MEMORANDUM TA’ SPJEGAZZJONI

1.           IL-KUNTEST TAL-PROPOSTA

1.1. Raġunijiet għall-proposta u l-għanijiet tagħha

Din il-proposta għandha l-għan li tipposponi sat-30 ta’ April 2014 l-iskadenza għat-traspożizzjoni tad-Direttiva 2004/40/KE[1] tal-Parlament Ewropew u tal-Kunsill tad-29 ta’ April 2004 dwar il-ħtiġijiet minimi għas-saħħa u s-sigurtà fir-rigward tal-espożizzjoni ta’ ħaddiema għal riskji li jiġu minn aġenti fiżiċi (qawwiet elettromanjetiċi) (It-18-il Direttiva individwali fis-sens tal-Artikolu 16(1) tad-Direttiva 89/391/KEE).

Fl-2006, il-komunità medika għarrfet lill-Kummissjoni dwar it-tħassib tagħha rigward l-implimentazzjoni ta' din id-Direttiva, filwaqt li qalet li l-valuri limitu ta’ espożizzjoni stabbiliti minn din jillimitaw b’mod sproporzjonat l-użu u l-iżvilupp tal-applikazzjonijiet mediċi ta' reżonanza manjetika (MR), meqjusin illum bħala strument indispensabbli għad-dijanjożi u t-trattament ta’ numru ta' mard. Għaldaqstant xi setturi industrijali oħrajn esprimew it-tħassib tagħhom dwar l-impatt tad-Direttiva fuq l-attivitajiet tagħhom.

Il-Kummissjoni ħadet numru ta’ miżuri bħala rispons għal dan it-tħassib.

Sabiex il-Kummissjoni twettaq analiżi profonda tal-impatt u tipproponi emendi, l-iskadenza għat-traspożizzjoni tad-Direttiva tressqet mit-30 ta’ April 2008 għat-30 ta’ April 2012 bid-Direttiva 2008/46/KE[2] tal-Parlament Ewropew u tal-Kunsill tat-23 ta’ April 2008 li temenda d-Direttiva 2004/40/KE dwar il-ħtiġijiet minimi għas-saħħa u s-sigurtà fir-rigward tal-espożizzjoni ta’ ħaddiema għal riskji li jiġu minn aġenti fiżiċi (qawwiet elettromanjetiċi).

Il-Kummissjoni eżaminat is-sitwazzjoni kollha kemm hi, analizzat l-aħħar studji xjentifiċi, inkluż dak imniedi mill-Kummissjoni dwar l-impatt negattiv li jista' jkollhom il-valuri limitu ta' espożizzjoni stabbiliti bid-Direttiva fuq l-użu mediku tat-teknoloġiji tal-immaġni li jużaw ir-reżonanza manjetika (MR). Wara bosta konsultazzjonijiet mal-partijiet interessati u bil-konsiderazzjoni xierqa tal-aħħar rakkomandazzjonijiet xjentifiċi[3], fl-14 ta' Ġunju 2011 il-Kummissjoni adottat il-proposta ta' COM(2011) 348 għal Direttiva ġdida biex temenda u tissostitwixxi d-Direttiva 2004/40/KE, bil-ħsieb li jkun garantit livell għoli ta' protezzjoni tas-saħħa u s-sigurtà għall-ħaddiema u fl-istess waqt tippermetti attivitajiet mediċi u oħrajn industrijali li jużaw il-qawwiet elettromanjetiċi biex jissoktaw u jiżviluppaw. Madanakollu l-adozzjoni ddewmet primarjament minħabba l-fatt li r-rakkomandazzjonijiet internazzjonali l-ġodda fuq l-espożizzjoni tal-ħaddiema u l-pubbliku għall-qawwiet elettromanjetiċi, ġew ippubblikati biss f'Diċembru 2010, minflok fl-2009, kif kien mistenni.

Barra minn hekk, il-proposta ta' COM(2011) 348 għandha l-għan li taġġorna u ttejjeb numru sinifikanti ta' dispożizzjonijiet oħrajn tad-Direttiva 2004/40/KE; din tintroduċi wkoll xi elementi ġodda biex tagħmilha iktar faċli għall-impjegaturi, speċjalment għal negozji żgħar, biex jimplimentaw il-miżuri.

Meta l-proposta tal-Kummissjoni kienet ġiet adottata, il-Parlament Ewropew u l-Kunsill bdew jaħdmu mill-aktar fis bil-ħsieb li jemendaw id-Direttiva 2004/40/KE qabel it-30 ta' April 2012.

