DOKUMENT TA’ ĦIDMA TAL-PERSUNAL TAL-KUMMISSJONI SOMMARJU EŻEKUTTIV TAL-VALUTAZZJONI TAL-IMPATT li jakkumpanja d-dokument Regolament tal-Parlament Ewropew u tal-Kunsill li jemenda r-Regolament tal-Kunsill (KE) Nru 111/2005 li jistabblixxi regoli għall-monitoraġġ tal-kummerċ tal-prekursuri tad-droga bejn il-Komunità u pajjiżi terzi. /* SWD/2012/0267 final */
DOKUMENT TA’ ĦIDMA TAL-PERSUNAL
TAL-KUMMISSJONI SOMMARJU EŻEKUTTIV TAL-VALUTAZZJONI
TAL-IMPATT li jakkumpanja d-dokument Regolament tal-Parlament Ewropew u
tal-Kunsill li jemenda r-Regolament tal-Kunsill
(KE) Nru 111/2005 li jistabblixxi regoli għall-monitoraġġ
tal-kummerċ tal-prekursuri tad-droga bejn il-Komunità u pajjiżi
terzi. 1. Definizzjoni tal-problema 1.1. X’inhi l-problema? L-efedrina u l-psewdoefedrina huma sustanzi
kimiċi użati għall-manifattura ta’ mediċini
għall-irjiħat jew l-allerġiji. Dawn iż-żewġ
sustanzi huma wkoll il-prekursuri ewlenin għall-manifattura
tal-metamfetamina. Sabiex ikun evitat id-dirottament tagħhom minn
kummerċ legali għall-produzzjoni illeċita tad-droga ġie
stabbilit qafas regolatorju speċifiku (kemm fil-livell internazzjonali[1] u kemm fl-UE[2]) sabiex ikunu identifikati
tranżazzjonijiet suspettużi. Madankollu, dan mhuwiex il-każ
għal prodotti mediċinali li fihom l-efedrina jew il-psewdoefedrina.
Minħabba li l-efedrina u l-psewdoefedrina li jinsabu fi prodotti mediċinali
jistgħu jiġu faċilment estratti (bl-użu tat-tagħmir
irħis domestiku u permezz ta' proċess kimiku sempliċi), dawn
il-prodotti huma fil-mira tat-traffikanti tad-droga bħala sors ta'
prekursuri għall-fabbrikazzjoni illeċita ta’ metamfetamina. Il-fatt
li l-prodotti mediċinali għall-użu mill-bniedem li fihom
l-efedrina u l-psewdoefedrina huma esklużi mid-dispożizzjonijiet
tar-Regolament (KE) Nru 111/2005, li japplika għall-kummerċ
tal-prekursuri tad-droga bejn l-UE u pajjiżi terzi, wassal għal
sitwazzjoni fejn dawn il-prodotti ma setgħux jiġu mwaqqfa jew
issekwestrati mill-awtoritajiet kompetenti tal-Istati Membri meta dawn
il-prodotti ġew esportati minn territorju doganali tal-Unjoni jew
għaddew minnu, minkejja li kien probabbli ħafna li dawn kienu se
jintużaw ħażin għall-manifattura illeċita
tal-metamfetamina fil-pajjiż tad-destinazzjoni tagħhom. L-UE
mistennija tagħlaq il-lakuna fil-leġislazzjoni attwali fir-rigward
tal-poteri konferiti fuq l-awtoritajiet tad-dwana u tal-pulizija li jistgħu
jwaqqfu u jissekwestraw l-efedrina u l-psewdoefedrina iżda ma
jistgħux iwaqqfu u jikkonsfiskaw prodotti mediċinali li fihom
l-efedrina jew il-psewdoefedrina. Fil-qosor, il-motivazzjonijiet li jirfdu
l-problema huma kif ġej: - il-miżuri ta' kontroll fuq l-efedrina u
l-psewdoefedrina (is-sustanzi) ġew imsaħħa madwar id-dinja. Xi
pajjiżi tad-dinja waslu sal-punt li jipprojbixxu l-importazzjonijiet ta'
dawn is-sustanzi. - għalhekk, il-ħtieġa
għat-traffikanti li jfittxu sorsi alternattivi ta' efedrina u
psewdoefedrina għall-manifattura tal-metampetamina; - bħala riżultat, it-traffikanti qed
jimmiraw prodotti mediċinali li fihom dawn is-sustanzi li mhumiex
suġġetti għal miżuri stretti ta' kontroll; kif ukoll - it-tisħiħ ta' miżuri ta'
kontroll fuq dawn il-prodotti mediċinali li fihom l-efedrina u
l-psewdoefedrina f’reġjuni oħra tad-dinja. Bħala reazzjoni,
it-traffikanti mmiraw dawk ir-reġjuni fejn hemm inqas miżuri ta'
kontroll fuq dawn il-prodotti, meta jiġu esportati jew ikunu fi
tranżitu, bħall-UE. Is-sekwestri
tal-prekursuri l-metamfetamina li jinsabu fi prodotti mediċinali li fihom
l-efedrina jew il-psewdoefedrina mill-awtoritajiet kompetenti fil-fruntieri
tal-Istati Membri tal-UE varjaw mhux ħażin mill-2007 sal-2010.
