Rakkomandazzjoni għal RAKKOMANDAZZJONI TAL-KUNSILL dwar il-programm nazzjonali ta' riforma tal-Italja għall-2013 u li tagħti opinjoni tal-Kunsill dwar il-programm ta' stabbiltà tal-Italja għall-2012-2017 /* COM/2013/0362 final - 2013/ () */
Rakkomandazzjoni għal RAKKOMANDAZZJONI TAL-KUNSILL dwar il-programm nazzjonali ta' riforma
tal-Italja għall-2013
u li tagħti opinjoni tal-Kunsill dwar il-programm ta' stabbiltà tal-Italja
għall-2012-2017 IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, u b’mod partikolari l-Artikoli 121(2)
u 148(4) tiegħu, Wara li kkunsidra r-Regolament tal-Kunsill
(KE) Nru 1466/97 tas-7 ta’ Lulju 1997 dwar
it-tisħiħ tas-sorveljanza ta’ pożizzjonijiet baġitarji u s-sorveljanza
u l-koordinazzjoni ta’ politika ekonomika[1],
u partikolarment l-Artikolu 5(2) tiegħu, Wara li kkunsidra r-Regolament (UE)
Nru 1176/2011 tal-Parlament Ewropew u tal-Kunsill
tas-16 ta’ Novembru 2011 dwar il-prevenzjoni u l-korrezzjoni
tal-iżbilanċi makroekonomiċi[2],
u b’mod partikolari l-Artikolu 6(1) tiegħu, Wara li kkunsidra r-rakkomandazzjoni
tal-Kummissjoni Ewropea[3], Wara li kkunsidra r-rakkomandazzjoni
tal-Parlament Ewropew[4], Wara li kkunsidra l-konklużjonijiet
tal-Kunsill Ewropew, Wara li kkunsidra l-opinjoni tal-Kumitat
tal-Impjiegi, Wara li kkonsulta l-Kumitat Ekonomiku u
Finanzjarju, Billi: (1) Fis-26 ta’ Marzu 2010,
il-Kunsill Ewropew qabel mal-proposta tal-Kummissjoni li tiġi mnedija
strateġija ġdida għat-tkabbir u l-impjiegi, bl-isem ta’ Ewropa
2020, li tkun imsejsa fuq koordinazzjoni msaħħa tal-politiki
ekonomiċi, li se tiffoka fuq l-oqsma ewlenin fejn tenħtieġ
azzjoni li tagħti spinta lill-potenzjal tal-Ewropa għat-tkabbir
sostenibbli u l-kompetittività. (2) Fit-13 ta’ Lulju 2010,
abbażi ta' proposti tal-Kummissjoni, il-Kunsill adotta rakkomandazzjoni
dwar il-linji gwida ġenerali għall-politiki ekonomiċi tal-Istati
Membri u l-Unjoni (mill-2010 sal-2014) u fil-21 ta’ Ottubru 2010
adotta deċiżjoni dwar il-linji gwida għall-politika tal-Istati
Membri dwar l-impjiegi[5],
li flimkien jagħmlu "l-linji gwida integrati". L-Istati Membri
ġew mistiedna jqisu l-linji gwida integrati fil-politiki nazzjonali
tal-ekonomija u tal-impjiegi tagħhom. (3) Fid-29 ta' Ġunju 2012,
il-Kapijiet tal-Istat jew tal-Gvern iddeċidew dwar Patt għat-Tkabbir
u l-Impjiegi li jipprovdi qafas koerenti għal azzjoni fuq livell
nazzjonali, ta' UE u taż-żona euro, bl-użu tal-influwenzi,
l-istrumenti, u l-politiki kollha possibbli. Huma ddeċidew dwar azzjoni li
għandha tittieħed fuq livell ta' Stat Membru, b'mod partikolari
esprimew l-impenn sħiħ tagħhom biex jintlaħqu l-objettivi
tal-Istrateġija Ewropa 2020 u biex jiġu implimentati
r-rakkomandazzjonijiet speċifiċi għall-pajjiż. (4) Fis-6 ta’ Lulju 2012,
il-Kunsill adotta rakkomandazzjoni dwar il-Programm Nazzjonali ta’ Riforma
tal-Italja għall-2012 u ta l-opinjoni tiegħu dwar il-programm ta’
stabbiltà aġġornat tal-Italja għall-2011-2015. (5) Fit-28 ta’ Novembru 2012,
