RAPPORT TAL-KUMMISSJONI

RAPPORT ANNWALI 2012 DWAR IS-SUSSIDJARJETÀ U L-PROPORZJONALITÀ

1. Introduzzjoni

Dan huwa l-għoxrin rapport annwali dwar l-applikazzjoni tal-prinċipji tas-sussidjarjetà u tal-proporzjonalità fit-tfassil tal-liġijiet tal-UE. Dan ir-rapport huwa ppreżentat skont l-Artikolu 9 tal-Protokoll (Nru 2) dwar l-applikazzjoni ta’ dawn il-prinċipji (minn issa 'l quddiem “il-Protokoll”) mehmuż mat-Trattat dwar il-Funzjonament tal-Unjoni Ewropea (TFUE).

Ir-rapport jagħti ħarsa lejn kif istituzzjonijiet u korpi differenti tal-UE implimentaw dawn iż-żewġ prinċipji u jekk il-prattika nbidlitx meta mqabbla mas-snin ta’ qabel. Dan janalizza f’aktar dettall ċerti proposti tal-Kummissjoni li kienu s-suġġett ta’ opinjonijiet motivati fl-2012. Minħabba li l-2012 rat l-ewwel ‘karta safra’ mill-parlamenti nazzjonali, kif introdotta mit-Trattat ta’ Lisbona, ir-rapport jiffoka fuq dak il-każ partikolari. Minħabba r-rabtiet mill-qrib bejn il-mekkaniżmu ta' kontroll tas-sussidjarjetà u d-djalogu politiku bejn il-Parlamenti nazzjonali u l-Kummissjoni, dan ir-rapport għandu jitqies bħala kumplimentari għar-Rapport Annwali tal-Kummissjoni għas-sena 2012 dwar ir-relazzjonijiet mal-Parlamenti nazzjonali.[1]

2. Applikazzjoni tal-prinċipji mill-istituzzjonijiet 2.1. Il-Kummissjoni

Minħabba d-dritt ta’ inizjattiva, il-Kummissjoni għandha r-responsabbiltà li tiżgura li jsiru l-għażliet it-tajba, dwar jekk u kif tiġi proposta azzjoni fil-livell tal-UE ssir fi stadju bikri tal-iżvilupp ta’ politika.

Għaldaqstant, u f’konformità mal-impenn tagħha għal regolamentazzjoni intelliġenti, qabel ma tipproponi inizjattivi ġodda, il-Kummissjoni tivverifika jekk l-UE għandhiex id-dritt li tieħu azzjoni u jekk l-għanijiet tal-azzjoni proposta ma jistgħux jintlaħqu b’mod suffiċjenti mill-Istati Membri.

L-ewwel, il-Kummissjoni tħejji pjanijiet direzzjonali disponibbli pubblikament[2] għall-inizjattivi ewlenin kollha. Il-pjanijiet direzzjonali jipprovdu deskrizzjoni preliminari ta’ inizjattivi possibbli u jispeċifikaw il-pjanijiet tal-Kummissjoni għax-xogħol ta' politika u konsultazzjoni. Dawn dejjem jinkludu ġustifikazzjoni inizjali għal azzjoni f’termini ta’ sussidjarjetà u proporzjonalità.

Aktar tard matul il-fażi tal-iżvilupp tal-politika, titwettaq analiżi iktar sħiħa ta’ kwistjonijiet ta’ sussidjarjetà bħala parti mill-proċess ta' valutazzjoni tal-impatt (IA), filwaqt li jitqiesu l-opinjonijiet espressi matul il-konsultazzjonijiet mal-partijiet interessati. Għal dan l-għan, huwa pprovdut sett ta’ mistoqsijiet strutturati għall-analiżi tas-sussidjarjetà u l-proporzjonalità fil-Linji Gwida IA,[3] u jservi bħala bażi għall-valutazzjoni tad-dritt tal-UE biex jaġixxi u l-ġustifikazzjoni għal azzjoni tal-UE.

Għalhekk, is-sussidjarjetà u l-proporzjonalità ta’ azzjoni possibbli tal-UE hija vvalutata abbażi tal-evidenza kollha disponibbli. Dan imbagħad jiġi eżaminat sew mill-Bord għall-Valutazzjoni tal-Impatt.[4]

Konxji tar-rwol ewlieni li għandhom il-valutazzjonijiet tal-impatt fit-twaqqif tal- evidenza għall-persuni politiċi li jieħdu d-deċiżjonijiet, il-Bord immarka fir-rapport annwali tiegħu għall-2012[5] il-ħtieġa li tiġi pprovduta ġustifikazzjoni robusta u dettaljata tas-sussidjarjetà fl-IAs kollha.

Fl-2012, l-IAB eżamina 97 valutazzjoni tal-impatt u ħareġ 144 opinjoni. Il-kummenti dwar il-kwistjonijiet ta' sussidjarjetà ġew inklużi fi 33 % tal-opinjonijiet tiegħu.

Wieħed mill-każijiet li l-IAB kkummenta dwaru fi-rigward tas-sussidjarjetà kien l-IA għall-proposta għal Direttiva dwar il-ġestjoni kollettiva tad-drittijiet tal-awtur u drittijiet relatati (COM(2012) 372). F’dan il-każ, l-IAB talab lis-servizz ewlieni “biex isaħħaħ il-valutazzjoni tal-ħtieġa għaż-żmien u l-valur miżjud ta’ azzjoni tal-UE skont il-bażi legali proposta (suq uniku u diversità kulturali)”. Bħala riżultat, l-IA riveduta ppreżentat b’mod aktar ċar ir-raġuni għall-proposta ta’ inizjattiva tal-UE, pereżempju spjegazzjoni aħjar dwar in-natura transnazzjonali tal-problemi identifikati li juru li l-qafas legali eżistenti kemm fil-livell nazzjonali kif ukoll fil-livell tal-UE wera li mhuwiex biżżejjed biex jindirizza l-problemi.

Għall-IA għall-proposta għal Regolament dwar Korp Volontarju Ewropew ta’ Għajnuna Umanitarja,[6] l-IAB ssuġġerixxa li “tippreżenta b’mod aktar ċar il-ħtieġa u l-valur miżjud ta’ azzjoni tal-UE sabiex l-aspettattivi politiċi jistgħu jiġu żviluppati fil-kuntest xieraq tagħhom”. Huwa talab ukoll lis-servizz ewlieni biex “jindirizza b’mod aktar espliċitu l-komplementarjetà u l-koordinazzjoni tal-[Korp Volontarju Ewropew ta’ Għajnuna Umanitarja] mal-ħidma ta’ organizzazzjonijiet oħra, minħabba t-tħassib tal-partijiet interessati dwar id-duplikazzjoni u l-kompetizzjoni”. Ir-rapport rivedut tal-IA segwa dawn ir-rakkomandazzjonijiet u pprovda ġustifikazzjoni iżjed bir-reqqa għal azzjoni mill-UE.

L-opinjonijiet tal-IAB jgħinu fit-titjib tal-analiżi ta’ konformità mal-prinċipji tas-sussidjarjetà u l-proporzjonalità, u dawn jikkostitwixxu, flimkien mar-rapporti tal-IA infushom, elementi importanti li jsaħħu l-proċess tat-teħid tad-deċiżjonijiet politiċi tal-Kummissjoni.

