21.11.2013   

MT

Il-Ġurnal Uffiċjali tal-Unjoni Ewropea

C 341/27

1.1

Il-Kumitat Ekonomiku u Soċjali Ewropew (KESE) jieħu nota tal-proposta tal-Kummissjoni li jiġi emendat ir-Regolament (KE) Nru 1083/2006 sabiex il-pagamenti għall-pajjiżi milquta mill-kriżi u li qed jirċievu l-għajnuna finanzjarja mill-Mekkaniżmu Ewropew ta' Stabbilizzazzjoni Finanzjarja (EFSM) jew mill-mekkaniżmu tal-Bilanċ tal-Pagamenti (BOP) jiżdiedu bl-applikazzjoni ta' 10 punti perċentwali supplimentari tar-rati ta' kofinanzjament applikabbli għall-assi prijoritarju matul il-perjodu meta ser ikunu qed jibbenefikaw minn dawn il-mekkaniżmi ta' appoġġ, iżda mingħajr ma tiġi miżjuda l-allokazzjoni totali tagħhom taħt il-politika ta' koeżjoni tal-Unjoni għall-perjodu ta' programmazzjoni 2007-2013. Madankollu, xorta waħda tinżamm l-effikaċja tal-kofinanzjament.

1.2

Il-KESE jieħu nota tal-proposta tal-Kummissjoni li jiġi emendat ir-Regolament (KE) Nru 1083/2006 sabiex ir-Rumanija u s-Slovakkja jkunu jistgħu jressqu l-applikazzjonijiet għal rimborż sa tmiem l-2014 minflok sa tmiem l-2013 (għall-impenji tal-2011) u sa tmiem il-programm minflok sa tmiem l-2014 (għall-impenji tal-2012), iżda mingħajr ma tiżdied l-allokazzjoni finanzjarja globali fil-qafas tal-politika ta' koeżjoni tal-UE għall-perjodu ta' programmazzjoni 2007-2013. B'hekk jonqos ir-riskju tad-diżimpenn awtomatiku tal-impenji tal-2011 u l-2012.

1.3

Il-KtR jaqbel ma' din il-proposta, b'konformità mal-opinjonijiet preċedenti tiegħu, bil-kundizzjoni li jibqgħu jiġu żgurati l-koerenza u l-effikaċja fl-użu tal-baġits.

2.1

Il-proposta tal-Kummissjoni tipprova tnaqqas il-kontribuzzjonijiet għall-proġetti kofinanzjati fil-qafas tal-politika ta' koeżjoni tal-UE li qed jintalbu bħalissa minn seba' Stati Membri li jirċievu l-għajnuna mill-EFSM jew mill-BOP. B'dan il-mod l-Istati Membri ma jkollhomx jirrikorru biss għar-riżorsi proprji tagħhom biex isibu r-riżorsi meħtieġa, ħaġa li fi żmien meta l-baġits nazzjonali jinsabu taħt pressjoni qawwija tikkontribwixxi b'mod konsiderevoli biex l-ekonomiji milquta mill-kriżi jerġgħu jaqbdu t-triq tat-tkabbir. Il-kofinanzjament iżid l-effikaċja tal-għajnuna li tingħata. Jekk jonqos il-kofinanzjament, ikun hemm ir-riskju li l-għajnuna tkun inqas effikaċi. Dan ir-riskju għandu jinżamm baxx kemm jista' jkun permezz tar-riżorsi disponibbli kollha. Il-KESE japprova l-proposta tal-Kummissjoni, li hi konformi mal-opinjonijiet preċedenti tiegħu (1).

2.2

Bl-estensjoni tal-possibbiltà li jressqu l-applikazzjonijiet għal rimborż sa tmiem l-2014, is-Slovakkja u r-Rumanija ser ikollhom flessibbiltà akbar biex iwettqu aħjar il-proġetti kofinanzjati fil-qafas tal-politika ta' koeżjoni tal-UE. L-estensjoni tal-iskadenza għad-diżimpenn awtomatiku tal-impenji hi wkoll adegwata għaliex hi limitata għal dawk l-Istati Membri li l-allokazzjonijiet finanzjarji tagħhom kienu ser ikunu limitati għall-perjodu 2014-2020 abbażi tal-ftehim li laħaq il-Kunsill Ewropew. Il-perjodu għad-diżimpenn tal-impenji ġie estiż fuq l-inizjattiva tal-Kunsill Ewropew li, fil-konklużjonijiet tiegħu tat-8 ta' Frar 2013, stieden lill-Kummissjoni biex tesplora soluzzjonijiet prattiċi biex jitnaqqas ir-riskju ta' diżimpenn awtomatiku tal-fondi mill-pakkett nazzjonali tal-2007-2013 għar-Rumanija u s-Slovakkja, inkluża l-emenda tar-Regolament (KE) Nru 1083/2006.

2.3

Il-KESE jemmen ukoll li huwa essenzjali li jiġu promossi l-benesseri u l-kompetittività fl-Istati Membri l-aktar milquta mill-kriżi, u għalhekk jappoġġja l-proposta msemmija hawn fuq.

2.4

Il-KESE jaqbel li l-allokazzjoni finanzjarja globali mill-Fondi għall-pajjiżi u l-proġetti kkonċernati ma tinbidilx għaż-żmien inkwistjoni.