RAPPORT TAL-KUMMISSJONI LILL-PARLAMENT EWROPEW U LILL-KUNSILL Rapport dwar l-implimentazzjoni tad-Direttiva 2004/42/KE tal-Parlament Ewropew u tal-Kunsill dwar il-limitazzjoni ta’ emissjonijiet ta’ komposti organiċi volatili minħabba l-użu ta’ solventi organiċi f’ċertu żebgħa u lostri u prodotti ta’ lostru mill-ġdid ta’ vetturi u li temenda d-Direttiva 1999/13/KE /* COM/2013/0704 final */
RAPPORT TAL-KUMMISSJONI LILL-PARLAMENT
EWROPEW U LILL-KUNSILL Rapport dwar l-implimentazzjoni tad-Direttiva 2004/42/KE
tal-Parlament Ewropew u tal-Kunsill dwar il-limitazzjoni ta’ emissjonijiet ta’
komposti organiċi volatili minħabba l-użu ta’ solventi organiċi f’ċertu żebgħa
u lostri u prodotti ta’ lostru mill-ġdid ta’ vetturi u li temenda d-Direttiva 1999/13/KE 1. Introduzzjoni Id-Direttiva 2004/42/KE tal-Parlament Ewropew
u tal-Kunsill ("id-Direttiva dwar iż-Żebgħa") tillimita
l-emissjonijiet tal-komposti organiċi volatili ("KOV") minħabba l-użu
ta' solventi organiċi f'ċerta żebgħa, lostri u prodotti ta’ lostru mill-ġdid
ta’ vetturi. Id-Direttiva dwar iż-Żebgħa timmira li tevita jew
tnaqqas it-tniġġis tal-arja li jirriżulta mill-kontribuzzjoni tal-KOVs
għall-formazzjoni tal-ożonu fil-livell tal-art[1]
u tal-materja partikulata sekondarja. Din tikkumplimenta miżuri li jridu
jittieħdu fil-livell nazzjonali sabiex tiġi żgurata l-konformità mal-limiti
tal-emissjonijiet tal-KOV kif stabbiliti fid-Direttiva 2001/81/KE dwar
il-livelli nazzjonali massimi tal-emissjonijiet ta' ċerti inkwinanti
atmosferiċi (“id-Direttiva dwar in-NEC”). Il-prodotti koperti bid-Direttiva
dwar iż-Żebgħa huma ż-żebgħa u l-lostri applikati fuq il-bini, it-tiżjin u
t-tagħmir tagħhom, u fuq strutturi assoċjati għal skopijiet dekorattivi,
funzjonali u prottetivi, kif ukoll il-prodotti ta’ lostru mill-ġdid tal-vetturi[2]. Skont id-Direttiva dwar iż-Żebgħa, il-kontenut
tal-KOV fil-prodotti li jaqgħu fil-kamp ta' applikazzjoni tagħha u li jitqiegħdu
fis-suq wara l-1 ta’ Jannar 2007 ma jistax jaqbeż il-valuri ta’
limitu stabbiliti fl-Anness II tagħha.
Mill-1 ta’ Jannar 2010, bdew japplikaw valuri tal-limitu tal-KOV
iżjed stretti għaż-żebgħa u l-lostri (il-Fażi II). Barra minn hekk, skont
id-Direttiva dwar iż-Żebgħa, it-tikketti tal-prodotti jridu jindikaw
il-kontenut tal-KOV tal-prodotti u b’hekk jgħinu lill-konsumatur jagħmel
għażliet infurmati. L-Istati Membri għandhom jistabbilixxu programm ta’
monitoraġġ biex tiġi vverifikata l-konformità mal-limiti tal-KOV u
mar-rekwiżiti tat-tikkettar, u għandhom jibagħtu rappori b’mod regolari
lill-Kummissjoni dwar ir-riżultati ta’ dan il-monitoraġġ. Dan huwa t-tieni rapport tal-Kummissjoni
lill-Parlament Ewropew u lill-Kunsill li jagħti ħarsa ġenerali lejn
l-implimentazzjoni tad-Direttiva dwar iż-Żebgħa mill-Istati Membri. L-ewwel
rapport[3]
ġie adottat fl-2011. L-analiżi li għaddejja bħalissa tal-Istrateġija Tematika
dwar it-Tniġġis tal-Arja (TSAP)[4]
tinkludi valutazzjoni sħiħa tas-sorsi tal-emissjonijiet tal-KOV u tal-miżuri
kosteffikaċi possibbli ta' tnaqqis. Għalhekk, ma saret l-ebda analiżi separata
tad-Direttiva dwar iż-Żebgħa. Bħala azzjoni supplimentari fuq livell Ewropew,
ta’ min jinnota li issa hemm l-“ekotikketti” għaż-żebgħa u l-lostru ta’ ġewwa u
ta’ barra[5].
