Proposta għal REGOLAMENT TAL-KUNSILL li jtemm ir-reviżjoni interim parzjali li tikkonċerna l-miżuri kompensatorji dwar l-importazzjonijiet ta' ċertu tereftalat tal-poljetilene (PET) li joriġina mill-Indja /* COM/2012/0237 final - 2012/0121 (NLE) */
MEMORANDUM TA' SPJEGAZZJONI 1. Il-kuntest tal-proposta · Ir-raġunijiet għall-proposta u l-għanijiet tagħha Din il-proposta tikkonċerna l-applikazzjoni
tar-Regolament tal-Kunsill (KE) Nru 597/2009
tat-11 ta' Ġunju 2009 dwar il-protezzjoni kontra l-importazzjonijiet
sussidjati minn pajjiżi li mhumiex membri tal-Komunità Ewropea
("ir-Regolament bażiku") fil-proċediment li
jikkonċerna l-importazzjonijiet ta' ċertu tereftalat tal-poljetilene
(PET) li joriġina, inter alia, mill-Indja. · Il-kuntest ġenerali Din il-proposta qiegħda ssir fil-kuntest
tal-implimentazzjoni tar-Regolament bażiku u hija r-riżultat ta'
investigazzjoni li saret b'konformità mar-rekwiżiti sostantivi u
proċedurali stabbiliti fir-Regolament bażiku. · Id-dispożizzjonijiet eżistenti fil-qasam tal-proposta Hemm fis-seħħ miżuri definittivi li
ġew imposti mir-Regolament tal-Kunsill (KE) Nru 1645/2005
tas-6 ta’ Ottubru 2005 li jemenda r-Regolament (KE)
Nru 2603/2000 li jimponi taxxa kompensatorja definittiva fuq l-importazzjonijiet
ta' ċertu tereftalat tal-poljetilene (PET) li joriġina, inter alia,
mill-Indja. · Il-konsistenza ma’ politiki u għanijiet oħrajn tal-Unjoni Mhux applikabbli. 2. Il-konsultazzjoni
mal-partijiet interessati u l-valutazzjoni tal-impatt · Konsultazzjoni mal-partijiet interessati Il-partijiet interessati milquta
mill-proċediment kellhom il-possibbiltà li jiddefendu l-interessi
tagħhom matul l-investigazzjoni, skont id-dispożizzjonijiet
tar-Regolament bażiku. · Il-ġbir u l-użu ta' għarfien espert Ma kienx hemm bżonn ta’ għarfien espert
estern. · Valutazzjoni tal-impatt Din il-proposta hija r-riżultat
tal-implimentazzjoni tar-Regolament bażiku. Ir-Regolament bażiku ma fihx
dispożizzjonijiet għal valutazzjoni ġenerali tal-impatt
iżda fih lista eżawrjenti ta’ kundizzjonijiet li jeħtieġ li
jiġu vvalutati. 3. ELEMENTI LEGALI TAL-PROPOSTA · Sommarju tal-azzjoni proposta Fit-2 ta' April 2011 il-Kummissjoni
fetħet reviżjoni interim parzjali li tikkonċerna
l-importazzjonijiet ta' ċertu tereftalat tal-poljetilene (PET) li
joriġina inter alia mill-Indja. Il-proposta mehmuża għal Regolament
tal-Kunsill hija bbażata fuq is-sejbiet tal-investigazzjoni mwettqa li
hija limitata għall-ambitu ta' eżami tas-sussidju u sa fejn
għandu x’jaqsam l-applikant. L-investigazzjoni sabet li l-livell ta' sussidju
kien inqas minn tal-aħħar investigazzjoni, iżda li
ċ-ċirkostanzi mibdula li qed iwasslu għal livell imnaqqas
tal-marġni tas-sussidju mhumiex ta' natura dejjiema. Għalhekk huwa propost li l-Kunsill jadotta
l-proposta mehmuża għal Regolament ta' temma li għandu jiġi
ppubblikat mhux aktar tard mill-1 ta’ Lulju 2012. · Bażi ġuridika Ir-Regolament tal-Kunsill (KE) Nru 597/2009
tal-11 ta’ Ġunju 2009 dwar il-protezzjoni kontra
importazzjonijiet sussidjati minn pajjiżi li mhumiex membri tal-Komunità
Ewropea. · Il-prinċipju tas-sussidjarjetà Il-proposta hija fil-kompetenza esklużiva
tal-Unjoni Ewropea. Għaldaqstant il-prinċipju tas-sussidjarjetà ma
japplikax. · Il-prinċipju tal-proporzjonalità Il-proposta hija konformi mal-prinċipju
tal-proporzjonalità għar-raġunijiet li ġejjin: Il-forma tal-azzjoni hija deskritta fir-Regolament
bażiku msemmi hawn fuq u ma tħallix lok għal deċiżjoni
nazzjonali. L-indikazzjoni ta' kif il-piż finanzjarju u
amministrattiv li jaqa' fuq l-Unjoni, fuq il-gvernijiet nazzjonali, fuq
l-awtoritajiet reġjonali u lokali, fuq l-operaturi ekonomiċi u fuq
iċ-ċittadini, jitnaqqas kemm jista' jkun u jkun proporzjonat
mal-għan tal-proposta, mhix applikabbli. · L-għażla tal-istrumenti L-istrument propost: regolament. Mezzi oħrajn ma jkunux xierqa minħabba
li r-Regolament bażiku ma jipprevedix għażliet alternattivi. 4. IMPLIKAZZJONI BAĠITARJA Il-proposta ma fiha ebda implikazzjoni
għall-baġit tal-Unjoni. 2012/0121 (NLE) Proposta għal REGOLAMENT TAL-KUNSILL li jtemm ir-reviżjoni interim parzjali
li tikkonċerna l-miżuri kompensatorji dwar l-importazzjonijiet ta'
ċertu tereftalat tal-poljetilene (PET) li joriġina mill-Indja IL-KUNSILL TAL-UNJONI EWROPEA Wara li kkunsidra t-Trattat dwar
il-Funzjonament tal-Unjoni Ewropea, Wara li kkunsidra r-Regolament tal-Kunsill
(KE) Nru 597/2009 tal-11 ta’ Ġunju 2009 dwar
il-protezzjoni kontra importazzjonijiet sussidjati minn pajjiżi li mhumiex
membri tal-Komunità Ewropea[1]
(“ir-Regolament bażiku”), u b’mod partikolari l-Artikoli 19 u 24
tiegħu, Wara li kkunsidra l-proposta mressqa
mill-Kummissjoni wara konsultazzjoni mal-Kumitat Konsultattiv, Billi: 1. PROĊEDURA 1.1. L-investigazzjoni
preċedenti u l-miżuri kumpensatorji eżistenti (1) Permezz tar-Regolament (KE)
Nru 2603/2000[2],
il-Kunsill impona dazju kumpensatorju definittiv fuq l-importazzjonijiet ta’
tereftalat tal-poljetilene (PET) li joriġina, inter alia, fl-Indja
(“l-investigazzjoni antisussidju oriġinali”). Is-sejbiet u
l-konklużjonijiet definittivi ta' reviżjoni aċċelerata
skont l-Artikolu 20 tar-Regolament bażiku huma stabbiliti fir-Regolament
tal-Kunsill (KE) Nru 1645/2005[3].
