Proposta għal REGOLAMENT TAL-PARLAMENT EWROPEW U TAL-KUNSILL li jemenda r-Regolament (UE) Nru 510/2011 bl-għan li jiġu ddefiniti l-modalitajiet biex tintlaħaq il-mira għall-2020 li jitnaqqsu l-emissjonijiet ta' CO2 minn vetturi kummerċjali ħfief ġodda /* COM/2012/0394 final - 2012/0191 (COD) */
MEMORANDUM TA’ SPJEGAZZJONI 1. KUNTEST TAL-PROPOSTA ·
Il-kuntest ġenerali L-UE għandha l-għan iddikjarat li
tillimita t-tibdil fil-klima globali għal żieda fit-temperatura ta'
2ºC 'il fuq mil-livelli preindustrijali. Sabiex jinkiseb dan, l-emissjonijiet globali
jridu jilħqu l-ogħla limitu sal-2020 u jitnaqqsu b'mill-inqas
50 % globalment sal-2050 meta mqabbel mal-1990. Il-Kunsill Ewropew
ikkonferma mill-ġdid il-mira tal-UE ta’ tnaqqis ta' 80-95 % sal-2050
meta mqabbel mal-1990 fil-kuntest tat-tnaqqis meħtieġ
mill-pajjiżi żviluppati bħala grupp. Politiki attwali jwasslu biss għal
tnaqqis tal-emissjonijiet ta' gassijiet serra ("GHG") ta' madwar
40 % sal-2050. Il-"Pjan direzzjonali għal ekonomija
kompetittiva b’livell baxx ta’ emissjonijiet tal-karbonju fl-2050"[1] tal-Kummissjoni
jistabbilixxi kif tista' tintlaħaq il-mira għall-2050 li jitnaqqsu
l-emissjonijiet domestiċi bi 80% bl-aktar mod kosteffikaċi. Il-Pjan
Direzzjonali juri li kull settur tal-ekonomija għandu jikkontribwixxi u,
skont ix-xenarju, meta mqabbel mal-1990 l-emissjonijiet tat-trasport
għandhom ikunu bejn +20 u -9 % sal-2030 u jonqsu b'54 % sa
67 % sal-2050[2]. Filwaqt li emissjonijiet minn setturi
oħra qiegħdin ġeneralment jonqsu, it-trasport stradali huwa
wieħed mill-ftit setturi fejn l-emissjonijiet żdiedu rapidament: bejn
l-1990 u l-2008 l-emissjonijiet mit-trasport stradali żdiedu b 26 %.
Fl-2008 madwar 70 % tal-emissjonijiet ta' CO2 tat-trasport
ġie mit-trasport stradali[3].
Bħala riżultat, dan huwa t-tieni l-ikbar sors ta’ emissjonijiet ta'
GHG fl-UE, u jikkontribwixxi madwar għoxrin fil-mija tal-emissjonijiet
totali ta' CO2 tal-UE. F'Marzu 2011 il-Kummissjoni adottat "Pjan
direzzjonali għal Żona Unika Ewropea tat-Trasport – Lejn
sistema tat-trasport kompetittiva u li tuża r-riżorsi b’mod
effiċjenti". Dan jistabbilixxi strateġija għat-trasport
f'qafas li jikseb tnaqqis ta’ 60% tal-emissjonijiet ta' GHG mit-trasport
sal-2050. ·
Ir-Regolament Ir-Regolament (UE) Nru 510/2011
jistabbilixxi qafas għat-tnaqqis ta' CO2 mill-flotta ta'
vannijiet ġodda sal-2020. Ir-Regolament għandu operazzjoni
f'żewġ fażijiet. Fl-ewwel perjodu sal-2017 ġew stabbiliti
l-modalitajiet tal-konformità mal-miri. Għat-tieni perjodu sal-2020
