Opinjoni tal-Kumitat Ekonomiku u Soċjali Ewropew dwar il-“Komunikazzjoni mill-Kummissjoni lill-Parlament Ewropew, il-Kunsill, il-Kumitat Soċjali u Ekonomiku Ewropew u l-Kumitat tar-Reġjuni — Att dwar is-Suq Uniku II — Flimkien għal tkabbir ġdid”

Nhar id-19 ta’ Diċembru 2012, il-Kummissjoni Ewropea ddeċidiet, b’konformità mal-Artikolu 304 tat-Trattat dwar il-Funzjonament tal-Unjoni Ewropea, li tikkonsulta lill-Kumitat Ekonomiku u Soċjali Ewropew dwar

il-Komunikazzjoni mill-Kummissjoni lill-Parlament Ewropew, il-Kunsill, il-Kumitat Soċjali u Ekonomiku Ewropew u l-Kumitat tar-Reġjuni - Att dwar is-Suq Uniku II: Flimkien għal tkabbir ġdid

Is-Sezzjoni Speċjalizzata għas-Suq Uniku, il-Produzzjoni u l-Konsum, inkarigata sabiex tipprepara l-ħidma tal-Kumitat dwar is-suġġett, adottat l-Opinjoni tagħha nhar it-8 ta’ Jannar 2013.

Matul l-486 sessjoni plenarja tiegħu li saret fis-16 u s-17 ta’ Jannar 2013 (seduta tas-16 ta’ Jannar), il-Kumitat Ekonomiku u Soċjali Ewropew adotta din l-Opinjoni b’162 vot favur, 24 vot kontra u 18-il astensjoni.

2. Kummenti ġenerali: “Għal ekonomija soċjali tas-suq kompetittiva ħafna”

Il-KESE jilqa’ bi pjaċir il-miżuri li jtejbu l-interkonnettività fis-Suq Uniku fil-qasam tat-trasport bil-ferroviji, bl-ajru u bil-baħar, iżda jemmen li mhux qed jiġi adottat approċċ olistiku minħabba li l-proposta tal-Kummissjoni ma tinkludix azzjonijiet dwar is-servizzi tal-merkanzija bil-ferrovija, it-trasport bit-triq (li jifforma l-akbar proporzjon tat-trasport tal-merkanzija u tal-passiġġieri) u t-trasport multimodali bil-għan li tiġi ottimizzata l-effettività tat-trasport.

Il-mod li bih il-privatizzazzjoni tat-trasport bil-ferrovija hija definita u difiża ma jirriflettix il-fatt li hemm bżonn li jitqiesu raġunijiet li mhumiex biss dawk ekonomiċi f’reġjuni importanti fl-Ewropa biex it-trasport pubbliku jibqa’ f’wiċċ l-ilma. Is-sempliċi introduzzjoni tal-fattur tal-profittabbiltà jista’ jherri l-funzjoni pubblika tas-sistemi tat-trasport bil-ferrovija. Mhuwiex biżżejjed li s-suċċess jew le tal-privatizzazzjoni jitkejjel biss abbażi tal-iffrankar. Il-kwalità u s-sikurezza tal-persunal u tal-pubbliku għandhom ikunu l-ewwel ħaġa li titqies.

Suq Uniku ġenwin għall-bastimenti jista’ jintlaħaq biss billi jiġi żgurat li dan il-qasam jitqiegħed fl-istess livell ta’ modi ta’ trasport oħra. Dan ifisser li rridu nimxu b’mod deċiż lejn is-semplifikazzjoni amministrattiva - i.e. doganali - tat-trasport bil-baħar fi ħdan l-UE. Il-merkanzija Komunitarja għandha tiġi ttrattata b’mod differenti mill-merkanzija ta’ pajjiżi terzi (partikolarment bl-użu tal-manifest elettroniku) sabiex tinqata’ l-burokrazija u r-responsabbiltà tgħaddi f’idejn it-trasportaturi. Bażikament, il-merkanzija li tkun ġiet spezzjonata malli tidħol fl-UE m’għandhiex bżonn terġa’ tiġi spezzjonata mill-ġdid f’port ta’ destinazzjoni ieħor fi ħdan l-UE.

Minn naħa, dan għandu jgħin biex jinħoloq trasport marittimu mingħajr ostakli fi ħdan l-UE, u min-naħa l-oħra, biex jiġu stabbiliti l-awtostradi tal-baħar tant meħtieġa - rotot ewlenin fl-ibħra bejn portijiet tal-UE differenti mħalltin mal-użu ta’ modi oħra ta’ trasport. Il-KESE bħalissa qed iħejji Opinjoni dwar it-Tkabbir Blu u ser jippreżenta proposti prattiċi fil-bidu tal-2013.

