KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL L-APPROĊĊ TAL-UE GĦAR-REŻILJENZA: NITGĦALLMU MILL-KRIŻIJIET TAS-SIGURTÀ TAL-IKEL /* COM/2012/0586 final */
KOMUNIKAZZJONI TAL-KUMMISSJONI
LILL-PARLAMENT EWROPEW U LILL-KUNSILL L-APPROĊĊ TAL-UE
GĦAR-REŻILJENZA:
NITGĦALLMU MILL-KRIŻIJIET TAS-SIGURTÀ TAL-IKEL 1. Il-Ħtieġa li Tiġi
Indirizzata l-Vulnerabbiltà Kronika Il-kriżijiet tal-ikel riċenti u
rikorrenti fir-reġjun tas-Sahel u fil-Qarn tal-Afrika, fejn aktar minn 30
miljun persuna qed ibatu l-ġuħ, issottolinjaw il-bżonn ta’
ħidma fuq strateġija sistematika u fuq perjodu twil għall-bini
tar-reżiljenza tal-pajjiżi u l-popolazzjonijiet vulnerabbli. L-effetti ta’ xokkijiet ekonomiċi,
taż-żidiet u ċ-ċaqliq fil-prezzijiet tal-ikel, il-pressjoni
demografika, it-tibdil fil-klima, id-deżertifikazzjoni, id-degradazzjoni
ambjentali, il-pressjoni fuq ir-riżorsi naturali, is-sistemi mhux adegwati
tal-pussess tal-art, u investiment insuffiċjenti fl-agrikoltura,
irriżultaw, f'ħafna partijiet tad-dinja, f'esponiment akbar
għar-riskju, notevolment minn perikli naturali. L-impatt ta’ dawn
ix-xejriet globali jintwera fiż-żieda li qed isseħħ
fin-numru u fl-intensità tad-diżastri u l-kriżijiet naturali. L-ifqar
familji huma l-aktar vulnerabbli u f'bosta każijiet din il-vulnerabilità
hija aggravata bl-instabbiltà politika u l-kunflitti. Fil-każ
tal-insigurtà tal-ikel, minkejja xi progress, biljun persuna għadhom qed
isofru mill-ġuħ u l-kwistjoni hija partikolarment gravi f'żoni
fejn il-biċċa l-kbira tal-popolazzjoni tiddependi direttament fuq
l-agrikoltura u l-pastoraliżmu. L-UE hija waħda mill-akbar donaturi
tad-dinja li tipprovdi l-għajnuna għas-salvataġġ lil
persuni milquta minn kriżijiet varji. Matul is-snin riċenti,
it-talbiet għal din it-tip ta' assistenza żdiedu sostanzjalment – u
huma bil-wisq akbar mir-riżorsi disponibbli. Din l-assistenza hija vitali,
iżda hija intiża prinċipalment biex jiġu affrontati
sitwazzjonijiet ta’ emerġenza u teħtieġ li tiġi
ssupplimentata b'appoġġ għall-popolazzjonijiet f'riskju sabiex
jirreżistu u jaffaċċjaw żviluppi negattivi ripetuti u
stress fit-tul u jadattaw ruħhom għalihom. Il-bini tar-reżiljenza huwa sforz fit-tul
li jeħtieġ li jiġi ankrat sew fil-politiki u l-ippjanar
nazzjonali. Huwa parti mill-proċess tal-iżvilupp, u żvilupp
ġenwinament sostenibbli jeħtieġ li jindirizza l-għerq
tal-kriżijiet rikorrenti, u mhux biss il-konsegwenzi tagħhom. Ħidma
ma' popolazzjonijiet vulnerabbli biex jibnu r-reżiljenza tagħhom hija
wkoll parti fundamentali mit-tnaqqis tal-faqar li huwa l-għan
aħħari tal-politika tal-iżvilupp tal-UE, kif ġie affermat
mill-ġdid mill-UE fl-Aġenda għall-Bidla[1]. L-istrateġiji għar-reżiljenza
għandhom jikkontribwixxu għal politiki differenti, partikolarment
is-Sikurezza Alimentari[2],
l-Adattament għat-Tibdil fil-Klima[3]
u t-Tnaqqis tar-Riskju ta’ Diżastri (DRR)[4].
F'dan il-kuntest, l-UE konsistentement appoġġjat il-prevenzjoni u
l-preparatezza għall-kriżijiet fl-aktar pajjiżi vulnerabbli u
identifikat il-ħtieġa li jiġu integrati d-DRR u l-Adattament
għat-Tibdil fil-Klima, partikolarment fil-miżuri tal-kooperazzjoni
għall-iżvilupp u r-rispons umanitarju Li ninvestu fir-reżiljenza huwa
kost-effettiv. L-indirizzar tal-kawżi ewlenin u l-kriżijiet ripetuti
huwa mhux biss aħjar, speċjalment għall-persuni
kkonċernati, milli sempliċiment reazzjoni għall-konsegwenzi
tal-kriżijiet, iżda huwa wkoll ferm irħas. Meta d-dinja qed
tesperjenza tnaqqis fir-ritmu ekonomiku u baġitarju, il-baġits kemm
tal-pajjiżi msieħba kif ukoll tad-donaturi qegħdin dejjem aktar
taħt pressjoni biex juru li huma jipprovdu l-impatt massimu
għall-fondi li huma disponibbli. B'reazzjoni għal kriżijiet massivi
tal-ikel fl-Afrika, reċentement il-Kummissjoni ħadet żewġ
inizjattivi: Appoġġ għar-Reżiljenza fil-Qarn tal-Afrika
(SHARE)[5]
u 'Alliance Globale pour l'Initiative Résilience Sahel' (AGIR)[6]. Dawn stabbilixxew
approċċ ġdid biex tinbena r-reżiljenza ta’ popolazzjonijiet
vulnerabbli. L-għan ta' din il-Komunikazzjoni huwa li
