KOMUNIKAZZJONI KONĠUNTA LILL-KUNSILL

STRATEĠIJA TA' SĦUBIJA KONĠUNTA UE-KARIBEW

DAĦLA

Fis-Summit ta’ Mejju 2010 UE-CARIFORUM[1] f'Madrid, il-Kapijiet tal-Istati u l-Gvernijiet qablu li jaħdmu fuq Strateġija ta’ Sħubija Konġunta UE-Karibew (JECS - Joint EU-Caribbean Partnership Strategy) u identifikaw ħames oqsma ċentrali għal kooperazzjoni aktar mill-qrib: l-integrazzjoni reġjonali, ir-rikostruzzjoni ta' Ħaiti, il-bidla fil-klima u d-diżastri naturali, il-kriminalità u s-sigurtà, u azzjoni konġunta f’fora multilaterali. Id-dokument preżenti, li hu bbażat fuq il-proposta miftiehma mill-Kapijiet tal-Istat f'Madrid, ġie elaborat minn grupp ta' ħidma konġunta, inkluż is-Servizz Ewropew għall-Azzjoni Esterna (SEAE) u s-servizzi tal-Kummissjoni, u rappreżentanti tal-Istati Membri tal-UE u l-pajjiżi tal-CARIFORUM.

L-UE u l-Karibew jaqsmu storja twila u bażi wiesgħa ta' valuri komuni. Permezz tar-reġjuni, pajjiżi u t-territorji mbiegħda tagħha, l-UE hija wkoll fiżikament parti mill-Karibew. Iż-żewġ reġjuni jaqsmu impenn għall-paċi globali, il-progress u l-prosperità kif ukoll għad-demokrazija u l-istat tad-dritt. Għall-Karibew, l-UE kienet u għadha sieħba affidabbli għall-iżvilupp, li l-appoġġ tagħha kien importanti għall-isforzi biex ir-reġjun jikseb l-iżvilupp sostenibbli.

Ir-relazzjonijiet huma attwalment mirfuda mill-Ftehim ta’ Cotonou, il-Ftehim ta’ Sħubija Ekonomika UE-CARIFORUM u d-djalogu politiku u bireġjonali. Dawn huma kkumplimentati minn oqfsa oħra ta’ kooperazzjoni reġjonali li fihom l-UE u l-Karibew jipparteċipaw, bħas-Sħubija UE-Amerika Latina u l-Karibew (LAC).

Dan l-abbozz ta' Strateġija Konġunta għandu l-għan li jiżviluppa dimensjoni ġdida għar-relazzjoni, u li jippermetti lill-UE u l-pajjiżi tal-Karibew li jfanndu d-djalogu u li jistrutturaw il-kooperazzjoni tagħhom sabiex jindirizzaw flimkien l-isfidi u l-opportunitajiet tas-seklu 21. Il-prinċipji li se jservu ta' gwida għall-Istrateġija Konġunta huma s-sjieda konġunta, ir-responsabbiltà u s-solidarjetà reċiproċi, il-koamministrazzjoni u l-koresponsabbiltà. Huwa jirrifletti l-impenn komuni tal-CARIFORUM u tal-UE lejn il-prinċipji mnaqqxa fil-Karta tan-NU u fil-liġi internazzjonali, inkluż b'mod partikolari r-rispett u l-promozzjoni tad-drittijiet tal-bniedem u l-libertajiet fundamentali, l-istat tad-dritt u t-tmexxija demokratika.

L-għan ta’ din il-Komunikazzjoni Konġunta huwa li jfittex l-approvazzjoni mill-Kunsill tal-proposta "Strateġija ta' Sħubija Konġunta UE-Karibew".

1. TEMA I: IL-KOOPERAZZJONI U L-INTEGRAZZJONI REĠJONALI FIL-KARIBEW WIESA'

1.1.        ĦARSA ĠENERALI

Hemm potenzjal biex wieħed jespandi t-tkabbir fil-Karibew permezz tal-kummerċ, l-investiment u t-turiżmu u billi jiġu żviluppati swieq speċjalizzati u opportunitajiet ekonomiċi oħra. Madankollu, jeżistu sfidi persistenti li jridu jingħelbu. Il-globalizzazzjoni ġabet sfidi għal stati żgħar vulnerabbli li qed jiżviluppaw bħal dawk fil-Karibew sabiex jippruvaw jipparteċipaw bis-sħiħ f'ekonomija globali kompetittiva ħafna.

L-integrazzjoni u l-kooperazzjoni reġjonali huma meqjusa l-aħjar mezzi biex jiffaċilitaw il-progess uman u soċjali u l-iżvilupp sostenibbli fit-tul fil-Karibew. Il-Komunità tal-Karibew (CARICOM) u l-Organizzazzjoni tal-Istati tal-Karibew tal-Lvant (l-OECS) huma ż-żewġ organizzazzjonijiet prinċipali ta' integrazzjoni reġjonali. Il-CARIFORUM[2] tiffaċilita l-koperazzjoni reġjonali bħalma tagħmel l-assoċjazzjoni tal-UE bil-pajjiżi u territorji mbiegħda tagħha (OCTs - overseas countries and territorities). L-UE, fuq il-bażi tal-esperjenza tagħha tkompli tkun sieħeb attiv fl-appoġġ tal-integrazzjoni u l-kooperazzjoni reġjonali biex taċċelera u tissimplifika l-għanijiet ta' żvilupp fil-Karibew. L-EPA UE-CARIFORUM jibni sħubija kummerċjali għal kompetittività ikbar, tkabbir u żvilupp ekonomiku, appoġġ għall-integrazzjoni reġjonali fil-Karibew u parteċipazzjoni fis-sistema kummerċjali dinjija.

