OPINJONI TAL-KUMMISSJONI skont l-Artikolu 294(7)(ċ) tat-Trattat dwar il-Funzjonament tal-Unjoni Ewropea,dwar l-emenda[i] tal-Parlament Ewropewgħall-pożizzjoni tal-Kunsill fir-rigward tal-proposta għal REGOLAMENT TAL-PARLAMENT EWROPEW U TAL-KUNSILLdwar it-tqegħid fis-suq u l-użu tal-prodotti bijoċidali /* COM/2012/0135 final - 2009/0076 (COD) */
2009/0076 (COD) OPINJONI TAL-KUMMISSJONI
skont l-Artikolu 294(7)(ċ) tat-Trattat dwar il-Funzjonament tal-Unjoni
Ewropea,
dwar l-emenda[i] tal-Parlament Ewropew
għall-pożizzjoni tal-Kunsill fir-rigward tal-proposta għal
REGOLAMENT TAL-PARLAMENT EWROPEW U TAL-KUNSILL
dwar it-tqegħid fis-suq u l-użu tal-prodotti bijoċidali 1. daħla L-Artikolu 294(7)(ċ) tat-Trattat
dwar il-Funzjonament tal-Unjoni Ewropea jistipula li l-Kummissjoni għandha
tagħti opinjoni dwar l-emendi proposti mill-Parlament Ewropew fit-tieni
qari. Il-Kummissjoni qed tagħti l-opinjoni tagħha hawn taħt dwar
l-emendi proposti mill-Parlament. 2. sfond Fit-12 ta’ Ġunju 2009,
il-Kummissjoni ppreżentat proposta għal Regolament lill-Parlament
Ewropew u lill-Kunsill dwar it-tqegħid fis-suq u l-użu tal-prodotti
bijoċidali għall-adozzjoni permezz tal-proċedura
tal-kodeċiżjoni kif stipulat fl-Artikolu 251 tat-Trattat tal-KE. Il-Kumitat Ekonomiku u Soċjali ta
l-opinjoni tiegħu fis-17 ta' Frar 2010. Il-Parlament Ewropew adotta l-pożizzjoni
tal-ewwel qari tiegħu fit-22 ta' Settembru 2010. Il-Kunsill laħaq ftehim politiku dwar
il-proposta fl-20 ta’ Diċembu 2010 u adotta
l-pożizzjoni komuni tiegħu fil-21 ta’ Ġunju 2011. COREPER ta l-qbil tiegħu dwar
il-kompromess tat-tieni qari fit-23 ta' Novembru 2011. Il-Parlament Ewropew adotta
r-Riżoluzzjoni Leġiżlattiva tiegħu fit-tieni qari
fid-19 ta' Jannar 2012. 3. L-għan tal-Proposta
tal-Kummissjoni L-għan tar-Regolament propost huwa li
jitjieb il-funzjonament tas-suq intern tal-prodotti bijoċidali filwaqt li
jiġi żgurat livell għoli ta’ ħarsien tal-ambjent u
tas-saħħa tal-bniedem. Il-proposta għandha l-għan li
tirranġa għadd ta' djgħufijiet [in-nuqqasijiet] li ġew
identifikati matul l-ewwel 8 snin tal-implimentazzjoni
tad-Direttiva 98/8/KE, li tnaqqas l-ispejjeż tal-konformità,
tantiċipa l-problemi tal-awtorizzazzjoni tal-prodott u tal-proċedura
tar-rikonoxximent reċiproku li ġejjin, u taġġorna u tadatta
l-istrument għall-iżviluppi politiċi reċenti. 4. L-opinjoni tal-kummissjoni
dwar l-emendi proposti mill-parlament ewropew Fis-Sessjoni Plenarja tiegħu
tad-19 ta' Jannar 2012, il-Parlament Ewropew adotta pakkett ta'
kompromess li dwaru kien hemm qbil mal-Kunsill bil-ħsieb li jintlaħaq
ftehim fit-tieni qari. Dawn l-emendi jikkonċernaw essenzjalment: –
il-kriterji għall-esklużjoni ta’ sustanzi
attivi mill-proċess tal-approvazzjoni, –
il-kamp ta’ applikazzjoni tal-proċedura
ċentralizzata tal-UE għal prodotti bijoċidali, –
flessibbiltà akbar fir-rigward tar-rekwiżiti
