KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUNSILL EWROPEW, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI

NAĦDMU FLIMKIEN GĦAŻ-ŻGĦAŻAGĦ TAL-EWROPA

SEJĦA GĦAL AZZJONI FIR-RIGWARD TAL-QGĦAD FOST IŻ-ŻGĦAŻAGĦ

Iż-żgħażagħ huma l-qofol tad-dinamiżmu u l-prosperità futuri tal-Ewropa. It-talenti, l-enerġija u l-kreattività tagħhom se jgħinu lill-Ewropa biex tikber u ssir aktar kompetittiva hekk kif negħlbu l-kriżi ekonomika u finanzjarja. Madankollu, iż-żgħażagħ intlaqtu partikularment ħażin bil-kriżi. Fil-preżent, kważi 6 miljun persuna fl-Ewropa taħt l-età ta' 25 sena huma qiegħda u total ta' 7,5 miljun huma barra mill-edukazzjoni, impjieg jew taħriġ. Ir-rati tal-qgħad fost iż-żgħażagħ fl-Ewropa kienu ta' 23,5 % fl-ewwel tliet xhur tal-2013, aktar mid-doppju tar-rata - li diġà hija għolja ħafna - tal-popolazzjoni sħiħa. F'xi pajjiżi, aktar minn nofs iż-żgħażagħ li jridu jaħdmu huma qiegħda.

Dan jirrappreżenta kemm riżors kbir li mhuwiex sfruttat li l-Ewropa ma tistax taffordja li taħli kif ukoll kriżi soċjali li l-Ewropa ma tistax tippermetti li tħalliha għaddejja. Il-qgħad fost iż-żgħażagħ għandu impatt qawwi fuq l-individwi kif ukoll fuq is-soċjetà u l-ekonomija. Jekk ix-xejriet attwali ma jinqalbux malajr, il-livelli attwali tal-qgħad fost iż-żgħażagħ qed jirriskjaw li jipperikolaw il-prospetti tal-impjiegi għaż-żgħażagħ fuq terminu itwal ta' żmien, li jkollhom implikazzjonijiet serji għat-tkabbir futur u l-koeżjoni soċjali. Għaldaqstant, fi ħdan l-istrateġija usa' tal-Ewropa biex toħloq tkabbir u impjiegi, l-għajnuna li tingħata liż-żgħażagħ biex jidħlu u jibqgħu fis-suq tax-xogħol biex jakkwistaw u jiżviluppaw il-ħiliet li jwittu t-triq għall-impjiegi futuri hija prijorità għolja għall-Unjoni Ewropea.

Matul il-kriżi finanzjarja, il-Kummissjoni kienet qed taħdem mal-Istati Membri biex tindirizza l-konsegwenzi ekonomiċi u soċjali ta' qgħad għoli u li qed jiżdied. Parti minn din il-ħidma għandha bżonn iż-żmien biex ikollha r-riżultati mixtieqa. L-Ewropa teħtieġ riforma strutturali qawwija biex issir aktar kompetittiva u dan ma jistax iseħħ mil-lum għal għada. Għaldaqstant, ir-riformi essenzjali jridu jitwettqu flimkien ma' miżuri li jaġixxu malajr biex jagħtu spinta lit-tkabbir u biex jgħinu liż-żgħażagħ isibu xogħlijiet u jakkwistaw ħiliet essenzjali. Dawn il-miżuri se jagħtu spinta lill-kunfidenza u juru liż-żgħażagħ li huma għandhom futur sabiħ.

Il-Kummissjoni pproponiet għadd ta' miżuri prattiċi u li jistgħu jintlaħqu li għandhom il-potenzjal li jkollhom impatt immedjat, dan l-aħħar fil-Pakkett għall-Impjiegi taż-Żgħażagħ ta' Diċembru 2012 u l-proposti ta' Marzu 2013 għall-Inizjattiva tal-Impjiegi taż-Żgħażagħ ta' EUR 6 biljun. Intlaħaq qbil dwar uħud minn dawn il-proposti fil-livell tal-UE u issa dawn iridu jinqalbu b'mod urġenti f'opportunitajiet għaż-żgħażagħ. Għad irid jintlaħaq qbil dwar oħrajn fil-livell tal-UE, b'mod partikulari dawk marbuta mal-Qafas Finanzjarju Pluriennali (QFP) għall-2014-2020.

B'dan l-isfond, dan ir-rapport jistabbilixxi passi li jirdu jittieħdu mingħajr dewmien biex iż-żgħażagħ jerġgħu jibdew jaħdmu, jitgħallmu jew jitħarrġu. Dawn il-passi jkopru:

- l-implimentazzjoni tal-Garanzija għaż-Żgħażagħ;

- l-investiment fiż-żgħażagħ permezz tal-Fond Soċjali Ewropew;

- il-forniment minn qabel tal-Inizjattiva favur l-Impjiegi għaż-Żgħażagħ;

- is-sostenn għall-mobilità fi ħdan l-UE mal-EURES;

- il-passi biex tiġi ffaċilitata t-tranżizzjoni mill-edukazzjoni għax-xogħol billi tingħata spinta lill-forniment ta' apprentistati u skemi ta' taħriġ ta' kwalità għolja u jiġi indirizzat in-nuqqas ta' ħiliet;

- aċċellerar ta' riformi biex jitwassal suq tax-xogħol tal-UE ġenwin fuq terminu itwal ta' żmien; u

- miżuri li jappoġġjaw il-ħolqien immedjat ta' impjiegi, speċjalment minn SMEs, u li jagħtu inċentiv biex jiġu impjegati ż-żgħażagħ.

F'ħafna minn dawn l-oqsma, il-ħidma tal-bażi diġà saret. Issa l-prijorità hi li l-implimentazzjoni tiġi aċċellerata u fornuta minn qabel. Is-suċċess jiddependi kemm mir-rieda politika tal-Istati Membri kif ukoll mill-kapaċità tas-settur privat li joħloq opportunitajiet għaż-żgħażagħ. L-UE ma tistax tissotitwixxi l-ħidma li hija meħtieġa fil-livell nazzjonali.  Iżda hemm x'tista' tagħmel, billi tidentifika l-aktar riformi kritiċi permezz tar-Rakkomandazzjonijiet Speċifiċi għall-Pajjiżi, ixxerred l-aħjar prattiki, tidderieġi l-investiment mill-baġit tal-UE, u tgħin liż-żgħażagħ jisfruttaw bis-sħiħ is-suq uniku Ewropew. 

Il-Kummissjoni Ewropea ssejjaħ lill-istituzzjonijiet Ewropej, lill-Istati Membri, lis-sħab soċjali u lis-soċjeta ċivili biex jaħdmu flimkien biex jimplimentaw il-miżuri f'dan ir-rapport; u lill-Kunsill Ewropew ta' Ġunju biex jagħti s-sotenn politiku qawwi tiegħu għal dawn il-passi.

1. Sabiex il-garanzija għaż-żgħażagħ issir realtà

Bħala parti mill-Pakkett għall-Impjiegi taż-Żgħażagħ ippreżentat f'Diċembru 2012, il-Kummissjoni sejħet lill-Istati Membri biex jiżguraw li ż-żgħażagħ Ewropej kollha jirċievu offerta ta' impjieg ta' kwalità tajba, tkomplija tal-edukazzjoni, apprentistat jew skema ta' taħriġ fi żmien erba' xhur minn meta jitilqu mill-iskola jew jiġu qiegħda. Din hija l-Garanzija għaż-Żgħażagħ.

Il-proposta tal-Kummissjoni ġiet adottata mill-Kunsill f'April 2013. Issa, il-prijorità hija l-implimentazzjoni. Dan jidher fir-Rakkomandazzjonijiet Speċifiċi għall-Pajjiżi tal-Kummissjoni għall-2013. Il-Kummissjoni identifikat passi urġenti f'19-il Stat Membru biex jiġi miġġieled il-qgħad permezz, fost l-oħrajn, politiki ta' suq tax-xogħol attiv, tisħiħ tas-servizzi pubbliċi tal-impjiegi u s-sostenn għall-iskemi ta' taħriġ u ta' apprentistat. Dawn il-passi kollha se jikkontribwixxu għat-twassil tal-Garanzija għaż-Żgħażagħ (ara l-Anness I għal sommarju tar-rakkomandazzjonijiet relatati).

L-implimentazzjoni tal-Garanzija għaż-Żgħżagħ se teħtieġ investiment sostnut fil-livell nazzjonali. Madankollu, l-esperjenza wriet, pereżempju fl-Awstrija u fil-Finlandja, li l-investiment irendi u li l-kost ekonomiku u soċjali tan-nuqqas ta' azzjoni huwa ferm ogħla mill-kost tal-implimentazzjoni. Jeħtieġ iż-żmien biex il-Garanzija għaż-Żgħażagħ tibda taħdem bis-sħiħ, allura jeħtieġ li l-proċess jibda issa bi pjan ta' implimentazzjoni ċar għal kull pajjiż li jispjega eżattament kif il-Garanzija għaż-Żgħażagħ se titpoġġa fil-prattika, u jitqiesu kif xieraq il-varjazzjonijiet fl-iskala u n-natura tal-isfidi f'kuntesti nazzjonali differenti.

Għaldaqstant, il-Kummissjoni ssejjaħ lil:

Ø Il-Kunsill biex jadotta r-Rakkomandazzjonijiet Speċifiċi għal-Pajjiżi proposti dwar il-Garanzija għaż-Żgħażagħ u dwar l-impjiegi taż-żgħażagħ b'mod ġenerali, u l-Istati Membri biex jimplimentaw dawn ir-rakkomandazzjonijiet b'ħeffa.

Ø L-Istati Membri li għandhom reġjuni li qegħdin jesperjenzaw rati ta' qgħad fost iż-żgħażagħ li jaqbżu l-25 % biex jippreżentaw Pjan ta' Implimentazzjoni tal-Garanzija għaż-Żgħażagħ sa Ottubru 2013. Dawn il-pjanijiet għandhom jistabbilixxu kif il-Garanzija għaż-Żgħażagħ se tiġi implimentata fil-livell nazzjonali, ir-rwoli rispettivi tal-awtoritajiet pubbliċi u organizzazzjonijiet oħra, kif se tiġi ffinanzjata, kif se jiġi mmonitorjat il-progress u l-iskeda ta' żmien. Stati Membri oħra huma mħeġġa jippreżentaw pjanijiet simili sar-rebbiegħa tal-2014.