tuża l-lezzjonijiet minn dawn l-esperjenzi sabiex ittejjeb
l-effikaċja tal-appoġġ tal-UE għat-tnaqqis
tal-vulnerabilità fil-pajjiżi li qed jiżviluppaw, li għandhom
tendenza li jesperjenzaw diżastri billi tinkludi r-reżiljenza
bħala għan ċentrali. Barra minn hekk, din il-Komunikazzjoni timmira
li tikkontribwixxi għad-dibattitu internazzjonali dwar it-tisħiħ
tas-sigurtà u r-reżiljenza alimentari f’sens usa', b’mod partikolari
fil-kuntest tal-G8, il-G20, il-Kumitat dwar is-Sigurtà tal-Ikel Dinjija,
l-inizjattiva Tisħiħ tan-Nutrizzjoni (SUN), in-negozjati
tal-Konvenzjonijiet ta’ Rio[7]
u l-Alleanza Globali għall-Qarn tal-Afrika. 2. Il-Mudell tar-reżiljenza Ir-reżiljenza
hija l-kapaċità ta’ individwu, familja, komunità, pajjiż jew
reġjun sabiex jirreżistu, jadattaw, u jirkupraw malajr minn stress u
xokkijiet. Il-kunċett ta’ reżiljenza
għandu żewġ dimensjonijiet: il-qawwa inerenti ta’ entità –
individwu, familja, komunità jew struttura ikbar – li tirreżisti
aħjar l-istress u x-xokk u l-kapaċità ta’ din l-entità li tirkupra
malajr mill-impatt. Iż-żieda fir-reżiljenza (u
t-tnaqqis tal-vulnerabbiltà) jistgħu għalhekk jinkisbu jew billi
tittejjeb is-saħħa tal-entità, jew billi titnaqqas l-intensità
tal-impatt, jew it-tnejn. Dan jeħtieġ strateġija
multidimensjonali u perspettiva wiesgħa tas-sistemi mmirata kemm lejn
it-tnaqqis tar-riskji multipli ta’ kriżi u kif ukoll fl-istess ħin
lejn it-titjib tal-mekkaniżmi rapidi ta’ reżistenza u ta’ adattament
fuq il-livell lokali, nazzjonali u reġjonali. It-tisħiħ
tar-reżiljenza jinsab fil-punt fejn jiltaqgħu l-għajnuna
umanitarja u dik għall-iżvilupp. It-tisħiħ tar-reżiljenza jitlob approċċ fuq perjodu twil, ibbażat fuq
it-tnaqqis tal-kawżi sottostanti li jwasslu għall-kriżijiet, u
tisħiħ tal-kapaċitajiet biex jiġu ġestiti aħjar l-inċertezzi
u l-bidla fil-futur. 3. L-esperjenza tal-UE fir-rigward
tar-reżiljenza u l-kriżijiet tal-ikel fl-Afrika Fl-Afrika sub-Saħarjana, l-ifqar familji,
komunitajiet u pajjiżi sofrew minn kapaċità mnaqqsa li jirkupraw
mill-effetti fit-tul tat-tibdil fil-klima, speċjalment nixfiet frekwenti u
intensi, kif ukoll kriżijiet ekonomiċi u konflitti interni. L-UE
pprovdiet appoġġ fir-rigward ta’ kriżijiet tal-ikel fl-Afrika
għal ħafna snin permezz ta’ għajnuna umanitarja u
għall-iżvilupp. Fuq dan il-pedament, l-Aġenda għall-Bidla
tal-UE se tipprijoritizza l-kooperazzjoni fl-agrikoltura sostenibbli,
inklużi l-issalvagwardjar tas-servizzi tal-ekosistemi u s-sigurtà tal-ikel
u n-nutriment fl-assistenza futura tal-UE għall-iżvilupp fit-tul. Konsistentement ma’ enfasi fuq
ir-reżiljenza, appoġġ għas-settur tal-agrikoltura u
politiki nazzjonali u reġjonali relatati, inkluż l-użu tal-art,
għandhom mhux biss issaħħu l-produzzjoni, iżda
jiżguraw b’mod partikolari l-funzjonament aħjar tas-swieq tal-ikel u
jappoġġjaw l-għoti ta' setgħa lil gruppi vulnerabbli u
s-soċjetà ċivili. F’dan l-isfond, l-UE qed tiżviluppa u
timplimenta risposti innovattivi għall-kriżijiet fil-Qarn tal-Afrika
u s-Sahel, li għandhom jipprovdu lezzjonijiet importanti għal
approċċ aktar sistematiku u fit-tul għall-bini
tar-reżiljenza tal-popolazzjonijiet milquta. Huwa importanti hawnhekk li
nirrikonoxxu r-rwol tan-nisa fil-bini tar-reżiljenza fl-unitajiet
domestiċi u fil-komunitajiet affettwati mill-kriżijiet.
F'pajjiżi instabbli u fraġli, fejn ir-reżiljenza hija ta' sikwit
l-aktar dgħajfa, huwa importanti wkoll li jiġi żgurat li
l-inizjattivi ta' politika jqisu n-nexus żvilupp-sigurtà, u b'hekk
jinkoraġġixxu approċċ li jista' jippromwovi l-koerenza u
l-kumplimentarjetà tal-politika. 3.1. Sostenn għar-reżiljenza
tal-Qarn tal-Afrika (SHARE) Hemm għadd ta’ fatturi li huma
fl-oriġini tal-vulnerabbiltà tal-għajxien li ilha teżisti
fil-Qarn tal-Afrika. Dawn jinkludu żieda fil-popolazzjoni u żieda
fil-pressjoni fuq ir-riżorsi, faqar rurali, produttività baxxa, termini
tal-iskambju mdgħajfa, aċċess insigur għall-art u l-ilma,
governanza dgħajfa, l-insigurtà u instabbiltà ġeopolitika prolongata.
