KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Il-Modernizzazzjoni tal-Għajnuna mill-Istat tal-UE (SAM) /* COM/2012/0209 final */
KOMUNIKAZZJONI TAL-KUMMISSJONI
LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI
EWROPEW U LILL-KUMITAT TAR-REĠJUNI Il-Modernizzazzjoni tal-Għajnuna
mill-Istat tal-UE (SAM) (Test b'rilevanza għaż-ŻEE) 1. Introduzzjoni: Il-kontroll tal-għajnuna
mill-istat fl-ambjent attwali 1. Ewropa 2020 hija
l-istrateġija tal-Ewropa għat-tkabbir għal dan il-perjodu ta' għaxar
snin li qegħdin fih. F’dinja li qed tinbidel, il-Kummissjoni Ewropea qed
timmira l-politika tagħha biex l-ekonomija tal-Ewropa tkun
intelliġenti, sostenibbli u inklużiva. Dawk it-tliet għanijiet
li jagħtu s-saħħa lil xulxin għandhom jgħinu lill-UE u
lill-Istati Membri biex jiksbu livelli għoljin ta’ impjiegi, produttività
u koeżjoni soċjali. 2. F’dak id-dawl, is-suq uniku
huwa l-aħjar assi tal-Ewropa biex jinħoloq tkabbir sostenibbli. Suq
intern effettiv jeħtieġ li jiġu attivati żewġ
strumenti: l-ewwel, regolamentazzjoni biex jinħoloq suq wieħed
integrat mingħajr fruntieri nazzjonali, u t-tieni, politika dwar
il-kompetizzjoni li tinkludi kontroll fuq l-għajnuna mill-Istat biex ikun
żgurat li t-tħaddim ta’ dak is-suq intern ma jkunx imxekkel
b’imġiba mhux kompetittiva min-naħa ta' kumpaniji jew mill-Istat
Membri li jiffavorixxu xi partijiet b’dannu għal partijiet oħrajn. Il-kompetizzjoni
hija spinta ewlenija wara t-tkabbir: tagħti inċentiv
lill-intrapriżi, inklużi dawk ġodda, u ttejjeb il-produttività u
l-kompetittività f’kuntest globali. Il-kompetizzjoni hija wkoll politika
kosteffettiva peress li tista’ ssir mingħajr infiq pubbliku jew privat. Għaldaqstant,
bħala wieħed mill-istrumenti tal-politika dwar il-kompetizzjoni,
l-għajnuna mill-Istat għandha rwol fundamentali fid-difiża u
t-tisħiħ tas-suq uniku. 3. Il-kriżi ekonomika u
finanzjarja heddet l-integrità tas-suq uniku u żiedet il-potenzjal li jkun
hemm reazzjonijiet antikompetittivi. Fl-istess ħin, minħabba
l-kriżi żdiedet id-domanda biex l-Istat ikollu rwol ikbar
fil-protezzjoni tal-membri l-iktar vulnerabbli tas-soċjetà u
fil-promozzjoni tal-irkupru ekonomiku. Iżda dan poġġa taħt
pressjoni l-baġits tal-Istati Membri, u huwa meħtieġ li jkun
hemm konsolidazzjoni fiskali u użu aħjar tar-riżorsi skarsi. Fl-aħħar,
iżda mhux b’inqas, dan żied id-differenza bejn il-marġini ta'
manuvra tal-Istati Membri biex jiffinanzjaw il-politiki tagħhom. 4. Il-potenzjal ta’ tkabbir
tal-Ewropa jista’ jiżdied billi l-infiq pubbliku jkun iktar iffukat u
billi jinħolqu l-kundizzjonijiet xierqa biex jibda l-irkupru u jkun
wieħed dejjiemi. B’mod partikolari, l-infiq pubbliku għandu jsir
iktar effiċjenti[1],
effikaċi u mmirat lejn politiki li jippromwovu t-tkabbir li jissodisfa
l-għanijiet Ewropej komuni. 5. Parti minn dak l-infiq
pubbliku jkun fil-forma ta' għajnuna mill-Istat[2], kemm jekk ikun f'għamla
ta' nfiq dirett, inċentivi tat-taxxa, garanziji mill-Istat jew
