Governanza aqwa tas-Suq Uniku

Introduzzjoni

Il-kriżi wriet li l-UE trid tieħu azzjoni biex ittejjeb il-mudell ekonomiku tagħha u terġa' tikseb il-kompetittività. Dan jirrikjedi taħlita ta’ finanzi pubbliċi sodi, riformi strutturali kbar u investiment immirat. L-Ewropa 2020 hija l-istrateġija tal-UE li permezz tagħha għandha tistimula t-tkabbir sostenibbli u l-ħolqien tal-impjiegi, u s-Suq Uniku għandu rwol ewlieni xi jwettaq biex dan iseħħ.

Is-Suq Uniku huwa element essenzjali biex jiġi stimulat it-tkabbir ekonomiku. Madankollu, biex jitgawdew il-benefiċċji li s-Suq Uniku jġib miegħu, ir-regoli tiegħu għandhom jiġu implimentati u infurzati b’mod xieraq. Filwaqt li l-Kummissjoni ilha taħdem fi sħubija mal-Istati Membri biex jintlaħaq dan l-iskop, il-qagħda attwali turi li għad jista' jsir ħafna aktar titjib. Id-defiċit medju għat-traspożizzjoni reġa’ għola minn 0.7 fl-2009 għal 1.2 % fi Frar 2012, u l-Istati Membri qed jittardjaw dejjem aktar (medja ta’ 8 xhur) biex jittrasponu d-Direttivi wara li l-iskadenza tat-traspożizzjoni tkun għaddiet. It-tul ta’ żmien biex il-proċeduri ta’ ksur jitlestew kompla jiżdied għal medja ta’ 25.5 xahar[1]. Anke fejn it-trasponiment tar-regoli jsir b’mod korrett, spiss, fil-prattika, ma jiffunzjonawx tajjeb. Ta’ sikwit, in-negozji u ċ-ċittadini ma jifhmux id-drittijiet tagħhom, u jiltaqgħu ma’ bosta diffikultajiet x’ħin jiġu biex japplikawhom[2].

Jekk dak li għandna jirnexxilna nagħmluh jiffunzjona aħjar fil-prattika, dan għandu jwassal malajr għat-tkabbir ekonomiku u l-ħolqien ta’ impjiegi. Pereżempju, huwa stmat li implimentazzjoni aqwa tad-Direttiva dwar is-Servizzi tista’ ġġib magħha żieda addizzjonali ta' 1.8 % fil-PDG tal-UE, kif intwera fil-Komunikazzjoni li l-Kummissjoni adottat illum[3]. Barra minn hekk, ġie kkalkulat li traspożizzjoni aktar effikaċi tal-leġiżlazzjoni tal-UE tista’ tnaqqas il-piżijiet amministrattivi b’terz, li jwassal għal iffrankar globali tal-ispejjeż li jammonta għal 40 biljun euro[4].  

Il-Kunsill Ewropew ta’ Marzu 2012 irrikonoxxa l-ħtieġa li l-governanza tas-Suq Uniku tiġi msaħħa u li l-implimentazzjoni u l-infurzar tiegħu jiġu mtejba. Sejħiet simili saru wkoll mill-Parlament Ewropew[5] Għaldaqstant, din il-Komunikazzjoni titlob li jiġġedded l-impenn li s-Suq Uniku jsir aktar effikaċi fir-rwol tiegħu għat-tkabbir. B’mod partikolari, din il-Komunikazzjoni tipproponi:

· strateġija partikolarment ambizzjuża biex iseħħ progress rapidu f’oqsma ewlenin li jkollhom l-akbar potenzjal ta’ tkabbir (il-Parti I);

· miżuri konkreti biex itejbu aktar iċ-“ċiklu ta’ governanza” tas-Suq Uniku, jiġifieri, il-mod li bih ir-regoli tas-Suq Uniku jiġu mfassla, implimentati, applikati u infurzati (il-Parti II).

1. Mobilizzazzjoni: l-isforzi tagħna għandhom jiġu ffokati biex iseħħ progress rapidu f’oqsma li jkollhom l-akbar potenzjal ta’ tkabbir 1.1. Fokus fuq oqsma ewlenin

F'dawn iż-żminijiet ta’ reċessjoni ekonomika, jeħtieġ li r-riżorsi skarsi jiġu ffokati fuq l-aktar ħaġa essenzjali: li jittieħdu l-passi meħtieġa biex jinħeles il-potenzjal kollu ta' tkabbir tas-Suq Uniku f'oqsma fejn dan il-potenzjal ikun l-akbar. Għalhekk, filwaqt li tkompli timmonitorja mill-qrib u tinforza ż-żamma tal-konformità mar-regoli tat-Trattat, il-Kummissjoni ddeċidiet li tiddetermina l-“oqsma ewlenin” u tevalwahom b’mod regolari, abbażi ta’ indikaturi ekonomiċi. L-Istati Membri u l-Kummissjoni għandhom jiftiehmu dwar l-azzjonijiet u l-miri konkreti li jgħinu biex jitjieb il-mod li bih is-Suq Uniku jiffunzjona f'dawn l-oqsma.

Abbażi tal-analiżi tal-qagħda attwali tal-ekonomija Ewropea, il-Kummissjoni tqis li għall-perjodu 2012-2013, l-attenzjoni għandha tkun iffokata l-aktar fuq is-setturi tas-servizzi ewlenin u l-industriji tan-netwerk. Fis-settur tas-servizzi, għandha tingħata attenzjoni partikolari għall-kummerċ bl-imnut u l-kummerċ bl-ingrossa, is-servizzi tan-negozji, il-kostruzzjoni u s-servizzi tal-intermedjazzjoni finanzjarja. Barra minn hekk, funzjonament aqwa tas-Suq Uniku diġitali, flimkien ma' Suq Uniku aktar b’saħħtu fis-settur tal-enerġija u t-trasport, jistgħu jwasslu għal aktar benefiċċji. L-Anness ta’ din il-Komunikazzjoni jiddeskrivi fid-dettall il-mod li bih intagħżlu dawn l-oqsma ewlenin u liema atti leġiżlattivi għandhom jitqiesu b’attenzjoni speċjali f’dawn l-oqsma. Il-lista tal-oqsma u tal-atti leġiżlattivi se tiġi evalwata b’mod regolari, bl-għan li jiġu ddeterminati l-emendi possibbli.

Barra minn hekk, għandha tingħata prijorità lill-implimentazzjoni, kemm jista' jkun malajr, tal-azzjonijiet ewlenin inklużi fl-Att dwar is-Suq Uniku maħsuba biex ikattru t-tkabbir u l-kunfidenza tal-konsumaturi u tan-negozji; dan għandu jsir b’mod partikolari fid-dawl tal-benefiċċju orizzontali li joffru biex is-Suq Uniku jiffunzjona aħjar, kif ukoll fid-dawl tal-kontribut li jistgħu jagħtu għat-tkabbir.

Biex il-progress f’dawn l-oqsma ewlenin iseħħ b’mod rapidu, jeħtieġ li jsiru sforzi speċjali biex jiġi żgurat li r-regoli jiġu implimentati kif xieraq (il-punt 1.2). Barra minn hekk, il-Kummissjoni se tuża l-proċess tas-Semestru Ewropew biex timmonitorja l-mod li bih is-Suq Uniku jiffunzjona f’dawn l-oqsma u biex tiddetermina azzjonijiet ġodda, kemm fuq il-livell tal-UE kif ukoll fuq dak nazzjonali (il-punt 1.3).

1.2. Niffissaw miri ambizzjużi biex tiġi żgurata implimentazzjoni xierqa

F’dawn l-aħħar snin ġew adottati atti leġiżlattivi importanti fl-oqsma ewlenin imsemmija hawn fuq (ara l-Anness). Issa jeħtieġ li nikkonċentraw fuq kif se nagħmluhom jiffunzjonaw fil-prattika. Biex dan iseħħ, il-Kummissjoni u l-Istati Membri għandhom jaħdmu flimkien biex jiżguraw li jkun hemm traspożizzjoni rapida u implimentazzjoni effikaċi tar-regoli.

Fil-każ ta’ Direttivi li għad iridu jiġu trasposti, il-Kummissjoni se żżid l-assistenza tagħha għat-traspożizzjoni. Pereżempju, se tagħmel kuntatti ma’ uffiċjali nazzjonali fuq bażi bilaterali u se toħloq gruppi ta' esperti u tipprovdi fora onlajn fejn l-esperti nazzjonali jkunu jistgħu jiddiskutu u jiskambjaw l-aħjar prassi bejniethom, minn kmieni kemm jista’ jkun fil-proċess tat-traspożizzjoni. Il-Kummissjoni se twettaq verifiki sistematiċi tal-konformità u tadotta miżuri ta’ appoġġ biex tiżgura li r-regoli jiffunzjonaw fil-prattika fl-Istati Membri kollha.

L-Istati Membri għandhom:

· jissottomettu lill-Kummissjoni, b’mod informali, aspetti speċifiċi tal-abbozzi ta’ miżuri ta’ traspożizzjoni, fejn huma jew il-Kummissjoni jqisu li dan ikun xieraq, biex l-għajnuna tal-Kummissjoni tkun effikaċi kemm jista’ jkun waqt il-perjodu tat-traspożizzjoni u biex tiġi żgurata implimentazzjoni rapida;

· jimpenjaw ruħhom għall-kompromess ta’ “tolleranza zero” fir-rigward tat-traspożizzjoni ta’ direttivi, jiġifieri li jilħqu l-mira ta’ defiċit għat-traspożizzjoni[6] u l-mira ta’ defiċit għall-konformità[7] ta’ 0 %;

· jipprovdu spjegazzjoni onlajn ta’ kif ikunu ttrasponew ir-regoli u ta’ kif dawn ir-regoli jiffunzjonaw fil-prattika[8].

Fir-rigward tar-Regolamenti, il-Kummissjoni se żżid ukoll l-isforzi biex tiġi żgurata l-implimentazzjoni xierqa tagħhom. Barra minn hekk, fil-każ tal-leġiżlazzjoni li tkun ilha xi żmien li ġiet trasposta u implimentata, il-Kummissjoni se twettaq evalwazzjonijiet fid-dettall biex tara kif ir-regoli jkunu ġew implimentati u kif jiffunzjonaw fil-prattika, mhux mil-lat legali biss iżda anke mil-lat prattiku u dak ekonomiku. F’dan il-kuntest, il-Kummissjoni tista’ tipproponi li jsiru evalwazzjonijiet reċiproċi bejn il-pari.

