MEMORANDUM TA’ SPJEGAZZJONI

1.           KUNTEST TAL-PROPOSTA

Ir-Regolament tal-Kunsill (UE) Nru 44/2012[1] jiffissa għall-2012 l-opportunitajiet tas-sajd disponibbli fl-ilmijiet tal-UE u, għall-bastimenti tal-UE, f’ċerti ilmijiet mhux tal-UE għal ċerti stokkijiet ta’ ħut u gruppi ta’ stokkijiet tal-ħut li huma suġġetti għal negozjati jew ftehimiet internazzjonali. Normalment l-opportunitajiet tas-sajd jiġu emendati diversi drabi waqt il-perjodu li matulu jkunu fis-seħħ.

2.           RIŻULTATI TAL-KONSULTAZZJONIJIET MAL-PARTIJIET INTERESSATI U L-VALUTAZZJONIJIET TAL-IMPATT

Mhux applikabbli.

3.           ELEMENTI LEGALI TAL-PROPOSTA

L-emendi proposti għandhom l-għan li jimmodifikaw ir-Regolament imsemmi hawn fuq, kif ġej:

Capelin fl-ilmijiet tal-Groenlandja

Skont l-Artikolu 5(3) tar-Regolament tal-Kunsill (KE) Nru 44/2012, il-Kummissjoni għandha tiffissa l-kwota tal-Unjoni għall-capelin fl-ilmijiet tal-Groenlandja taż-żoni ICES V u XIV. Skont dan l-Artikolu, abbażi tal-allokazzjoni stabbilita mill-Groenlandja, u skont il-Ftehim ta’ Sħubija dwar is-Sajd (FPA) bejn il-Komunità Ewropea min-naħa waħda, u l-Gvern tad-Danimarka u l-Gvern Awtonomu tal-Groenlandja min-naħa l-oħra, u l-Protokoll tiegħu, l-Unjoni għandha tirċievi 7.7 % tat-TAC għall-capelin fl-ilmijiet tal-Groenlandja taż-żoni ICES V u XIV. Il-Kummissjoni rċeviet informazzjoni mill-awtoritajiet tal-Groenlandja li l-Groenlandja se talloka pm tunnellati lill-Unjoni f’konformità mas-sehem iffissat skont il-Protokoll, li għandu jiġi mistad sat-30 ta’ April 2013.

Meta r-Regolament (UE) Nru 44/2012 kien adottat fis-17 ta’ Jannar 2012, il-Kummissjoni għamlet dikjarazzjoni dwar il-capelin maqbud fl-ilmijiet tal-Groenlandja taż-żoni V u XIV fejn impenjat ruħha li tidħol f'diskussjonijiet mal-Istati Membri dwar il-possibbiltà li talloka bejniethom l-opportunitajiet tas-sajd tal-capelin offruti mill-Groenlandja, fil-kuntest tal-FPA bejn l-UE u l-Groenlandja u l-Protokoll imsemmi hawn fuq.

Meta jitqies li ma kien hemm l-ebda sajd immirat għall-capelin minn kwalunkwe bastiment tal-UE taħt il-Ftehim ta’ Sħubija dwar is-Sajd mal-Groenlandja bejn l-2004 u l-2010, u li fl-2011 kien hemm sajd mhux allokat mid-Danimarka waħidha, il-Kummissjoni tipproponi li tuża s-snin 1998-2003 bħala l-perjodu ta' referenza biex tistabbilixxi l-allokazzjoni bejn l-Istati Membri.

Fl-aħħar nett, wara kunsiderazzjoni tal-konsultazzjonijiet annwali dwar is-sajd bejn l-Unjoni Ewropea u n-Norveġja għall-2012 u b’mod partikolari lejn l-impenn magħmul mill-Unjoni Ewropea biex tipprovdi lin-Norveġja bi kwantità addizzjonali ta’ 20 000 tunnellata ta' capelin aktar mill-bilanċ normali malli l-capelin isir disponibbli fl-ilmijiet tal-Groenlandja, huwa xieraq li tipprovdi għal dan l-ammont mill-kwota tal-Unjoni ta’ pm tunnellati msemmija hawn fuq.

2012/0187 (NLE)

Proposta għal

REGOLAMENT TAL-KUNSILL

li jemenda r-Regolament (UE) Nru 44/2012 rigward il-limiti tal-qbid għall-capelin fl-ilmijiet tal-Groenlandja

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 43(3) tiegħu,

Wara li kkunsidra l-proposta mill-Kummissjoni Ewropea[2],

Billi:

(1)       Il-Ftehim ta’ Sħubija dwar is-Sajd bejn il-Komunità Ewropea min-naħa waħda, u l-Gvern tad-Danimarka u l-Gvern Awtonomu tal-Groenlandja min-naħa l-oħra[3], u l-Protokoll tiegħu[4], jipprovdi li l-Unjoni għandha tirċievi 7,7 % tat-total tal-qabdiet disponibbli (TAC) għall-capelin fl-ilmijiet tal-Groenlandja taż-żoni ICES V u XIV.

(2)       Ir-Regolament tal-Kunsill (UE) Nru 44/2012[5] iffissa għall-perjodu mill-1 ta’ Jannar sat-30 ta' April 2012 kwota provviżorja tal-Unjoni għall-istokk tal-capelin f’dawk l-ilmijiet tal-Groenlandja, mingħajr allokazzjonijiet speċifiċi għall-Istati Membri.

