RAPPORT TAL-KUMMISSJONI LILL-KUNSILL

li jivvaluta l-progress irrappurtat mill-Italja lill-Kummissjoni u lill-Kunsill dwar l-irkupru tal-tal-imposta addizzjonali dovuta mill-produtturi tal-ħalib għall-perjodi 1995/96 sal-2001/02 (skont l-Artikolu 3 tad-Deċiżjoni tal-Kunsill Nru 2003/530/KE)

Dan ir-rapport ta' valutazzjoni qed isir mill-Kummissjoni skont l-Artikolu 3 tad-Deċiżjoni tal-Kunsill Nru 2003/530/KE tas-16 ta' Lulju 2003 dwar il-kompatibbiltà mas-suq komuni tal-għajnuna li r-Repubblika Taljana beħsiebha tagħti lill-produtturi tal-ħalib tagħha.

Skont l-Artikolu 1 ta' dik id-Deċiżjoni, l-għajnuna, li tikkonsisti f'pagament mir-Repubblika Taljana nfisha, tal-ammont dovut mill-produtturi tal-ħalib lill-Unjoni b'riżultat tal-imposta addizzjonali fuq il-ħalib għall-perjodu 1995/96 sal-2001/02, u billi tippermetti lil dawn il-produtturi jħallsu d-dejn tagħhom fil-forma ta' pagament diferit imqassam fuq għadd ta' snin mingħajr imgħax, hija meqjusa kompatibbli b’mod eċċezzjonali mas-suq komuni, bil-kundizzjoni li:

– il-produtturi jħallsu lura l-ammont kollu, f'pagamenti annwali tal-istess daqs, u

– il-perjodu ta' ripagament ma jaqbiżx l-erbatax-il (14) sena, li jibdew mill-1 ta' Jannar 2004.

Skont l-Artikolu 2 tad-Deċiżjoni, l-għajnuna tingħata biss bil-kundizzjoni li l-Italja tiddikjara l-imposta addizzjonali kollha għall-perjodi kkonċernati lill-FAEGG u billi tnaqqas id-dejn li jifdal permezz ta' tliet pagamenti annwali tal-istess daqs min-nefqa ffinanzjata mill-FAEGG għal Novembru 2003, Novembru 2004 u Novembru 2005 rispettivament.

Id-dikjarazzjoni mill-Italja tal-imposta addizzjonali totali għall-perjodi kkonċernati twettqet kif suppost permezz ta' ittra tas-26 ta' Awwissu 2003.

It-tnaqqis tad-dejn li jifdal sar kif suppost min-nefqa ffinanzjata mill-FAEGG għal Novembru 2003, 2004 u 2005.

L-Artikolu 3 tad-Deċiżjoni jeħtieġ li l-awtoritajiet kompetenti Taljani jirrappurtaw lill-Kummissjoni u lill-Kunsill kull sena dwar il-progress li jkunu għamlu fl-irkupru tal-ammont dovut mill-produtturi b'riżultat tal-imposta addizzjonali għall-perjodu 1995-96 sal-2001-02.

L-awtoritajiet Taljani ressqu s-seba’ rapport tagħhom skont din id-dispożizzjoni lill-Kummissjoni permezz ta' ittra mill-AGEA (Agenzia per le erogazioni in agricoltura) tal-31 ta' Ottubru 2011 li tikkonċerna l-ħlas parzjali tal-2010.

Pagament tal-imposta skont il-faċilità tal-pagament parzjali

Minn total ta' madwar 23 140 produttur li issa jridu jħallsu l-imposta għas-7 perjodi koperti bid-Deċiżjoni tal-Kunsill, imma li ngħataw ordni mill-qrati nazzjonali biex jitwaqqfu l-pagamenti sakemm tittieħed deċiżjoni finali, 15 433 minnhom għażlu li jħallsu permezz tal-iskema tal-pagament parzjali. L-għażla li jħallsu permezz tal-iskema tal-pagament parzjali fissret l-irtirar tal-litigazzjoni pendenti kollha. Barra minn hekk, jekk produttur jonqos milli jħallas xi wieħed mill-pagamenti parzjali fis-sena jiġi eskluż mill-iskema, u konsegwentement jesponi lill-produtturi fit-teħid tal-ammont kollu dovut bl-imgħax.

