MEMORANDUM TA’ SPJEGAZZJONI

L-Artikolu 3(1) tad-Direttiva 94/62/KE dwar l-imballaġġ u l-iskart mill-imballaġġ jipprovdi definizzjoni ġenerika tal-imballaġġ u l-kriterji għall-interpretazzjoni ta’ x’inhuwa imballaġġ u x’ma huwiex. L-Anness I għad-Direttiva jipprovdi lista ta’ eżempji illustrattivi tal-applikazzjoni ta’ dawn il-kriterji. B’segwitu tar-rekwiżiti tal-Artikolu 3 (1) tad-Direttiva 94/62/KE, il-Kummissjoni għandha teżamina, u fejn meħtieġ tirrevedi, il-lista ta’ eżempji illustrattivi għad-definizzjoni ta’ imballaġġ mogħtija f’Anness I. Sabiex tkompli tiġi armonizzata l-interpretazzjoni tad-definizzjoni tal-imballaġġ fl-UE, irrevediet l-Anness I għad-Direttiva 94/62/KE sabiex iżżid eżempji illustrattivi ġodda li ġew diskussi mal-Istati Membri.

Il-miżura hija meħtieġa sabiex tiċċara każijiet fejn id-demarkazzjoni bejn x’inhuwa imballaġġ u x’ma huwiex, għadha mhix ċara. L-għan huwa li tiffaċilita l-implimentazzjoni u l-infurzar tal-qafas ta' leġiżlazzjoni dwar l-imballaġġ u li toħloq opportunitajiet indaqs għal operaturi ekonomiċi fis-suq intern kollu tal-UE.

Għalhekk, il-Kummissjoni ressqet abbozz ta’ Direttiva għall-vot fil-Kumitat stabbilit skont l-Artikolu 21 tad-Direttiva. Il-Kumitat ma tax opinjoni dwar l-abbozz tad-Direttiva fil-laqgħa tiegħu tat-12 ta’ Diċembru 2011. Fid-dawl tal-pożizzjoni adottata mill-Kumitat, l-oġġett ‘karta approprjata għal tikketti bi twaħħil propju’ tneħħa mill-proposta.

Għalhekk, skont il-proċedura stabbilita fl-Artikolu 5(a) tad-Deċiżjoni 1999/468/KE, qed titressaq quddiem il-Kunsill, Proposta għal Direttiva tal-Kunsill u qiegħda tintbagħat ukoll lill-Parlament Ewropew.

2012/0070 (NLE)

Proposta għal

DIRETTIVA TAL-KUNSILL

li temenda l-Anness I għall-Parlament Ewropew u d-Direttiva tal-Kunsill 94/62/KE dwar l-imballaġġ u l-iskart mill-imballaġġ

(Test b’rilevanza għaż-ŻEE)

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra d-Direttiva tal-Parlament Ewropew u tal-Kunsill 94/62/KE tal-20 ta' Diċembru 1994 dwar l-imballaġġ u l-iskart[1] mill-imballaġġ, u b'mod partikolari l-Artikolu 3(1) tagħha,

Wara li kkunsidra l-proposta tal-Kummissjoni Ewropea,

Billi:

(1)       L-Artikolu 3(1) tad-Direttiva 94/62/KE jiddefinixxi "l-imballaġġ" billi jiddeskrivi għadd ta’ kriterji. L-elementi elenkati fl-Anness I għal dik id-Direttiva huma eżempji illustrattivi tal-applikazzjoni ta' dawn il-kriterji.

(2)       Għal raġunijiet ta’ ċertezza legali u armonizzazzjoni tal-interpretazzjoni tad-definizzjoni ta' "imballaġġ", huwa meħtieġ li tirrevedi u temenda l-lista ta' eżempji illustrattivi sabiex tikkjarifika l-każijiet addizzjonali fejn il-linja ta' demarkazzjoni bejn x'inhuwa imballaġġ u x'ma huwiex, għadha mhix ċara. Ir-reviżjoni ssegwi sejħiet mill-Istati Membri u mill-operaturi ekonomiċi sabiex issaħħaħ l-implimentazzjoni tad-Direttiva u toħloq opportunitajiet indaqs fis-suq intern.

(3)       Id-Direttiva 94/62/KE għalhekk għandha tiġi emendata kif xieraq.

(4)       Il-Kumitat stabbilit skont l-Artikolu 21 tad-Direttiva 94/62/KE ma tax opinjoni dwar il-miżuri stabbiliti f'din id-Direttiva u l-Kummissjoni għalhekk issottomettiet lill-Kunsill proposta dwar il-miżuri u bagħtitha lill-Parlament Ewropew.

ADOTTA DIN ID-DIRETTIVA:

Artikolu 1

L-Anness I għad-Direttiva 94/62/KE huwa sostitwit bit-test li jidher fl-Anness għal din id-Direttiva.

Artikolu 2

1.           L-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattivi neċessarji biex jikkonformaw ma’ din id-Direttiva sa mhux aktar tard mit-30 ta' Settembru 2013. Huma għandhom jikkomunikaw minnufih it-test ta’ dawk id-dispożizzjonijiet lill-Kummissjoni.

Meta l-Istati Membri jadottaw dawk id-dispożizzjonijiet, dawn għandhom jinkludu referenza għal din id-Direttiva jew għandhom ikunu akkumpanjati b’tali referenza fl-okkażjoni tal-pubblikazzjoni uffiċjali tagħhom. L-Istati Membri għandhom jiddeterminaw kif għandha ssir din ir-referenza.

