DOKUMENT TA’ ĦIDMA TAL-PERSUNAL TAL-KUMMISSJONI

SOMMARJU EŻEKUTTIV TAL-VALUTAZZJONI TAL-IMPATT Ir-rwol tal-użu tal-art, tat-tibdil fl-użu tal-art u tal-forestrija (LULUCF) fl-impenji tal-UE b'rabta mat-tibdil fil-klima

li jakkumpanja d-dokument

Proposta għal DEĊIŻJONI TAL-PARLAMENT EWROPEW U TAL-KUNSILL

dwar ir-regoli tal-kontabilità u l-pjanijiet ta' azzjoni dwar l-emissjonijiet u l-assorbimenti tal-gassijiet serra li jirriżultaw mill-attivitajiet relatati mal-użu tal-art, mat-tibdil fl-użu tal-art u mal-forestrija

1. Sommarju eżekuttiv 1.1. Kamp ta' applikazzjoni u sfond

L-UE u mexxejja dinjin oħra qablu[1] li t-tisħin globali ma għandux jaqbeż it-temperaturi esperjenzati qabel ir-rivoluzzjoni industrijali b'aktar minn 2˚ C. Dan l-għan fuq terminu twil jesiġi li, sal-2050, l-emissjonijiet tal-gassijiet serra jitnaqqsu b’mill-anqas 50 % mil-livelli tal-1990.

Fuq terminu qasir, l-UE ntrabtet li tnaqqas l-emissjonijiet tagħha tal-gassijiet serra b'20 % taħt il-livelli tal-1990 sal-2020, u bi 30 % jekk il-kundizzjonijiet ikunu favorevoli[2]. Il-Parlament Ewropew u l-Kunsill qablu li s-setturi kollha għandhom jikkontribwixxu biex tintlaħaq il-mira[3]. Is-settur tal-użu tal-art, tat-tibdil fl-użu tal-art u tal-forestrija (l-LULUCF) s’issa għadu ma jagħmilx parti mill-mira. L-għan ta' din il-valutazzjoni tal-impatt huwa li tivvaluta kif dan is-settur jista' jikkontribwixxi għal din il-mira.

Fl-UE, l-emissjonijiet tal-gassijiet serra jiġu primarjament mill-produzzjoni tal-enerġija u minn sorsi oħra maħluqin mill-bniedem. Il-karbonju li jiġi assorbit (imneħħi) mill-atmosfera permezz tal-fotosinteżi u li jinħażen fil-veġetazzjoni, fil-ħamrija u fi prodotti tal-injam maħsud ipatti għal uħud mill-emissjonijiet. Diversi użi tal-art u prattiki ta' ġestjoni fil-forestrija u fl-agrikoltura u l-użu ta' prodotti tal-injam maħsud li għandhom ħajja twila jistgħu jillimitaw l-emissjonijiet u jżidu l-assorbimenti mill-atmosfera. Dawn il-prattiki huma koperti mis-settur tal-LULUCF[4].

1.2. Definizzjoni tal-problema

Jeżistu raġunijiet tajbin biex wieħed jikkontabilizza l-emissjonijiet u l-assorbimenti marbutin mas-settur tal-LULUCF, l-iktar:

· biex tiġi żgurata l-koerenza tal-politika tal-UE, peress li l-kontabilità tkun konsistenti mal-istrateġija Ewropa 2020 u tiżgura li s-setturi kollha jikkontribwixxu għall-ġlieda kontra t-tibdil fil-klima. Dan huwa importanti għar-rwol tal-UE fil-promozzjoni ta' kundizzjonijiet indaqs għan-negozji u ta’ distribuzzjoni ġusta tal-isforzi;

· biex tittejjeb l-integrità ambjentali tal-impenji tal-UE b'rabta mat-tibdil fil-klima billi jiġi żgurat li l-emissjonijiet u l-assorbimenti fis-setturi kollha jiġu rreġistrati. Attwalment, l-emissjonijiet mill-bijomassa użata għall-enerġija mhumiex inklużi fir-regoli tal-kontabilità għas-settur tal-enerġija jew għal setturi oħrajn li jipproduċu l-enerġija mill-bijomassa;

· biex tissaħħaħ l-effiċjenza ekonomika tal-politika tal-UE dwar it-tibdil fil-klima huma u jfittxu li jintlaħqu miri aktar ambizzjużi, billi s-setturi kollha jitħallew jikkontribwixxu għaliha.