f'għamla oħra. Għajnuna mill-Istat li tkun iktar
b’saħħitha u mmirata aħjar tista’ tħeġġeġ
biex jitfasslu politiki iktar effikaċi li jtejbu t-tkabbir u tista’
tiżgura li t-tfixkil fil-kompetizzjoni jkun limitat sabiex is-suq intern
jibqa’ miftuħ u kontestabbli. Tista’ tikkontribwixxi wkoll biex tittejjeb
il-kwalità tal-finanzi pubbliċi. Qafas iktar iffukat se jippermetti
lill-Istati Membri biex jikkontribwixxu aħjar kemm fl-implimentazzjoni
tal-istrateġija Ewropa 2020 għal tkabbir sostenibbli, kif ukoll
fil-konsolidazzjoni baġitarja. 6. Il-modernizzazzjoni
tal-kontroll fuq l-għajnuna mill-Istat hija meħtieġa sabiex
tissaħħaħ il-kwalità tal-iskrutinju min-naħa
tal-Kummissjoni u biex l-istrument jissawwar f’għodda li tippromwovi
l-użu tajjeb tar-riżorsi pubbliċi biex ikun hemm politiki
orjentati lejn it-tkabbir u jitnaqqas it-tfixkil fil-kompetizzjoni li
jdgħajjef l-ugwaljanza fis-suq intern. Il-kumplessità attwali tar-regoli
sostantivi, kif ukoll tal-qafas proċedurali, li japplikaw
għall-każijiet iż-żgħar kif ukoll għall-kbar,
huma sfidi għall-kontroll tal-għajnuna mill-Istat. 7. Hemm elementi oħrajn li
jsaħħu l-bżonn li jkun hemm pakkett wiesa’ ta’ modernizzazzjoni
għall-politika tal-UE dwar l-għajnuna mill-Istat b’mod ġenerali:
l-iskadenza ta' għadd ta' strumenti ewlenin ta' għajnuna mill-Istat
qabel tmiem l-2013; it-tħejjija tal-Qafas Finanzjarju Multiannwali tal-UE
u tar-Regoli tal-Fondi Strutturali għall-2014-2020; u fl-aħħar,
iżda mhux b’inqas, it-tisħiħ tas-sistema ta’ sorveljanza
ekonomika u baġitarja fis-semestru tal-UE. 8. Għaldaqstant,
l-għanijiet tal-modernizzazzjoni tal-kontroll fuq l-għajnuna
mill-Istat huma tlieta: (i) it-trawwim tat-tkabbir sostenibbli,
intelliġenti u inklużiv f'suq intern kompetittiv; (ii) l-iffukar
tal-iskrutinju li l-Kummissjoni tagħmel minn qabel fuq każijiet li
jkollhom l-ikbar impatt fuq is-suq intern filwaqt li tissaħħaħ
il-kooperazzjoni tal-Istati Membri fl-infurzar tal-għajnuna mill-Istat; (iii)
is-simplifikazzjoni tar-regoli u l-għoti ta’ deċiżjonijiet
b’iktar ħeffa. 9. Din il-Komunikazzjoni
tagħti l-punti ġenerali ta' strateġija integrata għal
riforma li twassal għall-ksib ta’ dawk l-għanijiet, li huma marbuta
mill-qrib bejniethom u li għandhom jitqiesu bħala partijiet
individwali li permezz tagħhom se jinbena pakkett uniku għar-riforma.
2. L-għanijiet
tal-modernizzazzjoni tal-għajnuna mill-Istat u l-istrumenti biex jinkisbu 2.1. It-trawwim tat-tkabbir f’suq
intern imsaħħaħ, dinamiku u kompetittiv 10. L-Istrateġija
Ewropa 2020 għat-tkabbir tirrikonoxxi r-rwol tal-għajnuna
mill-Istat fit-tkabbir u l-kapaċità tagħha li "tikkontribwixxi
b'mod attiv u pożittiv għall-għanijiet tal-istrateġija
Ewropa 2020 billi tinċita u tappoġġa inizjattivi għal
teknoloġiji innovattivi, effiċjenti u aktar ekoloġiċi,
filwaqt li tiffaċilita l-aċċess għal appoġġ
pubbliku għall-investiment, kapital tar-riskju u ffinanzjar
tar-riċerka u l-iżvilupp”[3].