Filwaqt li fl-2007 ftit li xejn kienu l-prodotti mediċinali rreġistrati
mill-kwantitajiet kollha ssekwestrati (0.3 mt[3] minn
8 mt), fl-2008 u l-2009 l-ammont ta’ prodotti mediċinali mit-total
tal-kwantitajiet sekwestrati żdied sew (rispettivament 1.8 mt minn
3.5 mt u 0.6 mt minn 1.4 mt). Għalkemm dan l-ammont naqas
konsiderevolment fl-2010 (0.1 mt minn 2.9 mt), ħafna Stati Membri u l-Bord
Internazzjonali tan-NU dwar il-Kontroll tan-Narkotiċi (INCB) jinsabu
mħassba li l-mekkaniżmi tar-Regolament (KE) Nru 111/2005
għall-kontroll ta' prodotti mediċinali li fihom l-efedrina jew
il-psewdoefedrina mhumiex biżżejjed. 1.2. Min jintlaqat? - Pajjiżi terzi, fejn hija prodotta
l-metamfetamina, li l-miżuri ta' kontroll tagħhom fuq prodotti
mediċinali li fihom prekursuri tad-drogi mhumiex effettivi jekk ma jkunux
reċiprokati minn pajjiżi li jesportaw u dawk ta' tranżitu; - Manifatturi u distributuri li jinsabu jew
ġewwa jew barra l-Unjoni, bħala fornituri jew kummerċjanti ta'
dawn il-prodotti mediċinali li fihom l-efedrina u l-psewdoefedrina; kif
ukoll - Awtoritajiet doganali, il-pulizija u
l-awtoritajiet tas-saħħa, bħala l-awtoritajiet tal-infurzar
maħtura fi ħdan kull Stat Membru biex jimplimentaw
il-leġiżlazzjoni tal-prekursuri tad-droga. 2. Analiżi tas-sussidjarjetà Ir-Regolament (KE) Nru 111/2005 huwa
bbażat fuq l-Artikolu 207 tat-TFUE (li qabel kien l-Artikolu 133
TKE). Ir-Regolament jistabbilixxi r-regoli għall-monitoraġġ
tal-kummerċ fil-prekursuri tad-droga bejn il-Komunità u pajjiżi tezi.
Attwalment l-awtoritajiet doganali tal-Istati
Membri tal-UE jissekwestraw prodotti mediċinali li fihom l-efedrina jew
il-psewdoefedrina abbażi ta’ liġijiet nazzjonali kontra d-drogi jew
tal-kodiċi doganali, li jirriżultaw f'diversi azzjonijiet ta’
kontroll fuq il-fruntieri esterni tal-UE. Barra minn hekk, qed jippruvaw inaqqsu
d-dirottament ta' dawn il-prodotti mediċinali permezz ta’ tipi differenti
ta’ miżuri nazzjonali, b'hekk iwassal għal rekwiżiti legali
differenti għall-operaturi ekonomiċi tal-UE. 3. Għanijiet L-għanijiet
ta’ politika ġenerali ·
Li tikkontribwixxi għall-ġlieda globali
kontra l-manifattura illeċita tad-drogi. L-għanijiet ta' politika
speċifiċi ·
Li tikkumbatti kontra l-manifattura illeċita
tal-metamfetamina, permezz tal-kontroll tal-provvista ta'
efedrina/psewdoefedrina li tinsab fi prodotti mediċinali li huma
esportati, importati jew jgħaddu bejn l-Unjoni u pajjiżi terzi,
permezz tal-prevenzjoni tad-dirottament tagħhom, filwaqt li ma jixxekkilx
il-kummerċ leġittimu f'dawn il-prodotti; ·
Li jinżamm il-fluss ħieles ta' prodotti
mediċinali li fihom l-efedrina jew il-psewdoefedrina għal skopijiet
leġittimi bejn l-Unjoni u pajjiżi terzi; ·
Li jiġu evitati piżijiet amministrattivi
sproporzjonati fuq l-awtoritajiet nazzjonali kompetenti (dwana, pulizija,
saħħa) u fuq l-industrija involuti fil-kummerċ ta' mediċini
li fihom l-efedrina/psewdoefedrina. Għan operattiv Li tinkiseb u tinżamm xejra 'l isfel
tat-tentattivi ta' dirottament ta' prodotti mediċinali li fihom l-efedrin
jew psewdoefedrina, maħsuba għal skopijiet illegali. 4. Għażliet ta’ Politika Għażla 1: li ma
tittieħed l-ebda azzjoni leġiżlattiva ġdida
(għażla bażika) Ir-Regolament (KE) Nru 111/2005 ma
jiġix immodifikat. Taħt dan ir-Regolament prodotti mediċinali li
fihom l-efedrina jew il-psewdoefedrina mhumiex ikkontrollati. Għalhekk,
l-awtoritajiet tal-Istati Membri ma jistgħux iwaqqfu jew jissekwestraw
dawn il-prodotti meta jidħlu jew iħallu t-territorju doganali