1.2.        MIRI U GĦANIJIET

Il-Karibew u l-UE jaqsmu impenn biex jippromwovu l-integrazzjoni reġjonali u l-koperazzjoni li huma partikolarment effettivi biex jindirizzaw il-vulnerabbiltajiet assoċjati ma' grupp ta' pajjiżi li fil-maġġoranza tagħhom huma Stati gżejjer żgħar. Iż-żewġ naħat identifikaw l-oqsma speċifiċi ta' koperazzjoni strateġika fl-appoġġ għal integrazzjoni reġjonali u kooperazzjoni aktar fil-fond, li tiffaċilita l-iżvilupp uman u ekonomiku sostenibbli. L-oqsma tal-kooperazzjoni jinkludu iżda mhumiex limitati għal:

· It-tisħiħ tal-integrazzjoni reġjonali u proċessi ta’ kooperazzjoni fir-reġjun tal-Karibew inklużi d-dipartimenti u territorji esteri tal-UE, kif ukoll pajjiżi ġirien fl-Amerika Ċentrali u t’Isfel;

· L-implimentazzjoni tas-Suq Uniku u l-Ekonomija Unika tal-Karibew u tal-Unjoni Ekonomika tal-OECS;

· L-implimentazzjoni effettiva tal-EPA UE-CARIFORUM, b’enfasi fuq l-opportunitajiet li toffri għall-operaturi ekonomiċi fil-Karibew;

· It-trawwim ta' klima ta' investiment ekonomiku b'saħħtu fil-Karibew għat-titjib tal-integrazzjoni tas-swieq reġjonali u l-kompetittività fil-livell internazzjonali;

· L-iżvilupp tal-intrapriżi permezz ta’ investimenti tas-settur privat partikolarment fis-settur tas-servizzi inklużi s-servizzi finanzjarji u t-turiżmu u l-industriji kulturali, fl-agronegozju u l-manifattura. Promozzjoni tal-innovazzjoni, l-informazzjoni, il-komunikazzjoni u t-teknoloġija u l-kompetizzjoni;

· L-iżvilupp ta' netwerks ta’ infrastruttura biex jiffaċilitaw il-kummerċ internazzjonali u intrareġjonali;

· Id-diversifikazzjoni tal-enerġija, l-interkonnessjoni u s-sigurtà;

· Il-promozzjoni tat-tkabbir ekonomiku ekoloġiku b’appoġġ speċifiku għall-isforzi biex tiġi preservata l-bijodiversità, filwaqt li tiġi kkunsidrata l-importanza tar-riżorsi tal-ilma, tal-industrija tat-turiżmu, u s-setturi tal-agrikoltura u l-bijoriċerka;

· L-iżvilupp tal-ħiliet edukattivi permezz tat-taħriġ u l-kooperazzjoni fil-qasam tax-xjenza u t-teknoloġija;

· Strateġija reġjonali għas-sigurtà tal-Ikel u s-saħħa;

· Il-promozzjoni tal-allevjazzjoni tal-faqar, il-koeżjoni soċjali, id-djalogu soċjali, l-iżvilupp tas-soċjetà ċivili, inklużi l-imsieħba soċjali, l-eliminazzjoni tad-diskriminazzjoni, l-ugwaljanza bejn is-sessi, il-promozzjoni ta' xogħol diċenti u standards tax-xogħol rikonoxxuti internazzjonalment u t-tisħiħ tal-involviment taż-żgħażagħ fl-iżvilupp nazzjonali.

1.3.        AZZJONI KONĠUNTA

L-Imsieħba se jsegwu programm fit-tul ta' azzjoni konġunta ffukat fuq it-tkabbir u l-iżvilupp sostenibbli, u l-indirizzar tal-isfidi komuni, b'enfasi partikolari fuq l-integrazzjoni u l-kooperazzjoni reġjonali.

Azzjonijiet konġunti f'dan il-kuntest jistgħu jinkludu:

· Djalogu politiku u ta’ politika UE-Karibew intensifikat u inklużiv li jindirizza kwistjonijiet ta’ interess għaż-żewġ reġjuni u sfidi globali;

· Azzjonijiet li jikkontribwixxu għall-koerenza fost arranġamenti diversi ta’ integrazzjoni u kooperazzjoni li jinvolvu l-Karibew, inklużi s-sħubija AKP-Unjoni Ewropea, il-mekkaniżmi ta' koperazzjoni UE-LAC u l-assoċjazzjoni UE/OCT;