il-Kummissjoni adottat l-Istħarriġ Annwali dwar it-Tkabbir[6], li ta bidu għas-Semestru
Ewropew għall-koordinazzjoni tal-politika ekonomika tal-2013. Barra minn
hekk, fit-28 ta' Novembru 2012, il-Kummissjoni abbażi
tar-Regolament (UE) Nru 1176/2011 adottat ir-Rapport dwar
il-Mekkaniżmu ta’ Twissija[7],
li fih identifikat lill-Italja bħala wieħed mill-Istati Membri li
dwaru kellha titwettaq analiżi fil-fond. (6) Fl-14 ta’ Marzu 2013,
il-Kunsill Ewropew approva l-prijoritajiet sabiex ikunu garantiti l-istabbiltà
finanzjarja, il-konsolidazzjoni fiskali u l-azzjoni li
tħeġġeġ it-tkabbir. Huwa enfasizza l-ħtieġa li
titkompla konsolidazzjoni fiskali differenzjata u li tiffavorixxi t-tkabbir,
biex l-ekonomija jerġa’ jkollha kundizzjonijiet normali għas-self,
biex jiġu promossi t-tkabbir u l-kompetittività, biex jiġu
indirizzati l-qgħad u l-konsegwenzi soċjali tal-kriżi, u biex
tiġi mmodernizzata l-amministrazzjoni pubblika. (7) Fl-10 ta' April 2013,
il-Kummissjoni ppublikat ir-riżultati tal-analiżi ddettaljata
tagħha dwar l-Italja[8],
skont l-Artikolu 5 tar-Regolament (UE) Nru 1176/2011. L-analiżi
tal-Kummissjoni twassalha biex tikkonkludi li l-Italja qiegħda tesperjenza
żbilanċi makroekonomiċi li jenħtieġu azzjoni
b'politika determinata. B'mod partikolari, it-telf tal-kompetittività esterna
kif ukoll id-dejn pubbliku f'ambjent ta' tkabbir imrażżan b'mod
kroniku, jibqgħu identifikati bħala l-iżbilanċi
makroekonomiċi prinċipali tal-Italja. (8) Fil-11 ta' April 2013,
l-Italja ssottomettiet il-Programm ta’ Stabbiltà tagħha għall-2013 li
jkopri l-perjodu 2012-2017, u l-Programm Nazzjonali ta’ Riforma tagħha
għall-2013. Wara din is-sottomissjoni, il-Gvern il-ġdid appuntat
fit-28 ta' April wera l-intenzjoni li jsaħħaħ
l-aġenda tar-riforma strutturali filwaqt li kkonferma l-miri
baġitarji mressqin fil-programm ta' stabbiltà. Fis-17 ta' Mejju,
ġie adottat digriet leġiżlattiv li kellu dispożizzjonijiet
ġodda dwar it-tassazzjoni fuq il-proprjetà immobbli u l-estensjoni
tal-iskema għas-supplement ta' pagi għall-ħaddiema mhux
impjegati biżżejjed. Sabiex jitqiesu r-rabtiet ta' bejniethom,
iż-żewġ programmi u l-miżuri ġodda meħuda
mill-Gvern ġew ivvalutati fl-istess waqt. (9) Abbażi tal-valutazzjoni
tal-Programm ta' Stabbiltà għall-2013-2017 skont ir-Regolament tal-Kunsill
(KE) Nru 1466/97, il-Kunsill huwa tal-opinjoni li x-xenarju makroekonomiku
li jappoġġja il-projezzjonijiet baġitarji fil-programm huwa
ottimist għall-2014, meta kkumparat mat-tbassir tar-rebbiegħa 2013
tal-Kummissjoni. Huwa plawżibbli mill-2015 'il quddiem, imma dan jekk
jiġi meqjus li sseħħ l-implimentazzjoni sħiħa
tar-riformi strutturali adottati, li tibqa' sfida. L-istrateġija
baġitarja mfassla fil-programm ġiet ikkonfermata mill-Gvern u
approvata mill-Parlament. Din għandha l-għan li żżomm
id-defiċit taħt it-3 % tal-PDG tul il-perjodu tal-programm,
tilħaq l-objettiv ta' terminu medju (OTM) fl-2013 u tpoġġi
l-proporzjon bejn id-dejn u l-PDG fit-triq tan-niżla sa mill-2014.