Wara reviżjoni ta’ skadenza u permezz tar-Regolament (KE)
Nru 193/2007[4],
il-Kunsill impona dazju kumpensatorju definittiv għal perjodu ieħor
ta’ ħames snin. Il-miżuri kumpensatorji ġew emendati permezz
tar-Regolament tal-Kunsill (KE) Nru 1286/2008[5] wara reviżjoni interim
parzjali ("l-aħħar investigazzjoni tar-reviżjoni").
Il-miżuri kumpensatorji jikkonsistu f’dazju speċifiku. Ir-rata
tad-dazju tvarja bejn EUR 0 u EUR 106,5 kull tunnellata għall-produtturi
Indjani msemmija individwalment b’rata residwa ta’ dazju ta’ EUR 69,4 kull
tunnellata, imposta fuq importazzjonijiet tal-produtturi l-oħrajn kollha. (2) Wara li tbiddel isem
kumpanija waħda Indjana, South Asian Petrochem Ltd, permezz tal-Avviż
(KE) Nru 2010/C 335/07[6],
il-Kummissjoni kkonkludiet li s-sejbiet kontra s-sussidji fir-rigward tas-South
Asian Petrochem Ltd għandhom japplikaw għad-Dhunseri Petrochem &
Tea Limited. 1.2. Miżuri antidumping
eżistenti (3) Permezz tar-Regolament (KE)
Nru 2604/2000[7],
il-Kunsill impona dazju antidumping definittiv fuq l-importazzjonijiet ta’ PET
li joriġina, inter alia, mill-Indja ("l-investigazzjoni
antidumping oriġinali"). Reviżjoni skont l-Artikolu 11(4)
("ir-reviżjoni ġdida dwar l-esportaturi") tar-Regolament
tal-Kunsill (KE) Nru 1225/2009[8]
("ir-Regolament bażiku dwar l-anti-dumping") li tikkonċerna
s-South Asian Petrochem Ltd twettqet sussegwentament u s-sejbiet u
l-konklużjonijiet definittivi tagħha huma stabbiliti fir-Regolament
tal-Kunsill (KE) Nru 1646/2005[9].
Wara reviżjoni ta’ skadenza u permezz tar-Regolament (KE)
Nru 192/2007[10],il-Kunsill
impona dazju antidumping definittiv għal perjodu ieħor ta’ ħames
snin. Il-miżuri antidumping ġew emendati bir-Regolament tal-Kunsill
(KE) Nru 1286/2008 wara reviżjoni parzjali interim ("l-aħħar
reviżjoni ta' investigazzjoni dwar l-antidumping"). Il-miżuri
ġew stabbiliti fil-livell ta’ eliminazzjoni tal-ħsara u kienu
jikkonsistu f’dazji antidumping speċifiċi. Ir-rata tad-dazju tvarja
bejn EUR 87,5 u EUR 200,9 kull tunnellata għall-produtturi
Indjani msemmija individwalment b’rata residwa ta’ dazju ta’ EUR 153,6
kull tunnellata imposta fuq l-importazzjonijiet mill-produtturi l-oħrajn
kollha (“il-miżuri antidumping attwali”). (4) Wara li nbidel isem kumpanija
waħda Indjana, is-South Asian Petrochem Ltd, permezz tal-Avviż (KE)
Nru 2010/C 335/06[11],
il-Kummissjoni kkonkludiet li s-sejbiet kontra s-sussidji fir-rigward tas-South
Asian Petrochem Ltd għandhom japplikaw għad-Dhunseri Petrochem &
Tea Limited. (5) Permezz
tad-Deċiżjoni 2005/697/KE[12],
il-Kummissjoni aċċettat l-impenn offrut mis-South Asian Petrochem Ltd
li tiffissa prezz minimu tal-importazzjoni ("PMI") (“l-impenn”). Wara
li nbidel l-isem, il-Kummissjoni kkonkludiet permezz tal-Avviż (KE)
Nru 2010/C335/05 li l-impenn offrut mis-South Asian Petrochem Ltd
għandu japplika għad-Dhunseri Petrochem & Tea Limited. 1.3. Il-bidu ta' reviżjoni
interim parzjali (6) Saret
talba għal reviżjoni interim parzjali skont l-Artikolu 19
tar-Regolament bażiku minn Dhunseri Petrochem & Tea Limited, produttur
esportatur Indjan tal-PET (“l-applikant”). It-talba kienet limitata
għall-ambitu tas-sussidju u limitata għall-applikant. L-applikant
talab ukoll fl-istess waqt ir-reviżjoni tal-miżuri antidumping
attwali. Id-dazji antidumping u kumpensatorji residwi huma applikabbli
għall-importazzjonijiet ta’ prodotti magħmula mill-applikant u
l-bejgħ tal-applikant lill-Unjoni huwa kopert mill-impenn. (7) L-applikant ipprovda evidenza
prima facie li l-issoktar tal-applikazzjoni tal-miżura fil-livell
attwali ma kienx aktar meħtieġ biex jitpatta s-sussidju kumpensabbli.
B’mod partikolari, l-applikant ipprovda evidenza prima facie li turi li
l-ammont tas-sussidju tiegħu naqas sew taħt ir-rata ta’ dazju li
bħalissa hija applikabbli għalih. Dan it-tnaqqis fil-livell ta’
sussidju ġenerali huwa prinċipalment minħabba t-tmiem
tal-istatus tiegħu ta' Unità Orjentata lejn l-Esportazzjoni
("UOE"). L-iskema UOE, li d-daqs tagħha kien ta’ 13,5% kienet
tirrappreżenta l-biċċa l-kbira tas-sussidji ta' 13,9% stabbiliti
waqt ir-reviżjoni aċċellerata. (8) Wara li kkonsultat
lill-Kumitat Konsultattiv u ddeterminat li t-talba kien fiha
biżżejjed evidenza prima facie,
fit-2 ta' April 2011 il-Kummissjoni ћabbret il-bidu ta'
reviżjoni interim parzjali skont l-Artikolu 19 tar-Regolament
bażiku permezz ta' notifika ta' bidu ppubblikata f'Il-Ġurnal
Uffiċjali tal-Unjoni Ewropea[13].
