il-portal jeħtieġ
maġġoranza kritika ta’ pajjiżi li jipparteċipaw sabiex
il-potenzjal tiegħu jkun jista’ jiġi sfruttat b’mod sħiħ. 2.6 Impatt u sostenibbiltà Għalkemm ma teżistix statistika dwar
l-impatt tal-QEK fuq it-tagħlim tul il-ħajja u l-mobbiltà u
l-implimentazzjoni tagħha fi stadju bikri, it-trasferiment lejn
l-approċċ tal-eżiti tat-tagħlim huwa suċċess
kbir. Huwa witta t-triq għal modi iktar flessibbli ta’ tagħlim u
l-validazzjoni ta’ tagħlim mhux formali u informali. Il-QEK kellu impatt fuq iktar minn 36 pajjiż
parteċipant. Diversi pajjiżi msieħba tal-UE adottaw
kunċetti tal-QEK għall-iżviluppi nazzjonali u reġjonali
tagħhom stess u pajjiżi minn reġjuni oħra tad-dinja qed
ifittxu li jiddjalogaw mal-QEK. Minħabba l-livell ta’ impenn politiku
għall-QEK, l-għodda komuni ta’ referenza se tkun sostenibbli
mingħajr appoġġ finanzjarju Ewropew, iżda partijiet
ikkonċernati jqisu li l-koordinazzjoni qawwija fil-livell tal-UE hija
fundamentali għall-implimentazzjoni koerenti u trasparenti. 3. Konklużjonijiet Is-sejbiet jikkonfermaw li
l-QEK b’mod ġenerali huwa aċċettat bħala punt ta’ referenza
għall-iżvilupp ta’ oqfsa ta’ kwalifiki, li jimplimenta
l-approċċ tal-eżiti tat-tagħlim u li jsaħħaħ
it-trasparenza u r-rikonoxximent tal-ħiliet u l-kompetenzi. Jista’ jkun
ċentrali f’Żona Ewropea ta’ Ħiliet u Kwalifiki fil-futur. Madankollu, id-dewmien
fl-implimentazzjoni ħoloq sens ta’ urġenza. L-UE għandha
tagħmilha possibbli għall-istudenti u l-ħaddiema li jagħmlu
l-ħiliet tagħhom iktar viżibbli irrispettivament minn fejn kisbuhom.
Għandha tagħmel l-QEK operazzjonali għalkollox malajr kemm
jista’ jkun. Abbażi tar-riżultati tal-evalwazzjoni,
il-Kummissjoni tissuġġerixxi li jiġu kkunsidrati l-miżuri
li ġejjin sabiex tissaħħaħ ir-rilevanza, l-effettività u
l-impatt tal-QEK: Jitħaffef
ir-referenzjar tal-QEK u jiġu żviluppati oqfsa nazzjonali
tal-kwalifiki Il-pajjiżi kollha
għandhom jiżviluppaw NQFs b’saħħithom li jinftiehmu u
jintużaw mill-partijiet ikkonċernati. Għandhom jibnu fuq
konsultazzjonijiet nazzjonali, jistabbilixxu kunsens ġenerali dwar kif
livelli nazzjonali ta’ kwalifiki jirrelataw mal-QEK u jaħdmu sabiex jiffinalizzaw
l-ewwel rapport ta’ referenzjar tagħhom sal-2014. Jissaħħu
r-rwol u l-impatt tal-oqfsa tal-kwalifiki abbażi tal-eżiti
tat-tagħlim fil-livelli nazzjonali u Ewropej Il-gvernijiet għandhom
jimpenjaw ruħhom li jużaw l-approċċ tal-eżiti
tat-tagħlim fis-subsistemi tal-edukazzjoni u t-taħriġ kollha,
billi jimplimentaw NQFs komprensivi li jinkludu kwalifiki mogħtija kemm fi
ħdan is-sistemi tradizzjonali ta’ edukazzjoni u taħriġ formali
kif ukoll barra minn dawn is-sistemi. L-NQFs għandhom jiġu integrati fil-prattiki
kumplessivi tal-edukazzjoni, u t-taħriġ formali. Fil-livell Ewropew,
id-deskrittur tal-‘kompetenza’ fl-Annessi I u II għar-rakkomandazzjoni
għandu jiġi kjarifikat. Jissaħħaħ ir-referenzjar trasparenti u koerenti tal-QEK,
b’kunsiderazzjoni għan-natura li qed tinbidel tas-sistemi ta’ kwalifikazzjoni
Ir-referenzjar għandu jidher bħala proċess kontinwu, u ma
għandux ikun limitat għall-preżentazzjoni ta’ rapport ta’
referenzjar wieħed. Il-Grupp Konsultattiv għandu jipprovdi gwida dwar
il-kriterji 3 u 4 u jiżviluppa strateġija komprensiva
għas-segwitu ta’ rapporti ta’ referenzjar fil-futur. Dan għandu
jinkludi monitoraġġ imsaħħaħ ta’ kif il-pajjiżi
jikkunsidraw il-kummenti tal-Grupp Konsultattiv dwar rapporti nazzjonali ta’ referenzjar
u kif jiġu indirizzati inkonsistenzi ta’ referenzjar bejn il-pajjiżi.