tad-dejta u tat-tnaqqis fl-ittestjar ta’ annimali vertebri, –
ir-rekwiżiti tat-tikkettar għal
oġġetti trattati, –
il-pubblikazzjoni ta’ rapporti u t-tixrid ta’
informazzjoni, –
il-kompiti attribwiti lill-Aġenzija Ewropea
għas-Sustanzi Kimiċi u l-bażi għall-ħlas ta’ tariffi
lil dik l-Aġenzija. Il-Kummissjoni se taċċetta l-pakkett
ta' kompromess peress li huwa b’mod ġenerali f'konformità mal-għan
globali u l-karatteristiċi ġenerali tal-proposta. Dwar l-użu ta’
atti ta’ implimentazzjoni sabiex jiġu stabbiliti t-tariffi li
jitħallsu lill-Aġenzija Ewropea għas-Sustanzi Kimiċi,
id-definizzjoni ta’ nanomaterjali u t-tariffi għall-applikazzjonijiet
għal rikonoxximent reċiproku, il-Kummissjoni għamlet
dikjarazzjonijiet li huma mehmuża ma’ din l-opinjoni. 5. Konklużjoni Skont l-Artikolu 293(2) tat-Trattat dwar
il-Funzjonament tal-Unjoni Ewropea, il-Kummissjoni qed taċċetta
l-emendi li l-Parlament Ewropew ivvota favurihom fit-tieni qari skont it-test
tal-kompromess deskritt hawn fuq. Anness: Dikjarazzjonijiet tal-Kummissjoni Dikjarazzjoni tal-Kummissjoni dwar
l-użu ta’ atti ta’ implimentazzjoni biex jiġu stabbiliti t-tariffi Il-Kummissjoni hija tal-opinjoni li t-tariffi
li għandhom jitħallsu lill-ECHA ma jistgħux jiġu
determinati permezz ta’ atti ta’ implimentazzjoni. Madankollu, bi spirtu ta’
kompromess, il-Kummissjoni se taċċetta t-test finali kif miftiehem
bejn il-Kunsill u l-Parlament Ewropew. Minkejja dan, fir-rigward ta’ din
il-kwistjoni speċifika, il-Kummissjoni se żżomm id-dritt li
tiddisponi mir-rimedji legali pprovduti mit-Trattat bil-għan li tikseb
kjarfika mill-Qorti dwar il-kwistjoni tad-delimitazzjoni bejn
l-Artikoli 290 u 291. Dikjarazzjoni tal-Kummissjoni dwar
id-definizzjoni ta’ nanomaterjali Filwaqt li l-Kummissjoni tista’
taċċetta t-test finali kif miftiehem bejn il-Kunsill u l-Parlament Ewropew,
hija ssostni l-fehma tagħha li referenza diretta
għar-Rakkomandazzjoni tal-Kummissjoni 2011/696/UE fuq id-definizzjoni
tan-nanomaterjali kienet tkun iktar adattata minħabba l-ħtieġa
ta' definizzjoni armonizzata ta' nanomaterjali li tapplika fil-leġiżlazzjoni
tal-UE kollha u l-possibbiltà li tkun adattata faċilment għal
żviluppi tekniċi u xjentifiċi. Għal dan il-għan,
il-Kummissjoni se tieħu l-passi meħtieġa biex tiżgura li
dan ikun rifless fi kwalunkwe proposta fil-ġejjieni. Dikjarazzjoni tal-Kummissjoni dwar
it-tariffa għall-applikazzjonijiet għal rikonoxximent reċiproku Il-Kummissjoni, billi tagħmel il-proposta
tagħha għal Regolament dwar it-tariffi skont l-Artikolu 80(1),
għandha l-għan li tiżgura li l-livell tat-tariffa
għall-applikazzjonijiet għal rikonoxximent reċiproku li
għandha titħallas lill-Aġenzija Ewropea għas-Sustanzi
Kimiċi se jqis il-livel ta' tariffi mħallsa fl-Istati Membri
differenti, u ma jikkostitwixxix piż sproporzjonat għall-kumpaniji,
partikolarment għall-Impriżi Żgħar u ta’ Daqs Medju.