RAPPORT TAL-KUMMISSJONI LILL-PARLAMENT EWROPEW U LILL-KUNSILL

Rapport annwali lill-Parlament Ewropew u lill-Kunsill dwar l-attivitajiet tal-Unità Ċentrali tal-EURODAC fl-2011

1.           Introduzzjoni

1.1.        Ambitu

Ir-Regolament tal-Kunsill KE/2725/2000 tal-11 ta' Diċembru 2000 dwar l-istabbiliment tal-'EURODAC' għat-tqabbil ta' marki tas-swaba’ għall-applikazzjoni effettiva tal-Konvenzjoni ta' Dublin (minn hawn 'il quddiem imsejjaħ ir-'Regolament tal-EURODAC')[1], jistipula li l-Kummissjoni tippreżenta rapport annwali dwar l-attivitajiet tal-Unità Ċentrali lill-Parlament Ewropew u lill-Kunsill[2]. Ir-rapport annwali attwali, li huwa d-disa’ wieħed, jinkludi informazzjoni dwar il-ġestjoni u l-prestazzjoni tas-sistema fl-2011. Dan jivvaluta r-riżultat u l-kosteffettività tal-EURODAC, kif ukoll il-kwalità tas-servizz tal-Unità Ċentrali tagħha.

1.2.        Żviluppi legali u tal-politika

Il-Kummissjoni adottat Riformulazzjonijiet tar-Regolament EURODAC fl-2008[3] u fl-2009[4]. Dawn ġew segwiti bi proposta emendata tal-11 ta' Ottubru 2010 għal Regolament tal-Parlament Ewropew u tal-Kunsill dwar l-istabbiliment tal-'EURODAC' għat-tqabbil ta' marki tas-swaba’ għall-applikazzjoni effettiva tar-Regolament (KE) Nru […/…] [li jistabbilixxi l-kriterji u l-mekkaniżmi biex jiġi ddeterminat l-Istat Membru responsabbli biex jeżamina applikazzjoni għal protezzjoni internazzjonali ddepożitata f'wieħed mill-Istati Membri minn ċittadin ta' pajjiż terz jew persuna mingħajr Stat][5], li kien diskuss mill-koleġiżlaturi kmieni fl-2011. Fit-03.02.2011 ittieħed vot ta' orjentament fil-kumitat LIBE tal-Parlament Ewropew li permezz tiegħu ġie adottat l-abbozz tar-rapport tar-Rapporteur[6]. Saru żewġ laqgħat tal-korp preparatorju tal-Kunsill biex tiġi diskussa l-proposta.

Fil-21 ta' Ottubru 2011, il-Presidenza Pollakka avżat lill-Kunsill li x-"Xogħol fuq ir-Regolament EURODAC jinsab wieqaf. Il-maġġoranza vasta tad-delegazzjonijiet sostniet l-appoġġ tagħha biex tiddaħħal klawsola fir-Regolament EURODAC li tagħmilha possibbli għall-Istati Membri li jippermettu lill-awtoritajiet tagħhom tal-infurzar tal-liġi aċċess għall-bażi ċentrali tad-dejta tal-EURODAC taħt kundizzjonijiet stretti għall-finijiet tal-ġlieda kontra t-terroriżmu u l-kriminalità organizzata."[7] Il-Kummissjoni qabel kienet ippreżentat proposta li tippermetti l-possibbiltà tal-aċċess tal-EURODAC mill-awtoritajiet tal-infurzar tal-liġi[8], imma bid-dħul fis-seħħ tat-Trattat ta' Lisbona, din skadiet. Bħala konsegwenza, in-negozjati dwar il-proposta tal-2010 (li ma kenitx tinkludi aċċess għall-infurzar tal-liġi) ma reġgħux bdew fl-2011. Madankollu, peress li l-maġġoranza vasta tal-Istati Membri qed jitolbuha, issa jidher ċar li l-inklużjoni tal-infurzar tal-liġi fl-aċċess għall-EURODAC hi meħtieġa bħala parti minn ftehim ibbilanċjat fuq in-negozjati tal-pakkett dwar is-Sistema Ewropea Komuni dwar l-Asil, bil-ħsieb li l-pakkett jitlesta sa tmiem l-2012. Skont dan, il-Kummissjoni ddeċidied li terġa' tressaq proposta li tippermetti l-aċċess għall-infurzar fil-liġi għall-EURODAC, ippreżentata fit-30 ta' Mejju 2012.

L-UNITÀ ĊENTALI TAL-EURODAC[9]

1.3.        Il-ġestjoni tas-sistema

Minħabba l-ammont dejjem jikber ta' dejta li għandha tiġi ġestita (ċerti kategoriji ta' tranżazzjonijiet iridu jinħażnu għal 10 snin), l-iskadenza naturali tal-pjattaforma teknika (imwaqqfa fl-2001) u x-xejriet mhux prevedibbli tal-volum tat-tranżazzjonijiet tal-EURODAC, il-Kummissjoni aġġornat is-sistema tal-EURODAC. Il-proġett tal-IT, imsejjaħ EURODAC PLUS, kien immirat biex a) jissostitwixxi l-infrastruttura tal-IT li għadda żmienha, b) iżid il-kapaċità u l-prestazzjoni ġenerali tas-sistema, c) jiżgura sinkronizzazzjoni tad-dejta aktar veloċi, sikura u affaidabbli bejn is-Sistema tal-Produzzjoni u s-Sistema tal-Kontinwità tan-Negozju. Fl-2011, it-Test Finali tal-Aċċettazzjoni (FAT) tlesta b'suċċess.