il-mira ma tistax ssir effettiva mingħajr l-implimentazzjoni
tal-modalitajiet meħtieġa, li għandhom jiġu determinati
f'analiżi. Il-Kummissjoni hija mitluba tikkonferma li l-mira tal-vannijiet
għall-2020 hija fattibbli. Din il-mira kienet stabbilita bil-proċess
ta’ kodeċiżjoni u, apparti l-konferma tagħha, mhijiex
ikkunsidrata mill-ġdid fl-analiżi. Jekk ma jiġux determinati jew
implimentati l-modalitajiet, dan ikollu effett detrimentali fuq il-manifatturi
tal-vetturi u l-fornituri tal-partijiet li jesiġu ċertezza
fir-rigward tat-teknoloġija u l-vetturi li jinħtieġu biex
tintlaħaq il-mira. Il-modalitajiet huma aspetti
tal-implimentazzjoni li jħallu impatt fuq kif jintlaħqu l-miri
tal-emissjonijiet. Il-modalitajiet ewlenin fir-Regolament attwali jinkludu
l-kurva tal-valuri ta' limitu li hija ddefinita mill-parametru ta’ utilità u
l-funzjoni li tiddeskrivi r-relazzjoni bejn il-parametru ta’ utilità u
l-emissjonijiet ta' CO2 (li tissettja l-forma u l-inklinazzjoni).
Modalitajiet oħra jinkludu l-iskema tal-primjum
għall-eċċess ta’ emissjonijiet, l-ekoinnovazzjonijiet,
id-derogi, il-konsorzji, l-introduzzjoni gradwali tal-miri u l-għoti ta'
super krediti għal perjodu ta' żmien limitat. 2. Konsultazzjonijiet
mal-partijiet interessati u valutazzjonijiet tal-impatt Konsultazzjonijiet mal-partijiet interessati ·
Kompetenza esterna Studju estern[4]
"Appoġġ għar-reviżjoni tar-Regolament (UE) 510/2011
dwar l-emissjonijiet ta' CO2 minn vetturi kummerċjali
ħfief"[5]
ipprovda l-analiżi ewlenija li ssejjes din il-proposta. Jinkludi
evalwazzjoni tal-modalitajiet differenti u jivvaluta l-ispejjeż
tagħhom. Il-mudell PRIMES-TREMOVE ntuża biex jiġu vvalutati
l-impatti globali tal-mira għall-2020. ·
Konsultazzjoni mal-partijiet interessati Il-partijiet interessati kienu formalment
ikkonsultati permezz ta’ kwestjonarju onlajn u permezz ta' laqgħa
għall-partijiet interessati. Tqiesu l-kontributi mill-partijiet
interessati fil-valutazzjoni tal-opzjonijiet differenti possibbli biex
jiġu rregolati l-emissjonijiet ta' CO2 minn vetturi ħfief
(light-duty vehicles - LDVs). –
Konsultazzjoni pubblika Fil-ħarifa tal-2011 twettqet
konsultazzjoni pubblika onlajn. Kumplessivament, it-tweġibiet jagħtu
messaġġ li r-regolamentazzjoni tal-emissjonijiet mil-LDVs hija
importanti, għandha titwettaq skont miri fit-tul għall-GHG, tkun
ibbażata fuq l-emissjonijiet medji ta' vetturi ġodda u tkun newtrali
mil-lat tat-teknoloġija. Kien hemm diversi opinjonijiet differenti dwar
jekk il-leġiżlazzjoni attwali hijiex qed taħdem sew.