L-inklużjoni tas-settur tal-LULUCF tesiġi li jiġu indirizzati l-profil speċifiku tiegħu u ċ-ċirkostanzi differenti tal-Istati Membri. Hemm bżonn ta’ regoli tal-kontabilità biex issir distinzjoni bejn l-emissjonijiet u l-assorbimenti antropoġeniċi u dawk mhux antropoġeniċi. Ir-riversibbiltà tal-emissjonijiet u tal-assorbimenti tista' tiġi kkawżata minn disturbi naturali bħan-nirien, il-maltempati, l-inxif, l-organiżmi ta' ħsara, eċċ., iżda wkoll minn deċiżjonijiet ta' ġestjoni, pereżempju minn deċiżjonijiet biex jinħasdu jew jitħawlu s-siġar. Għalhekk, il-kontabilità jeħtieġ li tkun tista' tirrifletti dawn l-inverżjonijiet. Barra minn hekk, il-monitoraġġ u r-rapportar tal-emissjonijiet u tal-assorbimenti huwa kumplikat u jesiġi sistema soda. Fl-aħħar nett, l-emissjonijiet u l-assorbimenti fil-foresti jvarjaw ħafna minn sena għall-oħra u jistgħu jammontaw għal ishma sinifikanti ħafna mill-emissjonijiet totali annwali fl-Istati Membri.

1.3. Jekk l-affarijiet jibqgħu kif inhuma, kif tevolvi l-problema?

Il-bir (jiġifieri meta l-assorbimenti jkunu ogħla mill-emissjonijiet) fis-settur tal-LULUCF huwa mistenni jonqos fl-UE sal-2020 f'xenarju fejn kollox jibqa' kif inhu[5]. Kumplessivament, f’dan is-settur dan mistenni jonqos b'madwar 10 % fl-2020 meta mqabbel mal-perjodu mill-2005 sal-2009. Dan it-tnaqqis mistenni jkun qawwi ħafna fil-ġestjoni tal-foresti. It-tħawwil ta' foresti "ġodda" (l-afforestazzjoni) se jikkumpensa parzjalment għal dan. L-emissjonijiet u l-assorbimenti mill-attivitajiet agrikoli bħall-ġestjoni tar-raba' u l-ġestjoni tal-imriegħi huma mistennija jibqgħu pjuttost stabbli jew jitjiebu. Hemm ir-riskju li x-xejriet u l-emissjonijiet negattivi jiġu injorati jekk is-settur tal-LULUCF ma jkunx jifforma parti mill-politika tal-UE dwar it-tibdil fil-klima.

Il-kapaċità mbassra tal-bir tispiċċa taffettwa dejjem aktar il-koerenza tal-politika u l-effiċjenza ekonomika. Jekk ma jitqiesx it-tnaqqis fl-assorbimenti netti li jirriżulta min-nuqqas ta' azzjoni, ikun hemm ir-riskju li jsir użu eċċessiv mir-riżorsi għall-miżuri ta' mitigazzjoni li jgħoddu għal għanijiet oħra, u b'hekk jinħolqu kundizzjonijiet mhux indaqs bejn għażliet ta' mitigazzjoni differenti. Barra minn hekk, it-telf fl-effiċjenza ekonomika jista' jiżdied biż-żmien, minħabba li se tkun meħtieġa azzjoni addizzjonali sinifikanti fis-setturi kollha biex jintlaħqu l-għanijiet klimatiċi fuq terminu twil.

1.4. Għanijiet

L-għan kumplessiv huwa li jiġi żgurat li s-settur tal-LULUCF jikkontribwixxi għall-impenji tal-UE b'rabta mat-tibdil fil-klima. L-għanijiet operattivi li ġejjin jindirizzaw id-definizzjoni tal-problema:

· fil-monitoraġġ u r-rapportar tagħhom, l-Istati Membri għandhom jikkonformaw mal-Gwida għal Prattiki Tajbin maħruġa mill-Grupp Intergovernattiv ta' Esperti dwar it-Tibdil fil-Klima (l-IPCC), biex jiżguraw li l-istimi jkunu trasparenti, kompluti, konsistenti, komparabbli u preċiżi;

· ir-regoli tal-kontabilità għandhom:

· ikunu estensivi sabiex jinkludu l-emissjonijiet u l-assorbimenti kollha, u l-attivitajiet ewlenin kollha tas-settur tal-LULUCF (l-afforestazzjoni, ir-riforestazzjoni, id-deforestazzjoni, il-ġestjoni tal-foresti, il-ġestjoni tar-raba' u l-ġestjoni tal-imriegħi);

· jirriflettu n-nuqqas ta' permanenza tal-emissjonijiet u tal-assorbimenti;

· jipprovdu inċentivi għall-mitigazzjoni tat-tibdil fil-klima;

· il-kuntest tal-politika għall-integrazzjoni tas-settur tal-LULUCF għandu jkun tali li ma jqegħidx f'riskju l-ħila tal-Istati Membri li jikkonformaw mal-miri ta' tnaqqis tal-gassijiet serra minħabba l-varjabbiltà tal-emissjonijiet u l-assorbimenti minn sena għall-oħra jew minħabba disturbi naturali sinifikanti.