Il-programm jikkonferma l-OTM ta' pożizzjoni baġitarja f'termini
strutturali, li qiegħed f'linja mal-Patt ta' Stabbiltà u Tkabbir. Id-defiċit
tnaqqas għal 3 % tal-PDG fl-2012 u skont it-tbassir
tar-rebbiegħa 2013 tal-Kummissjoni rrilaxxat fit-3 ta' Mejju,
huwa mistenni jibqa' taħt il-valur referenzjali fl-2013-14.
Id-dispożizzjonijiet adotatti mill-Gvern Taljan fis-17 ta' Mejju
ġew ivvalutati li m'għandhomx impatt sinifikattiv fuq
id-defiċit, jekk implimentati b'mod konsistenti. Il-bilanċ
strutturali, wara li tjieb b'2,7 punti perċentwali tal-PDG f'termini
kumulattivi bejn l-2009 u l-2012, u jekk ma jkunx hemm aktar tibdil ta'
politika, bħala parti mill-PDG huwa previst li jitjieb b'punt
perċentwali ieħor fl-2013, għal -0,5 %, u mbagħad
jonqos marġinalment fl-2014. Il-bilanċ strutturali primarju se
jilħaq kważi l-5 % tal-PDG fl-2014. L-aġġustament
strutturali previst għall-2013 huwa xieraq, ibbażat ukoll fuq
l-analiżi tan-nefqa netta mill-miżuri diskrezzjonarji fid-dħul,
filwaqt li għall-2014 juri devjazzjoni mit-triq ta' aġġustamnet
lejn l-OTM. Il-programm jipprevedi li l-proporzjon tad-dejn tal-Gvern
jilħaq il-massimu fl-2013 u jibda jonqos minn hemm 'il quddiem, anki grazzi
għad-dħul previst mill-privatizzazzjoni li jammonta għal punt
perċentwali tal-PDG fis-sena. Fit-tbassir, madankollu, il-proporzjon
tad-dejn mal-PDG għadu jiżdied, anki minħabba s-saldu tad-dejn
kummerċjali, li jżid madwar 2,5 punti perċentwali fuq l-2013-2014,
filwaqt li l-ebda dħul mill-privatizzazzjoni mhuwa inkluż għax
id-dettalji għadhom ma ġewx speċifikati. Sa mill-2013, l-Italja
qiegħda f'perjodu ta' tranżizzjoni rigward il-konformità mal-kriterju
tad-dejn, u t-trajettorja tad-dejn fil-programm ta' stabbiltà tiżgura
progress suffiċjenti sabiex isseħħ konformità miegħu.