F’każ li l-problemi jippersistu, il-Kummissjoni tuża s-setgħat ta' infurzar tagħha bil-qawwa kollha u tesiġi li l-Istati Membri jikkooperaw magħha biex jiġi żgurat li l-ksur tal-liġi tal-UE jieqaf malajr kemm jista’ jkun. B'mod partikolari, l-Istati Membri għandhom jimpenjaw ruħhom li:

· jaħdmu b’mod attiv fil-proċess u jipprovdu l-informazzjoni b’mod rapidu biex jiżguraw li l-konformità tintlaħaq malajr, u b’hekk it-tul ta’ żmien li jieħdu l-proċeduri ta’ ksur f’oqsma ewlenin ikun jista’ jitnaqqas sakemm tintlaħaq il-mira politika ta’ medja ta’ 18-il xahar;[9]

· jiżguraw li l-konformità mal-opinjonijiet motivati tintlaħaq b’mod rapidu biex jiġi żgurat li s-Suq Uniku jiffunzjona b’mod effikaċi bla ma jkollu jitressaq każ fil-Qorti tal-Ġustizzja;

· iħaffu l-proċess ta’ konformità mas-sentenzi tal-Qorti tal-Ġustizzja. L-għan politiku għandu jkun li l-konformità sħiħa tintlaħaq f’medja ta’ 12-il xahar[10]. 

1.3. Monitoraġġ u definizzjoni ta’ azzjonijiet ta’ rimedju fil-proċess tas-Semestru Ewropew  

Minħabba r-rwol ewlieni tas-Suq Uniku fl-ixprunar tat-tkabbir sostenibbli u tal-ħolqien tal-impjiegi, il-Kummissjoni tipproponi li l-proċess tas-Semestru Ewropew jintuża għall-monitoraġġ tal-funzjonament tas-Suq Uniku, biex tiġi żviluppata pressjoni reċiproka iktar b'saħħitha fuq il-livell tal-Kapijiet tal-Istat jew tal-Gvern, u biex jiġu ppreżentati azzjonijiet bil-mira li jingħelbu l-ostakoli li fadal, kemm fuq il-livell Ewropew kif ukoll fuq dak nazzjonali.

Għal dan l-iskop, il-Kummissjoni se tħejji Rapport annwali dwar l-integrazzjoni tas-Suq Uniku. Dan ir-rapport se jippreżenta analiżi tal-qagħda tal-integrazzjoni tas-Suq Uniku u jeżamina l-mod li bih is-Suq Uniku qiegħed jiffunzjona fil-prattika, b’mod partikolari fl-oqsma ewlenin u għall-parteċipanti ewlenin tas-suq, inklużi n-negozji u l-konsumaturi. Kemm jista’ jkun, se jevalwa kemm is-Suq Uniku qiegħed jiffunzjona f'dawn l-oqsma billi juża punti ta' riferiment konkreti.

Abbażi ta’ dan, il-Kummissjoni se tidentifika l-isfidi prinċipali ta’ politika u tistabbilixxi l-prijoritajiet għat-teħid ta’ azzjoni għas-sena li jmiss, kemm fuq il-livell tal-UE kif ukoll fuq dak nazzjonali. L-azzjonijiet jistgħu jinkludu kemm inizjattivi leġiżlattivi kif ukoll dawk mhux leġiżlattivi. Se tingħata attenzjoni partikolari lit-tħaffif tal-piżijiet għall-SMEs sakemm jiġu mminimizzati[11]. Fejn ikun meħtieġ, l-evalwazzjonijiet jistgħu jmorru lil hinn mir-regoli eżistenti, bil-għan li l-potenzjal tas-Suq Uniku jintuża kollu, b’mod partikolari bil-promozzjoni tal-aħjar prassi.  

Ir-Rapport Annwali se jkun parti mill-Istħarriġ Annwali dwar it-Tkabbir, sabiex jiġi diskuss mill-Kunsill u mill-Parlament Ewropew u approvat mill-Kunsill Ewropew tar-Rebbiegħa. Ir-Rapport Annwali għandu jikkontribwixxi għad-definizzjoni tar-rakkomandazzjonijiet speċifiċi għall-pajjiżi, li se jkunu bbażati fuq analiżi aktar profonda tal-prestazzjoni f'kull Stat Membru, fil-kuntest tal-proċess tas-Semestru Ewropew.

Sabiex jinħeles il-potenzjal kollu ta' tkabbir tas-Suq Uniku, l-Istati Membri u l-Kummissjoni għandhom jimpenjaw ruħhom li jwettqu progress rapidu fl-oqsma fejn dan il-potenzjal ikun l-akbar. L-Anness jiddefinixxi l-oqsma ewlenin u jelenka l-atti leġiżlattivi ta’ dawn l-oqsma li jeħtieġu attenzjoni speċjali.

Il-Kummissjoni:

· se timpenja ruħha li twettaq azzjonijiet konkreti biex tiġi żgurata l-implimentazzjoni f’waqtha, korretta u effiċjenti tar-regoli tal-UE f’dawn l-oqsma ewlenin;

· se tħejji Rapport Annwali dwar l-integrazzjoni tas-Suq Uniku, biex teżamina l-mod li bih is-Suq Uniku qiegħed jiffunzjona fil-prattika u biex tidentifika azzjonijiet oħra fuq il-livell tal-UE u fuq dak nazzjonali;

· se tevalwa b’mod regolari l-lista tal-oqsma ewlenin u l-atti leġiżlattivi bil-għan li tiddefinixxi l-emendi possibbli.

Fir-rigward tal-atti leġiżlattivi ewlenin tal-oqsma b’potenzjal ta’ tkabbir, l-Istati Membri għandhom jimpenjaw ruħhom li:

· jirrispettaw l-iskadenzi ta’ traspożizzjoni u jittrasponu l-leġiżlazzjoni b’mod korrett (defiċits għall-konformità u għat-traspożizzjoni ta’ 0 %);

· jissottomettu lill-Kummissjoni, b’mod informali, aspetti speċifiċi dwar l-abbozzi ta’ miżuri ta’ traspożizzjoni u jipprovdu spjegazzjonijiet onlajn ta’ kif ikunu ttrasponew ir-regoli u ta’ kif dawn ir-regoli jiffunzjonaw fil-prattika, hekk kif il-miżuri ta’ traspożizzjoni jiġu adottati;

· jagħmlu l-isforzi kollha biex jiżguraw li l-konformità tintlaħaq b’mod rapidu, li jnaqqsu t-tul ta’ żmien li jieħdu l-proċeduri ta’ ksur sakemm tintlaħaq il-mira politika ta’ medja ta’ 18-il xahar u li l-konformità sħiħa mas-sentenzi tal-Qorti tal-Ġustizzja tintlaħaq f’medja ta’ 12-il xahar.

Il-Kummissjoni għandha l-intenzjoni li tevalwa ż-żamma tal-konformità ma’ dawn l-impenji b’mod regolari.

 

2. Effikaċja: Is-Suq Uniku jsir jaħdem aħjar għan-negozji u ċ-ċittadini

Tul dawn l-aħħar 20 sena, is-Suq Uniku evolva konsiderevolment. Il-mod li bih jiġi governat għandu jżomm il-pass ma' din l-evoluzzjoni. F’dawn l-aħħar snin ittieħdu passi importanti biex isir titjib fil-mod li bih ir-regoli jiġu mfassla, trasposti, implimentati u infurzati, kemm fuq il-livell tal-UE kif ukoll fuq dak nazzjonali[12]. Issa wasal iż-żmien li l-aħjar prassi jiġu kkonsolidati u razzjonalizzati, bil-għan li jiġi żgurat li r-regoli tas-Suq Uniku jiffunzjonaw b’mod effikaċi fl-Unjoni Ewropea kollha:

2.1. L-applikazzjoni ta’ prinċipji leġiżlattivi intelliġenti fit-tfassil u l-implimentazzjoni tar-regoli tas-Suq Uniku

Sabiex is-Suq Uniku jiffunzjona fil-prattika, il-qafas leġiżlattiv tiegħu għandu jkun tal-ogħla kwalità kemm fuq il-livell tal-UE kif ukoll fuq dak nazzjonali. B’mod partikolari, ir-regoli għandhom jiġu mfassla, trasposti u implimentati b'tali mod li jkunu “jiffunzjonaw” sew għal dawk li huma intiżi għalihom. Għalhekk, huwa importanti ħafna li l-istituzzjoniet kollha tal-UE u l-Istati Membri jkunu konformi mar-rakkomandazzjonijiet eżistenti biex tinkiseb leġiżlazzjoni intelliġenti[13], kif ukoll biex il-livell tal-piżijiet amministrattivi, b’mod partikolari għall-SMEs u l-intrapriżi mikro, jinżamm kemm jista’ jkun baxx, skont il-prinċipju ta’ “L-Ewwel Aħseb fiż-Zgħir”[14].

B’mod partikolari, qabel ma jadottaw ir-regoli fuq il-livell tal-UE, l-awtoritajiet rilevanti għandhom jiċċekkjaw jekk l-abbozzi tar-regoli jilħqux tal-anqas dawn ir-rekwiżiti : (i) ir-regoli għandhom ikunu ċari, faċli li jinftiehmu u mhux ambigwi; (ii) ir-regoli għandhom jiksbu l-effett mixtieq mingħajr ma jikkawżaw piżijiet bla bżonn fuq in-negozji, iċ-ċittadini u l-amministrazzjonijiet (jiġifieri, bla rekwiżiti mhux neċessarji (goldplating)); (iii) meta jkun meħtieġ li n-negozji u ċ-ċittadini jkunu konformi mal-proċeduri, dawn għandhom ikunu jistgħu jagħmlu hekk b’mod rapidu u b’mezzi elettroniċi; (iv) ir-regoli għandhom jiggarantixxu li n-negozji u ċ-ċittadini jkunu jistgħu jsibu l-informazzjoni u l-għajnuna u li jkollhom aċċess għal rikors rapidu u effikaċi meta dan ikun meħtieġ.

Sabiex tinkiseb il-konformità ma’ dawn il-prinċipji, il-partijiet interessati għandhom ikunu involuti kemm jista’ jkun fl-istadji kollha tat-tfassil u tal-implimentazzjoni tal-leġiżlazzjoni. Għal dan l-iskop, l-aħjar prassi żviluppati f’xi oqsma[15] għandhom jiġu razzjonalizzati aktar.

Min-naħa tagħha, il-Kummissjoni se tiżgura li l-proposti kollha għal-leġiżlazzjoni tas-Suq Uniku jkunu fattibbli u infurzabbli, bl-inqas kost amministrattiv possibbli. Meta jkun xieraq, il-Kummissjoni se tipproponi Regolamenti minflok Direttivi, b’mod partikolari meta ma jkunx hemm ħtieġa għal aktar diskrezzjoni waqt l-implimentazzjoni tar-regoli tal-UE proposti. Fil-ħidma tagħhom ta’ kuljum bħala koleġiżlaturi, il-Kunsill u l-Parlament għandhom jiżguraw ukoll li tinżamm konformità sħiħa mal-prinċipji msemmija hawn fuq.

