(1)

Ir-Regolament (KE) Nru 994/98 jagħti lill-Kummissjoni s-setgħa li tistabbilixxi, permezz ta' Regolament, livell limitu li taħtu l-miżuri ta’ għajnuna jitqiesu li ma jkunux jilħqu l-kriterji kollha stipulati fl-Artikolu 107(1) tat-Trattat u għalhekk ma jkunux jaqgħu taħt il-proċedura ta’ notifika stipulata fl-Artikolu 108(3) tat-Trattat.

(2)

Abbażi ta' dak ir-Regolament, il-Kummissjoni adottat, b’mod partikolari, ir-Regolament (KE) Nru 1998/2006 tal-15 ta' Diċembru 2006 dwar it-tħaddim tal-Artikoli 87 u 88 tat-Trattat dwar għajnuna de minimis  (3), li tistabbilixxi livell massimu ġenerali de minimis ta' EUR 200 000 għal kull benefiċjarju matul perjodu ta' tliet snin fiskali.

(3)

L-esperjenza tal-Kummissjoni fl-applikazzjoni tar-regoli dwar l-għajnuna mill-Istat lil impriżi li jipprovdu servizzi ta' interess ekonomiku ġenerali skont it-tifsira tal-Artikolu 106(2) tat-Trattat uriet li l-limitu li taħtu l-vantaġġi konċessi lil tali impriżi jistgħu jitqiesu li ma għandhomx impatt fuq il-kummerċ bejn l-Istati Membri u/jew ma joħloqux distorsjoni jew theddida ta' distorsjoni tal-kompetizzjoni jista', f'ċerti każi, ivarja mil-limitu massimu ġenerali de minimis stabbilit skont ir-Regolament (KE) Nru 1998/2006. Tabilħaqq, mill-inqas xi wħud minn dawk il-vantaġġi x'aktarx li jkunu jammontaw għal kumpens għall-ispejjeż addizzjonali marbuta mal-forniment ta' servizzi ta' interess ekonomiku ġenerali. Barra minn hekk, ħafna attivitajiet li jikkwalifikaw bħala l-forniment ta' servizzi ta' interess ekonomiku ġenerali għandhom kamp ta’ applikazzjoni territorjali limitat. Għaldaqstant huwa xieraq li jiġi introdott, paripassu mar-Regolament (KE) Nru 1998/2006, Regolament li jkun jikkonsisti f'regoli de-minimis speċifiċi għal impriżi li jipprodvu servizzi ta' interess ekonomiku ġenerali.

(4)

Fid-dawl tal-esperjenza tal-Kummissjoni, għajnuna mogħtija lil impriżi li jipprovdu servizz ta' interess ekonomiku ġenerali għandha titqies li ma taffettwax il-kummerċ bejn l-Istati Membri u/jew ma toħloqx distorsjoni jew theddida ta' distorsjoni tal-kompetizzjoni sakemm l-ammont totali ta’ għajnuna mogħtija għall-forniment ta’ servizzi ta' interess ekonomiku ġenerali li tirċievi l-impriża benefiċjarja ma jeċċedix il-EUR 500 000 matul kwalunkwe perjodu ta’ tliet snin fiskali.

(5)