Madankollu, il-projezzjonijiet tad-defiċit u tad-dejn fil-programm isiru
effettivi mal-implimentazzjoni sħiħa tal-miżuri baġitarji u
tar-riformi strutturali adottati, li huma essenzjali biex
tissaħħaħ il-kunfidenza fis-suq u jitjiebu t-tkabbir u
l-impjiegi. (10) Filwaqt li ġew adottati
riformi importanti li jħeġġu is-sostenibbiltà fiskali u
jixprunaw it-tkabbir, l-implimentazzjoni sħiħa tagħhom tibqa'
sfida u hemm lok għal aktar azzjoni. Diversi miżuri prinċipali
li ġew proposti għadhom ma ġewx approvati jew għadhom
jenħtieġu leġiżlazzjoni applikattiva, u hemm ir-riskju li
l-applikazzjoni konkreta tagħhom ma tkunx segwita fil-livelli kollha
tal-Gvern. L-effiċjenza fl-amministrazzjoni pubblika f'termini ta' qafas
regolatorju u proċedurali, il-kwalità tal-governanza u l-kapaċità
amministrattiva għadhom isofru minn dgħufijiet sinifikanti li
jaffettwaw l-implimentazzjoni tar-riformi u tal-ambjent kummerċjali. (11) It-tlestija tar-riforma
tal-ġustizzja ċivili bl-implimentazzjoni tar-reviżjoni
fl-organizzazzjoni tal-qrati u t-tnaqqis tad-dewmien eċċessiv,
id-dewmien fl-immaniġjar tal-każijiet, ix-xogħol b'lura u
l-livell għoli ta' tilwim legali, hija neċessarja biex jitjieb
l-ambjent kummerċjali. Wara s-sentenza tal-qorti Kostituzzjonali
f'Ottubru 2012 dwar il-medjazzjoni, hija meħtieġa azzjoni li
tippromwovi l-użu ta' mekkaniżmi għal soluzzjoni
għat-tilwim barra l-qorti. Il-korruzzjoni tirrappreżenta inkwiet
serju li timplika spiża stmata għal 4 % tal-PDG, li ttellef
serjament il-potenzjal ta' rkupru ekonomiku. Il-Liġi ta' Kontra
l-Korruzzjoni ta' Novembru 2012 tenħtieġ azzjoni ta' segwitu u
l-effiċjenza fit-trażżin tal-korruzzjoni tista' tittejjeb, b'mod
partikolari fir-rigward tal-istatut tal-limitazzjonijiet attwalment
ikkaratterizzat minn termini qosra ta' preskrizzjoni. (12) L-istrateġija ta'
konsolidazzjoni fiskali ambizzjuża adottata s'issa kienet akkumpanjata
bl-introduzzjoni ta' regola baġitarja bbilanċjata fil-Kostituzzjoni
f'April 2012 u b'azzjoni sabiex tittejjeb l-effikaċja u l-kwalità
tan-nefqa pubblika. Madankollu, lakuni fl-implimentazzjoni tellfu l-effettività
sħiħa tal-azzjoni meħuda, b'mod partikolari fir-rigward
tal-effiċjenza tal-impjiegi fis-settur pubbliku u fit-tnaqqis tal-għadd
ta' provinċji. Il-pjan ta' azzjoni għall-Koeżjoni għamilha
possibbli li l-fondi strutturali li jammontaw għal EUR 12,1 biljun
jiġu assorbiti malajr kemm jista' jkun fi tliet fażijiet
konsekuttivi. Madankollu, ma hemmx ħerqa għal titjib fl-immaniġjar
ġenerali tal-fondi, speċjalment fin-nofsinhar tal-Italja, li
jagħti lok għal tħassib serju għall-perjodu ta' programmar
tal-2014-2020. Dan jiftaħ l-ambitu għal titjib fl-effiċjenza
tan-nefqa pubblika. (13) Il-banek tradizzjonalment
għandhom rwol deċiżiv billi jappoġġjaw l-attivita
ekonomika Taljana, b'mod partikolari b'self lill-impriżi żgħar,
iżda din il-kapaċità tagħhom li jieħdu dan ir-rwol
ġiet imdgħajfa minħabba r-riċessjoni ekonomika fit-tul.