tal-Unjoni abbażi tal-leġiżlazzjoni tal-UE, anke jekk ikun
probabbli li dawn jintużaw ħażin għall-manifattura
illeċita tal-metamfetamina. Għażla 2: Ir-rakkomandazzjoni
ta' miżuri volontarji lill-Istati Membri Il-Kummissjoni tagħmel Rakkomandazzjoni
li telenka għadd ta' miżuri għall-kontroll ta' prodotti
mediċinali li fihom l-efedrina jew il-psewdoefedrina li minnhom kull Stat
Membru jkun jista’ jagħżel dak li jqis xieraq. Għażla 3: Jiżdiedu
s-setgħat tal-awtoritajiet kompetenti Prodotti mediċinali li fihom l-efedrina
jew il-psewdoefedrina jkunu koperti mid-dispożizzjonijiet
tal-Artikolu 26 tar-Regolament attwali (Setgħat tal-awtoritajiet
kompetenti). Dan jippermetti lill-awtoritajiet kompetenti tal-UE biex iwaqqfu
tranżazzjonijiet li jinvolvu dawn il-prodotti mediċinali meta jkun
hemm raġunijiet tajba għal suspett li dawn il-prodotti jistgħu
jiġu użati ħażin għall-manifattura ta' drogi
illeċiti, kemm jekk huma esportati, impurtati jew fi tranżitu. Għażla 4: jiżdiedu
s-setgħat tal-awtoritajiet kompetenti u jiġi introdott l-użu ta'
notifiki ta' pre-esportazzjoni L-awtoritajiet kompetenti tal-Istati Membri
tal-UE jkollhom bażi legali mhux biss li jwaqqfu u li jissekwestraw
prodotti mediċinali li fihom l-efedrina jew il-psewdoefedrina (bħal
f’għażla 3) iżda wkoll biex jibgħatu notifiki ta'
pre-esportazzjoni għal dawn il-prodotti lejn il-pajjiż
tad-destinazzjoni permezz ta' PEN onlajn (Pre-Export Notification). Għażla 5: Prodotti
mediċinali li fihom l-efedrina u l-psewdoefedrina jiġu
suġġetti għall-istess rekwiżiti ta' kontroll
bħall-efedrina u l-psewdoefedrina Prodotti mediċinali li fihom l-efedrina
jew il-psewdoefedrina jkunu inklużi fil-lista ta' sustanzi skedati ta'
kategorija 1. Għalhekk, dawn ikunu suġġetti għall-istess
rekwiżiti ta' kontroll għal liema sustanzi skedati ta' kategorija 1,
bħall-efedrina u l-psewdoefedrina, huma attwalment sottomessi:
jiġifieri notifika ta' pre-esportazzjoni, awtorizzazzjoni
għall-esportazzjoni, liċenzja, eċċ. Għażla 6: Jiġi pprojbit
il-kummerċ ta' prodotti mediċinali li fihom l-efedrina u
l-psewdoefedrina F'din
l-għażla, l-importazzjoni, l-esportazzjoni u t-tranżitu ta’
prodotti mediċinali li fihom l-efedrina jew il-psewdoefedrina lejn, minn u
fit-territorju doganali tal-Unjoni ma jkunux aktar possibli. Qabel ma tiġi
kkunsidrata projbizzjoni kummerċjali, miżuri oħra ta' kontroll,
bħal dawk previsti fil-leġiżlazzjoni, għandhom jiġu
esplorati. Dawn il-miżuri ġew analizzati skont l-għażla nru
5. Għalhekk,
l-għażla 6 ġiet skartata mingħajr aktar analiżi
tal-impatti tagħha. 5. Il-Valutazzjoni tal-Impatti Din l-inizjattiva tirrispetta d-drittijiet
fundamentali, il-libertajiet u l-prinċipji stabbiliti fil-Karta tad-Drittijiet
Fundamentali tal-Unjoni. Partikolarment l-Artikolu 35 tal-Karta
jiggarantixxi lil kulħadd id-dritt ta' aċċess għal kura
tas-saħħa preventiva u d-dritt li jibbenefika minn trattament mediku. Il-fatt li l-awtoritajiet kompetenti jingħataw
is-setgħa biex jaġixxu rigward mediċini, kif previst taħt
l-għażliet 3, 4 u 5, mhux se jnaqqas lill-pubbliku l-aċċess
għall-mediċini. L-ebda impatt ambjentali ma jista' jkun
assoċjat ma' din il-problema. Huwa diffiċli biex jiġi ddeterminat
jekk ikunx hemm xi impatt speċifiku fuq l-SMEs jew fuq il-mikrointrapriżi,
peress li fil-konsultazzjoni ma kienx possibbli li jiġu mmirati dawk li
jikkummerċjalizzaw speċifikament prodotti mediċinali li fihom
l-efedrina u il-psewdoefedrina. Madankollu, l-SMEs ġew ikkonsultati
bħala parti mill-assoċjazzjonijiet tal-farmaċewtiċi.