· Azzjonijiet li jikkontribwixxu għat-tfannid tal-integrazzjoni reġjonali u l-koperazzjoni inklużi t-tisħiħ tal-kapaċitajiet istituzzjonali ta' organizzazzjonijiet reġjonali fil-Karibew u fil-livell nazzjonali biex tiżdied id-definizzjoni effettiva, l-implimentazzjoni u l-insegwiment sostnut tal-politiki fil-livell reġjonali;

· Appoġġ għall-isforzi ta' konsolidazzjoni istituzzjonali fuq livelli reġjonali u subreġjonali;

· Programmi li jikkontribwixxu għall-implimentazzjoni effettiva tal-EPA CARIFORUM-UE, is-Suq Uniku u l-Ekonomija Unika tal-CARICOM (CSME) u l-Unjoni Ekonomika tal-OECS kif ukoll tisħiħ tar-rabtiet bejn il-CARIFORUM u l-OCTs tal-UE u l-ORs partikolarment fl-oqsma tal-kummerċ u l-enerġija;

· Azzjonijiet li jikkontribwixxu sabiex joħolqu ambjent ekonomiku san u klima ta' investiment u jrawmu l-kapaċitajiet produttivi fil-Karibew:

· L-iżvilupp ta' strateġiji industrijali u ta' esportazzjoni;

· Ir-Riċerka u l-Iżvilupp u t-taħriġ fl-oqsma tal-innovazzjoni, ix-xjenza u t-teknoloġija;

· Ir-rinfurzar tal-Kompetittività u l-promozzjoni tal-innovazzjoni;

· L-iżvilupp tan-negozju reġjonali, b'enfasi partikolari fuq l-iżvilupp tal-SMEs reġjonali;

· L-enerġija, b’enfasi partikolari fuq l-enerġija rinnovabbli;

· L-interkonnettività, inkluż it-trasport u t-teknoloġija tal-informazzjoni u l-komunikazzjoni.

· Jikkontribwixxu għall-promozzjoni tax-xogħol deċenti u l-istandards tax-xogħol rikonoxxuti internazzjonalment biex jappoġġjaw l-iżvilupp uman, il-koeżjoni soċjali u t-tkabbir ekonomiku;

· Jikkontribwixxu għall-iżvilupp ta’ qafas wiesa' tal-Karibew għal strateġija reġjonali effettiva tas-saħħa;

· Jaħdmu lejn l-iżvilupp ta' strateġija dwar is-sigurtà tal-ikel, il-kwalità u d-diversità, fil-Karibew, bl-użu ta' teknoloġiji ġodda biex tittejjeb il-produttività u l-kompetittività.

2. TEMA II: IR-RIKOSTRUZZJONI U L-APPOĠĠ ISTITUZZJONALI LIL ĦAITI

2.1.        ĦARSA ĠENERALI

Fit-12 ta’ Jannar 2010, ir-Repubblika ta’ Ħaiti ġarrbet wieħed mill-aktar terrimoti devastanti fiż-żminijiet moderni. Possibbilment 250 000 ruħ tilfu ħajjithom u 1.5 miljun jeħtieġu kenn ta' emerġenza. It-terremot ikkawża ħsara enormi lill-infrastruttura soċjali u ekonomika. It-terremot iggrava l-problemi eżistenti tal-pajjiż: il-faqar, l-insigurtà, id-degradazzjoni ambjentali u l-vulnerabbiltà għad-diżastri. L-Indiċi tal-Iżvilupp tal-Bniedem tan-NU tal-2009 kklassifika lil Ħaiti fl-145 post minn 162 pajjiż.

Ħaiti ngħatat prijorità fi ħdan din l-Istrateġija Konġunta ta’ Sħubija Karibew-UE minħabba l-kobor tal-bżonnijiet tagħha. It-tagħlimiet miksuba, partikolarment it-tnaqqis tar-riskju tad-diżastri u t-tnaqqis tal-vulnerabbiltà, se jkunu rilevanti wkoll għar-reġjun kollu tal-Karibew.

2.2.        MIRI U GĦANIJIET

Ħaiti tinsab fit-triq biex tirkupra mill-aktar ħtiġijiet urġenti tagħha, bis-saħħa wkoll ta’ għajnuna umanitarja sostanzjali tal-UE kif ukoll tal-Karibew. Il-pajjiż għadu jiffaċċja, madankollu, sfidi ta’ qtigħ il-qalb ta’ rikostruzzjoni, sfidi ekonomiċi u soċjali. Il-konsolidazzjoni tal-istituzzjonijiet demokratiċi ta' Ħaiti, it-titjib fil-governanza, it-tnaqqis tal-faqar u l-inugwaljanzi soċjali u l-konsolidazzjoni tal-amministrazzjoni jibqgħu sfidi enormi li għalihom l-UE u l-Karibew jistgħu jipprovdu appoġġ komplementari u sostanzjali, b’koordinazzjoni sħiħa mal-gvern ta’ Ħaiti u ma’ donaturi internazzjonali oħrajn. Hemm ukoll skop biex tittejjeb l-integrazzjoni ta' Ħaiti fil-kuntest reġjonali tal-Karibew. Il-programmazzjoni konġunta tal-Fond Ewropew għall-Iżvilupp (FEŻ) ser tikkontribwixxi biex tavvanza r-rwol ta' Ħaiti fil-kooperazzjoni bejn il-pajjiżi tal-Karibew u trawwem aktar parteċipazzjoni fil-proċess ta' integrazzjoni reġjonli