L-UE għandha esperjenza konsiderevoli f'kooperazzjoni mas-sħab
fl-iżvilupp fil-Qarn tal-Afrika dwar l-agrikoltura u s-sigurtà tal-ikel u
kisbet għarfien importanti dwar liema approċċi għandhom
l-akbar potenzjal. In-nixfa li laqtet ir-reġjun fl-2011
kienet l-agħar waħda f’60 sena. Kienet tikkostitwixxi xokk li bidel
sitwazzjoni prekarja fi kriżi (u fis-Somalja dan irriżulta
f’kundizzjonijiet ta’ ġuħ). Infurmata bl-allerti mis-sistemi tat-twissija
bikrija tas-sigurtà tal-ikel, l-UE u l-Istati Membri tagħha ħadmu
sabiex jiżviluppaw rispons li jista' jlaħħaq mal-iskala
tal-kriżi: –
Ġie żviluppat qafas analitiku
konġunt umanitarju/tal-iżvilupp li ppermetta lill-atturi umanitarji u
tal-iżvilupp biex jaħdmu minn perspettiva komuni u jiddefinixxu
prijoritajiet konġunti. –
L-UE flimkien ipprovdiet EUR 790 miljun
f’assistenza umanitarja fl-2011/12. Il-Kummissjoni waħedha allokat EUR 181
miljun. Minbarra l-attivitajiet biex tiġi salvata l-ħajja, din
l-assistenza kienet taħseb ukoll għall-ewwel passi fil-proċess
tal-irkupru, pereżempju permezz tal-forniment ta’ żrieragħ u
għodod, ġestjoni mtejba tal-ilma, u stokkjar mill-ġdid
tal-merħliet. –
Ġiet ipprovduta żieda malajr
fil-finanzjament għall-iżvilupp għal perjodu qasir sabiex
tappoġġja l-fażi tal-irkupru immedjat. L-impenn tal-Kummissjoni
għall-perjodu 2012-13 kien ta’ EUR 250 miljun biex tiġi
appoġġjata l-produzzjoni agrikola u tal-bhejjem, in-nutrizzjoni,
is-saħħa tal-bhejjem, il-provvista tal-ilma u l-immaniġġjar
tar-riżorsi naturali. Minbarra r-rispons fuq perjodu qasir, l-UE
stabbilixxiet approċċ strutturat u fuq perjodu twil biex tgħin
lill-pajjiżi u l-komunitajiet affettwati jirkupraw wara n-nixfa u jibnu
l-kapaċità tagħhom li jlaħħqu ma’ nixfiet fil-futur. Dan
jinvolvi: –
Impenn biex taħdem mal-imsieħba
reġjonali u permezz tagħhom. L-UE flimkien ma' donaturi bilaterali
oħra, qed tgħin lis-Segretarjat tal-Awtorità Intergovernamentali
tal-Iżvilupp (IGAD) sabiex isaħħaħ il-kapaċità
tagħha biex tikkoordina u tippromwovi inizjattivi transkonfinali f'oqsma
bħalma huma l-iżvilupp tal-bhejjem u l-immaniġġjar
tar-riżorsi naturali. –
Impenn biex taħdem mill-qrib ma’ donaturi
oħrajn attivi fir-reġjun. Il-komunità tad-donaturi nediet pjattaforma
ta’ koordinazzjoni ħafifa, "l-Alleanza Globali għall-Azzjoni
għar-Reżiljenza u t-Tkabbir[8]".
F’ħidma mill-qrib mal-IGAD, l-Alleanza Globali pprovdiet forum li
jiġbor flimkien il-pajjiżi sħab u dawk id-donaturi attivi
fis-sostenn għar-reżiljenza kontra n-nixfa. Impenn fit-tul biex jiġu indirizzati
l-kwistjonijiet strutturali u biex tinbena r-reżiljenza fit-tul. Skont
il-kuntest speċifiku nazzjonali u lokali, bosta temi u setturi se
jiġu trattati bħala prijoritajiet għall-finanzjament mill-UE
matul il-perjodu 2014-2020. Dawn jistgħu jinkludu: is-saħħa u
l-iżvilupp tal-bhejjem, il-ġestjoni tar-riżorsi naturali,
id-DRR, il-kummerċ nazzjonali u reġjonali, in-nutrizzjoni,
il-governanza, ir-riċerka u t-trasferiment tat-teknoloġija, u
l-flussi tal-popolazzjonijiet. 3.2. AGIR Sahel: l-Alleanza
Globali tal-UE għall-Inizjattiva tar-Reżiljenza (Alliance Globale
pour l’Initiative Résilience-Sahel) Matul l-aħħar disa' staġuni
agrikoli, is-Sahel iffaċċjat sitt kriżijiet distinti tal-ikel.
Ir-reġjun ilu jbati minn nuqqas ta’ nutriment, b’indikaturi li huma ‘l fuq
sew minn livelli allarmanti. Tnax-il miljun persuna bħalissa jinsabu
f'riskju, u dawn jirrappreżentaw 20% tal-popolazzjoni. In-nisa u t-tfal
huma l-iktar vulnerabbli għall-istress tal-ikel u ekonomiku, b'mod
partikolari matul il-perjodu ta’ nuqqas bejn iċ-ċikli tal-ħsad. Sar progress matul l-aħħar snin
fl-Afrika tal-Punent, grazzi għall-ħidma tal-istituzzjonijiet u
l-pjattaformi eżistenti – bħar-"Réseau de Prévention des Crises
Alimentaires" (RPCA) u l-"Comité permanent Inter-Etats de Lutte
contre la Sécheresse au Sahel" (CILSS). Fuq il-bażi tal-lezzjonijiet
li nkisbu, ġew żviluppati approċċi sabiex jiġu
ffaċċjati aħjar il-kriżijiet tal-ikel. Il-funzjonament
imtejjeb tas-sistemi ta’ twissija bikrija għen lill-pajjiżi u
lid-donaturi biex jantiċipaw aħjar il-kriżi li għaddejja
bħalissa. Il-pjan ta’ azzjoni tal-UE bħala rispons
għall-kriżi tas-Sahel tal-2012 jammonta għal madwar EUR 500
miljun (EUR 123 miljun għar-rispons umanitarju u EUR 372 miljun
għall-programmi tal-iżvilupp). Approċċ bi tliet fażijiet
ġie mfassal f'koordinazzjoni mill-qrib bejn l-għajnuna umanitarja u
dik għall-iżvilupp tal-UE. Il-pjan ikopri firxa wiesgħa ta’
attivitajiet li jvarjaw minn titjib fl-aċċess għall-ikel sa
għajnuna għas-sistemi ta’ twissija bikrija tal-pajjiżi
sħab, il-funzjonament tas-suq u l-protezzjoni tal-ekosistema. Huwa
jgħaqqad flimkien il-programmi tal-emerġenza u tal-iżvilupp, u
jħallat finanzjament għal żmien qasir ma’ dak għal perjodu
medju u fit-tul għat-tisħiħ tar-reżiljenza
f’approċċ integrat. Li jiġu indirizzati l-emerġenzi filwaqt
li jsir investiment fir-reżiljenza jitlob sforzi tal-assistenza
kkoordinati - allinjati ma' organizzazzjonijiet reġjonali – kemm sabiex