Dawn l-ekotikketti jeħtieġu, fost l-oħrajn, limitazzjonijiet volontarji aktar
stretti tal-kontenut tal-KOV fil-prodotti, biex b’hekk iwasslu għal aktar
tnaqqis fl-emissjonijiet tal-KOV permezz ta’ għażla tal-prodotti aktar
informata min-naħa tal-konsumatur. 2. Implimentazzjoni 2.1. Introduzzjoni Skont l-Artikolu 7 tad-Direttiva dwar
iż-Żebgħa, l-Istati Membri jridu jibagħtu rapport lill-Kummissjoni dwar
ir-riżultati tal-programm ta’ monitoraġġ tagħhom biex juru l-konformità
mar-rekwiżiti tad-Direttiva. Skont l-istess Artikolu, l-Istati Membri għandhom
jirrapportaw ukoll dwar il-kategoriji u l-kwantitajiet ta’ prodotti li għalihom
inħarġet liċenzja skont l-Artikolu 3(3) tad-Direttiva dwar iż-Żebgħa. L-Istati Membri kellhom jissottomettu t-tieni rapport
tagħhom, li jkopri l-2010, sal-1 ta’ Lulju 2012 fid-dawl
tal-limiti aktar stretti tal-KOV tal-Fażi II (l-Anness II
tad-Direttiva dwar iż-Żebgħa) li bdew japplikaw għaż-żebgħa u l-lostri sa
mill-1 ta’ Jannar 2010. Il-Kummissjoni żviluppat u adottat format
komuni biex tippromwovi rappurtar konsistenti min-naħa tal-Istati Membri[6]. Is-27 Stat Membru kollha bagħtu r-rapport
tal-implimentazzjoni tagħhom. Dawn ir-rapporti, u l-valutazzjoni sussegwenti
tagħhom, huma disponibbli fuq il-websajt tal-Kummissjoni[7]. Dan ir-rapport, li jiġbor fih fil-qosor is-sejbiet
ewlenin tal-valutazzjoni tat-tagħrif li wasal mingħand l-Istati Membri, jiffoka
fuq żewġ aspetti tal-implimentazzjoni tad-Direttiva dwar iż-Żebgħa, jiġifieri: · fuq liema programmi ta’ monitoraġġ ġew stabbiliti sabiex jiġu ċċekkjati
r-rekwiżiti tad-Direttiva dwar iż-Żebgħa, jiġifieri l-azzjonijiet prinċipalment
imwettqin mill-awtoritajiet kompetenti tal-Istati Membri; u · fuq kemm l-Istati Membri jikkonformaw tajjeb mar-rekwiżiti tekniċi
tad-Direttiva dwar iż-Żebgħa, jiġifieri l-azzjonijiet ta' implimentazzjoni
meħudin mill-manifatturi, l-importaturi, il-bejjiegħa bl-ingrossa u l-bejjiegħa
bl-imnut taż-żebgħa u l-lostri. 2.2. Programmi ta' monitoraġġ L-informazzjoni għall-2010 pprovduta mill-Istati
Membri turi li sar progress fil-monitoraġġ tal-konformità mal-limiti
tal-kontenut tal-KOV (l-Anness II) u mar-rekwiżiti tat-tikkettar
(l-Artikolu 4), jew li dan il-monitoraġġ baqa’ mill-inqas fl-istess livell
tal-2007. L-Istati Membri jużaw approċċi differenti biex
jimmonitorjaw il-konformità. Dawn jistgħu jinkludu kontrolli fiżiċi
(pereżempju, it-teħid ta' kampjuni u l-analiżi tal-prodotti taż-żebgħa, u
l-ispezzjoni viżwali tat-tikketti) u/jew approċċ ta' verifika anqas dirett
permezz ta’ kontrolli tad-dokumentazzjoni ppreżentata mill-produtturi. F’xi
