18.4.2012   

MT

Il-Ġurnal Uffiċjali tal-Unjoni Ewropea

C 113/40

—

jilqa’ b’sodisfazzjon il-benefiċċji reali tad-Direttiva iżda huwa diżappuntat li la d-Direttiva dwar l-Istorbju Ambjentali (DIA) u lanqas ir-rapport dwar l-implimentazzjoni tagħha ma jagħmel referenza speċifika għall-awtoritajiet lokali u reġjonali u r-rwol kruċjali li jaqdu fil-ġlieda kontra l-istorbju eċċessiv;

—

jinnota li t-tniġġis mill-istorbju huwa primarjament problema lokali, iżda li essenzjalment teħtieġ soluzzjoni Ewropea, u għaldaqstant jappella biex l-UE tiżviluppa politika Ewropea ambizzjuża dwar l-emissjonijiet tal-istorbju, fil-forma ta’ miżuri Ewropej li jindirizzaw il-problema fis-sors;

—

jipproponi li, wara valutazzjoni fil-fond tal-impatt fuq l-awtoritajiet lokali u reġjonali, il-Kummissjoni tistabbilixxi valuri ta’ intervent jew ta’ mira bbażati fuq ir-rakkomandazzjonijiet tas-saħħa tad-WHO;

—

jenfasizza l-bżonn ta’ rabtiet u komplementarjetà u li jimtlew il-lakuni leġislattivi bejn l-istrumenti leġislattivi differenti li jirregolaw il-materjali assoċjati mal-istorbju mis-sors, b’mod speċifku fir-rigward ta’ vetturi, b’mod speċjali karozzi u trakkijiet, toroq, linji ferrovjarji u ajruporti billi jitfassal qafas legali globali;

—

jenfasizza l-importanza li l-awtoritajiet reġjonali u lokali jingħataw l-appoġġ finanzjarju u l-gwida teknika li għandhom bżonn u li jadottaw miżuri komplementari fil-livell nazzjonali u f’dak tal-UE sabiex jimplimentaw il-politika tal-UE dwar it-tniġġis mill-istorbju;

—

jitlob li l-kwistjonijiet relatati mal-istorbju u mat-tniġġis mill-istorbju jiġu inkorporati fil-politiki u l-inizjattivi rilevanti kollha, b’mod partikolari fis-Seba’ Programm ta’ Azzjoni għall-Ambjent tal-ġejjieni u t-tieni Pjan ta’ Azzjoni għall-Ambjent u s-Saħħa, kif ukoll fl-inizjattivi tat-trasport sostenibbli li jagħmlu parti mill-programmi ta’ żvilupp reġjonali tal-UE u mill-politiki tal-ġestjoni tat-territorju;

—

jissuġġerixxi li l-Kummissjoni testendi l-kunċett ta’ governanza f’diversi livelli għal oqsma oħra bħall-istorbju. Il-Patt tas-Sindki jista’ jkun il-punt ta’ riferiment f’dan ir-rigward.

Relatur

José MACÁRIO CORREIA (PT/PPE), Sindku ta’ Faro

Dokument ta’ referenza

Rapport mill-Kummissjoni lill-Parlament Ewropew u lill-Kunsill dwar l-implimentazzjoni tad-Direttiva dwar l-Istorbju Ambjentali skont l-Artikolu 11 tad-Direttiva 2002/49/KE

COM(2011) 321 final

1.

jenfasizza l-importanza tal-ġlieda kontra t-tniġġis mill-istorbju u l-iżvilupp tal-politika Ewropea dwar l-istorbju adottata fil-25 ta’ Ġunju 2002 fil-forma tad-Direttiva 2002/49/KE tal-Parlament Ewropew u tal-Kunsill, magħrufa bħala d-Direttiva dwar l-Istorbju Ambjentali (DIA);

2.

jilqa’ b’sodisfazzjon il-benefiċċji reali tad-Direttiva f’termini ta’ tfassil ta’ mapep tal-istorbju, it-twaqqif ta’ indikaturi komuni, il-valutazzjoni ta’ kemm il-popolazzjoni tal-UE hija esposta għall-istorbju u t-twaqqif ta’ korpi kompetenti sabiex ifasslu pjani ta’ azzjoni;

3.

