4.10.2012 |
MT |
Il-Ġurnal Uffiċjali tal-Unjoni Ewropea |
C 299/76 |
Opinjoni tal-Kumitat Ekonomiku u Soċjali Ewropew dwar il-“Proposta għal Regolament tal-Parlament Ewropew u tal-Kunsill dwar it-titjib fis-saldu tat-titoli fl-Unjoni Ewropea u dwar depożitorji ċentrali tat-titoli (CSDs) u li jemenda d-Direttiva 98/26/KE”
COM(2012) 73 final — 2012/0029 (COD)
2012/C 299/14
Relatur: is-Sur MORGAN
Nhar il-15 ta’ Marzu 2012 u nhar it-3 ta’April 2012, il-Parlament Ewropew u l-Kunsill rispettivament iddeċidew, b’konformità mal-Artikolu 114 tat-Trattat dwar il-Funzjonament tal-Unjoni Ewropea (TFUE), li jikkonsultaw lill-Kumitat Ekonomiku u Soċjali Ewropew dwar
il-Proposta għal Regolament tal-Parlament Ewropew u tal-Kunsill dwar it-titjib fis-saldu tat-titoli fl-Unjoni Ewropea u dwar depożitorji ċentrali tat-titoli (CSDs) u li jemenda d-Direttiva 98/26/KE
COM(2012) 73 final – 2012/0029 (COD)
Is-Sezzjoni Speċjalizzata għas-Suq Uniku, il-Produzzjoni u l-Konsum, inkarigata sabiex tipprepara l-ħidma tal-Kumitat dwar is-suġġett, adottat l-Opinjoni tagħha nhar it-12 ta’ Ġunju 2012.
Matul l-482 sessjoni plenarja tiegħu li saret fil-11 u t-12 ta’ Lulju 2012 (seduta tal-11 ta’ Lulju), il-Kumitat Ekonomiku u Soċjali Ewropew adotta din l-Opinjoni b’110 voti favur, 2 voti kontra u 4 astensjonijiet.
1. Konklużjonijiet u rakkomandazzjonijiet
1.1 |
Il-KESE jilqa' din l-inizjattiva regolatorja. Bil-ħolqien tar-Regolament dwar is-CSDs, il-Kummissjoni ser tkun ikkompletat it-tliet pilastri tal-qafas il-ġdid tar-regolamentazzjoni dwar l-infrastruttura finanzjarja fl-UE: is-CSDs, l-EMIR u l-MiFID/MiFIR. |
1.2 |
L-introduzzjoni tal-euro kienet katalizzatur għall-investiment transkonfinali fit-titoli u l-funzjonament tajjeb tal-investiment transkonfinali huwa bbażat fuq standards komuni madwar l-Unjoni. Livell għoli ta’ dixxiplina fir-rigward tas-saldu jnaqqas ir-riskju tal-kontraparti, jew b'mod aktar speċifiku r-riskju tal-likwidità u r-riskju tas-sostituzzjoni. Aktar importanti, jippromovi l-protezzjoni tal-investitur, billi jgħin biex it-tranżazzjonijiet bejn il-bejjiegħa u x-xerrejja tat-titoli jiġu saldati b'mod sikur u fil-ħin. F'dan ir-rigward, ir-Regolament huwa pass importanti 'l quddiem lejn it-twettiq tas-Suq Uniku. |
1.3 |
Bidla kbira proposta fl-ambitu tal-attivitajiet tas-CSDs hija l-projbizzjoni ta’ detenzjoni ta’ liċenzja bankarja limitata. Dan ser jaffettwa lil żewġ CSDs kbar internazzjonali li jużaw il-kapaċitajiet bankarji tagħhom biex jappoġġjaw il-proċess ta’ saldu u ta’ kustodja fuq skala kbira ħafna. Il-KESE jagħraf li l-piż tal-opinjoni globali (G20, Kummissjoni Ewropea, IOSCO, eċċ.) huwa bil-kbir favur id-diviżjoni tal-istituzzjonijiet ta’ kreditu. Il-Kumitat jappoġġja lill-Kummissjoni u jemmen li l-aħjar soluzzjoni hija bank indipendenti. |