11. Il-politiki biex jinkisbu
l-għanijiet tal-Ewropa 2020 jistgħu jagħtu kontribut
importanti biex tintemm il-kriżi u jitqanqal mill-ġdid it-tkabbir
sostenibbli. L-Istati Membri u l-Unjoni se jipprijoritizzaw in-nefqa
mill-baġit għal dak l-iskop; u parti minnha se tinkludi
l-għajnuna mill-Istat. 12. Il-modernizzazzjoni
tal-kontroll fuq l-għajnuna mill-Istat għandha tiffaċilita
t-trattament ta' għajnuna tajba li tkun imfassla tajjeb, immirata lejn
nuqqasijiet identifikati tas-suq u għanijiet ta’ interess komuni u twassal
għall-inqas tfixkil possibbli fis-suq (“għajnuna tajba”). Dan se
jiżgura li l-appoġġ pubbliku jistimula l-innovazzjoni, it-teknoloġiji
ekoloġiċi, l-iżvilupp tal-kapital uman, jevita l-ħsara
ambjentali u fl-aħħar mill-aħħar jippromwovi t-tkabbir,
ix-xogħol u l-kompetittività tal-UE. Għajnuna bħal din
tikkontribwixxi bl-aħjar mod għat-tkabbir meta tkun immirata lejn
in-nuqqasijiet tas-suq u għalhekk tkun qed tikkumplimenta, mhux
tissostitwixxi, l-infiq privat. L-għajnuna mill-Istat tkun effikaċi
biex jinkiseb l-għan ta’ politika pubblika mixtieq biss meta jkollha
l-effett li tkun inċentiv, jiġifieri tkun tinkludi li
l-benefiċjarju tal-għajnuna jwettaq attivitajiet li kieku ma kienx
iwettaq mingħajr l-għajnuna. L-għajnuna mill-Istat se ikollha
l-ikbar impatt pożittiv fuq it-tkabbir biss meta tkun imfassla b’mod li
jillimita t-tfixkil fil-kompetizzjoni u jżomm is-suq intern kompetittiv u
miftuħ. Għaldaqstant il-kontroll tal-għajnuna mill-Istat huwa
kruċjali biex tittejjeb l-effiċjenza u l-effikaċja tal-infiq
pubbliku fl-għamla ta' għajnuna mill-Istat, bl-għan
ġenerali li jiġi stimulat iktar tkabbir fis-suq intern, li
neċessarjament jeħtieġ li jkun hemm kompetizzjoni li qed
tiżviluppa. L-għajnuna mill-Istat li ma timmirax lejn in-nuqqasijiet
tas-suq u li ma jkollha l-ebda effett li jservi ta’ inċentiv, mhux biss
hija ħela ta' riżorsi pubbliċi iżda sservi biex
trażżan it-tkabbir peress li l-kundizzjonijiet tal-kompetizzjoni
fis-suq intern imorru għall-agħar. 13. Il-kontroll tal-għajnuna
mill-Istat diġà huwa element sottostanti tal-inizjattivi prinċipali
tal-Ewropa 2020. Pereżempju, il-linji gwida wiesa’ jipprovdu
kundizzjonijiet għal appoġġ effiċjenti mill-Istat biex
jinfirex il-broadband, jingħata appoġġ lill-ksib
tal-għanijiet tal-"Aġenda Diġitali għall-Ewropa”. L-appoġġ
pubbliku biex tiġi żviluppata l-infrastruttura huwa strumentali wkoll
għall-kisba ta’ netwerks tat-trasport u tal-enerġija
intelliġenti, modernizzati u interkonnessi bis-sħiħ kif previst
mill-“Ewropa li tuża r-riżorsi b'effiċjenza”. Il-qafas
tal-għajnuna mill-Istat għar-riċerka, l-iżvilupp u
l-innovazzjoni jiffaċilita l-kisba tal-għanijiet tal-“Unjoni
tal-Innovazzjoni” kif ukoll ta’ “Politika industrijali għall-era
tal-globalizzazzjoni”. L-infurzar tal-prinċipju “min iniġġes
iħallas” kif ukoll il-possibilità li tingħata għajnuna
lill-kumpaniji biex jitħeġġu jmorru lil hinn mill-istandards
ambjentali obbligatorji tal-UE jew biex jippromwovu l-effiċjenza
tal-enerġija stipulata fil-linji gwida dwar l-Għajnuna ambjentali,
huma wieħed mill-għodod biex tiġi implimentata l-inizjattiva
prinċipali “Ewropa li tuża r-Riżorsi b’Effiċjenza”. Il-possibilità
li jingħata appoġġ lit-taħriġ permezz tal-fondi
tal-Istat tagħti kontribut lill-objettivi tal-"Aġenda
għall-ħiliet ġodda u l-impjiegi”. Il-linji gwida dwar
is-salvataġġ u r-ristrutturar jippermettu li tingħata
għajnuna mill-Istat lil kumpaniji fi kriżi b'kundizzjonijiet stretti