jilqa’ b’sodisfazzjon ir-rapport tal-Kummissjoni dwar l-implimentazzjoni tad-Direttiva bħala punt tat-tluq tajjeb għar-reviżjoni li hemm bżonn tad-DIA;

4.

jiddispjaċih li ċerti Stati Membri ma bagħtux il-mapep tal-istorbju tagħhom fil-limitu ta’ żmien stabbilit u li kellha titnieda proċedura ta’ ksur fil-każ ta’ Malta;

5.

jinsab diżappuntat li la d-DIA u lanqas ir-rapport dwar l-implimentazzjoni tagħha ma jagħmel referenza speċifika għall-awtoritajiet lokali u reġjonali u jenfasizza r-rwol kruċjali li dawn għandhom fil-ġlieda kontra l-istorbju eċċessiv; għaldaqstant jixtieq li jkun involut bis-sħiħ fl-iżvilupp ta’ politiki futuri;

6.

jinnota li t-tniġġis mill-istorbju huwa primarjament problema lokali, iżda li essenzjalment teħtieġ soluzzjoni Ewropea, u għaldaqstant jappella biex l-UE tiżviluppa politika Ewropea ambizzjuża dwar l-emissjonijiet tal-istorbju, fil-forma ta’ miżuri Ewropej li jindirizzaw il-problema fis-sors;

7.

jenfasizza mill-ġdid il-bżonn li jiġu stabbiliti objettivi sabiex jiġi miġġieled l-istorbju li jisimgħu n-nies f’żoni mibnija, fil-ġonna pubbliċi jew spazji oħra kwieti fl-agglomerazzjonijiet, fi spazji kwieti fil-kampanja u ħdejn l-iskejjel, l-isptarijiet u bini u żoni oħra li huma sensittivi għall-istorbju;

8.

josserva li l-Kummissjoni, fil-lista tagħha tal-impatt tal-istorbju fuq is-saħħa, tonqos milli ssemmi wieħed mill-iżjed effetti komuni tal-espożizzjoni għall-istorbju, li huwa t-tinnitus (żanżin tal-widnejn) u l-hyperacusis (sensittività estrema għall-istorbju) ta’ spiss ikkawżati minn tnaqqis fil-kapaċità tas-smigħ minħabba l-espożizzjoni għal livelli għoljin ta’ storbju. Mill-inqas 10 % tal-popolazzjoni jbatu mit-tinnitus u/jew il-hypercusis, fenomenu li qed jiżdied fost iż-żgħażagħ minħabba livelli għoljin ta’ storbju. Għalhekk, huwa importanti ħafna li l-pubbliku inġenerali jingħata informazzjoni dwar problemi relatati mas-saħħa minħabba l-espożizzjoni għall-istorbju;

9.

josserva li, fil-lista tal-inizjattivi preċedenti u futuri tal-UE f’dan il-qasam, ma tissemma l-ebda azzjoni biex jitnaqqsu l-livelli għoljin ta’ storbju f’ċerti postijiet pubbliċi bħad-diskoteki;

10.

jenfasizza l-bżonn li tiġi kkunsidrata d-data reċenti tal-Organizzazzjoni Dinjija tas-Saħħa (WHO) dwar il-meded/valuri ta’ storbju (noise bands) applikati fil-mapep tal-istorbju. Skont id-data, il-meded ta’ rappurtar ta’ valuri ta’ indikaturi ta’ LNIGHT għandhom jitnaqqsu għal 40 dB u l-ispejjeż soċjali tal-istorbju mit-traffiku tat-triq u l-linji ferrovjarji u tal-ajru għandhom jiġu inklużi wkoll; jinsisti li d-data reċenti tad-WHO għandha tiġi inkluża wkoll fil-kurvi tad-dożi u l-ispejjeż (exposure-cost curves), li bis-saħħa tagħhom jitkejlu l-ispejjeż soċjali tal-istorbju mit-traffiku;

11.

jitlob li l-kwistjonijiet relatati mal-istorbju u mat-tniġġis mill-istorbju jiġu inkorporati fil-politiki u l-inizjattivi rilevanti kollha, b’mod partikolari fis-Seba’ Programm ta’ Azzjoni għall-Ambjent tal-ġejjieni u t-tieni Pjan ta’ Azzjoni għall-Ambjent u s-Saħħa, kif ukoll fl-inizjattivi tat-trasport sostenibbli li jagħmlu parti mill-programmi ta’ żvilupp reġjonali tal-UE u mill-politiki tal-ġestjoni tat-territorju;