każijiet, il-proċess iktar ikkumplikat tal-ispezzjoni jew it-teħid ta’ kampjuni
jsir biss jekk l-osservazzjonijiet tal-verifika jkunu jiġġustifikaw dan. Biex
jippromwovu monitoraġġ aktar effettiv, xi Stati Membri indikaw li qiesu
approċċi alternattivi għall-verifika ta' konformità, bħal pereżempju li
jobbligaw lill-manifatturi jimlew kwestjonarju li jintradd lura flimkien ma’
kampjuni tal-prodotti, jewinkella li jdaħħlu skemi ta’ awtoċertifikazzjoni. Għalkemm kien hemm varjazzjonijiet kbar bejn
l-Istati Membri individwali, in-numru totali ta’ spezzjonijiet fuq
il-post imwettqin fl-2010 fl-UE-27 kien sinifikanti – fil-fatt saru xi
4 700 spezzjoni biex jiġi ċċekkjat il-kontenut tal-KOV tal-prodotti
u/jew it-tikkettar tagħhom. L-ispezzjonijiet koprew l-atturi kollha involuti
fit-tqegħid tal-prodotti fis-suq, jiġifieri l-manifatturi, l-importaturi,
il-bejjiegħa bl-ingrossa u l-bejjiegħa bl-imnut taż-żebgħa u l-lostri.
Fil-livell tal-Istati Membri individwali, in-numru ta’ spezzjonijiet
irrappurtati kien ivarja minn żero (fi tliet Stati Membri) sa 830. Minkejja li, għal darb’oħra, kien hemm
varjazzjonijiet kbar fil-livell tal-Istati Membri individwali, numru kbir ta’
kampjuni taż-żebgħa u tal-lostru ġew analizzati għall-kontenut tal-KOV
tagħhom, u fil-fatt saru aktar minn 19 000 analiżi fl-UE-27 fl-2010. Erba’
Stati Membri analizzaw aktar minn 1 000 kampjun (l-akbar numru kien ta’
11 800 kampjun), iżda ħames Stati Membri ma għamlu l-ebda analiżi.
L-iktar li kienu analizzati kienu l-prodotti taż-żebgħa u tal-lostru mibjugħa
mill-bejjiegħa bl-imnut (li jammontaw għal 41 % tal-kampjuni). In-numru ta’ kontrolli tat-tikketti
tal-prodotti, jew permezz ta’ spezzjoni viżwali jew permezz ta’ metodi
oħrajn, kien ilaħħaq il-121 000 fl-UE-27 fl-2010, għalkemm għal darb’oħra
kien hemm differenzi kbar bejn l-Istati Membri. Fil-livell tal-Istati Membri
individwali, in-numru ta’ kontrolli kien ivarja minn żero (fi tliet Stati
Membri) sa 78 000. L-iktar li kienu ċċekkjati għall-konformità tat-tikketti
kienu l-prodotti taż-żebgħa u tal-lostru mibjugħa mill-bejjiegħa bl-ingrossa
(li kienu jammontaw għal 41 % tal-kontrolli kollha). Dawk l-Istati Membri li rrappurtaw li ma sar
l-ebda monitoraġġ fl-2010, jew li rrappurtaw livelli baxxi ħafna tiegħu, semmew
numru ta’ raġunijiet għal dan. Ħafna Stati Membri kienu mxekkla minn nuqqas
ta’ riżorsi, b’mod partikolari finanzjarji. Xi awtoritajiet kompetenti
tal-Istati Membri għelbu din il-problema billi użaw il-prijoritizzazzjoni
(pereżempju, billi l-monitoraġġ ġie mmirat lejn prodotti speċifiċi) u/jew billi
użaw kampanji ta’ informazzjoni (biex jiżdied l-għarfien dwar id-Direttiva dwar