u jekk ir-riżultat ikun li l-kumpanija terġa' ssir vijabbli fuq tul
ta' żmien twil, billi l-impriżi ineffiċjenti
jitħeġġu joħorġu u dawk f'kompetizzjoni globali
jittieħdu fi ħdanha, b’kontribut lejn “Politika industrijali
għall–era tal-globalizzazzjoni”. Ir-rabta bejn l-għanijiet
tal-Ewropa 2020 u l-inizjattivi prinċipali fuq naħa waħda,
u r-regoli dwar l-għajnuna mill-Istat fuq in-naħa l-oħra,
għandhom jiġi żviluppati iktar biex l-istrumenti tal-Kummissjoni
jiġu ssimplifikati u l-Istati Membri jitħeġġu biex jiddirezzjonaw
ir-riżorsi pubbliċi lejn il-prijoritajiet komuni. 14. Billi ssir enfasi fuq
il-kwalità u l-effiċjenza tal-appoġġ pubbliku, il-kontroll
tal-għajnuna mill-Istat jista’ wkoll jgħin lill-Istati Membri biex
isaħħu d-dixxiplina baġitarja u jtejbu l-kwalità tal-finanzi
pubbliċi – li jirriżulta f'użu aħjar tal-flus
tal-kontribwenti. Dan għandu importanza partikolari sabiex tintlaħaq
konsolidazzjoni fiskali intelliġenti, b'rikonċiljazzjoni tar-rwol,
fil-ħolqien tat-tkabbir, tal-infiq pubbliku mmirat mal-ħtieġa li
jiġu kkontrollati l-baġits. Għaldaqstant jeħtieġ ukoll
li l-proċedura tas-Simestru tal-UE jkun fiha kontroll tal-għajnuna
mill-Istat u iktar preokkupazzjonijiet dwar il-kompetizzjoni ġenerali. 15. Jeħtieġ ukoll li
jkun hemm kontroll qawwi tal-għajnuna mill-Istat biex ikun żgurat li
s-suq uniku jiffunzjona sew. Dan il-kontroll qawwi jimxi id f’id
mal-implemetazzjoni effettiva tar-regoli tas-suq intern tal-UE u huwa ta'
rilevanza partikolari fi swieq li għadhom kif infetħu u fejn atturi
kbar li jkunu diġà preżenti u jkunu megħjuna mill-Istat ikun
għad għandhom rwol ewlieni x’jaqdu, bħat-trasport, is-servizzi
postali jew, f’każijiet iktar limitati, l-enerġija. Il-modernizzazzjoni
tal-għajnuna mill-Istat tista’ ttejjeb il-funzjonament tas-suq intern permezz
ta’ politika aktar effikaċi mmirata lejn l-illimitar tat-tfixkil
fil-kompetizzjoni, iż-żamma ta’ kundizzjonijiet ugwali u
l-ġlieda kontra l-protezzjoniżmu. Dan ir-rwol tal-għajnuna
mill-Istat issa huwa iktar importanti peress li jeħtieġ li l-potenzjal
kollu tas-suq intern jiġi mmobilizzat għat-tkabbir. 16. L-ambjent globali joħloq
sfidi u opportunitajiet għall-kumpaniji Ewropej. Fid-dinja kollha
jeżistu sistemi differenti ta' regoli dwar il-kompetizzjoni. Meta tqabbel,
ir-regoli tal-UE dwar l-għajnuna mill-Istat joffru qafas iktar
trasparenti, koerenti u orjentat lejn it-tkabbir, filwaqt li jippermettu
livelli kumparabli ta’ għajnuna[4].
Qafas tal-UE dwar l-għajnuna mill-Istat li jiffoka dejjem iktar fuq
it-titjib tal-għanijiet tat-tkabbir filwaqt li jiżgura li s-suq
intern jiffunzjona sew, għandu jtejjeb il-kompetittività tal-kumpaniji
tal-UE anki barra mill-UE. 17. Fiċ-ċirkostanzi
speċifiċi li s-sussidji mogħtija minn pajjiż terz ikunu se
jwasslu għal tfixkil fil-kompetizzjoni, ir-regoli tal-Organizzazzjoni
Dinjija tal-Kummerċ (WTO) jipprovdu qafas bażiku li joffri rimedju
għall-konsegwenzi speċifiċi ta’ sussidji barranin illegali li
jġarrbu l-operaturi tal-UE. Barra minn hekk, il-Ftehimiet bilaterali
tal-Kummerċ Ħieles iffirmati mill-UE ma’ pajjiżi terzi
jistgħu jinkludu wkoll regoli dwar is-sussidji li jittrattaw kwistjonijiet
speċifiċi li mhumiex koperti mill-qafas tad-WTO (pereżempju
l-Ftehim dwar il-Kummerċ Ħieles mal-Korea). L-istrumenti tal-politika
kummerċjali jistgħu jintużaw biex jiġu implimentati dawk
id-dixxiplini. 18. Il-proposti
tal-modernizzazzjoni tal-għajnuna mill-Istat li jikkontribwixxu