12.

jenfasizza l-bżonn ta’ rabtiet u komplementarjetà u li jimtlew il-lakuni leġislattivi bejn l-istrumenti leġislattivi differenti li jirregolaw il-materjali assoċjati mal-istorbju mis-sors, b’mod speċifku fir-rigward ta’ vetturi, b’mod speċjali karozzi u trakkijiet, toroq, linji ferrovjarji u ajruporti billi jitfassal qafas legali globali;

13.

jagħraf l-importanza li jiġu rimedjati għadd ta’ dgħufijiet tad-Direttiva attwali u jqis li huwa neċessarju u adatt li jiġu żviluppati metodoloġiji komparattivi għall-kejl tal-istorbju, l-użu ta’ netwerks għall-kejl u l-osservazzjoni tal-istorbju, li jinkludu kriterji standardizzati, il-valuri ta’ intervent (trigger values) jew ta’ mira (target values), ir-rappurtar, il-metodi ta’ valutazzjoni u l-infurzar;

14.

jenfasizza l-bżonn li l-istorbju jiġi indirizzat mis-sors u jenfasizza wkoll kemm hi kosteffettiva l-prevenzjoni tal-istorbju permezz ta’ żviluppi tekniċi u r-rispett tal-limiti tal-emissjonijiet li jikkontrollaw it-tniġġis mill-istorbju bil-kontra tat-tnaqqis għal livell minimu tal-effetti tiegħu;

15.

jenfasizza l-vantaġġi tat-tnaqqis tal-istorbju tat-traffiku mis-sors bħala mezz ta’ kif jitnaqqas l-infiq tal-kunsilli u l-awtoritajiet responsabbli għat-toroq, b’mod partikolari billi jitwaqqfu ħitan u insulazzjoni kontra l-istorbju;

16.

jenfasizza l-importanza li jiġi integrat it-tnaqqis tat-tniġġis mill-istorbju fil-politiki tal-ġestjoni tat-territorju u tal-ippjanar tal-ambjent urban, b’mod partikolari biex l-istorbju mit-traffiku tat-triq u mill-inħawi fil-viċinanzi jiġi limitat mis-sors;

17.

jinsisti fuq l-importanza li t-tnaqqis tal-istorbju jiġi inkluż fl-għanijiet għal sistema tat-trasport kompetittiva u effiċjenti fl-użu tar-riżorsi identifikati fil-White Paper tal-Kummissjoni intitolata “Pjan direzzjonali għal Żona Unika Ewropea tat-Trasport – Lejn sistema tat-trasport kompetittiva u li tuża r-riżorsi b’mod effiċjenti” u jissuġġerixxi li, bil-għan li jitnaqqas l-istorbju, jiġu implimentati u vvalutat ċerti miżuri fil-qasam tas-sostenibbiltà, l-effiċjenza fl-użu tal-enerġija u l-kwalità tal-arja. Il-Kumitat jipproponi li għall-implimentazzjoni tal-White Paper jitfassal pjan ta’ azzjoni, li fih jiġu stabbiliti skeda, miżuri u dati tal-għeluq għall-valutazzjoni;

18.

huwa tal-fehma li politika Ewropea ambizzjuża għall-istorbju għandha tinkorpora mill-inqas dawn il-miżuri li ġejjin:

19.

jitlob li s-settur tat-trasport jadotta objettivi għat-tnaqqis tat-tniġġis mill-istorbju, possibbilment permezz ta’ miżuri msejsa fis-suq, bħal ħlas għall-aċċess jew l-użu tan-netwerk (tat-triq, ferrovjarju, marittimu jew tal-ajru), sabiex dawk li jniġġsu jġarrbu l-ispejjeż tal-istorbju li jipproduċu;

20.

jirrakkomanda strateġija kollettiva u miri għat-tnaqqis tal-istorbju iktar ambizzjużi fir-reviżjoni tad-Direttiva 70/157/KEE dwar l-istorbju minn vetturi bil-mutur, fid-Direttiva 2001/43/KE dwar l-istorbju mit-tyres u proposti relatati mal-istorbju mill-vetturi tal-kategorija L irregolati mid-Direttiva 97/24/KE, u jappella biex jiġu adottati miżuri li, fil-prinċipju, jiggarantixxu li dawk li joqogħdu qrib l-ajruporti jgħaddu ljieli kwieti għal mill-inqas 7 sigħat;