1.5. Għażliet

L-azzjoni biex is-settur tal-LULUCF jiġi kkontabilizzat għandha tittieħed fuq żewġ livelli.

L-ewwel nett, jeħtieġ li jiġu ddefiniti l-għażliet fil-kuntest tal-politika li fih is-settur għandu jiġi kkontabilizzat, peress li diġà teżisti leġiżlazzjoni tal-UE dwar l-impenn li l-emissjonijiet tal-gassijiet serra jitnaqqsu b'20 % fl-2020. Għażla mhux regolatorja/"l-ebda azzjoni min-naħa tal-UE" (l-Għażla Nru 1) mhijiex realistika, peress li l-UE hija Parti għall-Protokoll ta' Kjoto u kwalunkwe impenn meħud fil-kuntest ta’ dan il-Protokoll jeħtieġ li jinqasam bejn l-Istati Membri u jkun jesiġi l-użu ta’ approċċ komuni. Għalhekk, l-għażla "li ma jsir xejn" tkun tfisser biss li kull azzjoni tiġi posposta sa ma jintlaħaq ftehim internazzjonali. L-Għażla Nru 2 tinvolvi l-ħolqien ta' qafas legali għas-settur tal-LULUCF li jkun separat mill-oqfsa stipulati fid-Deċiżjoni tal-UE dwar il-Qsim tal-Isforz u fl-Iskema tal-UE għan-Negozjar tal-Emissjonijiet (l-ETS). Din l-għażla ġiet sottodiviża fi tnejn: waħda mingħajr miri (l-Għażla Nru 2.I) u waħda bil-miri (l-Għażla Nru 2.II). L-Għażla Nru 3 tinvolvi l-inklużjoni tas-settur tal-LULUCF fil-qafas legali tad-Deċiżjoni dwar il-Qsim tal-Isforz. L-għażla li tintuża l-ETS twarrbet fi stadju bikri.

It-tieni nett, l-għażliet ġew żviluppati biex jiġi vvalutat kif jistgħu jinkisbu kontabilità, monitoraġġ u rapportar sodi fihom. Għall-kontabilità tqiesu l-għażliet li ġejjin:

(a) l-istess regoli tal-kontabilità li hemm għall-ewwel perjodu ta' impenn tal-Protokoll ta' Kjoto, inkluża l-kontabilità volontarja għall-attivitajiet agrikoli, iżda b'kontabilità mandatarja għall-attivitajiet kollha tal-forestrija;

(b) regoli tal-kontabilità li jikkorrispondu mar-riżultat mistenni tan-negozjati tal-UNFCCC dwar it-tieni perjodu ta' impenn fil-qafas tal-Protokoll ta' Kjoto, inkluża l-kontabilità mandatarja għall-attivitajiet kollha tal-forestrija u l-kontabilità volontarja għall-attivitajiet agrikoli;

(c) regoli tal-kontabilità li jikkorrispondu mar-riżultat mistenni tan-negozjati tal-UNFCCC, iżda b'aktar titjib miksub billi tiġi introdotta l-kontabilità mandatarja kemm għall-attivitajiet tal-forestrija kif ukoll għal dawk agrikoli.

Ingħatat ukoll deskrizzjoni ta' approċċ ibbażat fuq tliet stadji biex jinkisbu monitoraġġ u rapportar sodi. L-ewwel stadju jkun jinvolvi l-kisba ta' rapportar komplet tal-emissjonijiet u tal-assorbimenti mill-attivitajiet differenti, tal-anqas billi jintużaw metodi sempliċi. It-tieni stadju jkun ifisser żieda fil-preċiżjoni tad-dejta rrapportata billi jintużaw metodi aktar sofistikati. Fl-aħħar nett, se tittejjeb il-komparabilità tad-dejta tal-Istati Membri sabiex jiġu armonizzati l-monitoraġġ, ir-rapportar u n-nomenklatura relatata. L-għażliet sekondarji dwar il-kontabilità, u l-monitoraġġ u r-rapportar huma l-istess għall-Għażliet ġenerali Nri 2 u 3, iżda l-impatti tagħhom ivarjaw skont il-kuntest tal-politika.

1.6. Impatt

L-analiżi turi li tnejn mill-għażliet wiesgħa tal-politika jilħqu l-għan li s-setturi kollha jikkontribwixxu għall-impenn globali tal-UE li tnaqqas il-gassijiet serra, jiġifieri jkunu jinkludu s-settur tal-LULUCF fl-impenn tal-UE li tnaqqas il-gassijiet serra – jew f’qafas separat (l-Għażla Nru 2), jew fil-qafas tad-Deċiżjoni dwar il-Qsim tal-Isforz (l-Għażla Nru 3) L-impatti ambjentali, ekonomiċi u soċjali tal-għażliet ivarjaw ħafna skont ir-regoli tal-kontabilità li jiġu applikati, kif muri fit-Tabella 1.