għall-għan tat-tkabbir huma: (a)
L-identifikazzjoni u d-definizzjoni ta' prinċipji
komuni applikabbli għall-valutazzjoni tal-kompatibbiltà
tal-miżuri ta’ għajnuna kollha mwettqa mill-Kummissjoni; prinċipji
orizzontali bħal dawn jiċċaraw il-mod ta’ kif il-Kummissjoni
tivvaluta l-karatteristiċi komuni li bħalissa mhumiex trattati
bl-istess mod fil-linji gwida u l-oqfsa differenti kollha; dawk
il-prinċipji għandhom ikunu kemm jista’ jkun operattivi u kapaċi
jittrattaw id-definizzjoni u l-valutazzjoni ta' nuqqasijiet ġenwini
tas-suq, l-effett ta' inċentiv u l-effetti negattivi tal-interventi
pubbliċi, inklużi, potenzjalment, il-kunsiderazzjonijiet dwar
l-impatt globali tal-għajnuna. (b)
Ir-reviżjoni u s-simplifikazzjoni tal-linji
gwida dwar l-għajnuna mill-Istat, biex isiru
konsistenti ma’ dawk il-prinċipji komuni. Ir-reviżjoni se ssegwi
metodu ġenerali msejjes fuq it-tisħiħ tas-suq intern, li
jippromwovi iktar effikaċja fl-infiq pubbliku (l-użu
tal-għajnuna mill-Istat biss meta tirrappreżenta valur miżjud
reali); definizzjoni iktar ċara tan-nuqqasijiet tas-suq li
jeħtieġ li jiġu indirizzati u iktar skrutinju tal-effett ta’
inċentivi għandu jkollhom rwol importanti f’dak il-kuntest, sabiex
ikun żgurat li jkun hemm valur għall-flus u jiġi evitat
it-tfixkil. Valutazzjoni iktar sistematika tal-effetti negattivi potenzjali
tal-għajnuna mill-Istat – notevolment f’termini ta’ tfixkil
fl-effiċjenza allokattiva u dinamika, jeħtieġ li jissegwew ukoll
il-kompetizzjoni għas-sussidji u l-poter fis-suq. Għaldaqstant,
pereżempju, il-Linji Gwida riveduti dwar is-Salvataġġ u
r-Ristrutturar ta’ impriżi mhux finanzjarji se jsiru strument importanti
ħafna biex tiġi kkontrollata dik it-tip ta’ għajnuna li
toħloq tfixkil kbir, sabiex ikun żgurat li l-Istat iwaqqaf
il-proċess ta’ ħruġ mis-suq biss meta jkun verament
ġustifikat. Bl-istess mod, meta l-kundizzjonijiet tas-suq jippermettu, se
jiġu stipulati sensiela ġdida ta' regoli dwar is-salvataġġ
u r-ristrutturar tal-istituzzjonijiet finanzjarji għas-sitwazzjoni ta’
wara l-kriżi, li jkunu konsistenti mal-proposti tal-UE fil-futur dwar
il-ġestjoni u r-riżoluzzjoni tal-kriżijiet. Fl-aħħar
nett, l-identifikazzjoni tal-aħjar prattiki fir-rigward tal-prijoritajiet
ta’ nfiq ta' Ewropa 2020 għandha tippermetti li l-għajnuna li
tkun kosteffettiva u ttejjeb it-tkabbir tiġi approvata malajr. Fir-rigward
tas-simplifikazzjoni, fi stadju primarju, diversi linji gwida, fosthom linji
gwida għall-Għajnuna Reġjonali, ir-Riċerka u
l-Iżvilupp u l-Innovazzjoni, l-Għajnuna ambjentali, il-Kapital
tar-Riskju u l-Broadband (tipi ta’ għajnuna li jirrappreżentaw iktar
minn żewġ terzi tal-għajnuna mogħtija fl-UE), jistgħu
jiġu allinjati u possibilment konsolidati mal-prinċipji komuni
sal-aħħar tal-2013. Dan jista’ anki jippermetti t-tiftix ta’
sinerġiji bejn reġimi differenti ta’ għajnuna u l-issodisfar ta’
għanijiet multipli. L-adozzjoni individwali ta’ kull linja gwida se
sseħħ progressivament u bla dewmien matul dan il-perjodu. Niffukaw
l-infurzar fuq il-każijiet li għandhom l-ikbar impatt fuq is-suq
intern 2.2. Niffukaw l-infurzar fuq
il-każijiet li għandhom l-ikbar impatt fuq is-suq intern 19. Il-mixja
lejn infiq iktar effiċjenti ma għandhiex tirriżulta
f’mikrokontroll tan-nefqa pubblika kollha, iżda pjuttost fi
prijoritizzazzjoni u f’iktar skrutinju tal-għajnuna b’impatt sinifikanti
fuq is-suq uniku, inkluż dawk il-miżuri li jkopru l-għajnuna
kbira b’potenzjal ta’ tfixkil, inkluż l-għajnuna fiskali.