Minħabba r-regoli speċjali li japplikaw fis-setturi tal-produzzjoni primarja tal-prodotti agrikoli, is-sajd u l-akwakultura u r-riskju li ammonti iżgħar ta’ għajnuna minn dawk stipulati f’dan ir-Regolament jistgħu jissodisfaw il-kriterji tal-Artikolu 107(1) tat-Trattat f’dawk is-setturi, dan ir-Regolament ma għandux japplika għal dawk is-setturi. Dan huwa bla ħsara għal miżuri konċessi lil impriżi attivi fis-settur tas-sajd li jipprovdu servizz ta’ interess ekonomiku ġenerali mhux marbut mal-prodotti tas-sajd, pereżempju l-ġbir ta’ skart mill-baħar. Sabiex jiġi kkunsidrat id-daqs medju żgħir ta' impriżi attivi fis-settur tat-trasport tal-merkanzija bit-triq u passiġieri u fid-dawl tal-kapaċità żejda ta’ dak is-settur u l-objettivi tal-politika dwar it-trasport rigward il-konġestjoni fit-toroq u t-trasport tal-merkanzija, l-għajnuna għall-akkwist ta' vetturi għat-trasport tal-merkanzija bit-triq mogħtija lil impriżi li jittrasportaw merkanzija bit-triq bil-kiri jew b'kumpens għandha tkun eskluża. Dan ma jixħetx dubju fuq l-approċċ favorevoli tal-Kummissjoni dwar l-għajnuna mill-Istat għal vetturi li jħammġu inqas u li jħarsu aktar l-ambjent fi strumenti oħrajn tal-Unjoni minbarra f’dan ir-Regolament. Fid-dawl tad-Deċiżjoni tal-Kunsill 2010/787/UE tal-10 ta' Diċembru 2010 dwar l-għajnuna mill-Istat biex tiffaċilita l-għeluq ta' minjieri tal-faħam li mhumiex kompetittivi (4), dan ir-Regolament ma għandux japplika għas-settur tal-faħam.

(6)

Meta jitqies ix-xebh bejn l-ipproċessar u l-kummerċjalizzazzjoni ta’ prodotti agrikoli, fuq naħa, u dawk ta’ prodotti mhux agrikoli, fuq in-naħa l-oħra, dan ir-Regolament għandu japplika għall-ipproċessar u l-kummerċjalizzazzjoni ta’ prodotti agrikoli, sakemm jiġu ssodisfati ċerti kundizzjonijiet. La attivitajiet fl-irziezet meħtieġa għat-tħejjija ta' prodott għall-ewwel bejgħ, bħall-ħsad, il-qtugħ u d-dris taċ-ċereali, jew l-ippakkjar tal-bajd, u lanqas l-ewwel bejgħ lill-pitkali jew lill-proċessuri ma għandhom hawnhekk jitqiesu bħala pproċessar jew kummerċjalizzazzjoni.

(7)

Il-Qorti tal-Ġustizzja stabbilixxiet li, ladarba l-Unjoni lleġiżlat favur it-twaqqif ta’ organizzazzjoni komuni tas-suq f’settur partikolari tal-agrikoltura, l-Istati Membri huma obbligati li ma jieħdu ebda miżura li tista’ ddgħajjifha jew toħloq eċċezzjonijiet għaliha. Għal din ir-raġuni, dan ir-Regolament ma għandux japplika għal għajnuna li l-ammont tagħha huwa stabbilit fuq il-bażi tal-prezz jew tal-kwantità tal-prodotti mixtrija jew imqiegħda fis-suq. Lanqas ma għandu japplika għal sostenn de minimis marbut ma' obbligu li l-għajnuna tinqasam mal-produtturi primarji.

(8)

Dan ir-Regolament ma għandux japplika għal għajnuna de minimis għall-esportazzjoni jew għajnuna de minimis li tiffavorixxi prodotti domestiċi fuq dawk importati.

(9)

Dan ir-Regolament ma għandux japplika għal impriżi li jkunu f’diffikultà skont it-tifsira tal-linji gwida tal-Komunità dwar għajnuna mill-Istat sabiex ikunu salvati u ristrutturati impriżi li jkunu f’diffikultà (5).

(10)

Ma għandux ikun possibbli li miżuri ta' għajnuna mill-Istat li jaqbżu l-limitu de minimis jinqasmu f'għadd ta’ partijiet iżgħar biex dawn il-partijiet jaqgħu fil-kamp ta' applikazzjoni ta' dan ir-Regolament.

(11)

Skont il-prinċipji li jirregolaw l-għajnuna li taqa’ taħt l-Artikolu 107(1) tat-Trattat, għandha titqies li tkun ingħatat għajnuna de minimis fil-mument li d-dritt legali biex din l-għajnuna tiġi rċevuta jkun dikjarat lill-impriża taħt ir-reġim nazzjonali legali li jkun applikabbli.