Hekk kif il-leġiżlazzjoni tal-UE tiġi adottata, ikun f'idejn l-Istati Membri li jiżguraw li l-miżuri ta’ implimentazzjoni nazzjonali jkunu skont il-prinċipji ta’ leġiżlazzjoni intelliġenti msemmija hawn fuq. 

2.2. Użu aktar intelliġenti tal-għodod tal-IT biex in-negozji u ċ-ċittadini jiġu informati u jkunu jistgħu jużaw id-drittijiet u l-opportunitajiet tagħhom

Sabiex is-Suq Uniku jiffunzjona fil-prattika, jeħtieġ li n-negożji u ċ-ċittadini jkunu jafu d-drittijiet u l-opportunitajiet tagħhom u li jkunu jistgħu jużawhom b’mod effikaċi. F’dawn l-aħħar snin, ġew żviluppati diversi għodod u sistemi li jindirizzaw dawn il-ħtiġijiet, iżda għad jista’ jinkiseb aktar minn hekk, billi jkompli jsir żvilupp fuq dak li jeżisti, billi jsir użu aktar intelliġenti tat-teknoloġija tal-IT, u permezz ta’ koordinazzjoni aħjar tal-inizjattivi fuq il-livell nazzjonali u dak tal-UE.

Il-Kummissjoni se tkompli taħdem biex tiżgura li l-informazzjoni prattika u l-għajnuna dwar id-drittijiet tas-Suq Uniku jkunu aċċessibbli minn sors ta’ aċċess wieħed, jiġifieri l-portal “L-Ewropa Tiegħek”. L-Istati Membri għandhom ukoll iżidu l-isforzi tagħhom biex jipprovdu informazzjoni faċli għall-utent dwar il-mod li bih ir-regoli jiffunzjonaw fil-prattika fit-territorji tagħhom u jikkkooperaw mal-Kummissjoni biex jiżguraw l-interoperabbiltà bejn is-sistemi ta’ informazzjoni fuq il-livell nazzjonali u dak tal-UE. Fl-2013, il-Kummissjoni se tippreżenta Pjan ta’ Azzjoni li jistabbilixxi stadji u miri konkreti għall-provvediment sħiħ ta' informazzjoni ta' kwalità tajba dwar id-drittijiet tas-Suq Uniku u biex tkattar l-għarfien dwarhom, kemm fuq il-livell nazzjonali kif ukoll fuq dak tal-UE.    

Barra minn hekk, il-proċeduri tal-e-gvern għandhom ikunu disponibbli kull meta n-negozji u ċ-ċittadini jkunu jridu jlestu xi formalitajiet amministrattivi biex jużaw id-drittijiet tagħhom tas-Suq Uniku, b’mod partikolari f’kuntest transkonfinali[16].

Finalment, meta jkun meħtieġ li l-amministrazzjonijiet jikkooperaw bejniethom f’kuntest transkonfinali, din il-kooperazzjoni għandha tiġi ffaċilitata permezz ta’ għodod onlajn, fosthom is-Sistema ta' Informazzjoni tas-Suq Intern, li l-Kummissjoni beħsiebha testendi għal oqsma oħra. Ir-Regolament il-ġdid tal-IMI, li l-Kummissjoni tittama li jiġi adottat mill-Parlament Ewropew u mill-Kunsill dalwaqt, se jikkontribwixxi ħafna għall-kooperazzjoni amministrattiva b’konformità sħiħa mar-regoli dwar il-protezzjoni tad-dejta personali[17].

Fil-leġiżlazzjoni ġdida kollha, minn Jannar 2013, għandhom jiġu previsti obbligi sistematiċi ta’ informazzjoni u tal-użu ta’ għodod tal-IT għall-komunikazzjoni mal-awtoritajiet u bejniethom.

Fl-istess ħin, u bil-għan li l-kosti jiġu kkontrollati, il-Kummissjoni se taħdem biex toħloq strateġija koerenti għall-iżvilupp ulterjuri tal-għodod eżistenti biex dawn ikunu jistgħu jindirizzaw il-ħtiġijiet kollha ta’ informazzjoni, e-gvern u kooperazzjoni amministrattiva f’diversi oqsma ta’ politika, bla ma jittieħed xogħol doppju[18]. Barra minn hekk se tkompli tinkoraġġixxi l-iskambju tal-aħjar prassi f’dan il-qasam u timmonitorja l-progress.

2.3. Soluzzjoni ta’ problemi u rikorsi rapidi u effikaċi

Ħafna mill-problemi li n-negozji u ċ-ċittadini jiltaqgħu magħhom fis-Suq Uniku jibqgħu mhux solvuti, jew jiġu solvuti wara ħafna żmien u b’kost għoli. Biex l-infurzar tar-regolamenti tas-Suq Uniku jsir aktar effikaċi, jeħtieġ li l-mekkaniżmi eżistenti jiġu żviluppati, jiġu msaħħin, u jkun hemm sinerġija aħjar bejniethom. Għandhom jittieħdu passi biex jiġi żgurat li l-problemi jkunu jistgħu jiġu solvuti fuq il-livell nazzjonali u, fejn ikun possibbli, b’mezzi informali. Fl-istess ħin, iċ-ċittadini u n-negozji dejjem għandhom id-dritt li jressqu l-ilmenti tagħhom lill-Kummissjoni. Bħala l-Gwardjana tat-Trattati, il-Kummissjoni se tagħti prijorità lill-aktar każijiet serji ta' nuqqas ta' konformità mal-liġi tal-UE.

Biex tagħmel l-infurzar aktar effikaċi u tindirizza aħjar il-ħtiġijiet tan-negozji u ċ-ċittadini, il-Kummissjoni qed tipproponi, b’mod partikolari, dawn il-miżuri:

L-ewwel nett, għandu jkun hemm servizz ta’ għajnuna uniku, b’aċċess faċli u tal-aħjar kwalità fuq il-livell nazzjonali li n-negozji u ċ-ċittadini jistgħu jirrikorru għalih meta jiltaqgħu ma’ problemi x'ħin jipprovaw jużaw id-drittijiet u l-opportunitajiet li joffrilhom is-Suq Uniku. Dan is-servizz ta’ għajnuna jista’ jiġi stabbilit billi jkomplu jiġu żviluppati ċ-ċentri SOLVIT eżistenti, abbażi tal-prassi tajba li diġà ġiet żviluppata f’diversi Stati Membri. Għandu jkun possibbli li n-negozji u ċ-ċittadini li jirrikorru għal dan is-servizz ta’ għajnuna (“ċentri SOLVIT tat-tieni ġenerazzjoni”) jirċievu soluzzjoni rapida u informali għall-problema tagħhom jew, fejn dan ma jkunx possibbli, jirċievu parir malajr dwar fejn jistgħu jitolbu għall-għajnuna u rikors. Għal dan l-iskop, sa tmiem l-2012 il-Kummissjoni se tieħu inizjattiva biex timmodernizza r-Rakkomandazzjoni li tikkonċerna s-SOLVIT u se tieħu azzjoni ta’ appoġġ[19]. Barra minn hekk se tipprova tkompli ttejjeb il-kooperazzjoni man-netwerk SOLVIT, pereżempju billi tgħaddilhom l-ilmenti u billi ssegwi b’mod aktar sistematiku l-każijiet li ma jkunux għadhom ġew solvuti.

Fl-istess ħin, għandhom jittieħdu passi biex jiġi żgurat li għal kull problema tas-Suq Uniku relatata mal-liġi, ikun hemm disponibbli mekkaniżmi effikaċi għas-soluzzjoni ta’ problemi u li dawn ikunu aċċessibbli faċilment. Għal dan l-iskop, il-Kummissjoni se żżid l-isforzi tagħha biex tidentifika u tegħleb in-nuqqasijiet fis-soluzzjoni informali ta’ problemi u biex timmonitorja l-funzjonament tagħhom fil-prattika. B’mod partikolari, għandha l-intenzjoni li taħdem flimkien mal-Istati Membri u mal-partijiet interessati biex tiżgura li jiġu stabbiliti għodod ta’ kwalità għas-soluzzjoni ta’ tilwim kif ukoll proċeduri ta’ medjazzjoni u li dawn jiffunzjonaw fil-prattika,[20] u li tiġi stabbilita pjattaforma onlajn tal-UE għall-ilmenti transkonfinali[21]. Qiegħda tikkunsidra wkoll inizjattiva biex tiffaċilita s-soluzzjoni ta' problemi relatati mat-tassazzjoni doppja.

Il-funzjonament ta’ kuljum tas-Suq Uniku jiddependi ħafna mill-effiċjenza u mill-kwalità tas-sistemi ġudizzjarji nazzjonali. L-Istati Membri għandhom jimpenjaw ruħhom biex jiżguraw rikorsi ġudizzjarji rapidi u effikaċi, inkluż billi jippromwovu l-użu tal-Proċedura Ewropea għal Talbiet Żgħar[22]. Il-Kummissjoni se tkompli tiżviluppa l-portal e-Ġustizzja biex ittejjeb l-aċċess għall-ġustizzja fl-UE kollha. Barra minn hekk, għandu jkun hemm kumpens adegwat disponibbli għal meta n-negozji u ċ-ċittadini jsofru danni minħabba ksur tad-drittijiet tagħhom fl-UE.

L-awtoritajiet nazzjonali għandhom jimpenjaw ruħhom ukoll f’azzjonijiet konġunti ta’ sorveljanza tas-suq u ta’ infurzar, bħalma huma l-azzjonijiet konġunti (“sweeps” - verifiki sistematiċi) biex tiġi żgurata l-konformità mar-regoli tal-protezzjoni tal-konsumatur. 

Fl-aħħar nett, bħala "l-Gwardjana tat-Trattat", il-Kummissjoni tiżgura l-użu effikaċi u rapidu tal-istrumenti li għandha għad-dispożizzjoni tagħha (proċeduri ta' ksur u proċeduri ta' qabel il-ksur) biex jiġu eliminati l-ostakoli għat-tkabbir u għall-ħolqien tal-impjiegi. Il-Kummissjoni se tiffoka bil-qawwa kollha fuq il-problemi sistematiċi (bħalma hi t-traspożizzjoni tard, jew mhux korretta) li jeffettwaw il-funzjonament tas-Suq Uniku b’mod negattiv.