Parallelament, l-analiżi tal-każijiet ta’ natura iktar lokali u
b’effett żgħir fuq il-kummerċ għandhom jiġu
ssimplifikati. Dak l-eżitu jista’ jinkiseb billi jiġu definiti regoli
iktar proporzjonati u divrenzjati u billi l-proċeduri ta’ kontroll
tal-għajnuna mill-Istat jiġu modernizzati, b’iktar responsabilità fuq
l-Istati Membri biex ifasslu u jimplimentaw miżuri ta’ appoġġ. Dan
se jirrikjedi li r-regoli jiġu definiti aħjar u li l-Kummissjoni
ttejjeb il-monitoraġġ li jsir minnha wara biex tiżgura li jkun
hemm konformità xierqa. Dan se jnaqqas ukoll il-piż amministrattiv fuq
l-awtoritajiet pubbliċi u fuq il-benefiċjarji meta jkunu involuti
ammonti iżgħar ta’ għajnuna. 20. Il-proposti
tal-modernizzazzjoni tal-għajnuna mill-Istat li jikkontribwixxu
għall-għan ta' prijoritizzazzjoni huma: (a)
il-possibilità ta’ reviżjoni tar-Regolament
de minimis, fuq il-bażi ta’ studju tal-impatt dettaljat, b’kont
meħud tas-sitwazzjoni fl-Istati Membri kollha u fis-suq uniku b'mod
ġenerali, kif ukoll l-implikazzjonijiet baġitarji ta' reviżjoni
bħal din, sabiex jiġi eżaminat jekk il-limitu attwali
għadux jikkorrispondi għall-kundizzjonijiet tas-suq; (b)
il-possibilità ta’ tibdil fir-Regolament ta’
Awtorizzazzjoni tal-Kunsill biex il-Kummissjoni tkun tista’ tiddikjara li
ċerti kategoriji ta’ għajnuna jkunu kompatibbli mas-suq intern u
għalhekk ikunu eżenti milli jiġu notifikati minn qabel. Sussegwentement
dan għandu jippermetti li jkun hemm żieda fit-tipi ta’ għajnuna
li, skont l-esperjenza tal-Kummissjoni, ikunu jistgħu jibbenefikaw minn
kontroll issimplifikat bħal dan, mingħajr ma tiddgħajjef
is-superviżjoni effiċjenti mill-Kummissjoni u l-monitoraġġ
li jsir wara. Dawk it-tipi ġodda ta’ għajnuna li jistgħu jkunu
koperti mir-Regolament ta’ Awtorizzazzjoni jistgħu jinkludu,
pereżempju: għajnuna għall-kultura; għajnuna
għall-ħsara kkawżata minn diżastri naturali; għajnuna
(parzjali) għal proġetti ffinanzjati mill-UE bħal
pereżempju JESSICA; u oħrajn. (c)
reviżjoni u l-possibilità ta’ estensjoni tar-Regolament
għal Eżenzjoni Ġenerali Sħiħa fir-rigward
tal-kategoriji ta’ għajnuna koperti mir-Regolament ta’ Awtorizzazzjoni
rrivedut, sabiex jingħata kontribut biex ir-riżorsi pubbliċi
jiġu direzzjonati aħjar lejn ċerti għanijiet stabbiliti sew
filwaqt li jiġi ssimplifikat il-proċess amministrattiv ta’
miżuri mfassla sew b’ammont relattivament baxx ta’ għajnuna. 21. Jekk il-Kummissjoni
tiddeċiedi li żżid id-daqs u l-firxa ta' miżuri ta'
għajnuna li jkunu eżenti mill-obbligu ta' notifika, jiżdiedu
r-responsabilitajiet tal-Istati Membri biex jiżguraw li l-infurzar
tar-regoli dwar l-għajnuna mill-Istat isir korrettement. B’iktar
miżuri eżenti mir-rekwiżit ta’ notifika, l-Istati Membri se
jkollhom jiżguraw li jkun hemm konformità minn qabel mar-regoli dwar
l-għajnuna mill-Istat fil-każ ta’ miżuri de minimis u
skemi u każijiet ta' eżenzjonijiet ġenerali, b'koordinazzjoni
stretta mal-Kummissjoni li tkompli teżerċita kontroll ta’ wara fuq
dawn il-miżuri. Il-Kummissjoni se tistenna li jkun hemm kooperazzjoni
aħjar min-naħa tal-Istati Membri f’termini ta’ kwalità u puntwalità
fis-sottomissjoni ta’ informazzjoni u fit-tħejjija tan-notifiki, kif ukoll
li jkun hemm sistemi nazzjonali effettivi (inkluż infurzar privat) li
jiżguraw li l-miżuri ta' għajnuna mill-Istat li jkunu
eżenti minn notifika minn qabel ikunu jikkonformaw mal-liġi tal-Unjoni.