(12)

Sabiex tiġi evitata l-evażjoni tal-intensitajiet tal-għajnuna massima stabbiliti fi strumenti differenti tal-Unjoni, għajnuna de minimis ma tistax tiġi akkumulata mal-għajnuna mill-Istat fir-rigward tal-istess spejjeż eleġibbli jekk tali akkumulazzjoni tirriżulta f'intensità ta' għajnuna li taqbeż dik stipulata fiċ-ċirkostanzi speċifiċi ta' kull każ f'Regolament għal eżenzjoni ġenerali jew Deċiżjoni adottata mill-Kummissjoni.

(13)

Dan ir-Regolament ma għandux jirrestrinġi l-applikazzjoni tar-Regolament (KE) Nru 1998/2006 għal impriżi li jipprovdu servizzi ta' interess ekonomiku ġenerali. L-Istati Membri għandhom jibqgħu liberi li joqgħodu jew fuq dan ir-Regolament jew fuq ir-Regolament (KE) Nru 1998/2006 rigward għajnuna mogħtija għall-forniment ta’ servizzi ta' interess ekonomiku ġenerali.

(14)

Fis-sentenza tagħha fil-kawża Altmark  (6), il-Qorti tal-Ġustizzja stabbilixxiet kriterji għal meta kumpens għall-forniment ta' servizz ta' interess ekonomiku ġenerali ma jammontax għal għajnuna mill-Istat. Madankollu, fi kwalunkwe każ għajnuna de minimis taħt dan ir-Regolament ma tistax tiġi akkumulata ma' kumpens fir-rigward tal-istess servizz, irrispettivament milli jekk dan jammontax għal għajnuna mill-Istat jew le skont is-sentenza ta’ Altmark. Għaldaqstant, il-miżuri ta' għajnuna jaqgħu biss taħt dan ir-Regolament jekk l-ammont sħiħ ta' kumpens, irrispettivament milli jekk jammontax għal għajnuna mill-Istat jew le, ma jaqbiżx il-livell limitu stabbilit f’dan ir-Regolament.

(15)

Għall-għanijiet ta’ trasparenza u applikazzjoni korretta tiegħu, dan ir-Regolament għandu jistabbilixxi livell limitu ċar anki għal każijiet fejn l-għajnuna tieħu forma oħra apparti dik ta’ għotja, bħal self jew injezzjoni ta’ kapital. Bil-għan li jkun hemm applikazzjoni uniformi, trasparenti u sempliċi tar-regoli dwar l-għajnuna mill-Istat, dan il-livell limitu għandu jkun jista’ jiġi applikat indipendentement mill-karatteristiċi speċifiċi tal-miżura u ma għandu jeħtieġ l-ebda kalkolu. Għaldaqstant, għajnuna mogħtija f'forom oħra apparti dik ta’ għotja għandhom jibbenefikaw biss minn dan ir-Regolament jekk l-ammont imħallas lill-impriża ma jaqbiżx il-EUR 500 000. Fejn l-għajnuna tieħu l-forma ta’ garanzija, dan ir-Regolament għandu japplika biss fejn il-parti ggarantita tas-self sottostanti ma taqbiżx il-EUR 500 000.

(16)

Il-Kummissjoni għandha d-dmir li tiżgura li r-regoli dwar l-għajnuna mill-Istat ikunu mħarsa, u b’mod partikolari li l-għajnuna li tingħata skont ir-regoli de minimis tkun skont il-kundizzjonijiet tagħhom. Skont il-prinċipju ta’ kooperazzjoni li jinsab fl-Artikolu 4(3) tat-Trattat dwar l-Unjoni Ewropea, l-Istati Membri għandhom jiffaċilitaw it-twettiq ta’ dan il-kompitu billi jistabbilixxu l-għodod meħtieġa sabiex jiżguraw li l-ammont totali tal-għajnuna de minimis mogħtija lill-istess impriża għall-forniment tas-servizzi ta' interess ekonomiku ġenerali ma jkunx jaqbeż il-limitu kumplessiv permissibbli. Għal dak il-għan u biex jiżguraw konformità mad-dispożizzjonijiet dwar il-kumulazzjoni tal-għajnuna taħt ir-Regolament (KE) Nru 1998/2006, meta jagħtu għajnuna de minimis taħt dan ir-Regolament, l-Istati Membri għandhom jinfurmaw lill-impriża kkonċernata bl-ammont tal-għajnuna u l-karattru de minimis tagħha, billi jirreferu għal dan ir-Regolament. Barra minn hekk, qabel l-għoti ta’ għajnuna bħal din, l-Istat Membru kkonċernat għandu jirċievi mingħand l-impriża dikjarazzjoni dwar għajnuna oħra de minimis koperta minn dan ir-Regolament jew mir-Regolament (KE) Nru 1998/2006 riċevuta matul is-sena fiskali kkonċernata jew is-sentejn fiskali ta’ qabel. Alternattivament, l-Istat Membru għandu jkollu l-possibbilità li jiżgura li l-limitu jkun osservat permezz ta' reġistru ċentrali.