Ir-reviżjoni kienet limitata għall-ambitu tal-eżami tas-sussidju
fir-rigward tal-applikant. 1.4. Il-partijiet milquta
mill-investigazzjoni (9) Il-Kummissjoni infurmat
uffiċjalment lill-applikant, lir-rappreżentanti tal-pajjiż li
jesporta u lill-assoċjazzjoni tal-produtturi tal-Unjoni dwar il-bidu
tar-reviżjoni. Il-partijiet interessati ngħataw l-opportunità li
jressqu l-opinjonijiet tagħhom bil-miktub u li jitolbu seduta ta’
smigħ fil-limitu taż-żmien stipulat fin-notifika ta’ bidu. (10) Parti interessata waħda
talbet seduta ta' smigħ u din it-talba ntlaqgħet. (11) Sabiex tikseb it-tagħrif
li qieset meħtieġ għall-investigazzjoni tagħha,
il-Kummissjoni bagħtet kwestjonarju lill-applikant u lill-gvern tal-Indja
("GTI") u rċeviet tweġibiet fi żmien l-iskadenza
stipulata għal dan l-għan. (12) Il-Kummissjoni fittxet u
vverifikat it-tagħrif kollu li qieset li kien meħtieġ
għad-determinazzjoni tas-sussidju. Il-Kummissjoni għamlet żjarat
ta’ verifika fil-post lill-applikant f’Kolkota, l-Indja, u żjarat ta’
verifika fil-post lill-GTI fi New Delhi (Direttorat Ġenerali
tal-Kummerċ Barrani u l-Ministeru tal-Kummerċ) u f’Kolkota
(Id-Dipartiment tal-Kummerċ u l-Industrija, il-Gvern tal-Bengal tal-Punent). 1.5. Il-perjodu tal-investigazzjoni
tar-reviżjoni (13) L-investigazzjoni tas-sussidju
kopriet il-perjodu mill-1 ta' April 2010
sal-31 ta' Marzu 2011 (“il-perjodu tal-investigazzjoni
tar-reviżjoni” jew “PIR”). 1.6. Investigazzjoni antidumping
parallela (14) Fit-2 ta' April 2011[14], il-Kummissjoni ħabbret
il-bidu ta' reviżjoni interim parzjali tad-dazji attwali ta’ antidumping
limitata għall-ambitu tal-eżami tad-dumping fir-rigward tal-istess
applikant, skont l-Artikolu 11(3) tar-Regolament bażiku dwar l-antidumping,
. (15) Fl-investigazzjoni antidumping
parallela nstab li ċ-ċirkostanzi fir-rigward tad-dumping inbidlu
b'mod sinifikanti u dejjiemi, għalhekk il-miżuri antidumping attwali
applikabbli għall-applikant inbidlu. 2. IL-PRODOTT IKKONĊERNAT U
L-PRODOTT SIMILI 2.1. Il-prodott ikkonċernat (16) Il-prodott li qed jiġi
rivedut huwa l-PET li għandu viskożità ta’ 78 ml/g jew aktar,
skont l-Istandard ISO 1628-5, ikklassifikat attwalment taħt
il-kodiċi NM 3907 60 20 u li joriġina fl-Indja (“il-prodott
ikkonċernat”). 2.2. Il-prodott simili (17) L-investigazzjoni svelat illi
f'termini ta' karatteristiċi fiżiċi u kimiċi u użi,
il-prodott ikkonċernat magħmul fl-Indja u mibjugħ lill-Unjoni
huwa identiku għall-prodott magħmul u mibjugħ fis-suq domestiku
fl-Indja. Gћalhekk, ġie konkluż li skont it-tifsira
tal-Artikolu 2(c) tar-Regolament bażiku l-prodotti mibjugħa
fis-suq domestiku u fis-suq tal-esportazzjoni, huma prodotti simili. 3. IR-RIŻULTATI
TAL-INVESTIGAZZJONI 3.1. Is-sussidju (18) Abbażi tal-informazzjoni
mibgħuta mill-GTI u l-applikant u t-tweġibiet għall-kwestjonarju
tal-Kummissjoni, ġew investigati l-iskemi li ġejjin li allegatament
jinvolvu l-għoti ta’ sussidji: Skemi nazzjonali: (a) L-Iskema tal-Passbook li Jagħti Jedd
għad-Dazju ("DEPBS"); (b) Unitajiet Orjentati lejn l-Esportazzjoni
('UOE') / Żoni ta’ Proċessar tal-Esportazzjoni ('EPZ') / Żoni
Ekonomiċi Speċjali ('SEZ'); (c) L-Iskema ta' Promozzjoni
tal-Esportazzjoni ta' Beni Kapitali ("EPCGS"); (d) Skema ta' Fokus fuq is-Suq
("FMS") (e) L-Iskema ta' Kreditu
għall-Esportazzjoni ("ECS"); (f) Skema ta’ Eżenzjoni mit-Taxxa fuq
id-Dħul ("ITES"). Skemi reġjonali: (g) L-Iskema ta' Inċentiva tal-Bengal
tal-Punent. (19) L-iskemi minn (a) sa (d)
speċifikati aktar ’il fuq huma bbażati fuq l-Att tal-1992 dwar il-Kummerċ
Barrani (Żvilupp u Regolamentazzjoni) (Nru 22 tal-1992) li daħal
fis-seħħ fis-7 ta’ Awwissu 1992 (“l-Att dwar
il-Kummerċ Barrani”). L-Att dwar il-Kummerċ Barrani jawtorizza
lill-GTI biex joħroġ in-notifiki dwar il-politika ta’ esportazzjoni u
importazzjoni. Dawn huma mogħtija fil-qosor fid-dokumenti tal-Politika
tal-Kummerċ Barrani ("PKB"), li jinħarġu
mill-Ministeru tal-Kummerċ kull ħames snin u li jiġu
aġġornati regolarment. Żewġ dokumenti tal-PKB huma
relevanti għall-PIR ta' dan il-każ, jiġifieri, l-FTP 04-09
u l-FTP 09-14. Dan tal-aħħar daħal fis-seħħ
f’Awwissu 2009. Barra minn hekk, il-GTI stabbilixxa wkoll
il-proċeduri li jirregolaw l-FTP 04-09 u l-FTP 09-14 fil-“Manwal
tal-Proċeduri, Volum I" ("HOP I 04-09" u
"HOP I 09-14" rispettivament). Il-Manwal tal-Proċeduri
wkoll jiġi aġġornat fuq bażi regolari. (20) L-Iskema (e) hija bbażata
fuq it-taqsimiet 21 u 35A tal-Att dwar ir-Regolamentazzjoni tal-Banek tal-1949,
li jippermetti lill-Bank ta’ Riżerva tal-Indja (“RBI”) biex jidderiġi
l-banek kummerċjali fil-qasam tal-krediti għall-esportazzjoni. (21) L-iskema (f) hija bbażata
fuq l-Att tal-1961 dwar it-Taxxa tad-Dħul, li huwa emendat bl-Att annwali
dwar il-Finanzi. (22) L-iskema (g) hija amministrata
mill-Gvern tal-Bengal tal-Punent u hija stabbilita fin-notifika
Nru 580-CI/H tat-22 ta' Ġunju 1999 (WBIS 1999)
tad-Dipartiment tal-Kummerċ u l-Industrija tal-Gvern tal-Bengal
tal-Punent, li hija sostitwita bin-notifika Nru 134-CI/O/Incentive/17/03/I
tal-24 ta' Marzu 2004 (WBIS 2004). 3.2. L-Iskema tal-Passbook
għall-Intitolament tad-Dazji (“DEPBS”) (a) Bażi Legali (23) Id-deskrizzjoni dettaljata
tad-DEBPS tinsab fil-paragrafi 4.3 tal-politika-FTP 04-09 u
l-politika-FTP 09-14 kif ukoll fil-Kapitolu 4
tal-HOP I 04-09 u tal-HOP I 09-14. (b) L-eliġibbiltà (24) Kull manifattur esportatur jew
negozjant esportatur huwa eliġibbli għal din l-iskema. (c) L-implimentazzjoni prattika tad-DEPBS (25) Esportatur eliġibbli
jista’ japplika għall-krediti tad-DEPBS li jiġu kkalkulati bħala
perċentwali tal-valur ta’ prodotti esportati f'din l-iskema. Dawn ir-rati
DEPBS ġew stabbiliti mill-awtoritajiet Indjani għal biċċa
l-kbira tal-prodotti, inkluż il-prodott ikkonċernat. Huma jiġu
ddeterminati mingħajr ma jitqies jekk id-dazji tal-importazzjoni jkunux
tħallsu jew le. Ir-rata tad-DEPB għall-prodott ikkonċernat waqt
il-PIR tal-investigazzjoni attwali kienet ta' 8% tal-valur FOB,
suġġett għal limitu massimu tal-valur ta' INR 58/kg.