jiġu żgurati l-koerenza u l-kumplimentarjetà, kif ukoll sabiex
titnaqqas il-vulnerabilità tal-ifqar familji għal xokkijiet u sabiex
jiġu indirizzati l-kawżi sottostanti tan-nuqqas tas-sikurezza
tal-ikel u n-nutriment. Is-Sħubija "Alliance Globale pour
l'Initiative Résilience " (AGIR), imnedija mill-Kummissjoni fit-18 ta’
Ġunju 2012, tipprovdi pjan tar-reżiljenza li jibni fuq, u
jirrinforza, strateġiji reġjonali eżistenti –
bħall-istrateġija reġjonali konġunta tal-Komunità Ekonomika
tal-Istati tal-Afrika tal-Punent (ECOWAS), L-Union Economique et Monétaire
Ouest Africaine (UEMOA) u l-Comité permanent Inter-Etats de Lutte contre la
Sécheresse dans le Sahel (CILSS) bl-appoġġ tas-Sahel and West Africa
Club (SWAC). Pjan ta' Azzjoni reġjonali sabiex tissaħħaħ
ir-reżiljenza b'mod permanenti u sostenibbli fis-Sahel, imfassal
mill-organizzazzjonijiet reġjonali tal-Afrika tal-Punent
bl-appoġġ tal-komunità tad-donaturi, se jiġi ppreżentat
quddiem laqgħa ta' livell għoli tal-istati kollha kkonċernati
f'Ougadougou kmieni f'Diċembru 2012. 4. Nitgħallmu mill-esperjenza L-inizjattivi SHARE u AGIR
jirrappreżentaw titjib fil-mod kif l-għajnuna umanitarja u
għall-iżvilupp jinteraġixxu, u jsaħħu l-livelli
tal-assistenza fuq perjodu qasir, jiffaċilitaw ir-rabta bejn l-assistenza,
ir-riabilitazzjoni u l-iżvilupp (LRRD), u juru l-impenn tal-UE biex
tindirizza l-kawżi primarji tan-nuqqas ta’ sigurtà tal-ikel fuq medda
itwal ta’ żmien. Huma jiffukaw fuq is-sigurtà tal-ikel
fl-Afrika sub-Saħarjana, iżda dan l-approċċ jista’
ugwalment ikun applikat għal reġjuni oħra u tipi oħra ta’
vulnerabbiltà (pereżempju, reġjuni mhedda minn għargħar,
ċikluni, terremoti, nixfiet, mewġ tat-tempesti u tsunami, tibdil
fil-klima, jew żidiet fil-prezzijiet tal-ikel). L-approċċ
żviluppat għandu numru ta’ elementi komuni li l-UE se tfittex li
tirreplika fil-pajjiżi li qed jiżviluppaw li huma l-iktar
vulnerabbli. Hemm tliet komponenti ewlenin f’dan l-approċċ, li huma
elaborati aktar hawn taħt: ·
Antiċipazzjoni tal-kriżijiet permezz
tal-valutazzjoni tar-riskji ·
Enfasi fuq il-prevenzjoni u l-preparatezza ·
Tisħiħ tar-rispons
għall-kriżijiet 4.1. Antiċipazzjoni
tal-kriżijiet permezz tal-valutazzjoni tar-riskji Kemm fil-Qarn tal-Afrika kif ukoll fis-Sahel,
sistemi ta’ twissija bikrija indikaw li kienu imminenti kriżijiet. Is-sistemi
ta’ twissija bikrija għas-sigurtà tal-ikel (bħall-approċċ
tal-Klassifikazzjoni Integrata tal-Fażijiet) ġew imtejba, u dan
jippermetti lill-pajjiżi u l-istituzzjonijiet reġjonali sħab
sabiex jippreparaw rispons xieraq minn qabel ma jseħħu
l-kriżijiet. Bl-istess mod, is-sistemi ta’ twissija bikrija għal
riskji oħrajn bħal tsunamis, jew għal reġjuni oħra,
issa qegħdin ukoll jaħdmu aħjar. Dawn is-sistemi ta’ informazzjoni
jeħtieġu wkoll li jkunu interkonnessi ma’ inizjattivi globali
rilevanti bħas-Sistema tal-Informazzjoni tas-Suq Agrikolu stabbilita
fil-kuntest tal-G20. Jeħtieġ ukoll li jkun hemm rabta
iktar sistematika bejn l-informazzjoni mogħtija u t-tfassil tal-politika u
t-teħid tad-deċiżjonijiet fil-livelli nazzjonali u
reġjonali. Pereżempju, dejta bħan-nuqqas ta’ nutrizzjoni
(tat-tfal), il-produzzjoni agrikola (inklużi l-istokks) u s-swieq
(inklużi l-prezzijiet tal-ikel) għandha tikkontribwixxi aħjar
għall-politiki tas-sigurtà tal-ikel u l-agrikoltura sostenibbli. Din għandha tiġi riflessa b'mod partikolari
fil-politiki u l-proċessi li għalihom huma responsabbli
l-pajjiżi bħall-Programm għall-Iżvilupp Komprensiv
għall-Agrikoltura Afrikana (CAADP). Il-pjanijiet ta’ investiment tas-CAADP
mhux biss jindirizzaw il-limitazzjonijiet attwali iżda wkoll jantiċipaw
xokkijiet u stress fil-ġejjieni u jenfasizzaw u jgħinu
lill-pajjiżi jtaffu, jirrispondu u jibnu r-reżiljenza. Is-sistema
reġjonali ta’ twissija bikrija (CILSS/ECOWAS/UEMOA): In-Netwerk għall-Prevenzjoni tal-Kriżijiet Alimentari (RCPA)
hu pjattaforma fejn il-pajjiżi msieħba, id-donaturi, in-NU, u
l-organizzazzjonijiet tas-soċjetà ċivili jiġbru flimkien
l-informazzjoni sabiex joħorġu b'analiżi konġunta
tan-nuqqas tas-sigurtà tal-ikel fl-Afrika tal-Punent. Hija kienet strumentali
biex tat l-allarm fil-fażijiet bikrin tal-kriżi attwali tal-2012. Bl-istess mod, l-UE stabbilixxiet l-Alleanza
Globali dwar it-Tibdil fil-Klima sabiex issaħħaħ id-djalogu
tal-politika u l-kooperazzjoni mal-pajjiżi l-aktar milquta mit-tibdil
fil-klima. Sistemi ta’ Informazzjoni ta’ Twissija Bikrija u l-Ġestjoni
tad-Diżastri huma elementi importanti f’dan il-kuntest. Sistemi
ta’ twissija bikrija fin-Nepal: F'Awwissu 2010, il-livelli tal-għargħar tax-Xmara Rapt
qabżu l-livell tal-allarm fid-distrett ta’ Chitwan. Is-sistema tat-twissija
bikrija matul ix-xmara, permezz ta’ netwerk tar-radju u tat-telefown,
ippermettiet lill-Kumitati tal-Ġestjoni tad-Diżastri tal-komunitajiet
f’riskju sabiex iċaqilqu l-assi essenzjali u mobbli tagħhom lejn
postijiet aktar fl-għoli u aktar sikuri. Meta l-għargħar
laħqu l-irħula, in-nies diġà kienu waslu f'postijiet sikuri.