2. Tpoġġija fis-seħħ tal-Fond Soċjali Ewropew għaż-żgħażagħ

Matul ħafna deċennji, il-fondi strutturali tal-UE wrew li huma mexxejja b'saħħithom tal-ħolqien tal-impjiegi u l-koeżjoni soċjali fl-Ewropa. Il-Fond Soċjali Ewropew (FSE) jammonta għal kważi EUR 80 biljun għall-perjodu 2007-13. Dan ipprovda sostenn estensiv għal attivitajiet ġewwa l-Ewropa li huma mfassla biex jgħinu liż-żgħażagħ jintegraw irwieħhom fis-suq tax-xogħol u jiżviluppaw kapital uman. 

Meta wieħed iħares 'il quddiem lejn il-perjodu 2014-2020, il-Fondi Strutturali ta' Investiment Ewropej (European Structural and Investment Funds - ESIF) se jkollhom rwol kruċjali x'jaqdu fis-sostenn taż-żgħażagħ u fl-implimentazzjoni tal-Garanzija għaż-Żgħażagħ. Jeħtieġ ftehim dwar il-QFP li jmiss u l-programmi li jimplemetawh b'mod urġenti biex jiġi żgurat li l-FSE u ESIF oħra jistgħu jiġu mmobilizzati immedjatament f'Jannar 2014. Dan il-ftehim irid jirrifletti l-prijorità li l-UE tagħti għall-ġlieda kontra u l-prevenzjoni tal-qgħad fost iż-żgħażagħ:  sehem minimu ta' 25 % mill-finanzjament tal-politika ta' koeżjoni għall-FSE jgħin biex jiġi żgurat li mill-inqas EUR 80 biljun ikunu disponibbli għall-investiment fil-kapital uman tal-Ewropa.

B'mod parallel, l-Istati Membri qed jaħdmu qatigħ mal-Kummissjoni biex ifasslu l-ġenerazzjoni li jmiss ta' Programmi Operattivi li se jiggvernaw kif jintuża dan il-finanzjament Din hija opportunità tad-deheb biex il-programmi l-ġodda jiġu adattati għal aktar prijoritajiet ta' riforma urġenti għat-tkabbir u l-impjiegi, kif stabbilit fir-Rakkomandazzjonijiet Speċifiċi għall-Pajjiżi, u b'mod partikulari għat-twassil tal-Garanzija għaż-Żgħażagħ.

Għaldaqstant, il-Kummissjoni ssejjaħ lil: 

Ø Il-Parlament Ewropew u l-Kunsill biex jaqblu b'ħeffa dwar il-Qafas Finanzjarju Pluriennali u r-regolamenti l-ġodda tal-ESIF, li għandhom jiżguraw li sehem minimu ta' 25 % għall-finanzjament ta' politika ta' koeżjoni (mill-inqas EUR 80 biljun) jiġu allokati għall-Fond Soċjali Ewropew. L-Istati Membri b'livelli partikolarment għolja ta' qgħad fost iż-żgħażagħ għandhom jassenjaw sehem fiss għall-prijoritajiet marbuta mal-ġlieda kontra l-qgħad fost iż-żgħażagħ.

Ø L-Istati Membri biex jaċċelleraw il-ħidma mal-Kummissjoni dwar il-Ftehimiet ta' Sħubija u l-Programmi Operattivi għall-ESIF u biex ikomplu jiffukaw bir-reqqa fuq il-qgħad fost iż-żgħażagħ, l-investiment fil-kapital uman u l-adattament tas-sistemi tal-edukazzjoni u tat-taħriġ mar-realtajiet tas-suq tax-xogħol.

3. Tnedija tal-Inizjattiva għall-Impjiegi taż-Żgħażagħ

Sabiex ikompli jiffoka fuq is-sostenn finanzjarju fuq ir-reġjuni u l-individwi li qed ibatu l-aktar bil-qgħad u n-nuqqas ta' attivita fost iż-żgħażagħ, fi Frar il-Kunsill Ewropew qabel li joħloq Inizjattiva favur l-Impjieg għaż-Żgħażagħ (YEI) li għandha tiġi appoġġjata b'EUR 6 biljun mill-baġit tal-UE. Din se timmira fuq żgħażagħ individwali li għandhom bejn il-15 u l-24 sena li mhumiex jistudjaw, impjegati jew jitħarrġu (NEET) u tikkumplimenta s-sostenn ipprovdut mill-FSE għall-implimentazzjoni tal-Garanzija għaż-Żgħażagħ.

Il-Kummissjoni għaġġlet il-proposti legali meħtieġa u ppreżentathom lill-Parlament Ewropew u lill-Kunsill f'Marzu 2013.[1] Issa l-prijorità hija għall-Parlament Ewropew u l-Kunsill biex jaqblu dwar dawn il-proposti u biex jagħmlu dan il-finanzjament disponibbli malajr kemm jista' jkun.

3.1 Iffukar u forniment minn qabel tal-YEI (Inizjattiva favur l-Impjieg għaż-Żgħażagħ) 

Il-Kummissjoni pproponiet li tikkonċentra s-sostenn mill-YEI f'reġjuni li jesperjenzaw rati li jaqbżu l-25 % ta' żgħażagħ qiegħda, u f'dawn ir-reġjuni fuq żgħażagħ (NEET) fl-età ta' bejn il-15 u l-24 sena. Dawn il-kriterji għandhom jinżammu: kwalunkwe tnaqqis fil-livell limitu jifrex wisq il-fondi għad-detriment ta' dawk ir-reġjuni li l-aktar għandhom bżonn.[2] Huwa vitali wkoll li l-YEI tintuża fuq kollox biex tappoġġja l-implimentazzjoni tal-Garanzija għaż-Żgħażagħ. Gruppi oħra fil-mira se jiġu appoġġjati minn sorsi oħra ta' finanzjament mill-ESIF u b'mod partikolari mill-FSE.

Sabiex jiġi żgurat li l-flus mill-YEI jibdew jiċċirkolaw malajr ladarba l-qafas legali jiġi maqbul, il-Kummissjoni tipproponi li taġġusta l-profil tal-QFP li jmiss biex tagħmel disponibbli l-ammont sħiħ ta' EUR 6 biljun f'impenji matul l-ewwel sentejn tal-QFP li jmiss. Dan se jinkiseb billi jinbidel il-profil ta' implimentazzjoni ta' programmi oħra ħalli l-livelli annwali ġenerali tal-impenji jibqgħu l-istess.

Jeħtieġ li l-Istati Membri jkunu lesti jaħdmu mill-bidu nett fuq il-Programmi Operattivi tagħhom u fuq proġetti li qegħdin jitħejjew biex jgħinu liż-żgħażagħ isibu impjiegi, apprentistati jew edukazzjoni ta' kwalità tajba. L-implimentazzjoni għandha tibda mingħajr dewmien, anke qabel mal-Ftehimiet ta’ sħubija jkunu fis-seħħ u qabel mal-qafas legali jkun daħal fis-seħħ. Dan jiddependi fuq jekk l-Istati Membri jkunux lesti bil-programmi tagħhom fil-ħin: il-Kummissjoni tipproċessahom malajr.

Għaldaqstant, il-Kummissjoni ssejjaħ lil:

Ø Il-Parlament Ewropew u l-Kunsill biex jaqblu dwar l-Inizjattiva favur l-Impjieg għaż-Żgħażagħ biex jimmiraw is-sostenn fuq ir-reġjuni li jesperjenzaw rati ta' qgħad fost iż-żgħażagħ li jaqbżu l-25 % u fuq iż-żgħażagħ (NEET) li għandhom bejn 15 u 24 sena, u jiffukaw bil-qawwi fuq l-azzjonijiet li jappoġġjaw il-Garanzija għaż-Żgħażagħ.

Ø Il-Parlament u l-Kunsill biex jaqblu biex jimpenjaw is-EUR 6 biljun kollha tal-YEI fl-2014 u l-2015 billi jaġġustaw il-profil ta' impenn tal-QFP li jmiss u billi jadattaw ir-regolamenti tal-ESIF biex jippermettu li nefqa taħt il-YEI tiġi meqjusa eliġibbli mid-data ta' preżentazzjoni tal-programmi operattivi tal-YEI, anki qabel mal-Ftehimiet ta' Sħubija jkunu fis-seħħ u qabel mal-qafas legali jkun daħal fis-seħħ.

Ø L-Istati Membri biex jaċċelleraw it-tħejjija tal-programmi speċifiċi tal-YEI u biex jippreżentaw dawn il-programmi matul l-2013 għal implimentazzjoni immedjata.

3.2  Tnedija mill-ġdid tal-Gruppi ta' Azzjoni għall-Impjiegi fost iż-Żgħażagħ

Fl-2012, il-Kummissjoni stabbiliet Gruppi ta' Azzjoni għall-Impjiegi fost iż-Żgħażagħ b'mod konġunt mal-Istati Membri li jesperjenzaw livelli partikolarment għolja ta' qgħad fost iż-żgħażagħ. Dawn il-gruppi ħadmu biex jgħinu biex jiżguraw li l-fondi strutturali tal-UE jintużaw għal effett massimu biex jappoġġjaw liż-żgħażagħ. Permezz ta' din il-ħidma, madwar EUR 16-il biljun ta' finanzjament tal-UE diġà ġew immirati għal twassil aċċellerat jew allokazzjoni mill-ġdid. Eventwalment, dan se jgħin lil aktar minn miljun żagħżugħ u żagħżugħa u r-riżultati diġà qegħdin jinħassu (ara aktar 'l isfel u l-Anness II).