Ir-raġuni prinċipali tidher li hi li bosta jaħsbu li
l-leġiżlazzjoni attwali mhijiex b'saħħitha
biżżejjed. Hemm appoġġ qawwi biex jiġu stabbiliti
l-miri għal wara l-2020, irrispettivament minn miżuri oħra li
jistgħu jiġu implimentati. Ir-riżultati tal-konsultazzjoni
pubblika nġabru fil-qosor u ġew ippubblikati[6]. –
Laqgħa tal-partijiet interessati Fis-6 ta’ Diċembru 2011
saret laqgħa tal-partijiet interessati. Ġew ippreżentati
l-konklużjonijiet preliminari tal-istudju u ġew ippubblikati
l-preżentazzjonijiet mil-laqgħa flimkien ma' sommarju tad-diskussjoni[7]. Il-parteċipanti ma
esprimewx xi nuqqas ta' qbil sostanzjali fir-rigward tal-analiżi ppreżentata;
l-NGOs argumentaw li peress li l-ispejjeż huma inqas milli kien
maħsub preċedentement, u l-emissjonijiet huma sostanzjalment aktar
baxxi milli kien antiċipat, il-miri għandhom ikunu aktar stretti. Il-valutazzjoni tal-impatt Tħejjiet valutazzjoni konġunta
tal-impatt li tappoġġa l-proposta attwali u proposta ekwivalenti biex
jiġi emendat ir-Regolament (KE) Nru 443/2009. Ittieħed
approċċ wiesa’ sabiex jiġu identifikati opzjonijiet ta' politika
li jkopru kwistjonijiet li tqajmu fil-leġiżlazzjoni, dawk li
jirriżultaw mill-implimentazzjoni u dawk ivvalutati fl-istudji li
janalizzaw l-approċċi possibbli sabiex titjieb l-effettività
tal-leġiżlazzjoni. Ġew analizzati l-aspetti li ġejjin: a) L-opzjoni li ma jsir xejn; b) Konferma tal-fattibbiltà tal-mira
għall-2020 għall-vannijiet; c) Modalitajiet biex jintlaħqu l-miri
għall-vannijiet; d) Simplifikazzjoni u tnaqqis tal-piż
amministrattiv: e) Adattament għaċ-ċiklu
ġdid ta' testjar f) Għamla u restrizzjonijiet
tal-leġiżlazzjoni għal wara l-2020. Abbażi tal-analiżi tal-impatti
ekonomiċi, ambjentali u soċjali ta' modalitajiet differenti,
il-valutazzjoni tal-impatt waslet għall-konklużjonijiet li
ġejjin: ·
Il-mira għall-2020 ta' 147 g/km
għall-vannijiet hija kkonfermata bħala fattibbli bi spiża aktar
baxxa. ·
Il-parametru ta' utilità għandu jkompli jkun
il-massa; il-kurva tal-valuri ta' limitu għandha tkompli tkun lineari u
l-inklinazzjoni tal-kurva għandha tkun issettjata fuq 100%. ·
Primjum għall-Eċċess ta'
Emissjonijiet għandu jinżamm għal EUR 95 għal kull
g/km għal kull vettura. ·
Il-proċedura ta' deroga għandha tiġi
ssimplifikata bl-introduzzjoni ta' esklużjoni "de-minimis"
għall-iżgħar manifatturi mill-obbligu li jkollhom il-mira
għas-CO2. Minbarra dan, għandha tiġi permessa aktar
flessibbiltà fir-rigward tad-data tal-għoti tad-derogi għal volumi
żgħar. 3. ELEMENTI LEGALI TAL-PROPOSTA L-UE diġà aġixxiet f’dan il-qasam
meta adottat ir-Regolament (UE) 510/2011 ibbażat fuq il-kapitolu dwar
l-ambjent tat-Trattat. Is-suq uniku wkoll jipprovdi ġustifikazzjonijiet
biex issir azzjoni fil-livell tal-UE minflok fil-livell tal-Istati Membri