iż-Żebgħa u tittejjeb il-konformità magħha). Kien hemm ukoll kwistjonijiet ta'
nuqqas ta’ laboratorji ċċertifikati għall-analiżi tal-kampjuni tal-prodotti. 2.3. Konformità mal-limiti tal-KOV u mar-rekwiżiti tat-tikkettar Il-limiti tal-KOV L-Anness IIA tad-Direttiva dwar iż-Żebgħa
jiddefinixxi żewġ settijiet ta’ valuri tal-limitu għall-kontenut massimu
tal-KOV fil-prodotti taż-żebgħa u fil-lostri (fi grammi għal kull litru
tal-prodott li hu “lest għall-użu”). Il-“valuri tal-limitu tal-Fażi I”
ilhom fis-seħħ sa mill-1 ta’ Jannar 2007. Il-"valuri
tal-limitu tal-KOV tal-Fażi II", li huma aktar stretti, daħlu
fis-seħħ fl-1 ta’ Jannar 2010. Għalhekk, prodotti li fl-2010
nstabu li ma kinux konformi mal-limiti “tal-Fażi I” kienu wkoll
simultanjament mhux konformi mal-limiti “tal-Fażi II”. Għall-prodotti ta’
lostru mill-ġdid tal-vetturi, il-valuri tal-limitu tal-KOV mogħtija fl-Anness IIB
tad-Direttiva dwar iż-Żebgħa ilhom fis-seħħ sa
mill-1 ta’ Jannar 2007 u ma ġewx emendati minn dak iż-żmien ’l
hawn. Għal-limiti tal-KOV tal-Fażi I ir-rata ta’
konformità inġenerali kienet relattivament għolja u kienet ta’ 98,7 %
(jiġifieri kien hemm 259 kampjun li ma kienx konformi minn total ta’
19 525 kampjun). L-akbar proporzjon ta’ kampjuni li ma kinux konformi
nstab fost il-bejjiegħa bl-ingrossa (2,5 % tal-kampjuni ma kinux konformi)
u fost l-importaturi (2,4 % tal-kampjuni ma kinux konformi). Għal-limiti tal-KOV tal-Fażi II, li huma
aktar stretti, ir-rata ta’ konformità inġenerali kienet, għal darb’oħra,
relattivament għolja u kienet ta’ 97,46 % (jiġifieri kien hemm 500 kampjun
li ma kienx konformi). L-akbar proporzjon ta’ kampjuni li ma kinux konformi
nstab fost l-importaturi (6 % tal-kampjuni ma kinux konformi). Dawn il-livelli għolja ta’ konformità jindikaw li,
meta jiġu ċċekkjati, il-limiti tal-KOV b’mod ġenerali huma segwiti fl-UE-27
kollha, għalkemm għad baqa’ opportunitajiet biex ir-rata ta’ konformità titqarreb
għal 100 %. B’mod ġenerali l-livelli ta’ konformità huma simili għal dawk
irrappurtati għall-2007. Rekwiżiti tat-tikkettar Minn xi 121 000 kampjun li ġew iċċekkjati
t-tikketti tagħhom fl-2010, 94,2 % nstab li kienu konformi. L-ogħla rata
ta’ nuqqas ta’ konformità kienet fost l-importaturi. Minħabba d-differenzi
fin-numru ta’ kampjuni/tikketti analizzati, ma jistax isir paragun sew
tal-livelli ta' nuqqas ta’ konformità nnutati fl-Istati Membri differenti. Ir-raġunijiet għan-nuqqas ta’ konformità mhumiex
evidenti mid-dejta pprovduta fir-rapporti tal-Istati Membri. Għalkemm
il-livelli ta’ konformità jidhru li tjiebu b'mod konsiderevoli mill-2007 ’l