Tabella 1. Sommarju tal-impatt ewlieni għall-UE

Tip ta’ impatt || Għażla Nru 1 || Għażla Nru 2.I || Għażla Nru 2.II || Għażla Nru 3

|| L-ebda azzjoni min-naħa tal-UE || Is-settur tal-LULUCF jiġi inkluż f’qafas separat (mingħajr ebda mira) || Is-settur tal-LULUCF jiġi inkluż f’qafas separat (b’mira) || Is-settur tal-LULUCF jiġi inkluż fid-Deċiżjoni dwar il-Qsim tal-Isforz

Għażla tal-kontabilità || mhux applikabbli || (a) || (b) || (c) || (a) || (b) || (c) || (a) || (b) || (c)

Impatt ambjentali || || || || || || || || || ||

Effett nett fuq il-mitigazzjoni fl-ekonomija kollha flimkien max-xenarju ta' referenza (f’miljuni ta’ tunnellati ta’ CO2 fis-sena) || Żero (impatt f’perjodu iktar tard) || 0 || 0 || 0 || -7 || -5 || -5 || 80 || 13 || 39

Kontribut potenzjali għall-mira tal-UE li jitnaqqsu l-emissjonijiet, inkluż ix-xenarju ta' referenza (f’miljuni ta’ tunnellati ta' CO2 fis-sena) || Żero (impatt f’perjodu iktar tard) || -79 || -10 sa -86 || -36 sa -106 || -86 || -15 sa -91 || -41 sa -111 || 0 || 0 || 0

Kontribut potenzjali għall-mira tal-UE li jitnaqqsu l-emissjonijiet (f'perċentwal tal-ammont totali tal-emissjonijiet tal-gassijiet serra fl-1990) || Żero (impatt f’perjodu iktar tard) || -1.4 || -0.2 sa -1.5 || -0.6 sa -1.9 || -1.6 || -0.3 sa -1.6 || -0.7 sa -2/0 || 0 || 0 || 0

Impatt ekonomiku || || || || || || || || || ||

Kost tal-mitigazzjoni || Żero (impatt f’perjodu iktar tard) || 0 || 0 || 0 || 40 || 27 || 27 || -166 || -55 || -156

Kost tal-monitoraġġ u r-rapportar imtejbin (f'miljuni ta' EUR) || Żero (impatt f’perjodu iktar tard) || 0.35 || 0.65 || 1.35 || 0.35 || 0.65 || 1.35 || 0.35 || 0.65 || 1.35

Impatt soċjali || || || || || || || || || ||

Effetti fuq l-impjiegi || Żero (impatt f’perjodu iktar tard) || 0 || 0 || 0 || Impatt żgħir (newtrali jew pożittiv) || Impatt żgħir (newtrali jew pożittiv)

Nota: L-Għażla Nru 2.II hija bbażata fuq mira ta' krediti kkontabilizzati ta' -5.4 miljun tunnellata ta’ CO2. Dan huwa ekwivalenti għal prezz tal-karbonju ta' EUR 5 għal kull tunnellata ta’ CO2 għall-għażliet tal-kontabilità (b) u (c), kif ġie presuppost għall-Għażla Nru 3, iżda għal prezz tal-karbonju ta' EUR 12 għal kull tunnellata ta’ CO2 għall-għażla tal-kontabilità (a), minħabba li l-ġestjoni tal-foresti mhijiex ikkontabilizzata. Il-valuri negattivi jindikaw l-assorbimenti netti (u l-valuri pożittivi jindikaw l-emissjonijiet netti). Sors: il-kalkoli huma bbażati fuq Böttcher et al. (2011) u fuq aġġornament tal-JRC (2011b), li jirriflettu l-analiżi tal-UNFCCC. Għall-Għażla Nru 2.I (b) qed jingħataw żewġ stimi għall-kontribut għall-mira tal-UE li jitnaqqsu l-emissjonijiet: waħda hija bbażata fuq it-tbassir mill-mudelli u l-oħra hija bbażata kemm fuq it-tbassir mill-mudelli kif ukoll fuq it-tbassir nazzjonali.