Iż-żieda fir-riskju ta' kreditu, bi stokk kbir u dejjem jiżdied
ta' self li mhux irendi, ikkontribwixxiet għal tnaqqis fis-self u tiggrava
l-profitabbiltà baxxa tal-banek. Bi tweġiba, il-Bank tal-Italja qed
jivvaluta l-adegwatezza tal-provvediment ta' self danneġġat bi
spezzjonijiet fuq il-post. Karatteristiċi speċifiċi
fil-governanza korporattiva tal-banek Taljani jistgħu jillimitaw
l-effikaċja tal-intermedjazzjoni finanzjarja tagħhom. Ġew
adottati miżuri li jinkuraġġixxu l-użu ta' mezzi
finanzjarji mhux bankarji, b'mod partikolari il-finanzjament tal-ekwità, u
jinkuraġġixxu l-kapaċità innovattiva, iżda l-kamp ta'
applikazzjoni tagħhom jibqa' limitat u għadhom ma ġewx s'issa
kompletament implimentati. It-traspożizzjoni tad-direttiva tal-UE dwar
il-pagamenti tard fit-tranżazzjonijiet kummerċjali u s-saldu ppjanat
tal-istokk akkumulat ta' dejn kummerċjali se jikkontribwixxu biex itejbu
l-likwidità tal-impriżi. (14) Riforma tas-suq
tax-xogħol fuq firxa wiesgħa ġiet adottata
f'Ġunju 2012, u tindirizza r-riġidità u s-segmentazzjoni fis-suq
tax-xogħol. Ir-riforma trid titlesta billi tiġi adottata
l-leġiżlazzjoni implimentattiva pendenti u t-tħaddim konkret
tagħha jkun immonitorjat b'reqqa fuq il-post. Barra minn hekk, is-servizz
statali tal-impjiegi għad irid jiġi integrat mal-amministrazzjoni
tal-benefiċċju tal-qgħad sabiex tkun apoġġata
l-implimentazzjoni ta' strateġiji effiċjenti ta' attivazzjoni. Qafas
ġdid għall-iffissar tal-pagi kien definit mill-imsieħba
soċjali fi ftehimiet suċċessivi bejn l-2011u l-2013. Dan huwa
appoġġat minn inċentivi fiskali sabiex jixpruna l-allinjament
tal-pagi mal-produttività u bil-kundizzjonijiet lokali tas-suq tax-xogħol.
Dan il-qafas għandu jkun implimentat b'mod effettiv u aġġustat
progressivament abbażi tal-monitoraġġ tar-riżultati. (15) Il-qgħad fost
iż-żgħażagħ u l-proporzjon ta' żgħażagħ
li m'għandhomx impjieg, edukazzjoni jew taħriġ komplew
jiżdiedu, sal-aħħar tal-2012 laħqu 37 % u 21,1 %
rispettivament. Kemm min għandu edukazzjoni terzjarja kif ukoll ir-rata
tal-impjiegi għall-iggradwati terzjarji żgħażagħ huma
l-aktar baxxi fl-UE, li turi li l-ħiliet tal-iggradwati
żgħażagħ huma ftit li xejn relevanti għas-suq
tax-xogħol. It-tluq kmieni mill-iskola għalkemm qed jonqos
b'moderazzjoni, għadu għoli. Dan iqajjem tħassib rigward
il-prestazzjoni tas-sistema edukattiva. Wieħed mill-elementi
prinċipali hija l-professjoni tal-għalliem, li attwalment hija
kkaratterizzata minn karriera b'rotta waħda u toffri prospetti limitati
f'termini ta' żvilupp professjonali. Il-parteċipazzjoni tan-nisa
fis-suq tax-xogħol għadha dgħajfa u d-differenza bejn
l-irġiel u n-nisa impjegati għadha waħda mill-ogħla fl-UE.
Ir-riskju tal-faqar u tal-esklużjoni soċjali, u b'mod partikolari
d-depravazzjoni materjali severa qed jiżdiedu, filwaqt li s-sistema ta'
protezzjoni soċjali għandha diffikultajiet li qed jiżdiedu, biex
tkampa mal-bżonnijiet soċjali ġaladarba hija ddominata min-nefqa
għall-pensjonijet, kif ukoll it-trasferimenti soċjali li jeskludu
l-pensjonijiet mhumiex iffukati biżżejjed biex jiġġieldu
l-faqar u jippromwovu l-inklużjoni soċjali. (16) L-istruttura tas-sistema
tat-taxxa għadha kumplessa u tistrieħ ħafna fuq ix-xogħol u
l-kapital. Wara sforz li ttieħed fl-2010-2011, miżuri oħra li