2.           L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li huma jadottaw fil-qasam kopert b’din id-Direttiva.

Artikolu 3

Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f'Il-Ġurnal Uffiċjali tal-Unjoni Ewropea.

Artikolu 4

Din id-Direttiva hija indirizzata lill-Istati Membri.

Magħmula fi Brussel,

                                                                       Għall-Kunsill

                                                                       Il-President

ANNESS

‘ANNESS I

EŻEMPJI ILLUSTRATTIVI GĦALL-KRITERJI MSEMMIJA FL-ARTIKOLU 3(1)

Eżempji illustrattivi għall-kriterju (i)

Imballaġġ

Kaxxi tal-ħelu

Tgeżwira tal-plastik madwar kaxxa ta' CD

Boroż tal-posta għall-katalgi u għar-rivisti (b'rivista ġo fihom).

Forom tal-karta għal madwar il-kejkijiet li jinbiegħu bil-kejk magħhom

Rollijiet, tubi u ċilindri li magħhom jiddawwar materjal flessibbli (pereżempju film tal-plastik, aluminju, karta), għajr rollijiet, tubi u ċilindri intenzjonati bħala parts tal-makkinarju tal-produzzjoni u mhux biex jintużaw għall-preżentazzjoni ta' prodott bħala unità ta' bejgħ

Qsari maħsubin biex jintużaw biss għall-bejgħ u għat-trasportazzjoni tal-pjanti u mhux biex jibqgħu mal-pjanta tul ħajjitha

Fliexken tal-ħġieġ għas-soluzzjonijiet tal-injezzjonijiet

Mgħażel tas-CD (CD spindles) (li jinbiegħu bis-CDs, mhux maħsubin biex jintużaw għall-ħżin)

Spallieri (li jinbiegħu bil-ħwejjeġ)

Kaxxi tas-sulfarini

Sistemi ta’ iżolament sterili (boroż, trejs u materjali meħtieġa għall-preservazzjoni tal-isterilità tal-prodott)

Kapsuli tal-magni tax-xarbiet (pereżempju kafè, kawkaw, ħalib) li jitħallew vojta wara l-użu

Ċilindri tal-azzar li jistgħu jerġgħu jimtlew użati għal tipi differenti ta' gass, minbarra ċ-ċilindri għat-tifi tan-nar

Mhux imballaġġ

Qsari maħsuba biex jibqgħu mal-pjanta tul ħajjitha

Kaxxi tal-għodda

Boroż tat-tè

Saffi tax-xema' madwar il-ġobon

Ġilda taz-zalzett

Spallieri (li jinbiegħu separatament)

Kapsuli tal-kafè tal-magni tax-xarbiet, boroż tal-fojl tal-kafè, u karta tal-filtru għall-imżiewed tal-kafè li tintrema’ flimkien mal-prodott tal-kafè użat

Kartriġis għall-printers

Kaxxi tas-CD, tad-DVD u tal-vidjo (li jinbiegħu b’CD, DVD jew vidjo ġo fihom)

Mgħażel tas-CD (li jinbiegħu vojta, maħsubin biex jintużaw għall-ħżin)

Boroż li jistgħu jinħallu għad-deterġenti

Dwal għall-oqbra (kontenituri għax-xemgħat)

Mitħna tal-id mekkanika għat-tħin (integrata f’reċipjent li jista’ jerġa' jimtela, pereżempju mitħna tal-bżar li tista’ terġa’ timtela)

Eżempji illustrattivi għall-kriterju (ii)

Imballaġġ, jekk ikun imfassal u maħsub biex jimtela mal-bejgħ

Boroż tal-ġarr tal-karti jew tal-plastik

Platti u kikkri għar-rimi wara l-użu

Cling film

Boroż għas-sandwiċis

Fojl tal-aluminju

Fojl tal-plastik għall-ħwejjeġ imnaddfin fil-londri

Ċilindri tal-azzar li jistgħu jerġgħu jimtlew użati għal tipi differenti ta' gass, minbarra ċ-ċilindri għat-tifi tan-nar

Mhux imballaġġ

Oġġett li jħawwad

Pożati għar-rimi wara l-użu

Karta tat-tgeżwir (li tinbiegħ separatament)

Forom tal-karta għas-sajran fil-forn (li jinbiegħu vojta)

Forom tal karta għal madwar il-kejkijiet mingħajr il-kejk

Eżempji illustrattivi għall-kriterju (iii)

Imballaġġ

Tikketti mdendla direttament ma' prodott jew imwaħħla miegħu

Parti mill-imballaġġ

Pinzell tal-maskara li jifforma parti mis-sistema tal-għeluq tal-kontenitur

Tikketti adesivi mwaħħla ma' oġġett ieħor ta' imballaġġ

Stejpils

Koperturi tal-plastik

Apparat għall-kejl tad-doża li jifforma parti mis-sistema tal-għeluq tal-kontenituri tad-deterġenti.

Mitħna tal-id mekkanika għat-tħin (integrata f’reċipjent li ma jistax jerġa' jimtela, li jkun mimli bi prodott, pereżempju mitħna tal-bżar mimlija bil-bżar)

Mhux imballaġġ

Tikketti għall-identifikazzjoni bil-frekwenza tar-radju (RFID)

[1]               ĠU L 365, 31.12.1994, p. 10.