Il-15 433 produttur parteċipant kellhom jagħtu madwar EUR 345 miljun bejniethom fl-2004 qabel ma tħallas l-ewwel pagament parzjali, li jirrappreżenta madwar kwart mill-ammont kollu tal-imposta li għad trid titħallas fil-livell tal-produtturi. B'hekk jidher li l-maġġoranza tal-produtturi responsabbli għal-livelli aktar baxxi ta' kunsinni individwali eċċessivi għażlu li jidħlu f'din l-iskema. Min-naħa l-oħra, il-produtturi b’kunsinni individwali eċċessivi aktar sinifikanti, (madwar 8000 produttur li nħarġilhom kont minħabba li kienu għadhom iridu jagħtu madwar EUR 1 biljun f'imposta dovuta fuq is-seba' perjodi), minflok ippreferew li ma jidħlux fl-iskema ta' pagament parzjali. Madankollu, jekk jogħġbok innota li matul l-2010, l-awtoritajiet Taljani laqgħu madwar 69 applikazzjoni ġdida għal pagamenti parzjali, li kienu jammontaw għal bejn wieħed u ieħor EUR 1.2 miljun.

Is-seba' pagament parzjali kellu jitħallas minn 11 406 produttur għal ammont totali ta' EUR 24 331 454.59 qabel il-31 ta' Diċembru 2010. Il-verifiki li twettqu mill-awtoritajiet Taljani juru li matul l-2010, 10 802 produttur ħallsu kif xieraq l-ammonti f’total ta’ EUR 22 040 163.61. Dan ifisser li 95 % tal-produtturi ħallsu 90.5 % tal-imposti fil-ħin skont is-seba’ pagament parzjali. Kien ġie rreġistrat li l-ewwel, it-tieni, it-tielet, ir-raba' u l-ħames pagament parzjali kien sar fil-ħin għal 99.6 %, 97.9 %, 99.5 %, 99.7%, 96.4 % u 96.2% tal-ammonti dovuti rispettivament. Għalhekk, l-imposta kollha miġbura fl-ewwel seba’ pagamenti parzjali tammonta għal madwar EUR 175 miljun (madwar 98 % tal-ammont totali dovut).

Filwaqt li dawn il-livelli huma ċertament indikattivi tal-impenn min-naħa tal-produtturi parteċipanti fit-twettiq tal-obbligi tagħhom, il-Kummissjoni tqis li l-azzjoni ta' segwitu meħuda f'dawk il-każijiet fejn il-pagament ma sarx fil-limitu taż-żmien stipulat hija sinjal ċar tal-livell ta' impenn min-naħa tal-awtoritajiet sabiex jiżguraw li jitħarsu l-kundizzjonijiet tal-iskema kif suppost u li fl-aħħar nett tinġabar l-imposta kollha dovuta.

Fir-rigward tas-seba’ pagament parzjali, il-pagamenti ma ġewx identifikati għas-604 produtturi li fadal għal valur ta' EUR 2 291 279.38.

Għas-sitt perjodu tal-pagament parzjali 148 produttur naqsu milli jagħmlu l-pagament li jikkorrispondi għal EUR 921 417.20 sal-aħħar tal-2009. Skont informazzjoni li waslet mill-awtoritajiet Taljani, dawn il-każijiet kollha kienu notifikati mill-awtoritajiet ċentrali lill-awtoritajiet reġjonali rilevanti sabiex jiġi infurzat il-pagament tal-ammont sħiħ dovut mar-rata tal-imgħax 'il barra mill-iskema tal-faċilità tal-pagament parzjali.

Mill-148 produttur li għall-ewwel kienu maħsuba li ma ħallsux, wara ntwera li 23 minnhom biss kienu fil-fatt għadhom ma ħallsux. Dan irriżulta fir-revoka tal-possibbiltà li l-pagament jitħallas b'mod parzjali għal dawn il-produtturi u t-tnedija tal-proċeduri ta' rkupru infurzat.

Il-Kummissjoni bdiet ukoll proċedura ta’ għajnuna lill-Istat kontra l-Italja[1], fir-rigward ta’ decreto-legge Nru 255 tad-29 ta’ Diċembru 2010, approvata b’emendi bil-liġi Nru 10 tas-26 ta’ Frar 2011, li pposponiet l-iskadenza għall-pagament tal-imposti għall-kampanji tal-1995-1996 u 2001-2002 (mistenni bi prinċipju għall-31 ta’ Diċembru 2010 skont l-iskema tal-2003 approvata mid-Deċiżjoni tal-Kunsill Nru 2003/530/KE) sat-30 ta’ Ġunju 2011 (ara l-Artikolu 2(12k)). Tali posponiment huwa infatti f’kunflitt mal-Artikolu 1, l-ewwel inċiż tad-Deċiżjoni tal-Kunsill Nru 2003/530/KE, skont kif għandhom jitħallsu l-pagamenti fuq bażi ta' kull sena, u għalhekk jikkostitwixxi għajnuna ġdida u illegali tal-Istat skont it-tifsira tal-Artikolu 108(3) tat-TFUE.