2.3.        AZZJONI KONĠUNTA

L-azzjonijiet konġunti tal-UE u l-CARIFORUM f'dan il-kuntest jistgħu jinkludu:

· Koordinazzjoni tal-azzjonijiet b’appoġġ għar-rikostruzzjoni ta’ Ħaiti, fi ħdan strutturi tal-koordinazzjoni tad-donaturi eżistenti, u l-iżvilupp ta’ azzjonijiet konġunti CARIFORUM-UE li jibnu fuq il-programmazzjoni konġunta tal-UE għal Ħaiti;

· Mobilizzar tal-istrumenti rilevanti ta' koperazzjoni fil-qafas ta' Ftehim ta’ Partenarjat AKP-KE u l-proċess UE-ALK;

· Appoġġ għall-funzjonament u l-konsolidazzjoni tad-demokrazija f’Ħaiti permezz ta’ elezzjonijiet ħielsa, trasparenti u kredibbli, ir-rispett u l-promozzjoni tad-drittijiet tal-bniedem u l-istat tad-dritt, ir-riformi ġudizzjarji u t-tisħiħ tas-soċjetà ċivili kif ukoll miżuri urġenti biex jiġġieldu l-korruzzjoni;

· Azzjonijiet biex jiżguraw il-parteċipazzjoni sħiħa ta' Ħaiti fl-EPA CARIFORUM-UE u s-Suq Uniku u Ekonomija Unika tal-Karibew (CSME), inkluż l-iżvilupp tal-kapaċità istituzzjonali f’Ħaiti;

· Azzjoni fil-qasam tat-tħejjija għad-diżastri u l-istrateġiji ta’ tnaqqis tar-riskju, inkluż l-iżvilupp ta’ mekkaniżmi bħall-bini ta' kodiċi reġjonali biex titjieb il-kapaċità tar-reġjun biex itaffi l-effetti tad-diżastri naturali;

· L-iżvilupp ta’ mekkaniżmi għat-trasferiment tar-riskju u l-iffinanzjar għat-tnaqqis tar-riskju, bħall-Faċilità ta' Assigurazzjoni għar-Riskju Katastrofiku tal-Karibew (CCRIF), kif ukoll l-applikazzjoni tal-aqwa prattiċi għall-Aġenzija għall-Ġestjoni tal-Emerġenzi f'Diżastri fil-Karibew (CDEMA) u l-istituzzjonijiet usa' tal-Karibew li jispeċjalizzaw fil-ġestjoni tad-diżastri.

3. TEMA III: IL-BIDLA FIL-KLIMA U D-DIŻASTRI NATURALI

3.1.        ĦARSA ĠENERALI

Il-bidla fil-klima u l-konsegwenzi tagħha huma ostakli ewlenin għall-iżvilupp u l-kisba tal-Għanijiet ta’ Żvilupp għall-Millennju. Il-pajjiżi tal-Karibew huma fil-parti l-kbira Stati gżejjer żgħar li għadhom qed jiżviluppaw, għandhom żoni kostali baxxi u huma partikolarment vulnerabbli għall-effetti tal-livelli tal-baħar li qed jogħlew, li qed jheddu l-komunitajiet kostali, l-infrastruttura u l-għejun tal-ilma ħelu. Iż-żieda fit-temperatura u l-aċidità tal-ilma tal-baħar ikkawżati mill-gassijiet b'effett serra qed jikkawżaw ħsara serja lis-sikek tal-korall, bil-konsegwenza ta’ degradazzjoni tal-bijodiversità tal-baħar fir-reġjun.

Id-daqs żgħir tal-parti l-kbira tal-pajjiżi tal-Karibew ukoll jagħmilhom aktar vulnerabbli għall-impatt tad-diżastri naturali. Uragan wieħed kapaċi jeqred il-bażi ekonomika ta' pajjiż sħiħ, inkluż l-infrastruttura u s-sorsi prinċipali kollha ta’ attività ekonomika u dħul, u jpoġġi aktar pressjoni fuq ir-riżorsi finanzjarji limitati. L-isfidi huma aggravati mid-diffikultajiet ta’ distanza u ġeografija, li jfixklu t-twessigħ u l-konsolidazzjoni tal-bażi ekonomika tagħhom.

3.2.        MIRI U GĦANIJIET

L-Istati Membri tal-UE u l-CARIFORUM, bħala firmatarji għall-Protokoll ta' Kyoto, ħadmu flimkien biex javvanzaw in-negozjati dwar il-bidla fil-klima u żviluppaw politiki sabiex jitnaqqas l-impatt tal-bidla fil-klima u d-degradazzjoni ambjentali. Huma jikkondividu interess fil-kisba ta’ riżultat komprensiv, ġust u legalment vinkolanti taħt il-Konvenzjoni Qafas tan-Nazzjonijiet Uniti dwar it-Tibdil fil-Klima (UNFCC). L-istati membri tal-CARIFORUM u l-UE se jissoktaw bl-isforzi tagħhom biex jilħqu ftehim internazzjonali ambizzjuż dwar il-klima.