Madanakollu, minħabba

· il-kumplessità teknika tas-suġġett inkwistjoni li jeħtieġ diskussjonijiet fit-tul mal-esperti nazzjonali, u

· l-opinjonijiet tassew diverġenti fuq uħud mid-dispożizzjonijiet ewlenin tal-proposta,

x'aktarx il-Parlament Ewropew u l-Kunsill mhux se jiffinalizzaw il-proċess ta' adozzjoni qabel it-30 ta' April 2012.

F'dawn iċ-ċirkostanzi, hemm il-ħtieġa ta' Direttiva ġdida li tipposponi għat-tieni darba l-iskadenza tat-traspożizzjoni tad-Direttiva 2004/40/KE. Hemm bżonn ta' prevenzjoni milli tinħoloq sitwazzjoni legali inċerta wara t-30 ta' April 2012, meta l-Istati Membri kollha jkollhom jittrasponu d-Direttiva 2004/40/KE attwali, jekk ma tittiħidx iżjed azzjoni.

Din l-inċertezza legali jkollha żewġ konsegwenzi:

– il-Kummissjoni jkollha fil-prinċipju tniedi proċedimenti ta' ksur minħabba nuqqas ta' komunikazzjoni tal-miżuri tat-traspożizzjoni kontra kwalunkwe Stat Membri li jkun għadu ma trasponiex id-Direttiva.

– id-Direttiva 2004/40/KE jibda jkollha effett vertikali dirett fl-ordni ġuridiku nazzjonali tal-Istati Membri kollha, u ċ-ċittadini jkunu jistgħu jieħdu l-gvern tagħhom il-qorti minħabba li dan ma jkunx implimenta d-Direttiva.

Jidhrilna li huwa xieraq li tiġi posposta l-iskadenza tat-traspożizzjoni b'sentejn ħalli jingħata ħin biżżejjed lill-Parlament Ewropew u lill-Kunsill sabiex jiddiskutu u jilħqu kompromess abbażi tal-proposta tal-Kummissjoni COM(2011) 348 għal Direttiva ġdida, li taġġorna u ttejjeb id-dispożizzjonijiet tad-Direttiva 2004/40/KE filwaqt li tħassar u tissostitwixxi d-Direttiva ta' qabilha.

1.2. Id-Direttiva 2004/40/KE

Id-Direttiva 2004/40/KE hija t-18-il Direttiva individwali fis-sens tal-Artikolu 16(1) tad-Direttiva tal-Kunsill 89/391/KEE tat-12 ta’ Ġunju 1989 dwar l-introduzzjoni ta' miżuri sabiex jinkoraġġixxu titjib fis-sigurtà u s-saħħa tal-ħaddiema fuq ix-xogħol. Din għandha x'taqsam mal-effetti negattivi fuq is-saħħa f'perjodu qasir tal-ħaddiema esposti għal qawwiet elettromanjeti waqt xogħolhom.

Id-dispożizzjonijiet tad-Direttiva huma r-rekwiżiti minimi, iżda kull Stat Membru jista' jadotta regolamenti aktar stretti.

Id-Direttiva tistabbilixxi l-valuri limitu ta' espożizzjoni għall-qawwiet elettriċi, manjetiċi u elettromanjetiċi li jvarjaw mal-ħin bi frekwenzi ta' bejn 0 u 300 GHz[4]. L-ebda ħaddiem ma jista' jkun espost għal valuri li jaqbżu dawn il-limiti, li huma bbażati fuq kunsiderazzjonijiet bijoloġiċi u tal-impatt fuq is-saħħa.

Id-Direttiva tistabbilixxi wkoll valuri ta' azzjoni għall-qawwiet statiċi u li jvarjaw mal-ħin. Dawn il-valuri jistgħu jitkejlu direttament u jindikaw livell limitu li meta jinqabeż l-impjegaturi jkollhom jieħdu waħda jew iżjed mill-miżuri stipulati fid-Direttiva. Il-konformità ma' dawn il-valuri ta' azzjoni tiżgura l-konformità mal-valuri limitu rilevanti ta' espożizzjoni.