Filwaqt li jagħraf l-importanza ta’ miżuri li jindirizzaw il-frammentazzjoni attwali tal-ispazju tal-ajru Ewropew, il-KESE jiddispjaċih li r-reviżjoni tar-Regolament dwar id-Drittijiet tal-Passiġġieri bl-Ajru li tkopri l-kumpens u l-għajnuna għal passiġġieri f’każ li ma jitħallewx jirkbu fuq l-ajruplan, kanċellazzjonijiet jew dewmien twil, għadha ma ġietx ippreżentata. Din il-leġislazzjoni tal-UE teħtieġ tiġi ċċarata u aġġornata rigward il-firxa tal-applikazzjoni tagħha u l-interpretazzjoni ta’ ċerti dispożizzjonijiet ġenerali. Il-KESE jsejjaħ ukoll lill-Kummissjoni biex tippreżenta proposta leġislattiva li titlob lil-linji tal-ajru jiggarantixxu l-protezzjoni tal-passiġġieri kollha f’każ ta’ insolvenza ta’ linja tal-ajru u biex taġixxi kontra t-tkattir ta’ termini inġusti ta’ kuntratti, in-nuqqas ta’ trasparenza fl-ipprezzar tal-biljetti u d-diffikultajiet li l-konsumaturi jħabbtu wiċċhom magħhom biex ifittxu rimedju, billi tobbliga lill-kumpaniji tal-ajru biex iżommu mas-sistemi tal-ADR u anke mad-deċiżjonijiet li jkunu ttieħdu mill-awtoritajiet nazzjonali tal-ivvjaġġar bl-ajru.

F’ħafna Stati Membri, għad m’hemmx għażla bejn fornituri tal-enerġija differenti billi għad hemm nuqqas ta’ kompetizzjoni. Il-prezz aċċessibbli tas-servizzi, il-mod kif jiġu ttrattati l-ilmenti dwar il-kwalità, it-tqabbil tal-offerti u l-prezzijiet, it-tibdil tal-fornitur b’mod sempliċi u t-trasparenza tat-tariffi u t-termini tal-kuntratti għad iridu jintlaħqu madwar l-Ewropa kollha. Il-KESE jitlob lill-Kummissjoni u lill-Kunsill biex jissorveljaw mill-qrib is-swieq nazzjonali tal-enerġija għall-individwi, u fejn meħtieġ, jaġixxu malajr, biex jiżguraw li t-tielet pakkett tal-enerġija jiġi implimentat b’mod effikaċi għall-benefiċċju taċ-ċittadini. Huwa importanti li l-Istati Membri jittrasponu d-dispożizzjonijiet rilevanti li fih it-tielet pakkett b’mod li dawn jgħinu liċ-ċittadini vulnerabbli u jipprevjenu l-faqar enerġetiku fil-pajjiżi tagħhom. L-involviment tal-konsumatur huwa prerekwiżit neċessarju għas-suċċess tal-implimentazzjoni tal-meters intelliġenti, li jistgħu jipprovdu l-potenzjal ta’ effiċjenza fl-użu tal-enerġija. Madankollu, għad hemm ħafna punti mhux riżolti bħal jekk il-benefiċċji potenzjali humiex iżjed mill-ispejjeż għall-konsumatur, kif ukoll kwistjonijiet marbuta mal-ħarsien tad-data. Dawn il-problemi għandhom jiġu solvuti kemm jista’ jkun malajr fl-interess ta’ dawk kollha li jużaw l-enerġija.

Il-Kummissjoni tagħti appoġġ qawwi lill-mobbiltà. Madanakollu, il-mobbiltà mhijiex għan fiha nfisha. Mhijiex xi ħaġa faċli li wieħed jitlaq minn art twelidu, u t-tqabbil mal-Istati Uniti mhux dejjem jista’ jsir. Ħaddiema u dawk li jaħdmu għal rashom li jmorru f’pajjiż ieħor sikwit iħabbtu wiċċhom ma’ nuqqas ta’ rikonoxximent tal-kwalifiki tagħhom, sigħat ta’ xogħol twal, kundizzjonijiet ta’ xogħol ħżiena, diskriminazzjoni, trattament inġust u ostakli tal-lingwa. It-titjib tal-kundizzjonijiet tax-xogħol u l-promozzjoni tat-trattament ugwali għandhom ikunu parti attiva mill-politika Ewropea għas-suq tax-xogħol. B’mod partikolari, il-KESE jikkundanna l-fatt li wara iktar minn 20 sena ma sar ebda progress dwar il-kwistjoni importanti tar-rikonoxximent tal-kwalifiki vokazzjonali (9). Il-mobbiltà ta’ min qed jitħarreġ, tal-apprendisti u tal-intraprendituri żgħażagħ għandha tiġi promossa fl-Ewropa.