(17)

Dan ir-Regolament japplika bla ħsara għar-rekwiżiti tal-liġi tal-Unjoni fil-qasam tal-akkwist pubbliku jew għal rekwiżiti adizzjonali li joħorġu mit-Trattat jew mil-leġiżlazzjoni settorjali tal-Unjoni.

(18)

Dan ir-Regolament għandu japplika għal għajnuna mogħtija qabel id-dħul tiegħu fis-seħħ lil impriżi li jipprovdu servizzi ta' interess ekonomiku ġenerali.

(a)

għajnuna mogħtija lil impriżi għal attivitajiet fis-setturi tas-sajd u tal-akwakultura, kif koperti mir-Regolament tal-Kunsill (KE) Nru 104/2000 (7);

(b)

għajnuna mogħtija lil impriżi attivi fil-produzzjoni primarja ta’ prodotti agrikoli kif elenkati fl-Anness I tat-Trattat;

(c)

għajnuna mogħtija lil impriżi attivi fl-ipproċessar u l-kummerċjalizzazzjoni ta’ prodotti agrikoli kif elenkati fl-Anness I tat-Trattat, fil-każijiet segwenti:

(d)

għajnuna għal attivitajiet relatati mal-esportazzjoni lejn pajjiżi terzi jew Stati Membri, jiġifieri għajnuna marbuta direttament ma' kwantitajiet esportati, it-twaqqif u t-tħaddim ta' netwerk ta' distribuzzjoni jew nefqa oħra kurrenti marbuta mal-attività tal-esportazzjoni;

(e)

għajnuna li tiddependi mill-użu ta’ prodotti domestiċi fuq dawk importati;

(f)

għajnuna mogħtija lil impriżi attivi fis-settur tal-faħam, kif stipulat fid-Deċiżjoni 2010/787/UE;

(g)

għajnuna għall-akkwist ta' vetturi għat-trasport tal-merkanzija bit-triq mogħtija lil impriżi li jittrasportaw merkanzija bit-triq bil-kiri jew b'kumpens;

(h)

għajnuna mogħtija lil impriżi f’diffikultà.

(a)

“prodotti agrikoli” tfisser prodotti elenkati fl-Anness I tat-Trattat, ħlief għall-prodotti tas-sajd;

(b)

“ipproċessar ta’ prodotti agrikoli” tfisser kwalunkwe operazzjoni fuq prodott agrikolu li tirrizulta fi prodott li huwa wkoll prodott agrikolu, ħlief fuq attivitajiet li jsiru f'razzett li huma neċessarji għall-preparazzjoni ta’ prodott minn annimal jew pjanta għall-ewwel bejgħ;

(c)

“kummerċjalizzazzjoni ta’ prodotti agrikoli” tfisser iż-żamma jew l-espożizzjoni bil-għan ta' bejgħ, tal-offerta għall-bejgħ, tal-konsenja jew kwalunkwe mod ieħor ta’ tqegħid fis-suq, minbarra għall-ewwel bejgħ minn produttur primarju lil pitkala jew lil proċessuri u kwalunkwe attività li tipprepara prodott għal dak l-ewwel bejgħ. Bejgħ mill-produttur primarju lill-konsumaturi finali għandu jitqies bħala kummerċjalizzazzjoni jekk dan iseħħ f'post separat riżervat għal dak il-għan.