1.4 |
Il-proposta għal rekwiżit ta’ saldu uniformi fi żmien T+2 hija importanti ħafna. Filwaqt li dan aktarx jista' jinkiseb fl-UE, ser ikun hemm bżonn li jiġu indirizzati għadd ta’ problemi għat-tranżazzjonijiet globali. |
1.5 |
Il-proposti jitolbu d-dematerjalizzazzjoni tat-titoli negozzjabbli. Hemm perjodu ta’ tranżizzjoni li jispiċċa fl-1 ta’ Jannar 2020. Madankollu, l-Istati Membri kisbu livelli differenti ta’ progress f'dan ir-rigward u jaf ikun hemm bżonn ta’ kompromess politiku. |
2. Daħla
2.1 |
Id-Depożitorji Ċentrali tat-Titoli (CSDs – Central Securities Depositories) huma istituzzjonijiet sistemikament importanti għas-swieq finanzjarji. Kwalunkwe negozjar ta’ titoli ġewwa jew barra borża tat-titoli huwa segwit minn proċessi ta’ wara n-negozjar li jwasslu għas-saldu ta’ dak in-negozju, jiġifieri l-għoti ta’ titoli għal flus. Is-CSDs huma l-istituzzjonijiet ewlenin li jippermettu li jsir is-saldu billi jħaddmu l-hekk imsejħa sistemi ta’ saldu tat-titoli. Is-CSDs jiżguraw ukoll ir-reġistrar inizjali u l-manutenzjoni ċentrali tal-kontijiet tat-titoli li jirreġistraw kemm-il titolu nħareġ, minn min u kull bidla fiż-żamma ta’ dawk it-titoli. |
2.2 |
Is-CSDs għandhom rwol kruċjali wkoll għas-suq tal-kollateral, b'mod partikolari għal skopijiet ta’ politika monetarja. Pereżempju, kważi kull kollateral eliġibbli għal operazzjonijiet tal-politika monetarja tal-banek ċentrali fl-UE, b'mod partikolari fiż-żona tal-euro, jgħaddi mis-sistemi ta’ saldu tat-titoli mħaddma mis-CSDs. |
2.3 |
Fl-2010, is-sistemi tas-saldu tat-titoli fl-UE saldaw madwar EUR 920 triljun fi tranżazzjonijiet, u fi tmiem l-2010 kellhom depożitati magħhom kważi EUR 39 triljun f'titoli. Hemm aktar minn 30 CSD fl-UE, ġeneralment wieħed f'kull pajjiż, u żewġ CSDs ‘internazzjonali’ (ICSDs – Clearstream Banking Luxembourg u Euroclear Bank), li huma sottokategorija ta’ CSDs speċjalizzati fil-ħruġ ta’ bonds internazzjonali, komunament magħrufa bħala “Eurobonds”. |
2.4 |
Filwaqt li huma ġeneralment sikuri u effiċjenti fi ħdan il-fruntieri nazzjonali, is-saldu transfruntier bħala appoġġ għall-investiment transfruntier huwa aktar kumpless u jġib miegħu spejjeż ogħla mis-saldu domestiku. Pereżempju, l-għadd ta’ fallimenti tas-saldu huwa ogħla fi tranżazzjonijiet transfruntieri milli fi tranżazzjonijiet domestiċi u l-ispejjeż tas-saldu transfruntier huma sa erba' darbiet ogħla mill-ispejjeż għas-saldu domestiku. B'mod ġenerali, l-ispejjeż tas-CSDs huma minimi fi ħdan l-ispejjeż globali involuti fl-użu tal-elementi kollha tal-infrastruttura, avolja jirrappreżentaw spiża importanti għall-emittenti. |
2.5 |
Dawn il-problemi fis-sikurezza huma l-konsegwenza ta’ għadd ta’ fatturi, inklużi:
|
2.6 |