2.4. Monitoraġġ, koordinazzjoni u kontroll aħjar

Sal-lum, kemm fl-Istati Membri kif ukoll fil-Kummissjoni, ir-responsabbiltà li s-Suq Uniku jsir jiffunzjona fil-prattika hija mxerrda fuq għadd kbir ta' servizzi u entitajiet, fuq il-livelli kollha. Madankollu, il-prassi tajba diġà eżistenti f’diversi Stati Membri tindika li l-aħjar riżultati jinkisbu meta fl-amministrazzjoni nazzjonali jkun hemm entità waħda biss li tieħu ħsieb tissorvelja u timmonitorja l-funzjonament tas-Suq Uniku fuq il-livell nazzjonali[23]. Għalhekk, il-Kummissjoni tirrakkomanda li din il-prassi tajba tiġi segwita kullimkien. B’mod partikolari, dawn l-entitajiet ta’ koordinazzjoni nazzjonali (“ċentri tas-Suq Uniku”) għandhom:

· jimmonitorjaw li t-traspożizzjoni tar-regoli tas-Suq Uniku ssir f’waqtha u tiġi implimentata b’mod effikaċi (u jżommu kuntatt kontinwu mal-entitajiet parlamentari nazzjonali rilevanti dwar dan);

· jiżguraw li ċ-ċittadini u n-negozji jkunu informati dwar ir-regoli u l-proċeduri nazzjonali rilevanti (b’kollaborazzjoni mal-għodod eżistenti u man-netwerks rilevanti, bħalma huma n-Netwerk Ewropew għall-Intrapriżi (Enterprise Europe Network) u n-netwerk taċ-Ċentri tal-Konsumaturi Ewropej (European Consumer Centres));

· jipprovdu gwida u jippromwovu l-prassi tajba fost l-amministrazzjonijiet rilevanti;

· isibu u jiġbru dejta u dokumentazzjoni dwar il-problemi u l-ostakoli li jimpedixxu l-funzjonament effikaċi tas-Suq Uniku f'pajjiżhom, u

· jaġixxu bħala punt ta’ kuntatt għall-istituzzjonijiet tal-UE.

Dawn l-entitajiet jistgħu wkoll jingħataw ir-responsabbiltà li joffru għajnuna tal-aħjar kwalità f’każijiet fejn isir ksur tad-drittijiet (ara fuq).

Il-Kummissjoni se tistabbilixxi netwerk Ewropew ta’ dawn l-entitajiet nazzjonali billi tagħti mandat ġdid lill-Kumitat Konsultattiv dwar is-Suq Intern eżistenti biex janalizza l-kwistjonijiet ta’ integrazzjoni u ta’ governanza tas-Suq Uniku, u billi tuża pjattaformi onlajn. Naturalment, huma l-Istati Membri li għandhom jiddeċiedu x’sura istituzzjonali jagħtu lil tali entità u l-artikulazzjoni tagħha mal-istrutturi eżistenti.

Sabiex ikomplu jtejbu l-mod li bih ir-regoli tas-Suq Uniku jiġu mfassla, trasposti, implimentati u infurzati, l-Istati Membri għandhom jikkooperaw ma' xulxin u mal-Kummissjoni biex jiġi żgurat li:

· il-qafas leġiżlattiv tas-Suq Uniku jkun tal-ogħla kwalità u jiffunzjona b’mod effikaċi fil-prattika;

· tkun disponibbli informazzjoni faċli għall-utent dwar id-drittijiet tas-Suq Uniku u dwar kif għandhom jintużaw;

· in-negozji u ċ-ċittadini jistgħu jikkonformaw mal-formalitajiet amministrattivi meħtieġa biex jeżerċitaw id-drittijiet tagħhom tas-Suq Uniku b'mezzi elettroniċi;

· l-amministrazjonijiet li jeħtieġu komunikazzjoni bejniethom ikunu konnessi b’mod elettroniku;

· ikun hemm ċentri effikaċi ta’ għajnuna tal-aħjar kwalità fuq il-livell nazzjonali, fejn in-negozji u ċ-ċittadini jistgħu jirrikorru meta jiltaqgħu ma’ problemi relatati mas-Suq Uniku (“ċentri SOLVIT tat-tieni ġenerazzjoni”);

· ikun possibbli rikors rapidu u effikaċi għall-problemi kollha relatati mas-Suq Uniku;

· jiġi stabbilit netwerk ta’ “ċentri tas-Suq Uniku” nazzjonali li jimmonitorja u jissorvelja l-isforzi li jsiru biex jittejjeb il-funzjonament tas-Suq Uniku.

Il-Kummissjoni se timmonitorja l-progress li jsir f’dawn l-azzjonijiet kollha u tevalwa l-prestazzjoni b’mod regolari.

Konklużjoni

Għall-UE, is-Suq Uniku huwa stimulu għat-tkabbir kif ukoll punt ta’ referiment għall-impenn ta’ riforma strutturali fl-Istati Membri. Biex jiġi żgurat li l-impetu imġedded ta' riforma fuq il-livell tal-UE jagħti l-frott tiegħu jeħtieġ ukoll li jinbidel l-approċċ mil-lat tal-governanza tiegħu. Dan ifisser li s-sorveljanza politika għandha terġa' ssir fl-ogħla livell, li kwalunkwe distinzjoni artifiċjali bejn dak li jseħħ fuq il-livell tal-UE u dak li jseħħ fuq il-livell tal-Istati Membri tiġi evitata, u li jiġu żviluppati għodod aktar effiċjenti biex jiżguraw li s-Suq Uniku jkun ta’ servizz għaċ-ċittadini u n-negozji.

Il-Kummissjoni tistieden lill-Istati Membri jieħdu l-passi meħtieġa biex jimplimentaw dawn l-azzjonijiet u jikkonformaw mal-miri proposti f’din il-Komunikazzjoni.

Il-Kummissjoni se taħdem fi sħubija mal-Istati Membri biex tgħinhom f'dan, u minbarra l-azzjonijiet l-oħra li għandha tieħu skont din il-Komunikazzjoni, il-Kummissjoni se tipprovdi rapport inizjali dwar l-integrazzjoni tas-Suq Uniku u l-implimentazzjoni ta’ din il-komunikazzjoni bħala parti mill-Istħarriġ Annwali dwar it-Tkabbir tal-2013.

Anness

Oqsma ewlenin u atti leġiżlattivi li jeħtieġu attenzjoni speċjali

Is-Suq Uniku jikkontribwixxi għat-tkabbir u għall-ħolqien tal-impjiegi fl-Ewropa. Madankollu, l-analiżi turi li l-benefiċċji li jirriżultaw mill-ħolqien tas-Suq Uniku jistgħu jkunu ferm aktar kieku jiġu eliminati l-ostakoli u x-xkiel transkonfinali. Iżda l-qagħda tvarja minn settur għall-ieħor[24]. Sabiex iseħħ progress rapidu, il-Kummissjoni tipproponi li l-fokus jitqiegħed fuq setturi jew kwistjonijiet orizzontali fejn integrazzjoni akbar tas-suq (u għalhekk, funzjonament aqwa tas-Suq Uniku) x’aktarx li twassal għall-aktar benefiċċji sinifikanti f’termini ta’ tkabbir u ħolqien tal-impjiegi fl-UE.

Abbażi ta’ analiżi ekonomika, l-oqsma ewlenin identifikati għall-perjodu 2012-2013 huma s-settur tas-servizzi (inklużi l-kummerċ bl-imnut u l-kummerċ bl-ingrossa, is-servizzi tan-negozji, il-kostruzzjoni u s-servizzi tal-intermedjazzjoni finanzjarja), it-trasport, l-ekonomija diġitali u s-settur tal-enerġija. L-azzjonijiet ewlenin inklużi fl-Att dwar is-Suq Uniku għandhom jiżdiedu ma' din il-lista, peress li kienu ġew identifikati bħala miżuri ewlenin meħtieġa biex jistimulaw it-tkabbir, il-ħolqien tal-impjiegi u l-fiduċja, u minħabba li għandhom impatt orizzontali biex is-Suq Uniku jiffunzjona aħjar.

Dan l-anness jiddeskrivi kif il-Kummissjoni identifikat l-oqsma ewlenin għall-perjodu 2012-2013. L-anness jippreżenta wkoll lista tal-aktar atti leġiżlattivi importanti li jikkonċernaw lil dawn l-oqsma, fejn għandu jsir sforz partikolari biex jiġu żgurati traspożizzjoni f’waqtha, applikazzjoni xierqa u infurzar rigoruż.

1.         Metodoloġija u kriterji biex jiġu ddefiniti l-oqsma ewlenin għal titjib fil-funzjonament tas-Suq Uniku

Sabiex tiddefinixxi l-oqsma ewlenin, il-Kummissjoni għamlet studju komparattiv li fih evalwat il-prestazzjoni ta' kull settur tal-ekonomija f’kull pajjiż tal-UE27, bi tqabbil ma' livell ta' prestazzjoni meqjus li jista' jintlaħaq u li hu rrappreżentat mill-pajjiżi tal-UE li kellhom l-aħjar prestazzjoni[25]. Dan il-punt ta’ riferiment jindika valutazzjoni inizjali tal-potenzjal mhux sfruttat tas-Suq Uniku, skont is-settur.

Is-setturi jiġu identifikati bl-użu ta’ erba’ kriterji jew ta’ erba’ “testijiet”:

· Paragun tal-produzzjoni: Dan it-test huwa bbażat fuq għażla ta’ indikaturi kwantitattivi li jkopru l-fatturi ta’ produzzjoni ta’ oġġetti u servizzi, biex jiġu identifikati setturi li fihom jidher l-ogħla potenzjal mhux sfruttat biex jiġi ġġenerat it-tkabbir, billi jqabbel il-prestazzjoni ma' dik tal-ekonomija bl-aqwa prestazzjoni sinifikanti għal dak is-settur. L-indikaturi jinkludu l-produttività tax-xogħol, l-innovazzjoni, it-tkabbir tal-impjiegi u l-kriterji ta’ sostenibbiltà;

· Importanza ekonomika: Dan it-test janalizza jekk is-settur huwiex sinifikanti biżżejjed f’termini tad-daqs tal-ekonomija tant li jħalli impatt mhux negliġibbli fuq it-tkabbir li kieku jiġu indirizzati r-raġunijiet għall-isfruttament insuffiċjenti tal-potenzjal;

· Fatturi dinamiċi: Dan it-test janalizza jekk is-settur ikunx jidher li diġà qiegħed jindirizza l-potenzjal mhux sfruttat tiegħu, abbażi ta’ fatturi bħalma huma l-kapaċità tas-settur li joħloq it-tkabbir tal-impjiegi, u l-possibbiltà tiegħu li jilħaq il-livelli ta’ riferiment għall-produttività tax-xogħol;

· Fatturi tas-Suq Uniku: Dan it-test għandu l-għan li jfittex indikazzjonijiet li t-titjib tas-Suq Uniku jistax iwassal għall-użu ta’ potenzjal mhux sfruttat. Janalizza aspetti bħalma huma l-eżistenza ta' leġiżlazzjoni jew regolamenti differenti bejn l-Istati Membri, is-sodisfazzjon tal-konsumaturi, (in-nuqqas ta’) kompetittività, (in-nuqqas ta’) integrazzjoni bejn is-swieq domestiċi, it-tnaqqis fid-domanda għal tul ta’ żmien, u l-inizjattivi eżistenti ta’ politika. 