B'riżultat ta' dan, il-benefiċċju massimu huwa ta' INR 4,64/kg. (26) Sabiex tkun eliġibbli
għall-benefiċċji taħt din l-iskema, kumpanija trid
tesporta. Fil-mument tat-tranżazzjoni tal-esportazzjoni għandha ssir
dikjarazzjoni mill-esportatur lill-awtoritajiet fl-Indja li tindika li
l-esportazzjoni qed issir skont id-DEPBS. Sabiex il-merkanzija tkun esportata,
l-awtoritajiet doganali Indjani joħorġu polza tal-esportazzjoni waqt
il-proċedura li matulha l-merkanzija tintbagħat. Dan id-dokument
juri, inter alia, l-ammont ta’ kreditu tad-DEPBS li għandu
jingħata għal dik it-tranżazzjoni ta’ esportazzjoni. F’dak
il-mument, l-esportatur ikun jaf il-benefiċċji li għandu
jirċievi. Ladarba l-awtoritajiet tad-dwana joħorġu l-polza
tal-esportazzjoni, il-GTI ma jkollu l-ebda diskrezzjoni fuq l-għoti ta’
kreditu tad-DEPBS. Ir-rata tad-DEPBS rilevanti għall-kalkolu tal-benefiċċju
hija dik applikata fiż-żmien meta tkun saret id-dikjarazzjoni ta’
esportazzjoni. Għalhekk, emenda retroattiva għal-livell
tal-benefiċċju, mhijiex possibbli. (27) Instab li skont l-istandards
Indjani tal-kontabilità, il-krediti tad-DEPBS jistgħu jitniżżlu
fuq il-bażi tad-dovuti bħala dħul fil-kontijiet
tal-kummerċ, malli jiġi sodisfatt l-obbligu tal-esportazzjoni. Dawn
il-krediti jistgħu jintużaw biex jitħallsu d-dazji doganali fuq
importazzjonijiet sussegwenti ta’ kwalunkwe prodotti li jistgħu jiġu
importati mingħajr restrizzjonijiet, ħlief beni kapitali. Il-prodotti
importati b'dawn il-krediti jistgħu jinbiegħu fis-suq domestiku
(suġġetti għal taxxa tal-bejgħ) jew jiġu użati
mod ieħor. Il-krediti tad-DEPBS huma trasferibbli liberament u huma validi
għal perjodu ta’ 24 xahar mid-data tal-ħruġ. (28) L-applikazzjonijiet
għall-krediti tad-DEPBS jiddaħħlu elettronikament u jistgħu
jkopru ammont illimitat ta' tranżazzjonijiet ta’ esportazzjoni. Ma
japplikawx skadenzi stretti għal krediti tad-DEPBS, de facto.
Is-sistema elettronika użata għall-ġestjoni tad-DEPBS ma
teskludix awtomatikament it-transazzjonijiet tal-esportazzjoni li jaqbżu
l-iskadenza għas-sottomissjoni msemmija fil-paragrafu 4.47 tal-HOP I 04-09
u l-HOP I 09-14. Barra minn hekk, kif stipulat b’mod ċar
fil-paragrafu 9.3 tal-HOP I 04-09 u u l-HOP 09-14, l-applikazzjonijiet li
jaslu wara d-data tal-iskadenza għas-sottomissjoni dejjem jistgħu
jiġu kkunsidrati soġġett għall-impożizzjoni ta’ penali
minuri (jiġifieri 10% tal-intitolament). (29) Instab li l-applikant uża
din l-iskema matul il-PIR. (d) Il-konklużjonijiet dwar id-DEPBS (30) Id-DEPBS jipprovdi s-sussidji
skont it-tifsira tal-Artikolu 3(1)(a)(ii) u l-Artikolu 3(2)
tar-Regolament bażiku. Kreditu tad-DEPBS huwa kontribuzzjoni finanzjarja
mill-GTI, peress li l-kreditu eventwalment jintuża biex ipatti
għad-dazji ta’ importazzjoni, b’hekk inaqqas id-dħul tal-GI mid-dazji
li kieku jkunu dovuti. Barra minn hekk, il-kreditu tad-DEPBS jagħti
benefiċċju lill-esportatur, minħabba li jtejjeb il-likwidità
tiegħu. (31) Barra dan, id-DEPBS huwa
subordinat fil-liġi mal-mod kif tkun marret l-esportazzjoni, u
għalhekk huwa meqjus bħala speċifiku u kumpensabbli skont
il-punt (a) tal-ewwel sottoparagrafu tal-Artikolu 4(4) tar-Regolament
bażiku. (32) Din l-iskema ma tistax titqies
bħala sistema ta’ rtirar tad-dazju permissibbli jew sistema ta’ rtirar ta’
sostituzzjoni fis-sens tal-Artikolu 3(1)(a)(ii) tar-Regolament bażiku
kif iddikjarat mill-applikant. Hija mhix konformi mar-regoli stretti stipulati
fl-Anness I punt (i), fl-Anness II (definizzjoni u regoli
għall-irtirar tad-dazju) u fl-Anness III (definizzjoni u regoli
għas sistemi ta' sostituzzjoni ta' rtirar tad-dazju) tar-Regolament
bażiku. L-esportatur ma għandu ebda obbligu li jikkonsma l-prodotti
importati bla dazju fil-proċess tal-produzzjoni u l-ammont tal-kreditu
mhuwiex ikkalkulat b’konnessjoni mal-inputs li effettivament intużaw.