ġew adottati biex ixaqilbu l-piż tat-taxxa minn fuq il-fatturi
produttivi għal fuq il-konsum, il-proprjetà u l-ambjent, kienu aktar
limitati. Għad hemm bżonn ta' azzjoni biex tiġi ssimplifikata
s-sistema tat-taxxa, jiġu ssimplifikati n-nefqiet fiskali, titjieb
il-konformità u ma tkunx inċentivata l-evażjoni. Sakemm issir
ir-reviżjoni tal-valuri katastali, ir-riforma prevista fit-tassazzjoni
tal-proprjetà immobbli għandha fil-mira li tagħmilha aktar
ġusta, skont il-limiti tal-istrateġija baġitarja stipulata
fil-programm ta' stabbiltà. Minn tnaqqis fl-ekonomija s-sewda u x-xogħol
mhux iddikjarat jistgħu jibbenefikaw il-finanzi pubbliċi u jista'
jkun hemm implikazzjonijiet pożittivi fuq l-ekwitajiet. Ir-reviżjoni
tal-eżenzjonijiet tal-VAT jew ir-rati mnaqqsin u l-infiq fiskali dirett
jistgħu jenħtieġu xi aġġustament fit-trasferimenti
soċjali sabiex ikun imnaqqas l-impatt tad-distribuzzjoni. (17) Saru sforzi notevoli biex
is-settur tas-servizzi jiġi liberalizzat. Madankollu, ir-riforma
tal-professjonijiet irregolati għandha titkompla sabiex tindirizza
ir-restrizzjonijiet li fadal, u l-prinċipji ewlenin għandhom ikunu
ssalvagwardjati kontra l-ostakli possibbli, li jiġu b'mod partikolari
mir-riforma tal-professjoni legali. Wara s-sentenza tal-Qorti Kostituzzjonali
f'Lulju tal-2012, azzjoni sabiex jinfetħu s-servizzi pubbliċi lokali
hija wkoll importanti. (18) Ir-riforma fl-industriji
tan-netwerks għadha għaddejja biex jinfetaħ l-aċċess
għas-suq u titjieb il-kapaċità infrastrutturali, iżda għad
hemm sfidi importanti. Is-separazzjoni tas-settur tal-gass għandha
titlesta sa Settembru 2013 u l-istrateġija nazzjonali ta'
Marzu 2013 għall-enerġija għadha trid tiġi
implimentata. Il-ftuħ tat-telekomunikazzjoni għall-kompetizzjoni huwa
qasam potenzjali ieħor ta' azzjoni. L-awtorità tat-trasport il-ġdida
responsabbli mill-awtostradi, l-ajruporti, il-portijiet u l-ferroviji
għadha ma twaqqfitx. Għandha tkun indipendenti, tingħata
r-riżorsi li għandha bżonn biex tiffunzjona u jkollha poter li
tagħti sanzjonijiet. Hemm ukoll il-problema serja tan-nuqqasijiet
infrastrutturali interni u bejn il-fruntieri, b'differenzi bejn it-Tramuntana u
n-Nofsinhar, li jikkontribwixxu għal prezzijiet enerġetiċi
għoljin, penetrazzjoni baxxa tal-broadband u konġestjoni
tat-trasport. (19) Fil-kuntest tas-Semestru
Ewropew, il-Kummissjoni wettqet analiżi komprensiva tal-politika ekonomika
tal-Italja. Hija vvalutat il-programm ta’ stabbiltà u l-programm nazzjonali ta’
Riforma, u ppreżentat analiżi fil-fond. Hija mhux biss qieset
ir-rilevanza tagħhom għall-politika sostenibbli fiskali u
soċjoekonomika fl-Italja, imma wkoll il-konformità tagħhom mar-regoli
u l-gwida tal-UE, fid-dawl tal-ħtieġa tat-tisħiħ
tal-governanza ekonomika kumplessiva tal-Unjoni Ewropea billi jiġi
pprovdut kontribut fil-livell tal-UE għad-deċiżjonijiet
nazzjonali futuri. Ir-rakkomandazzjonijiet tagħha skont is-Semestru
Ewropew huma riflessi fir-rakkomandazzjonijiet (1) sa (6) hawn taħt. (20) Fid-dawl ta’ din
il-valutazzjoni, il-Kunsill eżamina l-programm ta’ stabbiltà tal-Italja, u
l-opinjoni tiegħu[9]
hija riflessa b’mod partikolari fir-rakkomandazzjoni (1) hawn taħt, (21) Fid-dawl tal-analiżi
ddettaljata tal-Kummissjoni u ta’ din il-valutazzjoni, il-Kunsill eżamina
l-programm nazzjonali ta’ riforma u l-programm ta’ stabbiltà.