Eżempji ta' riżultati tal-ħidma tal-Gruppi ta' Azzjoni għall-Impjiegi fost iż-Żgħażagħ

- Fil-Portugall, l-inizjattiva "Impulso Jovem" kienet tinkludi programmar mill-ġdid komprensiv tal-fondi strutturali tal-UE u se jibbenefikaw minnha 90 000 żagħżugħ u żagħżugħa u se tappoġġja 4 500 SME sal-aħħar tal-2015. Pereżempju, EUR 143 miljun mill-fondi tal-UE ġew allokati mill-ġdid biex jiġu ffinanzjati miżuri li jinkludu skemi ta' taħriġ f'setturi ekonomiċi ewlenin, kif ukoll sostenn għall-ikkuntrattar ta' persuni fl-età ta' 18-30 sena permezz ta' żburżar tal-kontribuzzjonijiet tas-sigurtà soċjali ta' min iħaddem.

- Fi Spanja, aktar minn EUR 286 miljun f'finanzjament tal-FSE ġew allokati mill-ġdid għal azzjonijiet marbuta maż-żgħażagħ. Azzjonijiet implimentati s'issa jinkludu skejjel li jieħdu xejra ta' workshop u workshops ta' impjiegi, b'madwar 9 500 parteċipant żagħżugħ. Ġew implimentati sussidji fil-forma ta' tnaqqis f'kontribuzzjonijiet ta' sigurtà soċjali għall-kumpaniji li jimpjegaw żgħażagħ għal 142 000 żagħżugħ. L-Istrateġija għall-Intraprenditorija u l-Impjiegi għaż-Żgħażagħ il-ġdida tistabbilixxi 100 miżura ulterjuri biex jiġi miġġieled il-qgħad fost iż-żgħażagħ. EUR 3,485 biljun ġew assenjati għal dawn l-azzjonijiet, u wħud minnhom ġew kofinanzjati mill-FSE. Diversi miżuri speċifiċi qed jiġu ffinanzjati mill-FEŻR f'reġjuni fejn ir-rati tal-qgħad taż-żgħażagħ huma l-ogħla.

- Fl-Italja, bħala parti mill-Pjan ta' Azzjoni għal Koeżjoni, ġew allokati EUR 1,4 biljun għal azzjonijiet immirati għaż-żgħażagħ, fosthom Pjan għal Impjiegi għaż-Żgħażagħ fi Sqallija li jiswa EUR 452 miljun, attivitajiet ta' edukazzjoni għal 65 300 student mir-reġjuni tan-Nofsinhar u 13 000 opportunità ta' mobilità ġdida. Fit-tieni fażi, ġew iddedikati EUR 620 miljun oħra għal azzjonijiet ġodda li jappoġġjaw liż-żgħażagħ u lin-NEET, fosthom il-kura tat-tfal, is-sostenn għall-intraprenditorjat u l-ġlieda kontra t-tluq bikri mill-iskola. Il-FSE se jikkofinanzja wkoll azzjonijiet li jappoġġjaw apprentistati (EUR 100 miljun) u li jipprovdu gwida u kollokamenti għall-istudenti u ż-żgħażagħ gradwati (EUR 36 miljun).

B'segwitu għal din l-esperjenza pożittiva, il-Kummissjoni hija lesta tniedi mill-ġdid u tespandi l-Gruppi ta' Azzjoni biex taħdem mal-Istati Membri eliġibbli għal sostenn finanzjarju skont l-Inizjattiva għall-Impjiegi għaż-Żgħażagħ.  Fuq inizjattiva tal-Istati Membri inkwistjoni, il-gruppi se jitwaqqfu biex jappoġġjaw u jaċċelleraw il-ħidma għat-tħejjija tal-Programmi Operattivi u biex jagħtu pariri dwar kif il-finanzjament tal-UE mill-FSE u l-YEI jista' jintuża bl-aħjar mod biex jimplimentaw il-Garanzija għaż-Żgħażagħ.

Għaldaqstant, il-Kummissjoni ssejjaħ lil:

Ø L-Istati Membri eliġibbli għall-Inizjattiva għall-Impjiegi taż-Żgħażagħ, fuq talba minnhom, biex jaħdmu mal-esperti tal-Kummissjoni permezz ta' Gruppi ta' Azzjoni għall-Impjiegi taż-Żgħażagħ biex jassistu bl-implimentazzjoni tal-iskema tal-Garanzija għaż-Żgħażagħ u l-mobilizzazzjoni tal-FSE u tal-YEI għal dan il-għan. Sabiex tappoġġja dan il-proċess u fuq talba minn Stat Membru, il-Kummissjoni se tikkoordina l-assistenza teknika, pereżempju permezz ta' ġemellaġġi bejn l-Istati Membri.

4. Spinta għall-mobilità bl-EURES u l-FSE

Is-suq uniku joffri firxa vasta ta' opportunitajiet għal impjiegi, apprentistati u taħriġ għaż-żgħażagħ tal-Ewropa. Hemm x'juri li ż-żgħażagħ huma ħerqana biex jaħtfu dawn l-opportunitajiet.  Madankollu, l-identifikar u l-isfruttament ta' dawn l-opportunitajiet f'xi Stati Membri f'ħin reali jista' jkun skoraġġanti. Għaldaqstant, il-Kummissjoni ilha taħdem biex tagħmel il-mobilità aktar faċli kemm għall-benefiċċju tal-individwi u ta' min iħaddem kif ukoll għall-benefiċċju tal-ekonomija Ewropea b'mod ġenerali.

Il-portal EURES jagħti aċċess għal aktar minn 1,4 miljun post tax-xogħol vakanti u kważi 31 000 impjegatur. Madankollu, in netwerk EURES għadu mhux jaħdem bil-potenzjal kollu tiegħu. Il-Kummissjoni bdiet riforma maġġuri biex tagħmel is-sistema EURES aktar reattiva għar-realtajiet tas-suq tax-xogħol u ssaħħaħ l-enfasi fuq il-mobilità taż-żgħaagħ billi toffri impjiegi kif ukoll opportunitajiet biex jgħaqqdu x-xogħol mat-tagħlim, bħall-apprentistati. Il-portal EURES qed jerġa' jingħata l-ħajja wkoll biex isir aktar faċli għall-utent u se titressaq Karta EURES li tipprovdi gwida tal-UE maqbula b'mod komuni għall-miżuri ta' twassil nazzjonali tal-EURES qabel l-aħħar tas-sena. Barra minn hekk, il-Kummissjoni qed taħdem fuq leġiżlazzjoni ġdida biex issaħħaħ is-servizzi tal-EURES kemm għal min iħaddem kif ukoll għal min ifittex impjieg. L-objettiv huwa li jiġu fornuti aktar postijiet tax-xogħol vakanti u jiġi mtejjeb it-tlaqqigħ ta' postijiet tax-xogħol vakanti mal-applikazzjonijiet filwaqt li tiġi msaħħa l-integrazzjoni tal-EURES fis-Servizzi Pubbliċi tal-Impjiegi.

Għal żagħżugħ jew żagħżugħa, l-identifikar ta' opportunitajiet ta' xogħol jew ta' tagħlim barra mill-pajjiż hija ħaġa; li jiġu sfruttati hija oħra. Bħalissa l-Kummisjoni qed tidderieġi sistema ġdida biex tgħin liż-żgħażagħ jaħtfu l-opporunitajiet ta' xogħol irreklamati fl-EURES, filwaqt li tgħin lill-SMEs biex jimpjegaw żgħażagħ li qed ifittxu xogħol mill-Ewropa kollha. "L-ewwel impjieg EURES tiegħek" tgħin liż-żgħażagħ isibu xogħol fi Stati Membri oħra billi tipprovdi sostenn finanzjarju għal korsijiet tal-lingwa u ħtiġijiet oħra ta' taħriġ, spejjeż ta' vjaġġar u programmi ta' integrazzjoni fil-każ ta' impjegar minn SME. Is-sistema pilota "L-ewwel impjieg EURES tiegħek" se tgħin biex issib post għal madwar 5 000 persuna fis-sitt Stati Membri parteċipanti u se tiġi estiża fl-2013 biex tkopri l-kollokament ta' apprentistat u ta' skemi ta' taħriġ. Ir-riżultati inizjali kienu inkoraġġanti ħafna u xi Stati Membri, pereżempju l-Ġermanja, ibbażat l-iskemi ta' mobilità tagħha fuq dan il-mudell.

Skont il-QFP li jmiss, il-Programm Ewropew għall-Bidla u l-Innovazzjoni Soċjali se jipprovdi finanzjament dirett addizzjonali ta' madwar EUR 5 miljun fis-sena biex jappoġġja dan it-tip ta' skema mmirata.  Madankollu, fid-dawl tal-iskala tal-isfida, il-piż se jkun fuq l-Istati Membri - bil-ħidma tas-Servizzi Pubbliċi tal-Impjiegi - u fuq min iħaddem biex itejbu s-sostenn finanzjarju tagħhom għall-impjiegi permezz tal-mobilità fl-UE, fuq il-bażi tal-esperjenza tal-Ewwel impjieg EURES tiegħek. Il-FSE qiegħed hemm biex jgħin:  mill-2014, is-sostenn finanjarju se jkun disponibbli għat-taħriġ tal-lingwi u tal-orjentazzjoni tal-karrieri, il-kost tal-ivvjaġġar u l-integrazzjoni fil-pajjiż ospitanti.

Għaldaqstant, il-Kummissjoni ssejjaħ lil:

Ø L-Istati Membri biex jagħmlu użu mill-opportunitajiet tal-finanzjament tal-FSE u s-sorsi ta' finanzjament nazzjonali biex tiġi promossa l-mobilità tax-xogħol fl-UE, fosthom bl-użu tal-EURES, u biex isaħħu l-kapaċità tas-Servizzi Pubbliċi tal-Impjiegi f'dan ir-rigward.

Ø Il-Parlament Ewropew u l-Kunsill biex iqisu malajr il-proposta leġiżlattiva li ġejja mill-Kummissjoni biex jissaħħaħ l-EURES li se titressaq sal-aħħar tal-2013.