Barra minn hekk, ma hemm l-ebda sistema jew proċedura fis-seħħ
li tikkonferma liema inputs jiġu kkunsmati fil-proċess tal-produzzjoni
tal-prodott esportat jew jekk sarx ħlas żejjed ta' dazji
tal-importazzjoni fit-tifsira tal-punt (i) tal-Anness I u
l-Annessi II u III tar-Regolament bażiku. Fl-aħħar nett,
esportatur huwa eliġibbli għall-benefiċċji DEPBS
irrispettivament minn jekk jimportax xi inputs jew le. Sabiex jinkiseb
il-benefiċċju, huwa biżżejjed li esportatur
sempliċiment jesporta l-prodotti mingħajr ma juri li kien importat xi
materjal input. Għalhekk, anki l-esportaturi li jakkwistaw l-inputs
tagħhom kollha lokalment u ma jimportaw ebda prodotti li jistgħu
jiġu użati bħala inputs, jibqgħu intitolati
għall-benefiċċji mid-DEPBS. (e) L-abolizzjoni tal-iskema DEPB (33) Permezz tal-Avviż
Pubbliku Nru 54 (RE-2010) /2009-2014
tas-17 ta' Ġunju 2011, l-iskema DEPB ġiet estiża
għall-aħħar darba għal tliet xhur
sat-30 ta' Settembru 2011. Billi ma ġiet ippubblikata ebda
estenzjoni wara dan, l-iskema DEPB effettivament ġiet irtirata
mit-30 ta' Settembru 2011 'il quddiem. B'konsegwenza ta' dan,
din l-iskema ma tagħti l-ebda benefiċċji lill-applikant wara
t-30 ta' Settembru 2011. Għaldaqstant irid jiġi
vverifikat jekk, skont l-Artikolu 15(1) tar-Regolament bażiku, iridux
jiġu imposti l-miżuri fuq din-l-iskema. (34) F'dan ir-rigward, kien
stabbilit li l-applikant irċieva benefiċċji simili skont
l-iskema parallela ta' rifużjoni tad-dazju. Ir-rata tar-rifużjoni
tad-dazju għall-PET kienet ta' 5,5% tal-valur FOB, soġġett
għall-ammont massimu ta' INR 5,50/kg. Iżda billi l-iskema ta'
rifużjoni tad-dazji ma ntużatx waqt il-PIR, mhuwiex possibbli li
jiġi kkalkulat l-ammont tas-sussidju għal din l-iskema. (35) L-applikant asserixxa li
l-iskema ta' Rifużjoni ta' Dazji tikkonforma mal-"linji gwida dwar
il-konsum tal-inputs fil-proċess tal-produzzjoni"
fl-Anness II tar-Regolament bażiku, b'mod speċifiku
fil-paragrafu I ta' dan l-Anness. Iżda ġie stabbilit li,
bħal fl-iskema DEPB, ir-rata tar-refużjoni tad-dazju tiġi
ddeterminata mingħajr ma jitqies jekk ikunux tħallsu d-dazji tal-importazzjoni. (f) Il-kalkolu tal-ammont tas-sussidju (36) Skont l-Artikolu 3(2) u
l-Artikolu 5 tar-Regolament bażiku, l-ammont ta’ sussidji
kumpensabbli kien ikkalkulat f’termini tal-benefiċċju mogħti
lir-riċevitur, li jinstab li jeżisti waqt il-PIR. F’dan ir-rigward,
tqies li l-benefiċċju huwa konferit lir-riċevitur fil-mument
meta tranżazzjoni ta’ esportazzjoni ssir skont din l-iskema. F’dan
il-mument, il-GTI huwa obbligat li jċedi d-dazji doganali, u dan
jikkostitwixxi kontribuzzjoni finanzjarja skont it-tifsira
tal-Artikolu 3(1)(a)(ii) tar-Regolament bażiku. (37) Fid-dawl ta’ dan, jitqies li
jkun xieraq li jiġi vvalutat il-benefiċċju skont id-DEPBS
bħala s-somma tal-krediti ggwadanjati fuq it-tranżazzjonijiet kollha
ta’ esportazzjoni li saru skont din l-iskema matul l-PIR. (38) Meta saru talbiet
ġustifikati, id-drittijiet li neċessarjament riedu jitħallsu
biex jinkiseb is-sussidju tnaqqsu mill-krediti hekk stabbiliti biex jinkisbu
l-ammonti tas-sussidju bħala n-numeratur, skont l-Artikolu 7(1)(a)
tar-Regolament bażiku. (39) Skont l-Artikolu 7(2)
tar-Regolament bażiku dawn l-ammonti ta’ sussidju ġew allokati fuq
il-fatturat kollu tal-esportazzjoni matul il-perjodu tal-investigazzjoni ta’
reviżjoni bħala d-denominatur xieraq, għaliex is-sussidju huwa
kontinġenti mal-mod kif tkun marret l-esportazzjoni u ma ngħatax
b’referenza għall-kwantitajiet manifatturati, prodotti, esportati jew
trasportati. (40) Abbażi ta' dak li ntqal
hawn fuq, ir-rata tas-sussidju stabbilita fir-rigward ta' din l-iskema
għall-applikant matul il-PIR tammonta għal 6,7%. 3.3. Unitajiet
Orjentati lejn l-Esportazzjoni ('UOE')/Żoni ta’ Proċessar
tal-Esportazzjoni ('EPZ')/Żoni Ekonomiċi Speċjali ('SEZ') (41) Waqt l-investigazzjoni nstab
li l-applikant ma kiseb ebda benefiċċju skont l-UOE/EPZ/SEZ matul
il-PIR. Għalhekk ma kienx meħtieġ li dawn l-iskemi jiġu
analizzati f’din l-investigazzjoni. 3.4. Skema ta' Promozzjoni
tal-Esportazzjoni tal-Beni Kapitali (“EPCGS”) (a) Bażi
ġuridika (42) Id-deskrizzjoni dettaljata
tal-EPCGS tinsab fil-Kapitolu 5 tal-FTP 04-09 u tal-FTP 09-14
kif ukoll fil-Kapitolu 5 tal-HOP I 04-09 u
tal-HOP I 09-14. (b) L-eliġibbiltà (43) L-esportaturi manifatturi,
l-esportaturi negozjanti “marbuta ma’ ” manifatturi ta’ appoġġ u
fornituri tas-servizzi huma eliġibbli għal din l-iskema. (c) L-implimentazzjoni
prattika (44) Skont il-kondizzjoni ta’
obbligu ta’ esportazzjoni, kumpanija hija awtorizzata li timporta beni kapitali
(beni kapitali ġodda u dawk użati sa massimu ta’ 10 snin) b’rata
mnaqqsa ta’ dazju doganali. Għal dan l-għan, il-GTI joħroġ
liċenzja EPCGS fuq applikazzjoni u pagament ta’ ħlas. L-iskema
tistipula rata ta' dazju tal-importazzjoni mnaqqsa ta’ 5% applikabbli
għall-beni kapitali kollha importati skont l-iskema. Sabiex jiġi sodisfatt
l-obbligu tal-esportazzjoni, il-beni kapitali importati jridu jintużaw
biex jipproduċu ċertu ammont ta’ prodotti għall-esportazzjoni
matul ċertu perjodu. Skont il-FTP 09-14, il-beni kapitali jistgħu
jiġu importati b’rata ta' dazju ta’ 0% skont l-EPCGS iżda f’każ
bħal dan il-perjodu taż-żmien għas-sodisfazzjon tal-obbligu
ta’ esportazzjoni huwa iqsar. (45) Id-detentur tal-liċenzja
EPCGS jista' wkoll iġib il-beni kapitali minn sors indiġenu. F'dan
il-każ, il-manifattur indiġenu ta’ beni kapitali jista' japprofitta
mill-benefiċċju ta’ importazzjoni ħielsa mid-dazju ta’
komponenti meħtieġa għall-manifattura ta’ dawn il-beni kapitali.