Il-miżuri proposti biex jiffaċilitaw l-aċċess għal fondi ta’ investimenti għal tul ta’ żmien huwa pass pożittiv. Madanakollu dan mhux ser isolvi l-problemi li l-SMEs jiffaċċjaw minħabba nuqqas ta’ kapital operattiv. Bħala s-sinsla tal-ekonomija tal-UE, l-SMEs m’għandhomx ibatu minn diskriminazzjoni f’termini ta’ aċċess għall-finanzi b’riżultat tar-regoli ħarxa fuq ir-riżervi tal-banek (10). Il-Kumitat jirreferi għall-Opinjonijiet preċedenti tiegħu dwar l-aċċess tal-SMEs għall-finanzjament (11). Hawnhekk il-KESE jirrakkomanda li jinħolqu għodod rotanti biex jipprovdu tali krediti li permezz tagħhom l-SMEs ikunu jistgħu jaċċessaw il-finanzi faċilment mingħajr kollaterali żejda (12). Il-garanziji għal dawn il-krediti għandhom jiġu pprovduti minn riżorsi nazzjonali jew Ewropej. L-Istati Membri wkoll għandhom jikkunsidraw possibbiltajiet oħra bħal perjodu ta’ eżenzjoni fiskali għal xi snin għal investituri privati u tal-familja f’SMEs li jkunu għadhom kemm fetħu u li qed jespandu, kif ukoll inċentivi oħra. Dawn il-miżuri għandhom jikkomplementaw il-proposta għall-moviment ħieles bejn il-fruntieri ta’ kapital ta’ riskju Ewropew li jkun dirett lejn kumpaniji innovattivi, kif propost fl-Att dwar is-Suq Uniku, iżda dan ma jsolvix in-nuqqas ta’ finanzjament għal SMEs oħra.

Il-proposta għall-modernizzazzjoni tal-leġislazzjoni dwar l-insolvenza huwa pass fid-direzzjoni t-tajba biex jittejjeb l-ambjent kummerċjali, speċjalment meta jkollha l-għan li tagħti ċans ieħor lill-intraprendituri. Għad hemm ħafna burokrazija li l-SME, u speċjalment il-mikrointrapriżi, mhux kapaċi jlaħħqu magħha. Nitolbu lill-Kummissjoni biex tkompli l-isforzi tagħha biex tnaqqas il-piż amminstrattiv u tidenfika l-miri kwantitattivi u kwalitattivi. F’dan ir-rigward, il-valutazzjoni tal-impatt għandha tittejjeb kontinwament. S’issa, il-valutazzjoni tal-piżijiet amministrattivi ffukat wisq fuq ir-regolamenti nfushom, u din kienet parti mir-raġuni li wasslet biex din tkun wisq “teknokratika”. Ir-regolamentazzjoni ta’ Stat Membru tista’ tkun motivata mix-xewqa li tinżamm il-kwalità tas-servizz provdut, u għalhekk tkun fl-interess tal-benessri pubbliku u għaldaqstant ma tkunx ostaklu (13).

Il-KESE jilqa’ l-fatt li l-Att dwar is-Suq Uniku II jinkludi r-reviżjoni tad-Direttiva dwar is-Servizzi ta’ Ħlas (PSD) u jenfasizza li l-iżvilupp ta’ suq ta’ ħlasijiet Ewropej kompetittiv u li jaħdem sew li jkun ta’ benefiċċju għall-konsumaturi u l-intrapriżi kollha għandu jkun l-għan ewlieni tar-reviżjoni. Huwa partikolarment importanti li s-servizzi ta’ ħlasijiet ikunu aċċessibbli għall-konsumatur, iżda wkoll li jiġi żgurat li dawn is-servizzi jiġu pprovduti b’mod sikur, effiċjenti u rħis. Ir-reviżjoni għandha tipprojbixxi l-prattika li jiġu imposti ħlasijiet addizzjonali fuq il-konsumaturi għall-użu ta’ metodi ta’ ħlas madwar l-UE. L-utenti tad-debitu dirett għandhom jingħataw id-drittijiet ta’ rifużjoni mingħajr kundizzjonijiet għal tranżazzjonijiet awtorizzati jew mhux awtorizzati. Il-konsumaturi għandu jkollhom protezzjoni qawwija jkun xi jkun il-metodu ta’ ħlas li jużaw, b’kunsiderazzjoni tar-regoli b’saħħithom ta’ protezzjoni għall-konsumaturi li jeżistu f’xi Stati Membri. Il-ħafna benefiċċji għall-partijiet interessati kollha kkonċernati, kif ukoll il-ħtieġa għal nefqa raġonevoli min-naħa tl-SMEs li joffru dawn il-metodi ta’ ħlas lill-klijenti tagħhom għandhom jiġu kkunsidrati f’dan il-kuntest. Il-KESE jinsab sodisfatt li l-Kummissjoni beħsiebha tippreżenta proposta leġislattiva dwar tariffi ta’ interskambju multilaterali għall-ħlasijiet bil-kards.