In-nuqqas tat-tweġibiet tagħhom jikkonferma li mhumiex daqshekk
involuti fil-kummerċ ta' prodotti mediċinali li fihom l-efedrina jew
il-psewdoefedrina jew qed jaħdmu għall-kumpaniji multinazzjonali li
huma attivi f'dan is-segment. Għalhekk, wieħed jista' jassumi li
l-SMEs mhux se jiġu affettwati minn din il-proposta. Impatti internazzjonali: Id-dirottament tal-prekursuri tad-droga hija problema globali li
tirrikjedi reazzjoni globali. Jekk
jittieħdu miżuri aktar stretti ta' kontroll fuq prodotti mediċinali
li fihom l-efedrina jew il-psewdoefedrina fil-livell tal-UE, dan ikun jaqbel
mal-isforzi li qed jagħmlu pajjiżi oħra fid-dinja, u b’hekk
jikkontribwixxu lejn l-għan internazzjonali li jissaħħu
l-kontrolli fuq dawn il-prodotti. Għal għażliet ta’ politika 3, 4
u 5, il-piż amministrattiv għall-awtoritajiet kompetenti
ġie kkwantifikat bl-użu ta' 'mudell tal-Kost Standard' tal-UE u fuq
il-bażi tad-dejta miġbura minn konsultazzjoni mal-partijiet
interessati. Il-piż amministrattiv addizzjonali għall-industrija
jista' jiġi biss parzjalment ivvalutat minħabba li ma ġiet
ipprovduta l-ebda dejta mill-assoċjazzjonijiet tal-kummerċ
tal-farmaċewtiċi u l-kumpaniji li bagħtu tweġiba
għall-konsultazzjoni onlajn kienu kollha favur li ma tittieħed ebda
azzjoni leġiżlattiva. Għażla 1: li ma
tittieħed ebda azzjoni leġiżlattiva ġdida
(l-għażla bażika) Effettività Id-dgħufija identifikata
tal-leġiżlazzjoni attwali fir-rigward tad-dirottament ta' prodotti
mediċinali li fihom l-efedrina jew il-psewdoefedrina tibqa' u b'hekk
tippermetti lit-traffikanti biex ikomplu jimmiraw prodotti mediċinali biex
jakkwistaw l-efedrina u l-psewdoefedrina għall-manifattura illeċita
tal-metamfetamina. Għalhekk, din l-għażla mhix se
tikkontribwixxi għall-ġlieda kontra l-manifattura illeċita tal-metamfetamina
billi tnaqqas fil-provvista l-efedrina u l-psewdoefedrina li jinsabu fi
prodotti mediċinali. Il-fluss ta' kummerċ ħieles
ta' dawn il-prodotti għal skopijiet leġittimi bejn l-Unjoni u
pajjiżi terzi ser ikompli. Barra minn hekk, l-UE se tkompli tiġi
kkritikata fil-livell internazzjonali talli baqgħet
"inattiva" minkejja sejħiet kontinwi mill-INCB biex
iżżid l-kontroll tal-leġiżlazzjoni tagħha
għall-kummerċ estern. Effiċjenza Din l-għażla ma timponi ebda
piż amministrattiv addizzjonali fil-livell Ewropew la fuq in-negozji
lanqas fuq l-awtoritajiet nazzjonali kompetenti. Minħabba li l-"kosti
tal-attività normali tax-xogħol” se jibqgħu l-istess, l-ispejjeż
amministrattivi wkoll se jibqgħu l-istess. Għażla 2: Ir-rakkomandazzjoni
ta' miżuri volontarji lill-Istati Membri Effettività Din l-għażla mhux se tipprovdi
għal rispons mill-UE kontra l-problema identifikata. Madankollu se
tiggwida lil dawk l-Istati Membri li ma jkollhom ebda miżuri ta’ kontroll
fis-seħħ, biex jistabbilixxu ftit minnhom fuq il-bażi tal-prassi