In-nuqqas ta’ suq intern uniku effiċjenti għas-saldu jqajjem ukoll tħassib importanti. Għadhom jeżistu ostakli importanti għas-suq Ewropew ta’ wara n-negozjar, bħal pereżempju l-limitazzjoni tal-aċċess tal-emittenti tat-titoli għas-CSDs, reġimi u regoli ta’ liċenzjar nazzjonali differenti għas-CSDs madwar l-UE u kompetizzjoni limitata bejn is-CSDs nazzjonali differenti. Dawn l-ostakli jirriżultaw f'suq frammentat ħafna. Konsegwentement, is-saldu transfruntier ta’ tranżazzjonijiet jiddependi minn ‘katini’ ta’ holdings kumplessi bla bżonn li spiss jinvolvu diversi CSDs u diversi intermedjarji oħrajn. Dan iħalli impatt negattiv fuq l-effiċjenza, iżda anki fuq ir-riskji assoċjati mat-tranżazzjonijiet transfruntieri. |
2.7 |
Dawn il-problemi huma importanti peress li t-tranżazzjonijiet transfruntieri fl-Ewropa, li jvarjaw minn xiri/bejgħ normali ta’ titoli sa trasferimenti ta’ kollateral, qegħdin dejjem jiżdiedu u s-CSDs qed isiru dejjem aktar interkonnessi. Dawn ix-xejriet huma mistennija jiżdiedu b'rata mgħaġġla bid-dħul tat-Target2 Securities (T2S), proġett imniedi mill-Eurosystem sabiex jipprovdi pjattaform komuni mingħajr fruntieri għas-saldu tat-titoli fl-Ewropa, li huwa skedat li jibda fl-2015. |
3. Ir-Regolament propost fil-qosor
3.1 |
Ir-Regolament propost għandu żewġ partijiet ewlenin: miżuri li jindirizzaw l-operaturi kollha tas-suq fil-kuntest tas-saldu tat-titoli (Titolu II) u miżuri li jindirizzaw b'mod speċifiku lis-CSDs (Titoli III, IV u V). |
Saldu tat-titoli
3.2 |
It-Titolu II jimponi l-hekk imsejħa dematerjalizzazzjoni/immobilizzazzjoni tat-titoli, li huwa l-ħruġ ta’ titoli fil-format ta’ entrata fil-kotba. Din il-miżura għandha l-għan li żżid l-effiċjenza tas-saldu, tiffaċilita t-tqassir tal-perjodi tas-saldu u tiżgura l-integrità ta’ ħruġ ta’ titoli billi tippermetti rikonċiljazzjoni eħfef taż-żamma tat-titoli. Ir-Regolament propost jipprovdi għal perjodu ta’ tranżazzjoni twil biżżejjed, sal-1 ta’ Jannar 2020, sabiex jippermetti lill-operaturi tas-suq mill-Istati Membri fejn għadhom jeżistu ammonti sinifikanti ta’ titoli fuq il-karta biex jikkonformaw ma’ din il-miżura. |
3.3 |
It-Titolu II jarmonizza l-perjodu tas-saldu għat-tranżazzjonijiet tat-titoli madwar l-UE. Fl-Ewropa, ħafna mit-tranżazzjonijiet ta’ titoli jiġu saldati fi żmien jumejn jew tlieta wara l-ġurnata tan-negozjar, skont is-suq. Il-perjodu tas-saldu ser jiġi armonizzat u stipulat għal jumejn wara l-ġurnata tan-negozjar, għalkemm ser ikunu permessi perjodi iqsar tas-saldu. |
3.4 |
It-Titolu II jarmonizza l-miżuri dixxiplinarji tas-saldu madwar l-UE. Dawn jikkonsistu f'miżuri ex ante għall-prevenzjoni tal-fallimenti tas-saldu, u miżuri ex post biex jindirizzaw il-fallimenti tas-saldu. |
Awtorizzazzjoni u superviżjoni tas-CSDs
3.5 |