Is-sistema EURODAC PLUS kienet aċċettata formalment f'April 2011, wara li tlesta t-test finali tal-aċċettazzjoni li kien jikkonsisti fi 3 xhur konsekuttivi ta' operazzjonijiet mingħajr intoppi.

L-infrastruttura l-qadima tal-EURODAC IT ġiet żarmata f'Novembru tal-2011.

1.4.        Il-kwalità tas-servizz u l-kosteffettività

Il-Kummissjoni ħadet ħsieb mill-aħjar biex twassal servizz ta' kwalità għolja lill-Istati Membri, li huma l-utenti aħħarija tal-Unità Ċentrali tal-EURODAC. L-Istati Membri kienu infurmati bis-sħiħ dwar meta s-servizz ma kienx disponibbli, li esklużivament f'kull okkażjoni kien minħabba attivitajiet marbuta mal-aġġornament tal-EURODAC (EURODAC PLUS). Minkejja li l-Unità Ċentrali tal-EURODAC fiha nnifisha ma rreġistratx xi perjodu fejn ma kenitx qed taħdem fl-2011, il-migrazzjoni skedata mill-EURODAC għal EURODAC PLUS u s-sinkronizzazzjoni relatata tad-dejta bejn is-sistemi kienet tirrikjedi l-interruzzjoni tal-fluss li kien dieħel u bħala konsegwenza l-ipproċessar tat-tranżazzjonijiet li kienu deħlin għal perjodu ta' 16-il siegħa. B'mod ġenerali, fl-2011 l-Unità Ċentrali tal-EURODAC kienet disponibbli għal 99.82% tal-ħin.

In-nefqa għall-manutenzjoni u t-tħaddim tal-Unità Ċentrali fl-2011 kienet ta' EUR 1,040,703.82 u dan kien jimmarka tnaqqis fin-nefqa meta mqabbel mas-snin preċedenti (EUR 2,115,056.51 fl-2010, EUR 1,221,183.83 fl-2009), fil-biċċa l-kbira din kienet dovuta għall-aġġornar tas-sistema EURODAC (EURODAC PLUS). Il-prezz fiss għall-implimentazzjoni tal-EURODAC PLUS hu ta' EUR 3,055,695.49: Fl-2009 tħallsu 20% (EUR 611,139.10) u 60% (EUR 1,833,417.29) tħallsu fl-2010. L-20% li kien fadal (EUR 611,139.10) tħallsu fl-2011 u kienu jirrappreżentaw 58.72% tan-nefqa tas-sena kollha.

Ċertu tfaddil kien possibbli permezz tal-użu effiċjenti tar-riżorsi u l-infrastrutturi eżistenti amministrati mill-Kummissjoni, bħall-użu tan-netwerk s-TESTA[10]. Il-Kummissjoni tipprovdi wkoll (permezz tal-Programm ISA[11]) is-servizzi ta' komunikazzjoni u ta' sigurtà għall-iskambju tad-dejta bejn l-Unitajiet Ċentrali u Nazzjonali. Dawn l-ispejjeż, li fil-bidu kienu maħsuba biex jintrefgħu minn kull Stat Membru skont l-Artikolu 21 (2) u (3) tar-Regolament, f'dal-każ ġew koperti mill-Kummissjoni bl-użu ta' infrastruttura komuni disponibbli.

1.5.        Il-protezzjoni tad-dejta u s-sigurtà tad-dejta

L-Artikolu 18 paragrafu 2 tar-Regolament EURODAC jistabbilixxi kategorija ta’ tranżazzjonijiet li tipprovdi l-possibbiltà li jsiru l’hekk imsejħa 'tfittxijiet speċjali' ("Kategorija 9") fuq it-talba tal-persuna li d-dejta tagħha tkun merfugħa fil-bażi tad-dejta ċentrali biex jiġu salvagwardjati d-drittijiet tagħha, bħala persuna li dwarha jkun hemm id-dejta, biex tiġi aċċessata d-dejta tagħha stess.

Kif ġie enfasizzat fir-rapporti annwali preċedenti, matul l-ewwel snin tal-operat tal-EURODAC, volumi kbar ta' 'tfittxijiet speċjali' wasslu għal tħassib dwar l-użu mhux xieraq li jista jsir mill-għan ta' din il-funzjonalità min-naħa tal-amministrazzjonijiet nazzjonali.

Fl-2011, saru total ta' 226 tfittxija bħal dawn, li jirrappreżentaw żieda kbira meta mqabbla mal-2010 (66) u l-2009 (42). Madankollu, il-maġġoranza vasta ta' dawn il-każijiet saru minn Spanja f'Mejju, Ġunju u Awwissu tal-2011 (10, 22 u 132 każ rispettivament), li jfisser li Spanja kienet responsabbli għal 79% tat-tfittxijiet speċjali kollha.