Alternattivament, il-manifattur indiġenu jista' jitlob
il-benefiċċju ta’ esportazzjoni li jqis li jkun wettaq fir-rigward
tal-provvista ta’ beni kapitali lid-detentur ta’ liċenzja EPCGS. (46) Instab li l-applikant uża
din l-iskema matul il-PIR. (d) Konklużjoni dwar l-EPCGS (47) L-EPCGS jipprovdi s-sussidji
fl-ambitu tat-tifsira tal-Artikolu 3(1)(a)(ii) u l-Artikolu 3(2)
tar-Regolament bażiku. It-tnaqqis fid-dazju jikkostitwixxi kontribuzzjoni
finanzjarja mill-GTI, billi din il-konċessjoni tnaqqas id-dħul
mid-dazju li kieku kien ikun dovut lilu. Barra minn hekk, it-tnaqqis tad-dazju
jagħti benefiċċju lill-esportatur, billi d-dazji ffrankati
mill-importazzjoni jtejbu l-likwidità tal-kumpanija. (48) Barra minn hekk, l-EPCGS hija
subordinata fil-liġi għall-prestazzjoni tal-esportazzjoni, billi dawn
il-liċenzji ma jistgħux jinkisbu mingħajr impenn ta’
esportazzjoni. Għalhekk, hija meqjusa bħala speċifika u kumpensabbli
skont l-ewwel sottoparagrafu tal-punt (a) tal-Artikolu 4(4),
tar-Regolament bażiku. Ġie ddikjarat mill-applikant li s-sussidji
tal-EPCGS fir-rigward tax-xiri tal-beni kapitali fejn l-obbligu ta’
esportazzjoni kien diġà sodisfatt qabel il-PIR, ma għandhomx
jibqgħu jiġu ttrattati bħala subordinati għall-prestazzjoni
tal-esportazzjoni. Għalhekk dawn ma għandhomx jiġu ttrattati
bħala sussidji speċifiċi u ma għandhomx jiġu
kkompensati. Madankollu, din id-dikjarazzjoni għandha tinċaħad.
Għandu jiġi enfasizzat li s-sussidju fih innifsu huwa subordinat
għall-prestazzjoni tal-esportazzjoni, jiġifieri ma kienx
jingħata kieku l-kumpanija ma aċċettatx ċertu obbligu ta’
esportazzjoni. (49) L-EPCGS ma tistax titqies
bħala sistema ta’ rtirar ta’ dazju jew sistema ta’ rtirar sostituttiva
fit-tifsira tal-Artikolu 3(1)(a)(ii) tar-Regolament bażiku. Il-beni
kapitali mhumiex koperti mill-ambitu ta’ dawn is-sistemi permissibbli, kif
stabbilit fl-Anness I, partita (i), tar-Regolament bażiku,
għaliex mhumiex ikkunsmati fil-produzzjoni tal-prodotti esportati. (e) Il-kalkolu
tal-ammont tas-sussidju (50) L-ammont tas-sussidju ġie
kkalkulat, skont l-Artikolu 7(3) tar-Regolament bażiku, abbażi
tad-dazju doganali mhux imħallas fuq beni kapitali importati mifruxa fuq
perjodu li jirrifletti l-perjodu ta' deprezzament normali ta' dawn il-beni
kapitali fl-industrija kkonċernata, jiġifieri 18,93 snin.
L-imgħaxijiet għandhom jiġu miżjuda ma’ dan l-ammont sabiex
jirriflettu l-valur sħiħ tal-benefiċċju
maż-żmien. Ir-rata ta’ imgħaxijiet kummerċjali
għas-self fil-munita lokali matul il-perjodu tal-investigazzjoni ta’
reviżjoni fl-Indja kienet meqjusa li hi xierqa għal dan l-iskop. (51) Skont l-Artikoli 7(2) u
7(3) tar-Regolament bażiku, dan l-ammont ta’ sussidju ġie allokat fuq
il-fatturat ta’ esportazzjoni matul il-PIR bħala d-denominatur xieraq,
għaliex is-sussidju jiddependi mill-mod kif tkun marret l-esportazzjoni. (52) Ir-rata ta' sussidju
stabbilita fir-rigward ta' din l-iskema għall-applikant matul il-PIR
tammonta għal 0,6%. 3.5. Skema ta' Fokus fuq is-Suq
("FMS") (a) Bażi
ġuridika (53) Id-deskrizzjoni dettaljata
tal-FMS tinsab fil-paragrafi 3.9.1 sa 3.9.2.2 tal-FTP 04-09 u
l-paragrafi 3.14.1 sa 3.14.3 tal-FTP 09-14 u fil-paragrafi 3.20
sa 3.20.3 tal-HOP I 04-09 u l-paragrafi 3.8 sa 3.8.2
tal-HOP I 09-14. (b) L-eliġibbiltà (54) Kull manifattur esportatur jew
negozjant esportatur huwa eliġibbli għal din l-iskema. (c) L-implimentazzjoni
prattika (55) Skont din l-iskema
l-esportazzjonijiet tal-prodotti kollha lejn il-pajjiżi notifikati skont l-Appendiċi
37(C) tal-HOP I 04-09 u l-HOP I 09-14 huma intitolati għal kreditu ta’
dazji ekwivalwenti għal 2,5% tal-valur FOB tal-prodotti esportati skont
din l-iskema. Ċertu tip ta' attivitajiet ta' esportazzjoni huma
esklużi mill-iskema, eż. esportazzjonijiet ta' prodotti importati jew
prodotti ttrasbordati, prodotti meqjusa għall-esportazzjoni,
esportazzjonijiet ta' servizzi u l-qligħ tal-esportazzjoni ta' unitajiet
li joperaw skont żoni ekonomiċi speċjali/unitajiet li joperaw fl-esportazzjoni.
Ċerti tipi ta' prodotti huma wkoll esklużi mill-iskema, eż.
djamanti, metalli prezzjużi, minerali, ċereali, zokkor u prodotti
taż-żejt. (56) Il-krediti tad-dazju skont
l-FMS huma trasferibbli liberament u validi għal perjodu ta’ 24 xahar
mid-data ta’ ħruġ taċ-ċertifikat ta’ intitolament
tal-kreditu rilevanti. Dawn jistgħu jintużaw biex jitħallsu
d-dazji tad-dwana fuq importazzjonijiet sussegwenti ta’ kwalunkwe inputs jew
prodotti, inklużi prodotti kapitali. (57) Iċ-ċertifikat ta'
intitolament ta' kreditu jinħareġ mill-port minn fejn saru
l-esportazzjonijiet u wara r-realizzazzjoni tal-esportazzjonijiet jew wara li
jintbagħtu l-prodotti. Sakemm l-applikant jipprovdi l-kopji
tad-dokumentazzjoni tal-esportazzjoni rilevanti kollha (pereżempju, ordni
ta’ esportazzjoni, fatturi, poloz tat-tagħbija, ċertifikati ta’
realizzazzjoni mill-bank), lill-awtoritajiet, il-GTI ma għandu l-ebda
diskrezzjoni fuq l-għoti tal-krediti tad-dazju. (58) Instab li l-applikant uża
din l-iskema matul il-PIR. (d) Il-konklużjoni
dwar l-FMS (59) L-FMS jipprovdi s-sussidji
fl-ambitu tat-tifsira tal-Artikolu 3(1)(a)(ii) u l-Artikolu 3(2)
tar-Regolament bażiku. Kreditu ta’ dazju tal-FMS huwa kontribuzzjoni
finanzjarja mill-GTI, billi l-kreditu eventwalment jintuża biex ibaxxi
d-dazji ta’ importazzjoni, b’hekk jitnaqqas id-dħul mid-dazju tal-GTI li
kieku kien ikun dovut. Barra minn hekk, il-kreditu tad-dazju tal-FMS
jagħti benefiċċju lill-esportatur, għaliex itejjeb
il-likwidità tiegħu. (60) Iktar minn hekk, l-FMS huwa
subordinat fil-liġi mal-mod kif tkun marret l-esportazzjoni, u
għalhekk huwa meqjus bħala speċifiku u jista’ jiġi
kkumpensat skont l-Artikolu 4(4), il-punt (a) tal-ewwel
sottoparagrafu, tar-Regolament bażiku. (61) Din l-iskema ma tistax titqies
bħala sistema ta’ rifużjoni ta’ dazju jew sistema li tissostitwixxi
r-rifużjoni ta’ dazju permissibbli fl-ambitu tat-tifsira
tal-Artikolu 2(1)(a)(ii) tar-Regolament bażiku. Hija mhix konformi
mar-regoli stretti stipulati fil-punt (i) tal-Anness I
fl-Anness II (definizzjoni u regoli għall-irtirar tad-dazju) u
fl-Anness III (definizzjoni u regoli għal sistemi ta' sostituzzjoni
tal-irtirar tad-dazju) tar-Regolament bażiku. L-esportatur ma għandu
ebda obbligu li effettivament jikkonsma l-prodotti importati bla dazju
fil-proċess tal-produzzjoni u l-ammont tal-kreditu mhuwiex ikkalkulat
b’konnessjoni mal-inputs li effettivament intużaw. Mhemm l-ebda sistema
jew proċedura fis-seħħ li tikkonferma liema inputs jiġu
kkunsmati fil-proċess tal-produzzjoni tal-prodott esportat jew jekk sarx
ħlas żejjed ta’ dazji ta’ importazzjoni fit-tifsira tal-punt (i)
tal-Anness I u l-Annessi II u III tar-Regolament bażiku.