F'termini tal-impatt ambjentali, azzjoni biex jiżdiedu l-assorbimenti u jitnaqqsu l-emissjonijiet fil-forestrija u fl-agrikoltura idealment għandha titqies fuq perjodu twil taż-żmien għax jistgħu jgħaddu għexieren ta' snin qabel ma miżuri bħall-afforestazzjoni jħallu effett sinifikanti. Madankollu, l-impenji eżistenti tal-UE b'rabta mat-tibdil fil-klima jestendu biss sal-2020 u huma tir importanti. Il-punt sa fejn il-kontribut jista' jmur lil hinn minn dak li huwa mistenni mill-isforzi attwali (jiġifieri x-xenarju ta' referenza) jiddependi mill-kuntest tal-politika li fih l-LULUCF jiġi kkontabilizzat. L-azzjoni addizzjonali mistennija tkun limitata fl-Għażliet Nri 2.I u 3 u mistennija tkun akbar fl-Għażla Nru 2.II. Madankollu, l-istima la taqbad il-potenzjal kollu ta' mitigazzjoni li hemm fl-agrikoltura, u lanqas ma tinkludi l-benefiċċji miksuba mis-sostituzzjoni tal-materjali. Fir-rigward tal-impatt ekonomiku, l-għażla tal-kontabilità (a) tiġġenera kostijiet ogħla fl-Għażla Nru 2.II jekk ikun hemm il-miri peress li frazzjoni żgħira biss tal-isforzi ta' mitigazzjoni jgħoddu fir-realtà. Min-naħa l-oħra, hija tiġġenera wkoll krediti għoljin fix-xenarju ta' referenza u dan iwassal għal iffrankar tal-kostijiet fl-Għażla Nru 3, fejn mhija meħtieġa l-ebda miżura addizzjonali ta’ mitigazzjoni mis-settur tal-LULUCF, iżda l-krediti jistgħu jintużaw biex jieħdu post it-tnaqqis fl-emissjonijiet fil-qafas tad-Deċiżjoni dwar il-Qsim tal-Isforz. Il-kostijiet għall-għażliet kollha tal-kontabilità huma żero fl-Għażla Nru 2.I, fejn ma hija stabbilita l-ebda mira u fl-Għażla Nru 1 fejn ma titwettaq l-ebda kontabilità. L-impatti soċjali huma limitati u l-effetti fuq l-impjiegi huma stmati li huma baxxi u li huma jew newtrali jew inkella pożittivi. Madankollu, hemm xi effetti fuq id-distribuzzjoni fost l-Istati Membri fl-Għażliet Nri 2.II u 3.

1.7. Tqabbil tal-għażliet 1.7.1. L-għażla tal-kuntest tal-politika t-tajjeb

L-għan li jiġi llimitat l-impatt tal-varjabbiltà għolja minn sena għall-oħra tal-emissjonijiet u tal-assorbimenti u tar-riversibbiltà inerenti tagħhom fuq il-konformità jippreżenta sfida kbira għall-inklużjoni tas-settur tal-LULUCF fl-oqfsa legali attwali tal-UE għall-miri ta' tnaqqis. Id-Deċiżjoni dwar il-Qsim tal-Isforz (l-Għażla Nru 3) hija bbażata fuq il-konformità annwali u tesiġi li l-Istati Membri jnaqqsu l-emissjonijiet (jew jillimitaw iż-żidiet fihom) billi jsegwu trajettorja lineari. Madankollu, ikun diffiċli li wieħed japplika l-konformità annwali ma' trajettorja lineari minħabba l-varjazzjonijiet fl-emissjonijiet netti bejn l-Istati Membri u l-kalkoli mill-ġdid frekwenti u sinifikanti tad-dejta rrapportata. F'ħafna każijiet dan imur ferm lil hinn mil-lok għall-flessibbiltà li tagħti d-Deċiżjoni dwar il-Qsim tal-Isforz. Barra minn hekk, iż-żmien twil li jgħaddi qabel ma jiġu implimentati ħafna mill-miżuri fis-settur tal-LULUCF ifisser li l-kontabilità annwali ma tkunx sinifikanti daqs dik f'setturi oħra u, b’mod ġenerali, trajettorja lineari bit-tnaqqis meħtieġ fl-emissjonijiet għal kull sena ma tkunx rilevanti. L-Għażla Nru 2 tindirizza dawn il-kwistjonijiet billi tistabbilixxi l-medja tal-emissjonijiet u tal-assorbimenti tul il-perjodu ta' impenn u b'hekk tilħaq l-għan rigward il-varjabbiltà minn sena għall-oħra. Riskju marbut mal-Għażla Nru 3 huwa li l-inklużjoni tas-settur tal-LULUCF tnaqqas l-isforzi miftehma għas-setturi li diġà jagħmlu parti mill-impenji eżistenti u, b’hekk, li din tnaqqas effettivament l-impenn tal-UE. L-Għażla Nru 2 tevita dan ir-riskju.