Meta dawn l-erba’ testijiet ġew applikati għas-67 settur ekonomiku (kif iddefiniti fin-“Nomenklatura tal-Attivitajiet Ekonomiċi fil-Komunitajiet Ewropej”[26]) li jiffurmaw l-ekonomija tal-UE, irriżulta li l-oqsma li ġejjin ikollhom l-akbar potenzjal ta’ tkabbir jekk is-Suq Uniku jsir jiffunzjona aħjar:

· Is-settur tas-servizzi (inklużi l-kummerċ bl-imnut u l-kummerċ bl-ingrossa, is-servizzi tan-negozji, u l-kostruzzjoni)

· Is-settur tas-servizzi finanzjarji (ta’ intermedjazzjoni)

· Is-settur tat-trasport (ferrovjarju, bit-triq, tal-avjazzjoni u marittimu)

· Is-settur tal-ekonomija diġitali (inklużi l-użu tal-broadband u l-e-kummerċ)

Barra minn hekk, il-Kummissjoni tqis li s-settur tal-enerġija għandu jitqies bħala suq ewlieni fil-politiki tas-Suq Uniku, minħabba r-rwol strateġiku li għandu bħala settur li jipprovdi servizz essenzjali lil setturi oħra tal-ekonomija.

Il-metodoloġija li ntużat biex jiġu ddefiniti l-oqsma ewlenin se tiġi riveduta b'mod regolari, fost l-oħrajn fil-kuntest tal-Proċess tas-Semestru Ewropew.

2.         Lista ta’ atti leġiżlattivi ewlenin 

Fl-oqsma ewlenin kollha msemmija hawn fuq ġew adottati, jew se jiġu adottati, atti leġiżlattivi biex itejbu s-Suq Uniku. Hawn taħt qed tingħata lista ta’ atti leġiżlattivi ewlenin f’dawn is-setturi, jiġifieri, atti li għandhom jiġu implimentati, trasposti u infurzati b’mod xieraq biex jiġi żgurat li l-potenzjal tat-tkabbir tas-Suq Uniku f’dawn is-setturi jiġi sfruttat bis-sħiħ.

Il-Kummissjoni tqis li huma meħtieġa sforzi u impenji aqwa, kemm min-naħa tal-Istati Membri kif ukoll min-naħa tal-Kummissjoni, biex is-Suq Uniku jsir jiffunzjona bil-potenzjal kollu tiegħu. Għal kull att leġiżlattiv elenkat hawn taħt, jidher spjegat il-mod li bih il-Kummissjoni biħsiebha taħdem mal-Istati Membri biex tiżgura implimentazzjoni xierqa. Fejn ikun meħtieġ, il-Kummissjoni tuża wkoll is-setgħat ta' infurzar tagħha kollha biex tiżgura l-konformità sħiħa.  

Qasam ewlieni || Att leġiżlattiv || Azzjoni proposta

Is-settur tas-servizzi || Id-Direttiva 2006/123/KE tal-Parlament Ewropew u tal-Kunsill tat-12 ta' Diċembru 2006 dwar is-servizzi fis-suq intern || Sabiex tindirizza n-nuqqasijiet fl-implimentazzjoni u l-applikazzjoni tad-Direttiva dwar is-Servizzi kif identifikati fil-Komunikazzjoni dwar is-servizzi, il-Kummissjoni għandha tagħmel sforzi f’diversi oportunitajiet, inkluż waqt laqgħat bilaterali, waqt laqgħat bejn il-pari għal gruppi żgħar ta’ Stati Membri, u permezz ta’ rakkomandazzjonijiet speċifiċi għall-pajjiżi.

Id-Direttiva 2008/6/KE tal-Parlament Ewropew u tal-Kunsill tal-20 ta’ Frar 2008 li temenda d-Direttiva 97/67/KE dwar it-tlestija kompleta tas-suq intern tas-servizzi postali Komunitarji || Seba’ (7) Stati Membri għadhom ma ttrasponewx id-Direttiva dwar is-Servizzi Postali (l-iskadenza għat-traspożizzjoni hija t-tmiem tas-sena 2012). Il-biċċa l-kbira tal-Istati Membri ssottomettew abbozzi ta’ atti leġiżlattivi għal verifiki informali. Biex tiżgura l-implimentazzjoni xierqa tad-Direttiva, il-Kummissjoni qiegħda twettaq verifiki sistematiċi tal-konformità tal-leġiżlazzjoni adottata. Barra minn hekk, il-Grupp ta’ Regolaturi Ewropej għas-Servizzi tal-Posta (ERGP) se jkompli jwettaq l-iskambju ta’ informazzjoni u tal-aħjar prassi dwar kwistjonijiet ta’ implimentazzjoni. 

Id-Direttiva 2005/36/KE tal-Parlament Ewropew u tal-Kunsill tas-7 ta' Settembru 2005 dwar ir-Rikonoxximent ta' Kwalifiki Professjonali || Il-Kummissjoni għandha tkompli tiddiskuti l-implimentazzjoni xierqa tad-Direttiva u l-funzjonament fil-prattika tagħha mal-Grupp ta’ Koordinaturi Nazzjonali, billi jiġi promoss l-iskambju tal-aħjar prassi. Il-Grupp ta' Koordinaturi Nazzjonali għandu jkompli jimmonitorja l-prestazzjoni, inkluż billi jsegwi r-riżultati tal-istudju komparattiv tal-prestazzjoni.

Id-Direttiva 2011/7/UE tal-Parlament Ewropew u tal-Kunsill tas-16 ta' Frar 2011 dwar il-ġlieda kontra l-ħlasijiet tard fi transazzjonijiet kummerċjali || Il-Kummissjoni tipprovdi għajnuna għat-traspożizzjoni volontarja qabel l-iskadenza tas-16 ta’ Marzu 2013. Diġà talbet lill-Istati Membri darbtejn li jħaffu fl-isforzi biex jadottaw miżuri ta’ traspożizzjoni nazzjonali. Barra minn hekk, ġie stabbilit Grupp ta’ Esperti dwar il-Ħlas Tardiv u se tiġi mnedija kampanja ta’ informazzjoni fl-Unjoni.

Is-settur tas-servizzi finanzjarji (ta’ intermedjazzjoni) || Proposta għal Direttiva tal-Parlament Ewropew u tal-Kunsill dwar l-aċċess għall-attività ta' istituzzjonijiet ta' kreditu u s-sorveljanza prudenzjali ta' istituzzjonijiet ta' kreditu u ditti tal-investiment (id-“Direttiva dwar ir-Rekwiziti ta' Kapital”) ) - COM(2011) 453, 20.7.2011 || Il-Kummissjoni għandha tippromwovi l-użu attiv tal-għodda tal-IT “Your Question on Legislation” biex tgħin lill-Istati Membri jittrasponu d-Direttiva. Għandhom jiġu organizzati laqgħat mal-Istati Membri u mal-Awtorità Bankarja Ewropea biex jiffaċilitaw it-traspożizzjoni. Il-Kummissjoni għandha torganizza wkoll workshops u twettaq verifiki sistematiċi tal-konformità tal-leġiżlazzjoni.

Proposta għal Regolament tal-Parlament Ewropew u tal-Kunsill dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment (ir-“Regolament dwar ir-Rekwiziti ta' Kapital”) - COM(2011) 452, 20.7.2011 || Il-Kummissjoni għandha tippromwovi l-użu attiv tal-għodda tal-IT “Your Question on Legislation” biex tgħin lill-Istati Membri jimplimentaw ir-Regolament. Għandhom jiġu organizzati laqgħat mal-Istati Membri u mal-Awtorità Bankarja Ewropea dwar l-implimentazzjoni tar-Regolament.

Ir-Regolament (UE) Nru 260/2012 tal-Parlament Ewropew u tal-Kunsill tal-14 ta’ Marzu 2012 li jistabbilixxi rekwiżiti tekniċi u tan-negozju għat-trasferimenti ta’ kreditu u debiti diretti bl-euro u li jemenda r-Regolament (KE) Nru 924/2009. || Għandhom jiġu organizzati workshops tekniċi fl-ambitu tal-Kunsill tas-SEPA.  Il-Kummissjoni għandha timmonitorja l-azzjonijiet ta’ akkumpanjament tal-Istati Membri (pereżempju, il-kampanji ta' informazzjoni) permezz tal-Kumitat tal-Pagamenti u permezz tal-Eurosystem, b'kooperazzjoni mill-qrib mal-BĊE. Kwistjonijiet tekniċi għandhom jiġu diskussi mal-parteċipanti fis-Suq (pereżempju, fil-Grupp Espert tas-Suq tas-Sistemi tal-Ħlasijiet). L-adozzjoni tal-istandards il-ġodda tal-pagamenti minn amministrazzjonijiet pubbliċi għandha tiġi mkejla kull sena (u dan il-kejl se jiġi ppubblikat fuq l-internet).

Direttiva 2009/138/KE tal-Parlament Ewropew u tal-Kunsill tal-25 ta’ Novembru 2009 dwar il-bidu u l-eżerċizzju tan-negozju tal-assigurazzjoni u tar-riassigurazzjoni (Solvibbiltà II) || L-abbozz ta’ “Direttiva Omnibus” (il-proposta COM(2012) 217 finali tas-16 ta’ Mejju 2012) jestendi l-iskadenza għat-traspożizzjoni sat-30 ta’ Ġunju 2013. Il-Kummissjoni qiegħda tiżviluppa għodda tal-IT biex timmonitorja t-traspożizzjoni tad-Direttiva tas-Solvibbiltà II mill-Istati Membri u biex issegwi l-implimentazzjoni tagħha. Fl-aħħar nofs tas-sena 2013 għandu jiġi organizzat seminar mal-Istati Membri u l-EIOPA dwar it-traspożizzjoni tad-Direttiva tas-Solvibbiltà II mill-Istati Membri.

Id-Direttiva 2008/48/KE tal-Parlament Ewropew u tal-Kunsill tat-23 ta’ April 2008 dwar ftehim ta' kreditu għall-konsumatur || Il-Kummissjoni żviluppat linji gwida li għandhom jgħinu lill-Istati Membri biex jużaw l-aspetti tekniċi tad-Direttiva b'mod aktar armonizzat. L-iskadenza għat-traspożizzjoni kienet it-12 ta’ Mejju 2010, u issa, il-Kummissjoni qiegħda twettaq verifiki sistematiċi tat-traspożizzjoni. Qed isiru żewġ studji, wieħed ekonomiku u l-ieħor legali, biex jitħejja r-rapport ta’ implimentazzjoni għall-2013.

