MEMORANDUM TA’ SPJEGAZZJONI

1.           KUNTEST TAL-PROPOSTA

Ir-Regolamenti tal-Kunsill dwar l-opportunitajiet tas-sajd adottati matul it-tieni nofs ta' kull sena ma għadhomx jinkludu t-TAC għall-inċova fil-Bajja ta’ Biscay minħabba ċ-ċiklu annwali differenti segwit mill-bijoloġija ta’ dan l-istokk u l-parir xjentifiku dwaru. Jeħtieġ li tiġi stabbilita TAC għall-inċova kull sena, lejn Lulju.

Permezz tar-Regolament tal-Kunsill (KE) Nru 716/2011, il-Kunsill stabbilixxa t-TAC għas-sajd li jisfrutta dan l-istokk applikabbli mill-1 ta' Lulju 2011 sat-30 ta' Ġunju 2012. It-TAC u l-allokazzjoni tagħha lill-Istati Membri kkonċernati issa jridu jiġu ffissati għat-12-il xahar li jmiss.

2.           ELEMENTI LEGALI TAL-PROPOSTA

B'kunsiderazzjoni tal-għanijiet tal-Politika Komuni tas-Sajd, stipulati bir-Regolament tal-Kunsill (KE) Nru 2371/2002 tal-20 ta' Diċembru 2002 dwar il-konservazzjoni u l-isfruttar sostenibbli ta' riżorsi tas-sajd skont il-Politika Komuni dwar is-Sajd, l-opportunitajiet tas-sajd għandhom jiġu stabbiliti abbażi tal-parir xjentifiku disponibbli u billi jitqiesu l-aspetti bijoloġiċi u soċjoekonomiċi, filwaqt li jiġi żgurat trattament ġust bejn is-setturi tas-sajd.

Il-parir tal-Kumitat Xjentifiku, Tekniku u Ekonomika għas-Sajd (STECF) ta' Lulju 2012 għall-istokk tal-inċova fil-Bajja ta' Biscay, huwa bbażat fuq l-istaġun tas-sajd li jibda fl-1 ta' Lulju 2011 u jintemm fit-30 ta' Ġunju 2012.

Skont il-parir tal-STECF il-bijomassa tal-istokk riproduttiv hija stmata għal madwar 68,180 tunnellata. Meta wieħed jikkunsidra li l-proposta tal-Kummissjoni tad-29 ta' Lulju 2009 għal Regolament li jistabbilixxi pjan fit-tul għall-istokk tal-inċova fil-Bajja ta' Biscay u s-sajd li jisfrutta dak l-istokk[1], u b'kunsiderazzjoni tal-valutazzjoni tal-impatt li fuqha hija bbażata dik il-proposta, li tipprovdi għall-valutazzjoni l-iktar riċenti tal-impatt tad-deċiżjonijiet dwar l-opportunitajiet tas-sajd għal dan l-istokk, huwa xieraq li tiġi stipulata TAC għal dan l-istokk skont ir-regola tal-ħsad stipulata fil-proposta. B'riżultat ta' dan, it-TAC għall-istaġun tas-sajd mill-1 ta' Lulju 2012 sat-30 ta' Ġunju 2013 għandha tiġi stabbilita għal 20,700 tunnellata.

Il-Kunsill huwa mitlub jadotta din il-proposta malajr kemm jista' jkun sabiex is-sajjieda jkunu jistgħu jippjanaw l-attivitajiet tagħhom għall-istaġun ġdid tas-sajd.

2012/0194 (NLE)

Proposta għal

REGOLAMENT TAL-KUNSILL

dwar l-istabbiliment tal-opportunitajiet tas-sajd għall-inċova fil-Bajja ta’ Biscay għall-istaġun tas-sajd 2012/2013

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 43(3) tiegħu,

Wara li kkunsidra l-proposta mill-Kummissjoni Ewropea,

Billi:

(1)       Hija r-responsabbiltà tal-Kunsill li jistabbilixxi l-Qabdiet Totali Permessi (TACs) għal kull tip ta' sajd jew grupp ta' sajd. L-opportunitajiet tas-sajd għandhom jitqassmu fost l-Istati Membri b’tali mod li tiġi żgurata l-istabbiltà relattiva tal-attivitajiet tas-sajd f’kull Stat Membru għal kull stokk jew gruppi ta’ stokkijiet u billi jitqiesu adegwatament l-għanijiet tal-Politika Komuni tas-Sajd stabbiliti bir-Regolament tal-Kunsill (KE) Nru 2371/2002 tal-20 ta’ Diċembru 2002 dwar il-konservazzjoni u l-isfruttar sostenibbli ta’ riżorsi tas-sajd skont il-Politika Komuni dwar is-Sajd[2].

(2)       Għall-finijiet tal-ġestjoni adegwata u ssimplifikata tal-istokk, huwa xieraq li jiġu stabbiliti dawk it-TACs u kwoti għall-Istati Membri għall-istokk tal-inċova fil-Bajja ta’ Biscay (is-Subżona VIII tal-ICES) għal staġun ta’ ġestjoni annwali li jibda fl-1 ta’ Lulju u jintemm fit-30 ta’ Ġunju tas-sena ta’ wara, minflok perjodu ta’ ġestjoni ta’ sena kalendarja. Is-sajd għandu, madankollu jibqa’ suġġett għad-dispożizzjonijiet ġenerali tar-Regolament (UE) Nru 43/2012[3] fir-rigward tal-kundizzjonijiet għall-użu tal-kwoti.