Esportatur ikun eliġibbli għall-benefiċċji tal-FMS
mingħajr ma jingħata każ jekk jimportax oġġetti biex
jidħlu fil-prodott jew le. Sabiex jinkiseb il-benefiċċju, huwa
biżżejjed li esportatur sempliċiment jesporta l-prodotti
mingħajr ma juri li kien importat xi materjal tal-input. B’hekk, anke
esportaturi li jakkwistaw l-inputs tagħhom lokalment u ma jimportaw l-ebda
prodotti li jistgħu jintużaw bħala input jibqgħu intitolati
għall-benefiċċji mill-FMS. Barra minn hekk, esportatur jista'
juża l-krediti tad-dazju FMS biex jimporta beni kapitali għalkemm
il-beni kapitali mhumiex koperti fil-kamp ta' applikazzjoni ta’ dawn is-sistemi
permissibbli tal-irtirar tad-dazju, kif stipulat fil-punt (i)
tal-Anness I tar-Regolament bażiku, għaliex ma jiġux
ikkunsmati fil-produzzjoni tal-prodotti esportati. (e) Il-kalkolu tal-ammont tas-sussidju (62) L-ammont ta’ sussidji li
jistgħu jiġu kkumpensati ġie kkalkulat abbażi tal-benefiċċju
li jinstab li jeżisti matul il-PIR li jingħata lir-riċevitur,
kif prenotat mill-produttur esportatur li kkoopera b'sistema ta' akkumulazzjoni
bħala dħul fl-istadju ta’ transazzjoni tal-esportazzjoni. Skont
l-Artikoli 7(2) u 7(3) tar-Regolament bażiku dan l-ammont ta’
sussidju (nominatur) kien allokat fuq il-fatturat ta’ esportazzjoni matul
il-PIR bħala d-denominatur xieraq, għaliex is-sussidju huwa
subordinat mal-mod kif tkun marret l-esportazzjoni u ma ngħatax
b’referenza għall-kwantitajiet immanifatturati, prodotti, esportati jew
trasportati. (63) Ir-rata ta' sussidju
stabbilita fir-rigward ta' din l-iskema għall-applikant matul il-PIR
tammonta għal inqas minn 0,1%. 3.6. L-Iskema ta’ Kreditu
għall-Esportazzjoni ('ECS') (64) Ġie stabbilit li l-applikant
irċieva l-benefiċċju ta' rati ta' interessi preferenzjali
għall-finanzjament tal-esportazzjonijiet tiegħu waqt il-PIR
sat-30 ta' Ġunju 2011. Il-bażi legali għal din ir-rata
ta' interessi preferenzjali hija stabbilita fil-Master Circular on Rupee/Foreign
Currency Export Credit & Customer Services to Exporters DBOD No DIR.(Exp).
BC 07/04.02.02/2009-10 tal-Bank ta’ Riżerva tal-Indja (RBI), li hija
indirizzata lill-banek kummerċjali kollha fl-Indja. (65) Fl-1 ta' Lulju 2011,
it-termini u l-kundizzjonijiet tal-ECS (Skema ta' Kreditu ta' Esportazzjoni)
ġew riveduti mill-Master Circular on Rupee / Foreign Currency
Export Credit & Customer Services to Exporters DBOD No.DIR.
(Exp).BC.04/04.02.002/2011-12. Il-kundizzjonijiet riveduti ma taw ebda
benefiċċju lill-applikant. Għalhekk, skont l-Artikolu 15(1)
tar-Regolament bażiku, din l-iskema mhijiex se tkun ikkumpensata. 3.7. L-Iskema ta’ Eżenzjoni
mit-Taxxa fuq id-Dħul ("ITES") (66) Matul l-investigazzjoni nstab
li l-applikant ma kiseb l-ebda benefiċċju mill-ITES waqt il-PIR.
Għalhekk, ma kienx meħtieġ li din l-iskema tiġi analizzata
aktar f’din l-investigazzjoni. 3.8. L-Iskema ta' Inċentivi
tak-Bengal tal-Punent 1999 ('WBIS 1999') (67) L-Istat tal-Bengal tal-Punent
jagħti l-inċentivi lill-impriżi industrijali eliġibbli
fis-sura ta' għadd ta' benefiċċji li jinkludu eżenzjoni
tat-taxxa fuq il-bejgħ u tat-taxxa fuq il-bejgħ ċentrali fuq
il-bejgħ ta' oġġetti kompluti, biex jinkoraġġixxi
l-iżvilupp industrijali ta' żoni li huma inqas żviluppati
ekonomikament f'dan l-Istat. (a) Bażi
ġuridika (68) Id-deskrizzjoni ddettaljata
ta' din l-iskema kif applikata mill-Gvern tal-Bengal tal-Punent hija stabbilita
f'din in-Notifika Nru 580-CI/H tat-22 ta' Ġunju 1999
tad-Dipartiment tal-Kumnmerċ u l-Industrija tal-Gvern tal-Bengal tal-Punent. (b) L-eliġibbiltà (69) Il-kumpaniji li qed iwaqqfu
stabbilimenti industrijali ġodda jew qed ikabbru fuq skala kbira,
stabbilimenti industrijali eżistenti f'żoni li għadhom mhux
żviluppati, huma eliġibbli li jgawdu mill-benefiċċji ta'
din l-iskema. Madankollu, teżisti lista eżawrjenti ta' industriji li
mhumiex eliġibbli (lista negattiva tal-industriji) li qed iżżomm
il-kumpaniji f'ċerti oqsma ta’ operazzjonijiet milli jgawdu
mill-inċentivi. (c) L-implimentazzjoni
prattika (70) F'din l-iskema, il-kumpaniji
jridu jinvestu f'żoni li għadhom mhux żviluppati. Dawn
iż-żoni, li jirrappreżentaw ċerti unitajiet territorjali
fil-Bengal tal-Punent huma klassifikati f'kategoriji differenti skont
l-iżvilupp ekonomiku tagħhom, filwaqt li fl-istess ħin hemm
żoni żviluppati esklużi mill-applikazzjoni tal-iskemi ta'
inċentiva. Il-kriterju ewlieni biex jiġi stabbilit l-ammont ta’
inċentivi huwa d-daqs tal-investiment u ż-żona fejn tinsab
l-intrapriża jew se tkun tinsab. (d) Konklużjoni (71) Din l-iskema tipprovdi s-sussidji
fit-tifsira tal-Artikoli 3(1)(a)(ii) u 3(2) tar-Regolament bażiku.