Is-settur tat-trasport || Id-Direttiva 1999/62/KE tal-Parlament Ewropew u tal-Kunsill tas-17 ta' Ġunju 1999 dwar il-ħlas li jrid isir minn vetturi ta' merkanzija tqila għall-użu ta' ċerti infrastrutturi kif emendata bid-Direttiva 2006/38/KE tas-17 ta’ Mejju 2006 || Id-dati ewlenin għat-traspożizzjoni huma l-2008 u l-2013. Il-Kummissjoni għandha tintensifika l-laqgħat bilaterali minn kmieni mal-Istati Membri li qegħdin jimplimentaw dispożizzjonijiet ġodda għat-taxxi tat-toroq. Fl-2013, għandha taħdem ukoll mal-Kumitat rilevanti biex jiżviluppaw noti ta’ gwida bil-għan li jippromwovu implimentazzjoni aktar uniformi.

Id-Direttiva 2004/52/KE tal-Parlament Ewropew u tal-Kunsill tad-29 ta' April 2004 dwar l-interoperabilità ta' sistemi elettroniċi dwar taxxi tat-toroq fil-Komunità || Id-dati ewlenin għat-traspożizzjoni huma l-2006 u l-2012. Il-Kumitat dwar il-Ġbir tat-Taxxi tat-Toroq se jintensifika l-ħidma tiegħu. Il-Kummissjoni għandha timplimenta monitoraġġ aktar strett abbażi tal-Artikolu 258 tat-TFEU u l-Artikolu 7h tad-Direttiva 1999/62/KE, u għandha tippromwovi l-iskambju tal-aħjar prassi permezz ta’ gruppi ta’ esperti u ta’ websajt speċifika.

L-Ewwel Pakkett Ferrovjarju: Id-Direttiva 2001/12/KE tal-Parlament Ewropew u tal Kunsill tas-26 ta' Frar 2001 li temenda d-Direttiva tal-Kunsill 91/440/KEE dwar l-iżvilupp tal-ferroviji tal-Komunità Id-Direttiva 2001/13/KE tal-Parlament Ewropew u tal-Kunsill tas-26 ta' Frar 2001 li temenda d-Direttiva tal-Kunsill 95/18/KE dwar l-għoti ta' liċenzji għal impriżi ferrovjarji Id-Direttiva 2001/14/KE tal-Parlament Ewropew u tal-Kunsill tas-26 ta' Frar 2001 dwar l-allokazzjoni ta' kapaċità ta' infrastruttura tal-ferroviji u t-tqegħid ta' piżijiet għall-użu ta' infrastruttura tal-ferroviji u ċertifikazzjoni tas-sigurtà || Il-Kummissjoni għandha torganizza laqgħat ad-hoc mal-Istati Membri kollha biex tispjega l-ewwel pakkett ferrovjarju.

Il-Proposta għal Direttiva tal-Parlament Ewropew u tal-Kunsill li tistabbilixxi żona ferrovjarja unika Ewropea (Riformulazzjoni) - COM(2010) 475, 17.9.2010 || Bħala parti mill-għajnuna li toffri għat-traspożizzjoni, il-Kummissjoni għandha tadotta regoli ta’ implimentazzjoni biex tiġi żgurata l-applikazzjoni uniformi tad-Direttiva.

Ir-Raba’ Pakkett Ferrovjarju: Proposta leġiżlattiva li tirrevedi r-Regolament (KE) Nru 881/2004 li jistabbilixxi Aġenzija Ewropea tal-Ferroviji u temenda d-dispożizzjonijiet dwar is-sikurezza u l-interoperabbiltà fir-rigward tal-awtorizzazzjoni tat-tip u ċ-ċertifikazzjoni ta’ impriżi ferrovjarji Proposta leġiżlattiva dwar l-aċċess għas-suq ferrovjarju, li timplika l-adozzjoni adegwata tal-acquis attwali għall-aċċess għas-suq ferrovjarju (l-Ewwel Pakkett Ferrovjarju u l-emendi sussegwenti tiegħu) Reviżjoni tar-Regolament dwar servizzi pubbliċi tat-trasport tal-passiġġieri bil-ferrovija u bit-triq (ir-Regolament KE 1370/2007) || Wara li l-proposti jiġu adottati (sa tmiem l-2012), il-Kummissjoni għandha l-ħsieb li tniedi studju li jevalwa l-effikaċja fl-implimentazzjoni tal-miżuri proposti (it-tnaqqis tal-kost u t-tul ta’ żmien tal-proċess tal-awtorizzazzjoni ta’ vetturi ferrovjarji, l-iffaċilitar tal-aċċess għas-suq għall-impriżi ferrovjarji ġodda). F’dan il-kuntest, se tanalizza wkoll l-implimentazzjoni tar-Regolament 1370/2007, kif rivedut. B’mod partikolari, għandha twettaq analiżi dwar l-impatt fuq is-suq li jħalli r-regola ġdida prevista, li għandu l-għan li jimponi proċeduri ta’ sejħa għall-offerti kompetittivi għall-għoti ta’ kuntratti tas-servizz pubbliku ferrovjarju. Il-Kummissjoni għandha torganizza workshop(s) biex tippromwovi l-iskambju tal-aħjar prassi.

Id-Direttiva 2009/12/KE tal-Parlament Ewropew u tal-Kunsill tal-11 ta’ Marzu 2009 dwar l-imposti tal-ajruporti || Il-Kummissjoni għandha twettaq verifiki tal-konformità każ b’każ, u fl-2013 tirrapporta dwar is-sitwazzjoni tat-traspożizzjoni fl-Istati Membri.

lr-Regolament tal-Kummissjoni (UE) Nru 691/2010 li jistabbilixxi skema ta’ prestazzjoni għas-servizzi tan-navigazzjoni bl-ajru u għall-funzjonijiet tan-netwerk u li jemenda r-Regolament (KE) Nru 2096/2005 li jistabbilixxi rekwiżiti komuni għall-forniment ta’ servizzi ta’ navigazzjoni bl-ajru || F’Ġunju 2012, il-Kummissjoni għandha tadotta Rakkomandazzjoni dwar l-implimentazzjoni ta’ pjanijiet u miri ta' prestazzjoni. Il-monitoraġġ, l-istudju komparattiv u r-reviżjoni tal-prestazzjoni tas-servizzi tan-navigazzjoni bl-ajru u ta’ funzjonijiet tan-netwerk għandhom jitwettqu minn Entità ta’ Evalwazzjoni tal-Prestazzjoni indipendenti. F’Diċembru 2012, il-Kummissjoni għandha tadotta Rakkomandazzjoni dwar il-monitoraġġ, fejn tipprovdi gwida lill-Istati Membri dwar l-obbligu tagħhom li jimmonitorjaw l-implimentazzjoni xierqa tal-pjanijiet ta’ prestazzjoni. F’Ġunju 2013, il-Kummissjoni għandha tadotta Rakkomandazzjoni dwar l-implimentazzjoni ta’ pjanijiet u miri ta' prestazzjoni. Fl-2013 għandhom jiġu stabbiliti l-miri għat-tieni perjodu ta’ referenza (2015-2019), applikabbli għall-UE kollha. Kif previst fir-regolament dwar il-prestazzjoni, il-Kummissjoni (permezz ta’ proċedura ta’ Komitoloġija) għandha temenda r-regolamenti dwar il-prestazzjoni u t-tariffi fil-bidu tal-2013 biex l-iskema ta’ prestazzjoni tiġi estiża għal sistema “gate-to-gate” kompluta, fejn jiġu ffissati miri fl-erba’ oqsma ta’ prestazzjoni ewlenin kollha (il-kapaċità, il-kosteffiċjenza, is-sikurezza u l-ambjent).

Id-Direttiva 2010/65/UE tal-Parlament Ewropew u tal-Kunsill tal-20 ta’ Ottubru 2010 dwar il-formalitajiet ta’ rappurtar għal bastimenti li jaslu fi u/jew jitilqu minn portijiet tal-Istati Membri || Id-data għat-traspożizzjoni hija d-19 ta’ Mejju 2012. Il-Kummissjoni għandha tintensifika l-kooperazzjoni tagħha mal-Istati Membri tul il-proċess ta’ implimentazzjoni kollu tas-“single window” nazzjonali (li għandu jiġi ffinalizzat sal-1 ta’ Ġunju 2015). B’mod partikolari, il-grupp ta’ esperti tal-Istati Membri (eMS) jipprovdi gwida ta’ traspożizzjoni dwar il-koordinazzjoni tal-implimentazzjoni u dwar kwistjonijiet tekniċi speċifiċi (sistemi tal-IT, proċeduri). Il-Grupp jippromwovi l-aħjar prassi u jippreżenta r-riżultati tal-implimentazzjoni. L-Aġenzija Ewropea għas-Sigurtà Marittima tipprovdi għajnuna teknika lill-Grupp. L-Istati Membri jingħataw aktar appoġġ permezz tal-proġett ta’ riċerka tal-FP7 (eMar). Ir-riżultati jingħataw ukoll lill-grupp tal-eMS, u b’hekk, l-Istati Membri jiksbu għodda biex iħejju għall-implimentazzjoni. Fl-ambitu tas-sejħa tat-TEN-T 2012, hemm previst proġett pilota f’Novembru 2012 għall-implimentazzjoni tas-“single windows” nazzjonali.Konsorzju ffurmat minn 17-il Stat Membru wera l-interess tiegħu li jissottometti proposta għas-sejħa.

Id-Deċiżjoni Nru 661/2010/UE tal-Parlament Ewropew u tal-Kunsill tas-7 ta’ Lulju 2010 fuq linji gwida tal-Unjoni għall-iżvilupp tan-netwerk tat-trasport trans-Ewropew (riformulazzjoni) || Il-Koordinaturi Ewropej jipprovdu appoġġ lill-Istati Membri biex jimplimentaw il-Proġetti Prijoritarji b’mod effikaċi u f’waqthom. Il-Konferenzi annwali fl-ambitu tal-Ġranet TEN-T jipprovdu opportunità għall-iskambju ta’ prassi tajba (il-konferenza li jmiss għandha ssir fil-ħarifa tal-2012).

