OPINJONI TAL-KUMMISSJONI

dwar abbozz ta’ deċiżjoni tal-Kunsill Ewropew favur li jiġu eżaminati l-emendi proposti tat-Trattati dwar iż-żieda ta' Protokoll dwar l-applikazzjoni tal-Karta tad-Drittijiet Fundamentali tal-Unjoni Ewropea għar-Repubblika Ċeka

IL-KUMMISSJONI EWROPEA,

Wara li kkunsidra t-Trattat dwar l-Unjoni Ewropea, u b'mod partikolari l-Artikolu 48(3) tiegħu,

Billi:

(1)       Fil-laqgħa tal-Kunsill Ewropew fid-29 u t-30 ta’ Ottubru 2009 il-Kapijiet ta’ Stat jew tal-Gvern, wara li qiesu l-pożizzjoni meħuda mir-Repubblika Ċeka, qablu li, fil-mument tal-konklużjoni tat-Trattat tal-Adeżjoni li jmiss, it-Trattati għandhom ikunu emendati fis-sens li mat-Trattat dwar l-Unjoni Ewropea (TUE) u t-Trattat dwar il-Funzjonament tal-Unjoni Ewropea (TFUE) jiġi mehmuz Protokoll dwar l-applikazzjoni tal-Karta tad-Drittijiet Fundamentali tal-Unjoni Ewropea għar-Repubblika Ċeka. Dak il-Protokoll għandu jipprovdi li l-Protokoll Nru 30 dwar l-applikazzjoni tal-Karta tad-Drittijiet Fundamentali tal-Unjoni Ewropea għall-Polonja u għar-Renju Unit japplika wkoll għar-Repubblika Ċeka. F’dak ir-rigward, il-Kunsill Ewropew fakkar li d-dħul fis-seħħ tat-Trattat ta’ Lisbona jirrikjedi r-ratifika minn kull wieħed mis-27 Stat Membru skont ir-rekwiżiti kostituzzjonali rispettivi tagħhom u saħaq mill-ġdid fuq id-determinazzjoni tiegħu biex jara li t-Trattat jidħol fis-seħħ sa tmiem l-2009. Wara li ġie rratifikat mir-Repubblika Ċeka fit-13 ta’ Novembru 2009, it-Trattat ta’ Lisbona daħal fis-seħħ fl-1 ta’ Diċembru 2009.

(2)       Fil-5 ta’ Settembru 2011, il-Gvern Ċek ressaq proposta lill-Kunsill, skont l-Artikolu 48(2) tat-TUE, biex it-Trattati jiġu emendati biex jiddaħħal Protokoll dwar l-applikazzjoni tal-Karta tad-Drittijiet Fundamentali tal-Unjoni Ewropea għar-Repubblika Ċeka.

(3)       Il-President tal-Kunsill Ewropew kiteb lill-Kummissjoni fil-25 ta’ Ottubru 2011 fejn talab l-opinjoni tagħha dwar dik il-proposta.

(4)       F’konformità mal-ewwel subparagrafu tal-Artikolu 6(1) tat-TUE il-Karta tad-Drittijiet Fundamentali tal-UE għandu jkollhom l-istess valur legali bħat-Trattati. It-tieni subparagrafu tal-Artikolu 6(1) tat-TUE tiċċara li din il-Karta m’għandha bl-ebda mod testendi l-kompetenzi tal-Unjoni kif definiti mit-Trattati. F’konformità mal-Preambolu, il-Karta tafferma mill-ġdid, b’rigward debitu lejn il-kompetenzi u l-kompiti tal-Unjoni kif wkoll lejn il-prinċipju tas-sussidjarjetà, id-drittijiet kif jirriżultaw, b'mod partikolari, mit-tradizzjonijiet kostituzzjonali u mill-obbligi internazzjonali komuni għall-Istati Membri, il-Konvenzjoni Ewropea għall-Protezzjoni tad-Drittijiet tal-Bniedem u tal-Libertajiet Fundamentali, l-Karti Soċjali adottati mill-Unjoni u mill-Kunsill tal-Ewropa kif ukoll il-ġurisprudenza tal-Qorti tal-Ġustizzja tal-Unjoni Ewropea u tal-Qorti Ewropea tad-Drittijiet tal-Bniedem. Għandu l-għan li jsaħħaħ il-protezzjoni tad-drittijiet fundamentali billi dawk id-drittijiet isiru iktar viżibbli. F’konformità mal-Artikoli 51(1) tagħha, il-Karta hija “intiża għall-istituzzjonijiet, għall-korpi u għall-aġenziji tal-Unjoni fir-rispett tal-prinċipju ta' sussidjarjetà u għall-Istati Membri wkoll biss meta jkunu qed jimplimentaw il-liġi tal-Unjoni”.