1.7.2. L-iżgurar ta' kontabilità soda

It-Tabella 2 tipprovdi valutazzjoni fil-qosor ta' kif l-għażliet differenti tal-kontabilità jilħqu l-għanijiet. Fir-rigward tal-provvediment ta' kundizzjonijiet indaqs għall-għażliet differenti ta' mitigazzjoni, l-aktar attività importanti hija l-ġestjoni tal-foresti. It-Tabella 1 turi li l-għażla tal-kontabilità (a) tiġġenera krediti sostanzjali, li, fil-biċċa l-kbira tagħhom, huma ta' "bla ħsieb" (b'xejn), għax jinkludu assorbimenti li kienu jseħħu anki mingħajr ebda tibdil fid-deċiżjonijiet tal-ġestjoni. 85 % tal-isforzi ta' mitigazzjoni mhumiex se jiġu kkontabilizzati. Dan se jwassal biex il-mitigazzjoni tkun aktar għolja u għalhekk se jillimita l-inċentivi biex tittieħed azzjoni addizzjonali. Dan jippermetti wkoll tnaqqis sostanzjali fl-assorbimenti netti u żidiet fl-emissjonijiet netti mingħajr ebda impatt ekonomiku reali. Fl-aħħar nett, dan ma jiżgurax li n-nuqqas ta' permanenza jkun rifless fil-kontabilità minħabba li ma jkoprix l-emissjonijiet u l-assorbimenti relatati mal-attivitajiet agrikoli, u jkopri biss frazzjoni minn dawk relatati mal-ġestjoni tal-foresti.

Tabella 2. Il-prestazzjoni tal-għażliet differenti tal-kontabilità

Għanijiet || Kemm jintlaħqu l-għanijiet mill-għażliet differenti tal-kontabilità

Għażla tal-kontabilità (a) Bidliet żgħar || Għażla tal-kontabilità (b) Riżultat mistenni min-negozjati tal-UNFCCC || Għażla tal-kontabilità (c) UNFCCC+

Il-provvediment ta' kundizzjonijiet indaqs għall-għażliet differenti ta' mitigazzjoni || X || ● || ●●

L-iżgurar ta’ kopertura estensiva tal-emissjonijiet u tal-assorbimenti || ● || ● || ●●

L-iżgurar ta’ riflessjoni tan-nuqqas ta' permanenza fil-kontabilità || X || ● || ●●

L-evitar ta’ effetti negattivi fuq ir-riskju tal-konformità tal-Istati Membri minn disturbi naturali kbar || ● || ●● || ●●

Spjega tas-simboli użati: x L-għan ma ġiex indirizzat jew ma ġiex indirizzat biżżejjed mill-għażla, ● L-għan ġie parzjalment indirizzat mill-għażla, ●● L-għan ġie indirizzat biżżejjed mill-għażla.

L-għażliet tal-kontabilità (b) u (c) jippermettu tibdil fil-bir minħabba s-saturazzjoni naturali u l-politiki eżistenti mingħajr ma jiġġeneraw debiti jew krediti. Dan jagħmluh biex jeliminaw bidliet fl-emissjonijiet u fl-assorbimenti li ma jkunux ir-riżultat ta' azzjoni mill-bniedem. Madankollu, dawn jesiġu kontabilità sħiħa għal kwalunkwe devjazzjoni mil-"livell ta' referenza". Dan ifisser li, fix-xenarju ta' referenza, l-għażliet kollha ta’ tnaqqis u l-użi kollha, kemm jekk dawn ikunu jinvolvu s-sekwestru jew l-użu addizzjonali tal-bijomassa għall-produzzjoni tal-enerġija (pereżempju biex jintlaħqu l-miri tad-Direttiva dwar il-promozzjoni tal-użu tal-enerġija minn sorsi rinnovabbli), kif ukoll jekk ikunu jinvolvu s-sostituzzjoni tal-materjali, se jaffrontaw l-istess kost tal-għażla. Dan se jiżgura kundizzjonijiet indaqs għall-għażliet differenti ta' mitigazzjoni.