Biex dan il-fenomenu jiġi mmonitorjat aħjar, il-Kummissjoni inkludiet, fil-proposta tagħha għall-emendar tar-Regolament tal-EURODAC, il-ħtieġa li l-Istati Membri jibagħtu kopja tat-talba għal aċċess tal-persuna li dwarha jkun hemm id-dejta lill-awtorità superviżorja nazzjonali kompetenti.

2.           Ċifri u sejbiet

L-anness mehmuż ma' dan ir-rapport annwali attwali jinkludi tabelli b'dejta fattwali prodotta mill-Unità Ċentrali għall-perjodu 01.01.2011 – 31.12.2011. L-istatistiki tal-EURODAC huma bbażati fuq rekords ta' (1) marki tas-swaba' mill-individwi kollha ta' 14-il sena jew aktar li applikaw għall-asil fi Stati Membri ('kategorija 1'), (2) marki tas-swaba' ta' persuni li nqabdu meta kienu qed jaqsmu fruntiera esterna ta' Stat Membru b'mod irregolari ('kategorija 2'), jew (3) ta' persuni li nstabu preżenti illegalment fit-territorju ta' Stat Membru (fil-każ li l-awtoritajiet kompetenti jikkonsidrawh neċessarju li jivverifikaw applikazzjoni potenzjali preċedenti għall-asil) ('kategorija 3').

Id-dejta tal-EURODAC dwar l-applikazzjonijiet għall-asil ma tistax titqabbel ma' dik prodotta mill-Eurostat, li hi bbażata fuq dejta statistika ta' kull xahar ipprovduta mill-Ministeri tal-Ġustizzja u l-Intern. Hemm numru ta' raġunijiet metodoloġiċi għal dawn id-differenzi. L-ewwel, id-dejta tal-Eurostat tinkludi l-applikanti kollha għall-asil, jiġifieri ta’ kull età. It-tieni, id-dejta tagħhom hi miġbura b’distinzjoni bejn persuni li japplikaw għall-asil matul ix-xahar ta’ referenza (li jista’ jinkludi applikazzjonijiet repetuti) u persuni li japplikaw għall-asil għall-ewwel darba.

2.1.        It-tranżazzjonijiet li jirnexxu

'Tranżazzjoni li tirnexxi' hija tranżazzjoni li ġiet ipproċessata sew mill-Unità Ċentrali, mingħajr rifjut minħabba kwistjoni ta' validità tad-dejta, żbalji fil-marki tas-swaba' jew kwalità mhix suffiċjenti[12].

Fl-2011, l-Unità Ċentrali rċeviet total ta' 412,303 tranżazzjoni li rnexxew, li jirrappreżenta żieda ta' 37.7% meta mqabbla mal-2010 (299,459). Dan hu b'kuntrast max-xejra tas-sena preċedenti, li kienet rat tnaqqis fin-numru tat-tranżazzjonijiet li rnexxew. L-akbar żidiet kienu f'Malta (582.4%) u fl-Italja (559.1%) u jistgħu jiġu attribwiti lir-Rebbiegħa Għarbija.

Ix-xejra fin-numru tat-tranżazzjonijiet tad-dejta ta' dawk li jfittxu asil ('kategorija 1') fl-2011 żdiedet għal 275,857 (28%) talba meta mqabbla mal-2010 (215,463) u l-2009 (236,936).

Kien hemm bidla fix-xejra rigward in-numru ta' persuni li nqabdu b'konnessjoni mal-qsim irregolari ta' fruntiera esterna ('kategorija 2'). Wara li waqa’ għal 31,071 tranżazzjoni fl-2009, u wara li reġa’ waqa’ għal 11,156 fl-2010, in-numru ta' tranżazzjonijiet żdied b'mod notevoli fl-2011 għal 57,693 (417.1%). L-Italja introduċiet il-maġġoranza l-kbira ta' dawn it-tranżazzjonijiet (50,555 jew 88%) u fit-tieni post, b'distakk qawwi, kien hemm Spanja (4,204 jew 7%). Bil-kontra ta’ dan, filwaqt li l-Greċja introduċiet l-ogħla numru ta' tranżazzjonijiet f'din il-kategorija fl-2009 (18,714), kif ġara għal darb'oħra fl-2010 (4,486), fl-2011 introduċiet biss 530 tranżazzjoni (-88%).

Fl-2011, 8 Stati (l-Isvizzera, ir-Repubblika Ċeka, l-Estonja, l-Irlanda, il-Lussemburgu, il-Latvja, in-Norveġja, il-Portugall) ma bagħtu l-ebda tranżazzjoni ta' 'kategorija 2' (5 minn dawn l-Istati ma kienu bagħtu l-ebda waħda lanqas fl-2010). Kif spjegat fir-rapport tal-2009, il-kwistjoni ta’ diverġenza bejn n-numru tad-dejta tal-kategorija 2 mibgħuta lill-EURODAC u sorsi oħrajn ta’ statistiki dwar il-volum ta’ qsim irregolari ta' fruntieri fl-Istati Membri, enfasizzati mill-istatistiki tal-EURODAC, hi minħabba d-definizzjoni vaga fl-Artikolu 8(1) tar-Regolament tal-EURODAC[13]. Din il-kwistjoni se tiġi kkjarifikata fil-qafas tar-reviżjoni attwali tar-Regolament EURODAC.