Imposta dovuta għall-perjodi 1995-96 sal-2001-02 li ma ddaħħlitx fl-iskema tal-pagament parzjali

Saret referenza għall-fatt li l-faċilità tal-pagament parzjali ntużat relattivament ftit f'termini tal-ammont ta' imposta mdaħħla. Madwar tliet kwarti tal-ammonti kumplessivi li kien għad fadal mill-imposti mhux imħallsa għall-perjodu kkonċernat għadhom ma ddaħħlux fl-iskema tal-faċilità tal-pagament parzjali. L-imposta li mhix koperta bl-iskema tal-2003 tikkorrispondi (skont l-aħħar ċifri disponibbli minn April 2010) għal EUR 767 miljun, u madwar 91 % ta' dan l-ammont, jiġifieri madwar EUR 701 miljun, qiegħed minflok jiġi kkontestat fil-qrati Taljani.

Fir-rapporti preċedenti ta' valutazzjoni li kienu ppreżentati lill-Kunsill, il-Kummissjoni kienet tal-opinjoni li r-rapporti annwali ppreżentati mill-Italja għandhom jindirizzaw b'mod speċifiku l-kawżi marbuta mas-seba' perjodi kkonċernati u għandhom jipprovdu dettalji li jikkonfermaw il-pagament min-naħa tal-produtturi li tilfu l-kawża tagħhom fil-qorti. Mingħajr tali indikazzjonijiet, il-Kummissjoni mhijiex f'pożizzjoni li tagħmel monitoraġġ korrett tal-progress fil-ġbir ta' dik il-parti tal-imposta li ma ddaħħlitx fil-faċilità tal-pagament parzjali.

Madanakollu, ir-rapport dwar ir-seba’ ħlas ma fih l-ebda informazzjoni dwar dawn il-proċeduri tal-qorti.

Minkejja dan, xi informazzjoni addizzjonali li rċevew l-awtoritajiet Taljani f’April 2010 bħala risposta għal talba tal-Kummissjoni turi li l-amministrazzjoni Taljana kienet rebbieħa f'għadd ta' każijiet li jikkorrispondu għal madwar EUR 13 miljun. Il-ġabra attwali ta’ dawn l-ammonti tikkorrispondi għal EUR 6.8 miljun, u madwar EUR 580 miljun għadhom qed jiġu kkontestati quddiem il-qrati Taljani. B’dispjaċir, l-awtoritajiet Taljani naqsu milli jipprovdu, fil-komunikazzjoni tagħhom tat-2 ta' Frar 2011, iċ-ċifri aġġornati dwar dawn il-proċeduri tal-qorti . Rigward is-sistema introdotta fl-2009 ta' rimborż ta' imposti minħabba r-rata ta' interess daqs ir-rata ta' referenza għall-Unjoni miżjuda b'diversi punti ta' persentaġġ, 332 debitur ippreferew lilha (għal total ta' EUR 90.5 miljuni), filwaqt li 1774 debitur ma ppreferewhiex (għal total ta’ EUR 535 miljun).

Il-Kummissjoni tesprimi dispjaċir kbir li ma sarx biżżejjed progress fil-ġbir tal-parti tal-imposta li ma kinitx iddaħħlet fil-faċilità tal-pagament parzjali, u hija diżappuntata wkoll bil-livell ta' informazzjoni pprovduta mill-awtoritajiet Taljani, li mhuwiex suffiċjenti. Il-progress bil-mod huwa marbut kemm mat-tul tal-proċeduri tal-qorti kif ukoll, minħabba f'hekk, mat-tul tal-irkupru tas-somom fejn il-każijiet tal-qorti tlestew (ir-rapport Taljan dwar is-sitt pagament parzjali ma fihx informazzjoni dwar l-irkupru, iżda informazzjoni preċedenti mressqa bħala tweġiba għal talba tal-Kummissjoni turi li kienu nġabru biss xi EUR 6.8 miljun sal-2010 wara proċeduri tal-qorti li kellhom suċċess). Barra minn hekk, iċ-ċifri li jirrappreżentaw il-ġbir tal-imposta li fil-fatt qatt ma kienet ikkontestata, u għalhekk immedjatament rekuperabbli, jirriflettu nuqqas fil-proċess reali tal-ġbir (madwar EUR 18 miljun minn EUR 66 miljun imposta li qatt ma kienu kkontestati, sal-2010 għadhom ma nġabrux).