Ir-rakkomandazzjonijiet tiegħu skont l-Artikolu 6 tar-Regolament (UE)
Nru 1176/2011 dwar il-prevenzjoni u l-korrezzjoni tal-iżbilanċi
makroekonomiċi huma riflessi fir-rakkomandazzjonijiet minn (1) sa (6) hawn
taħt. (22) Fil-kuntest tas-Semestru
Ewropew il-Kummissjoni wettqet ukoll analiżi tal-politika ekonomika
taż-żona tal-euro kollha. Abbażi ta' dan, il-Kunsill
ħareġ rakkomandazzjonijiet speċifiċi indirizzati
lill-Istati Membri li l-munita tagħhom hija l-euro. L-Italja għandha
wkoll tiżgura l-implimentazzjoni sħiħa u f'waqtha ta' dawn
ir-rakkomandazzjonijiet. B’DAN JIRRAKKOMANDA li l-Italja
tieħu azzjoni fil-perjodu 2013-2014 sabiex: 1. Tiżgura li
d-defiċit jibqa' taħt it-3 % tal-PDG fl-2013, billi timplimenta
bi sħiħ il-miżuri adottati. Twettaq l-aġġustament
strutturali b'pass xieraq u permezz ta' konsolidazzjoni fiskali li
tħeġġeġ it-tkabbir sabiex tilħaq u żżomm
l-OTM sa mill-2014. Tilħaq l-eċċessi strutturali primarji
ppjanati sabiex il-proporzjon għoli ferm ta' bejn id-dejn u l-PDG (previst
li jkun 132,2 % tal-PDG fl-2014) jieħu t-triq tan-niżla. Tkompli
twettaq titjib li jdum fl-effiċjenza u l-kwalità tan-nefqa pubblika billi
timplimenta bi sħiħ il-miżuri adottati fl-2012 kif ukoll
iżżid l-isforz permezz ta' analiżi regolari profonda tal-infiq
fil-livelli kollha tal-Gvern. 2. Tiżgura
l-implimentazzjoni f'waqtha tar-riformi li għadhom għaddejjin billi
tadotta b'ħeffa l-leġiżlazzjoni applikabbli neċessarja, li
għandha tkun segwita bit-twettiq konkret fil-livelli kollha tal-Gvern u
bil-partijiet interessati relevanti kollha, u bil-monitoraġġ
tal-impatt. Issaħħaħ l-effiċjenza tal-amministrazzjoni
pubblika u ttejjeb il-koordinazzjoni bejn is-saffi tal-Gvern. Tissimplifika
l-qafas amministrattiv u regolatorju għaċ-ċittadini u n-negozji
u tnaqqas id-dewmien fl-immaniġjar tal-każijiet kif ukoll il-livelli
għolja ta' tilwim fil-ġustizzja ċivili, anki billi
ssaħħaħ l-proċeduri ta' soluzzjoni alternattiva
għat-tilwim. Issaħħaħ il-qafas legali
għat-trażżin tal-korruzzjoni, anki billi jiġu
reviżjonati r-regoli li jirregolaw il-perjodi ta' limitazzjoni. Tadotta
miżuri strutturali biex ittejjeb l-immaniġjar tal-fondi tal-UE
fir-reġjuni tan-Nofsinhar fil-perjodu ta' programmar 2014-2020. 3. Tippromwovi prattiki ta'
governanza korporatitva fis-settur bankarju li jwasslu għal aktar
effiċjenza u profittabbiltà biex ikun sostnut il-fluss ta' kreditu
għall-attivitajiet produttivi. Titrasferixxi x-xogħol li għaddej
bħalissa rigward l-iskrinjar tal-kwalità tal-assi għas-settur
bankarju u tiffaċilita s-saldu ta' self improduttiv fuq il-karti
tal-bilanċ tal-banek. Tippromwovi aktar l-iżvilupp tas-swieq
tal-kapital biex tiddiversifika u ssaħħaħ l-aċċess
tal-impriżi għall-finanzjament, speċjalment fl-ekwità, u b'hekk
tinkoraġġixxi l-kapaċità u t-tkabbir fl-innovazzjoni. 4. Tiżgura