Il-KESE jilqa’ l-intenzjoni tal-Kummissjoni Ewropea li tnaqqas l-ispejjeż u żżid l-effiċjenza tal-użu ta’ infrastruttura ta’ komunikazzjoni b’veloċità għolja billi tadotta regoli komuni. Il-KESE jappoġġja l-proposta li titjieb il-konnessjoni tal-internet broadband b’veloċità għolja bħala kundizzjoni teknika għall-espansjoni tal-kummerċ elettroniku. Huwa importanti li jiġi adottat mudell konsistenti għall-metodoloġiji dwar l-ispejjeż użati mill-awtoritajiet regolatorji nazzjonali madwar l-UE biex jiġi żgurat li l-ispejjeż ikunu ġusti u kkalkulati fuq l-istess standards. Swieq tat-telekomunikazzjoni regolati sew għandhom jiżguraw li l-konsumaturi jkollhom għażla. Jekk ma jinkisibx aċċess b’kundizzjonijiet ġusti mill-operaturi ġodda għan-netwerks tal-ġenerazzjoni l-ġdida, il-kwalità tal-għażliet tas-servizzi għall-bejgħ għall-konsumaturi tkun mgħawwġa jew limitata. Il-kompetituri kollha għandu jkollhom aċċess għall-infrastruttura b’kundizzjonijiet ugwali u għandu jkun żgurat l-aċċess għan-netwerks għall-operaturi ġodda u dawk li diġà joperaw bi prezzijiet raġonevoli (jiġifieri bbażati fuq l-ispiża).

L-intrapriżi ilhom jitolbu għall-użu mifrux tal-fatturazzjoni elettronika, inkluż f’attivitajiet bejn il-fruntieri. Għalhekk nappoġġjaw bis-sħiħ il-proposta biex din issir regola ġenerali għall-kuntratti ta’ akkwist pubbliku. Madanakollu, il-forma elettronika għandha tkun applikata wkoll għat-tressiq tal-offerti billi l-fatt li din ftit li xejn tintuża hija waħda mir-raġunijiet għaliex għadd żgħir biss ta’ SMEs minn Stati Membri oħra jinvolvu ruħhom fl-akkwist pubbliku fi Stati Membri oħra (ara wkoll il-Programm ta’ Ħidma tal-Kummissjoni għall-2013).

(2) http://epp.eurostat.ec.europa.eu/cache/ITY_PUBLIC/3-03122012-AP/EN/3-03122012-AP-EN.PDF

(5) Monti 2010 “Dan jispiċċa jherri l-bażi tal-integrazzjoni ekonomika u tat-tkabbir u l-impjiegi madwar l-UE kollha kemm hi, fi żmien fejn qed ifeġġu potenzi globali ġodda u sfidi ambjentali gravi li qed jitolbu aktar minn qatt qabel li l-UE tkun magħquda, fl-interess taċ-ċittadini Ewropej u kif ukoll ta’ governanza globali effettiva.”

(6) Riżoluzzjoni tal-Parlament Ewropew tal-14 ta’ Ġunju 2012 dwar “l-Att dwar is-Suq Uniku: Il-Passi li Jmiss għal Tkabbir”

(12) Għall-karta Szechenyi fl-Ungerija ara: http://www.google.com/url?sa=t&rct=j&q=&esrc=s&source=web&cd=1&ved=0CC8QFjAA&url=http%3A%2F%2Fwww.iapmei.pt%2Fconferencia%2F1_Laslo_Krisan.ppt&ei=DM29UKvHJNGRhQehsoGwDA&usg=AFQjCNHWIFTTA7fbjHyT1ShycR1qL7tKRQ