Il-Kummissjoni qed tkompli ssegwi mill-qrib il-proċess ta' rkupru fl-Italja, b’mod partikolari l-irkupru tal-imposta li mhijiex koperta mill-iskema tal-faċilità tal-pagament parzjali. F'diversi okkażjonijiet is-servizzi tal-Kummissjoni esprimew l-osservazzjonijiet tagħhom (inklużi r-rimarki negattivi) lill-awtoritajiet Taljani u talbu informazzjoni dettaljata dwar aspetti differenti li jikkonċernaw l-irkupru tal-imposta tal-ħalib u l-imġiba tal-awtoritajiet Taljani quddiem il-qrati Taljani.

Konklużjoni

Il-Kummissjoni tqis li l-progress li sar mill-awtoritajiet Taljani fl-irkupru tal-ammont dovut mill-produtturi li għażlu li jissieħbu fl-iskema tal-pagament parzjali approvata mill-Kunsill fl-2003 għall-perjodi 1995-96 sal-2001-02 juri l-ġestjoni relattivament xierqa tagħha. Madanakollu, is-servizzi tal-Kummissjoni nnutaw ukoll li l-ħlas tas-seba' pagament parzjali ġie rreġistrat fil-ħin għal 90.5%, li huwa l-aktar baxx fost is-seba’ pagamenti parzjali kollha (pagament fil-ħin tal-ewwel, it-tieni, it-tielet, ir-raba’, il-ħames, u s-sitt pagament parzjali qabel kienu ġew irreġistrati għal 99.6%, 97.9%, 99.5%, 99.7%, 96.4% u 96.2% tal-ammonti dovuti rispettivament). Barra minn hekk, il-Kummissjoni tiddeplora li fl-assenza ta’ kwalunkwe indikazzjoni ta’ ammonti li effettivament inġabru mingħand produtturi parteċipanti li naqsu milli jagħmlu pagamenti parzjali u li b'hekk ġew esklużi minn aktar parteċipazzjoni, mhix f'pożizzjoni li tivvaluta d-diliġenza użata jew il-progress li sar fil-ġbir ta' imposta korrispondenti. Il-Kummissjoni titlob, kif diġà esprimiet f’rapporti ta’ stima preċedenti, li huwa indispensabili li rapporti futuri mill-awtoritajiet Taljani jkun fihom informazzjoni dettaljata suffiċjenti dwar tali ġabra.

Rigward l-ammonti ta’ imposta li ma ddaħħlux fl-iskema ta’ pagamenti parzjali u rigward il-litigazzjoni li qed titwettaq quddiem il-qrati Taljani, il-Kummissjoni diġà stqarret, fir-rapporti ta’ stima ppreżentati lill-Kunsill fl-2010 u l-2011, in-nuqqas ta’ sodisfazzjon tagħha rigward il-progress bil-mod ħafna fl-irkupru tal-imposti tal-kwota tal-ħalib, u kkunsidrat li l-irkupru tal-imposti b'dan il-mod jeħtieġ li jittejjeb b'mod sinifikanti.

Fin-nuqqas ta’ informazzjoni biżżejjed dettaljata mill-awtoritajiet Taljani, kif imsemmi hawn fuq, il-Kummissjoni mhix f’pożizzjoni sabiex timmonitorja l-progress kif xieraq fil-ġbir tal-parti ta’ dik l-imposta li ma kinitx iddaħħlet fil-faċilità tal-pagament parzjali. Madanakollu, xi informazzjoni limitata li waslet fi Frar 2012 mill-awtoritajiet Taljani turi li – minkejja xi titjib – l-ebda żvilupp ewlieni ġdid ma ġie nnutat u l-effettività tal-liġi tal-UE f’dan il-każ hija ’l bogħod ħafna milli tinkiseb b’ammont daqshekk kbir ta’ imposti li tul perjodu daqshekk twil ta’ żmien għadhom ma tħallsux. Il-Kummissjoni tistenna – kif diġà ntalab fir-rapporti ta’ stima preċedenti – li r-rapporti annwali futuri jiddokumentaw l-evoluzzjoni tal-litigazzjoni esperjenzata fil-perjodi 1995/96 sal-2001/02 u l-2003/04 sa l-2008/09, u l-eżekuzzjoni ta’ ġudizzji finali li jikkonfermaw l-imposta dovuta.

[1]               SA.33726