Il-limiti imposti mid-Direttiva ġew stabbiliti abbażi tar-rakkomandazzjonijiet li nħarġu mill-ICNIRP fl-1998, l-organizzazzjoni li internament hija rikonoxxuta bħala l-awtorità li tivvaluta l-impatti fuq is-saħħa ta' din it-tip ta' radjazzjoni. L-ICNIRP taħdem mill-qrib mal-organizzazzjonijiet internazzjonali relevanti kollha, bħad-WHO, l-ILO, l-IRPA, l-ISO, is-CENELEC, l-IEC, is-CIE u l-IEEE.

Id-Direttiva hija bbażata fuq il-filosofija ta' prevenzjoni li diġà hija stabbilità f'termini iżjed ġenerali fid-Direttiva Qafas 89/391/KEE:

– il-protezzjoni tal-ħaddiema kollha, irrispettivament mis-settur tal-attività tagħhom, billi ħaddiema li huma esposti għall-istess riskji għandhom l-istess dritt tal-protezzjoni;

– l-obbligu tal-impjegaturi li jiddeterminaw u jivvalutaw ir-riskji;

– it-tneħħija jew, fejn possibbli, it-tnaqqis tar-riskji identifikati;

– tagħrif u taħriġ speċifiċi għall-ħaddiema inkwistjoni u konsultazzjoni magħhom.

– is-sorveljanza medika xierqa.

Id-Direttiva tapplika għas-setturi kollha tal-attività mingħajr eċċezzjoni u għandha tiġi trasposta fil-leġiżlazzjoni nazzjonali sa mhux aktar tard mit-30 ta' April 2012 sakemm ma tittiħidx iżjed azzjoni.

Matul id-diskussjonijiet ta' qabel l-adozzjoni tagħha, il-każ speċifku tal-immaġni bir-reżonanza fil-mediċina ġie diskuss fid-dettall kemm mill-Kunsill kif ukoll mill-Parlament Ewropew. L-esperti nazzjonali mill-istituzzjonijiet bħan-National Radiation Protection Board (NRPK, ir-Renju Unit), l-Institut national de recherche et de sécurité (INRS, Franza), il-Finnish Institute of Occupational Health (FIOH, il-Finlandja) u l-Bundesamt für Strahlenschutz (BfS, il-Ġermanja) taw appoġġ tekniku għan-negozjati fil-Kunsill. Il-Presidenza tal-Kunsill talbet, f'bosta okkażjonijiet, l-opinjoni tal-ICNIRP.

Fin-nuqqas ta' kwalunkwe evidenza ta' impatt li mhuwiex mixtieq, il-Parlament Ewropew u l-Kunsill adottaw id-Direttiva, b'ċerti emendi fil-valuri li kienu proposti oriġinarjament mill-Kummissjoni. Dawn jinkludu li ma jiġix stabbilit valur limitu ta' espożizzjoni għall-qawwiet manjetiċi statiċi, komponent essenzjali tal-MRI, minħabba li dan il-valur kien qed jiġi emendat fid-dawl tal-aħħar sejbiet xjentifiċi, li saru disponibbli waqt l-adozzjoni tad-Direttiva.

1.3. Proposta ta' COM(2011) 348 għal Direttiva ġdida

Il-proposta t'hawn fuq għandha l-għan li taġġorna u ttejjeb id-dispożizzjonijiet tad-Direttiva 2004/40/KE filwaqt li tħassarha u tissostitwiha. Din iżżomm għadd ta' prinċipji u dispożizzjonijiet importanti tad-Direttiva 2004/40/KE.

L-iżjed bidliet importanti li l-proposta tintroduċi, filwaqt li jiġu kkonsidrati l-aħħar sejbiet xjentifiċi f'dan il-qasam, huma:

– definizzjonijiet iżjed ċari, b'mod partikolari għall-effetti negattivi fuq is-saħħa (l-Artikolu 2 tad-Direttiva 2004/40/KE);

– tiddaħħal s-sistema riveduta għall-valuri limitu u ta' referenza li jvarjaw mill-valuri limitu attwali u l-valuri attwali ta' azzjoni fil-firxa ta' bejn 0 u 100 kHz (din se taffettwa l-Artikoli 2 u 3 tad-Direttiva 2004/40/KE kif ukoll l-Anness tagħha);