tajba fi Stati Membri oħra li diġà adottaw uħud minnhom u sabu
li huma effettivi biex inaqqsu l-provvista ta' efedrina u psewdoefedrina
għall-manifattura illegali ta’ drogi. Mhux se jkun hemm impatt fuq il-fluss
tal-kummerċ ta' dawn il-prodotti bejn l-Unjoni u pajjiżi terzi. Din l-għażla mhix se tikkonforma
mar-Riżoluzzjonijiet tan-NU li jistiednu lill-Partijiet Kontraenti kollha
għall-Konvenzjoni tal-1988 tan-NU biex isaħħu l-kontrolli fuq
dan it-tip ta' prodotti. Effiċjenza Kwalunkwe miżura
li jiddeċiedu li jimplimentaw, wieħed jista’ jassumi li din se
timplika xi piż amministrattiv fuq il-livell nazzjonali. Il-piż
amministrattiv addizzjonali ta’ kwalunkwe minn dawn il-miżuri nazzjonali
ma jkunx ivvalutat f’din l-inizjattiva billi mhuwiex ċar liema miżuri
l-Istati Membri jistgħu jieħdu. Għażla 3: Jiżdiedu
s-setgħat tal-awtoritajiet kompetenti Effettività Din l-għażla se żżid
il-possibilitajiet biex tevita d-dirottament ta' dawn il-prodotti, biex b'hekk
jonqos il-forniment tal-efedrina u l-psewdoefedrina għall-manifattura
illeċita tal-metamfetamina. Minħabba li din l-għażla se
tistabbilixxi fi ħdan il-leġiżlazzjoni tal-prekursuri tad-droga
bażi legali għall-awtoritajiet kompetenti tal-Istati Membri sabiex
iwaqqfu jew jissekwestraw kunsinna ta’ prodotti mediċinali li fihom
l-efedrina u l-psewdoefedrina, l-awtoritajiet kompetenti tal-Istati Membri mhux
se jibqa' jkollhom jiddependu fuq il-liġijiet nazzjonali differenti fejn
dawn jeżistu biex iwaqqfu jew jissekwestraw dawn il-prodotti. Il-fluss kummerċjali tal-mediċini
li fihom l-efedrina u l-psewdoefedrina mhux se jkun imfixkel. Dan se jnaqqas il-kritika li tesprimi
l-INCB rigward in-nuqqas ta' azzjoni tal-UE biex
timponi miżuri ta' kontroll fuq dawn il-prodotti. Effiċjenza Il-kontrolli
għalhekk se jsiru kemm fl-importazzjoni/esportazzjoni kif ukoll waqt
it-tranżitu fl-Istati Membri kollha, fuq il-bażi ta' analiżi
tar-riskju. Billi dan se jkun parti mill-ħidma normali tad-dwana, fejn
il-kriterji tar-riskju jvarjaw skont ix-xejriet, il-piż amministrattiv
addizzjonali huwa mistenni jkun minimu. Rigward il-kummerċjanti,
minħabba li l-kontrolli doganali huma parti mir-riskju normali li dawn
jieħdu fil-kummerċ internazzjonali tal-merkanzija, l-impatt huwa
wkoll ikkunsidrat bħala minimu. Għażla 4: Jiżdiedu
s-setgħat tal-awtoritajiet kompetenti u jiġi introdott l-użu ta'
notifiki ta' pre-esportazzjoni Effettività Din l-għażla tibni fuq dik ta’
qabel, u b’hekk iżżomm il-benefiċċji kollha diġà
deskritti. Barra minn hekk, l-użu tas-sistema PEN-onlajn se timminimizza
r-riskju ta' dirottament, minħabba li din is-sistema tiżgura
monitoraġġ sistematiku u konsistenti tal-kummerċ fis-sustanzi
prekursuri tad-drogi madwar id-dinja. Grazzi għal din l-għodda, din
l-għażla se ttejjeb il-possibiltajiet biex jiġi evitat