hawn, meta l-ksur tar-rekwiżiti tat-tikkettar kien jammonta għal madwar
20 %, hemm lok għal titjib fil-kontrolli tal-konformità, speċjalment
f’dawk l-Istati Membri fejn il-monitoraġġ mhux qed jitwettaq dal-ħin. Prodotti li mhumiex konformi Fil-biċċa l-kbira tal-każijiet, l-Istati Membri li
sabu nuqqas ta’ konformità mal-limiti tal-kontenut tal-KOV jew mar-rekwiżiti
tat-tikkettar ipprovdew ukoll informazzjoni dwar is-sottokategoriji
tal-prodotti li ma kinux konformi skont l-Anness I tad-Direttiva dwar
iż-Żebgħa. Il-biċċa l-kbira tal-każijiet ta’ nuqqas ta’
konformità, kemm mal-limiti tal-kontenut tal-KOV u kemm mar-rekwiżiti
tat-tikkettar, kienu marbutin mal-prodotti tal-kategorija 1.1d)
(“dekorazzjoni interna/esterna u kisi minn barra għal injam, metall jew
plastik”). Ġew irrappurtati każijiet ta’ nuqqas ta’ konformità kemm
mar-rekwiżiti tal-limiti tal-kontenut tal-KOV u kemm mar-rekwiżiti
tat-tikkettar għal tliet kategoriji oħra ta’ prodotti, jiġifieri
fil-kategoriji 1.1a) “kisjiet matti għal ħitan interni u soqfa”, 1.1e)
“lostri ta' dekorazzjoni interna/esterna u kulur għall-injam” u 1.1i) “kisjiet bi
prestazzjoni ta' pakkett wieħed”. Kienu rrappurtati nuqqasijiet ta’ konformità
f’aktar sottokategoriji f’dak li għandu x’jaqsam mar-rekwiżiti tat-tikkettar,
milli f’dak li għandu x’jaqsam mal-limiti tal-KOV. Fil-fatt instabu nuqqasijiet
ta’ konformità mar-rekwiżiti tat-tikkettar fis-sottokategoriji kollha minbarra
tnejn fost dawk taż-żebgħa u l-lostri u fis-sottokategoriji kollha tal-prodotti
ta’ lostru mill-ġdid tal-vetturi. Azzjonijiet biex tiġi żgurata l-konformità L-iktar sanzjoni komuni meħuda mill-Istati Membri
fil-każ ta’ nuqqas ta’ konformità mal-limiti tal-kontenut tal-KOV kien
l-irtirar tal-prodotti mis-suq, kif meħtieġ mid-Direttiva dwar iż-Żebgħa. Fil-każ ta’ ksur tar-rekwiżiti tat-tikkettar,
b'mod ġenerali l-Istati Membri kienu jitolbu lill-operaturi jikkoreġu l-iżball
f'ċertu perjodu taż-żmien biex jevitaw il-prosekuzzjoni jew il-multi. Stat Membru wieħed biss semma l-prosekuzzjonijiet
u l-istess Stat Membru jitlob lill-operaturi jixprunaw il-bidliet permezz
tal-katina tal-provvista tagħhom. Xi Stati Membri rrappurtaw li, minflok ma
ppenalizzaw lill-operaturi għal nuqqas ta’ konformità, b’mod kostruttiv tawhom
pariri dwar ir-rekwiżiti tad-Direttiva dwar iż-Żebgħa u dwar il-bidliet
meħtieġa biex tkun żgurata l-konformità magħha. 3. Konklużjoni u prospetti L-informazzjoni li waslet mingħand l-Istati Membri
skont l-Artikolu 7 tad-Direttiva dwar iż-Żebgħa turi li, fl-2010, bosta
Stati Membri kienu stabbilixxew il-monitoraġġ biex jiċċekkjaw il-konformità