5. Tħaffif tat-tranżizzjoni mill-edukazzjoni għax-xogħol

Li ż-żgħażagħ jiġu megħjuna jintegraw ruħhom fis-suq tax-xogħol wara li jitilqu mill-iskola jew mill-università hija parti indispensabbli mit-twassil tal-Garanzija għaż-Żgħażagħ. Fir-Rakkomandazzjonijiet Speċifiċi għall-Pajjiżi ta' din is-sena, il-Kummissjoni rrakkomandat lil 16-il Stat Membru li jiffukaw fuq ir-riforma ta' programmi ta' edukazzjoni u taħriġ vokazzjonali (ETV) billi jżidu r-rilevanza tas-suq tax-xogħol tagħhom permezz ta' komponent ta' tagħlim aktar b'saħħtu bbażat fuq ix-xogħol u jaċċelleraw ir-riforma tal-apprentistati. Il-baġit tal-UE jista' jappoġġja dan il-proċess: l-Istati Membri jistgħu jużaw il-FSE, il-YEI u l-programm 'Erasmus +' biex jgħinu t-titjib tal-kwalità u l-effiċjenza tas-sistemi tal-edukazzjoni u tat-taħriġ.

It-tranżizzjoni minn edukazzjoni għal xogħol kienet tema ċentrali tal-Pakkett għall-Impjiegi taż-Żgħażagħ, li nediet żewġ inizjattivi speċifiċi biex jiffaċilitaw it-tranżizzjoni:  l-Alleanza Ewropea għall-Apprentistati u l-Qafas ta' Kwalità għall-Iskemi ta' Taħriġ.

5.1  Implimetazzjoni tal-Alleanza Ewropea għall-Apprentistati

L-esperjenza wriet li l-pajjiżi b'sistemi ta' ETV b'saħħithom u attraenti u speċjalment dawk b'sistemi ta' apprentistati stabbiliti sew u tagħlim b'saħħtu bbażat fuq ix-xogħol għandhom tendenza li jkollhom prestazzjoni aħjar f'termini ta' ffaċilitar tat-tranżizzjoni mill-iskola għax-xogħol u ż-żamma baxxa tal-qgħad fost iż-żgħażagħ. Għaldaqstant, it-titjib tal-forniment u l-kwalità tal-apprentistati huwa parti importanti mill-istrateġija tal-impjiegi għaż-żgħażagħ.

Kif imħabbar fil-Pakkett għall-Impjiegi taż-Żgħażagħ, il-Kummissjoni qed tniedi Alleanza Ewropea għall-Apprentistati biex tgħin fit-titjib tal-kwalità u tal-forniment tal-apprentistati u biex tibdel il-perċezzjonijiet li jeżistu tat-tagħlim ibbażat fq ix-xogħol. L-Alleanza se ġġib flimkien lill-Istati Membri, lis-sħab soċjali, lin-negozji, lill-Kummissjon u lil atturi oħra relevanti biex jiżviluppaw taħriġ tat-tip ta' apprentistat ta' kwalità għolja u eċċellenza fit-tagħlim ibbażat fuq ix-xogħol fl-ETV u biex jippromwovu s-sħubiji nazzjonali għat-tagħlim doppju.

It-tnedija tal-Alleanza fit-2 ta' Lulju 2013 hija opportunità biex tiggalvanizza s-settur privat u biex tagħti impetu ġdid għall-forniment ta' u d-domanda għal apprentistati ta' kwalita għolja u tagħlim ibbażat fuq ix-xogħol. In-negozji għandhom ħafna x'jiggwadanjaw mill-aċċess għal għażla vasta ta' kandidati potenzjali għall-apprentistati u mill-investiment fil-preżent biex tinħoloq forza tax-xogħol b'ħiliet tajbin ħafna għall-futur

Għaldaqstant, il-Kummissjoni ssejjaħ lil:

Ø L-Istati Membri biex jimplimentaw r-Rakkomandazzjonijiet Speċifiċi għall-Pajjiżi proposti dwar l-apprentistati u dwar l-edukazzjoni u t-taħriġ vokazzjonali.

Ø L-Istati Membri biex jinkludu r-riforma tal-apprentistati fil-Pjanijiet ta' Implimentazzjoni tal-Garanzija għaż-Żgħażagħ u biex jimmobilizzaw il-finanzjament tal-UE biex jappoġġjaw dan l-objettiv; u biex jistabbilixxu sħubiji b'saħħithom fil-livell nazzjonali għal tagħlim doppju li jgħaqqad flimkien lill-awtoritajiet responsabbli għall-edukazzjoni u l-impjieg, lis-sħab soċjali, lill-kmamar, lill-fornituri tal-ETV, lill-organizzazzjonijiet taż-żgħażagħ u tal-istudenti, lis-servizzi tal-impjiegi u lill-aġenziji li jiġġestixxu l-finanzjament tal-UE.

Ø Is-settur privat biex jappoġġja bis-sħiħ lill-Alleanza u biex jimpenja ruħu biex iforni apprentistati ta' kwalità għolja, li jkomplu jibnu fuq inizjattivi mmexxija mill-indistriji.

5.2  Twassil ta' skemi ta' taħriġ ta' kwalità għolja

Is-skemi ta' taħriġ ukoll għandhom rwol importanti x'jaqdu fl-iffaċilitar tat-tranżizzjoni mill-edukazzjoni għax-xogħol, b'mod partikulari fil-kuntest tal-kriżi. Skemi ta' taħriġ ta' kwalità għolja jgħinu biex jagħtu spinta lill-impjegabbiltà taż-żgħażagħ u huma passi importanti fil-mixja lejn impjiegi regolari.

Madankollu, minkejja l-kunsens ġenerali dwar l-importanza tal-iskemi ta' taħriġ, hemm tħassib serju dwar il-kwalità tal-iskemi ta' taħriġ offruti u l-valur miżjud tagħhom.  Dan it-tħassib huwa marbut mal-kontenut insuffiċjenti tat-tagħlim, il-kundizzjonijiet tax-xogħol mhux xierqa u l-iskemi ta' taħriġ ripetuti li fil-verità jintużaw bħala sostituti għall-impjiegi reali. Sabiex jiġi indirizzat dan it-tħassib, il-Kummissjoni ħabbret inizjattiva Ewropea ġdida għal Qafas Ewropew ta' Kwalità għall-Iskemi ta' Taħriġ bħala parti mill-Pakkett għall-Impjiegi taż-Żgħażagħ.. Il-Kummissjoni kkonsultat lis-sħab soċjali u l-ħidma fuq dan il-qafas se tiġi aċċellerata sabiex tiġi ppreżentata proposta sal-aħħar tal-2013.

Għaldaqstant, il-Kummissjoni ssejjaħ lil:

Ø Il-Kunsill biex jaħdem malajr fuq il-proposta tal-Kummissjoni li ġejja dwar Qafas ta' Kwalità għall-Iskemi ta' Taħriġ, bil-ħsieb li l-Qafas ikun fis-seħħ fil-bidu tal-2014.

5.3 "Erasmus +": il-ftuħ ta' edukazzjoni transfruntiera u opportunitajiet ta' taħriġ

Programmi tal-UE ddedikati wkoll jikkontribwixxu b'mod importanti għall-iżvilupp tal-ETV u biex jgħinu liż-żgħażagħ jisfruttaw is-suq uniku. Iż-żieda fil-mobilità tal-istudenti żżid il-mobilità tax-xogħol u tikkontribwixxi għall-ħolqien ta' suq tax-xogħol aktar integrat. Pereżempju, il-Programm ta' Tagħlim tul il-Ħajja attwali - u b'mod partikulari s-subprogramm "Leonardo da Vinci" għall-ETV - diġà ppermetta li 500 000 student tal-ETV u 225 000 student ta' edukazzjoni ogħla jisfruttaw it-taħriġ ibbażat fuq ix-xogħol fi Stat Membru ieħor, li jippermettilhom jiżviluppaw kemm il-ħiliet rilevanti għax-xogħol kif ukoll il-ħiliet trażversali li jkun qed ifittex min iħaddem.

Eżempji ta' kif il-programmi Ewropej ta' mobilità tal-ETV għenu liż-żgħażagħ

- Fl-2012, Lili mir-Rumanija pparteċipat fi proġett ta' mobilità ta' Leonardo da Vinci bl-isem ta' "Applying modern healthcare systems". Hi għamlet erba' ġimgħat tiżviluppa l-ħiliet tagħha ta' infermiera waqt kors ta' taħriġ fl-Isptar Barmherzige Bruder fi Vjenna fl-Awstrija. Dan taha l-opportunità li takkwista għarfien ġdid dwar it-tekniki tal-infermerija u t-tekniki moderni tar-riċerka u li tiżviluppa l-ħiliet tagħha fil-lingwa Ġermaniża. Din l-esperjenza u ċ-Ċertifikat Europass Mobility li hi akkwistat fi tmiem il-kollokament għenuha ssib xogħol barra minn pajjiżha.

- Fl-2008, Joanna, mill-Polonja, ħadet sehem f'kollokament vokazzjonali ta' xahar fil-Ġermanja permezz tal-programm "Leonardo da Vinci", u ħadmet ma' kumpanija lokali taż-żerriegħa, Appels Wilde Samen. Dan il-kollokament ippermettielha li takkwista ħiliet fl-ikkultivar ta' ħafna speċi ta' pjanti kif ukoll li taħdem f'lingwa u f'ambjent kulturali differenti. Din l-esperjenza wittitilha t-triq biex tiftaħ ir-razzett tagħha fil-Polonja, u żammet kuntatti tajbin ħafna mal-kumpanija ospitanti fil-Ġermanja.

- Matthias, mill-Ġermanja, wettaq skema ta' taħriġ vokazzjonali inizjali fl-Ajruport Internazzjonali ta' Munich biex isir speċjalist fil-mekkatronika u mbagħad mar għal tliet ġimgħat fl-Ajruport ta' Vjenna biex jikseb esperjenza barra minn pajjiżu permezz tal-programm "Leonardo da Vinci". Kollokament barra minn pajjiżu ppermettielu li jakkwista għarfien ġdid dwar id-differenzi fil-prattiki tax-xogħol u l-kultura u tah perspettiva ġdida dwar il-proċessi ta' ħidma fil-kumpanija oriġinali tiegħu.