It-twissija bikrija għalhekk imminimizzat it-telf tal-ħajja u
l-proprjetà. Il-Bangladexx: Il-finanzjament għall-Kulleġġ Mediku ta’ Dhaka,
b’enfasi fuq il-maniġment ta’ sitwazzjonijiet ta’ diżgrazzji
tal-massa, inkluż l-ippjanar ta’ kontinġenza, it-tagħmir mediku,
il-ħażniet tal-mediċina u t-taħriġ. Konsegwentement,
f'Ġunju 2010, wara nar li kkawża 120 mewt, l-isptar kien kapaċi
jsalva l-ħajja ta’ aktar minn 250 pazjent. ASEAN: Fuq livell reġjonali, il-Kummissjoni qiegħda
tappoġġja lil AADMER (ASEAN Agreement on Disaster Management and
Emergency Response), li l-għan tiegħu huwa li jżid
ir-reżiljenza u jnaqqas il-vulnerabbiltà f'komunitajiet lokali u
istituzzjonijiet permezz ta’ appoġġ lil strateġiji li jippermettulhom
jippreparaw aħjar għal, jimmitigaw u jirrispondu għal
diżastri naturali. 4.2. Enfasi fuq il-prevenzjoni u
l-preparatezza Ir-reazzjoni tal-komunità internazzjonali u
l-pajjiżi milquta għall-kriżijiet fil-Qarn u s-Sahel uriet
progress sinifikanti fil-kapaċità biex jiġu indirizzati l-konsegwenzi
tal-kriżijiet. Madankollu huma enfasizzaw ukoll l-importanza primordjali
tal-prevenzjoni (li l-kriżijiet jitwaqqfu milli jseħħu) u
l-preparatezza (li jiġi żgurat li individwu, familja,
pajjiż, jew reġjun huma lesti li jimmaniġġaw l-effetti ta’
episodju negattiv). Għalhekk, huwa kruċjali li: –
Għaż-żmien fit-tul, il-programmi
nazzjonali u reġjonali jindirizzaw il-kawżi ta’ vulnerabbiltà.
Vulnerabbiltà mnaqqsa għax-xokkijiet hija possibbli biss jekk tkun
inkorporata fi ħdan politiki ta’ żvilupp tal-pajjiżi sħab.
Biex jiġu żviluppati dawn il-proċessi huwa meħtieġ li
l-analiżi tar-riskju, inkluża l-ġestjoni tar-riskju
tad-diżastri u l-ġestjoni tal-kriżijiet tal-ikel, ikunu
integrati f’politiki nazzjonali/reġjonali. B'mod simili, adattament
għat-tibdil fil-klima u oqfsa tal-politika bħall-Programmi ta’
Azzjoni dwar l-Adattament Nazzjonali (NAPAs) għandhom ukoll jiġu
integrati fil-politiki nazzjonali. –
L-esperjenza miksuba minn inizjattivi bħal
SHARE u AGIR jew proġetti pilota ta’
suċċess dwar id-DRM bħal dawk appoġġjati
mill-Programm tal-Preparatezza għad-Diżastri tal-Kummissjoni
(DIPECHO) għandha tkun imxerrda aħjar. Waħda mill-isfidi
hija li naraw kif proġetti bbażati fuq il-Komunità li jiksbu
suċċess, jistgħu jikkontribwixxu aħjar għall-politiki
governattivi nazzjonali u reġjonali. –
Il-governanza strutturata
għall-ġestjoni tad-diżastri jeħtieġ li tittejjeb u
jeħtieġ li tissaħħaħ il-kapaċità tal-partijiet
interessati fil-livelli lokali u nazzjonali. Strutturi lokali b'saħħithom
huma essenzjali sabiex jiġu mmitigati r-riskji u tiġi żgurata
l-effikaċja tal-isforzi ta' prevenzjoni u preparatezza kif ukoll
l-operazzjonijiet ta' rispons inizjali. –
Sħubiji pubbliċi privati għandhom jintużaw b’mod sħiħ f’kuntesti xierqa
bħall-inizjattiva riċenti tal-G8 'Alleanza Ġdida għall-Ikel
u n-Nutriment', Fil-każ ta’ kriżijiet tal-ikel, hemm
bżonn ta’ approċċ integrat sabiex jiġu indirizzati
l-kawżi prinċipali tan-nuqqas ta’ sigurtà fl-ikel.
F'termini ta’ disponibbiltà tal-ikel, dan ikopri d-diversifikazzjoni
tal-produzzjoni tal-ikel, li tista’ tixxekkel minn degradazzjoni ambjentali u
t-tibdil fil-klima. L-aċċess għall-prodotti tal-ikel
jirrikjedi swieq funzjonanti u xbieki ta’ sikurezza, filwaqt li wieħed
jinnota l-importanza tar-riservi, l-iskemi ta’ assigurazzjoni, l-istrumenti
tal-ħażna, l-aċċess tal-bdiewa għas-suq u servizzi
finanzjarji, u ħażniet ta’ emerġenza. Huwa jinkludi wkoll
investimenti fl-infrastruttura rurali u fir-riċerka u t-trasferiment
tat-teknoloġija. Mill-perspettiva fit-tul, appoġġ
għall-agrikoltura sostenibbli huwa importanti ħafna sabiex tinbena
r-reżiljenza fl-Afrika sub-Saħarjana fejn is-settur jipprovdi impjieg
għal 60% tal-popolazzjoni, speċjalment dawk li huma l-aktar vulnerabbli.
