Proposta għal DEĊIŻJONI TAL-KUNSILL li tawtorizza lill-Belġju biex japplika miżura li tidderoga mill-Artikolu 285 tad-Direttiva 2006/112/KE dwar is-sistema komuni ta’ taxxa fuq il-valur miżjud /* COM/2012/0654 final - 2012/0312 (NLE) */
MEMORANDUM TA' SPJEGAZZJONI 1. IL-KUNTEST TAL-PROPOSTA Raġunijiet għall-proposta u l-għanijiet
tagħha Skont l-Artikolu 395(1)
tad-Direttiva 2006/112/KE tat-28 ta' Novembru 2006 dwar
is-sistema komuni ta' taxxa fuq il-valur miżjud[1]
(minn hawn 'il quddiem 'id-Direttiva dwar il-VAT'), il-Kunsill, li jaġixxi
unanimament fuq proposta mill-Kummissjoni, jista' jawtorizza lil kwalunkwe Stat
Membru biex japplika miżuri speċjali għal deroga mid-dispożizzjonijet ta' din
id-Direttiva, sabiex jissimplifika l-proċedura tal-ġbir tal-VAT jew sabiex
jipprevjeni ċerti tipi ta' evażjoni jew evitar tat-taxxa. B'ittra rreġistrata mal-Kummissjoni
fil-21 ta' Ġunju 2012 il-Belġju talab awtorizzazzjoni biex
jintroduċi miżura biex teżenta persuni taxxabbli li d-dħul annwali tagħhom mhux
aktar minn EUR 25 000. Skont l-Artikolu 395(2) tad-Direttiva
tal-VAT, il-Kummissjoni infurmat lill-Istati Membri l-oħrajn, permezz ta' ittra
datata t-13 ta' Settembru 2012, bit-talba magħmula mil-Belġju.
Permezz ta’ ittra datata s-17 ta’ Settembru 2012, il-Kummissjoni
nnotifikat lill-Belġju li kellha l-informazzjoni kollha meħtieġa biex tqis
it-talba. Kuntest ġenerali Il-Kapitolu 1 tat-Titolu XII
tad-Direttiva tal-VAT jagħti l-possibbiltà lill-Istati Membri li japplikaw
skemi speċjali għall-impriżi żgħar, inkluża l-possibbiltà li jeżentaw lil
persuni taxxabbli b'inqas minn ċertu dħul annwali. Din l-eżenzjoni timplika li
persuna taxxabbli ma għandhiex għalfejn iżżomm il-VAT fuq il-provvisti tagħha
u, konsegwentement, ma tistax tnaqqas il-VAT minn fuq ix-xiri tagħha. Skont l-Artikolu 285 tad-Direttiva
tal-VAT, l-Istati Membri li m'għamlux użu tal-Artikolu 14 tad-Direttiva
tal-Kunsill 67/228/KEE[2],
jistgħu jeżentaw persuni taxxabbli lil-livell limitu tagħhom mhuwiex iktar minn
EUR 5 000. Fil-klima ekonomika u politika preżenti,
il-gvern Belġjan jixtieq iżid dan il-limitu għal EUR 25 000,
bil-possibbiltà li jgħollih biex jinżamm il-valur tiegħu f'termini reali.