Skont il-QFP li jmiss, bħala parti mill-programm "Erasmus +" propost mill-Kummissjoni, is-sostenn għall-mobilità se jingħata aktar importanza b'mod sinifikanti biex jgħin lil kważi 5 miljun persuna b'kollox, fosthom aktar minn 700 000 kollokament ta' ETV. Il-kooperazzjoni bejn min iħaddem u l-fornituri tal-edukazzjoni se tissaħħaħ permezz ta' sħubiji strateġiċi u alleanzi ta' ħiliet skont is-settur biex jiġu appoġġjati programmi ta' edukazzjoni ta' kwalità ogħla u mobilità transfruntiera.

L-impatt ta' din il-kooperazzjoni jista' jiżdied bl-injezzjoni ta' fondi nazzjonali u tal-UE - b'mod partikulari l-FSE - biex jipprovdi opportunitajiet għal għadd saħansitra akbar ta' żgħażagħ. Huwa ċar li d-domanda għal mobilità transfruntiera hija għolja u li għaldaqstant l-għadd ta' opportunitajiet ta' kollokament barra mill-pajjiż għandu potenzjal sinifikanti ta' tkabbir. Sabiex tgħin l-isfruttament ta' dan il-potenzjal, il-Kummissjoni se taċċellera l-implimentazzjoni ta' din il-parti tal-programm "Erasmus +" u l-Istati Membri għandhom jużaw l-allokazzjonijiet tal-FSE tagħhom għal dan il-għan.

Għaldaqstant, il-Kummissjoni ssejjaħ lil:

Ø Il-Parlament Ewropew u l-Kunsill biex jaqblu malajr dwar il-programm "Erasmus +". Il-Kummissjoni se taċċellera l-implimentazzjoni tal-komponent tal-ETV ta' dan il-programm ladarba jitnieda fl-2014.

Ø L-Istati Membri biex jużaw il-FSE biex jiżviluppaw u jappoġġjaw il-mobilità fl-ETV biex jgħinu liż-żgħażagħ jakkwistaw il-ħiliet meħtieġa biex isibu posthom fis-suq tax-xogħol.

5.4  Investiment fil-ħiliet u indirizzar tad-diskrepanzi fil-ħiliet

Il-kompetittività tal-Ewropa, il-kapaċità innovattiva u l-produttività jiddependu b'mod kritiku fuq id-disponibilità ta' ħaddiema b'edukazzjoni għolja u mħarrġin sew. It-tendenza li ilha għal rekwiżiti ta’ ħiliet dejjem ogħla jfisser li ż-żgħażagħ mingħajr il-ħiliet li l-ekonomija teħtieġ se jsibuha dejjem aktar diffiċli biex isibu impjieg. Għaldaqstant, l-indirizzar tal-qgħad fost iż-żgħażagħ jeħtieġ azzjoni li tindirizza n-nuqqas ta’ ħiliet u d-diskrepanzi fihom.

Il-proċess tal-akkwist ta’ ħiliet jibda fl-iskola u jkompli bl-edukazzjoni għolja u bit-tagħlim ibbażat fuq ix-xogħol. Madankollu, illum il-prestazzjoni ta' ħafna mis-sistemi edukattivi hija inadegwata għax ikollhom rati għoljin li mhumiex aċċettabli ta' dawk li jitilqu mill-iskola u ma jipprovdux liż-żgħażagħ b’ħiliet essenzjali. Għalhekk hemm ħtieġa urġenti li s-sistemi edukattivi jirrispondu aktar għall-ħtiġijiet ta’ ħiliet attwali u futuri sabiex jiġu evitati d-diskrepanzi fil-ħiliet u l-ostakli.

L-indirizzar tad-diskrepanzi fil-ħiliet f'setturi li huwa rikonoxxut li għandhon il-potenzjal li joħolqu l-mpjiegi, bħall-ICT, il-kura tas-saħħa u l-ekonomija ekoloġika huwa prijorità partikulari. F'Marzu 2013 il-Kummissjoni nediet sħubija bejn diversi partijiet interessati madwar l-UE — il-Gran Koalizzjoni għall-Impjiegi Diġitali — biex tindirizza n-nuqqas ta’ ħiliet fl-ICT fl-UE u biex jimtlew id-diversi mijiet ta’ eluf ta’ postijiet tax-xogħol vakanti li huma previsti u li jeħtieġu dawn il-ħiliet. Bħala parti mill-pjan ta’ azzjoni tagħha dwar il-forza tax-xogħol tal-UE fil-qasam tas-saħħa , il-Kummissjoni nediet f’April 2013 Azzjoni Konġunta li tgħin biex jitjieb it-tbassir u l-ippjanar tal-forza tax-xogħol fil-qasam tas-saħħa, u qarrbet lill-Istati Membri u lill-azzjonisti biex jiskambjaw l-aħjar prattika. Il-Kummissjoni qed twettaq ukoll studju ta' identifikazzjoni bejn il-pajjiżi dwar strateġiji ta' reklutaġġ innovattivi bħall-użu tal-midja soċjali, sabiex iħajru liż-żgħażagħ biex jagħżlu karriera fil-kura tas-saħħa. Il-Kummissjoni se tniedi koalizzjonijiet simili jew pjanijiet ta’ azzjoni usa’ sabiex jiġi sfruttat il-potenzjal tal-ħolqien tax-xogħol ta’ “ekonomija ekoloġika”.

Ħiliet intraprenditorjali huma importanti wkoll għal żagħżagħ li qed ifittxu impjieg u li jibdew in-negozju tagħhom. Esperjenzi intraprenditorjali prattiċi għaż-żgħażagħ kollha jgħinu biex ikun hemm rabta bejn l-edukazzjoni u d-dinja reali, fejn l-ideat kreattivi jissarfu f’azzjoni intraprenditorjali. Il-Kummissjoni, biex tappoġġa l-bidla fis-sistema edukattiva, se tipprovdi gwida politika aktar iddettaljata dwar l-intraprenditorija fl-edukazzjoni. Azzjoni ta' kollaborazzjoni mal-OECD dwar Oqfsa ta' Gwida għall-Edukazzjoni Intraprenditorjali fil-livell ta' skejjel, ta' ETV u ta' universitajiet, se tħeġġeġ it-tagħlim intraprenditorjali. 

Biex tkompli tgħin liż-żgħażagħ jibdew xogħlijiet barra mill-pajjiż, il-Kummissjoni qed taħdem f’kooperazzjoni mill-qrib mal-Istati Membri u l-partijiet interessati għall-ħolqien ta’ Żona Ewropea għall-Ħiliet u l-Kwalifiki. Dan se jiżgura li l-ħiliet u l-kwalifiki jistgħu jiġu faċilment rikonoxxuti lil hinn mill-fruntieri kif ukoll tkun iffaċilitata l-mobilità tax-xogħol.

Għaldaqstant, il-Kummissjoni tistieden lil:

Ø L-Istati Membri biex jimmodernizzaw u jtejbu s-sistemi edukattivi tagħhom billi jindirizzaw id-diskrepanzi fil-ħiliet bażiċi, itejbu l-isforzi kontra t-tluq bikri mill-iskola, itejbu l-provvista ta' ħiliet trasversali bħal ħiliet diġitali, intraprenditorjali u lingwistiċi kif ukoll jiskalaw 'il fuq l-użu tal-ICT fit-tagħlim appoġġjat.

Ø Lill-partijiet interessati kollha biex jiskalaw 'il fuq l-appoġġ għall-Gran Koalizzjoni għall-Impjiegi Diġitali, sabiex jiġi indirizzat in-nuqqas ta' 900 000 ħaddiem professjonali fl-ICT fl-Ewropa sal-2015.

6. Il-bini ta' suq tax-xogħol Ewropew għal terminu twil

Ħafna mill-azzjonijiet deskritti hawn fuq, jekk jiġu implimentati issa se jkollhom effett immedjat.  Madankollu, hemm ħafna akar xi jsir fuq terminu medju għar-riforma tal-ekonomija, sabiex jinbena suq tax-xogħol Ewropew ġenwin li fih iċ-ċittadini kollha, iż-żgħażagħ u l-ħaddiema kbar fl-età, ikunu jistgħu jiċċirkulaw liberament biex jaħdmu, jistudjaw u jitħarrġu. Dan ser jagħmel lill-ekonomija Ewropea aktar dinamika u flessibbli filwaqt li jiġi żgurat li l-protezzjonijiet neċessarji jkunu fis-seħħ għal dawk li jeżerċitaw id-drittijiet tagħhom biex jgħixu, jaħdmu u jistudjaw barra minn pajjiżhom.

Diġà hemm ħafna proposti fuq il-mejda li se jgħinu biex is-suq uniku jaħdem b’mod aktar effiċjenti, inklużi l-emendi proposti għad-Direttiva tal-Kwalifiki Professjonali u għad-Direttiva dwar it-trasferiment tad-drittijiet għall-pensjoni supplementari u d-Direttiva dwar l-infurzar tad-drittijiet tal-ħaddiema mobbli. Jeħtieġ urġentement li l-infurzar tal-liġi tal-UE eżistenti jitjieb, b'mod partikulari fir-rigward tal-impjiegi u l-kundizzjonijiet tax-xogħol. Barra minn hekk, il-Kummissjoni qed taħdem fuq regoli dwar il-koordinazzjoni tas-sigurtà soċjali favur iċ-ċittadin fir-rigward tal-benefiċċji tal-qgħad, u qed tanalizza l-possibiltà li l-beneffiċċji tal-qgħad jitħallsu għal perjodu li hu itwal mit-3 xhur attwali lill-ħaddiema li jkunu qed ifittxu xogħol fi Stat Membru ieħor.

Il-proposta reċenti tal-Kummissjoni biex il-kooperazzjoni bejn is-Servizz Pubbliku tal-Impjiegi timmodernizza ruħha u tittejjeb se tikkontribwixxi wkoll biex jitjieb il-funzjonament operattiv tas-swieq tax-xogħol u biex il-programmi tas-suq tax-xogħol jaslu, u għaldaqstant iż-żgħażagħ se jiġu megħjuna jidħlu fis-suq tax-xogħol. Il-Kummissjoni se tipproponi li tistabbilixxi netwerk tas-Servizzi Pubbliċi tal-Impjiegi sabiex tibda sistema b'punti ta' referenza, u l-attivitajiet ta’ tagħlim reċiproku korrispondenti se jikkontribwixxu għall-ħolqien ta’ suq tax-xogħol Ewropew u fl-aħħar mill-aħħar se jipprovdu lil dawk li qed ifittxu x-xogħol u lill-impjegaturi servizz tal-impjiegi aħjar u aktar effettiv.