Il-perikli naturali bħall-uragani u t-terremoti ma jistgħux jiġu evitati, iżda jistgħu jittieħdu passi importanti biex jitnaqqsu r-riskji u jiġu limitati l-impatti, billi jiġu indirizzati l-kawżi primarji tal-vulnerabbiltà u tiżdied il-kapaċità biex wieħed ilaħħaq mal-konsegwenzi. Ġew identifikati ħames żoni ta' prijorità għall-kooperazzjoni:

· l-adattament għall-effetti tal-bidla fil-klima mingħajr preġudizzju biex jintlaħqu l-Għanijiet ta’ Żvilupp tal-Millenju;

· it-tisħiħ tal-prevenzjoni tad-diżastri u t-tnaqqis tar-riskji kif ukoll it-titjib tal-monitoraġġ, l-għarfien tas-sitwazzjoni, il-valutazzjoni u s-sistemi ta’ twissija bikrija għall-ġestjoni u r-rispons tad-diżastri;

· it-tnaqqis tad-deforestazzjoni permezz tal-ġestjoni sostenibbli tal-foresti;

· it-tisħiħ tal-parteċipazzjoni fis-suq dinji tal-karbonju permezz tal-Mekkaniżmu ta’ Żvilupp Nadif (CDM);

· l-integrazzjoni tal-bidla fil-klima fl-isforzi għat-tnaqqis tal-faqar.

3.3.        AZZJONI KONĠUNTA

L-azzjonijiet konġunti tal-CARIFORUM u l-UE f’dan il-qasam, f’konformità mal-għanijiet tal-Alleanza Globali dwar it-Tibdil fil-Klima (GCCA) l-għanijiet u l-Pjan ta’ Azzjoni ta’ Madrid UE-LAC jistgħu jinkludu:

· It-titjib tal-kooperazzjoni f'negozjati internazzjonali, inklużi permezz ta’ konsultazzjonijiet regolari u inizjattivi konġunti biex jippromwovu l-konklużjoni b' suċċess tal-ftehim internazzjonali dwar il-klima għal wara l-2012 taħt il-UNFCCC;

· Appoġġ għal strateġija komprensiva biex tindirizza l-bidla fil-klima billi tipprijoritarizza miżuri ta' adattament u mitigazzjoni, partikolarment billi jiġu adottati l-prinċipji ta' tkabbir ekoloġiku u billi jiġi provdut aċċess għall-enerġija rinnovabbli;

· It-tisħiħ tal-kapaċità ta’ reazzjoni għad-diżastri reġjonali u r-rispons ta' emerġenza, b' enfasi partikolari fuq l-adattament, it-tnaqqis tar-riskju tad-diżastri u l-interoperabbiltà, kif ukoll il-monitoraġġ, għarfien tas-sitwazzjoni u sistemi ta' twissija bikrija. F'dan il-kuntest, għandu jsir ukoll xogħol fuq ir-rabta bejn azzjonijiet fil-qosor u fit-tul;

· Integrazzjoni tal-politiki dwar il-bidla fil-politiki u strateġiji nazzjonali u reġjonali ta' żvilupp reġjonali kif ukoll fi ftehimiet ta' kooperazzjoni/sħubija;

· L-iżgurar li l-vulnerabilità tas-SIDS u pajjiżi kostali baxxi tibqa’ fuq quddiem tal-aġenda għall-iżvilupp globali, inkluż fil-Ftehim ta’ Sħubija ACP-KE u l-proċess UE-LAC;

· Inkoraġġiment għal rwol akbar għat-taħriġ, ir-riċerka u l-iżvilupp u t-trasferiment tat-teknoloġija u l-eko-innovazzjoni;

· Jirrikonoxxu l-Baħar tal-Karibew bħala żona speċjali fil-kuntest tal-iżvilupp sostenibbli u jaħdmu biex jappoġġjaw oqfsa mmirati biex jipproteġu l-ekosistemi fraġli u l-bijodiversità unika tiegħu.

4. TEMA IV: IL-KRIMINALITÀ U S-SIGURTÀ

4.1.        ĦARSA ĠENERALI

Attivitajiet kriminali transnazzjonali, b'mod partikolari t-traffikar ta’ drogi illegali u reati relatati, jirrappreżentaw preokkupazzjoni dejjem tikber għall-UE u l-Karibew. Il-Karibew huwa reġjun ta’ tranżitu maġġuri għad-drogi illegali mill-Amerika t'Isfel u Ċentrali; Il-ħsara kollaterali tal-kummerċ tad-droga huwa enormi u għandu effett importanti fuq is-soċjetajiet: huwa jġib il-korruzzjoni, ifixkel l-istat tad-dritt u jwassal għal aktar kriminalità organizzata. Iż-żieda fit-traffikar lokali tad-drogi u l-abbuż idgħajjef il-fibra soċjali u jiġġenera vjolenza bejn il-gruppi (gangs). Il-ħasil ta' ammonti kbar ta' flus illeċiti ifixklu l-ekonomija u jdgħajfu sforzi ta' żvilupp sostenibbli. Din is-sitwazzjoni jkollha effett detrimentali fuq prospetti fit-tul tat-tkabbir, stabbiltà u żvilupp.