id-dirottament ta' prodotti mediċinali li fihom l-efedrina jew
il-psewdoefedrina għall-manifattura illeċita tal-metamfetamina. L-użu ta' notifiki ta' pre-esportazzjoni
(PEN onlajn) għall-prodotti mediċinali mill-awtoritajiet kompetenti
tal-Istati Membri se jkun imfaħħar minn INCB li ripetutament
ħeġġet lill-Unjoni li tagħmel dan matul l-aħħar
ftit snin permezz tar-rapporti annwali tagħhom. Sa mill-ħolqien tagħha, il-PEN-onlajn
qatt ma ġiet irreġistrata bħala li tnaqqas jew tostakola
t-tranżazzjonijiet tal-kummerċ kif ikkonfermat bil-fatt
ta' għadd dejjem jikber ta’ pajjiżi madwar id-dinja li jużawha. Effiċjenza Il-piż amministrattiv addizzjonali
għall-awtoritajiet kompetenti rigward il-kontrolli li huma se jwettqu,
abbażi tal-Artikolu 26 emendat, se jibqa' minimu. Il-piż
amministrattiv addizzjonali medju għall-awtoritajiet kompetenti biex
tintbagħat notifika ta' pre-esportazzjoni għal sustanza ta'
kategorija 1 jammonta għal EUR 15. Il-piż amministrattiv
addizzjonali se jiddependi prinċipalment fuq il-volum ta' kummerċ
leċitu għal dawn il-prodotti f'kull Stat Membru. F'dan ir-rigward,
wieħed jista' jassumi li dan il-piż amministrattiv addizzjonali huwa
relattivament baxx u li jista' jinġarr mill-awtoritajiet kompetenti
tal-Istati Membri minħabba li diversi Stati Membri diġà ilhom
jibagħtuhom volontarjament mill-aħħar tliet snin matul
l-inizjattivi operattivi internazzjonali taħt il-Proġett Prism. Għażla 5: Prodotti
mediċinali li fihom l-efedrina u l-psewdoefedrina jiġu
suġġetti għall-istess rekwiżiti ta' kontroll
bħall-efedrina u l-psewdoefedrina Effettività Din l-għażla se
ssaħħaħ konsiderevolment il-kontrolli fuq il-prodotti
mediċinali li fihom l-efedrina jew il-psewdoefedrina, li jkunu sottomessi
għall-istess reġim ta' kontroll impost mil-leġiżlazzjoni
tal-prekursuri tad-droga għas-sustanzi bażi li fihom. Din l-għażla se żżid
il-possibilitajiet biex tevita d-dirottament ta' dawn il-prodotti, biex b'hekk
jonqos il-forniment tal-efedrina u l-psewdoefedrina
għall-manifattura illeċita tal-metamfetamina. Ir-rekwiżiti li jkunu applikabbli
għal dawn il-prodotti mediċinali jkunu sproporzjonati
għall-għan ta' din l-inizjattiva. Il-fluss tal-kummerċ ta' dawn
il-prodotti bejn l-Unjoni u pajjiżi terzi jista’ jiġi mxekkel miż-żieda fir-rekwiżiti li magħhom l-operaturi ser
ikunu obbligati jikkonformaw sabiex jesportaw jew jimportaw dawn il-prodotti. Barra minn hekk, din l-għażla
timplika l-emenda tal-istess Artikolu fir-Regolament li jirregola
l-kummerċ intra-UE tal-prekursuri tad-drogi. Din l-għażla se tkun konformi
mar-Riżoluzzjoni tas-CND (Commission on Narcotic Drugs) u tistieden
fost l-oħrajn lill-Unjoni "biex tapplika l-istess miżuri ta'
kontroll għall-preparazzjonijiet farmaċewtiċi li fihom
l-efedrina u l-psewdoefedrina bħal dawk użati għall-kimiċi
prekursuri (bażi) bl-ingrossa"[4].