Id-Direttiva 98/26/KE diġà tiddefinixxi s-sistemi tas-saldu tat-titoli bħala arranġamenti formali li jippermettu t-trasferimenti ta’ titoli bejn parteċipanti differenti. Madanakollu, dik id-Direttiva ma tindirizzax l-istituzzjonijiet li huma responsabbli mit-tħaddim ta’ dawn is-sistemi. Fir-rigward tal-kumplessità ta’ dawn is-sistemi u r-riskji relatati mas-saldu li dejjem qed jiżdiedu, huwa essenzjali li l-istituzzjonijiet li jħaddmu sistemi ta’ saldu tat-titoli jiġu legalment definiti, awtorizzati u superviżati skont sett ta’ standards prudenzjali komuni. |
3.6 |
Is-CSDs iridu jkunu awtorizzati u superviżati minn awtoritajiet kompetenti nazzjonali tal-post fejn ikunu stabbiliti. Madanakollu, minħabba l-element transfruntier dejjem jikber tal-attività tagħhom, ikollhom jiġu kkonsultati awtoritajiet oħrajn relatati mas-sistema/i ta’ saldu tat-titoli mħaddma mis-CSD u relatati ma’ entitajiet ta’ grupp oħrajn. L-AETS ser ikollha rwol importanti fl-iżvilupp ta’ abbozz ta’ standards tekniċi sabiex jiġi armonizzat il-proċess tal-awtorizzazzjoni u sabiex tiġi żgurata kooperazzjoni bejn l-awtoritajiet. |
3.7 |
Il-proposta tagħti “passaport” lis-CSDs awtorizzati sabiex jipprovdu servizzi fl-Unjoni, jew billi jipprovdu direttament servizz fi Stat Membru ieħor jew billi jistabbilixxu fergħa f'dak l-Istat Membru. CSD minn pajjiż terz jista' jingħata aċċess għall-Unjoni jekk ikun rikonoxxut mill-AETS. |
Rekwiżiti għas-CSDs
3.8 |
Peress li s-CSDs huma sistemikament importanti u jwettqu servizzi kritiċi għas-suq tat-titoli, dawn iridu jkunu soġġetti għal standards prudenzjali għoljin sabiex tiġi żgurata l-vijabbiltà tagħhom u l-protezzjoni tal-parteċipanti tagħhom. Ir-rekwiżiti għas-CSDs huma miġbura f'diversi kategoriji: rekwiżiti organizzazzjonali, regoli tal-kondotta tan-negozju, rekwiżiti għas-servizzi tas-CSD, rekwiżiti prudenzjali u rekwiżiti għall-konnessjonijiet tas-CSD. |
3.9 |
Ir-regoli tal-kondotta tal-operazzjonijiet jirrikjedu li l-operazzjonijiet ikunu nondiskriminatorji, trasparenti u strettament ibbażati fuq ir-riskju u li jkun hemm divulgazzjoni sħiħa tal-ispejjeż u d-dħul lill-awtoritajiet kompetenti. |
3.10 |
Ir-rekwiżiti għas-servizzi tas-CSD jinkludu obbligi dwar ir-rikonċiljazzjoni dakinhar tal-kontijiet u s-segregazzjoni tal-kontijiet. Rigward is-saldu fi flus, il-proposta teħtieġ li s-CSDs isaldaw f'kontijiet f'banek ċentrali kull meta dan ikun prattikabbli u disponibbli. Saldu fi flus f'bank kummerċjali jista' jsir, madanakollu, għall-kuntrarju ta’ ċerti prattiki attwali, dan għandu jsir permezz ta’ istituzzjoni ta’ kreditu separata li taġixxi bħala aġent tas-saldu. |
3.11 |