(3)       Fil-… l-Unjoni rċeviet informazzjoni mill-awtoritajiet tal-Groenlandja li t-TAC għall-capelin fl-ilmijiet tal-Groenlandja fis-subżoni tal-ICES V u XIV ġew stabbiliti għal … tunnellata għall-perjodu mill-1 ta’ Mejju 2012 sat-30 ta' April 2013. Il-kwota rilevanti tal-Unjoni għal dak il-perjodu għandha għalhekk tkun iffissata għal pm tunnellati.

(4)       Fil-qafas tal-konsultazzjonijiet annwali dwar is-sajd bejn l-Unjoni u n-Norveġja, l-Unjoni ħadet l-impenn li tipprovdi lin-Norveġja bi kwantità addizzjonali ta’ 20 000 tunnellata ta' capelin fl-ilmijiet tal-Groenlandja taż-żoni ICES V u XIV għall-2012. Huwa xieraq li dak l-ammont jiġi allokat mill-kwota disponibbli tal-Unjoni f’dawk l-ilmijiet.

(5)       Barra minn hekk jixraq li l-kwota tal-Unjoni tiġi allokata fost l-Istati Membri. B’konsiderazzjoni tal-fatt li l-bastimenti tal-Unjoni ma wettqux attivitajiet tas-sajd immirati lejn capelin taħt il-Ftehim ta’ Sħubija dwar is-Sajd mal-Groenlandja bejn l-2004 u l-2010, u li fl-2011 Stat Membru wieħed biss għamel użu mill-kwota mhux allokata tal-Unjoni, il-perjodu ta’ referenza għall-allokazzjoni tal-kwota tal-Unjoni bejn l-Istati Membri għandu jkun is-snin 1998-2003.

(6)       L-allokazzjoni tal-kwota tal-Unjoni fost l-Istati Membri tmur lil hinn mis-setgħat ta’ implimentazzjoni mogħtija lill-Kummissjoni permezz tal-Artikolu 5(3) tar-Regolament (UE) Nru 44/2012. Sabiex jiġi evitat it-tixrid ta’ provvisti bejn l-atti tal-Kummissjoni u tal-Kunsill, dan ir-Regolament għandu jistabbilixxi kemm il-kwota tal-Unjoni kif ukoll l-allokazzjoni tagħha bejn l-Istati Membri.

(7)       Il-limiti tal-qbid tal-capelin pprovduti permezz ta’ dan ir-Regolament għandhom japplikaw mill-1 ta’ Mejju 2012. Tali applikazzjoni retroattiva ma tippreġudikax il-prinċipju taċ-ċertezza legali u l-protezzjoni ta’ aspettattivi leġittimi peress li l-opportunitajiet tas-sajd ikkonċernati għadhom ma ġewx eżawriti. Billi l-limiti tal-qbid jinfluwenzaw l-attivitajiet ekonomiċi u l-ippjanar tal-istaġun tas-sajd tal-bastimenti tal-Unjoni, dan ir-Reglament għandu jidħol fis-seħħ immedjatament wara l-pubblikazzjoni tiegħu.

(8)       Ir-Regolament (UE) Nru 44/2012 għandu jiġi emendat kif meħtieġ,

ADOTTA DAN IR-REGOLAMENT:

Artikolu 1 Emendi għar-Regolament (UE) Nru 44/2012

L-Anness IB tar-Regolament (UE) Nru 44/2012 huwa emendat skont l-Anness ta’ dan ir-Regolament.

Artikolu 2 Dħul fis-seħħ

Dan ir-Regolament għandu jidħol fis-seħħ l-għada tal-jum tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Għandu jibda japplika mill-1 ta’ Mejju 2012.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

                                                                       Għall-Kunsill

                                                                       Il-President

ANNESS

Fl-Anness IB tar-Regolament (UE) Nru 44/2012, l-entrata dwar il-capelin fl-ilmijiet tal-Groenlandja taż-żoni V u XIV għandha tinbidel b’dan li ġej:

"Speċi: || Capelin Mallotus villosus || Żona: || l-ilmijiet tal-Groenlandja taż-żoni V u XIV (CAP/514GRN)

Id-Danimarka || pm || ||

Ir-Renju Unit || pm ||

L-Isvezja || pm ||

Il-Ġermanja || pm ||

L-Istati Membri kollha || pm || (1) (2)

L-UE || pm || (3) (4) ||

TAC || Mhux rilevanti || ||

(1) Ħlief Stati Membri b’iktar minn 10 % tal-kwota tal-Unjoni (2) L-Istati Membri bi kwota assenjata jistgħu jaċċessaw il-kwota tal-"Istati Membri kollha" biss meta jkunu eżawrew il-kwota tagħhom stess. (3) Li minnhom 20 000 tunnellata huma allokati lin-Norveġja. (4) Għandhom jiġu mistada sat-30 ta’ April 2013, permezz ta’ deroga mill-Artikolu 1(2)(a) ta’ dan ir-Regolament."

[1]               Ir-Regolament tal-Kunsill (UE) Nru 44/2012 tas-17 ta’ Jannar 2012 li jiffissa għall-2012 l-opportunitajiet tas-sajd disponibbli fl-ilmijiet tal-UE u, għall-bastimenti tal-UE, f’ċerti ilmijiet mhux tal-UE għal ċerti stokkijiet tal-ħut li huma suġġetti għal negozjati jew ftehimiet internazzjonali (ĠU L 25, 27.1.2012, p. 55-147).

[2]               [ĠU Ref]

[3]               ĠU L 172, 30.6.2007, p. 4.

[4]               ĠU L 172, 30.6.2007, p. 9.

[5]               ĠU L 25, 27.1.2012, p. 55.