In-numru totali ta' tranżazzjonijiet ta 'kategorija 3' (id-dejta ta’ persuni maqbuda waqt li jkunu preżenti illegalment fit-territorju ta’ Stat Membru) tela' ftit fl-2011 b'8.1% (għal 78,753) meta mqabbel mal-2010 (72,840). L-Irlanda hi l-uniku Stat Membru li ma bagħat l-ebda tranżazzjoni tal-'kategorija 3'.

Minkejja li tiftixiet tal-'kategorija 3' mhumiex obbligatorji skont ir-Regolament tal-EURODAC, il-Kummissjoni tinkoraġġixxi lill-Istati Membri jużaw din il-possibbiltà qabel ma' jibdew il-proċeduri ta' ripatrijazzjoni skont id-Direttiva 2008/115/KE tal-Parlament Ewropew u tal-Kunsill tas-16 ta’ Diċembru 2008 dwar standards u proċeduri komuni fl-Istati Membri għar-ritorn ta’ ċittadini ta' pajjiżi terzi li jkunu preżenti fil-pajjiż illegalment[14]. F'dawn il-każi msemmija mir-Regolament EURODAC[15], tali tiftix jista' jgħin biex jistabbilixxi jekk iċ-ċittadin ta' pajjiż terz ikunx applika għal asil fi Stat Membru ieħor fejn din il-persuna għandha tiġi ripatrijata skont ir-Regolament ta' Dublin. L-akbar numru ta' tranżazzjonijiet ta' 'kategorija 3' fl-2011 kien mill-Ġermanja (22,851 jew 29%), ir-Renju Unit (12,859 jew 16%) u l-Pajjiżi l-Baxxi (11,154 jew 14%). Dan hu konsistenti max-xejra fl-2010.

2.2.        'Hits'

2.2.1.     Applikazzjonijiet multipli għall-asil (Hits ta' 'kategorija 1' imqabbla ma' 'kategorija 1')

Minn total ta' 275,857 applikazzjoni għall-asil reġistrati fil-EURODAC fl-2011, 22.4% ġew irreġistrati bħala 'applikazzjonijiet multipli għall-asil' (jiġifieri t-tieni darba jew iżjed), li jfisser li f'61,819 każ, il-marki tas-swaba' tal-istess persuna kienu diġà reġistrati bħala tranżazzjoni ta' 'kategorija 1' fl-istess Stat Membru jew f’ieħor. Fl-2010, l-istess ċifra kienet 52,064 (24.2%). Madankollu, il-prattika ta' wħud mill-Istati Membri li jieħdu l-marki tas-swaba' meta jittieħdu lura skont ir-Regolament ta' Dublin tirriżulta f'distorsjoni tal-istatistika dwar l-applikazzjonijiet multipli: it-teħid u t-trażmissjoni mill-ġdid tal-marki tas-swaba' tal-applikant meta jasal, wara trasferiment skont ir-Regolament ta' Dublin, jindika li l-applikant ikun applika għall-asil mill-ġdid meta fil-fatt dan ma jkunx il-każ. Il-Kummissjoni biħsiebha ssolvi din il-problema u, fil-proposta tagħha tal-emendar tar-Regolament tal-EURODAC, introduċiet il-ħtieġa li t-trasferimenti m'għandhomx jiġu reġistrati bħala applikazzjonijiet ġodda għall-asil.

It-tabella 3 tal-Anness turi, għal kull Stat Membru, in-numru ta' applikazzjonijiet għall-asil li jikkorrispondu għall-applikazzjonijiet għall-asil reġistrati preċedentament fi Stat Membru ieħor ('hits barranin') jew fl-istess Stat Membru ('hits lokali')[16].

Fl-2011, total ta' 38.6% tal-applikazzjonijiet multipli kollha kienu hits lokali. F'numru ta' Stati Membri (il-Belġju, il-Bulgarija, Ċipru, ir-Repubblika Ċeka, Spanja, l-Irlanda, l-Italja, il-Pajjiżi l-Baxxi, il-Polonja u r-Renju Unit) din iċ-ċifra saħansitra tisboq il-50%. Il-persentaġġ ta' hits lokali fl-2010 kien ta' 35%. Minħabba li jindikaw il-każi fejn persuna li tkun applikat għall-asil fi Stat Membru tagħmel applikazzjoni oħra fl-Istess Stat Membru, il-hits lokali fil-fatt jirriflettu l-prinċipju ta' applikazzjoni sussegwenti taħt l-Artikolu 32 tad-Direttiva tal-Kunsill 2005/85/KE tal-1 ta' Diċembru 2005 dwar standards minimi għal proċeduri fl-Istati Membri għall-għoti u l-irtirar tal-istatus ta' rifuġjat[17].