Għaldaqstant, il-Kummissjoni tistieden lil:

Ø Il-Parlament Ewropew u l-Kunsill biex iżidu l-ħidma fuq il-proposti kollha mfassla li jippromwovu l-iżvilupp ta' suq tax-xogħol Ewropew ġenwin li jkun aċċesssibbli għaż-żgħażagħ kollha.

7. Ħolqien tal-impjiegi: għajnuna lill-kumpaniji biex jimpjegaw liż-żgħażagħ

Il-qgħad fost iż-żgħażagħ jista' jonqos biss b’mod sostenibbli jekk l-ekonomija toħloq aktar impjiegi. Għaldaqstant ix-xogħol kollu li qiegħed isir fl-Ewropa sabiex jiġi xprunat it-tkabbir u l-ħolqien tal-impjiegi se jikkontribwixxi biex tiġi indirizzata l-problema tal-qgħad taż-żgħażagħ. Il-prijoritajiet enfasizzati fil-livell Ewropew fil-kuntest tal-Istħarriġ Annwali dwar it-Tkabbir u fil-livell nazzjonali fil-qafas tar-Rakkomandazzjonijiet Speċifiċi għall-Pajjiżi stabbilixxew it-triq 'il quddiem. F’dan il-kuntest, hemm bżonn ta’ sforz partikolari sabiex jinħolqu inċentivi tajbin għall-kumpaniji, b'mod partikolari għall-SMEs, sabiex jiġu rreklutati u miżmuma ż-żgħażagħ.

Iż-żgħażagħ huma milquta b’mod sproporzjonat mill-qgħad. Dan huwa r-riflessjoni ta' problemi aktar profondi u usa’ fil-funzjonament tas-swieq tax-xogħol. Barra minn hekk, f’ħafna pajjiżi, iż-żgħażagħ huma l-aktar fost il-ħaddiema b'kuntratti temporanji. It-tnaqqis tad-diskrepanzi bejn il-kuntratti temporanji u dawk permanenti fil-leġiżlazzjoni għall-ħarsien tal-impjiegi se jikkontribwixxi għall-faċilitazzjoni tat-tranżizzjoni ta’ dawk li qed ifittxu xogħol għall-ewwel darba, inklużi ż-żgħażagħ, minn impjiegi tal-bidu għal perjodu qasir sa impjiegi aktar stabbli li joffru prospetti tajbin ta' karriera. Barra minn hekk, it-tnaqqis fl-ispejjeż meta żgħażagħ jiġu impjegati fl-ewwel impjieg tagħhom, pereżempju permezz ta’ sussidji mmirati u tnaqqis fil-kontribuzzjonijiet tas-sigurtà soċjali fil-każ ta’ pożizzjonijiet b’ħiliet baxxi, fiċ-cirkustanzi t-tajbin jistgħu jagħtu kontribut importanti.

L-SMEs u b’mod partikolari l-mikrointrapriżi huma b'mod speċjali mutur importanti għall-ħolqien tax-xogħol għaż-żgħażagħ, u għalhekk għandu jsir kull sforz biex jiġu megħjuna jkollhom aċċess għall-finanzi li jeħtieġu biex jirnexxu. Hawnhekk l-istrumenti tal-UE, b’mod partikolari l-Fond Ewropew għall-Iżvilupp Reġjonali, għandhom rwol importanti, kemm biex jipprovdu appoġġ dirett lill-SMEs kif ukoll għall-kofinanzjament ta’ firxa wiesgħa ta’ strumenti finanzjarji. Il-Bank Ewropew tal-Investiment (BEI) għandu wkoll rwol kruċjali fir-rigward tal-aċċess għall-finanzjament għall-SMEs. Iż-żieda kapitali riċenti ta’ EUR 10 biljun hija mistennija li toħroġ EUR12,5 biljun fis-sena bħala appoġġ finanzjarju dirett għall-SMEs fil-perjodu bejn l-2013 u l-2015, u tista' timmobilizza b’kollox madwar EUR 37,5 biljun f’self lill-SMEs meta tipi oħra ta’ self li indirettament jibbenefikaw minnhom l-SMEs kif ukoll il-kofinanzjament jiġu kkunsidrati. Barra minn hekk, il-Kummissjoni attwalment qed taħdem mal-BEI biex tiżviluppa strumenti konġunti li jappoġġjaw is-self lill-SMEs.

Għaldaqstant, il-Kummissjoni tistieden lil:

Ø L-Istati Membri biex jimplimentaw ir-Rakkomandazzjonijiet Speċifiċi għall-Pajjiżi indirizzati lilhom, anki billi jillimitaw il-piż tat-taxxa fuq ix-xogħol, inaqqsu d-diskrepanzi bejn it-tipi differenti ta' kuntratti tax-xogħol sabiex jitħarsu l-impjiegi u jesploraw miżuri fil-mira sabiex ikun inċentivat l-impjieg taż-żgħażagħ.

Ø Il-BEI biex itejjeb is-sostenn għall-SMEs li joħolqu impjiegi u joffru apprentistati għal min għandu inqas minn 25 sena u biex tiġi aċċellerata l-ħidma mal-Kummissjoni biex jimplimentaw mekkaniżmi ġodda biex jappoġġjaw lill-SMEs.

*** Anness 1 : Il-qgħad fost iż-żgħaagħ marbut mar-Rakkomandazzjonijiet Speċifiċi għall-Pajjiżi

BE || Issimplifika u saħħaħ il-koerenza bejn l-inċentivi tal-impjiegi, il-politiki tal-attivazzjoni, it-tlaqqigħ tal-impjiegi, l-edukazzjoni, it-tagħlim tul il-ħajja u l-politiki ta' taħriġ vokazzjonali għall-anzjani u għaż-żgħażagħ.

BG || Aċċellera l-Inizjattiva favur l-Impjieg għaż-Żgħażagħ nazzjonali, pereżempju permezz ta' Garanzija għaż-Żgħażagħ. Adotta l-Att tal-Edukazzjoni fl-Iskejjel u segwi r-riforma tal-edukazzjoni ogħla, b'mod partikulari permezz ta' eżiti ta' allinjament aħjar għall-ħtiġijiet tas-suq tax-xogħol u t-tisħiħ tal-kooperazzjoni bejn l-edukazzjoni, ir-riċerka u n-negozju.

DK || Tejjeb il-kwalità tat-taħriġ vokazzjonali biex jitnaqqsu r-rati ta' dawk li jitilqu mill-iskola u jiżdied l-għadd ta' apprentistati.

EE || Kompli bl-isforzi biex tittejjeb ir-rilevanza tas-sistemi tal-edukazzjoni u tat-taħriġ fis-suq tax-xogħol, fosthom billi jiġu involuti aktar is-sħab soċjali u jiġu implimentati miżuri mmirati biex jindirizzaw il-qgħad fost iż-żgħażagħ.

ES || Implimenta u mmonitorja mill-qrib l-effettività tal-miżuri biex jiġi miġġieled il-qgħad fost iż-żgħażagħ stabbiliti fl-Istrateġija tal-Intraprenditorjat u tal-Impjiegi għaż-Żgħażagħ 2013-2016, pereżempju permezz ta' Garanzija għaż-Żgħażagħ. Kompli bl-isforzi biex tiżdied ir-rilevanza tal-edukazzjoni u tat-taħriġ fis-suq tax-xogħol, biex jitnaqqas it-tluq bikri mill-iskola u biex jitjieb it-tagħlim tul il-ħajja, jiġifieri billi titwessa' l-applikazzjoni tat-taħriġ vokazzjonali doppju lil hinn mill-fażi pilota attwali u billi tiġi introdotta sistema komprensiva ta' monitoraġġ tal-prestazzjoni tal-istudenti sal-aħħar tal-2013.

FI || Implimenta u mmonitorja mill-qrib l-impatt tal-miżuri li għaddejjin biex titjieb il-pożizzjoni taż-żgħażagħ u tan-nies qiegħda fit-tul fis-suq tax-xogħol, b'enfasi partikulari fuq l-iżvilupp tal-ħiliet rievanti għall-impjieg.

FR || Ħu aktar miżuri biex titjieb it-tranżizzjoni mill-iskola għax-xogħol, pereżempju permezz ta' Garanzija għaż-Żgħażagħ u promozzjoni tal-apprentistati.

HU || Indirizza l-qgħad fost iż-żgħażagħ, pereżempju permezz ta' Garanzija għaż-Żgħażagħ.  Implimenta starteġija nazzjonali dwar it-tluq bikri mill-iskola u żgura li s-sistema tal-edukazzjoni tipprovdi liż-żgħażagħ b'ħiliet, kompetenzi u kwalifiki rilevanti għas-suq tax-xogħol. ... Appoġġja t-tranżizzjoni bejn l-istadji differenti tal-edukazzjoni u lejn is-suq tax-xogħol. Implimenta riforma ta' edukazzjoni ogħla li tippermetti kisba ta' edukazzjoni terzjarja ogħla, b'mod partikulari minn studenti żvantaġġati.

IT || Ħu aktar azzjoni biex trawwem il-parteċipazzjoni fis-suq tax-xogħol, speċjalment tan-nisa u taż-żgħażagħ, pereżempju permezz tal-Garanzija għaż-Żgħażagħ. Saħħaħ l-edukazzjoni u t-taħriġ vokazzjonali, assigura servizzi pubbliċi tal-impjiegi aktar effiċjenti, u tejjeb is-servizzi ta' konsulenza għall-istudenti terzjarji. ... Tejjeb l-isforzi biex tevita t-tluq bikri mill-iskola u tejjeb il-kwalita u l-eżiti tal-iskola, anke billi tirriforma l-iżvilupp professjonali u tal-karriera tal-għalliema.

LT || Tejjeb l-impjegabbiltà taż-żgħażagħ, pereżempju permezz tal-Garanzija għaż-Żgħażagħ, tejjeb l-implimentazzjoni u l-effettività tal-iskemi għall-apprentistati, u indirizza n-nuqqas persistenti ta' tlaqqigħ ta' ħiliet.