Ir-Regolament (KE) Nru 680/2007 tal-Parlament Ewropew u tal-Kunsill tal- 20 ta' Ġunju 2007 li jistabbilixxi r-regoli ġenerali għall-għoti ta' għajnuna finanzjarja Komunitarja fil-qasam tan-netwerks trans-Ewropej tat-trasport u tal-enerġija || Il-kumitat tat-TEN-T għandu jadotta Programmi ta’ Ħidma Annwali u Multiannwali li jistabbilixxu l-prijoritajiet finanzjarji. Is-sejħiet għall-proposti għandhom jiġu mnedija fl-2012 u fl-2013, u għandha tiġi mnedija proċedura għall-għażla tal-proġetti bħala tħejjija għall-Faċilità Nikkollegaw l-Ewropa wara l-2013. F’dan il-kuntest, il-Kummissjoni għandha l-intenzjoni li torganizza sessjonijiet ta’ informazzjoni (ta' ġurnata) u għandha tipprovdi l-monitoraġġ u l-għajnuna għall-iżvilupp ta' sensiela ppjanata ta' proġetti.

L-inizjattiva tal-Bonds Ewropa 2020 għall-Proġetti li għandha temenda r-Regolament (KE) Nru 680/2007 (imsemmi hawn fuq) || Il-Programm ta’ Ħidma Annwali tat-TEN-T 2012 għandu jiġi emendat fit-tielet kwart tas-sena 2012 biex jiġi pprovdut baġit għal-LGTT (l-Istrument ta' Garanzija fuq is-Self għall-Proġetti TEN-T - “Loan Guarantee Instrument for TEN-T”) biex tiġi ffinanzjata l-fażi pilota tal-bonds għall-proġetti. Il-Kummissjoni għandha taħdem mal-BEI biex tidentifika u tagħżel proġetti għall-fażi pilota tal-bonds għall-proġetti. Lejn nofs is-sena 2013 għandhom isiru studji għar-rapport interim tal-fażi pilota tal-inizjattiva tal-bonds għall-proġetti.

Is-settur tas-suq uniku diġitali || Id-Direttiva Nru 2000/31/KE tal-Parlament u tal-Kunsill tat-8 ta' Ġunju 2000 dwar ċerti aspetti legali tas-servizzi minn soċjetà tal-informazzjoni, partikolarment il-kummerċ elettroniku, fis-Suq Intern || Bħalissa qiegħda ssir evalwazzjoni profonda tat-traspożizzjoni u l-implimentazzjoni tad-Direttiva (ir-rapport finali huwa mistenni f’Awwissu 2012). Abbażi ta’ dan l-istudju, il-Kummissjoni għandha tieħu l-azzjoni xierqa. Il-ħidma li ssir fl-ambitu tal-grupp ta’ esperti tal-Istati Membri stabbilit bid-Direttiva għandu jkompli jgħin għall-iżvilupp tal-forniment transkonfinali legali ta’ prodotti u servizzi onlajn.

Proposta għal Regolament tal-Parlament Ewropew u tal-Kunsill dwar il-protezzjoni tal-individwi fir-rigward tal-ipproċessar ta’ dejta personal u dwar il-moviment liberu ta’ dik id-dejta - COM(2012) 11, 25.1.2012 || Hekk kif jiġi adottat ir-Regolament, il-Kummissjoni għandha tgħin lill-Istati Membri biex jiżguraw l-implimentazzjoni u l-applikazzjoni xierqa tiegħu fil-prattika.

Id-Direttiva 2011/83/UE tal-Parlament Ewropew u tal-Kunsill tal-25 ta’ Ottubru 2011 dwar drittijiet tal-konsumatur, li temenda d-Direttiva tal-Kunsill 93/13/KEE u d-Direttiva 1999/44/KE tal-Parlament Ewropew u tal-Kunsill u li tħassar id-Direttiva tal-Kunsill 85/577/KEE u d-Direttiva 97/7/KE tal-Parlament Ewropew u tal-Kunsill || Il-Kummissjoni tipprovdi għajnuna aqwa għal traspożizzjoni permezz ta’ laqgħat ta’ esperti tal-Istati Membri u billi tiżviluppa linji gwida li jgħinu lill-awtoritajiet tal-infurzar biex jimplimentaw b’mod korrett ir-rekwiżiti ta’ informazzjoni stabbiliti fid-Direttiva 2011/83/UE għas-settur diġitali.

Proposta għal Regolament tal-Parlament Ewropew u tal-Kunsill fuq Liġi Komuni Ewropea dwar il-Bejgħ - COM(2011) 635, 11.10.2011 || Hekk kif jiġi adottat ir-Regolament, il-Kummissjoni għandha tipprovdi għajnuna biex jiġu żgurati l-implimentazzjoni u l-applikazzjoni xierqa tiegħu fil-prattika.

Is-settur tal-enerġija || Id-Direttiva 2009/72/KE tal-Parlament Ewropew u tal-Kunsill tat-13 ta’ Lulju 2009 dwar ir-regoli komuni għas-suq intern fil-qasam tal-elettriku u li tħassar id-Direttiva 2003/54/KE (id-Direttiva dwar l-Elettriku) || Id-data għat-traspożizzjoni hija t-3 ta’ Marzu 2011. Bħalissa qiegħda ssir analiżi profonda tal-miżuri diġà notifikati. Madankollu, tlettax-il (13) Stat Membru għadhom ma trasponewx id-Direttiva b’mod sħiħ u l-Kummissjoni qiegħda tieħu l-azzjoni xierqa. Il-Kummissjoni għandha tkompli tiddiskuti l-implimentazzjoni xierqa tad-Direttiva u l-funzjonament fil-prattika tagħha mal-awtoritajiet nazzjonali, inkluż mal-awtoritajiet regolatorji nazzjonali għall-enerġija.

Id-Direttiva 2009/73/KE tal-Parlament Ewropew u tal-Kunsill tat-13 ta’ Lulju 2009 dwar ir-regoli komuni għas-suq intern tal-gass naturali u li tħassar id-Direttiva 2003/55/KE (id-Direttiva dwar il-Gass) || Id-data għat-traspożizzjoni hija t-3 ta’ Marzu 2011. Bħalissa qiegħda ssir analiżi profonda tal-miżuri notifikati. Madankollu, tnax-il (12) Stat Membru għadhom ma trasponewx id-Direttiva b’mod sħiħ u l-Kummissjoni qiegħda tieħu l-azzjoni xierqa. Il-Kummissjoni għandha tkompli tiddiskuti l-implimentazzjoni xierqa tad-Direttiva u l-funzjonament fil-prattika tagħha mal-awtoritajiet nazzjonali, inkluż mal-awtoritajiet regolatorji nazzjonali għall-enerġija.

Direttiva 2006/32/KE tal-Parlament Ewropew u tal-Kunsill tal-5 ta' April 2006 dwar effiċjenza fl-użu finali tal-enerġija u dwar servizzi ta' enerġija u li tħassar id-Direttiva tal-Kunsill 93/76/KEE || Id-Direttiva ġiet trasposta fl-Istati Membri kollha; madankollu, qed jiġi evalwat għadd sinifikanti ta' lmenti, u dawn jindikaw il-possibbiltà ta’ kwistjonijiet ta’ konformità. L-implimentazzjoni tad-Direttiva tiġi diskussa b’mod regolari mal-Istati Membri, kemm fuq livell bilaterali kif ukoll fil-qafas ta’ Azzjoni Konġunta. Il-Kummissjoni qiegħda tħejji rapport li jiffoka fuq il-progress li sar mill-Istati Membri fl-implimentazzjoni tal-miri nazzjonali indikattivi tagħhom; madankollu, għandhom jiġu indirizzati wkoll xi kwistjonijiet fir-rigward ta’ implimentazzjoni aktar ġenerali. Id-Direttiva proposta dwar l-Effiċjenza Enerġetika għandha l-għan li tkompli tispeċifika ċerti dispożizzjonijiet tad-Direttiva 2006/32/KE biex tiġi ffaċilitata l-implimentazzjoni tagħha.

Id-Direttiva 2010/31/UE tal-Parlament Ewropew u tal-Kunsill tad-19 ta’ Mejju 2010 dwar ir-rendiment tal-bini fl-użu tal-enerġija (riformulazzjoni) || Id-dati ta’ traspożizzjoni huma: id-9 ta’ Lulju 2012 u d-9 ta' Jannar 2013 (skont id-dispożizzjonijiet). Il-Kummissjoni għandha twettaq verifiki sistematiċi tat-traspożizzjoni hekk kif jagħlqu dawn l-iskadenzi. L-għajnuna għall-implimentazzjoni għandha tingħata permezz ta’ dokumenti ta’ gwida, laqgħat bilaterali regolari mal-Istati Membri u laqgħat tal-gruppi ta’ esperti.

Miżuri proposti mill-Kummissjoni Ewropea skont l-Att dwar is-Suq Uniku I li l-Parlament Ewropew u l-Kunsill impenjaw ruħhom li jatuh prijorità, u li l-Kummissjoni se tipprovdi għajnuna aħjar għat-traspożizzjoni u/jew l-implimentazzjoni tiegħu:

1. Il-Proposta għal Regolament tal-Parlament Ewropew u tal-Kunsill dwar Fondi Ewropej ta’ Kapital ta' Riskju, 7.12.2011 COM(2011) 860 finali 2011/0417 (COD)

2. Il-Proposta għal Direttiva tal-Parlament Ewropew u tal-Kunsill li temenda d-Direttiva 2005/36/KE dwar ir-Rikonoxximent ta’ Kwalifiki Professjonali u r-Regolament dwar il-kooperazzjoni amministrattiva permezz tas-Sistema ta’ Informazzjoni tas-Suq Intern, 19.12.2011 COM(2011) 883 finali 2011/0435 (COD)

3. Il-Proposta għal Regolament tal-Parlament Ewropew u tal-Kunsill li jimplimenta l-kooperazzjoni msaħħa fil-qasam tal-ħolqien ta’ protezzjoni tal-privattiva unitarja, 13.4.2011 COM(2011) 215 finali 2011/0093 (COD)

4. Il-Proposta għal Direttiva tal-Parlament Ewropew u tal-Kunsill dwar soluzzjoni alternattiva għat-tilwim, għat-tilwim tal-konsumaturi u li temenda r-Regolament (KE) Nru 2006/2004 u d-Direttiva 2009/22/KE (id-Direttiva dwar l-ADR tal-konsumaturi), 29.11.2011 COM(2011) 793 finali 2011/0373 (COD) Il-Proposta għal Regolament tal-Parlament Ewropew u tal-Kunsill dwar soluzzjoni onlajn għat-tilwim, għat-tilwim tal-konsumaturi (ir-Regolament dwar l-ODR tal-konsumaturi) 29.11.2011 COM(2011) 794 finali 2011/0374 (COD)