Il-hits barranin jagħtu indikazzjoni tal-movimenti sekondarji tal-persuni li jfittxu l-asil fl-UE. Bħal fis-snin preċedenti, l-istatistika tikkonferma li l-movimenti sekondarji li rajna mhux neċessarjament isegwu r-rotot 'loġiċi' bejn l-Istati Membri ġirien. Pereżempju, Franza baqgħet tirċievi l-ogħla numru ta' hits barranin minn persuni li jfittxu l-asil li qabel kienu ppreżentaw applikazzjoni fil-Polonja (1,746). L-istess mudell jista' jiġi osservat fil-Ġermanja, fejn l-ogħla numru ta' hits barranin sar meta mqabbel mad-dejta mill-Isvezja (1,314). L-istatistika turi li l-hits barranin ma jimxux f'direzzjoni waħda biss minn pajjiżi bi fruntiera esterna ta' art jew dawk li jmissu mal-Mediterran lejn l-Istati Membri li qegħdin aktar 'il fuq. Madankollu, l-istatistika li tindika flussi sekondarji lejn pajjiżi bi fruntiera esterna ta' art jew dawk li jmissu mal-Mediterran tista' fil-biċċa l-kbira tiġi attribwita għall-prattika ta' xi Stati Membri għat-teħid tal-marki tas-swaba' meta l-persuni jittieħdu lura skont ir-Regolament ta' Dublin.

2.2.2.     Hits ta' 'kategorija 1' imqabbla ma' dawk ta' 'kategorija 2'

Dawn il-hits jagħtu indikazzjoni tar-rotot li jkunu użaw persuni li jkunu daħlu irregolarment fit-territorju tal-Istati Membri, qabel ma applikaw għall-asil. Fl-2011 il-biċċa l-kbira tal-hits ġraw fil-każ tad-dejta li ntbagħtet mill-Italja; (4,268), il-Greċja (1,805), Spanja (555), l-Ungerija (446) u l-Bulgarija (76). Madankollu, hu sorprendenti li fir-rigward tal-Italja (85.9%) l-biċċa l-kbira ta' dawn il-hits, fil-fatt, kienu hits lokali.

Meta wieħed iqabbel l-2011 mal-2010 wieħed jista' josserva tnaqqis drammatiku minn 73,4% għal 21% fil-każijiet ta' persuni li nqabdu b'konnessjoni mal-qsim irregolari tal-fruntieri, li aktar tard jiddeċiedu li jippreżentaw talba għall-asil. Madankollu, meta wieħed iqabbel in-numru assolut tal-hits, hemm tnaqqis drammatiku minn 11,939 fl-2010 għal 7,384 fl-2011.

Il-biċċa l-kbira ta' dawk li daħlu fl-UE illegalment mill-Italja u baqgħu għaddejjin, ivvjaġġaw lejn l-Isvizzera (2,288), il-Ġermanja (688), jew l-Isvezja (363). Il-biċċa l-kbira ta’ dawk li baqgħu għaddejjin wara li daħlu illegalment mill-Greċja marru l-Ġermanja (323), ir-Renju Unit (195) jew Franza (193). Minn fost dawk li daħlu minn Spanja (555), il-biċċa l-kbira marru lejn l-Isvizzera (161), Franza (139) jew il-Belġju (130), filwaqt li l-biċċa l-kbira ta’ dawk li baqgħu għaddejjin wara li tteħdulhom il-marki tas-swaba' fl-Ungerija marru ljen il-pajjiżi ġirien tal-Awstrija (163) jew il-Ġermanja (66).

2.2.3.     Hits tal-‘kategorija 3 mqabbla ma' kategorija 1’

Dawn il-hits jagħtu indikazzjoni fejn l-immigranti illegali jkunu applikaw għall-asil għall-ewwel darba qabel ma vvjaġġaw lejn Stat Membru ieħor. Madankollu, wieħed għandu jżomm f'moħħu li s-sottomissjoni tat-tranżazzjonijiet tal-'kategorija 3' m'humiex obbligatorji u li mhux l-Istati Membri kollha jużaw il-possibbiltà ta' dan il-kontroll sistematikament.

Id-dejta disponibbli tindika li l-maġġoranza tal-flussi ta' persuni li nqabdu meta kienu preżenti illegalment fi Stat Membru differenti minn dak li fih talbu l-asil spiċċaw fi ftit Stati Membri, b'mod partikolari l-Ġermanja (7,749), l-Isvizzera (2,225), il-Pajjiżi l-Baxxi (3,418), Franza (2,255), l-Awstrija (1,739) u n-Norveġja (1,612).

2.3.        Id-dewmien tat-tranżazzjoni

Ir-Regolament EURODAC bħalissa jipprovdi biss skadenza vaga għat-trażmissjoni tal-marki tas-swaba’, li tista' twassal għal dewmien sinifikanti fil-prattika. Din hi kwistjoni kruċjali minħabba li dewmien fit-trażmizzjoni jista' jwassal għal riżultati li jmorru kontra l-prinċipji tar-responsabbiltà stabbiliti fir-Regolament ta' Dublin. Il-kwistjoni ta' dewmien esaġerat bejn it-teħid tal-marki tas-swaba' u li dawn jintbagħtu lill-Unità Ċentrali EURODAC kienet imsemmija fir-rapport annwali preċedenti u enfasizzata bħala problema ta' implimentazzjoni fir-Rapport ta' Evalwazzjoni.