l-implimentazzjoni effettiva tas-suq tax-xogħol u tar-riformi
għall-iffissar tal-pagi, sabiex tippermetti allinjament aħjar bejn
il-pagi u l-produttività. Tieħu aktar azzjoni biex ittejjeb
il-parteċipazzjoni fis-suq tax-xogħol speċjalment tan-nisa u
taż-żgħażagħ, pereżempju permezz ta' Garanzija
għaż-Żġħażagħ. Issaħħaħ
l-edukazzjoni vokazzjonali u t-taħriġ, tiżgura aktar
effiċjenza fis-servizzi pubbliċi tal-impjieg u ttejjeb is-servizzi
dwar il-karriera u li jagħtu parir lill-istudenti terzjarji. Tnaqqas
id-diżinċentivi fiskali biex it-tieni persuna toħroġ
taħdem b'paga u ttejjeb id-dispożizzjoni tas-servizzi għall-kura
u s-servizzi mhux marbutin mal-iskola. Iżżid l-isforzi biex
timpedixxi t-tluq kmieni mill-iskola u ttejjeb il-kwalità tal-edukazzjoni kif
ukoll tar-riżultati, anki permezz ta' riforma fl-iżvilupp
professjonali u tal-karriera tal-għalliema. Tiżgura l-effikaċja
tat-trasferimenti soċjali, b'mod partikolari billi tpoġġi
fil-mira l-benefiċċji, speċjalment għall-familji bi
dħul baxx li għandhom it-tfal. 5. Tispostja l-piż
tat-taxxa minn fuq ix-xogħol u l-kapital għal fuq il-konsum,
il-proprjetà u l-ambjent b'mod newtrali għall-baġit. Għal dan
il-għan, tirrevedi l-kamp ta' applikazzjoni tal-eżenzjonijiet tal-VAT
u tar-rati mnaqqsin u tal-infiq dirett tat-taxxa, u tirriforma s-sistema
katastali biex tallinja l-bażi tat-taxxa tal-proprjetà immobbli rikorrenti
mal-valuri tas-suq. Tiġġieled kontra l-evażjoni tat-taxxa,
ittejjeb il-konformità tat-taxxa u tieħu passi deċiżivi kontra
l-ekonomija sewda u x-xogħol mhux iddikjarat. 6. Tiżgura
l-implimentazzjoni korretta tal-miżuri li għandhom fil-mira
l-liberalizzazzjoni tas-swieq fis-settur tas-servizzi. Tneħħi
r-restrizzjonijiet li jifdal fis-servizzi professjonali u ttejjeb
l-aċċess għas-suq pereżempju fl-għoti tas-servizzi
pubbliċi lokali, fejn l-użu tal-akkwist pubbliku għandu jitmexxa
'l quddiem (minflok il-konċessjonijet diretti). Tpoġġi
fis-seħħ il-miżuri meħuda sabiex jitjiebu l-kundizzjonijiet
t'aċċess għas-suq fl-industriji tan-netwerk, b'mod partikolari
billi bħala prijorità twaqqaf b'urġenza l-Awtorità tat-Trasport.
Taġġorna l-kapaċità tal-infrastruttura, b'fowkus fuq
l-interkonnessjonijiet tal-enerġija, it-trasport intermodali u l-broadband
b'veloċità għolja fit-telekomunikazzjoni, anki bil-ħsieb li
jiġu indirizzati d-differenzi bejn it-Tramuntana u n-Nofsinhar. Magħmul fi Brussell, F'isem
il-Kunsill Il-President [1] ĠU L 209, 2.8.1997, p. 1. [2] ĠU L 306, 23,11.2011, p. 25. [3] COM(2013) 362 finali. [4] P7_TA(2013)0052 u P7_TA(2013)0053. [5] Id-Deċiżjoni tal-Kunsill 2013/208/UE
tat-22 ta' April 2013. [6] COM(2012) 750 finali. [7] COM(2012) 751 finali. [8] SWD(2013) 118 finali. [9] Skont l-Artikolu 5(2) tar-Regolament tal-Kunsill (KE)
Nru 1466/97.