– jiddaħħlu indikaturi biex jiffaċilitaw il-kejl u l-kalkoli (l-Artikolu 3(3)) u biex jiggwidaw dwar il-konsiderazzjoni ta' inċertezzi fil-kejl. Il-leġiżlazzjoni dwar is-sikurezza tal-prodott stabbilita bid-Direttivi 1999/5/KE u 2006/95/KE tiżgura li l-pubbliku, inklużi l-ħaddiema, mhuwiex espost għal livelli ogħla minn dawk stabbiliti mir-Rakkomandazzjoni 1999/519/KEE, sakemm il-prodotti qed jintużaw kif suppost. Peress li l-livelli stabbiliti għall-pubbliku huma iktar baxxi minn dawk stabbiliti għall-ħaddiema u jinkludu l-protezzjoni kontra effetti fit-tul, il-konformità ma' dawn id-Direttivi tistabbilixxi protezzjoni biżżejjed f'dawn is-sitwazzjonijiet;

– tiddaħħal daqsxejn gwida sabiex tkun żgurata valutazzjoni tar-riskju simplifikata iżda iktar effiċjenti (l-Artikolu 4), sabiex tkun faċilitata l-ħidma tal-evalwazzjoni u tillimita l-piż fuq l-SMEs;

– tiddaħħal flessibbiltà limitata iżda xierqa billi jiġi propost qafas ikkontrollat għal derogi limitati għall-industrija mill-valuri limitu u ta' azzjoni. Il-proposta tinkludi żewġ derogi speċifiċi, waħda għall-applikazzjonijiet mediċi ta' reżonanza manjetika (MR), u oħra għall-forzi armati. It-tielet deroga hija għal sitwazzjonijiet okkażjonali, soġġetta għal kontroll u awtorizzazzjoni stretta mill-Istati Membri; segwita minn evalwazzjoni. L-Istati Membri għandhom jgħarrfu lill-Kummissjoni dwar kwalunkwe awtorizzazzjoni mogħtija. Dawn it-tliet derogi, imfassla wara konsultazzjonijiet intensi mal-partijiet interessati kollha u definiti sew fil-kamp ta' applikazzjoni tagħhom, jassiguraw livell għoli ta' protezzjoni tas-saħħa u s-sigurtà filwaqt li jiżguraw li l-attivitajiet mediċi u industrijali ma jkunux imfixkla;

– jiddaħħal razzjonal għas-sorveljanza medika (l-Artikolu 8);

– tingħata attenzjoni speċjali lill-każ speċifiku tal-applikazzjonijiet mediċi li jużaw ir-reżonanza manjetika u attivitajiet relatati;

– dispożizzjoni għal miżuri kumplimentari li ma jorbtux bħal gwida prattika li ma torbotx.

2. KONSULTAZZJONI MAL-PARTIJIET INTERESSATI U VALUTAZZJONI TAL-IMPATT 2.1. Il-konsultazzjoni mal-partijiet interessati

Il-Konsultazzjoni tal-Kumitat Konsultattiv dwar is-Sigurtà u s-Saħħa fuq il-Post tax-Xogħol

Ir-rappreżentanti tal-imsieħba soċjali u r-rappreżentanti tal-gvernijiet tas-27 Stat Membru fil-Kumitat Konsultattiv dwar is-Sigurtà u s-Saħħa fuq il-Post tax-Xogħol, li ltaqgħu fil-plenarja nhar l-1 ta' Diċembru 2011, qablu li tiġi posposta d-data ta' skadenza għat-traspożizzjoni tad-Direttiva 2004/40/KE fil-ordni ġuridiku nazzjonali ta' kull Stat Membru sabiex tkun evitata sitwazzjoni ta' inċertezza legali wara t-30 ta' April 2012, u sabiex jitħalla biżżejjed żmien lill-Parlament Ewropew u lill-Kunsill biex jilħqu kompromess dwar il-proposta tal-Kummissjoni COM(2011) 348.

Il-konsultazzjoni mal-imsieħba soċjali tal-UE

Minħabba n-natura tal-proposta, li taffettwa biss id-data tat-traspożizzjoni tad-Direttiva mingħajr ma temenda d-dispożizzjonijiet infushom, u wara konsultazzjoni mas-Servizz Legali u s-Segretarjat Ġenerali tal-Kummissjoni, ġie deċiż li f'dan il-każ m'hemmx bżonn ta' konsultazzjoni formali mal-imsieħba soċjali fuq livell Ewropew, u dan skont l-Artikolu 154 tat-Trattat dwar il-Funzjonament tal-Unjoni Ewropea. Madanakollu, l-imsieħba soċjali transindustrijali tal-UE ġew infurmati bil-proposta permezz ta' ittra mingħand il-Kummissarju Andor u ġew mistiedna jibagħtu l-kummenti tagħhom.