APPENDIĊI

għall-Opinjoni tal-Kumitat Ekonomiku u Soċjali Ewropew

L-emendi li ġejjin inċaħdu waqt id-diskussjoni iżda rċevew aktar minn kwart tal-voti (Artikolu 39(2) tar-Regoli ta’ Proċedura):

a) Punt 3.2 (Emenda 5)

“3.2

L-irtirar tar-regolament Monti II ma jsolvix il-problemi maħluqa mill-Qorti Ewropea tal-Ġustizzja fis-sentenzi tagħha dwar l-istazzjonar tal-ħaddiema. Trid tinstab soluzzjoni għas-sitwazzjoni attwali għax dan qed iżomm lill-ħaddiema milli jeżerċitaw id-drittijiet tagħhom b’mod sħiħ. Il-Kummissjoni għandha tiżgura li d-drittijiet soċjali fundamentali ma jitnaqqsux minħabba l-libertajiet ekonomiċi. Il-Kummissjoni għandha tikkunsidra proposta għal protokoll ta’ proġress soċjali mehmuż mat-Trattati Ewropej. Dan il-protokoll għandu jiċċara r-relazzjoni bejn id-drittijiet soċjali fundamentali u l-libertajiet ekonomiċi billi jikkonferma li s-Suq Uniku mhuwiex l-għan fih innifsu, iżda twaqqaf biex jinkiseb progress soċjali għaċ-ċittadini kollha tal-UE (effettivament fl-implimentazzjoni tal-Artikolu 3(3) tal-verżjoni konsolidata tat-Trattat dwar l-Unjoni Ewropea). Għandu jagħmilha ċara wkoll li l-libertajiet ekonomiċi u r-regoli tal-kompetizzjoni ma jistgħux jieħdu l-prijorità fuq id-drittijiet soċjali u l-progress soċjali, u ma jistgħu qatt jiġu interpretati li jagħtu lill-impriżi d-dritt li jevadu jew jevitaw il-liġijiet u l-prattiki soċjali u tal-impjieg jew għar-raġunijiet ta’ kompetizzjoni mhux ġusta fuq is-salarji u l-kundizzjonijiet tax-xogħol. Il-Kummissjoni introduċiet żewġ proposti leġislattivi mmirati lejn it-titjib u r-rinfurzar tat-traspożizzjoni,l-implimentazzjoni u l-infurzar fil-prattika tad-Direttiva dwar l-Istazzjonament tal-Ħaddiema. L-ewwel proposta dwar l-infurzar tad-Direttiva 96/71/EC għandha l-għan li ttejjeb il-protezzjoni tal-ħaddiema stazzjonati temporanjament barra minn pajjiżhom, billi ttejjeb l-informazzjoni, il-kooperazzjoni amministrattiva u l-kontrolli. Din għadha qed tiġi diskussa. It-tieni proposta, dwar l-eżerċizzju tad-dritt li tittieħed azzjoni kollettiva fil-kuntest tal-libertà tal-istabbiliment u l-libertà tal-provvista ta’ servizzi (Monti II,) ġiet irtirata.

Rigward il-prinċipju tal-ugwaljanza tal-valuri tad-drittijiet soċjali fundamentali vis-à-vis il-libertajiet ekonomiċi, il-KESE huwa tal-opinjoni li l-liġi primarja b’mod partikolari għandha tiżgura dan l-approċċ. Il-KESE jinnota li t-tielet premessa tal-preambolu, u speċifikament l-Artikolu 151 tat-TFUE, huma intiżi għat-titjib tal-kundizzjonijiet tal-ħajja u tax-xogħol “sabiex jagħmlu possibbli l-armonizzazzjoni tagħhom waqt li jitkompla it-titjib”. Huwa jitlob b’mod ċar li “Protokoll tal-Progress Soċjali” jiddaħħal fit-Trattati sabiex il-prinċipju tal-ugwaljanza jiġi mnaqqax mad-drittijiet soċjali u l-libertajiet ekonomiċi. B’hekk jiġi ċċarat li la l-libertà ekonomika u lanqas ir-regoli tal-kompetizzjoni m’għandu jkollhom prijorità fuq id-drittijiet soċjali, kif ukoll jiġi definit b’mod ċar l-impatt tal-għan tal-Unjoni li jinkiseb il-progress soċjali (1).”

Raġuni

Ser tingħata bil-fomm.

Riżultat tal-votazzjoni:

Favur	:	77
Kontra	:	114
Astensjonijiet	:	11

(1) ĠU C 376, 22.12.2011, p. 74.