2.2. Parlamenti nazzjonali

Fl-2012, il-Kummissjoni rċeviet mingħand il-parlamenti nazzjonali 70 opinjoni motivata, simili għall-għadd riċevut is-sena ta’ qabel (64 fl-2011), b’żieda żgħira ta’ madwar 9 %. Madankollu, il-proporzjon ta’ opinjonijiet motivati li waslu fl-2012 kien l-istess bħall-għadd globali ta’ opinjonijiet li l-Kummissjoni rċeviet fil-kuntest ta’ djalogu politiku usa’ tagħha mal-parlamenti nazzjonali fl-2012 (663). Bħal fl-2010 u l-2011, dawn kienu jammontaw għal ftit aktar minn 10 %. L-2012 rat l-ewwel użu tal-karta safra mill-parlamenti nazzjonali fil-kuntest tal-mekkaniżmu ta’ kontroll tas-sussidjarjetà, b’reazzjoni għall-proposta tal-Kummissjoni għal regolament dwar l-eżerċitar tad-dritt li tittieħed azzjoni kollettiva fil-kuntest tal-libertà tal-istabbiliment u l-libertà biex jiġu pprovduti s-servizzi. Dan il-proċess huwa deskritt f’aktar dettall fil-kapitolu 3.

L-opinjonijiet motivati jkomplu jvarjaw ħafna f’termini tal-forma tagħhom u t-tip ta’ argumenti mressqin mill-parlamenti nazzjonali li jsaħħu l-konklużjoni tagħhom li l-prinċipju tas-sussidjarjetà nkiser. Simili għas-sena ta’ qabel, il-fowkus tal-opinjonijiet motivati li joħorġu mill-parlamenti nazzjonali kien varjat ħafna. Is-70 opinjoni motivata koprew mhux anqas minn 23 proposta tal-Kummissjoni. Wara l-proposta Monti II (12-il opinjoni motivata), il-proposta għal Regolament dwar il-Fond għall-għajnuna Ewropea għal dawk l-aktar fil-bżonn siltet it-tieni l-ogħla numru ta’ opinjonijiet motivati (5). Tmien proposti oħra siltu tliet opinjonijiet motivati kull wieħed (għad-dettalji ara l-Anness). Din it-tendenza jidher li tikkonferma l-interessi politiċi varji tal-parlamenti nazzjonali, li jsegwu prijoritajiet differenti meta jagħżlu l-proposti tal-Kummissjoni li għandhom jiġu skrutinizzati fil-kuntest tal-mekkaniżmu ta’ kontroll tas-sussidjarjetà u japplikaw kriterji differenti meta jivvalutaw il-konformità mal-prinċipju tas-sussidjarjetà. Dan ifisser li l-koordinazzjoni bejniethom tibqa’ sfida.

Bħal fl-2011, il-Riksdag Svediża kien il-Parlament nazzjonali li adottat bil-bosta l-ogħla numru ta’ opinjonijiet motivati (20), kważi d-doppju tan-numru fl-2011 (11). Ir-Riksdag tiskrutinizza l-proposti kollha tal-Kummissjoni f’termini ta’ sussidjarjetà, u tiddeċentralizza l-iskrutinju lill-kumitati parlamentari kollha, li jidhru li japplikaw kriterji differenti. Dan jista’ jkollu impatt fuq l-għadd ta’ opinjonijiet motivati li jinħarġu mir-Riksdag.[7] Is-Sénat Franċiż ħareġ it-tieni l-ogħla numru ta’ opinjonijiet motivati (7), segwit mill-Bundesrat Ġermaniż (5). Dawn it-tliet ikmamar waħedhom ħarġu kważi 50 % tal-opinjonijiet motivati kollha maħruġa mill-Parlamenti nazzjonali fl-2012.

It-tmintax-il rapport biannwali tal-COSAC[8] jagħti ħarsa ġenerali lejn il-proċeduri u l-prattiċi li jirrigwardaw skrutinju parlamentari.[9] Dan id-dokument, ibbażat fuq it-tweġibiet mibgħuta mill-parlamenti nazzjonali/kmamar għal kwestjonarju, jikkonkludi li l-proċeduri huma differenti b’mod partikolari f’termini ta’ opinjonijiet tal-Parlamenti nazzjonali dwar ir-relazzjoni bejn il-prinċipji ta’ sussidjarjetà u ta’ proporzjonalità. Filwaqt li xi wħud jemmnu li huma daqstant ieħor importanti, oħrajn jemmnu li l-prinċipju ta’ proporzjonalità huwa sempliċiment komponent ta’ sussidjarjetà. Iżda ħafna mill-parlamenti nazzjonali huma tal-opinjoni li l-kontrolli ta’ sussidjarjetà mhumiex effettivi sakemm ma tkunx inkluża verifika ta’ proporzjonalità.

Ir-rapport jgħid li maġġoranza kbira tal-parlamenti nazzjonali jirrapportaw li l-opinjonijiet motivati tagħhom spiss huma bbażati fuq interpretazzjoni usa’ tal-prinċipju tas-sussidjarjetà mill-kliem fil-Protokoll Nru 2. Pereżempju, l-Eerste Kamer Olandiż jemmen li “mhuwiex possibbli li jiġi eskluż il-prinċipji ta’ legalità u proporzjonalità meta tiġi applikata l-verifika tas-sussidjarjetà ...”. Is-Senát Ċek huwa tal-opinjoni li s-sussidjarjetà għandha “natura ġenerali u astratta ... mhijiex kunċett legali strett u ċar” u għalhekk għandha tintuża interpretazzjoni wiesgħa. Il-House of Lords tar-Renju Unit tat fehma simili, billi argumentat favur interpretazzjoni usa’ ta’ dan il-prinċipju minħabba li “għalkemm il-prinċipju huwa kunċett ġuridiku, fil-prattika l-applikazzjoni tiegħu tiddependi fuq ġudizzju politiku”.

L-opinjonijiet differenti tal-Parlamenti nazzjonali dwar il-fehim u l-applikazzjoni tal-prinċipju tas-sussidjarjetà wasslet għal opinjonijiet differenti dwar il-ħtieġa għal linji gwida biex jiċċaraw il-kamp ta' applikazzjoni ta’ kontroll tas-sussidjarjetà u kriterji relatati. Nofs biss tal-parlamenti nazzjonali li wieġbu għall-kwestjonarju COSAC kienu favur dan. Dawk kollha li taw l-appoġġ tagħhom insistew li kwalunkwe linja gwida għandha tkun mhux vinkolanti.

2.3. Il-Parlament Ewropew u l-Kunsill

Fil-Kunsill, il-Kumitat tar-Rappreżentanti Permanenti ta' kull Stat Membru (Coreper) jiżguraw li l-prinċipji ta' sussidjarjetà u proporzjonalità huma rispettati. Fl-2012 il-Parlament Ewropew ħoloq direttorat orizzontali ġdid biex jipprovdi firxa usa’ ta’ servizzi lill-kumitati tal-PE dwar valutazzjonijiet tal-impatt u valur miżjud Ewropew.