(3)       It-TAC għall-inċova fil-Bajja ta’ Biscay għall-istaġun tas-sajd 2012/2013 għandha tkun stabbilita abbażi tal-parir xjentifiku disponibbli, u billi jitqiesu l-aspetti bijoloġiċi u soċjoekonomiċi filwaqt li jiġi żgurat trattament ġust bejn is-setturi tas-sajd.

(4)       Sabiex tipprovdi għal pjan multiannwali għall-istokk tal-inċova fil-Bajja ta’ Biscay li jkopri l-istaġun tas-sajd u tistabbilixxi r-regola tal-kontroll tal-ħsad li tapplika biex jiġu stabbiliti l-opportunitajiet tas-sajd, fid-29 ta’ Lulju 2009 il-Kummissjoni ppreżentat proposta għal Regolament li jistabbilixxi pjan fit-tul għall-istokk tal-inċova fil-Bajja ta’ Biscay u għas-sajd li jisfrutta dak l-istokk. B’kunsiderazzjoni ta’ dik il-proposta u filwaqt li titqies dik il-valutazzjoni tal-impatt li fuqha hija bbażata l-proposta għall-valutazzjoni l-iktar riċenti tal-impatt tad-deċiżjonijiet fuq l-opportunitajiet tas-sajd għall-istokk tal-inċova fil-Bajja ta’ Biscay, huwa xieraq li tiġi stabbilita TAC għal dak l-istokk skont dan. Il-parir li nħareġ mill-Kumitat Xjentifiku, Tekniku u Ekonomiku għas-Sajd (STECF) f’Lulju 2012 ta stima ta’ madwar 68,180 tunnellata għall-bijomassa tal-istokk riproduttiv . B'riżultat ta' dan, it-TAC għall-istaġun tas-sajd li jibda fl-1 ta' Lulju 2012 u jintemm fit-30 ta' Ġunju 2013 għandha tiġi stabbilita għal 20,700 tunnellata.

(5)       Skont l-Artikolu 2 tar-Regolament (KE) Nru 847/96 tas-6 ta’ Mejju 1996 li jintroduċi kundizzjonijiet addizzjonali għal tmexxija minn sena għal sena tat-TAC u l-kwoti[4], huwa meħtieġ li jiġi stabbilit sa fejn l-istokk tal-inċova fil-Bajja ta’ Biscay huwa suġġett għall-miżuri stabbiliti f’dak ir-Regolament.

(6)       Minħabba l-bidu tal-istaġun tas-sajd 2012/2013 u għall-finijiet tar-rappurtar annwali tal-qabdiet, dan ir-Regolament għandu jidħol fis-seħħ minnufih u japplika mill-1 ta’ Lulju 2012.

ADOTTA DAN IR-REGOLAMENT:

Artikolu 1 Opportunitajiet tas-sajd għall-inċova fil-Bajja ta’ Biscay

1.           Il-qabda totali permissibbli (TAC) u l-allokazzjoni tagħha bejn l-Istati Membri għall-istaġun tas-sajd li jibda fl-1 ta’ Lulju 2012 u jintemm fit-30 ta’ Ġunju 2013 għall-istokk tal-inċova fis-Subżona VIII tal-ICES kif iddefinit fir-Regolament (KE) Nru 218/2009 tal-Parlament Ewropew u tal-Kunsill tal-11 ta’ Marzu 2009 dwar il-preżentazzjoni ta’ statistiċi ta’ qbid nominali mill-Istati Membri li jistadu fil-Grigal tal-Atlantiku[5], għandhom ikunu kif ġej (f’tunnellati ta’ piż ta’ ħut ħaj):

Speċi: || Inċova Engraulis encrasicolus || Żona tal-ICES: || Iż-żona VIII (ANE/08.)

Spanja || 18 630 || || TAC analitika

Franza || 2 070 ||

L-UE || 20 700 ||

|| ||

TAC || 20 700 ||

2.           L-allokazzjoni tal-opportunitajiet tas-sajd kif stabbilita fil-paragrafu 1 u l-użu tagħha għandha tkun suġġetta għall-kundizzjonijiet stipulati fl-Artikoli 8, 10 u 13 tar-Regolament (UE) Nru 43/2012.

3.           L-istokk imsemmi fil-paragrafu 1 għandu jitqies bħala suġġett għal TAC analitika għall-finijiet tar-Regolament (KE) Nru 847/96. Għandhom japplikaw il-punti 2 u 3 tal-Artikolu 3 u l-Artikolu 4 ta’ dak ir-Regolament.

Artikolu 2

Dan ir-Regolament għandu jidħol fis-seħħ l-għada tal-jum tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Għandu japplika mill-1 ta’ Lulju 2012.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

                                                                       Għall-Kunsill

                                                                       Il-President

[1]               COM(2009) 399 finali

[2]               ĠU L 358, 31.12.2002, p. 59.

[3]               ĠU L 25, 27.1.2012, p. 1.

[4]               ĠU L 115, 9.5.1996, p. 3.

[5]               ĠU L 87, 31.3.2009, p. 70.