RAKKOMANDAZZJONI TAL-KUMMISSJONI LILL-KUNSILL

li tawtorizza lill-Kummissjoni biex tinnegozja l-emendi għat-Trattat dwar il-Komunità tal-Enerġija f’isem l-Unjoni Ewropea

1. MEMORANDUM TA’ SPJEGAZZJONI

It-Trattat li jistabbilixxi l-Komunità tal-Enerġija ġie ffirmat f'Ateni fil-25 ta' Ottubru 2005 mill-Komunità Ewropea u d-disa' Partijiet Kontraenti mix-Xlokk tal-Ewropa u daħal fis-seħħ fl-1 ta' Lulju 2006. L-Artikolu 16 tat-Trattat jiddefinixxi l-"acquis communautaire dwar l-ambjent" li tfisser:

· id-Direttiva tal-Kunsill 85/337/KEE tas-27 ta' Ġunju 1985 dwar l-istima tal-effetti ta’ ċerti proġetti pubbliċi u privati fuq l-ambjent, kif emendata bid-Direttiva tal-Kunsill 97/11/KE tat-3 ta' Marzu 1997 u bid-Direttiva 2003/35/KE tal-Parlament Ewropew u tal-Kunsill tas-26 ta' Mejju 2003,

· Id-Direttiva tal-Kunsill 1999/32/KE tas-26 ta' April 1999 dwar it-tnaqqis tal-kontenut tal-kubrit f'ċerti karburanti likwidi u li temenda d-Direttiva 93/12/KEE,

· Id-Direttiva 2001/80/KE tal-Parlament Ewropew u tal-Kunsill tat-23 ta' Ottubru 2001 dwar il-limitazzjoni tal-emissjonijiet ta' ċerti tniġġis fl-arja minn impjanti kbar tal-kombustjoni (id-Direttiva dwar l-LCP),

· l-Artikolu 4(2) tad-Direttiva 79/409/KEE tal-Kunsill tat-2 ta' April 1979 dwar il-konservazzjoni tal-għasafar selvaġġi.

L-Artikolu 12 tat-Trattat li jistabbilixxi l-Komunità tal-Enerġija jistipula li kull Parti Kontraenti għandha timplimenta l-acquis communautaire dwar l-ambjent b'konformità mal-iskeda stabbilita fl-Anness II tat-trattat.

Id-Direttiva dwar l-LCP ġiet issostitwita bl-Artikolu 72(3) u (4) tal-Kapitolu III u l-Anness V tad-Direttiva 2010/75/UE tal-Parlament Ewropew u tal-Kunsill tal-24 ta’ Novembru 2010 dwar l-emissjonijiet industrijali (il-prevenzjoni u l-kontroll integrati tat-tniġġis) mis-7 ta’ Jannar 2013 għall-impjanti l-ġodda, u mill-1 ta’ Jannar 2016 għall-impjanti eżistenti. Id-Direttiva dwar l-LCP hija rrevokata b'effett min din l-aħħar data. Għaldaqstant għandhom jiġu emendati skont dan l-acquis communautaire dwar l-ambjent stabbilit fl-Artikolu 16 tat-Trattat li jistabbilixxi l-Komunità tal-Enerġija, u l-iskeda tal-implimentazzjoni stabbilita fl-Anness II ta' dan it-Trattat.

Fid-29 ta' April 2013, il-Kummissjoni adottat Deċiżjoni C(2013)2364(finali) li tistabbilixxi l-Proposti tal-Kummissjoni lill-Kunsill tal-Ministri tal-Komunità tal-Enerġija dwar l-implimentazzjoni tad-Direttiva 2001/80/KE tal-Parlament Ewropew u tal-Kunsill tat-23 ta’ Ottubru 2001 dwar il-limitazzjoni tal-emissjonijiet ta’ ċerti tniģģis fl-arja minn impjanti kbar tal-kombustjoni, u dwar l-implimentazzjoni tal-Kapitolu III, l-Anness V u l-Artikolu 72(3)-(4) tad-Direttiva 2010/75/UE tal-Parlament Ewropew u tal-Kunsill tal-24 ta’ Novembru 2010 dwar l-emissjonijiet industrijali (il-prevenzjoni u l-kontroll integrati tat-tniġġis) u li temenda l-Artikolu 16 u l-Anness II tat-Trattat dwar il-Komunità tal-Enerġija.

L-Artikolu 5(2) tad-Deċiżjoni tal-Kunsill 2006/500 tad-29 ta' Mejju 2006 dwar il-konklużjoni mill-Komunità Ewropea tat-Trattat dwar il-Komunità tal-Enerġija, jistipula l-proċedura li għandha tiġi applikata qabel tittieħed pożizzjoni mill-Komunità tal-Enerġija dwar emendi għat-Trattat dwar il-Komunità tal-Enerġija.

F'dan il-kuntest, il-Kummissjoni tirrakkomanda li l-Kunsill jagħtiha l-awtorizzazzjoni biex tiddelibera fi ħdan l-istituzzjonijiet tal-Komunità tal-Enerġija dwar emendi meħtieġa fit-Trattat dwar il-Komunità tal-Enerġija.

2. RAKKOMANDAZZJONI

Il-Kumitat jirrakkomanda li:

· il-Kunsill jawtorizza lill-Kummissjoni biex, f’isem l-Unjoni Ewropea, tinnegozja l-emendi meħtieġa fit-Trattat li jistabbilixxi l-Komunità tal-Enerġija;

· skont it-Trattat, il-Kunsill jawtorizza lill-Kummissjoni biex tagħmilha tan-negozjatur f'isem l-Unjoni Ewropea u tinnegozja l-emendi fit-Trattat dwar il-Komunità tal-Enerġija kif stipulat fid-direttivi dwar in-negozjar annessi ma' din ir-Rakkomandazzjoni ("id-direttivi dwar in-negozjar");

· li l-Kunsill jaħtar kumitat li għandu jiġi kkonsultat matul in-negozjati; kif ukoll

· id-direttivi dwar in-negozjar jinħarġu mill-Kunsill.

L-ANNESS

Id-direttivi għan-negozjar tal-emendi għat-Trattat li jistabbilixxi l-Komunità tal-Enerġija

L-emendi li se jiġu miftiehma f'isem l-Unjoni Ewropea għandhom ikunu bbażati fuq dawk proposti fid-Deċiżjoni tal-Kummissjoni C(2013)2364(finali) u għandhom l-għan li jiżguraw konverġenza kemm jista' jkun malajr mal-acquis communautaire aġġornat dwar l-ambjent fejn jikkonċerna l-emissjonijiet minn impjanti kbar tal-kombustjoni.