tal-prodotti taż-żebgħa u tal-lostru li jitqiegħdu fis-suq. Madankollu, għad
hemm numru żgħir ta’ Stati Membri li naqsu milli jagħmlu dan u li kien għadhom
ma stabbbilixxewx programmi adegwati ta' monitoraġġ. F’dawk l-Istati Membri li jwettqu l-monitoraġġ,
hemm varjazzjoni kbira fil-frekwenza li biha jitwettaq il-monitoraġġ. Dawn
l-Istati Membri juru konformità ġeneralment tajba mal-valuri tal-limitu tal-KOV
preskritti mid-Direttiva dwar iż-Żebgħa, u l-ogħla rata ta' nuqqas ta’
konformità ġeneralment tinstab fiż-żebgħa importata. Madankollu, jidher li hemm
bżonn ta’ infurzar aħjar tar-rekwiżiti tat-tikkettar. L-Istati Membri li baqgħu lura huma mħeġġa jieħdu
l-miżuri meħtieġa malajr biex jimplimentaw bis-sħiħ l-obbligi marbuta
mal-programmi ta’ monitoraġġ. Il-Kummissjoni se timmonitorja mill-qrib il-progress
li jsir b’rabta ma’ dawn il-kwistjonijiet u se tkompli tgħin lill-Istati Membri
biex itejbu aktar il-livell ta’ prestazzjoni tagħhom, kemm permezz ta’ diversi
attivitajiet ta’ appoġġ u kemm permezz ta’ azzjoni xierqa ta’ infurzar. Għalhekk, qed issir rakkomandazzjoni lill-Istati
Membri biex ikomplu bl-isforzi tagħhom favur monitoraġġ u infurzar immirat lejn
l-aspetti fejn dawn huma l-aktar effettivi u effiċjenti biex jitnaqqsu
l-prodotti taż-żebgħa u tal-lostru mhux konformi li jitqiegħdu fis-suq. [1] L-ożonu jifforma permezz ta’ reazzjoni tal-KOV
mal-ossidi tan-nitroġenu u mal-monossidu tal-karbonju fil-preżenza tad-dawl
tax-xemx. [2] Il-"prodotti ta' lostru mill-ġdid tal-vetturi"
huma ddefiniti bħala l-prodotti elenkati fis-sottokategoriji msemmija fl-Anness II(B)
tad-Direttiva dwar iż-Żebgħa. Dawn jintużaw għall-kisi ta' vetturi tat-triq kif
iddefiniti fid-Direttiva 70/156/KEE, jew ta’ parti minnhom, liema xogħol
isir bħala parti mit-tiswija, mill-konservazzjoni jew mid-dekorazzjoni tal-vetturi
’l barra mill-istallazzjonijiet tal-manifattura tagħhom. [3] COM(2011)297 http://eur-lex.europa.eu/LexUriServ/LexUriServ.do?uri=COM:2011:0297:FIN:MT:PDF. [4] Komunikazzjoni mill-Kummissjoni lill-Kunsill u
lill-Parlament Ewropew: Strateġija Tematika dwar it-Tniġġis tal-Arja
(COM(2005) 446 finali), 21.9.2005. [5] Id-Deċiżjoni tal-Kummissjoni 2009/543/KE li
tistabbilixxi l-kriterji ekoloġiċi għall-għoti tal-ekotikketta Komunitarja
għaż-żebgħa u l-verniċ ta’ barra, u d-Deċiżjoni
tal-Kummissjoni 2009/544/KE li tistabbilixxi l-kriterji ekoloġiċi
għall-għoti tal-ekotikketta Komunitarja għaż-żebgħa u l-verniċ ta’ ġewwa. [6] Id-Deċiżjoni tal-Kummissjoni 2010/693/UE
tat-22 ta’ Lulju 2010 (ĠU L 301, 18.11.2010, p. 4). [7] https://circabc.europa.eu/w/browse/d8915eeb-0b2f-4d22-824e-1d4b5d969e14