Il-Programm tax-Xibka tas-Sikurezza Produttiva
tal-Etjopja (PSNP) jipprovdi lezzjonijiet validi. Huwa jipprovdi trasferimenti
f'forma ta’ ikel jew ta’ flus lill-familji l-aktar vulnerabbli fil-pajjiż,
bi skambju ma’ parteċipazzjoni f'xogħlijiet pubbliċi. Il-PSNP huwa l-akbar skema ta’ trasferiment
soċjali fl-Afrika sub-Saħarjana u huwa kosteffikaċi (jiswa
madwar terz) meta mqabbel ma' interventi umanitarji. L-indirizzar
tal-kriżi moħbija tan-nuqqas ta’ nutrizzjoni tat-tfal biex titnaqqas
il-vulnerabbiltà tal-adulti ta' għada: Il-ġuħ u n-nuqqas ta’ nutrizzjoni joqtlu madwar 2,6 miljun
tifel u tifla fis-sena. In-nuqqas ta’ nutrizzjoni jaffettwa wieħed minn
kull tlett itfal f'pajjiżi li qed jiżviluppaw. Spiss il-problema
tibda qabel ma jitwieldu minħabba nuqqas ta’ nutrizzjoni tal-omm. In-nuqqas
ta’ nutrizzjoni hija waħda mill-kawżi prinċipali ta’
vulnerabbiltà, speċjalment għat-tfal sal-età ta’ sentejn (2). Huwa jnaqqas l-iżvilupp intellettwali u
fiżiku, u b'hekk inaqqas il-kapaċità tal-adulti ta’ għada
sabiex jiffaċċjaw żviluppi negattivi. Barra minn hekk, huwa
jiswa lil bosta pajjiżi li qed jiżviluppaw bejn 2% u 3% tal-Prodott
Domestiku Gross tagħhom kull sena, u jestendi ċ-ċiklu tal-faqar,
u jxekkel it-tkabbir ekonomiku. L-UE tappoġġja lill-imsieħba
tagħha fl-isforzi tagħhom sabiex inaqqsu n-nuqqas ta’ nutrizzjoni fuq
perjodu qasir u twil ta’ żmien. Approċċi huma meħtieġa
f’diversi setturi bħas-saħħa, l-agrikoltura, l-ilma, is-sanità,
it-tkabbir ekonomiku, u l-edukazzjoni. L-UE tappoġġja l-moviment SUN
(Scaling Up Nutrition - Żieda fin-Nutrizzjoni), li jipprovdi qafas
għat-tmexxija tal-pajjiżi sħab. Niffaċċjaw
in-nixfa fil-KENJA tat-Tramuntana. 3,7 miljun
Kenjan kienu fi bżonn immedjat ta' ikel, ilma nadif u sanitazzjoni
bażika matul in-nixfa tal-2011. Taħt SHARE, l-UE qed
issaħħaħ l-appoġġ tagħha
għat-tisħiħ tal-irkupru u l-bini tar-reżiljenza, permezz
ta': assistenza sabiex tiġi ssimplifikata s-sistema tat-twissija bikrija
tal-Kenja; appoġġ istituzzjonali għall-Ministeru tal-Kenja
tat-Tramuntana; appoġġ għall-Awtorità Nazzjonali tal-Ġestjoni
tan-Nixfiet (NDMA) li tamministra Fond ta' Kontinġenza tad-Diżastri u
n-Nixfiet; titjib tal-kapaċitajiet tal-awtoritajiet lokali sabiex iwettqu
rispons bikri; u proġetti tal-għajxien fuq il-livell
tal-komunitajiet, li jespandu l-opportunitajiet ekonomiċi.
Istituzzjonijiet aktar b'saħħithom u aktar investimenti f'artijiet
niexfa mill-Gvern tal-Kenja huma mistennija li jħejju aħjar
lill-pajjiż sabiex itaffi l-impatt ta' kriżi simili. 4.3. It-titjib tar-reazzjoni
għal sitwazzjonijiet ta’ kriżi Imfassla inter alia fuq l-esperjenza miksuba
fil-Qarn u s-Sahel, l-elementi li ġejjin jistgħu jgħinu sabiex
jittejjeb l-impatt tar-rispons għall-kriżijiet meta dawn
jitfaċċaw: –
It-tħejjija ta’ qafas analitiku konġunt
imħejji minn atturi umanitarji u tal-iżvilupp li: ·
jidentifika l-kawżi profondi tal-kriżi
kif ukoll l-impatt preċiż fuq l-aktar popolazzjonijiet milquta. ·
jivvaluta l-interventi li jkunu għaddejjin
biex jara jekk humiex qegħdin jiġu indirizzati l-kawżi ewlenin u
wkoll biex jara jekk hemmx lakuni fl-għajnuna li qed tiġi pprovduta. ·
jidentifika l-oqsma, kemm f'termini ta’ setturi kif
ukoll ta’ reġjuni ġeografiċi, fejn approċċ ta’
reżiljenza msaħħa jista’ jkollu l-akbar impatt. ·
jiddefinixxi prijoritajiet strateġiċi
għal żmien qasir (l-irkupru bikri) kif ukoll għat-tul
b’“Approċċ ta’ Reżiljenza” koerenti –
Jeħtieġ ikun hemm żieda
fil-finanzjament temporanju għall-appoġġ tal-fażi
tal-irkupru bikri. Inizjattivi reċenti jenfasizzaw il-ħtieġa
għal livell ogħla ta’ flessibbiltà fl-ipprogrammar biex jingħata
rispons għall-bżonnijiet li jinbidlu malajr, mingħajr ma
jitnaqqsu l-attivitajiet li jinsabu għaddejjin għal perjodu
medju/twil biex jiġu indirizzati l-kawżi primarji. Modalitajiet
ġodda ta’ għajnuna bħal Fondi Fiduċjarji tal-UE
għandhom jiġu kkunsidrati biex jiġu indirizzati sitwazzjonijiet
ta’ emerġenza jew ta’ wara l-emerġenzi. –
Il-biċċa l-kbira tal-kriżijiet
maġġuri huma transkonfinali. Il-kapaċità
tal-organizzazzjonijiet reġjonali jeħtieġ li tiġi
msaħħa sabiex dawn ikunu jistgħu jiżviluppaw inizjattivi
transkonfinali u jippromwovu l-integrazzjoni reġjonali. –
Għal kriżijiet kbar, għandhom
jitwaqqfu strutturi ħfief biex jippermettu l-koordinazzjoni
tad-donaturi u t-twaqqif ta' djalogu strutturat ma' pajjiżi sħab u
organizzazzjonijiet reġjonali. Huwa meħtieġ li jiġi ddefinit
u fformalizzat min jagħmel xiex, abbażi tal-vantaġġ
komparattiv ta’ kull attur f'kuntest partikolari. Kemm l-atturi
tal-iżvilupp kif ukoll dawk umanitarji għandhom jiġu involuti
b'mod attiv. –
Identifikazzjoni ta’ interventi fuq medda qasira
ta’ żmien li għandhom impatt fit-tul. Għalkemm risponsi fuq
medda qasira ta’ żmien, u l-assistenza umanitarja b'mod partikolari, huma
l-aktar iffukati fuq li jsalvaw il-ħajjiet u jipproteġu l-assi, dawn
l-attivitajiet jistgħu jkollhom ukoll impatt fit-tul. Pereżempju,
bidla minn għajnuna tal-ikel għal trasferimenti tal-flus jista’
jkollha effett fit-tul biex jiġi stimulat is-suq lokali u jiġu
ffinanzjati xogħlijiet pubbliċi li jistgħu jnaqqsu l-possibbiltà
ta’ diżastri oħra fil-ġejjieni jew jimmitigaw l-impatt tagħhom.