(5)       L-Artikolu 1(1) tal-Protokoll Nru 30 jistipula li l-Karta ma testendix l-abbiltà tal-Qorti tal-Ġustizzja tal-Unjoni Ewropea, jew ta’ xi qorti jew tribunal tal-Istati Membri li l-Protokoll Nru 30 japplika għalihom, li jiddeċiedu li l-liġijiet, ir-regolamenti jew id-dispożizzjonijiet, prattiċi jew azzjonijiet amministrattivi tal-Istati Membri li tapplika għalihom ikunu inkonsistenti mad-drittijiet, il-libertajiet u l-prinċipji fundamentali li hija tafferma. F’konformità mal-Artikolu 1(2) tal-Protokoll Nru 30, xejn fit-Titolu IV tal-Karta ma joħloq drittijiet ġustizzjabbli applikabbli għall-Polonja u għar-Renju Unit, ħlief safejn dawn l-Istati Membri ikunu pprovdew tali drittijiet fil-liġi nazzjonali tagħhom. Fl-aħħarnett, l-Artikolu 2 tal-Protokoll Nru 30 jipprovdi li sa dak il-punt li dispożizzjoni tal-Karta tirreferi għall-prattiki u l-liġijiet nazzjonali, dan għandu japplika għall-Polonja jew għar-Renju Unit biss sal-punt li d-drittijiet jew il-prinċipji li jinsabu fih ikunu rikonoxxuti fil-liġijiet jew fil-prattiki ta’ dawn l-Istati Membri.

(6)       Il-Protokoll Nru 30 huwa bla ħsara għall-obbligi l-oħra tal-Polonja u tar-Renju Unit taħt it-Trattat dwar l-Unjoni Ewropea - u b’mod partikolari l-Artikolu 6(3) tiegħu, it-Trattat dwar il-Funzjonament tal-Unjoni Ewropea, u l-liġi tal-Unjoni b’mod ġenerali. F’dan ir-rigward għandu jiġi nnotat li hija biss il-Karta li tirrafferma d-drittijiet, il-libertajiet u l-prinċipji rikonoxxuti fl-Unjoni u li jagħmel dawk id-drittijiet aktar viżibbli. L-għan tal-Protokoll Nru 30 huwa li tiġi ċċarata l-applikazzjoni tal-Karta fejn jidħlu l-liġijiet u l-azzjoni amministrattiva ta’ dawn l-Istati Membri kif ukoll il-ġustizzjabbiltà tagħha f’dawn l-Istati Membri.

(7)       Il-Kummissjoni tinnota li l-ftehim fost il-Kapijiet ta’ Stat jew tal-Gvern fuq emenda tat-Trattati dwar iż-ieda ta’ Protokoll dwar l-applikazzjoni tal-Karta tad-Drittijiet Fundamentali tal-UE lir-Repubblika Ċeka ntlaħaq f’kuntest speċifiku.

TAT OPINJONI FAVOREVOLI

dwar abbozz ta’ deċiżjoni tal-Kunsill Ewropew favur li jiġu eżaminati l-emendi proposti tat-Trattati dwar iż-żieda ta' Protokoll dwar l-applikazzjoni tal-Karta tad-Drittijiet Fundamentali tal-Unjoni Ewropea għar-Repubblika Ċeka

Din l-opinjoni hija indirizzata lill-Kunsill Ewropew.