sabiex jiġu żgurati rekwiżiti komuni madwar l-UE u b'hekk
jiġu minimizzati l-ispejjeż tal-manifatturi. L-adozzjoni tal-proposta mhix se twassal
għar-revoka ta' leġiżlazzjoni eżistenti. Sommarju tal-azzjoni proposta Il-proposta tikkonferma l-fattibbiltà tal-mira
medja ta’ 147 g CO2/km għal vetturi kummerċjali
ħfief ġodda li għandha tintlaħaq fl-2020. Tipproponi li
tiddefinixxi l-modalitajiet biex tintlaħaq il-mira kif ġej: –
Il-parametru ta' utilità jkompli jkun il-massa
tal-vettura fi stat ta' tħaddim. –
Il-kurva tal-valuri ta' limitu tibqa' lineari
b’inklinazzjoni ta’ 100% meta mqabbla mal-bażi ta' referenza tal-flotta. –
Il-manifatturi responsabbli għal inqas minn 500 reġistrazzjoni
ta’ vetturi kummerċjali ħfief ġodda fis-sena huma esklużi
mill-obbligu li jissodisfaw il-mira speċifika għall-emissjonijiet. –
Aktar flessibbiltà hija permessa
fl-għażla taż-żmien tad-deċiżjonijiet
għall-għoti ta' derogi għal volumi żgħar. –
Jinżammu l-ekoinnovazzjonijiet meta tiġi
implimentata proċedura riveduta ta' testjar. –
Il-Primjum għall-Eċċess ta'
Emissjonijiet jinżamm għal EUR 95 għal kull g/km għal
kull vettura. Hekk kif l-industrija tibbenefika minn
indikazzjonijiet tas-sistema regolatorja li tkun tapplika wara l-2020,
il-proposta tinkludi analiżi ulterjuri li għanda sseħħ sa
mhux aktar tard mill-31 ta' Diċembru 2014. 4. IMPLIKAZZJONI BAĠITARJA Il-proposta ma tesiġix riżorsi
finanzjarji addizzjonali. 5. ELEMENTI FAKULTATTIVI ·
Analiżi/reviżjoni/klawżola sunset Il-proposta tinkludi klawżola ta'
analiżi. ·
Iż-Żona Ekonomika Ewropea L-att propost jikkonċerna kwistjoni
taż-ŻEE u għalhekk għandu jkun estiż
għaż-Żona Ekonomika Ewropea. 2012/0191 (COD) Proposta għal REGOLAMENT TAL-PARLAMENT EWROPEW U
TAL-KUNSILL li jemenda r-Regolament (UE)
Nru 510/2011 bl-għan li jiġu ddefiniti l-modalitajiet biex
tintlaħaq il-mira għall-2020 li jitnaqqsu l-emissjonijiet ta' CO2
minn vetturi kummerċjali ħfief ġodda (Test b’rilevanza għaż-ŻEE) IL-PARLAMENT EWROPEW U L-KUNSILL
TAL-UNJONI EWROPEA, Wara li kkunsidraw it-Trattat dwar
il-Funzjonament tal-Unjoni Ewropea, u b’mod partikolari l-Artikolu 192(1)
tiegħu, Wara li kkunsidraw il-proposta tal-Kummissjoni
Ewropea, Wara t-trażmissjoni tal-abbozz tal-att
leġiżlattiv lill-Parlamenti nazzjonali, Wara li kkunsidraw l-opinjoni tal-Kumitat
Ekonomiku u Soċjali Ewropew ([8]) Wara li kkunsidraw l-opinjoni tal-Kumitat
tar-Reġjuni ([9]),
Filwaqt li jaġixxu skont
il-proċedura leġiżlattiva ordinarja, Billi: (1) L-Artikolu 13(1)
tar-Regolament (UE) Nru 510/2011 tal-Parlament Ewropew u tal-Kunsill
tal-11 ta’ Mejju 2011 li jistabbilixxi standards ta’ rendiment
fir-rigward tal-emissjonijiet tal-vetturi kummerċjali ħfief
ġodda bħala parti mill-approċċ integrat tal-Unjoni biex