Hija tikkostitwixxi kontribut finanzjarju mill-Gvern tal-Bengal tal-Punent,
peress li l-inċentivi mogħtija, fil-każ attwali
eżenzjonijiet tat-taxxa fuq il-bejgħ u tat-taxxa fuq il-bejgħ
ċentrali, inaqqsu d-dħul mit-taxxa li kienet tkun dovuta Barra dan,
dawn l-inċentivi jagħtu benefiċċju lill-kumpaniji,
għaliex itejbu s-sitwazzjoni finanzjarja tagħhom peress li ma
jitħallsux taxxi li kienu jkunu dovuti. (72) Barra minn hekk, l-iskema hija
speċifika għar-reġjun fit-tifsira tal-Artikoli 4(2)(a) u
4(3) tar-Regolament bażiku billi hija disponibbli biss għal
ċerti kumpaniji li nvestew f'ċerti żoni geografiċi nominati
fi ħdan il-ġuriżdizzjoni tal-Istat ikkonċernat. Mhijiex
disponibbli għal kumpaniji li mhumiex f’dawn iż-żoni u, apparti
hekk, il-livell tal-benefiċċju huwa differenzjat skont
iż-żona kkonċernata. (73) Għalhekk
id-WBIS 1999 hija kumpensabbli. (e) Il-kalkolu tal-ammont tas-sussidju (74) L-ammont ta’ sussidju ġie
ikkalkulat fuq il-bażi tal-ammont ta’ taxxa fuq il-bejgħ u t-taxxa
fuq il-bejgħ ċentrali normalment dovut matul il-perjodu
tal-investigazzjoni ta’ reviżjoni imma li b'din l-iskema baqa' ma
tħallasx. Skont l-Artikolu 7(2) tar-Regolament bażiku, dan
l-ammont ta’ sussidju (numeratur) imbagħad ġie allokat fuq
il-bejgħ kollu matul il-perjodu tal-investigazzjoni ta’ reviżjoni
bħala denominatur xieraq, għaliex is-sussidju mhuwiex subordinat
għall-esportazzjoni u ma ngħatax b’referenza għall-kwantitajiet
manifatturati, prodotti, esportati jew trasportati. Ir-rata ta’ sussidju miksub
kien jammonta għal 1,4%. 3.9. L-ammont ta’ sussidji
kumpensabbli (75) L-ammont ta’ sussidji
kumpensabbli ddeterminat skont id-dispożizzjonijiet tar-Regolament
bażiku, espress ad valorem, għall-applikant huwa ta’ 8,7%.
Dawn l-ammonti ta’ sussidjar jaqbżu l-limitu de minimis imsemmi
skont l-Artikolu 14(5) tar-Regolament bażiku. (76) Il-livelli tas-sussidjar
għall-applikant stabbiliti fil-proċedura attwali jidhru hawn
taħt: SKEMI || DEPBS || EPCGS || FMS || WBIS || Total Dhunseri Tea & Petrochem || 6,7% || 0,6% || < 0,1% || 1,4% || 8,7% (77) Għalhekk huwa meqjus li,
skont l-Artikolu 19 tar-Regolament bażiku, is-sussidju baqa'
għaddej matul il-PIR. 3.10. In-natura dejjiema
taċ-ċirkostanzi mibdula fir-rigward tas-sussidju (78) Skont l-Artikolu 19(4)
tar-Regolament bażiku, ġie eżaminat ukoll jekk kienx
raġonevoli li jitqies li ċ-ċirkustanzi mibdula huma ta’ natura
dejjiema. (79) Ġie stabbilit li, matul
il-PIR, l-applikant kompla jibbenefika mill-għoti ta’ sussidji
kumpensabbli mill-GTI. Barra minn hekk, ir-rata tas-sussidju li nstabet matul
din ir-reviżjoni hija inqas minn dik stabbilita matul l-aħħar
investigazzjoni ta’ reviżjoni. Ġie stabbilit ukoll li l-bidliet li
qal li saru l-applikant fil-premessa (7) kienu tabilħaqq saru
fir-realtà. Fil-fatt, l-applikant ma baqax jibbenefika mill-iskema UOE matul
il-PIR, kif inhu indikat fil-premessa (41) ta' hawn fuq. (80) Iżda ġie stabbilit
ukoll li l-iżjed skema importanti użata mill-applikant matul il-PIR
(jiġifieri d-DEBPS ma baqgħetx tintuża fit-30 ta' Settembru 2011,
u bħalissa qed tintuża skema oħra mill-applikant (jiġifieri
rtirar tad-dazju) li ma ntużatx waqt il-PIR. Għalhekk jidher ċar
li s-sitwazzjoni li kienet teżisti waqt il-PIR mhijiex ta' natura
dejjiema, billi din diġà nbidlet b'mod sinifikanti minn dak
iż-żmien 'l hawn. (81) Għalhekk ġie
konkluż li l-investigazzjoni ta' reviżjoni interim parzjali
għandha tintemm mingħajr ma jinbidlu l-miżuri kompensatorji li
hemm fis-seħħ. L-applikant kif ukoll il-partijiet ikkonċernati
l-oħra ġew infurmati bil-fatti u l-kunsiderazzjonijiet li abbażi
tagħhom kien maħsub li jiġi propost l-għeluq
tal-investigazzjoni, ADOTTA DAN IR-REGOLAMENT: Artikolu 1 Ir-reviżjoni interim parzjali
tal-miżuri kompensatorji applikabbli għall-importazzjonijiet ta'
tereftalat tal-poljetilene li attwalment huma kklassifikati bil-kodiċi
NM 3907 60 20, u li joriġinaw, inter alia,
mill-Indja, hija b'dan mitmuma mingħajr emendi għall-miżuri
fis-seħħ. Artikolu 2 Dan ir-Regolament għandu jidħol
fis-seħħ fil-ġurnata ta’ wara l-pubblikazzjoni tiegħu f’Il-Ġurnal
Uffiċjali tal-Unjoni Ewropea. Dan ir-Regolament għandu jorbot
fl-intier tiegħu u japplika direttament fl-Istati Membri kollha. Magħmul fi Brussell, Għall-Kunsill Il-President [1] ĠU L 188, 18.7.2009,
p. 93. [2] ĠU L 301, 30.11.2000,
p. 1. [3] ĠU L 266, 11.10.2005,
p. 1. [4] ĠU L 59, 27.2.2007, p. 34. [5] ĠU L 340, 19.12.2008, p. 1. [6] ĠU C 335, 11.12.2010, p. 7. [7] ĠU L 301, 30.11.2000, p. 21. [8] ĠU L 343, 22.12.2009,
p. 51. [9] ĠU L 266, 11.10.2005, p. 10. [10] ĠU L 59, 27.2.2007, p. 1. [11] ĠU C 335, 11.12.2010, p. 6. [12] ĠU L 266, 11.10.2005, p. 62. [13] ĠU C 102, 2.4.2011,
p. 15. [14] ĠU C 102, 2.4.2011, p.18.