Ix-xogħol fuq il-valutazzjonijiet tal-impatt ikopri l-iskrinjar ta’ pjanijiet direzzjonali tal-Kummissjoni li juru politika pjanata u konsultazzjoni tax-xogħol u jagħmlu evalwazzjoni inizjali tal-valutazzjonijiet tal-impatt tal-Kummissjoni. Fuq talba ta’ kumitati individwali, jista’ jipprovdi wkoll valutazzjonijiet dettaljati tal-valutazzjonijiet tal-impatt tal-Kummissjoni, analiżi kumplimentari dwar aspetti tal-proposti li mhumiex koperti oriġinarjament mill-Kummissjoni u valutazzjonijiet tal-impatt ta’ emendi kkunsidrati mill-Parlament.

Il-Parlament Ewropew issa jħares ukoll lejn il-valur miżjud Ewropew tal-proposti, billi janalizza l-benefiċċju potenzjali ta’ azzjoni tal-UE fil-ġejjieni. Fuq talba ta’ kumitat tal-Parlament Ewropew, valutazzjonijiet Ewropej b'valur miżjud jistgħu jiġu pprovduti biex jivvalutaw l-impatti potenzjali u jidentifikaw il-vantaġġi u l-iżvantaġġi tal-proposti magħmula f’rapporti leġiżlattivi tal-Parlament. Il-Parlament Ewropew issa jista' jipproduċi wkoll rapporti dwar l-ispiża jekk ma titteħidx azzjoni fil-livell tal-UE, dwar oqsma ta’ politika b’potenzjal sinifikanti għal aktar effiċjenza u/jew fuq il-kisba ta’ “ġid pubbliku” billi jieħu azzjoni fil-livell tal-UE, fejn tali azzjoni bħalissa hija nieqsa.

Fl-2012, il-Parlament Ewropew ħareġ 10 evalwazzjonijiet inizjali tal-valutazzjonijiet tal-impatt tal-Kummissjoni, evalwazzjoni waħda dettaljata ta’ valutazzjoni tal-impatt tal-Kummissjoni u tliet rapporti dwar valur miżjud Ewropew.

Fit-13 ta’ Settembru 2012, il-Parlament Ewropew adotta riżoluzzjoni dwar it-tfassil aħjar tal-liġijiet, li sa ċertu punt twieġeb għar-rapport annwali tal-Kummissjoni għall-2010 dwar is-sussidjarjetà u l-proporzjonalità.[10] F’dan ir-rigward, il-Parlament Ewropew, simili għall-COSAC, jissuġġerixxi li l-każ għandu jiġi eżaminat sabiex jistabbilixxi l-kriterji fil-livell tal-UE għall-evalwazzjoni ta’ konformità mal-prinċipji tas-sussidjarjetà u l-proporzjonalità.

Barra minn hekk, ir-rapport tal-Parlament Ewropew jenfasizza d-dimensjoni reġjonali u lokali tal-iskrutinju tas-sussidjarjetà u jitlob li ssir analiżi indipendenti tal-Kummissjoni tar-rwol tal-parlamenti reġjonali u lokali fil-qasam tal-kontroll tas-sussidjarjetà. Fit-tweġiba tagħha għar-rapport tal-Parlament Ewropew,[11] il-Kummissjoni kkonfermat li l-Kumitat tar-Reġjuni diġà ħejja din l-analiżi.[12]

2.4. Il-Kumitat tar-Reġjuni

Fl-2012, il-Kumitat tar-Reġjuni (CoR) adotta strateġija ġdida dwar il-monitoraġġ tal-prinċipju ta’ sussidjarjetà. L-għan huwa li tissaħħaħ mill-ġdid l-istruttura tal-governanza ta’ ħidma ta’ monitoraġġ ta’ sussidjarjetà tal-CoR, tistabbilixxi approċċ komprensiv biex timmonitorja s-sussidjarjetà matul il-proċess tat-teħid ta’ deċiżjonijiet tal-UE, bl-involviment tal-UE u l-istituzzjonijiet nazzjonali f’din il-ħidma u tikkonsolida d-disponibbiltà tal-CoR biex tieħu azzjoni quddiem il-Qorti tal-Ġustizzja.

F’dan il-kuntest, twaqqaf il-grupp ta’ tmexxija tas-sussidjarjetà biex jipprovdi governanza politika ta’ ħidma ta’ monitoraġġ ta’ sussidjarjetà tal-CoR. Dan jikkoordina u jagħti segwitu politiku għall-attivitajiet ta' monitoraġġ tas-sussidjarjetà matul is-sena. Huwa responsabbli sabiex jenfasizza l-prijoritajiet annwali ta' sussidjarjetà u sabiex isiru proposti dwar l-użu tal-iktar għodod xierqa u l-proċeduri tan-Netwerk għall-Monitoraġġ tas-Sussidjarjetà sabiex tiġi appoġġjata l-ħidma tar-relaturi tal-CoR fil-proċess leġiżlattiv.

L-istrateġija riveduta tenfasizza li attivitajiet ta’ monitoraġġ tas-sussidjarjetà tal-KoR għandhom jinbdew matul il-fażi preleġiżlattiva. Dan l-approċċ jiddependi fuq ir-rwol ta’ Grupp ta’ Esperti tas-Sussidjarjetà, li jinkludi 16-il uffiċjal min-Netwerk ta’ Monitoraġġ tas-Sussidjarjetà magħżula skont l-għarfien espert tagħhom f’termini ta’ sussidjarjetà u għall-esperjenza kbira tagħhom fil-liġi tal-UE. Il-Grupp iltaqa’ għall-ewwel darba fil-25 ta’ Ottubru 2012 u għażel inizjattivi għal monitoraġġ prijoritarju. Fuq din il-bażi, il-Bureau tal-CoR adotta fit-30 ta’ Jannar 2013 il-Programm ta’ Ħidma ta’ Sussidjarjetà.[13] Dan jinkludi erba’ inizjattivi ppjanati fil-Programm ta’ Ħidma tal-Kummissjoni għall-2013 (il-fatturazzjoni elettronika fil-qasam tal-akkwist pubbliku, “Blue Belt” għal suq uniku għat-trasport marittimu, ir-Reviżjoni tal-Politika u l-Leġiżlazzjoni dwar l-Iskart, il-qafas dwar il-klima ambjentali u l-valutazzjoni tal-enerġija li jippermetti l-estrazzjoni sigura u mingħajr periklu l-estrazzjoni tal-idrokarburi mhux konvenzjonali) u l-Mobbiltà Urbana (li mhijiex koperta mis-CWP 2013, iżda l-Kummissjoni ħabbret l-intenzjoni tagħha li toħroġ Komunikazzjoni dwar id-dimensjoni urbana tal-politika tat-trasport tal-UE fl-2013).