jitnaqqsu l-emissjonijiet tas-CO2 minn vetturi ħfief[10] jitlob lill-Kummissjoni,
soġġett għall-konferma tal-fattibbiltà tagħha, li tirrevedi
l-modalitajiet biex tintlaħaq il-mira ta' 147g/km sal-2020, inklużi
l-formoli fl-Anness I u d-derogi fl-Artikolu 11. Qed jintalab li
l-proposta li temenda r-Regolament tkun kemm jista' jkun newtrali mil-lat
tal-kompetizzjoni, soċjalment ġusta u sostenibbli. (2) Huwa xieraq li jiġi
ċċarat li għall-fini tal-verifika tal-konformità mal-mira ta'
147gCO2/km, l-emissjonijiet ta' CO2 għandhom ikomplu
jitkejlu skont ir-Regolament (KE) Nru 715/2007 tal-Parlament Ewropew u
tal-Kunsill tal-20 ta’ Ġunju 2007 dwar l-approvazzjoni
tat-tip ta’ vetturi bil-mutur fir-rigward tal-emissjonijiet ta’ vetturi
ħfief għall-passiġġieri u ta’ vetturi kummerċjali
(Euro 5 u Euro 6) u dwar l-aċċess għal informazzjoni
dwar it-tiswija u l-manutenzjoni tal-vetturi[11]
u l-miżuri implimentattivi tiegħu u t-teknoloġiji innovattivi. (3) Skont l-analiżi teknika
mwettqa għall-valutazzjoni tal-impatt, it-teknoloġiji biex
tintlaħaq il-mira ta' 147 g CO2/km huma disponibbli u
t-tnaqqis meħtieġ jista' jinkiseb bi spiża iżgħar
milli kienet stmata fl-analiżi preċedenti mwettqa qabel l-adozzjoni
tar-Regolament (UE) Nru 510/2011. Minbarra dan, naqas ukoll id-distakk bejn
l-emissjonijiet speċifiċi medji attwali ta' CO2 minn
vetturi kummerċjali ħfief ġodda u l-mira. Għalhekk,
il-fattibbiltà tal-mira ta' 147 g CO2/km li għandha
tintlaħaq sal-2020 hija kkonfermata. (4) B’rikonoxximent tal-impatti
sproporzjonati fuq l-iżgħar manifatturi li jirriżultaw minn
konformità ma' miri speċifiċi għall-emissjonijiet iddefiniti
abbażi tal-utilità tal-vettura, mill-piż amministrattiv kbir
tal-proċedura tad-deroga u vantaġġ li huwa biss marġinali
f’termini ta’ tnaqqis ta' CO2 mill-vetturi li jinbiegħu minn
dawn il-manifatturi, il-produtturi responsabbli annwalment għal inqas minn
500 vettura kummerċjali ħafifa ġdida huma esklużi
mill-kamp ta' applikazzjoni tal-mira speċifika għall-emissjonijiet u
l-primjum għal eċċess ta' emissjonijiet (5) Il-proċedura biex
tingħata deroga għall-manifatturi ta’ volumi żgħar
għandha tkun issimplifikata biex titħalla aktar flessibbiltà
f'termini tal-għażla ta' żmien tal-applikazzjoni għal
deroga mill-manifatturi u d-deċiżjoni biex din tingħata mill-Kummissjoni. (6) Sabiex l-industrija
tal-karozzi tkun tista' twettaq investimenti u innovazzjoni fit-tul ikun tajjeb
li jiġu pprovduti indikazzjonijiet ta' kif dan ir-Regolament għandu
jiġi emendat għall-perjodu ta' wara l-2020. Dawn l-indikazzjonijiet
għandhom ikunu bbażati fuq valutazzjoni tar-rata meħtieġa
ta’ tnaqqis skont il-miri tal-Unjoni fit-tul għall-klima u
l-implikazzjonijiet għall-iżvilupp ta' teknoloġija
kosteffikaċi li tnaqqas is-CO2 għall-karozzi.