Kuntrarju għas-snin preċedenti, l-2011 rat tnaqqis globali fil-medja tad-dewmien tat-trażmissjonijiet, jiġifieri l-perjodu li jkun għadda bejn meta jittieħdu l-marki tas-swaba' u meta jintbagħtu lill-Unità Ċentrali tal-EURODAC. Id-dewmien tal-biċċa l-kbira tal-Istati Membri u l-Pajjiżi Asooċjati biex jittrażmettu l-marki tas-swaba' lill-Unità Ċentrali tal-EURODAC hu bejn 0 u erbat (4) ijiem. Wieħed jista' jinnota l-aktar dawn l-eċċezzjonijiet għal din il-medja fit-trażmissjoni tal-marki tas-swaba' KAT2 għall-Istati Membri li ġejjin: il-Ġermanja (4.67), il-Greċja (12.03), il-Pajjiżi l-Baxxi (8.83), is-Slovakkja (6.4) u r-Renju Unit (5.75). Il-Kummissjoni trid ittenni li trażmissjoni tard tista' tirriżulta fin-nominazzjoni żbaljata ta' Stat Membru minħabba żewġ xenarji differenti msemmija fir-rapport annwali preċedenti: 'hits żbaljati[18] u 'hits mitlufa'[19].

Minħabba dan it-titjib ġenerali fil-medja tad-dewmien tat-trażmissjonijiet, in-numru totali ta' hits mitlufa minħabba dewmien fit-trażmissjoni ta' marki tas-swaba' niżel minn 362 fl-2010 għal 9 biss fl-2011.

Bħas-sena preċedenti, hu notevoli l-fatt li l-maġġoranza enormi tal-hits mitlufa, jiġifieri 6 (66.6%), tista' tiġi attribwita għad-dewmien fit-trażmissjoni min-naħa tal-Greċja. Il-mudell fir-rigward tad-distribuzzjoni tal-hits żbaljati segwa wkoll l-istess mudell bħal tas-sena 2010 fis-sens li d-dewmien fit-trażmissjoni mid-Danimarka rriżulta fi 28 hit żbaljati u wara ġiet il-Finlandja bi 23 hit żbaljati minn total ta' 89. Abbażi tar-riżultati ta’ hawn fuq, il-Kummissjoni mill-ġdid tħeġġeġ lill-Istati Membri biex jagħmlu l-isforzi kollha meħtieġa biex jibagħtu minnufih id-dejta skont l-Artikoli 4 u 8 tar-Regolament EURODAC.

2.4.        Il-kwalità tat- tranżazzjonijiet

Fl-2011, ir-rata medja ta' tranżazzjonijiet irrifjutati[20] għall-Istati Membri kollha u l-Pajjiżi Assoċjati naqset minn 5.87%, 'l isfel minn 8.92% fl-2010. L-Istati Membri li ġejjin kellhom rata ta' rifjut ta' 10% jew aktar: l-Estonja (21.65%), Franza (13.41%), Malta (13.31%), il-Portugall (15.42%), u r-Renju Unit (11.08%). B'kollox 10 Stati Membri kellhom rata ta’ rifjut ogħla mill-medja.

Ir-rata ta' rifjut ma kenitx tiddependi mit-teknoloġija jew minn dgħufijiet fis-sistema. Il-kawżi ta' din ir-rata ta' rifjut kienu prinċipalment marbuta mal-kwalità baxxa tal-immaġini tal-marki tas-swaba' mibgħuta mill-Istati Membri, żbalji umani jew il-konfigurazzjoni żbaljata tat-tagħmir li l-Istat Membru juża biex jibgħat. Min-naħa l-oħra, f'xi każi dawn iċ-ċifri inkludew numru ta' tentattivi biex jintbagħtu l-istess marki tas-swaba' wara li dawn kienu ġew rifjutati mis-sistema għal raġunijiet ta' kwalità. Filwaqt li tirrikonoxxi li xi dewmien jista’ jiġi kkawżat minħabba li għal perjodu ma jkunx possibbli li jittieħdu l-marki tas-swaba’ (il-ponot tas-swaba’ jkunu danneġġati jew kondizzjonijiet tas-saħħa oħrajn ifixklu t-teħid mill-ewwel tal-marki tas-swaba’), il-Kummissjoni ttenni l-problema ta’ rati ta’ rifjut li ġeneralment hi għolja li diġà hi enfasizzata minn rapporti annwali preċedenti, u l-Kummissjoni tħeġġeġ lill-Istati Membri jipprovdu taħriġ speċifiku għall-operaturi nazzjonali tal-EURODAC, kif ukoll biex jikkonfiguraw it-tagħmir tagħhom biex inaqqsu r-rata ta’ rifjut.

3.           Konklużjonijiet

L-Unità Ċentrali tal-EURODAC ipprovdiet riżultati sodisfaċenti matul l-2011 f'termini ta' veloċità, output, sigurtà u kosteffettività.

Fl-2011, il-volum ġenerali tat-tranżazzjonijiet żdied bi 37.7% (għal 412,303), b'żidiet fit-tliet (3) kategoriji ta' tranżazzjonijiet kollha kemm huma. In-numru ta' tranżazzjonijiet ta' 'kategorija 1' żdied bi 28% (għal 275,857), filwaqt li n-numru ta' tranżazzjonijiet ta' 'kategorija 2' żdied b'17.1% (għal 57,693) u n-numru ta' tranżazzjonijiet ta' 'kategorija 3' żdied b'persentaġġ aktar modest ta' 8.1% (għal 78,753).

Ir-rata medja ta' tranżazzjonijiet irrifjutati għall-Istati Membri kollha naqset għal 5.87% fl-2011, minn 8.92% fl-2010.