Imwaqqaf fl-2007, in-Netwerk tal-Monitoraġġ tas-Sussidjarjetà (SMN) huwa l-għodda ta’ monitoraġġ prinċipali tal-CoR, u inkluda 141 imsieħeb fi tmiem l-2012. Il-bażi tas-sħubija u r-rappreżentanza tiegħu reġgħu żdiedu fl-2012, partikolarment minħabba li ngħaqdu l-parlamenti u l-gvernijiet reġjonali. Konsultazzjonijiet tal-imsieħba SMN huma l-għodda operattiva ewlenija użata waqt it-tħejjija ta’ abbozz ta’ opinjoni tal-CoR permezz ta’ relatur. Saru tliet konsultazzjonijiet fl-2012 — dwar il-Faċilità Nikkollegaw l-Ewropa,[14] fis-7 Programm ta’ Azzjoni Ambjentali (EAP)[15] u dwar l-eżerċizzju tad-dritt li tittieħed azzjoni kollettiva fil-kuntest tal-libertà tal-istabbiliment u l-libertà li jiġu pprovduti servizzi (“Monti II”).[16] Taħt pjan ta’ Azzjoni tal-SMN, grupp ħadem matul is-sena dwar ir-reviżjoni tal-linji gwida tat-TEN-T u l-Faċilità Nikkollegaw l-Ewropa.

Fi Frar 2012, REGPEX, l-Iskambju Parlamentari Reġjonali, tnieda bħala sub-network tan-Netwerk għall-Monitoraġġ tas-Sussidjarjetà, miftuħ għall-parlamenti u l-gvernijiet tar-reġjuni li għandhom setgħat leġiżlattivi. Huwa jappoġġja dawn ir-reġjuni meta jkunu qed jagħtu s-sehem tagħhom fil-monitoraġġ tas-sussidjarjetà tal-leġiżlazzjoni tal-UE, b’mod partikolari fil-kuntest ta’ sistema ta’ twissija bikrija u ta’ wara Lisbona u l-konsultazzjoni possibbli tagħhom mill-parlamenti nazzjonali. Il-CoR jikkunsidra lil REGPEX mhux biss bħala bażi ta' dejta teknika, li jipprovdi aċċess għal sorsi ta’ informazzjoni u li tippubblika l-pożizzjonijiet reġjonali, iżda wkoll bħala netwerk li jrawwem kuntatti fost ir-"reġjuni leġiżlattivi" tal-UE.

L-opinjonijiet li ġejjin li ġew addottati mill-CoR fl-2012 qajmu tħassib fir-rigward tal-konformità mal-prinċipji tas-sussidjarjetà u proporzjonalità, uħud minnhom jiċċitaw ksur potenzjali: il-proposta għal Regolament dwar il-Fond Ewropew għall-Iżvilupp Reġjonali ERDF; is-7 Programm ta' Azzjoni Ambjentali; il-Pakkett tal-akkwist pubbliku, il-pakkett tal-protezzjoni tad-dejta u l-impjieg ta’ ħaddiema fil-qafas tal-provvediment ta’ servizzi.

2.5. Il-Qorti tal-Ġustizzja

Fl-2012 il-Qorti tal-Ġustizzja ma tat l-ebda sentenza li żviluppat b’mod sinifikanti il-prinċipju tas-sussidjarjetà. Madankollu, fil-każ C-288/11 P, Mitteldeutsche Flughafen, sentenza tad-19 ta’ Diċembru 2012, il-Qorti tal-Ġustizzja kkonfermat li l-prinċipju tas-sussidjarjetà ma japplikax fil-qasam tal-għajnuna mill-Istat, li fih il-Kummissjoni għandha kompetenza esklussiva.

Barra minn hekk, fil-kawża C-221/10 P, Artegodan, sentenza tad-19 ta’ April 2012, il-Qorti tenniet li s-sussidjarjetà, u b'mod aktar ġenerali r-regoli ta' kompetenza tat-Trattat, ma jagħtux lok għal drittijiet individwali, u għalhekk ksur ta’ dawn ir-regoli fih innifsu ma jikkawżawx responsabbiltà mhux kuntrattwali tal-Unjoni u l-istituzzjonijiet tagħha.

3. Każijiet ewlenin fejn tqajjem tħassib dwar is-sussidjarjetà u l-proporzjonalità

Proposta għal Regolament dwar l-eżerċizzju tad-dritt li tittieħed azzjoni kollettiva fil-kuntest tal-libertà tal-istabbiliment u l-libertà li tagħti servizz (Monti II).

Il-Parlamenti nazzjonali ħarġu 12-il opinjoni motivata dwar il-proposta Monti II, li jirrappreżentaw 19-il vot (18 ikun il-limitu), u b’hekk għall-ewwel darba wasslu għall-imsejħa karta safra.[17]

L-għan tal-proposta tal-Kummissjoni kien li jiċċara l-interazzjoni bejn l-eżerċizzju tad-drittijiet soċjali u l-eżerċizzju tal-libertà ta’ stabbiliment u ta’ provvista ta’ servizzi mnaqqxa fit-Trattat. Hija ppruvat tindirizza t-tħassib imqajjem mill-partijiet interessati (speċjalment it-trejdjunjins) li, fis-suq uniku, il-libertajiet ekonomiċi jipprevalu fuq id-dritt tal-istrajk wara s-sentenzi Viking Line u Laval tal-Qorti tal-Ġustizzja, billi jiġu ċċarati fi strument leġiżlattiv li ma jeżisti l-ebda preċedenza bejn it-tnejn. Il-Kummissjoni kienet konxja tas-sensittività tal-kwistjoni u diffikultajiet biex isibu bażi komuni bejn l-interessi kuntrastanti dwar kif l-aħjar tittratta kunflitt industrijali f’sitwazzjonijiet li jinvolvu n-negozji u l-ħaddiema fi Stati Membri differenti.

L-opinjonijiet motivati nħarġu minn SE Riksdag (2 voti), DK Folketing (2 voti), FI Eduskunta (2 voti), FR Sénat (1 vot), PL Sejm (1 vot), PT Assembleia da República (2 voti), LV Saeima (2 voti), LU Chambre des Députés (2 voti), BE Chambre des Représentants (1 vot), UK House of Commons (1 vot), NL Tweede Kamer (1 vot) u MT Kamra tad-Deputati (2 voti).

Il-maġġoranza tal-parlamenti nazzjonali li adottaw opinjonijiet motivati esprimew dubji dwar l-użu tal-Artikolu 352 tat-TFUE bħala l-bażi legali għall-proposta. Ħafna sabu l-użu ta’ din il-bażi legali mhux ġustifikati biżżejjed. Xi wħud ikkunsidraw li minbarra d-dritt tal-istrajk mill-kamp ta' applikazzjoni tal-Artikolu 153 tat-TFUE għandha wkoll tiġi eskluża l-possibbiltà li tuża l-Artikolu 352 tat-TFUE bħala bażi legali. L-istess għadd ta’ parlamenti nazzjonali esprimew dubji dwar il-valur miżjud tal-proposta u l-ħtieġa għall-azzjoni proposta. Uħud mill-kmamar rrimarkaw li l-proposta ma għandhiex tbiddel is-sitwazzjoni legali attwali, oħrajn sostnew li ma tikkontribwixxix għal ċarezza u ċertezza legali akbar. Barra minn hekk, ħames parlamenti nazzjonali argumentaw li l-Artikolu 153(5) tat-TFUE jeskludi d-dritt tal-istrajkjar minn kompetenza tal-UE, waqt li oħrajn allegaw li l-prinċipju ġenerali u l-prova tal-proporzjonalità inklużi fil-proposta mhumiex konformi mal-prinċipju tas-sussidjarjetà u jistgħu joħolqu impatt negattiv fuq id-dritt tal-istrajk. Fost kwistjonijiet oħra li tqajmu, il-parlamenti nazzjonali staqsew jekk hemmx bżonn ta’ mekkaniżmu ta’ soluzzjoni alternattiv għat-tilwim, għax beżgħu li dan jinterferixxi mas-sistemi nazzjonali. Huma ressqu wkoll dubji dwar il-ħtieġa ta’ mekkaniżmu ta’ twissija.