Għalhekk ikun tajjeb li jiġu riveduti dawn l-aspetti, li
l-Kummissjoni tagħmel rapport u, jekk xieraq, li jsiru proposti
għall-miri ta' wara l-2020. (7) L-Artikolu 13(3)
jesiġi li l-Kummissjoni tippubblika rapport dwar id-disponibbiltà ta'
dejta dwar l-impronta u t-tagħbija utli u l-użu tagħhom
bħala parametri ta' utilità fil-formoli fl-Anness I. Billi din
id-dejta hija disponibbli u l-użu potenzjali tagħha ġie vvalutat
fil-valutazzjoni tal-impatt, ġie konkluż li huwa aktar
kosteffikaċi li tinżamm il-massa waqt l-istat ta' tħaddim
bħala l-parametru ta' utilità għall-mira għall-2020 tal-vetturi
kummerċjali ħfief. (8) Huwa xieraq li jinżamm
l-approċċ fir-rigward tal-issettjar tal-mira bbażata fuq
relazzjoni lineari bejn l-utilità tal-vettura kummerċjali ħafifa u
l-mira tagħha għall-emissjonijiet ta' CO2 kif espress
permezz tal-formoli fl-Anness I, billi dan jippermetti li tinżamm
id-diversità tas-suq tal-vetturi kummerċjali ħfief u l-abbiltà
tal-produtturi li jindirizzaw il-ħtiġijiet differenti
tal-konsumaturi, u b’hekk tiġi evitata kwalunkwe distorsjoni mhux
ġustifikata fil-kompetizzjoni. Madankollu huwa xieraq li jiġi
aġġornat dan l-approċċ biex tiġi riflessa
l-aħħar dejta disponibbli dwar ir-reġistrazzjonijiet ta’ vetturi
kummerċjali ħfief ġodda. (9) Il-Kummissjoni vvalutat
id-disponibbiltà ta' dejta dwar l-impronta u l-użu tagħha bħala
parametru ta’ utilità fil-formoli fl-Anness I. Din id-dejta hija
disponibbli u l-użu potenzjali tagħha ġie vvalutat
fil-valutazzjoni tal-impatt, abbażi ta' dik il-valutazzjoni ġie
konkluż li l-parametru ta' utilità użat fil-formola għall-2020
għandu jkun il-massa. (10) Ir-Regolament jesiġi li
l-Kummissjoni twettaq valutazzjoni tal-impatt sabiex tirrevedi l-proċeduri
ta' ttestjar biex tirrefletti b’mod adegwat ir-rendiment reali
tal-emissjonijiet ta' CO2 tal-karozzi. Din il-ħidma qed
tipproċedi permezz tal-iżvilupp ta’ proċedura ta' test dinji
għall-vetturi ħfief (World Light Duty Test) fil-qafas tal-Kummissjoni
Ekonomika għall-Ewropa tan-Nazzjonijiet Uniti iżda din għadha
mhijiex kompluta. Fid-dawl ta' dan, l-Anness I tar-Regolament (KE) Nru 443/2009
jistabbilixxi limiti tal-emissjonijiet għall-2020 kif imkejla skont
ir-Regolament (KE) Nru 715/2007 u l-Anness XII tar-Regolament (KE)
Nru 692/2008. Meta jiġu emendati l-proċeduri ta' testjar,
il-limiti stabbiliti fl-Anness I għandhom jiġu
aġġustati biex jiżguraw restrizzjonijiet komparabbli
għall-manifatturi u l-klassijiet tal-vetturi. (11) Għaldaqstant,
ir-Regolament (UE) Nru 510/2011 għandu jiġi emendat skont dan, ADOTTAW DAN IR-REGOLAMENT: Artikolu 1
Ir-Regolament (UE)
Nru 510/2011 huwa emendat kif ġej: (1)
Fl-Artikolu 1, il-paragrafu 2 jinbidel
b’dan li ġej: ‘2. Mis-sena 2020, dan ir-Regolament