LU || Tejjeb l-isforzi biex jitnaqqas il-qgħad fost-iż-żgħażagħ billi jittejjeb it-tfassil u l-monitoraġġ tal-politiki tas-suq tax-xogħol. Saħħaħ l-edukazzjoni ġenerali u vokazzjonali biex jitlaqqgħu aħjar il-ħiliet taż-żgħażagħ mad-domanda tax-xogħol, b'mod partikulari għal nies bi sfond ta' migrazzjoni.

LV || Indirizza l-qgħad fit-tul u fost iż-żgħażagħ billi żżid il-kopertura u l-effettività tal-politiki attivi fis-suq tax-xogħol u s-servizzi soċjali mmirati. Tejjeb l-impjegabbiltà taż-żgħażagħ, pereżempju permezz ta' Garanzija għaż-Żgħażagħ, waqqaf gwida komprensiva għall-karrieri, implimenta riformi fil-qafas tal-edukazzjoni u t-taħriġ vokazzjonali, u tejjeb il-kwalità u l-aċċessibbiltà tal-apprentistati.

MT || Kompli segwi sforzi ta' politika biex tnaqqas it-tluq bikri mill-iskola, speċjalment billi twaqqaf sistema komprensiva ta' monitoraġġ, u żid ir-rilevanza tal-edukazzjoni u tat-taħriġ fis-suq tax-xogħol billi tindirizza nuqqasijiet fil-ħiliet, fosthom permezz tar-riforma mħabbra tas-sistema ta' apprentistati.

PL || Saħħaħ l-isforzi biex jitnaqqas il-qgħad fost iż-żgħażagħ, pereżempju permezz ta' Garanzija għaż-Żgħażagħ, żid id-disponibbiltà tal-apprentistati u t-tagħlim ibbażat fuq ix-xogħol, saħħaħ il-kooperazzjoni bejn l-iskejjel u min iħaddem u tejjeb il-kwalità tat-tagħlim.

RO || Sabiex tiġġieled il-qgħad fost iż-żgħażagħ, implimenta mingħajr dewmien il-Pjan Nazzjonali għal Impjiegi għaż-Żgħażagħ, inkluż, pereżempju permezz ta' Garanzija għaż-Żgħażagħ. Tejjeb ir-riformi fl-edukazzjoni u t-taħriġ vokazzjonali. Kompli allinja l-edukazzjoni terzjarja mal-ħtiġijiet tas-suq tax-xogħol u tejjeb l-aċċess għan-nies żvantaġġati. Implimenta strateġija nazzjonali dwar it-tluq bikri mill-iskola li jiffoka fuq aċċess aħjar għal edukazzjoni bikrija tat-tfal ta' kwalità, anke għat-tfal tar-Rom.

SE || Saħħaħ l-isforzi biex ittejjeb l-integrazzjoni ta' żgħażagħ bi ftit kwalifiki u persuni bi sfond ta' migrazzjoni fis-suq tax-xogħol b'miżuri aktar b'saħħithom u aktar immirati biex titjieb l-impjegabbiltà tagħhom u d-domanda għal dawn il-gruppi. Tejjeb l-isforzi biex tiffaċilita t-tranżizzjoni mill-iskola għax-xogħol, anke permezz ta' aktar użu ta' tagħlim ibbażat fuq ix-xogħol, appentistati u forom oħra ta' kuntratti li jgħaqqdu l-impjiegi mal-edukazzjoni. Lesti l-Garanzija għaż-Żgħażagħ biex tkopri aħjar liż-żgħażagħ barra mill-edukazzjoni jew taħriġ.

SI || Ħu aktar miżuri biex iżżid l-impjieg ta' gradwati terzjarji żgħażagħ, anzjani u persuni bi ftit kwalifiki billi tiffoka r-riżorsi fuq miżuri ta' politika attiva fis-suq tax-xogħol imfasslin apposta filwaqt li titjieb l-effettività tagħhom. Indirizza n-nuqqas ta' tlaqqigħ ta' ħiliet billi ttejjeb l-attrattività tal-programmi ta' edukazzjoni u taħriġ vokazzjonali rilevanti u billi tkompli tiġi żviluppata l-kooperazzjoni mal-partijiet interessati rilevanti fil-valutazzjoni tal-ħtiġijiet tas-suq tax-xogħol. 

SK || Tejjeb l-isforzi biex tiġi indirizzata r-rata ta' qgħad għoli fost iż-żgħażagħ, pereżempju permezz ta' Garanzija għaż-Żgħażagħ. Ħu passi biex tiġbed liż-żgħażagħ lejn il-professjoni tat-tagħlim u għolli r-riżultati edukattivi. Fl-edukazzjoni u t-taħriġ vokazzjonali, saħħaħ il-proviżjoni tat-tagħlim ibbażat fuq ix-xogħol fil-kumpaniji. Fl-edukazzjoni ogħla, oħloq aktar programmi ta' baċellerat orjentati lejn l-impjiegi.

UK || B'segwitu għall-Kuntratt taż-Żgħażagħ, tejjeb il-miżuri biex tindirizza l-qgħad fost iż-żgħażagħ, pereżempju permezz ta' Garanzija għaż-Żgħażagħ.  Żid il-kwalità u t-tul tal-apprentistati, issimplifika s-sistema ta' kwalifiki u saħħaħ l-impenn ta' min iħaddem, b'mod partikulari fil-forniment ta' ħiliet tekniċi avvanzati u intermedji. Naqqas l-għadd ta' żgħażagħ fl-età ta' 18 sa 24 sena li għandhom ħiliet bażiċi baxxi ħafna, anke permezz ta' implimentazzjoni effettiva tal-programm ta' Skemi ta' Taħriġ.

Anness 2 – Kif il-Gruppi ta' Azzjoni għall-Impjiegi taż-Żgħażagħ għenu liż-żgħażagħ

L-Irlanda || - F'Diċembru 2012 tnieda Fond ta' Edukazzjoni u Taħriġ għas-Suq tax-Xogħol, magħruf bħala Momentum u huwa parti mill-Pjan ta' Azzjoni għall-Impjiegi tal-Irlanda, biex jipprovdi taħriġ ta' ħiliet għal massimu ta' 6 500 persuna qiegħda fit-tul. Il-FSE se jikkontribwixxi għal EUR 10 miljun għal dan il-Fond, li għandu baġit ġenerali ta' EUR 20 miljun. Wieħed mill-erba' oqsma ta' dan il-Fond huwa mfassal speċifikament għaż-Żgħażagħ taħt l-eta ta' 25 sena Attwalment, 816-il żagħżugħ huma appoġġjati minn dan il-qasam speċifiku. Iżda peress li ż-żgħażagħ jistgħu jipparteċipaw ukoll fit-tliet oqsma l-oħra, l-għadd totali ta' parteċipanti żgħażagħ f'Momentum huwa ta' 1 353. - EUR 25 miljun ġew diretti mill-ġdid għall-programm integrat Youthreach li jipprovdi edukazzjoni, taħriġ u esperjenza ta' xogħol liż-żgħażagħ li telqu kmieni mill-iskola mingħajr kwalifiki jew taħriġ vokazzjonali. Dan se jippermetti 3 700 post ta' taħriġ sal-aħħar tal-2013.

Is-Slovakkja || - B'segwitu għall-allokazzjoni mill-ġdid tal-FSE, f'Novembru 2012 tnedew żewġ proġetti nazzjonali (li jiswew EUR 70 miljun) li jappoġġjaw il-ħolqien tal-impjiegi għaż-żgħażagħ taħt l-età ta' 29 sena fis-setturi privati u awtonomi fir-reġjuni bl-ogħla livelli ta' qgħad (mira: 13 000 impjieg ġdid). S'issa l-implimentazzjoni tal-proġetti kienet ta' suċċess, u l-mikrointrapriżi u l-SMEs urew l-aktar interess li joffru opportunitajiet ta' xogħol liż-żgħażagħ. Sa nofs Mejju 2013, inħolqu aktar minn aktar minn 6 200 impjieg ġdid (EUR 33,1 miljun ikkuntrattati).

Il-Litwanja || - Fil-Litwanja, qed jiġu implimenttai l-azzjonijiet ippjanati kollha tal-FSE. Proġett ġie ffukat mill-ġdid biex joffri programmi ta' taħriġ vokazzjonali lil madwar 6 000 żagħżugħ u żagħżugħa. Il-baġit huwa ta'madwar EUR 6 miljun.  Il-proġett beda f'Awwissu 2012 u se jintemm f'Awwissu 2013.  L-għadd ta' parteċipanti huwa ta' 4 851. - Proġett li jipprovdi ħiliet għall-ewwel impjieg liż-żgħażagħ ġie estiż b'baġit addizzjonali ta' EUR 6 miljun, li se jappoġġja madwar 6 000 żagħżugħ u żagħżugħa. Il-proġett beda f'Awwissu 2011 u se jintemm f'Awwissu 2013.  Diġà pparteċipaw 4 382 żagħżugħ qiegħed f'dan il-proġett. - Il-Fond ta’ Promozzjoni tal-Imprenditorija (FSE EUR 14,5-il miljun) attwalment jipprovdi self u servizzi ta' taħriġ għal bidu ta' negozju u impjiegi indipendenti, u ż-żgħażagħ huma fost il-gruppi fokus ipprijoritizzati taħt din il-miżura. Ġiet approvata miżura ġdida (li tiswa EUR 3 miljun) biex tiżdied l-attrattività ta' din l-iskema ta' self għall-bidu ta' negozju u impjiegi indipendenti.  - Riċentement ġiet approvata miżura ġdida oħra tal-FSE (EUR 9,3 miljun) "Sostenn għall-ewwel impjieg", li tieħu post l-iskema eżistenti ta' tnaqqis tas-sigurtà soċjali għall-ewwel impjieg permezz ta' sussidji tal-pagi. Il-proġett beda f'Awwissu 2012 u se jintemm f'Settembru 2015.  L-għadd ippjanat ta' parteċipanti huwa ta' madwar 20 000. L-għadd ta' applikazzjonijiet riċevuti sat-18 ta' April 2013 huwa ta' 4 858. - Fis-17 ta' April 2013 ġiet approvata miżura ġdida li tiswa EUR 2,3 miljun, "Promozzjoni tal-impjiegi taż-żgħażagħ u l-motivazzjoni".  Tnejn mill-proġetti se jiffukaw fuq il-volontarjat u s-sostenn individwali għaż-żgħażagħ vulnerabbli.