L-introduzzjoni ta’ limitu bħal dan se tissimplifika s-sistema tal-VAT
għall-intrapriżi żgħar u tnaqqas b'mod sinifikanti l-piż fuq dawk in-negozji
eleġibbli għall-iskema billi tirrilaxxahom minn ħafna mill-obbligi tal-VAT
skont l-arranġamenti normali tal-VAT. Is-sistema tkun fakultattiva
għall-persuni taxxabbli. Skont l-awtoritajiet Belġjani, madwar 1% ta’ persuni
taxxabbli se tagħmel użu tal-iskema, b'effett minimu korrispondenti fuq
il-baġit (madwar 0.2%). Dispożizzjonijiet eżistenti fil-qasam
tal-proposta Fl-2004, il-Kummissjoni għamlet proposta biex
iżżid il-limitu tad-dħul annwali disponibbli għall-Istati Membri
(COM(2004) 728 finali) għall-eżenzjoni mill-VAT tal-persuni taxxabbli għal
EUR 100 000. Konsistenza ma' politiki u għanijiet oħrajn
tal-Unjoni Mhux applikabbli. 2. RIŻULTATI TAL-KONSULTAZZJONIJIET
MAL-PARTIJIET INTERESSATI U TAL-VALUTAZZJONIJIET TAL-IMPATT Konsultazzjoni mal-partijiet interessati Mhux rilevanti Ġbir u użu tal-għarfien espert Ma kienx hemm bżonn ta’ għarfien espert
estern. Valutazzjoni tal-impatt Il-proposta għal Deċiżjoni tal-Kunsill għandha
l-għan li ddaħħal miżura ta' simplifikazzjoni li tneħħi ħafna mill-obbligi
tal-VAT għan-negozji li jaħdmu bi dħul annwali ta’ mhux aktar minn
EUR 25 000, u għalhekk għandha potenzjal għal impatt pożittiv. Minħabba l-kamp ta’ applikazzjoni strett
tad-deroga u l-applikazzjoni limitata fiż-żmien, il-kamp ta’ applikazzjoni jkun
limitat fi kwalunkwe każ. 3. ELEMENTI LEGALI TAL-PROPOSTA Sommarju tal-azzjoni proposta Awtorizzazzjoni għall-Belġju biex tintroduċi
miżura li tidderoga mid-Direttiva tal-VAT fir-rigward ta’ miżura ta’
simplifikazzjoni għan-negozji bi dħul annwali li mhux ogħla minn
EUR 25 000. Bażi legali L-Artikolu 395 tad-Direttiva tal-VAT. Il-prinċipju tas-sussidjarjetà Il-proposta taqa’ taħt il-kompetenza
esklussiva tal-Unjoni Ewropea. Għalhekk, il-prinċipju tas-sussidjarjetà ma japplikax. Il-prinċipju tal-proporzjonalità Il-proposta tikkonforma mal-prinċipju
tal-proporzjonalità għar-raġunijiet li ġejjin. Id-Deċiżjoni tikkonċerna awtorizzazzjoni
mogħtija lil Stat Membru wara talba li għamel hu stess u ma tikkostitwixxi
l-ebda obbligu. Minħabba l-kamp ta' applikazzjoni limitat
tad-deroga, il-miżura speċjali hija proporzjonata mal-għan mixtieq. Għażla tal-istrumenti: L-istrument propost: Deċiżjoni tal-Kunsill. Skont l-Artikolu 395 tad-Direttiva
tal-VAT, deroga mir-regoli komuni tal-VAT hija possibbli biss
bl-awtorizzazzjoni tal-Kunsill li jkun qiegħed jaġixxi b'mod unanimu fuq
proposta mill-Kummissjoni. Barra minn hekk, Deċiżjoni tal-Kunsill hija l-aktar
strument adattat peress li tista' tiġi indirizzata lill-Istati Membri
individwali. 4. IMPLIKAZZJONI BAĠITARJA Il-proposta m’għandhiex implikazzjoni fuq
il-baġit tal-UE għaliex il-Belġju se jwettaq kalkolu ta’ kumpens skont
l-Artikolu 6 tar-Regolament tal-Kunsill (KEE, EURATOM) 1553/89. 5. ELEMENTI FAKULTATTIVI Klawżola ta’ analiżi/ta’ reviżjoni/sunset Il-proposta tinkludi klawżola sunset. 2012/0312 (NLE) Proposta għal DEĊIŻJONI TAL-KUNSILL li tawtorizza lill-Belġju biex japplika
miżura li tidderoga mill-Artikolu 285 tad-Direttiva 2006/112/KE dwar
is-sistema komuni ta’ taxxa fuq il-valur miżjud IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, Wara li kkunsidra d-Direttiva