2.2. It-trażmissjoni ta' din il-proposta lill-parlamenti nazzjonali

L-abbozzi tal-atti leġiżlattivi, inklużi proposti mingħand il-Kummissjoni, li ntbagħtu lill-Parlament Ewropew u lill-Kunsill għandhom jintbagħtu lill-parlamenti nazzjonali skont il-Protokoll (Nru 1) dwar ir-rwol tal-Parlamenti nazzjonali fil-Unjoni Ewropea, mehmuż mat-Trattati.

Skont l-Artikolu 4 tal-Protokoll, għandhom jgħaddu tmien ġimgħat minn meta l-abbozz tal-att leġiżlattiv ikun disponibbli għall-parlamenti nazzjonali sad-data ta' meta jitqiegħdu fuq aġenda proviżorja għall-Kunsill għall-adozzjoni tiegħu jew għall-adozzjoni ta' pożizzjoni taħt proċedura leġiżlattiva.

Madanakollu, skont l-Artikolu 4 għandu jkun possibbli li jsiru eċċezzjonijiet f'każijiet ta' urġenza, li r-raġuni għalihom għandhom jiġu dikjarati fl-att jew fil-pożizzjoni tal-Kunsill. L-adozzjoni ta' din il-proposta mill-Parlament Ewropew u mill-Kunill għandha tkun ikkonsidrata bħala każ ta' urġenza assoluta għar-raġunijiet li jissemmew hawn fuq, u li jistgħu jitniżżlu fil-qosor kif ġej.

Il-proposta tal-Kummissjoni COM(2011) 348, li bħalissa qed tiġi diskussa mill-Parlament Ewropew u mill-Kunsill, għandha l-ħsieb li taġġorna u ttejjeb id-dispożizzjonijiet tad-Direttiva 2004/40/KE filwaqt li tħassarha u tissostitwiha, qabel it-30 ta' April 2012. Għaldaqstant, il-maġġoranza l-kbira tal-Istati Membri ma trasponewx id-Direttiva 2004/40/KE, u qed jistennew l-adozzjoni tad-Direttiva l-ġdida aġġornata bbażata fuq il-proposta t'hawn fuq.

Madanakollu, minħabba l-kumplessità tas-suġġett inkwistjoni u l-opinjonijiet tassew diverġenti fil-Kunsill, jidher mhux possibbli li l-Parlament Ewropew u l-Kunsill jiffinalizzaw il-proċess tal-adozzjoni qabel id-data tal-iskadenza tat-30 ta' April 2012.

Għalhekk il-proposta, li l-għan waħdieni tagħha huwa li tipposponi b'sentejn id-data tal-iskadenza għat-traspożizzjoni tad-Direttiva 2004/40/KE, trid tiġi adottata b'urġenza fil-perjodu qasir ħafna ta' żmien li baqa'. Jekk il-proposta ma tiġix adottata sad-data tal-iskadenza tat-30 ta' April 2012, jista' jkun hemm konsegwenzi legali negattivi fl-ordinijiet ġuridiċi interni ta' xi Stat Membru li għadu ma trasponiex id-Direttiva (ara s-Sezzjoni 1.1 t'hawn fuq).

2.3. Valutazzjoni tal-Impatt

Minħabba l-urġenza tal-proposta u l-impatt limitat tagħha, il-prosposta m'għandhiex inkluża magħha Valutazzjoni tal-Impatt separata.

Jekk ma jsir xejn f'dan l-istadju, l-Istati Membri li għadhom ma trasponewx id-Direttiva 2004/40/KE fil-leġiżlazzjoni nazzjonali, jkunu qed jiġu obbligati biex jagħmlu hekk u biex jinfurzawha f'perjodu qasir ħafna ta' żmien, jiġifieri sad-data attwali tal-iskadenza tat-30 ta' April 2012, b'konsegwenzi potenzjalment serji għall-kontinwità tas-servizzi tal-kura tas-saħħa li jużaw l-MRI. Ċerti attivitajiet industrijali jistgħu wkoll jiġu affettwati b'mod negattiv.

Fi kwalunkwe Stat Membru li ma trasponiex id-Direttiva sal-iskadenza, tista' tinħoloq sitwazzjoni legali tassew inċerta. Skont il-prinċipju tal-effett dirett vertikali tad-direttivi tal-UE, stabbilit mill-Qorti tal-Ġustizzja, iċ-ċittadini tagħhom jistgħu jressqu azzjonijiet kontrihom fil-qrati nazzjonali minħabba li ma jkunux implimentaw id-Direttiva. Barra minn hekk, il-Kummissjoni jkollha, fil-prinċipju, tippreżenta proċeduri ta' ksur kontra dawk l-Istati Membri minħabba li ma jkunux ikkomunikaw il-miżuri tat-traspożizzjoni.