Il-Latvja || - Ġew allokati EUR 11-il miljun għal diversi miżuri li jappoġġjaw liż-żgħażagħ mingħajr kwalifiki vokazzjonali u li jkunu qed ifittxu kwalifiki ġodda u orjentati lejn is-suq tax-xogħol. B'riżultat ta' dawn il-miżuri, il-proporzjoni taż-żgħażagħ qiegħda li jirċievu sostenn mill-UE se jaqbeż minn 24 % għal 40 %, filwaqt li l-għadd ta' persuni f'taħriġ vokazzjonali se jirdoppja. - Il-proġett ta' 5 snin "Il-Kisba ta' Programmi ta' Edukazzjoni Vokazzjonali, Ħiliet Bażiċi u Kompetenzi għas-Sostenn tal-Edukazzjoni u tal-Iżvilupp tal-Karrieri" huwa mmirat għat-tħejjija ta' professjonisti fil-livell sekondarju ta' ETV sabiex tiġi promossa l-kisba ta' kompetenzi vokazzjonali u ħiliet għal attivitajiet okkupazzjonali u edukazzjoni ulterjuri kif ukoll l-iffaċilitar tal-integrazzjoni fis-suq tax-xogħol. Huwa qed jiġi implimentat bi sħubija mal-iskejjel tal-ETV biex jiġu pprovduti programmi ta' 12-18-il xahar għal kwalifiki professjonali tat-tieni u tat-tielet livell għal mill-inqas 4 000 persuna taħt l-età ta' 25 sena. Sal-aħħar ta' Mejju 2013, 1 372 student irċevew il-kwalifika professjonali tat-tieni u tat-tielet livell. - Fl-2013, il-miżura "Workshops għaż-żgħażagħ", ikkofinanzjata mill-FSE qed tiġi implimentata bl-objettiv li tgħin lil sa 500 żgħażugħ u żagħżugħa mill-età ta' 15-il sena sa 24 sena mingħajr edukazzjoni vokazzjonali preċedenti biex jesperjenzaw 3 professjonijiet u jagħmlu għażla ta' karriera infurmata sew (500 żagħżugħ u żagħżugħa huma mistennija li jkunu involuti).

Il-Portugall || - Inizjattiva nazzjonali bl-isem ta' "Impulso Jovem" kienet tinkludi programmar mill-ġdid komprensiv tal-fondi strutturali tal-UE u se jibbenefikaw minnha 90 000 żagħżugħ u żagħżugħa sal-aħħar tal-2015. Ġew allokati mill-ġdid EUR 143 miljun mill-fondi tal-FSE biex jiġu ffinanzjati miżuri li jinkludu skemi ta' taħriġ f'setturi ekonomiċi ewlenin, kif ukoll sostenn għall-ikkuntrattar ta' persuni fl-età ta' 18-30 sena permezz ta' żburżar tal-kontribuzzjonijiet tas-sigurtà soċjali ta' min iħaddem. - Fi Frar 2013, twessa' l-kamp ta' applikazzjoni tal-programm, b'hekk tkabbru l-kriterji ta' eliġibbiltà kif ukoll ġie estiż għal reġjuni addizzjonali. Sal-aħħar ta’ Mejju, 9,676 żagħżugħ u żagħżugħa kienu koperti mill-programm s'issa. Sar trasferiment ta' EUR 10 miljun mill-Programm Operattiv tal-FEŻR tal-Madejra għall-Programm Operattiv tal-FSE korrispondenti sabiex jiġu appoġġjati l-miżuri ta' impjiegi taż-żgħażagħ bħall-iskemi ta' taħriġ u l-inċentivi tal-impjiegi. Sal-aħħar ta’ Mejju, 1,497 żagħżugħ u żagħżugħa addizzjonali kienu koperti.

Spanja || - Fi Spanja, fl-2012, aktar minn EUR 286 miljun f'finanzjament tal-FSE ġew allokati mill-ġdid għal azzjonijiet marbuta maż-żgħażagħ. Minn dawn, EUR 135 miljun ġew diretti għas-servizz pubbliku tal-impjiegi biex iż-żgħażagħ jiġu megħjuna jsibu xogħol. L-azzjonijiet taż-żgħażagħ implimentati s'issa jinkludu skejjel li jieħdu xejra ta' workshop u workshops ta' impjiegi, b'madwar 9 500 parteċipant żagħżugħ. Dawn huma programmi mħallta ta' impjiegi u taħriġ. Barra minn hekk, ġew implimentati sussidji fil-forma ta' tnaqqis f'kontribuzzjonijiet ta' sigurtà soċjali għall-kumpaniji li jimpjegaw żgħażagħ għal 142 000 żagħżugħ. - Fir-rigward ta' EUR 50 miljun tal-FSE allokati mill-ġdid fl-2012 fil-programm Ġlieda kontra d-Diskriminazzjoni, miżuri biex jiġu indirizzati l-problemi tal-qgħad fost iż-żgħażagħ jikkonsistu l-aktar f’attivitajiet marbuta ma’ pjanijiet integrati għall-impjiegi adattati għall-ħtiġijiet speċifiċi ta’ gruppi differenti, bħaż-żgħażagħ b’diżabilità, iż-żgħażagħ Rom, iż-żgħażagħ b’diffikultajiet speċjali u ż-żgħażagħ qiegħda b’livell medju ta’ prospetti ta’ impjegabbiltà. - Fit-12 ta' Marzu 2013, il-Gvern Spanjol ippreżenta l-Istrateġija għall-Intraprenditorija u l-Impjiegi għaż-Żgħażagħ 2013-2016. Din l-inizjattiva tipporvdi 100 miżura individwali biex jiġi miġġieled il-qgħad fost iż-żgħażagħ. L-azzjoni tindirizza liż-żgħażagħ inġenerali taħt l-età ta' 30 sena u speċjalment dawk li huma qiegħda. Sabiex jinkisbu l-objettivi tal-Istrateġija u jiġu implimentati l-miżuri l-ġodda, ġew assenjati EUR 3,485 biljun. Uħud mill-azzjonijiet se jkunu parzjalment iffinanzjati mill-FSE matul il-perjodi ta' programmar attwali u futuri.

L-Italja || - Bħala parti mill-Pjan ta' Azzjoni għal Koeżjoni, ġew allokati EUR 1,4 biljun għal azzjonijiet immirati għaż-żgħażagħ, fosthom Pjan għal Impjiegi għaż-Żgħażagħ fi Sqallija li jiswa EUR 452 miljun u huwa mistenni li jibbenefikaw minnu madwar 50 000 żagħżugħ u żagħżugħa, attivitajiet ta' edukazzjoni għal 65 300 student mir-reġjuni tan-Nofsinhar u 13 000 opportunità ta' mobilità ġdida. Fit-tieni fażi, ġew iddedikati EUR 620 miljun oħra għal azzjonijiet li jappoġġjaw liż-żgħażagħ u lin-NEET, fosthom is-sostenn għall-intraprenditorjat u l-ġlieda kontra t-tluq bikri mill-iskola. - Il-FSE se jikkofinanzja wkoll il-"programm AMVA" li jiswa EUR 118 miljun biex jappoġġja l-iskemi ta' apprentistat u l-"programm FIXO" (il-promozzjoni tal-gwida u tal-kollokament tal-istudenti) li jiswa EUR 36 miljun.

Il-Greċja || - B'segwitu għall-ipprogrammar mill-ġdid estensiv fl-aħħar tal-2012, f'Jannar 2013 ġie approvat pjan ta' azzjoni għaż-żgħażagħ nazzjonali b'finanzjament mill-UE ta' EUR 517 miljun. Il-pjan huwa maħsub li jippromwovi l-impjiegi, it-taħriġ u l-intraprenditorjat taż-żgħażagħ u jimmira għal kważi 350 000 żagħżugħ u żagħżugħa. Qed jiġi allokat sostenn addizzjonali ta' EUR 1,2 biljun biex jiġu indirizzati l-ħtiġijiet ta' likwidità skont l-aħħar eżerċizzju ta' programmar mill-ġdid. Skont l-aħħar informazzjoni mill-awtoritajiet Griegi, l-inizjattivi l-ġodda inklużi fil-pjan ta' azzjoni għaż-żgħażagħ adottat li diġà bdew (madwar EUR 47 miljun) jinkludu l-impjieg temporanju ta’ żgħażagħ qiegħda (sa 35 sena) fi programmi ta’ ħidma fil-Komunità fis-settur kulturali kif ukoll l-għoti ta’ sostenn għal strutturi soċjali li għandhom l-għan li jiġġieldu l-faqar u l-esklużjoni soċjali għar-reklutaġġ ta’ żgħażagħ qiegħda. - Barra minn hekk, qed titnieda l-implimentazzjoni tal-iskemi li ġejjin mill-pjan ta' azzjoni (madwar EUR 146 miljun): a) “vawċer għad-dħul fis-suq tax-xogħol” li jabbina t-taħriġ ma' kollokament f'impjieg ta' ħames xhur f'negozji u jimmira għal 45 000 żagħżugħ u żagħżugħa qiegħda sal-età ta' 29 sena; b) taħriġ teoretiku u fuq il-post tax-xogħol għal 1 000 baħri żagħżugħ qiegħed sal-istess limitu ta' età.

[1] COM(2013) 144 finali

[2] It-tnaqqis tal-livell limitu għar-reġjuni b'rati ta' qgħad fost iż-żgħażagħ li jaqbżu l-20 % u li jestendu s-sostenn tagħhom għall-grupp ta' età bejn il-25 u d-29 sena jnaqqas b'aktar min-nofs il-livell ta' sostenn għal kull NEET minn EUR 1360 għal EUR 560, u dan l-effett jagħmel ħsara kbira lill-effettività ta' dawn l-interventi.