Ir-rekwiżiti prudenzjali għas-CSDs stess jinkludu dispożizzjonijiet importanti dwar il-mitigazzjoni tar-riskju operazzjonali. Peress li s-CSDs ma jitħallewx iwettqu servizzi tat-tip bankarju b'mod dirett, ir-riskju ewlieni li ser jaffaċjaw is-CSDs huwa riskju operazzjonali. Dawn id-dispożizzjonijiet jinkludu miżuri xierqa sabiex jiżguraw il-kontinwità tal-operazzjonijiet, inkluż is-saldu, il-ħin kollu. Huma stabbiliti wkoll rekwiżiti kapitali b'referenza għall-ispejjeż operazzjonali – is-CSDs għandhom iżommu l-kapital, il-qligħ imfaddal u r-riżervi sabiex ikopru minimu ta’ sitt xhur spejjeż operazzjonali. |
3.12 |
Ir-rekwiżit għall-konnessjonijiet tas-CSDs jinkludi l-istabbiliment ta’ regoli identiċi dwar il-finalità tas-saldu. |
Aċċess għas-CSDs
3.13 |
Il-ftuħ tas-suq għas-servizzi tas-CSD u t-tneħħija tal-ostakli għall-aċċess huma wieħed mill-objettivi ta’ din l-inizjattiva. Qed jiġu kkunsidrati tliet tipi ta’ aċċess: (a) bejn emittenti u CSDs, (b) bejn CSDs, u (c) bejn CSDs u infrastrutturi oħrajn tas-suq. |
3.14 |
L-abbozz jintroduċi d-dritt tal-emittenti li jirreġistraw it-titoli tagħhom fi kwalunkwe CSD awtorizzat fl-Unjoni kif ukoll id-dritt għas-CSDs li jipprovdu servizzi għal titoli li ġew kostitwiti skont il-liġi ta’ Stat Membru ieħor. |
3.15 |
CSD għandu jkollu d-dritt li jirċievi aġġornamenti dwar it-tranżazzjonijiet mis-CCPs u ċentri tan-negozjar u dawk l-infrastrutturi għandu jkollhom aċċess għas-sistemi ta’ saldu tat-titoli mħaddma mis-CSDs. |
Istituzzjonijiet ta’ kreditu
3.16 |
Meta saldu f'bank ċentrali ma jkunx prattiku jew disponibbli, is-CSDs jistgħu joffru lill-parteċipanti tagħhom saldu fi flus f'bank kummerċjali. Madanakollu, is-CSDs ma għandhomx jipprovdu s-servizzi bankarji anċillari għas-saldu huma stess, iżda għandhom ikunu awtorizzati mill-awtoritajiet kompetenti tagħhom sabiex jagħżlu istituzzjoni ta’ kreditu li taġixxi bħala aġent tas-saldu għall-ftuħ tal-kontijiet tal-flus u l-għoti ta’ faċilitajiet ta’ kreditu bil-għan li jiġi ffaċilitat is-saldu. |
3.17 |
Din is-separazzjoni bejn is-CSDs u l-aġenti tas-saldu hija miżura importanti sabiex tiġi indirizzata u tiżdied is-sikurezza tas-CSDs. Is-servizzi bankarji anċillari għas-saldu jżidu r-riskji li għalihom huma esposti s-CSDs u għaldaqstant iżidu l-probabilità li s-CSDs iġarrbu inadempjenza jew ikunu soġġetti għal stress qawwi. |
3.18 |
Filwaqt li ġeneralment is-servizzi bankarji jiġu pprovduti minn xi CSDs fuq il-bażi ta’ dakinhar (jiġu integralment koperti minn riżorsi kollaterali u minn riżorsi finanzjarji oħra) u huma limitati għas-servizzi anċillari għas-saldu, l-ammonti ġestiti xorta waħda huma sinifikanti u kwalunkwe inadempjenza ta’ CSDs bħal dawn ikollha konsegwenzi negattivi għas-swieq tat-titoli u tal-pagamenti. Ir-rekwiżit li s-servizzi bankarji jiġu fornuti f'entità legali separata minn dik li tipprovdi s-servizzi ewlenin tas-CSD ser jipprevjeni t-trażmissjoni tar-riskji mis-servizzi bankarji għall-forniment ta’ servizzi ewlenin tas-CSD, b'mod partikolari fil-każ ta’ insolvenza jew stress qawwi li jirriżultaw mis-servizzi bankarji. |