Effiċjenza Hemm erba' rekwiżiti amministrattivi
ewlenin: liċenzja, awtorizzazzjoni tal-importazzjoni, awtorizzazzjoni
tal-esportazzjoni u notifiki ta' pre-esportazzjoni. Il-piż amministrattiv
addizzjonali li joriġina mill-ħtieġa ta PEN-onlajn ġie
kkalkolat skont l-għażla 4. Rigward il-liċenzjar, il-piż
amministrattiv medju attwali għal kull awtorità kompetenti għal
sustanzi ta KAT 1 huwa ta' EUR 861 fis-sena. Għalhekk, il-piż amministrattiv
attwali għal kull awtorità kompetenti li toħroġ liċenzja
għal dawn il-prodotti jkun l-istess bħal kwalunkwe sustanza oħra
ta' kategorija 1, jiġifieri EUR 49. Rigward l-awtorizzazzjonijiet
tal-importazzjoni, il-piż amministrattiv medju attwali għal kull
awtorità kompetenti għal sustanzi ta kategorija 1 huwa EUR 1236
fis-sena. Il-piż amministrattiv attwali għall-għoti ta'
awtorizzazzjoni tal-importazzjoni huwa EUR 28. Rigward l-awtorizzazzjonijiet
tal-esportazzjoni, il-piż amministrattiv medju attwali għal kull
awtorità kompetenti għal sustanzi ta’ kategorija 1 huwa EUR 995
fis-sena. Il-piż amministrattiv attwali għall-għoti ta'
awtorizzazzjoni tal-esportazzjoni huwa EUR 29. Il-piż amministrattiv għal kull
kumpanija biex tikseb liċenzja huwa EUR 77 (evalwazzjoni tal-impatt
DĠ ENTR)[5]. 6. Tqabbil tal-Għażliet It-tabella li ġejja tindika l-effettività
u l-effiċjenza fl-ispiża ta' kull għażla, u b'hekk
tikkontribwixxi lejn l-analiżi tal-aktar waħda preferita. Tabella 1: Tqabbil tal-għażliet Għażliet || || Effettività || || L-Effiċjenza tal-Kosti || || Valutazzjoni globali || Tnaqqis fil-forniment ta' EPH/PSE li jinsabu f'mediċini billi jiġi evitat id-dirottament tagħhom || Jinżamm il-fluss liberu tal-mediċini EPH/PSE bejn l-UE u pajjiżi terzi || Konformità mar-Riżoluzzjonijiet tan-NU || Piż amministrattiv addizzjonali Għal kull awtorità || Għal kull industrija 1 || - || + || - || € 0 || € 0 || - 2 || -/+ || + || - || € 0/+ || € 0/+ || - 3 || + || + || + || € 0/+ || € 0/+ || ++ 4 || ++ || + || + || € 1500* || NA || +++ 5 || +++ || +/- || + || Esportazzjonijiet = €9300 Importazzjonijiet = €7700 || Liċenzja = €77 || ++ Għalkemm ix-xenarju bażi ma jimplika
l-ebda piż amministrattiv addizzjonali, din l-għażla
għandha tiġi eskluża biex il-Kummissjoni twieġeb b’mod
adegwat għat-talba tal-Kunsill biex tindirizza n-nuqqasijiet identifikati
fis-sistema ta’ kontroll tal-leġiżlazzjoni dwar il-prekursuri
tad-drogi u għat-tħassib li esprimiet il-komunità internazzjonali. Miżuri mhux leġiżlattivi,
sakemm adottati madwar l-Istati Membri kollha, jindirizzaw il-problema
identifikata parzjalment biss. Barra minn hekk, mhux se tippermetti
lill-awtoritajiet kompetenti biex iwaqqfu jew jissekwestraw, kemm
fl-esportazzjoni kif ukoll fit-tranżitu, prodotti mediċinali li fihom
l-efedrina jew il-psewdoefedrina minħabba n-nuqqas ta' bażi legali
ċara dwar dawn il-prodotti speċifiċi. Il-miżuri previsti
taħt din l-għażla sa ċertu punt biss ma jippermettux
id-dirottament ta' prodotti mediċinali li fihom l-efedrina u
l-psewdoefedrina. L-għażliet 3, 4 u 5 kollha jipprovdu
bażi legali ċara għal awtoritajiet kompetenti biex iwaqqfu u/jew
jissekwestraw prodotti mediċinali li fihom l-efedrina jew
il-psewdoefedrina fl-esportazzjoni minn jew fi tranżitu minn territorju
doganali tal-Unjoni, meta jkun hemm raġunijiet tajba għal suspett li
dawn il-prodotti huma maħsuba għall-użu fil-manifattura ta’
drogi illeċiti. Huma kollha jnaqqsu l-kritika il-kritika li tesprimi
l-INCB rigward in-nuqqas ta' azzjoni tal-UE biex timponi miżuri ta'
kontroll fuq dawn il-prodotti u se jżidu l-possibilitajiet kollha biex
jiġi evitat id-dirottament ta' prodotti mediċinali li fihom
l-efedrina jew il-psewdoefedrina għall-manifattura illeċita