Kien hemm titjib ġenerali rigward id-dewmien fit-trażmissjoni tad-dejta lill-Unità Ċentrali tal-EURODAC, għalkemm għad jista' jsir aktar titjib.

ANNESS

Tabella 1: L-Unità Ċentrali tal-EURODAC, l-istatus tal-kontenut tal-Bażi tad-Dejta fil-31/12/2011

Tabella 2: Tranżazzjonijiet li rnexxew lejn l-Unità Ċentrali tal-EURODAC, fl-2011

Tabella 3: Tqassim tal-hits – Kategorija 1 mqabbla ma' Kategorija 1, fl-2011

Tabella 4: Tqassim tal-hits – Kategorija 1 imqabbla ma' Kategorija 2, fl-2011

Tabella 5: Tqassim tal-hits – Kategorija 3 mqabbla ma' Kategorija 1, fl-2011

Tabella 6: Tranżazzjonijiet rifjutati, perċentwal fl-2011

Tabella 7: Tul ta' żmien medju bejn id-data meta ttieħdu l-marki tas-swaba' u meta ntbagħtu lill-Unità Ċentrali tal-EURODAC, fl-2011

Tabella 8: Hit ta' Kategorija 1 imqabbla ma' Kategorija 1 fis-sens ħażin, fl-2011

Tabella 9: Distribuzzjoni tal-hits ta' KAT1/KAT2 li ntilfu minħabba dewmien meta kienu qed jintbagħtu l-KAT 2, fl-2011

Tabella 10: Distribuzzjoni ta' hits imqabbla ma' każi bblokkati (l-Artikolu 12 tar-Regolament tal-KE 2725/2000), fl-2011

Tabella 11: In-numru ta' "tiftixiet speċali" ta' kategorija 9 għal kull Stat Membru, fl-2011

[1]               ĠU L 316, 15.12.2000, p. 1.

[2]               L-Artikolu 24(1) tar-Regolament tal-EURODAC.

[3]               COM(2008) 825 finali.

[4]               COM(2009) 342 finali u COM(2009)344 finali.

[5]               COM(2010) 555 finali.

[6]               Ara d-dokument tal-Parlament Ewropew LIBE_PV(2011)0203_1

[7]               "Politika Komuni Ewropea dwar l-Asil – Is-sitwazzjoni Attwali". Ara d-Dokument tal-Kunsill 15843/11.

[8]               COM(2009) 344 finali.

[9]               Ir-Regolament EURODAC jipprovdi għall-implimentazzjoni ta' Unità Ċentrali mmaniġġjata mill-Kummissjoni Ewropea li tinkludi Sistema Awtomatizzata tal-Identifkazzjoni tal-Marki tas-Swaba' (AFIS) li tirċievi d-dejta u titrażmetti tweġibiet ta’ tiftix li 'jirriżulta jew ma jirriżultax' lill-Unitajiet nazzjonali (Punti Nazzjonali ta' Aċċess) f'kull Stat Membru. Ir-Regolament EURODAC u r-Regoli Implimentattivi tiegħu jidentifikaw ir-responsabbiltajiet għall-ġbir, it-trażmissjoni u t-tqabbil tad-dejta tal-marki tas-swaba', il-mezzi li permezz tagħhom tista' ssir it-trażmissjoni, il-kompiti statistici tal-Unità Ċentrali u l-istandards użati għat-trażmissjoni tad-dejta.

[10]             In-netwerk S-TESTA (Servizzi Trans-Ewropej Siguri għal Telematika bejn l-Amministrazzjonijiet) jipprovdi infrastruttura ġenerika biex iservi l-ħtiġijiet tan-negozju u l-iskambju tal-informazzjoni bejn l-amministrazzjonijiet Ewropej u dawk nazzjonali.

[11]             L-ISA (Soluzzjoni għall-Interoperabilità għall-Amministrazzjonijiet Pubbliċi Ewropej) hu l-programm il-ġdid biex tittejjeb il-kooperazzjoni elettronika fost l-amministrazzjonijiet pubbliċi fl-Istati Membri tal-UE. Dan ikompli mal-programm li kien hemm qabel, l-IDA II (Interskambju ta'      Dejta bejn l-Amministrazzjonijiet) u IDABC (it-Twassil Interoperabbli ta' Servizzi Ewropej ta' eGovernment lill-Amministrazzjonijiet Pubbliċi, lin-Negozji u liċ-Ċittadini).

[12]             It-Tabella 2 tal-Anness turi fid-dettall it-tranżazzjonijiet li rnexxew fil-każ ta’ kull Stat Membru, imqassma skont il-kategorija, bejn l-1 ta' Jannar 2011 u l-31 ta' Diċembru 2011.

[13]             'Kull Stat Membru għandu, bi qbil mal-protezzjonjiet preskritti fil-Konvenzjoni Ewropea dwar id-Drittijiet tal-Bniedem u fil-Konvenzjoni tan-Nazzjonijiet Uniti dwar id-Drittijiet tat-Tfal, jieħu fil-pront il-marki ta' swaba tas-swaba kollha ta' kull barrani li jkollu tal-inqas 14-il sena li jinqabad mill-awtoritajiet ta' kontroll kompetenti b'konnessjoni mal-qsim irregolari bl-art, bil-baħar jew bl-ajru tal-fruntjiera ta' dak l-Istat Membru wara li jkun ġie minn pajjiż terz u li ma jintbagħatx lura fih.'