Dawn it-tipi ta’ interventi għandhom ikunu identifikati u prijoritizzati. –
Fejn jeżistu kunflitti vjolenti,
l-istrateġija tar-reżiljenza u l-approċċ aktar wiesa'
tal-UE għall-politiku u tas-sigurtà għandhom jappoġġjaw lil
xulxin u jkunu konsistenti bejniethom, u għandhom jiġu
żviluppati sinerġiji fil-livelli tal-istrumenti, partikolarment
l-istrumenti tal-Politika ta' Sigurtà u ta' Difiża Komuni u l-Istrument
għall-Istabbiltà. Finanzjament
flessibbli permezz tal-Faċilità Alimentari tal-UE ta’ EUR 1 biljun, AFSI u V-FLEX - il-kriżi tal-prezzijiet
tal-ikel tal-2007/08 wasslet għal rispons fuq skala bla preċedent
mill-komunità internazzjonali. L-UE kienet l-ewwel donatur li ħadet
miżuri proattivi u ħabbret Faċilità Alimentari ta’ EUR 1 biljun,
li wriet l-abbiltà tal-UE li tirreaġixxi fil-ħin u fuq skala kbira.
Sena wara, fl-2009, donaturi wiegħdu USD 22 biljun f'appoġġ
għal agrikoltura sostenibbli u s-sigurtà tal-ikel (the L'Aquila Food
Security Initiative, AFSI - l-Inizjattiva għas-Sigurtà tal-Ikel ta’ L’Aquila,).
L-UE żiedet aktar appoġġ, u kkommettiet
US$ 3,8 biljun. Jeżistu żewġ mekkaniżmi oħra
għall-pajjiżi Afrikani, tal-Karibew u tal-Paċifiku (Pajjiżi
AKP): il-FLEX (Fluctuations in Export Earnings – Fluttwazzjonijiet
fil-Qligħ mill-Esportazzjoni) tassisti l-gvernijiet li
jiffaċċjaw telf f’daqqa tal-qligħ mill-esportazzjoni u
"Vulnerability FLEX" (V-FLEX) imfassla biex tgħin
lill-pajjiżi l-aktar affettwati mit-tnaqqis fir-ritmu ekonomiku tal-2009
minħabba r-reżiljenza fqira tagħhom. Dan l-istrument kien
jaħdem b’mod preventiv, abbażi tal-previżjonijiet ta’ telf
fiskali, b’aġġustamenti għall-vulnerabbiltà, u jaġixxi
b'mod kontraċikliku b’mod li jidentifika nuqqasijiet ta’ finanzjament
nazzjonali. 5. 10 PASSI BIEX TISSAĦĦAĦ
IR-REŻILJENZA F'PAJJIŻI LI MA GĦANDHOMX SIGURTà TAL-IKEL U LI
HUMA ESPOSTI GĦAD-DIŻASTRI 1. Ir-reżiljenza tista'
tinbena biss mill-qiegħ. Il-punt tat-tluq għall-approċċ
tal-UE għar-reżiljenza għalhekk huwa rikonoxximent sod tar-rwol
ewlieni tal-pajjiżi sħab. L-UE se tallinja l-appoġġ tagħha
mal-politiki u l-prijoritajiet tas-sħab tagħha, f'konformità
mal-prinċipji tal-Effikaċja tal-Għajnuna. 2. Azzjoni
għat-tisħiħ tar-reżiljenza jenħtieġ li
tittieħed abbażi ta' metodoloġiji sodi
għall-valutazzjonijiet tar-riskju u l-vulnerabilità. Dawn il-valutazzjonijiet
għandhom iservu bħala l-bażi għall-elaborazzjoni
tal-istrateġiji nazzjonali tar-reżiljenza, kif ukoll
għat-tfassil ta' proġetti u programmi speċifiċi. L-UE se
tappoġġja l-iżvilupp ta' strateġiji nazzjonali
tar-reżiljenza bħala parti mill-istrateġiji aktar wiesgħa
tal-iżvilupp. L-UE se tikkoopera mal-pajjiżi msieħba u l-atturi
internazzjonali ewlenin sabiex ittejjeb il-metodoloġiji
għall-iżvilupp tal-valutazzjonijiet li fuqhom huma bbażati dawn
l-istrateġiji. Sabiex tiżgura l-effikaċja, l-UE sejra madankollu
tistabbilixxi qafas għall-kejl tal-impatt u r-riżultati
tal-appoġġ tagħha għar-reżiljenza. 3. F'pajjiżi li qed
jiffaċċjaw kriżijiet rikorrenti, li tiġi miżjuda
r-reżiljenza se jkun għan ċentrali tal-għajnuna esterna
tal-UE. Il-programmi bbażati mill-UE se jkunu bbażati fuq
valutazzjoni operattiva komuni mħejjija mill-atturi umanitarji u
tal-iżvilupp, li tkopri l-interventi fuq perjodu ta' tul medju sa dawk
fit-tul. Huma se jiffukaw fuq l-indirizzar tal-kawżi ta' bażi
tal-kriżijiet, partikolarment permezz tal-appoġġ
għall-attivitajiet tal-prevenzjoni u l-preparatezza. Hija se taħdem
aktar mill-qrib mal-pajjiżi sħab sabiex tistabbilixxi
l-kapaċitajiet sabiex telabora u timplimenta strateġiji u pjanijiet
ta' Ġestjoni tat-Tnaqqis tad-Diżastri fuq il-livell nazzjonali u
reġjonali. 4. Il-Kummissjoni sejra
sistematikament tinkludi r-reżiljenza bħala element fil-Pjanijiet ta'
Implimentazzjoni Umanitarja tagħha. Minbarra dan, il-Kummissjoni se
tagħmel ħilitha favur l-ipprogrammar konġunt tal-azzjonijiet
relatati mar-reżiljenza fl-għajnuna umanitarja u tal-iżvilupp
tagħha sabiex tiżgura l-kumplimentarjetà massima, u tiżgura li
l-azzjonijiet għal parjodu qasir jistabbilixxu l-bażi
għall-interventi fuq perjodu ta' żmien medju jew fit-tul. 5. Il-flessibilità se tkun ta'
importanza ewlenija għall-ħtiġijiet tal-pajjiżi affettwati
mid-diżastri. Il-Kummissjoni se tkompli tiżgura l-flessibilità
massima fl-implimentazzjoni tal-programmi umanitarji tagħha.