Oqsma ta’ tħassib speċifiku għall-Karibew u l-UE jinkludu:

· Traffikar tad-droga u r-reati relatati inkluż vjolenza mill-gruppi u ħasil tal-flus;

· It-traffiku u l-kummerċ illegali fl-armi żgħar u l-armamenti ħfief;

· L-impatt ta' attivitajiet kriminali fuq is-sigurtà tal-bniedem tas-soċjetajiet tal-Karibew;

· Il-problemi soċjali u ta' sigurtà maħluqa mir-ritorn tal-kriminali lura lejn il-Karibew minn barra;

· Traffikar u ħtif tal-persuni;

· Kapaċità insuffiċjenti għall-kontroll tal-fruntieri marittimi u tal-ispazju tal-ajru;

· Nonkonformità mal-istandards internazzjonali fis-settur finanzjarju.

4.2.        MIRI U GĦANIJIET

Il-ħidma flimkien fil-ġlieda kontra netwerks kriminali hija prijorità tal-Istrateġija Konġunta. It-tisħiħ tal-kooperazzjoni u l-bini tal-kapaċità fl-oqsma bħal tal-pulizija, proċessi ġudizzjarji, u l-qsim tal-intelligence huma aspetti ewlenin f’dan ir-rigward. Ugwalment, l-għeruq tal-attività kriminali u l-impatt soċjali jeħtieġ li jiġu indirizzati.

Il-kooperazzjoni UE-Karibew fil-ġlieda kontra d-drogi hi mmexxija fil-kuntest tal-Mekkaniżmu ta’ Koordinazzjoni u Koperazzjoni UE-LAC dwar id-Drogi. Il-"Pjan ta’ Azzjoni ta’ Panama" u l-prijoritajiet identifikati fil-Port ta' Spanja fl-2007 jirrappreżenta firxa ta' prijoritajiet għal azzjoni komuni f’dan ir-rigward. Il-kooperazzjoni UE-Karibew fil-ġlieda kontra l-kriminalità għandha tinkludi wkoll kooperazzjoni ma’ organizzazzjonijiet tan-NU rilevanti, l-Interpol, l-OAS u l-Europol u tinkludi l-iskambju ta' informazzjoni u l-aħjar prattiċi.

4.3.        AZZJONI KONĠUNTA

Il-kooperazzjoni fis-Sigurtà UE-CARIFORUM hija bbażata fuq il-prinċipji ta' responsabbiltà maqsuma bejn produzzjoni, tranżitu u l-pajjiżi konsumaturi tad-droga. Hija għandha l-għan li tiżviluppa strateġiji integrati u bbilanċjati.

L-azzjonijiet konġunti tal-UE u l-CARIFORUM f'dan il-kuntest jistgħu jinkludu:

· L-appoġġ għat-twaqqif ta’ strateġija madwar ir-reġjun biex tindirizza l-kriminalità, l-insigurtà, it-traffikar tad-drogi, il-kriminalità finanzjarja eċċ;

· Tiġdid tal-isforzi biex jiġu implimentati l-"Prijoritajiet tal-Port ta’ Spanja” fl-oqsma tal-kontroll tal-portijiet l-aktar vulnerabbli; il-qsim tal-intelligence fil-kontroll tal-prekursuri; programmi biex jindirizzaw il-kawżi tal-kriminalità u d-delinkwenza u t-tnaqqis fid-domanda; kif ukoll il-promozzjoni tal-konformità mar-Rakkomandazzjonijiet tal-Grupp ta’ Ħidma ta’ Azzjoni Finanzjarja tal-OECD u kooperazzjoni msaħħha bejn korpi reġjonali u internazzjonali, inkluż l-UNODC;

· Il-bini tal-kapaċità tal-ġestjoni tal-kontroll tal-fruntiera, inklużi skambji ta’ esperti u assistenza teknika;

· Implimentazzjoni bis-sħiħ tal-Programm ta’ Azzjoni tan-NU għall-prevenzjoni, il-ġlieda u l-eradikazzjoni tal-kummerċ illegali fl-armi ż-żgħar u l-armamenti ħfief b'kooperazzjoni marittima bħala qasam prijoritarju, inkluż il-qsim tal-informazzjoni u aktar żvilupp tal-kooperazzjoni operazzjonali bejn l-atturi interessati fil-Karibew u l-Istati Membri tal-UE;

· Appoġġ tal-bini tal-kapaċità tal-amministrazzjonijiet tal-ġustizzja u r-riforma ġudizzjarja fil-ġlieda kontra l-kriminalità transnazzjonali.

5. TEMA V: AZZJONI KONĠUNTA F'FORA BIREĠJONALI U MULTILATERALI U DWAR KWISTJONIJIET GLOBALI

5.1.        ĦARSA ĠENERALI

Il-Karibew u l-UE jiffaċċjaw għadd ta' sfidi u preokkupazzjonijiet komuni u huma impenjati biex jaġixxu b’mod kkoordinat biex jinstabu risposti konġunti fil-livell internazzjonali. Id-djalogu u l-konsultazzjonijiet politiċi diġà qed iseħħu fil-livelli differenti sabiex jindirizzaw kwistjonijiet globali f’fora bireġjonali u multilaterali, kif muri fil-laqgħa reċenti tal-COP 17 f’Durban.