21.

jilqa’ b’sodisfazzjon l-iżviluppi reċenti dwar is-sistema ġdida tat-tikkettar tat-tyres li ser tagħti l-opportunità lill-konsumaturi, lil dawk li jmexxu l-flotta u lill-awtoritajiet pubbliċi li jagħżlu l-aqwa fosthom fejn jidħol storbju; jissuġġerixxi f’dan il-kuntest li t-tikketti jippermettu wkoll li l-konsumaturi jibbilanċjaw il-prestazzjoni ta’ tyre partikolari mal-karatteristiċi tal-konsum tal-fjuwil tiegħu; barra minn hekk, jissuġġerixxi li dawn it-tikketti jkunu marbuta wkoll ma’ standards Ewropej ċari għall-vetturi li, bl-użu ta’ teknoloġiji adatti relatati mas-superfiċji tat-toroq, ikunu kapaċi jnaqqsu bin-nofs il-livelli tal-istorbju mit-toroq (10 dB); ifakkar madanakollu fis-sitwazzjoni speċjali li teżisti fl-Istati Membri tat-Tramuntana fir-rigward tal-possibbiltà li jintużaw ċerti tyres bl-ispikes jew mingħajrhom pereżempju fix-xitwa jew f’kundizzjonijiet estremi oħra bil-għan tas-sigurtà fit-triq f’sitwazzjonijiet ta’ emerġenza;

22.

jinnota li l-iżvilupp ta’ materjali silenzjużi tas-superfiċji għandhom iqisu l-kundizzjonijiet tal-klima u t-temp lokali kif ukoll it-titjib fid-durabbiltà tas-superfiċji kontra t-trattamenti għal kontra ż-żliq (melħ, tyres bl-istuds);

23.

jenfasizza l-importanza tad-Direttiva 2000/14/KE dwar l-emissjonijiet tal-istorbju ambjentali minn tagħmir li jintuża barra;

24.

jagħraf li l-bżonn li l-vetturi ferrovjarji jiġu sostitwiti jew adattati kemm jista’ jkun malajr, u mhux iżjed tard mill-2020, u li jiġu provduti inċentivi għall-użu ta’ tagħmir iktar silenzjuż. Strumenti bbażati fuq is-suq bħal tariffi tal-aċċess għal-linji ferrovjarji għandhom jintużaw biex jiżguraw li min iniġġes iħallas għall-ispejjeż tal-istorbju li jikkawża. Għandhom jinħolqu miżuri addizzjonali, bħalma hija projbizzjoni fuq l-użu ta’ vetturi ferrovjarji li mhumiex mogħnija bit-teknoloġiji l-inqas storbjużi, fuq perjodu medju ta’ żmien, jekk jagħti l-każ li l-istrumenti bbażati fuq is-suq jirriżultaw insuffiċjenti. Ifakkar b’mod partikolari fir-reviżjoni tal-politika tal-UE dwar l-istorbju ferrovjarju, kif ukoll fil-proġetti pilota li diġà bdew fil-Ġermanja u l-Pajjiżi l-Baxxi dwar l-istess suġġett;

25.

jiġbed l-attenzjoni għall-importanza tat-titjib taż-żoni urbani billi jitħeġġu modi tat-trasport iktar kwieti, inklużi karozzi ibridi u elettriċi u trasport pubbliku iktar kwiet u sostenibbli;

26.

jirrakkomanda li jiġu adottati miżuri tal-ippjanar urban bħal trams u tipi oħra ta’ trasport pubbliku, fosthom is-sistemi ta’ taħt l-art, il-promozzjoni taċ-ċikliżmu u l-mixi, il-limitazzjoni tat-traffiku tal-karozzi u tal-veloċità tal-vetturi, akkwist pubbliku iktar ekoloġiku, u li l-awtoritajiet lokali u reġjonali jingħataw l-inċentivi t-tajba u l-informazzjoni adegwata dwar il-mekkaniżmi ta’ finanzjament tal-UE;

27.