Jista’ jkun hemm inqas piż amministrattiv minħabba inqas obbligi ta’
notifika biss jekk dan ikun akkumpanjat minn żieda fl-impenn u
fir-riżultati min-naħa tal-awtoritajiet nazzjonali f’termini ta’
konformità. Konsegwentement, il-kontrolli li tagħmel il-Kummissjoni wara
se jkollhom jiżdiedu, anki peress li r-riżultati attwali
tal-monitoraġġ tal-implimentazzjoni mill-Istati Membri
tal-miżuri suġġetti għal eżenzjoni ġenerali qed
juri li spiss ikun hemm nuqqas ta’ konformità mar-regoli dwar l-għajnuna mill-Istat.
B’dan il-mod jista' jkun żgurat li l-infurzar ikun effikaċi. 2.3. Simplifikazzjoni tar-regoli u
teħid ta’ deċiżjonijiet iktar malajr 22. Maż-żmien, ir-regoli
dwar l-għajnuna mill-Istat żviluppaw f'qafas legali kumpless. Hemm
lok biex ir-regoli jiġu ċċarati u ssimplifikati, tiżdied
il-konsistenza u jiġi ssimplifikat il-proċess ta’ valutazzjoni. Hemm
bżonn li jiġu spjegati aħjar il-kunċetti tal-għajnuna
mill-Istat u jiġu kkonsolidati r-regoli orizzontali u sostantivi
tagħna. 23. Il-Kummissjoni hija obbligata
li teżamina l-allegazzjonijiet kollha dwar għajnuna potenzjali
mingħajr ma tkun kapaċi tistabbilixxi fil-prattika prijoritajiet
fl-indirizzar tal-ilmenti. Barra minn hekk, il-Kummissjoni mhux dejjem tkun
f'pożizzjoni li tikseb mingħand il-partijiet informazzjoni kompleta u
korretta, u dan jista’ jtawwal il-proċeduri. Hemm bżonn li jiġu
ssimplifikati u rriformati l-proċeduri sabiex id-deċiżjonijiet
jittieħdu f’perjodi ta’ żmien rilevanti għan-negozju,
b’kooperazzjoni mill-qrib mal-Istati Membri. L-elementi tal-pakkett li
jikkontribwixxu għal dak l-għan huma: (a)
kjarifika u spjegazzjoni aħjar tal-kunċett
tal-għajnuna mill-Istat: il-kunċett ta’ għajnuna huwa
kunċett oġġettiv iddefinit direttament mit-Trattat
fl-Artikolu 107 bħala kwalunkwe miżura li tirriżulta
f’intervent mill-Istat jew permezz ta’ riżorsi tal-Istat, li jkollu effett
fuq il-kummerċ bejn l-Istati Membri, li jagħti vantaġġ li
min jirċevih u li jwassal għal distorsjoni jew jhedded li jwassal għal
distorsjoni għall-kompetizzjoni. Ir-rwol tal-Kummissjoni f’dak ir-rigward
huwa limitat għall-għoti ta' kjarifika dwar kif hi tifhem u tapplika
d-dispożizzjonijiet tat-Trattat, kif interpretati mill-Qorti
tal-Ġustizzja. F’dawk il-limiti, il-Kummissjoni se tipprovdi kjarifika
ulterjuri dwar il-kunċetti prinċipali relatati mal-kunċett ta'
għajnuna bl-għan li tikkontribwixxi għal implimentazzjoni iktar
sempliċi; (b)
Modernizzazzjoni tar-Regolament Proċedurali
dwar l-għajnuna mill-Istat f’dak li jirrigwarda t-trattament
tal-ilmenti u l-għodod ta’ informazzjoni tas-suq, sabiex il-Kummissjoni
tkun tista’ tiffoka l-azzjoni tagħha aħjar fuq każijiet li huma
l-iktar rilevanti għas-suq intern. Dan jirrikjedi li l-Kummissjoni tkun
tista’ tistabbilixxi prijoritajiet għat-trattament tal-ilmenti, sabiex
tipprijoritizza allegazzjonijiet ta' għajnuna potenzjali li jkollha impatt
kbir fuq il-kompetizzjoni u l-kummerċ fis-suq intern. Parallelament,
sabiex il-Kummissjoni tkun tista' tinvestiga b'effiċjenza każijiet
ta' għajnuna b’impatt sinifikati, għandu jkollha għodod iktar
effiċjenti biex tikseb l-informazzjoni kollha meħtieġa
mill-parteċipanti fis-suq minn kmieni sabiex tkun tista' tieħu
deċiżjonijiet f'perjodu ta' żmien rilevanti għan-negozju. Dawn
il-proċeduri ta’ modernizzazzjoni jippermettu wkoll li l-Kummissjoni twettaq
