MEMORANDUM TA’ SPJEGAZZJONI

1.           KUNTEST TAL-PROPOSTA

L-Artikolu 17(2), l-ewwel subparagrafu, tar-Regolament tal-Kunsill (KE) Nru 2371/2002 dwar il-konservazzjoni u l-isfruttar sostenibbli tar-riżorsi tas-sajd skont il-Politika Komuni dwar is-Sajd[1] jistipula deroga għaż-żona ta’ 12-il mil nawtiku ta' Stati Membri (ilmijiet territorjali) mir-regola tal-aċċess ugwali ġenerali għal bastimenti tas-sajd tal-Unjoni għall-ilmijiet u r-riżorsi tal-Unjoni stabbiliti fl-Artikolu 17(1) ta' dak ir-Regolament, li tawtorizza lill-Istati Membri biex jirrestrinġu l-aċċess għal ċerti bastimenti f’dik iż-żona. Ir-restrizzjonijiet tal-aċċess imqiegħda mill-Istati Membri fuq il-bażi ta’ dik id-deroga naqqsu l-pressjoni tas-sajd fl-aktar żoni bijoloġikament sensittivi u kkontribwixxew għalll-istabbiltà ekonomika għal attivitajiet kostali, fuq skala żgħira.

Id-deroga hija fis-seħħ mill-1 ta’ Jannar 2003 sal-31 ta’ Diċembru 2012. Il-kontinwazzjoni tar-reġim ta’ aċċess ta’ 12-il mil nawtiku hija prevista fl-Artikolu 6(2) tal-proposta għal Regolament ġdid għall-Politika Komuni tas-Sajd[2]. Fil-każ li r-riforma tal-PKS ma tkunx konkluża sa tmiem l-2012, huwa neċessarju li tiġi estiża l-validità tar-reġim ta’ aċċess ta' 12-il mil nawtiku b’limitu taż-żmien sad-dħul fis-seħħ tar-Regolament il-ġdid tal-Parlament Ewropew u tal-Kunsill dwar il-Politika Komuni tas-Sajd, biex ikun żgurat li l-attivitajiet tas-sajd jistgħu jkomplu mingħajr interruzzjoni mill-1 ta' Jannar 2013.

Skont l-Artikolu 17(2), it-tieni subparagrafu, tar-Regolament (KE) Nru 2371/2002, il-Kummissjoni ppreżentat rapport lill-Parlament Ewropew u lill-Kunsill dwar l-arranġamenti rigward l-aċċess għar-riżorsi fiż-żoni ta’ 12-il mil nawtiku ta' Stati Membri[3]. Huwa nnotat fir-rapport li r-reġim ta’ aċċess huwa stabbli ħafna u kompla jopera b’mod sodisfaċenti mill-2002 ’il hawn.

2.           RIŻULTATI TAL-KONSULTAZZJONIJIET MAL-PARTIJIET INTERESSATI U L-VALUTAZZJONIJIET TAL-IMPATT

Il-proposta tikkonċerna l-estensjoni limitata fiż-żmien tal-validità ta’ reġim ta’ aċċess eżistenti, stabbilit attwalment fl-Artikolu 17(2) tar-Regolament (KE) Nru 2371/2002. L-estensjoni tar-reġim ta’ aċċess, sal-31 ta' Diċembru 2022, hija inkluża fl-Artikolu 6(2) tal-proposta għal Regolament ġdid dwar il-Politika Komuni tas-Sajd, li kienet koperta minn Valutazzjoni tal-Impatt [SEC (2011)891]. Għalhekk ma kienx hemm bżonn ta’ konsultazzjoni ma’ partijiet interessati jew għal valutazzjoni tal-impatt ġdida.

3.           ELEMENTI LEGALI TAL-PROPOSTA

· Sommarju tal-azzjoni proposta

L-għan prinċipali hu li jiġi evitat il-waqfien tar-reġim ta’ aċċess speċifiku stabbilit fl-Artikolu 17(2) tar-Regolament (KE) Nru 2371/2002, fil-każ li sal-31 ta' Diċembru 2012 il-proposta għal Regolament tal-Parlament Ewropew u tal-Kunsill dwar il-Politika Komuni tas-Sajd tkun għadha ma ġietx adottata u daħlet fis-seħħ.

· Bażi legali

L-Artikolu 43(2) tat-Trattat dwar il-Funzjonament tal-Unjoni Ewropea.

· Prinċipju tas-sussidjarjetà

Il-proposta taqa’ fil-kompetenza esklussiva tal-Unjoni Ewropea.

· Prinċipju tal-proporzjonalità

Peress li din il-proposta tinkludi estensjoni limitata fiż-żmien tal-validità ta’ miżura li diġà teżisti fir-Regolament (KE) Nru 2371/2002, ma jirriżulta l-ebda tħassib dwar il-prinċipju tal-proporzjonalità.

· Għażla tal-istrument

L-istrument propost: Regolament tal-Parlament Ewropew u tal-Kunsill.