Il-posponiment tad-data tat-traspożizzjoni ma jimpedix mingħajr mistħoqq l-użu tal-MRI jew attivitajiet industrijali oħra. Fl-istess waqt, il-posponiment jagħti biżżejjed żmien biex id-Direttiva, b'mod partikolari l-valuri limitu ta' espożizzjoni, tkun aġġornata u mtejba, permezz ta' Direttiva ġdida bbażata fuq il-proposta tal-Kummissjoni COM(2011) 348. Minħabba li din tirrifletti sejbiet xjentifiċi ġodda, din tassigura livell għoli ta' protezzjoni għall-ħaddiema u l-kontinwità tal-attivitajiet ekonomiċi.

Il-bdil propost jaffettwa biss l-obbligazzjoni tal-Istati Membri li jittrasponu d-Direttiva sat-30 ta' April 2012, u jestendiha sat-30 ta' April 2014. Il-bdil ma jaffettwax lis-sustanza tad-Direttiva inkwistjoni u għalhekk ma jimponix xi obbligazzjonijiet addizzjonali fuq in-negozji.

3. L-ELEMENTI LEGALI TAL-PROPOSTA 3.1. Sommarju tal-miżuri proposti

Il-proposta temenda l-Artikolu 13(1) tad-Direttiva 2004/40/KE billi tipposponi d-data tat-traspożizzjoni għat-30 ta' April 2014.

3.2. Il-bażi legali

L-Artikolu 153(2) tat-Trattat dwar il-Funzjonament tal-Unjoni Ewropea,

3.3. Il-prinċipju tas-sussidjarjetà

Il-prinċipju tas-sussidjarjetà japplika peress li l-proposta għandha x'taqsam ma' qasam — il-protezzjoni tas-saħħa u s-sigurtà tal-ħaddiema fuq il-post tax-xogħol — li ma jaqax taħt il-kompetenza esklussiva tal-Unjoni Ewropea.

L-għanijiet tal-proposta ma jistgħux jintlaħqu kif inhu xieraq mill-Istati Membri, peress li d-dispożizzjonijiet tad-direttivi ma jistgħux jiġu emendati jew imħassra fuq livell nazzjonali.

L-għanijiet tal-proposta jistgħu jintlaħqu biss b'azzjoni tal-UE, peress li din il-proposta temenda att tal-liġi tal-UE li qiegħed fis-seħħ, u din ma tistax issir mill-Istati Membri nnifishom.

Il-prinċipju tas-sussidjarjetà li huwa osservat f'dik il-proposta jemenda l-leġiżlazzjoni eżistenti tal-UE.

3.4. Il-prinċipju tal-proporzjonalità

Il-proposta hija konformi tal-prinċipju tal-proporzjonalità għal dawn ir-raġunijiet li ġejjin:

Din ma tibdilx is-sustanza tal-leġiżlazzjoni attwali tal-UE: din tipposponi biss id-data tat-traspożizzjoni tad-Direttiva 2004/40/KE sat-30 ta' April 2014, sabiex tkun evitata sitwazzjoni ta' inċertezza legali wara li skadiet id-data attwali tal-iskadenza u sabiex jitħalla biżżejjed żmien lill-Parlament Ewropew u lill-Kunsill biex jiddiskutu u jilħqu kompromess dwar il-proposta tal-Kummissjoni COM(2011) 348, li tfittex li taġġorna u ttejjeb id-dispożizzjonijiet tad-Direttiva 2004/40/KE filwaqt li tħassarha u tissostitwiha.

3.5. L-għażla tal-istrumenti

L-istrument(i) propost(i): id-direttiva.

L-ebda strument ieħor ma kien ikun xieraq. Peress li din hija direttiva emendata, l-uniku mezz xieraq huwa li tiġi adottata direttiva oħra.

4. IMPLIKAZZJONIJIET BAĠITARJI

–           Il-proposta m'għandhiex implikazzjonijiet fuq il-baġit tal-UE.