Wara valutazzjoni fil-fond tal-argumenti mressqa mill-parlamenti nazzjonali f’opinjonijiet motivati tagħhom, il-Kummissjoni sabet li l-prinċipju tas-sussidjarjetà ma kienx inkiser.

Fit-tweġibiet tagħha lill-parlamenti nazzjonali li ħarġu opinjonijiet motivati,[18] il-Kummissjoni spjegat li l-għan tal-proposta tal-Kummissjoni kien li jiċċara l-prinċipji ġenerali u r-regoli applikabbli fil-livell tal-UE fir-rigward tal-eżerċizzju tad-dritt fundamentali li tittieħed azzjoni kollettiva fil-kuntest tal-libertà biex jingħata servizz u l-libertà tal-istabbiliment, inkluż il-ħtieġa li jiġu rikonċiljati fil-prattika f’sitwazzjonijiet transfruntieri. Il-Kummissjoni temmen li dan ma jistax jinkiseb mill-Istati Membri waħedhom u jeħtieġ azzjoni fil-livell tal-Unjoni Ewropea.

Rigward il-kwistjoni tal-bażi legali, il-Kummissjoni ddeċidiet li tuża l-Artikolu 352 tat-TFUE minħabba n-nuqqas ta’ dispożizzjoni espliċita fit-Trattat. Għalkemm huwa minnu li l-Artikolu 153(5) tat-TFUE jeskludi d-dritt tal-istrajkjar mill-firxa ta’ kwistjonijiet li jistgħu jiġu regolati madwar l-UE bi standards minimi stabbiliti f’direttiva, id-deċiżjonijiet tal-Qorti wrew biċ-ċar li l-fatt li l-Artikolu 153 ma japplikax għad-dritt tal-istrajkjar ma jeskludix l-azzjoni kollettiva mill-kamp ta’ applikazzjoni tal-liġi tal-UE. Barra minn hekk il-Kummissjoni kkunsidrat li Regolament kien l-aktar strument ġuridiku xieraq biex jintużaw bħala huwa direttament applikabbli u kif din kienet tnaqqas il-kumplessità regolatorja u mogħtija ċertezza legali akbar għal dawk soġġetti għal-leġiżlazzjoni madwar l-Unjoni, billi tiċċara r-regoli applikabbli.

Barra minn hekk, ir-Regolament propost kien jirrikonoxxi l-irwol tal-qrati nazzjonali fl-istabbiliment tal-fatti u jaċċerta jekk l-azzjonijiet isegwux għanijiet li jikkostitwixxu interess leġittimu, humiex adatti sabiex jintlaħqu dawn l-għanijiet, u jekk imorrux lil hinn minn dak li huwa meħtieġ biex dawn jintlaħqu. Bl-istess mod huwa jirrikonoxxi l-importanza tal-liġijiet u l-proċeduri nazzjonali attwali għat-tħaddim tad-dritt tal-istrajkjar, inklużi l-istituzzjonijiet eżistenti alternattivi għar-riżoluzzjoni tat-tilwim, li la kienu se jinbidlu u lanqas jintlaqtu mill-proposta. Dan kien jispjega r-rwol ta’ mekkaniżmi alternattivi ta’ riżoluzzjoni informali li jeżistu f’għadd ta’ Stati Membri.

Il-Kummissjoni kkonkludiet li l-prinċipju tas-sussidjarjetà ma kienx miksur, iżda hija ħadet nota tal-opinjonijiet espressi mill-parlamenti nazzjonali kif ukoll il-qagħda tad-diskussjonijiet dwar l-abbozz tar-Regolament fost il-partijiet interessati. Hija rrikonoxxiet li l-proposta tagħha probabbilment ma kienx se jkollha l-appoġġ politiku neċessarju fil-Parlament Ewropew u l-Kunsill biex tippermetti l-adozzjoni. Fid-dawl ta’ dan, il-Kummissjoni infurmat lill-Parlament Ewropew, lill-Kunsill u lill-Parlamenti nazzjonali permezz tal-ittri tat-12 u t-13 ta’ Settembru 2012 dwar l-intenzjoni tagħha li tirtira l-proposta tagħha u spjegat li, b’dan il-mod, hija ttamat ukoll biex tiġi ffaċilitata azzjoni rapida tan-negozjati tal-proposta għal Direttiva tal-Parlament Ewropew u tal-Kunsill dwar l-infurzar tad-Direttiva 96/71/KE, u li jippermettu li jimxu 'l quddiem dwar l-infurzar tad-drittijiet tal-ħaddiema stazzjonati kif enfasizzat fil-punt 3 l) tal-“Patt għal Tkabbir u Impjiegi” adottat mill-Kunsill Ewropew fit-28-29 ta’ Ġunju 2012. Il-Kummissjoni ħadet id-deċiżjoni tagħha li tirtira l-proposta Monti II fis-26 ta’ Settembru 2012.[19]

Proposta għal regolament dwar il-Fond għal Għajnuna Ewropea għall-Persuni l-Aktar fil-Bżonn [20]

Il-proposta tal-Kummissjoni li attirat t-tieni l-ogħla numru ta’ opinjonijiet motivati fl-2012 (5) kienet il-proposta għat-twaqqif tal-fond għall-għajnuna Ewropea għal Dawk l-Aktar fil-Bżonn. Il-Parlamenti nazzjonali kollha li bagħtu opinjonijiet motivati [21] qajmu l-istess kwistjoni, jiġifieri n-nuqqas ta’ ġustifikazzjoni suffiċjenti rigward il-konformità tal-proposta mal-prinċipju tas-sussidjarjetà.[22] DE Bundestag issottometta li l-Artikoli 174 u 175 tat-TFUE ma jipprovdux għal kompetenza tal-UE fil-ġlieda kontra l-faqar, li l-politika soċjali u miżuri skont politika bħal din jaqgħu taħt il-kompetenza tal-Istati Membri u li l-proposta kisret il-prinċipju ta’ proporzjonalità. SE Riksdag argumentat li l-faqar u l-esklużjoni soċjali huma l-aħjar evitati permezz tal-impjiegi li jippermettu għal appoġġ indipendenti u minn sistema tas-sigurtà soċjali għall-popolazzjoni kollha kemm hi. Fil-fehma tagħha, is-sigurtà soċjali hija r-responsabbiltà tal-Istati Membri u l-għajnuna hija bl-aktar mod effiċjenti ġestita mill-Istati Membri. Din l-opinjoni ġiet kondiviża minn DK Folketing, li sostniet l-għan ta' appoġġ għal dawk l-aktar fil-bżonn jista' jkun sodisfat bl-aħjar mod mill-Istati Membri, jew fil-livell ċentrali, reġjonali jew dak lokali. Il-UK House of Lords sabet li ma kien sar l-ebda argument konvinċenti mill-Kummissjoni biex tiġġustifika l-proposta tagħha fid-dawl tal-prinċipju tas-sussidjarjetà u li kwalunkwe inċertezza dwar l-ħila tal-Istati Membri kollha biex isostnu n-nefqa soċjali u l-investiment f’livelli suffiċjenti tkun tista’ tintlaħaq permezz ta’ azzjoni taħt il-programmi ta’ koeżjoni eżistenti tal-UE. Il-UK House of Commons staqsiet hemmx bżonn għall-azzjoni proposta.