Mezzi oħra ma jkunux xierqa minħabba r-raġuni li ġejja: Regolament irid jiġi emendat b’Regolament.

4.           IMPLIKAZZJONI BAĠITARJA

Din il-miżura ma tinvolvi l-ebda nefqa addizzjonali għall-Unjoni.

2012/0143 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jemenda r-Regolament tal-Kunsill (KE) Nru 2371/2002 dwar il-konservazzjoni u l-isfruttar sostenibbli ta' riżorsi tas-sajd skont il-Politika Komuni dwar is-Sajd

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b'mod partikolari l-Artikolu 43(2) tiegħu,

Wara li kkunsidraw il-proposta li saret mill-Kummissjoni Ewropea,

Wara li l-abbozz tal-att leġiżlattiv intbagħat lill-Parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew[4],

Filwaqt li jaġixxu skont il-proċedura leġiżlattiva ordinarja,

Billi:

(1)          Bastimenti tas-sajd tal-Unjoni għandhom aċċess ugwali għall-ilmijiet u r-riżorsi tal-Unjoni soġġett għar-regoli tal-Politika Komuni tas-Sajd.

(2)          Ir-Regolament tal-Kunsill (KE) Nru 2371/2002 tal-20 ta’ Diċembru 2002 dwar il-konservazzjoni u l-isfruttar sostenibbli ta' riżorsi tas-sajd skont il-Politika Komuni dwar is-Sajd[5] jistipula deroga mir-regola tal-aċċess ugwali, billi jawtorizza lill-Istati Membri biex jirrestrinġu is-sajd għal ċerti bastimenti tas-sajd f'ilmijiet sa 12-il mil nawtiku mil-linji bażi tagħhom.

(3)          Fit-13 ta’ Lulju 2011 il-Kummissjoni ppreżentat rapport lill-Parlament Ewropew u lill-Kunsill, skont ir-Regolament tal-Kunsill (KE) Nru 2371/2002, dwar l-arranġamenti li jikkonċernaw l-aċċess għar-riżorsi tas-sajd fiż-żona ta’ 12-il mil nawtiku[6], li kkonkluda li r-reġim ta’aċċess huwa stabbli ħafna u kompla jopera b’mod sodisfaċenti mill-2002 ’il hawn.

(4)          Ir-regoli eżistenti li jirrestrinġu l-aċċess għar-riżorsi fi ħdan dik iż-żona kienu ta’ benefiċċju għall-konservazzjoni billi rrestrinġew l-isforz tas-sajd fl-aktar parti sensittiva tal-ilmijiet tal-Unjoni. Dawk ir-regoli ppreservaw ukoll l-attivitajiet tradizzjonali tas-sajd li huma importanti għall-iżvilupp soċjali u ekonomiku ta' ċerti komunitajiet kostali.

(5)          Id-deroga daħlet fis-seħħ fl-1 ta’ Jannar 2003 u tiskadi fil-31 ta’ Diċembru 2012. Il-validità tagħha għandha tiġi estiża sakemm issir l-adozzjoni tar-Regolament il-ġdid tal-Parlament Ewropew u tal-Kunsill dwar il-Politika Komuni tas-Sajd[7].

(6)          Għaldaqstant, ir-Regolament (KE) Nru 2371/2002 għandu jiġi emendat skont dan.

ADOTTAW DAN IR-REGOLAMENT:

Artikolu 1

Fl-Artikolu 17(2) tar-Regolament (KEE) Nru 2371/2002, l-ewwel subparagrafu għandu jinbidel b'dan li ġej:

"2. Fl-ilmijiet sa 12-il mil nawtiku mil-linji bażi taħt is-sovranità jew il-ġurisdizzjoni tagħhom, l-Istati Membri għandhom ikunu awtorizzati mill-1 ta’ Jannar 2013 sal-31 ta’ Diċembru 2014 li jirrestrinġu s-sajd għal bastimenti tas-sajd li tradizzjonalment jistadu f'dawk l-ilmijiet minn portijiet fuq il-kosta kontigwa, bla ħsara għall-arranġamenti għal bastimenti tas-sajd tal-Unjoni li jtajru l-bandiera ta' Stati Membri oħra skont relazzjonijiet eżistenti tal-viċinat bejn l-Istati Membri u l-arranġamenti li jinsabu fl-Anness I, li jistabbilixxu għal kull Stat Membru ż-żoni ġeografiċi fi ħdan il-faxex kostali ta' Stati Membri oħra fejn isiru attivitajiet tas-sajd u l-ispeċijiet ikkonċernati.

Artikolu 2

Dan ir-Regolament għandu jidħol fis-seħħ fis-seba’ jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jibda japplika mill-1 ta’ Jannar 2013.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

Għall-Parlament Ewropew                           Għall-Kunsill

Il-President                                                    Il-President

[1]               ĠU L 358, 31.12.2002, p. 59.

[2]               COM(2011)425

[3]               COM (2011)418.

[4]               ĠU C […], […], p. […].

[5]               ĠU L 358, 31.12.2002, p. 59.

[6]               COM (2011)418.

[7]               COM (2011)425.