F'termini tal-iżgurar ta' kopertura estensiva tal-emissjonijiet u tal-assorbimenti u tal-iżgurar ta’ riflessjoni tan-nuqqas ta' permanenza fil-kontabilità, l-għażla tal-kontabilità (c) biss tesiġi li l-Istati Membri jikkontabilizzaw, b'mod mandatarju, l-emissjonijiet u l-assorbimenti kemm fl-agrikoltura kif ukoll fil-forestrija. L-għażliet tal-kontabilità (a) u (b) jagħmlu l-kontabilità għall-agrikoltura ħaġa volontarja, u dan jista' jqiegħed f'riskju l-kredibbiltà tal-impenn tal-UE. L-estensjoni tal-ambitu tal-kontabilità jżid il-konsistenza bejn l-Istat Membri. Huwa importanti li s-setturi kollha fl-Istati Membri kollha jikkontribwixxu għall-ilħiq tal-miri tal-istrateġija "Ewropa 2020", biex jiġu żgurati kundizzjonijiet indaqs għan-negozji u għall-Istati Membri u distribuzzjoni ġusta tal-isforz, u biex jiġi żgurat trattament konsistenti tal-agrikoltura, il-forestrija u l-industrija fi ħdan is-suq intern tal-UE. Fuq terminu itwal, sistema tal-kontabilità aktar inklużiva se twassal ukoll għal żieda fil-kosteffiċjenza fl-ilħiq ta' kwalunkwe mira kumplessiva partikolari.

Fir-rigward tat-tnaqqis tal-impatt ta' disturbi naturali fuq ir-riskju tal-konformità, l-għażliet tal-kontabilità (b) u (c) jinkludu regoli tal-kontabilità għal disturbi naturali kbar u għalhekk jillimitaw ir-riskju ta' nuqqas ta' konformità mal-miri ta' tnaqqis tal-gassijiet serra jekk l-emissjonijiet jokkorru minħabba disturbi ta' dan it-tip li l-Istati Membri ma jkollhomx kontroll fuqhom. L-impatt fuq il-kontabilità kumplessiva tal-UE se jkun negliġibbli, iżda dan se jipprovdi s-salvagwardji meħtieġa għal dawk l-Istati Membri l-aktar affettwati.

1.7.3. Titjib fil-monitoraġġ u fir-rapportar

Din il-valutazzjoni tal-impatt tiddeskrivi approċċ ibbażat fuq tliet stadji biex jintlaħaq l-għan li jiġi żgurat li l-monitoraġġ u r-rapportar ikunu konformi mal-Gwida għal Prattiki Tajbin tal-IPCC. L-ewwel stadju jkun jinvolvi l-kisba ta' rapportar komplet, tal-anqas billi jintużaw metodi sempliċi. It-tieni stadju jkun ifisser żieda fil-preċiżjoni tad-dejta rrapportata billi jintużaw metodi aktar sofistikati. Huwa mistenni li jkun hemm progress matul l-ewwel perjodu ta' impenn tal-Protokoll ta' Kjoto, iżda jeħtieġ li l-isforzi jitkomplew matul il-perjodu mill-2013 sal-2020. Fl-aħħar nett, il-komparabilità tad-dejta bejn l-Istati Membri tista' tittejjeb billi jiġu armonizzati l-monitoraġġ, ir-rapportar u n-nomenklatura relatata.

L-istadji ta' hawn fuq se jkunu jagħmlu parti mill-proposta tal-Kummissjoni għal Deċiżjoni riveduta dwar il-Mekkaniżmu ta' Monitoraġġ.

1.8. Kummenti finali

Ftehim internazzjonali dwar regoli riveduti tal-kontabilità għas-settur tal-LULUCF għat-tieni perjodu ta' impenn tal-Protokoll ta' Kjoto nkiseb biss fis-17-il Konferenza tal-Partijiet (COP17) li saret f'Durban f'Diċembru 2011[6].

Issa jeżistu raġunijiet tajbin biex wieħed jinkludi s-settur tal-LULUCF fl-impenji tal-UE li tnaqqas l-emissjonijiet tal-gassijiet serra, l-iktar biex jittejbu l-koerenza tal-politika, l-integrità ambjentali u l-effiċjenza ekonomika. Iżda dan jesiġi li jiġu indirizzati l-karatteristiċi speċjali tas-settur tal-LULUCF u ċ-ċirkostanzi differenti fl-Istati Membri differenti. Għalhekk huwa importanti li wieħed jiżgura li jiġu implimentati regoli sodi tal-kontabilità u monitoraġġ u rapportar sodi.

L-għażla tal-kontabilità (c) tinvolvi l-kontabilità mandatarja tal-emissjonijiet u tal-assorbimenti kemm mill-attivitajiet tal-forestrija kif ukoll minn dawk agrikoli, u tagħti l-istess importanza lill-azzjonijiet ta' mitigazzjoni, kemm jekk jittieħdu fis-settur tal-forestrija kif ukoll jekk jittieħdu fis-setturi tal-agrikoltura, tal-industrija jew tal-enerġija. Dan iwassal għall-kosteffiċjenza u jiżgura kundizzjonijiet indaqs kemm għall-Istati Membri kif ukoll għad-diversi setturi tas-suq intern tal-UE. Se jipprovdi wkoll qafas biex jingħataw inċentivi għal azzjonijiet ta' mitigazzjoni min-naħa tal-bdiewa, ta’ dawk li jaħdmu fil-foresti u tal-industrija, u jiżgura li dawn ikunu viżibbli u li jitqiesu b'mod korrett. Kopertura wiesgħa tal-emissjonijiet u tal-assorbimenti tiżgura wkoll li l-inverżjonijiet potenzjali jitqiesu fis-sistema tal-kontabilità.