Fit-tweġibiet tagħha għal dawn opinjonijiet motivati, il-Kummissjoni enfasizzat li kienet eżaminat id-dritt tal-UE li taġixxi u l-valur miżjud tiegħu matul il-proċess tal-valutazzjoni tal-impatt u li dawn is-sejbiet ġew imqassra f’memorandum ta’ spjegazzjoni li jakkumpanja l-proposta. Il-Kummissjoni rrikonoxxiet li l-promozzjoni tal-ħidma u appoġġ indipendenti huwa l-aħjar mod sabiex jikkumbattu l-esklużjoni soċjali u li l-Fond Soċjali Ewropew għandu jibqa’ l-istrument ewlieni tal-UE għall-ġlieda kontra l-faqar u l-esklużjoni soċjali billi jappoġġja miżuri ta’ attivazzjoni. Madankollu, hija enfasizzat li għadd dejjem ikbar ta’ Ewropej huma wisq’ il bogħod mis-suq tax-xogħol biex jibbenefikaw mill-appoġġ li jista' jiġi pprovdut minn fondi eżistenti. Il-Kummissjoni ġibdet l-attenzjoni dwar l-obbligu propost li jagħqdu d-distribuzzjoni ta’ assistenza materjali b’miżuri ta’ akkumpanjament, li jimmiraw lejn ir-reintegrazzjoni soċjali ta’ persuni megħjuna, li jagħmel lill-Fond propost strument li jmur lil hinn minn interventi passivi. Ir-rapport enfasizza li l-Fond propost għandu jkun ibbażat fuq skemi ta’ appoġġ nazzjonali u jkunu implimentati taħt ġestjoni kondiviża, li jħalli lill-Istati Membri r-responsabbiltà primarja biex jiġu identifikati l-aħjar gruppi fil-mira u tipi ta’ interventi.

Proposta għal regolament dwar il-protezzjoni ta' individwi fir-rigward tal-ipproċessar ta' dejta.personali u dwar il-moviment liberu ta' dik id-dejta.[23]

Fost it-tmien proposti tal-Kummissjoni li wasslu għal tliet opinjonijiet motivati, il-proposta għal Regolament dwar il-protezzjoni tad-dejta kienet dik li ġiet ikkritikata mhux biss fuq il-bażi tas-sussidjarjetà, iżda wkoll ta’ proporzjonalità. Uħud mill-Parlamenti nazzjonali kienu tal-fehma li l-kamp ta' applikazzjoni tal-att propost għandu jibqa’ limitat għal skambji transkonfinali. F’termini ta’ proporzjonalità huma argumentaw li l-proposta tista’ tinfluwenza t-trattament ta’ dejta personali mis-settur pubbliku (b’mod partikolari fil-qasam tas-saħħa u s-servizzi soċjali). Fl-aħħar nett, diversi parlamenti nazzjonali esprimew dubji dwar il-kamp ta' applikazzjoni u l-għadd ta’ setgħat delegati mogħtija lill-Kummissjoni mill-proposta. Dan l-argument tal-aħħar kien prinċipalment rifless mill-Istati Membri fid-diskussjonijiet tal-Kunsill kif ukoll minn uħud mill-membri tal-Parlament Ewropew.

Fit-tweġibiet tagħha l-Kummissjoni spjegat li l-għażla ta’ Regolament għandha l-għan li tkompli tarmonizza l-leġiżlazzjoni tal-protezzjoni tad-dejta Ewropea eżistenti biex jiġi żgurat livell għoli ta’ protezzjoni fl-Unjoni kollha u tiggarantixxi b’dan il-mod il-fluss ħieles tad-dejta personali fis-suq intern. Fil-limiti tar-Regolament, l-Istati Membri jżommu ċerta marġini ta’ manuvrar fis-settur pubbliku, kif diġà speċifikat mill-proposta. Fir-rigward ta' setgħat delegati, il-Kummissjoni ċċarat li se jassiguraw l-adattabilità xierqa tal-leġiżlazzjoni għad-dinja li kull ma tmur dejjem tipprogressa ta’ dejta elettronika mingħajr il-ħtieġa ta’ negozjar mill-ġdid tal-Att fil-livell ta’ koleġiżlaturi.

4. Konklużjonijiet

Is-sena 2012 ġabet magħha aktar għarfien tal-prinċipji tas-sussidjarjetà u l-proporzjonalità fil-kuntest interistituzzjonali, mhux l-inqas minħabba l-parlamenti nazzjonali li jiskattaw l-ewwel karta safra.

Kwistjonijiet ta’ kontroll u ta' monitoraġġ tas-sussidjarjetà kienu wkoll b'mod prominenti fuq l-aġenda tal-Parlament Ewropew u l-Kumitat tar-Reġjuni, li t-tnejn li huma adattataw il-proċeduri interni tagħhom biex ikunu f’qagħda aħjar biex jeżaminaw l-impatt u l-valur miżjud ta’ xogħolhom. Istituzzjonijiet u entitajiet tal-UE qed jesploraw ukoll  sinerġiji f’termini tal-valutazzjoni ta’ konformità mal-prinċipji tas-sussidjarjetà u proporzjonalità. B’riżultat ta’ dan, il-Kumitat tar-Reġjuni issa jistgħu jissupplixxu informazzjoni, fuq talba espliċita mill-Kummissjoni, dwar l-impatt reġjonali u lokali ta' proposta li kienet ippjanata fil-valutazzjonijiet tal-impatt tal-Kummissjoni. Il-Parlament Ewropew saħħaħ ukoll l-approċċ tiegħu biex jivvaluta l-impatt u l-valur miżjud tal-UE.

Is-sena 2012 rat intensifikazzjoni ta’ diskussjonijiet dwar id-definizzjoni tal-prinċipji tas-sussidjarjetà u l-proporzjonalità, jiġifieri l-ħtieġa li jiġi definit aħjar il-kamp ta' applikazzjoni tal-kontroll tas-sussidjarjetà kif deskritt fit-Trattat. Għalkemm il-parlamenti nazzjonali jaraw benefiċċji ċari f’koordinazzjoni aktar mill-qrib tal-iskrutinju tagħhom tax-xogħol u aktar vuċijiet li jitolbu linji gwida, huma jixtiequ jżommu d-dritt li jinterpretaw dawn il-prinċipji. F’dan il-kuntest, għandu jiġi mfakkar li l-linji gwida dwar il-valutazzjoni tal-impatt tal-Kummissjoni[24] diġà stabbilixxew b’mod ċar il-kriterji użati biex jivvalutaw il-konformità tal-proposti tal-Kummissjoni mas-sussidjarjetà u l-proporzjonalità, u l-Kummissjoni minn dejjem inkoraġġiet istituzzjonijiet oħra sabiex japplikaw l-istess kriterji.