Flimkien, il-CARIFORUM u l-UE jirrappreżentaw 42 pajjiż. Madankollu, b'konsultazzjonijiet aktar frekwenti, allinjament aħjar tal-pożizzjonijiet u koordinazzjoni msaħħa, iż-żewġ reġjuni jista' jkollhom impatt aktar deċiżiv fuq suġġetti ta’ importanza reċiproka, bħalma huma: il-promozzjoni tad-drittijiet tal-bniedem, il-valuri demokratiċi u l-governanza; ir-riforma tan-Nazzjonijiet Uniti u s-sistema u l-istituzzjonijiet finanzjarji internazzjonali; rispons koordinat għall-kriżi finanzjarja u ekonomika globali; il-kisba tal-Għanijiet ta’ Żvilupp tal-Millennju; u l-konklużjoni tal-Aġenda ta' Doha għall-Iżvilupp.

5.2.        MIRI U GĦANIJIET

L-imsieħba ser isaħħu d-djalogu dwar kwistjonijiet globali biex jidentifikaw iż-żoni ta' koperazzjoni, jikkoordinaw il-pożizzjonijiet u jwettqu flimkien inizjattivi u azzjonijiet speċifiċi. Iż-żewġ imsieħba jixtiequ jippromwovu u jsostnu sistema ta' multilateraliżmu effettiv, b’istituzzjonijiet leġittimi, b'saħħithom u rappreżentattivi. Livell ogħla ta' koordinazzjoni tal-politiki u skambju ta' informazzjoni se jagħti lok għal impatt komuni akbar fil-konsultazzjonijiet u biex partijiet terzi jkunu aktar konxji ta’ preokkupazzjonijiet reċiproċi.

Il-Pajjiżi tal-UE u l-CARIFORUM se jimmiraw li jikkoordinaw ma’ xulxin f’istituzzjonijiet multilaterali li t-tnejn huma membri tagħhom (in-NU, Istituzzjonijiet Finanzjarji Internazzjonali, id-WTO, eċċ.) u huma se jippruvaw jieħdu inkonsiderazzjoni l-interessi u t-tħassib tal-parti l-oħra f'aggruppamenti internazzjonali jew organizzazzjonijiet li fihom hija membru parti minnhon (il-G8, il-G20, l-Alleanza tal-Istati ta' Gżejjer Żgħar (AOSIS), eċċ.).

5.3.        AZZJONIJIET KONĠUNTI

Permezz tal-politika u d-djalogu politiku, iż-żewġ reġjuni se jmexxu konsultazzjonijiet fuq suġġetti ta' interess komuni u jidentifikaw pożizzjonijiet komuni possibbli kif ukoll sforzi konġunti lejn l-implimentazzjoni tal-prijoritajiet kondiviżi.

Azzjonijiet konġunti f 'dan il-kuntest jistgħu jinkludu:

· Jaħdmu flimkien fuq il-promozzjoni tad-drittijiet tal-bniedem, il-prinċipji demokratiċi, l-istat tad-dritt u l-governanza tajba, inkluż il-proċessi elettorali ħielsa u ġusti, il-ġlieda kontra l-korruzzjoni, il-ħasil tal-flus, l-iffinanzjar tat-terroriżmu, il-kriminalità organizzata u l-evażjoni tat-taxxa;

· Jaħdmu flimkien fuq jippromwovu r-riforma tas-Sistema tan-Nazzjonijiet Uniti, bil-għan li jtejbu l-kwalità rappreżentattiva tagħha, it-trasparenza, ir-responsabbiltà, l-effiċjenza u l-effettività, inkluża r-riforma komprensiva tal-Kunsill tas-Sigurtà;

· L-iżvilupp, fejn possibbli ta’ pożizzjonijiet reġjonali konġunti fi ħdan is-Sistema tan-NU u l-istituzzjonijiet finanzjarji internazzjonali u jistinkaw biex jappoġġjaw l-inizjattivi ta’ xulxin;

· Jikkontribwixxu għall-modernizzazzjoni tal-IMF u l-Bank Dinji biex, inter alia, jirrifletti aħjar għat-tibdil fl-ekonomija dinjija permezz ta’ rappreżentazzjoni akbar ta’ swieq emerġenti dinamiċi u pajjiżi li qed jiżviluppaw;

· Jindirizzaw l-isfidi tar-riformi strutturali li jsaħħu r-regolamenti, u jkattru u jsostnu d-domanda globali u jrawmu l-ħolqien tal-impjiegi fil-kuntest bireġjonali permezz tal-Ftehim ta’ Cotonou u l-EPA kif ukoll fil-Bank Dinji, l-IMF, il-G8 u l-G20;

· Jiżviluppaw strumenti biex isaħħu xbieki ta' sikurezza finanzjarja, jgħinu pajjiżi vulnerabbli biex jirreżistu aħjar għal xokkijiet esterni imprevisti;

· Biex iżommu l-impenn tagħhom għal sistema kummerċjali multilaterali bbażata fuq ir-regoli bħala l-magna prinċipali għat-tkabbir u l-iżvilupp is-sieħba se jfittxu konsultazzjonijiet regolari u aġenda ta' negozjati attivi fil-livell multilaterali sabiex jidħlu f'negozjati ġenerali biex jaslu għal konklużjoni b’suċċess, komprensiva, ambizzjuża u bilanċjata għaċ-Ċiklu ta' Doha, u jibnu fuq il-progress miksub s’issa;

· Ikomplu l-isforzi ta' appoġġ sabiex il-pajjiżi li qed jiżviluppaw, u b'mod partikolari ekonomiji żgħar u vulnerabbli, isiru aktar kompetittivi fuq skala globali.