Il-Grupp Konsultattiv għandu jappoġġja wkoll komunikazzjoni fost
il-partijiet ikkonċernati dwar kwistjonijiet ta’ referenzjar li huma ta’
sfida. Tissaħħaħ
ir-rabta bejn l-assigurazzjoni Ewropea tal-kwalità u l-oqfsa tal-kwalifiki Il-prinċipji
komuni tal-QEK dwar l-assigurazzjoni tal-kwalità, l-EQAVET u l-ESG, għandhom
isiru iktar koerenti u għandhom jappoġġjaw l-approċċ
tal-eżiti tat-tagħlim, bil-għan li jiġu żviluppati
prinċipji koerenti ta’ assigurazzjoni tal-kwalità għat-tagħlim
tul il-ħajja. Apparti minn fiduċja ikbar fil-kwalifiki, fl-oqfsa
tal-kwalifiki u fir-referenzjar għall-QEK, dan jista’ jwassal ukoll
għal iktar fiduċja u permeabbiltà aħjar bejn is-subsistemi
tal-edukazzjoni u t-taħriġ. Titjieb
il-komunikazzjoni dwar il-QEK, sabiex l-istudenti, il-ħaddiema u partijiet
ikkonċernati oħra jintlaħqu aħjar u jiġu infurmati
dwar il-benefiċċji tal-QEK Wara li
jirreferenzjaw il-kwalifiki tagħhom mal-QEK, il-pajjiżi għandhom
jiżguraw li ċ-ċertifikati, id-diplomi u s-supplimenti Europass
ġodda kollha jinkludu riferenza għal-livell tal-QEK rilevanti.
Il-pajjiżi għandhom iwaqqfu bażijiet tad-dejta/reġistri
nazzjonali u dawn ikollhom ħolqa mal-portal tal-QEK. Il-portal tal-QEK
għandu jkollu ħolqa mal-portal Ewropew dwar l-opportunitajiet
tat-tagħlim (Ploteus) u l-ESCO. Il-Kummissjoni se tesplora kif l-għodod
tal-internet jistgħu jintużaw biex joffru servizzi relatati
mal-ħiliet lill-istudenti, il-ħaddiema u partijiet ikkonċernati
oħra sabiex jiġu appoġġjati l-mobbiltà, it-tagħlim tul
il-ħajja, u l-impjegabbiltà. Isir użu aħjar tal-QEK f’politiki u għodod
għall-mobbiltà u t-tagħlim tul il-ħajja Il-QEK
jista’ jkun il-qofol li miegħu jirrelataw politiki u għodod Ewropej
oħra, bħat-trasferiment tal-krediti u r-rikonoxximent. L-oqfsa
tal-kwalifiki u s-sistemi tal-krediti bbażati fuq l-eżiti
tat-tagħlim jiffaċilitaw modi iktar flessibbli ta’ tagħlim
individwali f’istituzzjonijiet, setturi u pajjiżi differenti.