tal-metamfetamina, għalkemm bi gradi differenti. Meta wieħed iqabbel dawn it-tliet
għażliet li jipprevedu emendi leġiżlattivi,
l-għażla 3 tiġġenera biss piż amministrattiv
żgħir; l-istess jista' jkun mistenni għal għażla 4,
filwaqt li l-għażla 5 tista’ timponi l-ogħla piż
amministrattiv kemm għall-awtoritajiet kompetenti kif ukoll
għall-operaturi ekonomiċi. Minkejja li għażla 5 tista'
titqies bħala l-aktar effettiva sa fejn hija tapplika kontrolli mill-aktar
stretti, hija timponi wisq rekwiżiti ta' kontroll li jkunu jidhru
sproporzjonati għall-għan imfittex minn din l-inizjattiva. Il-valur
miżjud ipprovdut minn għażla 4 meta mqabbel mal-għażla
3 huwa li, taħt din l-għażla, is-sinerġija
taż-żewġ miżuri flimkien iżżid l-effettività ta'
kull miżura individwali, b'piż żejjed limitat minħabba li
sistema ta' notifika ta' pre-esportazzjoni hija stabbilita u qed tiffunzjona u
l-għadd ta' notifiki ta' pre-esportazzjoni li jistgħu jkunu
apparentement mibgħuta fis-sena mill-awtoritajiet kompetenti tal-Istati
Membri huwa relattivament żgħir. Barra minn hekk, minħabba
lin-notifiki ta' pre-esportazzjoni huma diġà obbligatorji għal
sustanzi skedati ta' kategorija 1, ikun jidher loġiku li dawn isiru
obbligatorji wkoll għall-prodotti li jkun fihom dawn is-sustanzi,
bħal prodotti mediċinali li jkunu jinkluduhom, bħall-efedrina
jew il-psewdoefedrina. L-għażla 4 għalhekk tidher
l-aktar preferuta: hija tipprovdi għal kontroll effiċjenti, timponi
rekwiżit ta’ kontroll wieħed biss żejjed u ma
tiġġenera kważi l-ebda piż amministrattiv addizzjonali. 7. Monitoraġġ u Evalwazzjoni Il-Kummissjoni tipprevedi: ·
Il-ġbir, l-analiżi u r-rappurtar
tal-istatistika annwali tal-Istati Membri dwar il-kunsinni sekwestrati jew
imwaqqfa. ·
Sostenn fl-implimentazzjoni tar-Regolament emendat
permezz ta' Ġrupp ta' Ħidma għall-Prekursuri tad-Droga u permezz
ta' aġġornament tal-linji gwida eżistenti, l-għodda
tal-e-learning, dokument bi FAQ. ·
L-implimentazzjoni ta' bażi tad-dejta li qed
jiġi żviluppat biex jiffaċilita l-ġbir u l-analiżi
tal-istatistika. ·
Il-ħolqien ta' kodiċi ta' tariffa
speċifika fin-Nomenklatura Magħquda għal prodotti
mediċinali li fihom l-efedrina jew il-psewdoefedrina. ·
L-organizzazzjoni ta' attivitajiet ta'
sensibilizzazzjoni li jinvolvu lill-awtoritajiet kompetenti u l-operaturi
ekonomiċi. ·
L-iskambju ta’ informazzjoni, inkluż dwar
ix-xejriet, mal-gvernijiet ta’ pajjiżi terzi. Il-Kummissjoni tista’ twettaq evalwazzjoni
tad-dispożizzjonijiet ġodda tagħha ħames snin wara
l-adozzjoni tagħhom, billi teżamina r-riżultati miksuba meta
mqabbla mal-objettivi stabbiliti u tevalwa kwalunkwe implikazzjonijiet
għal għażliet futuri. Imbagħad tkun tista' tissottometti
rapport dwar l-evalwazzjoni. [1] Il-Konvenzjoni tan-Nazzjonijiet Uniti kontra t-Traffikar
Illeċitu tad-Drogi Narkotiċi u s-Sustanzi Psikotropiċi,
disponibbli fi: http://www.incb.org/pdf/e/conv/1988_convention_en.pdf [2] Ir-Regolament (KE) Nru 273/2004 tal-Parlament
Ewropew u tal-Kunsill tal-11 ta’ Frar 2004 u r-Regolament
tal-Kunsill (KE) Nru 111/2005 dwar l-implimentazzjoni u l-funzjonament
tal-leġiżlazzjoni tal-Komunità dwar il-monitoraġġ u
l-kontroll tal-kummerċ tal-prekursuri tad-drogi. [3] Mt = tunellata metrika = 1000 kg. [4] Ir-Riżoluzzjoni E/CN.7/2011/l.5/Rev.1
"Insaħħu l-kooperazzjoni internazzjonali u l-oqfsa regolatorji u
istituzzjonali għall-kontroll ta' kimiċi prekursuri użati
fil-manifattura illeċita ta' drogi sintetiċi". http://www.unodc.org/documents/commissions/CND-Res-2011to2019/CND54_8e1.pdf [5] L-ispejjeż amministrattivi u l-piżijiet
amministrattivi imposti minn emendi tal-leġiżlazzjoni tal-UE dwar
il-prekursuri tad-drogi, Rapport Finali, EIM, Ottubru 2011, paġna 24.