Anness

Lista ta' inizjattivi tal-Kummissjoni li dwarhom il-Parlamenti nazzjonali fl-2012 ħarġu opinjonijiet motivati[25] fir-rigward tal-konformità mal-prinċipju ta' sussidjarjetà[26]

|| Dokument tal-Kummissjoni || Titlu || Opinjonijiet motivati (il-Protokoll 2) || Kamra nazzjonali li qed tressaq opinjonijiet motivati

1 || COM(2012)130 || L-eżerċizzju tad-dritt li tittieħed azzjoni kollettiva fil-kuntest tal-libertà tal-istabbiliment u l-libertà li tagħti servizz (Monti II) || 12 || BE Chambre des Représentants DK Folketing FI Eduskunta FR Sénat LV Saeima LU Chambre des Députés MT Kamra tad-Deputati NL Tweede Kamer PL Sejm PT Assembleia da República UK House of Commons SE Riksdag

2 || COM(2012)617 || Fond għal Għajnuna Ewropea għall-Persuni l-Aktar fil-Bżonn || 5 || DE Bundestag DK Folketing UK House of Commons UK House of Lords SE Riksdag

3 || COM (2012)380 || Testijiet perjodiċi tal-affidabbiltà stradali għal vetturi bil-mutur u t-trejlers tagħhom u li tħassar id-Direttiva 2009/40/KE || 5 || CY Vouli ton Antiprosopon NL Eerste Kamer NL Tweede Kamer FR Sénat SE Riksdag

4 || COM(2012)11 || Il-protezzjoni tal-individwi fir-rigward tal-ipproċessar ta’ dejta personali u dwar il-moviment liberu ta’ dik id-dejta (Regolament dwar il-Protezzjoni ta’ Dejta Ġenerali) || 4 || DE Bundesrat BE Chambre des Représentants FR Sénat SE Riksdag

5 || COM (2011)778 || Proposta li temenda d-Direttiva 2006/43/KE dwar il-verifiki statutorji tal-kontijiet annwali u tal-kontijiet konsolidati || 3 || BE Chambre des Représentants SK Národná Rada SE Riksdag

6 || COM(2011)779 || Rekwiżiti speċifiċi dwar l-awditjar statutorju ta’ entitajiet ta’ interess pubbliku || 3 || BE Chambre des Représentants SK Národná Rada SE Riksdag

7 || COM(2011)828 || L-istabbiliment ta' regoli u proċeduri fir-rigward tal-introduzzjoni ta' restrizzjonijiet operattivi relatati mal-istorbju f’ajruporti tal-Unjoni fi ħdan l-Approċċ Bilanċjat u li jħassar id-Direttiva 2002/30/KE tal-Parlament Ewropew u tal-Kunsill || 3 || DE Bundesrat FR Sénat NL Tweede Kamer

8 || COM (2011)897 || L-għoti ta’ kuntratti ta’ konċessjoni || 3 || DE Bundesrat AU Bundesrat ES Congreso de los Diputados/Senado

9 || COM (2012)372 || L-immaniġġjar kollettiv tad-drittijiet tal-awtur u drittijiet relatati u ħruġ ta’ liċenzji multiterritorjali ta’ drittijiet f’xogħlijiet mużikali għal użi online fis-suq intern || 3 || FR Sénat PL Sejm SE Riksdag

10 || COM (2012)381 || Proposta li temenda d-Direttiva tal-Kunsill 1999/37/KE dwar id-dokumenti ta' reġistrazzjoni għall-vetturi  || 3 || CY Vouli ton Antiprosopon NL Eerste Kamer NL Tweede Kamer

11 || COM (2012)382 || Proposta dwar il-pjan direzzjonali tekniku tal-affidabbiltà stradali ta' vetturi kummerċjali li jiċċirkolaw fl-Unjoni u li tħassar id-Direttiva 2000/30/KE || 3 || CY Vouli ton Antiprosopon NL Eerste Kamer NL Tweede Kamer

12 || COM (2012)576 || L-Aċċess għal Riżorsi Ġenetiċi u l-Qsim Ġust u Ekwu ta' Benefiċċji li Jirriżultaw mill-Użu tagħhom fl-Unjoni || 3 || FR Sénat IT Senato della Repubblica SE Riksdag

13 || COM (2012)614 || It-titjib tal-bilanċ bejn is-sessi fost diretturi mhux eżekuttivi ta' kumpaniji elenkati f'boroż u miżuri relatati || 3[27] || DK Folketing NL Eerste Kamer/Tweede Kamer SE Riksdag

14 || COM (2011)821 || Dispożizzjonijiet komuni għall-monitoraġġ u l-valutazzjoni tal-abbozzi tal-pjanijiet baġitarji u l-iżgurar tal-korrezzjoni tad-defiċit eċċessiv tal-Istati Membri fiż-żona tal-euro || 2 || FR Sénat SE Riksdag

15 || COM (2012)10 || Il-protezzjoni ta’ individwi fir-rigward tal-ipproċessar ta’ dejta personali mill-awtoritajiet kompetenti għall-finijiet ta’ prevenzjoni, investigazzjoni, sejbien jew prosekuzzjoni ta’ reati kriminali jew l-eżekuzzjoni ta’ pieni kriminali, u l-moviment liberu ta’ dik id-dejta || 2 || DE Bundesrat SE Riksdag

16 || COM(2012)167 || Proposta li temenda r-Regolament (KE) Nru 223/2009 dwar l-Istatistika Ewropea || 2 || AU Bundesrat ES Congreso de los Diputados/Senado

17 || COM(2012)48 || Proposta li temenda d-Direttiva 2001/83/KE, fir-rigward tal-informazzjoni għall-pubbliku inġenerali dwar prodotti mediċinali soġġetti għal preskrizzjoni medika u fir-rigward tal-informazzjoni għall-pubbliku inġenerali dwar prodotti mediċinali soġġetti għal preskrizzjoni medika, id-Direttiva 2001/83/KE dwar il-kodiċi tal-Komunità li għandu x’jaqsam ma’ prodotti mediċinali għall-użu mill-bniedem || 2 || PL Senat SE Riksdag

18 || COM (2012)49 || Proposta li temenda r-Regolament (KE) Nru 726/2004 fir-rigward ta' informazzjoni lill-pubbliku ġenerali dwar prodotti mediċinali għall-użu mill-bniedem soġġetti għal preskrizzjoni medika || 2 || PL Senat SE Riksdag

19 || COM(2012)84 || It-trasparenza ta’ miżuri li jirregolaw il-prezzijiet ta’ prodotti mediċinali għall-użu mill-bniedem u l-inklużjoni tagħhom fil-kamp ta’ applikazzjoni ta’ sistemi pubbliċi tal-assigurazzjoni tas-saħħa || 2 || AU Nationalrat LU Chambre des Députés

20 || COM(2011)793 || Soluzzjoni alternattiva għat-tilwim u li temenda r-Regolament (KE) Nru 2006/2004 u d-Direttiva 2009/22/KE (id-Direttiva dwar l-ADR tal-konsumaturi) || 2 || DE Bundesrat NL Eerste Kamer