Il-Kummissjoni, l-Istati Membri u l-partijiet ikkonċernati għandhom
isaħħu u jispjegaw ir-rabtiet bejn il-QEK u s-sistemi Ewropej
tat-trasferiment u ta’ akkumulazzjoni tal-krediti. Il-pajjiżi
għandhom jużaw iktar il-QEK bħala sors addizzjonali
tal-informazzjoni għall-awtoritajiet kompetenti biex jeżaminaw ir-rikonoxximent
ta’ kwalifiki maħruġa fi Stati Membri oħra fil-kuntest
tad-Direttiva dwar ir-Rikonoxximent ta’ Kwalifiki Professjonali u
fil-pajjiżi ET2020 fil-kuntest tal-Konvenzjoni ta’ Lisbona dwar
ir-Rikonoxximent. Jiġi kkjarifikat
ir-rwol tal-QEK b’relazzjoni mal-kwalifiki internazzjonali u mal-pajjiżi u
r-reġjuni barra mill-Ewropa Il-QEK
qed jintuża dejjem iktar bħala punt ta’ referenza għall-komparabbiltà
tal-kwalifiki. Il-proċess ta’ referenzjar eżistenti u l-kriterji
tiegħu għandu jiżgura li l-QEK ikopri t-tipi kollha ta’
kwalifiki, inklużi l-kwalifiki internazzjonali. Għandhom ikomplu
jiġu esplorati modi kif il-QEK jista’ jappoġġja l-komparabbiltà
u r-rikonoxximent tal-kwalifiki miksuba barra mill-Ewropa. Il-QEK jiġi żviluppat sabiex isir adattat aħjar
għall-iżviluppi attwali fit-tagħlim onlajn u l-kwalifiki
internazzjonali Il-QEK għandu jkopri kwalifiki internazzjonali u
kwalifiki li jinkludu moduli kompluti f’pajjiżi differenti jew li
jitħalltu wiċċ imb wiċċ u t-tagħlim onlajn. Il-QEK
jista’ jsir biss qafas verament komprensiv jekk jadatta għal dawn
l-iżviluppi ġodda u jibqa’ kapaċi jżomm mat-tibdil
fil-provvediment tal-edukazzjoni u t-taħriġ. Il-Komunikazzjoni 'Reviżjoni tal-Edukazzjoni' enfasizzat ir-rwol tal-edukazzjoni
fit-tkabbir ekonomiku, il-kompetittività u l-impjieg. Waħda mill-proposti
tagħha tikkonċerna t-twettiq ta’ xogħol esploratorju dwar
sinerġiji ulterjuri bejn għodod tal-UE għat-trasparenza u
r-rikonoxximent ta’ ħiliet u kwalifiki. Dan għandu jkun indirizzat
lejn il-bini ta’ Żona Ewropea ta’ Ħiliet u Kwalifiki li fiha
kulħadd jista’ jiċċaqlaq b’mod ħieles u jkollu l-kompetenzi
u l-kwalifiki tiegħu/tagħha rikonoxxuti malajr għal tagħlim
ulterjuri u jkunu jinftiehmu b’mod adegwat minn min iħaddem. Il-Kummissjoni se
tiddiskuti l-konklużjonijiet ippreżentati f’dan ir-rapport
mal-partijiet ikkonċernati rilevanti anke matul dibattitu pubbliku dwar
iż-Żona Ewropea tal-Ħiliet u l-Kwalifiki fix-xitwa 2013/2014.
Abbażi tal-konklużjonijiet ta’ dan id-dibattitu u l-valutazzjoni
tal-Impatt, il-Kummissjoni tista’ tikkunsidra li tipproponi reviżjoni
tal-bażi ġuridika attwali tal-QEK — (2008/C 111/01)
Rakkomandazzjoni tal-Parlament Ewropew u tal-Kunsill tat-23 ta’ April 2008. [1] http://ec.europa.eu/education/lifelong-learning-policy/eqf_en.htm. [2] COM(2012) 669 finali. [3] http://www.ehea.info/Uploads/qualification/QF-EHEA-May2005.pdf. [4] http://ec.europa.eu/eqf/documentation_en.htm
[5] http://ec.europa.eu/education/lifelong-learning-policy/mobility_en.htm. [6] ETS 165 —
Recognition Qualifications 1997 Higher Education in the European Region, 11.IV.1997. [7] http://eur-lex.europa.eu/LexUriServ/LexUriServ.do?uri=CELEX:52011PC0883:MT:NOT
[8] http://eur-lex.europa.eu/LexUriServ/LexUriServ.do?uri=OJ:C:2012:398:0001:0005:MT:PDF