[14]             ĠU L 348 tal-24.12.2008.

[15]             L-Artikolu 11 '(…) Bħala regola ġenerali hemm bażi sabiex isiru kontrolli ta' jekk il-barrani jkunx tefa' applikazzjoni għal asil fi Stat Membru ieħor fejn: (a) il-barrani jiddikjara li hu/hi kien tefa' applikazzjoni għal asil iżda mingħajr ma jkun indika l-Istat Membru li fih hu/hi kien tefa' l-applikazzjoni; (b) il-barrani ma jitlobx għall-asil iżda joġġezzjona li jiġi ripatrijat lejn il-pajjiż ta' oriġini tiegħu/tagħha billi jiddikjara li hu/hi jkun fil-periklu, jew (c) il-barrani, b'mod ieħor, jipprova jipprevjeni l-espulsjoni tiegħu/tagħha billi jirrifjuta li jikkoopera fl-istabbiliment tal-identità tiegħu/tagħha, b'mod partikolari billi ma jurix dokumenti ta' identità, jew ikunu foloz.'

[16]             L-istatistika dwar il-hits lokali fit-tabelli mhux bilfors taqbel mat-tweġibiet għall-hits trażmessi mill-Unità Ċentrali u rreġistrati mill-Istati Membri. Ir-raġuni għal dan hi li l-Istati Membri mhux dejjem jużaw il-possibbiltà, stipulata fl-Art. 4(4), li titlob lill-Unità Ċentrali biex tfittex li tqabbel mad-dejta tagħhom stess li diġà tkun qiegħda fil-bażi tad-dejta Ċentrali. Madanakollu, anki meta l-Istati Membri ma jużawx din il-possibbiltà, l-Unità Ċentrali trid, għal raġunijiet tekniċi, tagħmel dejjem tqabbil mad-dejta kollha (nazzjonali u barranija) merfugħa fl-Unità Ċentrali. F'dawn il-każi konkreti, anki jekk ikun hemm qbil ma' dejta nazzjonali, l-Unità Ċentrali se tirrispondi sempliċiment li ma jkun hemm 'l-ebda hit' billi l-Istat Membru ma jkunx talab għat-tqabbil tad-dejta mressqa mad-dejta tiegħu stess.

[17]             ĠU L 326 tat-13.12.2005.

[18]             Fil-każ tal-hekk imsejħa 'hit żbaljata', ċittadin ta' pajjiz terz jitfa' applikazzjoni għall-asil fi Stat Membru (A), fejn l-awtoritajiet jeħdulu l-marki tas-swaba'. Filwaqt li dawk il-marki tas-swaba' jkunu għadhom qed jistennew biex jiġu trażmessi lill-Unità Ċentrali (tranżazzjoni tal-kategorija 1), l-istess persuna tkun diġà tista' tippreżenta lilha nnifisha fi Stat Membru (B) u tagħmel talba oħra għall-asil. Jekk il-marki tas-swaba' jintbagħtu l-ewwel mill-Istat Membru B, il-marki tas-swaba' mibgħuta mill-Istat Membru A jiġu rreġistrati fil-bażi tad-dejta Ċentrali aktar tard mill-marki tas-swaba' mibgħuta mill-Istat Membru B u b'hekk jirriżultaw bħala hit mid-dejta mibgħuta mill-Istat Membru B meta mqabbla mad-dejta mibgħuta mill-Istat Membru A. B'hekk, l-Istat Membru B jiġi magħżul biex ikun responsabbli minflok l-Istat Membru A fejn l-applikazzjoni għall-asil tkun ġiet iddepożitata għall-ewwel darba.

[19]             Fil-każ tal-hekk imsejħa 'hit mitlufa', ċittadin ta' pajjiż terz maqbud b'konnessjoni ma' qsim irregolari tal-fruntiera u l-marki tas-swaba' tiegħu jittieħdu mill-awtoritajiet tal-Istat Membru (A) fejn hu jkun daħal. Filwaqt li dawk il-marki tas-swaba' jkunu għadhom qed jistennew biex ikunu trażmessi lill-Unità Ċentrali (tranżazzjoni tal-kategorija 2), l-istess persuna tista' tippreżenta lilha nnifisha fi Stat Membru ieħor (B) u u tressaq applikazzjoni għall-ażil. F'dik l-okkażjoni, il-marki tas-swaba' tiegħu jittieħdu mill-awtoritajiet tal-Istat Membru (B). Jekk dan l-Istat Membru (B) jibgħat il-marki tas-swaba' (tranżazzjoni tal-kategorija 1) qabel, l-Unità Ċentrali tirreġistra t-tranżazzjoni tal-kategorija 1 l-ewwel, u l-Istat Membru (B) ikollu jieħu ħsieb l-applikazzjoni minflok l-Istat Membru A. Fil-fatt, meta tranżazzjoni tal-kategorija 2 tasal iktar tard, tintilef hit għaliex id-dejta tal-kategorija 2 ma tkunx tista' titfittex.

[20]             Tranżazzjoni tista' tiġi rrifjutata minħabba kwistjoni ta' validazzjoni tad-dejta, żbalji fil-marki tas-swaba' kew kwalità insuffiċjenti (ara wkoll taqsima 2.1.ibid).