5. TAGĦRIF IEĦOR

· Simplifikazzjoni

Il-proposta ma tissimplifikax il-qafas leġiżlattiv. Din għandha l-għan biss li tipposponi d-data tat-traspożizzjoni tad-Direttiva 2004/40/KE għat-30 ta' April 2014.

· Titħassar il-leġiżlazzjoni eżistenti

L-adozzjoni tal-proposta ma jfissirx li għandha titħassar il-leġiżlazzjoni eżistenti.

· Iż-Żona Ekonomika Ewropea

L-istrument abbozz għandu x'jaqsam ma' suġġett kopert fil-Ftehim taż-ŻEE u għalhekk għandu jiġi estiż sabiex ikopri ż-Żona Ekonomika Ewropea.

· Spjegazzjoni dettaljata tal-proposta skont il-kapitlu jew skont l-artikolu

Il-proposta tipposponi d-data tat-traspożizzjoni tad-Direttiva 2004/40/KE għat-30 ta' April 2014. Dawn is-sentejn żejda għat-traspożizzjoni tad-dispożizzjonijiet tad-Direttiva fil-leġiżlazzjoni nazzjonali huma ġġustifikati bit-tħassib espress — u f'xi każi kkonfermat — li l-valuri limitu ta' espożizzjoni stipulati fid-Direttiva jista' jkollhom impatt sproporzjonat fuq il-kontinwità tal-proċeduri mediċi li jużaw l-immaġni tar-reżonanza manjetika. Il-posponiment sa jagħti biżżejjed żmien biex id-Direttiva, u partikolarment l-espożizzjoni tal-valuri limitu, tkun aġġornata u tittejjeb, permezz ta' Direttiva ġdida bbażata fuq il-proposta tal-Kummissjoni COM(2011) 348, li bħalissa qed tiġi diskussa fil-Kunsill u l-Parlament Ewropew u li għandha l-għan li tassigura livell għoli ta' protezzjoni għall-ħaddiema u l-kontinwità tal-proċeduri mediċi u attivitajiet ekonomiċi oħrajn. Il-posponiment ta' sentejn se jevita wkoll kwalunkwe konsegwenza legali negattiva fl-ordnijiet ġuridiċi tal-Istati Membri li għadhom ma trasponewx id-Direttiva.

L-Artikolu 1 tal-proposta jemenda l-Artikolu 13(1) "It-Transposizzjoni" tad-Direttiva 2004/40/KE kif xieraq.

2012/0003 (COD)

Proposta għal

DIRETTIVA TAL-PARLAMENT EWROPEW U TAL-KUNSILL

li temenda d-Direttiva 2004/40/KE fuq il-ħtiġijiet minimi għas-saħħa u s-sigurtà fir-rigward tal-esposizzjoni ta’ ħaddiema għal riskji li jiġu minn aġenti fiżiċi (kampi elettromanjetiċi) (It-18-il Direttiva individwali fis-sens tal-Artikolu 16(1) tad-Direttiva 89/391/KEE)

IL-PARLAMENT EWROPEW U L-KUNSILL TAL-UNJONI EWROPEA

Wara li kkunsidraw it-Trattat dwar il-Funzjonament tal-Unjoni Ewropea, u b'mod partikolari l-Artikolu 153(2) tiegħu,

Wara li kkunsidraw il-proposta tal-Kummissjoni Ewropea,

Wara t-trażmissjoni tal-abbozz tal-att leġiżlattiv lill-Parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew[5],

Wara li kkunsidraw l-opinjoni tal-Kumitat tar-Reġjuni[6],

Jaġixxu f'konformità mal-proċedura leġiżlattiva ordinarja,

Billi:

(1) Wara d-dħul fis-seħħ tad-Direttiva 2004/40/KE tal-Parlament Ewropew u tal-Kunsill tad-29 ta’ April 2004 fuq il-ħtiġijiet minimi għas-saħħa u s-sigurtà fir-rigward tal-espożizzjoni ta’ ħaddiema għal riskji li jiġu minn aġenti fiżiċi (kampi elettromanjetiċi)[7], il-partijiet interessati esprimew tħassib serju, b'mod partikolari fil-komunità medika, dwar l-impatt potenzjali tal-implimentazzjoni tad-Direttiva dwar l-użu tal-proċeduri mediċi bbażati fuq l-immaġni mediċi. Ġie espress tħassib ukoll dwar l-impatt tad-Direttiva fuq ċerti attivitajiet industrijali.