jitlob reviżjoni tal-Anness V tad-Direttiva, li jistabbilixxi r-rekwiżiti minimi għall-Pjani ta’ Azzjoni għall-Istorbju f’forma ta’ inċiżi, kif ukoll tal-Anness VI, li jiddefinixxi liema informazzjoni trid tintbagħat lill-Kummissjoni Ewropea għal dan l-għan, sabiex tiġi żgurata konformità iktar mifruxa u effettiva mad-Direttiva u biex ikunu jistgħu jsiru paraguni tar-riżultati bejn l-Istati Membri;

28.

jissuġġerixxi l-adozzjoni fil-livell tal-UE tal-istandardizzazzjoni tal-għodod u l-metodoloġiji li jiffaċilitaw it-tfassil u/jew l-implimentazzjoni reali tal-Pjani ta’ Azzjoni għall-Istorbju u jinvolvu firxa wiesgħa ta’ partijiet interessati minn istituti ta’ riċerka u universitajiet għal awtoritajiet lokali u reġjonali, taħt il-koordinazzjoni ta’ aġenzija tal-UE waħda;

29.

f’dan ir-rigward, jiġbed l-attenzjoni għall-fatt li f’ċerti każijiet l-entità inkarigata mill-istabbiliment tal-pjan ta’ azzjoni għall-istorbju mhijiex responsabbli wkoll għall-implimentazzjoni tiegħu u jitlob li tingħata aktar attenzjoni lil din il-kwistjoni;

30.

jissuġġerixxi li l-Kummissjoni testendi l-kunċett ta’ governanza f’diversi livelli għal oqsma oħra bħall-istorbju. Il-Patt tas-Sindki jista’ jkun il-punt ta’ riferiment f’dan ir-rigward;

31.

jitlob li l-proġett CNOSSOS-EU (Common Noise Assessment Methods in Europe – Metodi Komuni tal-Valutazzjoni tal-Istorbju fl-Ewropa) jiġi finalizzat malajr sabiex jiġi introdott metodu ta’ valutazzjoni armonizzat għall-mapep tal-istorbju tat-toroq, tal-linji ferrovjarji u l-istorbju industrijali u l-istorbju mill-inġenji tal-ajru;

32.

jipproponi li, wara valutazzjoni fil-fond tal-impatt fuq l-awtoritajiet lokali u reġjonali, il-Kummissjoni tistabbilixxi valuri ta’ intervent jew ta’ mira bbażati fuq ir-rakkomandazzjonijiet tas-saħħa tad-WHO li jobbligaw lill-Istati Membri li jieħdu azzjoni hekk kif jintlaħaq ċertu livell ta’ storbju;

33.

għandu xi riservi dwar l-istandards Ewropej fil-qasam tal-immissjonijiet għat-tniġġis mill-istorbju jekk dawn jiġu ttrattati b’mod separat minn politika komprensiva tal-emissjonijiet għall-istorbju. L-awtoritajiet lokali u reġjonali għandhom japplikaw dawn l-istandards Ewropej għad li l-miżuri lokali u reġjonali ta’ sikwit ma jkunux adatti. Għalhekk, l-implimentazzjoni potenzjali ta’ tali standards marbuta mal-immissjonijiet għandha tiġi konċeputa fi ħdan il-qafas ta’ politika Ewropea dwar l-istorbju li torbot biċ-ċar il-politika għall-emissjonijiet ma’ dik għall-immissjonijiet. Għalhekk, il-Kumitat jipproponi dawn il-miżuri:

34.

jenfasizza l-importanza tar-restituzzjoni tal-valuri ta’ gwida li diġà jinsabu fil-Green Paper dwar il-politika tal-istorbju tal-ġejjieni li tħallew barra fid-Direttiva attwali u li ġew ikkonfermati minn studji ġodda tad-WHO bħala objettivi ta’ protezzjoni; jenfasizza li l-istorbju minn sorsi differenti għandu impatt kumulattiv u li l-ippjanar ta’ proġetti ġodda għandu jissejjes fuq il-valuri ta’ mira fit-tul tad-WHO;

35.

jirrakkomanda iktar sinerġiji bejn il-politiki tal-istorbju u tal-kwalità tal-arja (kemm id-Direttiva tal-UE dwar il-kwalità tal-arja kif ukoll id-Direttiva DIA jinkludu obbligi fir-rigward tal-pjani ta’ azzjoni) u b’hekk tingħata spinta għal azzjoni politika konġunta iktar effettiva;