3.19 |
Għas-CSDs li diġà jipprovdu servizzi bankarji, l-ispejjeż ewlenin assoċjati ma’ din il-miżura huma l-ispejjeż legali involuti fit-twaqqif ta’ entità legali separata għall-forniment ta’ servizzi bankarji. Fil-fehma tal-Kümmissjoni, ma hemm l-ebda alternattiva inqas strinġenti għas-separazzjoni tas-servizzi bankarji, li tkun telimina kompletament il-periklu ta’ trażmissjoni ta’ riskji mis-servizzi bankarji għas-servizzi ewlenin tas-CSD. |
3.20 |
Sabiex jiġu żgurati l-effiċjenzi li jirriżultaw mid-dispożizzjoni ta’ servizzi kemm ta’ CSD kif ukoll bankarji fl-istess grupp ta’ intrapriżi, ir-rekwiżit li s-servizzi bankarji jitwettqu minn istituzzjoni ta’ kreditu differenti ma għandux jipprevjeni lil dik l-istituzzjoni ta’ kreditu milli tagħmel parti mill-istess grupp ta’ intrapriżi bħas-CSD. |
3.21 |
L-awtoritajiet kompetenti għandhom ikunu jistgħu juru każ b'każ li ma jeżistix riskju sistemiku li jinħoloq mill-forniment ta’ servizzi ta’ CSD kif ukoll bankarji mill-istess entità ġuridika. F'dan il-każ, tkun tista' ssir talba ġustifikata lill-Kummissjoni Ewropea li tista' tawtorizza deroga. Fi kwalunkwe każ, l-attivitajiet ta’ CSD liċenzjat bħala istituzzjoni ta’ kreditu għandhom ikunu limitati għall-forniment ta’ servizzi bankarji anċillari għas-saldu. |
Sanzjonijiet
3.22 |
Pereżempju, analiżi tar-reġimi superviżorji nazzjonali fis-seħħ uriet li l-livelli ta’ sanzjonijiet pekunarji jvarjaw ħafna fost l-Istati Membri, li wħud mill-awtoritajiet kompetenti ma għandhomx ċerti setgħat ta’ sanzjonar importanti għad-dispożizzjoni tagħhom u li xi awtoritajiet kompetenti ma jistgħux jimponu sanzjonijiet fuq persuni fiżiċi u ġuridiċi. Għaldaqstant, il-Kummissjoni qed tipproponi li sett minimu ta’ sanzjonijiet u miżuri amministrattivi għandu jkun disponibbli għall-awtoritajiet kompetenti, inklużi l-irtirar tal-awtorizzazzjoni, twissijiet pubbliċi, tkeċċija tal-maniġers, radd lura ta’ profitti miksuba mill-ksur ta’ dan ir-Regolament meta dawn ikunu jistgħu jiġu ddeterminati, u multi amministrattivi. |
4. Il-perspettiva tal-KESE
4.1 |
Il-KESE jilqa' din l-inizjattiva regolatorja. Bil-ħolqien tar-Regolament dwar is-CSDs, il-Kummissjoni ser tkun ikkompletat it-tliet pilastri tal-qafas il-ġdid tar-regolamentazzjoni dwar l-infrastruttura finanzjarja fl-UE: is-CSDs, l-EMIR u l-MiFID/MiFIR. Flimkien, dawn it-tliet strumenti jkopru s-suq b'mod mifrux u komprensiv. Il-Kummissjoni għandha toqgħod attenta li tiżgura li dawn l-istrumenti jorbtu tajjeb flimkien mingħajr ma jidħlu f'xulxin peress li dan jaf iwassal għal interpretazzjoni diverġenti tar-regoli l-ġodda. Huwa wkoll essenzjali li dawn l-inizjattivi leġislattivi differenti jkunu koerenti u konsistenti bejniethom fl-oqsma ewlenin. |
4.2 |