(2) Il-Kummissjoni eżaminat l-argumenti li ressqu l-partijiet interessati u ddeċidiet li terġa' tikkonsidra xi dispożizzjonijiet tad-Direttiva 2004/40/KE, abbażi ta' evidenza xjentifika ġdida.

(3) Għalhekk id-data tal-iskadenza għat-traspożizzjoni tad-Direttiva 2004/40/KE ġiet posposta sat-30 ta' April 2012 bid-Direttiva 2008/46/KE tat-23 ta' April 2008[8], sabiex titħalla l-adozzjoni ta' direttiva ġdida bbażata fuq l-iżjed evidenza riċenti.           

(4) Fl-14 ta' Ġunju 2011, il-Kummissjoni adottat proposta għal Direttiva ġdida biex tieħu post id-Direttiva 2004/40/KE. Id-Direttiva l-ġdida għandha tiżgura kemm livell għoli ta' protezzjoni tas-saħħa u s-sigurtà għall-ħaddiema kif ukoll il-kontinwazzjoni u l-iżvilupp ta' attivitajiet mediċi u oħrajn industrijali li jużaw il-qawwiet elettromanjetiċi. Għaldaqstant, il-maġġoranza tal-Istati Membri għandhom ma trasponewx id-Direttiva 2004/40/KE, u allura twaqqfet l-adozzjoni tad-Direttiva l-ġdida.

(5) Madanakollu, minħabba l-kumplessità teknika tas-suġġett inkwistjoni, x'aktarx id-Direttiva l-ġdida ma tiġix adotatta qabel l-iskadenza tat-traspożizzjoni tad-Direttiva 2004/40/KE.

(6) Għaldaqstant, l-iskadenza għandha tiġi estiża.

(7) Fid-dawl ta' dan kollu u minħabba li ftit li xejn baqa' żmien qabel il-limitu ta' żmien tat-30 ta' April 2012, għandu jkun żgurat li din id-Direttiva tiġi adottata mill-Parlament Ewropew u mill-Kunsill b'urġenza u li tidħol fis-seħħ mingħajr dewmien.

(8) Għaldaqstant, fir-rigward tat-trażmissjoni lill-Parlamenti nazzjonali skont il-Protokoll (Nru 1) dwar ir-rwol tal-Parlamenti nazzjonali fl-Unjoni Ewropea, l-eċċezzjoni għal każijiet urġenti stabbilita fl-Artikolu 4 ta' dan il-Protokoll ġiet applikata f'dan il-każ fir-rigward tat-tmien ġimgħat li għandhom jgħaddu minn meta l-abbozz tal-att leġiżlattiv ikun disponibbli għall-Parlamenti nazzjonali sad-data ta' meta jitqiegħdu fuq aġenda proviżorja għall-Kunsill għall-adozzjoni tiegħu jew għall-adozzjoni ta' pożizzjoni taħt proċedura leġiżlattiva.

ADOTTAW DIN ID-DIRETTIVA:

Artikolu 1

Fl-Artikolu 13(1) tad-Direttiva 2004/40/KE, id-data "it-30 ta' April 2012" tinbidel permezz ta' "it-30 ta' April 2014".

Artikolu 2

Din id-Direttiva għandha tidħol fis-seħħ fil-jum tal-pubblikazzjoni tagħha f'Il-Ġurnal Uffiċjali tal-Unjoni Ewropea.

Artikolu 3

Din id-Direttiva hija indirizzata lill-Istati Membri.

Magħmul fi Brussell,

Għall-Parlament Ewropew                           Għall-Kunsill

Il-President                                                    Il-President

[1]               ĠU L 184, 24.5.2004, p. 23.

[2]               ĠU L 114, 26.4.2008, p. 88.

[3]               B'mod partikolari r-rakkomandazzjonijiet mill-Kummissjoni Internazzjonali għall-Protezzjoni kontra r-Radjazzjoni Mhux Jonizzanti (ICNIRP) għall-qawwa manjetika statika (April 2009) u għall-qawwa manjetika u elettrika fil-firxa bejn 1 Hz u 100 kHz (Diċembru 2010).

[4]               300 GHz: il-frekwenza ta' 300 biljun hertz jew ċiklu fis-sekonda. Il-hertz (imqassra Hz) hija l-unità internazzjonali tal-frekwenza.

[5]               ĠU C […], […], p. […].

[6]               ĠU C […], […], p. […].

[7]               ĠU L 184, 24.5.2004, p. 1.

[8]               ĠU L 114, 26.4.2008, p. 88-89.