5. Il-Proposta għal Regolament tal-Parlament Ewropew u tal-Kunsill dwar l-Istandardizzazzjoni Ewropea u li jemenda d-Direttivi tal-Kunsill 89/686/KEE u 93/15/KEE u d-Direttivi 94/9/KE, 94/25/KE, 95/16/KE, 97/23/KE, 98/34/KE, 2004/22/KE, 2007/23/KE, 2009/105/KE u 2009/23/KE tal-Parlament Ewropew u tal-Kunsill, 1.6.2011 COM(2011) 315 finali 2011/0150 (COD)

6. Il-Proposta għal Regolament tal-Parlament Ewropew u tal-Kunsill li jistabbilixxi l-Faċilità Nikkollegaw l-Ewropa, 19.10.2011 COM(2011) 665 finali 2011/0302 (COD) Il-Proposta għal Regolament tal-Parlament Ewropew u tal-Kunsill dwar linji gwida għall-infrastruttura tal-enerġija trans-Ewropea u li jħassar id-Deċiżjoni Nru 1364/2006/KE, 19.10.2011 COM/2011/0658 finali - 2011/0300 (COD) Il-Proposta għal Regolament tal-Parlament Ewropew u tal-Kunsill dwar linji gwidi tal-Unjoni għall-iżvilupp tan-Netwerk tat-Trasport Trans-Ewropew, 19.10.2011 COM/2011/0650 finali - 2011/0294 (COD) Il-Proposta għal Regolament tal-Parlament Ewropew u tal-Kunsill dwar linji gwida għan-netwerks tat-telekomunikazzjonijiet trans-Ewropej u li tirrevoka d-Deċiżjoni Nru 1336/97/KE, 19.10.2011 COM/2011/0657 finali - 2011/0299 (COD)

7. Il-Proposta għal Regolament tal-Parlament Ewropew u tal-Kunsill dwar servizzi ta' identifikazzjoni elettronika u ta' fiduċja għat-transazzjonijiet elettroniċi fis-suq intern, 4.6.2012, COM/2012/238

8. Il-Proposta għal Regolament tal-Parlament Ewropew u tal-Kunsill dwar il-Fondi ta' Intraprenditorija Soċjali Ewropej, 7.12.2011 COM(2011) 862 finali 2011/0418 (COD)

9. Il-Proposta għal Direttiva tal-Kunsill li temenda d-Direttiva 2003/96/KE li tirriforma l-istruttura tal-Komunità dwar tassazzjoni fuq prodotti ta’ enerġija u elettriku, 13.4.2011 COM(2011) 169 finali 2011/0092 (CNS)

10. Il-Proposta għal Direttiva tal-Parlament Ewropew u tal-Kunsill dwar l-infurzar tad-Direttiva 96/71/KE dwar l-impjieg ta’ ħaddiema fil-qafas ta’ prestazzjoni ta’ servizzi, Brussell, 21.3.2012 COM(2012) 131 final 2012/0061 (COD) Il-Proposta għal Regolament tal-Kusill dwar l-eżerċizzju tad-dritt li tittieħed azzjoni kollettiva fil-kuntest tal-libertà tal-istabbiliment u l-libertà li tagħti servizz, 21.3.2012 COM(2012) 130 finali 2012/0064 (APP)

11. Il-Proposta għal Direttiva tal-Parlament Ewropew u tal-Kunsill dwar ir-rapporti finanzjarji annwali, ir-rapporti finanzjarji konsolidati u r-rapporti relatati ta’ ċerti tipi ta’ impriżi, 25.10.2011 COM(2011) 684 finali 2011/0308 (COD)

12. Il-Proposta għad-Direttiva tal-Parlament Ewropew u tal-Kunsill dwar l-akkwist pubbliku, 20.12.2011 COM(2011) 896 final 2011/0438 (COD)

[1]       Id-Dokument ta’ Ħidma tal-Persunal tal-Kummissjoni “Nagħmlu Suċċess mis-Suq Uniku - Kontroll Annwali fuq il-Governanza 2011”, SWD(2012) 25 finali, 24.2.2012.

[2]       Pereżempju, ara d-Dokument ta' Ħidma tal-Persunal tal-Kummissjoni "The Single Market through the lens of the people: A snapshot of citizens' and businesses' 20 main concerns", SEC(2011) 1003 finali, 16.8.2011.

[3]       Komunikazzjoni dwar l-implimentazzjoni tad-Direttiva dwar is-Servizzi: A partnership for new growth in services 2012-2015" (Sħubija għal tkabbir ġdid fis-servizzi 2012-2015), COM(2012) 261.

[4]       Rapport mill-Grupp ta’ Livell Għoli ta’ Partijiet Interessati Indipendenti dwar Piżijiet Amministrattivi, il-15 ta’ Novembru 2011.

[5]       Ir-Riżoluzzjoni tal-Parlament Ewropew tas-6 ta’ April 2011 dwar il-governanza u s-sħubija fis-Suq Uniku (2010/2289(INI) u r-Riżoluzzjoni tal-Parlament Ewropew tal-20 ta’ Mejju 2010 dwar ir-realizzazzjoni tas-Suq Uniku għall-konsumaturi u ċ-ċittadini (2010/2011(INI).

[6]       Id-defiċit għat-traspożizzjoni jkejjel l-għadd ta' Direttivi li ma ġewx trasposti f’waqthom.

[7]       Id-defiċit għall-konformità jkejjel l-għadd ta’ Direttivi li għalihom ikunu nbdew proċeduri ta’ ksur għan-nuqqas ta’ konformità.

[8]       Minħabba l-importanza tagħhom għat-tkabbir, il-Kummissjoni tqis li fil-każ tal-atti leġiżlattivi l-ġodda inklużi fl-Anness, l-Istati Membri għandhom jaċċettaw li jmorru lil hinn mill-ftehim li jidher fid-Dikjarazzjoni Politika Konġunta tat-28 ta’ Settembru 2011 dwar id-dokumenti ta’ spjegazzjoni (2011/C 369/02).   

[9]       Ikkalkulat mid-data li fiha l-Kummissjoni tibgħat ittra ta’ tqegħid fil-mora sat-tmiem tal-fażi ta’ qabel il-litigazzjoni.

[10]     Meta jitqies il-fatt li, f’xi każijiet kumplessi, perjodu itwal għall-implimentazzjoni jkun ġustifikat (ara l-Kawża C 278/01, Il-Kummissjoni v. Spanja, il-25 ta’ Novembru 2003, b’mod partikolari l-paragrafi 43 ff.).

[11]     Ara r-Rapport mill-Kummissjoni lill-Kunsill u lill-Parlament Ewropew “L-imminimizzar tal-piż regolatorju għall-SMEs - L-adattament tar-regolamentazzjoni tal-UE għall-bżonnijiet tal-intrapriżi mikro”, COM(2011) 803 finali, 23.11.2011.

[12]     Ara r-Rakkomandazzjoni tal-Kummissjoni tad-29 ta' Ġunju 2009 dwar miżuri għat-titjib fil-funzjonament tas-Suq Uniku (2009/524/KE) u l-Komunikazzjoni “L-Att dwar is-Suq Uniku – 12-il xprun sabiex jiġi stimulat it-tkabbir u r-rinfurzar tal-fiduċja: Flimkien għal tkabbir ġdid”, COM(2011) 206 finali, 14.4.2011.

[13]     Ara l-Komunikazzjoni “Regolamentazzjoni Intelliġenti fl-Unjoni Ewropea”, COM(2010) 543 finali, 8.10.2010, u l-Ftehim Interistituzzjonali dwar tfassil aħjar tal-liġijiet (2003/C 321/01).

[14]     Ara r-Rapport “L-imminimizzar tal-piż regolatorju għall-SMEs - L-adattament tar-regolamentazzjoni tal-UE għall-bżonnijiet tal-intrapriżi mikro”, supra.

[15]     Pereżempju, il-Forum taċ-Ċittadini dwar l-Enerġija.

[16]     Għal dan l-iskop, l-Istati Membri għandhom ikomplu jiżviluppaw il-Punti ta' Kuntatt Uniċi tagħhom; ara r-rapport dwar l-Implimentazzjoni tad-Direttiva dwar is-Servizzi li ġie adottat illum.

[17]     Ara l-proposta għal Regolament tal-Parlament Ewropew u tal-Kunsill dwar il-kooperazzjoni amministrattiva permezz tas-Sistema ta’ Informazzjoni tas-Suq Intern, COM(2011) 522.

[18]     Ara wkoll il-programm għal soluzzjonijiet ta’ interoperabbiltà għall-amministrazzjonijiet pubbliċi Ewropej, id-Deċiżjoni Nru 922/2009/KE tal-Parlament Ewropew u tal-Kunsill tas-16 ta’ Settembru 2009.

[19]     Ara d-dokument ta’ ħidma tal-persunal tal-Kummissjoni “Ir-rinfurzar tas-soluzzjoni effettiva tal-problemi fis-Suq Uniku – inħollu l-potenzjal tas-SOLVIT fl-okkażjoni tal-10 anniversarju tiegħu", SWD(2012) 33 finali, 24.2.2012.

[20]     Ara d-Direttiva 2008/52 tal-Parlament Ewropew u tal-Kunsill tal-21 ta’ Mejju 2008 dwar ċerti aspetti ta’ medjazzjoni f’materji ċivili u kummerċjali; Proposta għal Direttiva tal-Parlament Ewropew u tal-Kunsill dwar soluzzjoni onlajn tat-tilwim għat-tilwim tal-konsumaturi - COM(2011) 793 finali.

[21]     Ara l-Proposta għal Regolament tal-Parlament Ewropew u tal-Kunsill dwar soluzzjoni onlajn tat-tilwim għat-tilwim tal-konsumaturi - COM(2011) 794 finali.

[22]     Ir-Regolament (KE) Nru 861/2007 tal-Parlament Ewropew u tal-Kunsill tal-11 ta’ Lulju 2007 li jistabbilixxi Proċedura Ewropea għal Talbiet Żgħar.

[23]     Ara r-Rakkomandazzjoni tal-Kummissjoni tad-29 ta' Ġunju 2009 dwar miżuri għat-titjib fil-funzjonament tas-Suq Uniku - 2009/524/KE.

[24]             Monitoraġġ tas-suq tal-prodotti, il-Kummissjoni Ewropea, Direttorat Ġenerali għall-Affarijiet Ekonomiċi u Finanzjarji (2010b).

[25]             Preżentazzjoni komprensiva tal-metodoloġija proposta flimkien mar-riżultati kwantifikati tagħha għandha tingħata fl-istudju “cost of non-Europe” li bħalissa qiegħed jitħejja għall-Kummissjoni mill-London Economics u minn PWC taħt is-superviżjoni tal-BEPA u li għandu jiġi ppubblikat fil-ħarifa tal-2012.

[26]     Nomenklatura tan-NACE, fil-livell ta’ 2 ċifri.