36.

jissuġġerixxi li, wara vaultazzjoni fil-fond tal-impatt fuq l-awtoritajiet lokali u reġjonali, jiġu stabbiliti miri għat-tnaqqis tal-espożizzjoni għall-istorbju hekk kif sar għat-tniġġis atmosferiku u tal-klima, inkluża mira għat-tnaqqis tan-numru ta’ nies esposti għal livelli ta’ 55 dB matul il-lejl b’mill-inqas 15 % sal-2013;

37.

jemmen li jkun tajjeb li jitqies tnaqqis ta’ LDEN ta’ 40 dB u LNIGHT ta’ 35 dB huma u jitfasslu l-mapep tal-istorbju tal-ġejjieni;

38.

jitlob li wħud mill-kunċetti fid-Direttiva jiġu ċċarati, b’mod partikolari “agglomerazzjoni” u “żoni trankwilli”;

39.

jenfasizza l-importanza li l-awtoritajiet reġjonali u lokali jingħataw l-appoġġ finanzjarju u l-gwida teknika li għandhom bżonn u li jadottaw miżuri komplementari fil-livell nazzjonali u f’dak tal-UE sabiex jimplimentaw il-politika tal-UE dwar it-tniġġis mill-istorbju;

40.

jenfasizza mill-ġdid il-valur tal-ħolqien ta’ netwerk għall-awtoritajiet reġjonali u lokali sabiex jaqsmu l-informazzjoni u l-esperjenza u jadottaw l-aqwa prattiki, li jipprovdu informazzjoni aġġornata disponibbli bil-lingwi kollha;

41.

jirrakkomanda li tiġi provduta iktar informazzjoni u informazzjoni aħjar lill-awtoritajiet lokali u reġjonali kif ukoll strumenti ta’ appoġġ u gwida dwar il-viżwalizzazzjoni, f’mapep konġunti, ta’ storbju kumulattiv minn sorsi differenti. B’konformità mal-prinċipju tas-sussidjarjetà, għandu jitħalla f’idejn kull awtorità lokali biex tiddeċiedi hi kif l-aħjar tniedi l-kampanji ta’ informazzjoni;

42.

jipproponi t-tnedija ta’ kampanji ta’ sensibilizzazzjoni u informazzjoni dwar l-istorbju fil-livell reġjonali u lokali u li jsiru konsultazzjonijiet u seduti pubbliċi li jipprovdu fehim iżjed fil-fond tas-sitwazzjoni u li tiġi ċċarata l-kwistjoni għan-nies;

43.

jissuġġerixxi iktar sħubijiet bejn l-awtoritajiet lokali u reġjonali u NGOs u assoċjazzjonijiet lokali taċ-ċittadini, b’mod partikolari billi jingħataw premjijiet li jistgħu jikkontribwixxu wkoll sabiex jenfasizzaw miżuri kreattivi jew kosteffettivi implimentati fl-UE;

44.

jenfasizza li l-limiti fuq il-livell ta’ storbju huma neċessarji mhux biss biex ikun hemm livell għoli ta’ protezzjoni iżda wkoll biex fis-suq uniku jonqsu d-distorsjonijiet tal-kompetizzjoni marbutin mar-regoli dwar il-protezzjoni mill-istorbju. Iżda, huwa essenzjali li jiġi rispettat il-prinċipju tas-sussidjarjetà fir-rigward tad-definizzjoni tal-valuri ta’ intervent u/jew valuri ta’ mira u l-implimentazzjoni tad-Direttiva. Għandha tiġi kkunsidrata wkoll l-introduzzjoni ta’ miżuri addizzjonali f’każ li jinqabżu l-limiti fuq il-livell tal-istorbju, filwaqt li jitqies l-impatt ta’ dawk il-miżuri fuq l-awtoritajiet lokali u reġjonali; għandha titqies ukoll id-diversità kulturali fl-Ewropa;

45.

jenfasizza l-importanza tal-proporzjonalità f’termini tal-ħolqien ta’ spejjeż addizzjonali u piżijiet amministrattivi għall-kumpaniji u l-amministrazzjonijiet pubbliċi, li jridu jitqiesu fir-rigward tal-benefiċċji ambjentali.