L-AETS ser tkun responsabbli għall-abbozzar tal-istandards tekniċi għal din il-leġislazzjoni l-ġdida, kif ukoll għaż-żewġ pilastri l-oħra. Il-Kumitat jinnota l-firxa tal-kompiti u r-responsabbilitajiet li qed jiġu allokati lill-AETS fi żmien relattivament qasir. Fost l-oħrajn, dawn jinkludu responsabbiltajiet fir-rigward tar-Regolament dwar l-Aġenziji tal-Klassifikazzjoni tal-Kreditu, is-superviżjoni tas-settur tal-awditjar, sehem fil-bejgħ bin-nieqes u fl-iswaps ta’ inadempjenza tal-kreditu, kif ukoll is-superviżjoni tad-Direttiva dwar l-AIFM. Huwa essenzjali li l-AETS jkollha persunal bil-ħiliet u l-esperjenza meħtieġa biex tkun tista' twettaq il-kompiti tagħha b'mod effettiv. |
4.3 |
Peress li l-kumpaniji tas-servizzi finanzjarji huma soġġetti għal regolazzjoni ġdida, superviżjoni ġdida, rekwiżiti prudenzjali ġodda, eċċ., ir-Regolamenti dwar is-CSDs ser ikomplu joħolqu sensiela ta’ tibdiliet għall-industrija. Il-KESE jappoġġja l-introduzzjoni ta’ dawn il-bidliet addizzjonali, iżda jħeġġeġ lil dawk inkarigati mir-regolazzjoni u s-superviżjoni, b'mod partikolari lill-AETS, sabiex joqogħdu attenti għall-problemi potenzjali jafu jiġu kkaġunati minn regolazzjoni eċċessiva. |
4.4 |
L-introduzzjoni tal-euro kienet katalizzatur għall-investiment transkonfinali fit-titoli u l-funzjonament tajjeb tal-investiment transkonfinali huwa bbażat fuq standards komuni madwar l-Unjoni. Livell għoli ta’ dixxiplina fir-rigward tas-saldu jnaqqas ir-riskju tal-kontraparti, jew b'mod aktar speċifiku r-riskju tal-likwidità u r-riskju tas-sostituzzjoni. Aktar importanti, jippromovi l-protezzjoni tal-investitur, billi jgħin biex it-tranżazzjonijiet bejn il-bejjiegħa u x-xerrejja tat-titoli jiġu saldati b'mod sikur u fil-ħin. F'dan ir-rigward, ir-Regolament huwa pass importanti 'l quddiem lejn it-twettiq tas-Suq Uniku. |
4.5 |
Fil-kuntest ukoll tas-Suq Uniku, il-KESE jilqa' l-proposta għall-għoti ta’ “passaport” lil CSDs awtorizzati peress li dan ser jgħin biex jitneħħew l-ostakli għall-aċċess u fl-istess ħin l-emittenti ser jingħataw id-dritt li jirreġistraw it-titoli tagħhom fi kwalunkwe CSD awtorizzat fl-UE. Dan it-tkissir tal-monopolji nazzjonali huwa wkoll ta’ min jilqgħu fis-Suq Intern. |
4.6 |
L-approċċ imsejjes fuq riskju baxx lejn id-definizzjoni tal-mudell ta’ negozju tas-CSDs, kif ukoll il-fatt li l-mudell fil-verità ser ikun limitat bir-regolazzjoni, jista' jkun mistenni jkollu effetti kemm pożittivi kif ukoll negattivi fuq il-kompetittività u l-innovazzjoni tas-CSDs. Il-ftuħ tas-suq transfruntier ser ikun bla dubju ta’ vantaġġ. Mill-bqija, is-CSDs għandhom permess joffru firxa ta’ servizzi kemm-il darba jikkontribwixxu għat-tisħiħ tas-sigurtà, l-effiċjenza u t-trasparenza tas-swieq tat-titoli. Barra minn hekk, u sabiex l-innovazzjoni tkompli tiġi stimolata, il-KESE jipproponi li s-CSDs ma jitħallewx ikunu s-sidien ta’ negozji li ma jaqgħux taħt l-ambitu ta’ CSD biss fil-każ li attivitajiet bħal dawn ikunu ta’ ħsara għall-profil tar-riskju tas-CSD. |