21 || COM(2011)895 || Akkwist minn entitajiet li joperaw fis-setturi tas-servizzi tal-ilma, l-enerġija, it-trasport u dak postali || 2 || SE Riksdag UK House of Commons

22 || COM(2011)896 || Akkwist pubbliku || 2 || SE Riksdag UK House of Commons

23 || COM(2011)747 || Proposta li temenda r-Regolament (KE) Nru 1060/2009 dwar aġenziji li jiggradaw il-kreditu || 1 || SE Riksdag

24 || COM(2011)794 || Soluzzjoni online għat-tilwim, għat-tilwim tal-konsumaturi (Regolament dwar l-ODR tal-konsumaturi) || 1 || NL Eerste Kamer

25 || COM(2011)824 || Servizzi ta’ groundhandling fl-ajruporti tal-Unjoni u li jħassar id-Direttiva tal-Kunsill 96/67/KE || 1 || LU Chambre des Députés

26 || COM(2011)834 || Li jistabbilixxi Programm għall-Kompetittività tal-Intrapriżi u l-Intrapriżi ż-żgħar u ta’ daqs medju (2014 - 2020) || 1 || SE Riksdag

27 || COM(2011)873 || Li jistabbilixxi s-Sistema Ewropea ta’ Sorveljanza tal-Fruntieri (EUROSUR) || 1 || SE Riksdag

28 || COM(2011)877 || Proposta li temenda d-Direttiva 2003/98/KE dwar l-użu mill-ġdid tal-informazzjoni tas-settur pubbliku || 1 || SE Riksdag

29 || COM(2012)150 || Proposta li temenda d-Direttivi 1999/4/KE, 2000/36/KE, 2001/111/KE, 2001/113/KE u 2001/114/KE fir-rigward tas-setgħat li għandhom jiġu konferiti fuq il-Kummissjoni || 1 || AU Bundesrat

30 || COM(2012)280 || Li jistabbilixxi qafas għall-irkupru u r-riżoluzzjoni ta' istituzzjonijiet ta' kreditu u ditti ta' investiment u li jemenda d-Direttivi tal-Kunsill 77/91/KEE u 82/891/KE u d-Direttivi 2001/24/KE, 2002/47/KE, 2004/25/KE, 2005/56/KE, 2007/36/KE u 2011/35/KE u r-Regolament (UE) Nru 1093/2010 || 1 || SE Riksdag

31 || COM(2012)35 || Statut għal Fondazzjoni Ewropea (FE) || 1 || LT Seimas

32 || COM(2012)363 || Il-ġlieda kontra l-frodi li jaffettwaw l-interessi finanzjarji tal-Unjoni permezz tal-liġi kriminali || 1 || SE Riksdag

33 || COM(2012)369 || Il-provi kliniċi fuq prodotti mediċinali għall-użu mill-bniedem, u li jħassar id-Direttiva 2001/20/KE || 1 || PL Sejm

34 || COM(2012)511 || Li jikkonferixxi kompiti speċifiċi lill-Bank Ċentrali Ewropew fir-rigward ta’ politiki relatati mas-superviżjoni prudenzjali ta' istituzzjonijiet ta' kreditu || 1 || SE Riksdag

|| Opinjonijiet motivati dwar proposti mgħoddija individwalment || || 83 ||

|| Opinjonijiet motivati dwar pakketti ta’ proposti[28] || || -13 ||

|| TOTAL || || 70 ||

[1] COM(2013) 565.

[2] http://ec.europa.eu/governance/impact/planned_ia/planned_ia_en.htm.

[3] SEC(2009) 92.

[4] http://ec.europa.eu/governance/impact/iab/iab_en.htm.

[5] http://ec.europa.eu/governance/impact/key_docs/docs/iab_report_2012_en_final.pdf.

[6] COM(2012) 514.

[7] Ir-rapport tal-Kumitat Kostituzzjonali tar-Riksdag — 2012/13:KU8.

[8] COSAC hija Konferenza tal-Kumitati tal-Parlamenti nazzjonali tal-Istati Membri tal-Unjoni Ewropea li tittratta l-kwistjonijiet tal-Unjoni Ewropea kif ukoll rappreżentanti tal-Parlament Ewropew.

[9] It-tmintax-il rapport biannwali: L-iżviluppi fil-Proċeduri u l-Prattiki tal-Unjoni Ewropea Rilevanti għall-Iskrutinju Parlamentari, is-27 ta’ Settembru 2012.

[10] COM(2011) 344.

[11] SP (2012) 766/2.

[12] http://extranet.cor.europa.eu/subsidiarity/regpex/Pages/Study-on-Regional-Parliaments.aspx.

[13] CDR2336-2012.

[14] COM(2011) 659.

[15] COM(2012) 95.

[16] COM(2012) 130.

[17]  Ara l-Artikolu 7(2) tal-Protokoll Nru 2 dwar l-applikazzjoni tal-prinċipji tas-sussidjarjetà u tal-proporzjonalità.

[18] Ittra tal-14 ta’ Marzu 2013.

[19] PV(2012) 2017; http://ec.europa.eu/transparency/regdoc/rep/10061/2012/EN/10061-2012-2017-EN-F-0.Pdf.

[20] COM(2012) 617; il-predeċessura tagħha kien il-programm tal-UE għad-Distribuzzjoni tal-Ikel għall-Persuni l-Aktar fil-Bżonn li għandu jitwaqqaf fl-2013 — Il-proposta tal-Kummissjoni COM(2010) 486 wkoll kienet irċeviet tliet opinjonijiet motivati.

[21] DE Bundestag, DK Folketing, UK House of Lords, UK House of Commons u SE Riksdag.

[22] L-Artikolu 5 tal-Protokoll Nru 2.

[23] COM(2012) 11.

[24] SEC(2009) 92.

[25] Biex tikkwalifika bħala opinjoni motivata skont id-definizzjoni fil-Protokoll 2, opinjoni għandha tiddikjara b’mod ċar ksur tas-sussidjarjetà u tintbagħat lill-Kummissjoni fi żmien tmien ġimgħat mit-trasmissjoni tal-proposta lill-Parlamenti nazzjonali.

[26] Klassifikati skont l-għadd ta’ opinjonijiet motivati li waslu għand il-Kummissjoni bejn l-1 ta’ Jannar u l-31 ta’ Diċembru 2012.

[27] Dwar din il-proposta l-Kummissjoni rċeviet sitt opinjonijiet motivati b’kollox. Tliet opinjonijiet motivati (PL Sejm; PL Senat; UK House of Lords) ġew riċevuti wara l-31 ta' Diċembru 2012, iżda qabel l-iskadenza tal-15 ta' Jannar 2013. 

[28]  Peress li xi opinjonijiet jikkonċernaw pakketti ta’ proposti, it-tabella tistabbilixxi l-għadd ta’ opinjonijiet motivati li joħorġu għal kull proposta. Sabiex ukoll turi l-għadd ta’ opinjonijiet motivati li waslu mill-Kummissjoni, l-għadd ta’ opinjonijiet motivati li jkopri aktar proposti minn waħda huwa mnaqqas.