jistabbilixxi mira ta’ 147 g CO2/km
għall-emissjonijiet medji ta’ vetturi kummerċjali ħfief
ġodda rreġistrati fl-Unjoni kif imkejla skont ir-Regolament (KE)
Nru 715/2007 u l-miżuri implimentattivi tiegħu, u
teknoloġiji innovattivi. (2)
Fl-Artikolu 2, għandu jiżdied
il-paragrafu 4 li ġej: ‘4. L-Artikolu 4,
l-Artikolu 8(4)(b) u (c), l-Artikolu 9 u l-Artikolu 10(1)(a) u
(c) ma għandhomx japplikaw għal manifattur li jkun responsabbli,
flimkien mal-impriżi kollha assoċjati tiegħu, għal inqas
minn 500 vettura kummerċjali ħafifa ġdida rreġistrati
fl-UE fis-sena kalendarja preċedenti.” (3)
Fl-Artikolu 11(3), titħassar
l-aħħar sentenza. (4)
L-Artikolu 13 huwa emendat kif ġej: (a)
Il-paragrafu 1 jinbidel b’dan li ġej: “Sal-31 ta’ Diċembru 2014,
il-Kummissjoni għandha tirrevedi l-miri speċifiċi
għall-emissjonijiet, il-modalitajiet u aspetti oħra ta' dan
ir-Regolament sabiex tistabbilixxi il-miri għall-emissjonijiet ta' CO2
għal vetturi kummerċjali ħfief ġodda għall-perjodu ta'
wara l-2020.” (b)
Il-paragrafu 6 huwa emendat kif ġej: –
jitħassar it-tieni subparagrafu: –
it-tielet subparagrafu jinbidel b'dan li ġej: "Sabiex tiġi riflessa kwalunkwe bidla
fil-proċedura regolatorja ta' testjar għall-kejl ta' emissjonijiet
speċifiċi ta' CO2, il-Kummissjoni għandha tadatta
l-formoli stabbiliti fl-Anness I permezz ta' atti ddelegati skont
l-Artikolu 15, u soġġetti għall-kundizzjonijiet stabbiliti
fl-Artikoli 16 u 17 filwaqt li jiġi żgurat li r-rekwiżiti
għat-tnaqqis ta’ restrizzjoni komparabbli għall-manifatturi u vetturi
ta' utilità differenti jkunu meħtieġa taħt il-proċeduri ta'
testjar il-qodma u l-ġodda." (5)
Fil-punt 1 tal-Anness I, jiżdied
il-punt (c) li ġej: ‘(c) mill-2020: Emissjonijiet speċifiċi indikattivi ta’
CO2 = 147 + a × (M – M0) Fejn: M = il-massa tal-vettura f’kilogrammi (kg) M0 = il-valur adottat skont
l-Artikolu 13(2) a = 0,096." Artikolu 2
Dan ir-Regolament għandu jidħol
fis-seħħ fit-tielet jum wara l-pubblikazzjoni tiegħu f'Il-Ġurnal
Uffiċjali tal-Unjoni Ewropea. Dan ir-Regolament għandu jorbot
fl-intier tiegħu u japplika direttament fl-Istati Membri kollha. Magħmul fi Brussell, Għall-Parlament Ewropew Għall-Kunsill Il-President Il-President [1] COM/2011/0112 finali [2] Esklużi l-emissjonijiet
marittimi internazzjonali [3] It-trasport tal-UE f'ċifri 2011,
il-Kummissjoni Ewropea [4] Taħt il-kuntratt qafas ENV.C.3/FRA/2009/0043 dwar
l-emissjonijiet tal-vetturi [5] http://ec.europa.eu/clima/policies/transport/vehicles/vans/studies_en.htm [6] http://ec.europa.eu/clima/consultations/0012/index_en.htm [7] http://ec.europa.eu/clima/events/0048/index_en.htm [8] ĠU C , , p. . [9] ĠU C , , p. . [10] ĠU L 145, 31.5.2011, p. 1. [11] ĠU L 171, 29.6.2007, p.1.