Għall-finanzjament tal-iżvilupp, fi żminijiet ta' kriżijiet
mhux previsti u diżastri maġġuri, l-UE se tfittex flessibilità
massima fil-mobilizzazzjoni ta' fondi mhux programmati. Minbarra dan,
il-Kummissjoni se tintroduċi flessibilità fid-disinn tal-programmi sabiex
tippermetti azzjoni malajr u f'waqtha. L-UE se tikkunsidra l-użu ta' Fondi
Fiduċjarji sabiex tintervjenti f'sitwazzjonijiet ta' emerġenza u ta'
wara l-emerġenzi. 6. Meta tkun qed taħdem
sabiex ittejjeb ir-reżiljenza fi stati fraġli jew affettwati
mill-kunflitti, l-UE se ssegwi approċċ li jindirizza wkoll l-aspetti
tas-sigurtà u l-impatti tagħhom fuq il-vulnerabilità tal-popolazzjonijiet.
Dan se jinkludi wkoll djalogu politiku attiv mal-pajjiżi u
l-organizzazzjonijiet sħab fir-reġjun ikkonċernat. 7. L-UE se tipprova tirreplika
l-inizjattivi eżistenti bħal SHARE u AGIR, kif ukoll proġetti
ta' suċċess fuq it-Tnaqqis tar-Riskju tad-Diżastri (DRR). Hija
se taqsam u tiskambja lezzjonijiet mas-sħab tagħha sabiex
timmultiplika u tkabbar l-iskala tal-approċċi li jirnexxu –
bil-għan li tinkorporahom fl-istrateġiji nazzjonali
tar-reżiljenza. Il-Kummissjoni se tirrevedi regolarment il-progress li
jsir fl-aġenda tar-reżiljenza, u se tħares partikolarment lejn
l-ipprogrammar, il-metodoloġiji u r-riżultati. 8. L-UE se tippromwovi
approċċi innovattivi għall-ġestjoni tar-riskju. Ħidma
flimkien mal-industriji tal-assigurazzjoni u r-riassigurazzjoni huwa
approċċ partikolarment promettenti. Il-Kummissjoni se
tippreżenta Green Paper fil-bidu tal-2013 dwar ir-rwol tal-assigurazzjoni
fil-ġestjoni tad-diżastri. 9. Għal pajjiżi li qed
jiffaċċjaw kriżijiet severi, l-UE se taħdem mal-gvernijiet
ospitanti, donaturi oħra, organizzazzjonijiet reġjonali u
internazzjonali u partijiet interessati oħra sabiex toħloq
pjattaformi fil-livell tal-pajjiżi sabiex tiżgura skambju f'waqtu tal-informazzjoni
u l-koordinazzjoni ta' azzjonijiet umanitarji u tal-iżvilupp fuq perjodu
qasir, medju u fit-tul għat-tisħiħ tar-reżiljenza. 10. L-UE se tippromwovi
r-reżiljenza fil-fora internazzjonali, inklużi l-G8, il-G20,
il-Kumitat dwar is-Sigurtà Alimentari Dinjija (CFS), il-Konvenzjonijiet ta'
Rio, il-proċess għar-reviżjoni tal-Għanijiet tal-Millennju
għall-Iżvilupp, l-iżvilupp ta' Għanijiet tal-Iżvilupp
Sostenibbli u d-diskussjonijiet dwar is-segwitu tal-Qafas Hyogo
għall-Azzjoni tal-2005-2015. Ir-reżiljenza se tkun tema ewlenija
fis-sħubijiet tagħha ma' organizzazzjonijiet bħall-FAO, l-IFAD u
l-WFP, kif ukoll il-UNISDR, il-Bank Dinji, u organizzazzjonijiet
tas-soċjetà ċivili. Fl-ewwel kwart tal-2013, il-Kummissjoni se
tħejji Pjan ta' Azzjoni sabiex tistabbilixxi t-triq 'il quddiem
għall-implimentazzjoni ta' dawn il-prinċipji. [1] COM(2011)637, kif approvat mill-Konklużjonijiet
tal-Kunsill tal-14 ta’ Mejju 2012. [2] COM(2010)127 finali [3] COM(2009) 147 finali. White paper – 'Nadattaw
ruħna għat-tibdil fil-klima: Lejn qafas Ewropew għall-azzjoni [4] L-istrateġija tal-UE ta' sostenn għat-tnaqqis
tar-riskju ta' diżastri fil-pajjiżi fil-fażi ta' żvilupp
(COM (2009) 84 tat-23.02.2009. Lejn reazzjoni tal-UE għal sitwazzjonijiet
ta’ fraġilità: L-involviment f’ambjenti diffiċli
għall-iżvilupp sostenibbli, l-istabilità u l-paċi COM (2007) 643
tal-25.10.2007. [5] Dokument ta’ Ħidma tal-Persunal tal-Kummissjoni
SEC(2012) 102 tal-11 ta’ April 2012. [6] Alliance globale pour
l'Initiative Résilience (Sahel) –
http://europa.eu/rapid/pressReleasesAction.do?reference=IP/12/613&format=HTML&aged=0&language=EN& [7] Il-Konvenzjoni Qafas tan-Nazzjonijiet Uniti dwar
it-Tibdil fil-Klima, il-Konvenzjoni tan-Nazzjonijiet Uniti dwar id-Diversità
Bijoloġika u l-Konvenzjoni tan-Nazzjonijiet Uniti Kontra
d-Deżertifikazzjoni [8] L-ambitu tal-Alleanza jkopri l-Qarn estiż:
l-Etjopja, il-Kenja, l-Uganda, il-Ġibuti kif ukoll is-Sudan u s-Sudan ta’
Isfel. Is-Segretarjat huwa pprovdut minn USAID.