investigazzjonijiet b’inizjattiva tagħha stess dwar tfixkil sinifikanti
fil-kompetizzjoni li jxekkel is-suq intern. Għandhom jippermettu wkoll li
ssir verifika malajr tal-effetti fuq is-suq ta' miżuri li jippermettu li
d-deċiżjonjiet jittieħdu iktar malajr. 3. il-passi li jmiss 24. Il-modernizzazzjoni
tal-għajnuna mill-Istat kif deskritta hawn fuq għandha
tirriżulta f'arkitettura aktar ċara u koerenti tal-kontroll
tal-għajnuna mill-Istat. Il-miżuri potenzjali varji deskritti hawn
fuq jikkostitwixxu elementi integrati ta’ pakkett wieħed ta’ riforma. 25. Għalhekk, il-miżuri
potenzjali deskritti hawn fuq jaħdmu flimkien biex jiksbu l-għanijiet
ta' livell għoli – huma jappoġġaw lil xulxin u huma
interdipendenti. Pereżempju, il-miżuri proċedurali possibbli li
qed jiġu suġġeriti hawn fuq għandhom jippermettu li
d-deċiżjonijiet jittieħdu b’iktar ħeffa u jippermettu
lill-Kummissjoni li tiffoka l-infurzar tagħha fuq l-affarijiet l-iktar
importanti fuq il-livell tal-UE. L-istess loġika tapplika
għat-twessigħ tal-kamp ta’ applikazzjoni tar-Regolament għal
Eżenzjoni Ġenerali Sħiħa permezz ta' modifika
tar-Regolament ta’ Awtorizzazzjoni. 26. Fid-dawl ta' dik
l-interdipendenza bejn l-għanijiet u l-elementi tal-pakkett, u sabiex
jinkiseb il-massimu possibbli mir-riżultati tal-modernizzazzjoni
tal-għajnuna mill-Istat, huwa mixtieq ukoll li l-elementi prinċipali
tar-riforma jidħlu fis-seħħ fl-istess ħin. Għaldaqstant
il-proċessi differenti se jibdew mill-adozzjoni ta’ din il-Komunikazzjoni,
u l-istrumenti prinċipali tal-pakkett, inklużi l-atti tal-Kunsill,
għandhom jiġu adottati sal-aħħar tal-2013. 27. Biex tintlaħaq din
il-mira, il-proposti tal-Kummissjoni għar-Regoli ta’ Proċedura u ta’
Awtorizzazzjoni għandhom jiġu adottati fil-ħarifa tal-2012. Il-Kummissjoni
se timmira li tiżviluppa l-bqija tal-pakkett matul ix-xhur li ġejjin
bil-ħsieb li l-atti tal-Kummissjoni u l-linji gwida prinċipali
jiġu riveduti u ssimplifikati progressivament sal-aħħar
tal-2013. Il-Kummissjoni għandha l-ħsieb li tikkonsulta lill-Istati
Membri u tibda djalogu miftuħ mal-Parlament Ewropew u ma’ partijiet
interessati oħrajn, bl-għan li tiġbor informazzjoni biex isir
dibattitu dwar il-proposti għall-modernizzazzjoni tal-għajnuna
mill-Istat. [1] Dan jimplika wkoll l-eliminazzjoni gradwali tas-sussidji
li jwasslu għal użu ineffiċjenti ta’ riżorsi jew ħsara
ambjentali f’konformità mal-Komunikazzjoni tal-Kummissjoni “Pjan Direzzjonali
għal Ewropa b'Użu Effiċjenti tar-Riżorsi”,
COM(2011) 571 finali, p. 10. [2] Ħarsa ġenerali lejn in-nefqa pubblika
għall-għajnuna mill-Istat tinsab fit-“Tabella ta’ Valutazzjoni dwar
l-Għajnuna mill-Istat - Rapport dwar l-għajnuna mill-Istat
mogħtija mill-Istati Membri tal-UE”, COM(2011) 848 finali. [3] Komunikazzjoni mill-Kummissjoni “Ewropa 2020 –
Strateġija għal tkabbir intelliġenti, sostenibbli u
inklużiv”, COM(2010) 2020 finali, 3.3.2010, p. 20. [4] Studju komparattiv imwettaq mid-WTO fl-2006
jissuġġerixxi li l-livell ta’ għajnuna mogħti lill-Istati
Membri tal-UE huwa paragunabbli mal-livelli mogħtija mill-imsieħba
kummerċjali ewlenin tal-UE. Ara r-Rapport tal-World Trade
Organization tal-2006 “Exploring the links between subsidies, trade
and the WTO.” http://www.wto.org/english/res_e/booksp_e/anrep_e/world_trade_report06_e.pdf.
Ara Taqsima II“Subsidies, Trade and the WTO”, Kapitolu E “The
Incidence of Subsidies”.