4.7 |
Bidla kbira proposta għall-ambitu tal-attivitajiet tas-CSDs hija l-projbizzjoni ta’ CSD milli jkun detentur ta’ liċenzja bankarja limitata. Dan ser jaffettwa lil żewġ CSDs kbar internazzjonali - Euroclear u Clearstream - li jużaw il-kapaċitajiet bankarji tagħhom biex jappoġġjaw il-proċess ta’ saldu u ta’ kustodja fuq skala kbira ħafna. L-ambitu tal-attivitajiet bankarji huwa limitat ferm, u rnexxielu jiffaċċja l-kriżi reċenti mingħajr problemi. Madankollu, il-KESE jagħraf li l-piż tal-opinjoni globali (G20, Kummissjoni Ewropea, IOSCO, eċċ.) huwa bil-kbir favur id-diviżjoni tal-istituzzjonijiet ta’ kreditu. Is-CSDs ser ikunu awtorizzati joħolqu bank b'ambitu limitat taħt sjieda ta’ grupp. Dan mhuwiex mistenni jwassal għal reviżjoni kbira tal-mudell ta’ negozju tas-CSDs. |
4.8 |
Minkejja l-fehma ddikjarata tal-Kummissjoni li ma hemm l-ebda alternattiva għas-separazzjoni tal-attività bankarja mill-ħidma ewlenija tas-CSDs, id-dispożizzjoni msemmija f'punt 3.21 hawn fuq tipprevedi deroga possibbli meta l-awtorità kompetenti nazzjonali tagħti l-appoġġ tagħha. Għad li l-possibiltà ta’ deroga teżisti, il-Kumitat jappoġġja lill-Kummissjoni u jemmen li l-aħjar soluzzjoni hija bank indipendenti. |
4.9 |
Il-proposti jitolbu d-dematerjalizzazzjoni tat-titoli negozzjabbli. Hemm perjodu ta’ tranżizzjoni li jispiċċa fl-2020. Madankollu, l-Istati Membri kisbu livelli differenti ta’ progress f'dan ir-rigward u jaf ikun hemm bżonn ta’ kompromess politiku. |
4.10 |
Proposta ewlenija oħra hija rekwiżit ta’ saldu uniformi fi żmien T+2. Filwaqt li dan aktarx jista' jinkiseb fis-Suq Intern, ser ikun hemm bżonn li jiġu indirizzati għadd ta’ problemi għat-tranżazzjonijiet globali. Dawn jinkludu l-kumplikazzjonijiet ikkawżati mill-kambju, il-possibbiltà li l-istokk ikun misluf, diskrepanzi bejn iż-żoni ta’ ħin, ċikli ta’ saldu differenti fis-swieq ta’ reġjuni oħra u l-ispiża sinifikanti li taf tkun involuta għall-awtomatizzazzjoni tas-sistemi sabiex it-T+2 jkun possibbli. |
4.11 |
Bażikament, ir-Regolament jitlob li s-CSDs kollha jistabbilixxu sistemi ta’ multi għall-parteċipanti li ma jsaldawx fil-ħin, imma dawn is-sistemi jridu jkunu adattati għall-istrument. Jekk tiġi applikata multa f'każ ta’ dewmien fil-kunsinna ta’ ishma nonlikwidi jew ishma ta’ SMEs, dan jaffettwa b'mod negattiv il-likwidità tagħhom fis-suq. Għandha titqies deroga għall-SMEs elenkati. L-abbozz ta’ Regolament ma jiddiskutix id-destinazzjoni tal-fondi miġbura permezz ta’ multi. |
Brussell, 11 ta’ Lulju 2012.
Il-President tal-Kumitat Ekonomiku u Soċjali Ewropew
Staffan NILSSON