6. MODALITAJIET TA' IMPLIMENTAZZJONI U MEKKANIŻMI TA' MONITORAĠĠ

6.1.        IL-MODALITAJIET TAL-IMPLIMENTAZZJONI

Din is-sħubija se tinvolvi, u tiġi implimentata minn, numru kbir ta' atturi istituzzjonali u mhux istituzzjonali fl-UE u fir-reġjun tal-Karibew fil-livelli reġjonali, nazzjonali u lokali. L-implimentazzjoni effettiva tagħha se tkun ir-responsabbiltà maqsuma tal-pajjiżi kollha tal-CARIFORUM u l-Istati Membri tal-UE u l-istituzzjonijiet tagħha.

Azzjonijiet konġunti identifikati għandhom ikunu kumplimentari għal u jiġu segwiti minn ftehimiet, strutturi u strumenti eżistenti għall-kooperazzjoni bejn il-Karibew u l-UE biex jippromwovu sinerġiji u jevitaw id-dupplikazzjoni.

Is-soċjetà ċivili, atturi mhux statali u l-parlamenti għandhom rwol importanti fl-implimentazzjoni tal-Istrateġija Konġunta u se jkunu involuti permezz ta’ djalogu inklussiv.

L-implimentazzjoni tal-Istrateġija ta’ Sħubija Konġunta UE-KARIBEW se tiġi appoġġata finanzjarjament kif xieraq mill-istrumenti eżistenti, bħal Fond Ewropew għall-Iżvilupp (EDF), l-Istrument ta' Kooperazzjoni għall-Iżvilupp (DCI), il-Fond Ewropew għall-Iżvilupp Reġjonali (ERDF), il-Fond tal-Iżvilupp tal-Karibew, il-Programmi Tematiċi tal-UE, u l-Istrument għall-Istabbiltà, l-Istrument ta’ Partenarjat Futur, il-Faċilità tal-Investiment tal-Karibew jew is-suċċessuri tagħha, kif ukoll mill-istituzzjonijiet finanzjarji, bħal Bank Ewropew għall-Investiment (BEI) u il-Bank tal-Iżvilupp tal-Karibew. Fejn rilevanti u possibbli, dawn l-istrumenti ser ikunu kkumplimentati minn kontribuzzjonijiet ulterjuri mill-pajjiżi tal-CARIFORUM u l-Istati Membri tal-UE.

6.2.        MEKKANIŻMI TA’ MONITORAĠĠ

Laqgħat regolari ta’ mexxejja miż-żewġ reġjuni (inklużi r-rappreżentanti kollha relevanti tal-istituzzjonijiet tal-UE u l-CARIFORUM ) se jkomplu jipprovdu gwida politika għas-sħubija. Dawn il-laqgħat se jirrevedu l-progress, jipprovdi orjentazzjonijiet ġodda lill-istrateġija u jagħtu struzzjonijiet dwar it-triq 'il quddiem li wieħed għandu jikkunsidra għall-isfidi globali ġodda u n-neċessitajiet reġjonali.

Barra d-djalogu politiku, Grupp ta' Ħidma Konġunt UE-CARIFORUM ibbażat fi Brussell se jimmonitorja u jevalwa l-progress perjodikament, u jagħmel rakkomandazzjonijiet xierqa. Dan il-grupp ta’ ħidma se jkun kompost minn uffiċjali tas-Servizz Ewropew għall-Azzjoni Esterna, il-Kummissjoni Ewropea, il-CARIFORUM u l-Istati Membri tal-UE. Esperti mill-OCTs u r-Reġjuni l-aktar imbiegħda jistgħu jkunu assoċjati, fejn meħtieġ. Il-grupp ta' ħidma se jipprovdi rapport ta' progress lill-mexxejja fuq bażi regolari.

[1]               Il-Grupp ta' pajjiżi tal-CARIFORUM jinkludi: L-Antigwa u Barbuda, il-Baħamas, il-Barbados, il-Beliż, id-Dominika, ir-Repubblika Dominikana, Grenada, il-Gujana, Ħaiti, il-Ġamajka, Saint Kitts u Nevis, Santa Luċija, Saint Vincent u l-Grenadini, is-Surinam, it-Trinidad u Tobago

[2]               Is-sħubija fil-CARIFORUM tinkludi l-Istati Membri kollha tal-CARICOM, (ħlief Montserrat), u r-Repubblika Dominikana u Kuba li mhumiex membri tal-CARICOM.