tal-Kunsill 2006/112/KE tat-28 ta' Novembru 2006 dwar
is-sistema komuni ta’ taxxa fuq il-valur miżjud[3],
u b’mod partikolari l-Artikolu 395(1) tagħha, Wara li kkunsidra l-proposta mill-Kummissjoni
Ewropea, Billi: (1) F'ittra rreġistrata
mal-Kummissjoni fil-21 ta' Ġunju 2012, il-Belġju talab
awtorizzazzjoni għal miżura li tidderoga mill-Artikolu 285
tad-Direttiva 2006/112/KE sabiex jintroduċi miżura speċjali li teżenta
mit-taxxa fuq il-valur miżjud (il-VAT) persuni taxxabbli li d-dħul annwali
tagħhom mhux aktar minn EUR 25 000. Permezz ta’ dik il-miżura, dawk
il-persuni taxxabbli se jkomplu jkunu eżenti minn ċerti obbligi jew
mill-obbligi kollha fir-rigward tal-VAT imsemmija fil-Kapitoli 2 sa 6
tat-Titolu XI tad-Direttiva 2006/112/KE. (2) Permezz ta’ ittra datata
t-13 ta’ Settembru 2012, il-Kummissjoni infurmat lill-Istati
Membri l-oħra bit-talba magħmula mill-Belġju. Permezz ta’ ittra datata
s-17 ta’ Settembru 2012, il-Kummissjoni nnotifikat lill-Belġju
li kellha l-informazzjoni kollha meħtieġa biex tqis it-talba. (3) Skont l-Artikolu 285
tad-Direttiva 2006/112/KE, l-Istati Membri li m'għamlux użu
tal-Artikolu 14 tad-Direttiva tal-Kunsill 67/228/KEE[4], jistgħu jeżentaw persuni
taxxabbli li l-livell limitu ta' dħul mhuwiex iktar minn EUR 5 000.
Il-Belġju talab li dan il-limitu jiżdied għal EUR 25 000. (4) Limitu ogħla għall-iskema
speċjali għall-intrapriżi ż-żgħar hu miżura ta’ simplifikazzjoni għaliex jista’
jnaqqas b’mod sinifikanti l-obbligi tal-VAT tal-iżgħar negozji. Din l-iskema
hija fakoltattiva għall-persuni taxxabbli. (5) Fil-proposta tagħha għal
Direttiva biex tissimplifika l-obbligi tat-taxxa fuq il-valur miżjud tad-29 ta' Ottubru 2004[5], il-Kummissjoni inkludiet
dispożizzjonijiet maħsuba biex jippermettu lill-Istati Membri biex
jistabbilixxu l-limitu tad-dħul annwali għall-iskema ta' eżenzjoni mill-VAT sa
ammont massimu ta' EUR 100 000 jew l-ekwivalenti fil-valuta nazzjonali,
bil-possibbiltà li dan l-ammont ikun aġġornat kull sena. It-talba ppreżentata
mill-Belġju hi konformi ma' dik il-proposta. (6) Id-deroga m'għandhiex impatt
fuq ir-riżorsi proprji tal-Unjoni li jakkumulaw mill-VAT u se jkollha biss
effett żgħir fuq l-ammont globali tad-dħul mit-taxxa tal-Istat Membru miġbur
fl-istadju tal-konsum finali, ADOTTA DIN ID-DEĊIŻJONI: Artikolu 1 B’deroga mill-Artikolu 285
tad-Direttiva 2006/112/KE, il-Belġju hu awtorizzat li jeżenta mill-VAT
persuni taxxabbli li d-dħul annwali tagħhom ma jkunx aktar
minn EUR 25 000. Il-Belġju jista’ jżid l-ogħla limitu sabiex
iżomm il-valur tal-eżenzjoni f’termini reali. Artikolu 2 Din id-Deċiżjoni tapplika sad-data tad-dħul
fis-seħħ ta’ Direttiva li temenda l-ammonti tal-limiti massimi ta’ dħul annwali
li taħthom il-persuni taxxabbli jistgħu jikkwalifikaw għal eżenzjoni mill-VAT
jew sal-31 ta’ Diċembru 2015, skont liema data sseħħ l-ewwel. Din id-Deċiżjoni għandha tidħol fis-seħħ
l-għada tal-jum tal-pubblikazzjoni tagħha f'Il-Ġurnal Uffiċjali tal-Unjoni
Ewropea. Artikolu 3 Din id-Deċiżjoni hija indirizzata lir-Renju
tal-Belġju. Magħmul fi Brussell, Għall-Kunsill Il-President [1] ĠU L 347, 11.12.2006, p.1 [2] ĠU 71, 14.4.1967, p. 1303-1312. [3] ĠU L 347, 11.12.2006, p.1 [4] ĠU 71, 14.4.1967, p. 1303-1312. [5] COM(2004) 728 finali.