Il-monitoraġġ u r-rapportar jeħtieġ li jittejbu biex il-qafas tal-kontabilità u l-indikaturi li jkejlu l-progress li jkun qed isir fl-agrikoltura u l-forestrija jingħataw bażi soda. Il-Kummissjoni qed tipproponi li tikseb dan permezz ta' qafas separat, jiġifieri billi tirrevedi d-Deċiżjoni dwar il-Mekkaniżmu ta’ Monitoraġġ. Għal raġunijiet ta' komparabilità u ta’ kosteffiċjenza, l-istrumenti tal-monitoraġġ madwar l-Unjoni Ewropea, bħal, pereżempju, dawk imsejħin “LUCAS” u “CORINE”, għandhom jintużaw aħjar.

Biex jiġu pprovduti inċentivi kbar, ir-riżultati tal-azzjonijiet meħudin fis-setturi differenti għandhom jgħoddu mal-impenji tal-UE li tnaqqas l-emissjonijiet tal-gassijiet serra. Dan se jkun possibbli biss jekk jiġi implimentat il-kuntest tal-politika t-tajjeb għas-settur tal-LULUCF. Il-varjabbiltà għolja tal-emissjonijiet u tal-assorbimenti fil-foresti tfisser li l-miri annwali tat-tnaqqis tal-emissjonijiet li japplikaw għas-setturi l-oħra mhumiex adattati għal dan is-settur. Iż-żmien twil meħtieġ qabel ma l-miżuri ta' mitigazzjoni jħallu effett ukoll jiddistingwi s-settur tal-LULUCF mill-biċċa l-kbira tas-setturi l-oħra. Din il-valutazzjoni tal-impatt tissuġġerixxi li l-aqwa għażla tkun li jkun hemm qafas legali separat għas-settur tal-LULUCF.

L-UE diġà ntrabtet li tnaqqas l-emissjonijiet tal-gassijiet serra b'20 % sal-2020, meta mqabbel mal-livelli tal-1990, permezz ta' sforzi f'setturi oħrajn. Qabel ma l-livell ta' ambizzjoni jiżdied għal aktar minn 20 %, jeħtieġ li jkun hemm il-kundizzjonijiet ix-xierqa. Għalhekk, is-settur tal-LULUCF għandu jiġi inkluż b'mod formali f’dawn l-impenji biss ladarba l-UE tiddeċiedi li żżid dan il-livell ta' ambizzjoni (l-Għażla Nru 2.I). Dan ma jfissirx li, sadanittant, l-azzjonijiet ta' mitigazzjoni għandhom jiġu sospiżi. Il-pjanijiet ta' azzjoni nazzjonali jistgħu jitħejjew biex jiġu pprovduti strateġija u previżjonijiet għas-settur tal-LULUCF. Dan ikun pass intermedju lejn l-inklużjoni sħiħa tas-settur fil-politiki attwali.

[1]               Id-Deċiżjoni 1/CP.16 tal-Konferenza tal-Partijiet għall-UNFCCC ("il-Ftehimiet ta' Cancún").

[2]               Il-Konklużjonijiet tal-Presidenza tal-Kunsill Ewropew tat-8-9.3.2007 li sar fi Brussell, implimentati permezz tad-Deċiżjoni Nru 406/2009/KE u permezz tad-Direttiva 2009/29/KE.

[3]               Id-Deċiżjoni Nru 406/2009/KE u d-Direttiva 2009/29/KE.

[4]               Gassijiet serra oħrajn mill-attivitajiet agrikoli, pereżempju l-metan u l-ossidu nitruż mill-annimali li jixtarru u mill-fertilizzanti, ma l-LULUCF, li jittratta primarjament l-emissjonijiet tal-karbonju u l-assorbimenti tiegħu fil-veġetazzjoni u l-ħamrija. L-emissjonijiet li mhumiex emissjonijiet tad-CO2 huma koperti mis-settur tal-inventarju tal-"agrikoltura".

[5]               F'dan il-kuntest, sitwazzjoni fejn "kollox jibqa' kif inhu" tassumi li l-Istati Membri se jilħqu l-miri ta' tnaqqis tagħhom ta' 20 %, inklużi dawk għall-enerġija rinnovabbli.

[6]               Id-Deċiżjoni -/CMP.7 tal-Konferenza tal-Partijiet li sservi bħala laqgħa tal-Partijiet għall-Protokoll ta' Kjoto.