MEMORANDUM TA’ SPJEGAZZJONI

Il-kummerċ ta' ċerti prodotti tal-azzar bejn il-Komunità Ewropea u l-Federazzjoni Russa kien jiġi rregolat permezz ta' Ftehim li jistabbilixxi wkoll il-kwoti għall-importazzjonijiet fl-Ewropa ta' azzar li joriġina mill-Federazzjoni Russa. Kif previst fl-Artikolu 10(4) tal-Ftehim, bid-dħul tal-Federazzjoni Russa fl-Organizzazzjoni Dinjija tal-Kummerċ (WTO) il-Ftehim għandu jintemm u l-kwoti jitneħħew.

Għaldaqstant, din il-proposta tipprevedi t-tneħħija tar-Regolament tal-Kunsill (KE) Nru 1342/2007 li jimplimenta dak il-Ftehim fl-Unjoni Ewropea u li jidħol fis-seħħ fil-ġurnata li l-Federazzjoni Russa tissieħeb fl-Organizzazzjoni Dinjija tal-Kummerċ.

2011/0315 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jħassar ir-Regolament tal-Kunsill (KE) Nru 1342/2007 dwar l-amministrazzjoni ta’ ċerti restrizzjonijiet fuq importazzjonijiet ta’ ċerti prodotti tal-azzar mill-Federazzjoni Russa

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 207 tiegħu,

Wara li kkunsidraw il-proposta tal-Kummissjoni Ewropea,

Wara t-trażmissjoni tal-abbozz tal-att leġiżlattiv lill-Parlamenti nazzjonali,

Filwaqt li jaġixxu skont il-proċedura leġiżlattiva ordinarja,

Billi:

(1)       Il-Ftehim ta' Sħubija u Kooperazzjoni li jistabbilixxi sħubija bejn il-Komunitajiet Ewropej u l-Istati Membri tagħhom minn naħa, u l-Federazzjoni Russa min-naħa l-oħra[1], minn hawn ’il quddiem imsejjaħ “il-FSK”, daħal fis-seħħ fl-1 ta' Diċembru 1997.

(2)       L-Artikolu 21(1) tal-FSK jipprevedi li l-kummerċ ta’ ċerti prodotti tal-azzar għandu jiġi rregolat mit-Titolu III ta’ dak il-Ftehim, għajr għall-Artikolu 15 tiegħu, u mid-dispożizzjonijiet ta’ ftehim dwar arranġamenti kwantitattivi.

(3)       Fis-26 ta’ Ottubru 2007, il-Komunità Ewropea u l-Gvern tal-Federazzjoni Russa kkonkludew it-tali Ftehim dwar il-kummerċ ta' ċerti prodotti tal-azzar[2], minn hawn ’il quddiem imsejjaħ “il-Ftehim”.

(4)       Fit-22 ta’ Ottubru 2007, il-Kunsill adotta r-Regolament (KE) Nru 1342/2007 dwar l-amministrazzjoni ta’ ċerti restrizzjonijiet fuq l-importazzjonijiet ta’ ċerti prodotti tal-azzar mill-Federazzjoni Russa[3] sabiex jimplimenta l-Ftehim.

(5)       Il-Ftehim jistipula li f'każ illi l-Federazzjoni Russa tissieħeb fl-Organizzazzjoni Dinjija tal-Kummerċ qabel l-iskadenza ta' dan il-Ftehim, il-Ftehim jintemm u b'konsegwenza ta' dan, mill-ġurnata stess tas-sħubija, jitneħħew il-limiti kwantitattivi.

(6)       Fid-data li fiha l-Federazzjoni Russa tissieħeb fl-Organizzazzjoni Dinjija tal-Kummerċ, ir-Regolament għall-implimentazzjoni tal-Ftehim ma jibqax meħtieġ. Ir-Regolament (KE) Nru 1342/2007 għandu għalhekk jitħassar b'effett minn dik id-data,

ADOTTAW DAN IR-REGOLAMENT:

Artikolu 1

Ir-Regolament (KE) Nru 1342/2007 hu b’dan mħassar.

Artikolu 2

Dan ir-Regolament għandu jidħol fis-seħħ l-għada tal-jum tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Għandu jidħol fis-seħħ fil-ġurnata li fiha l-Federazzjoni Russa tissieħeb fl-Organizzazzjoni Dinjija tal-Kummerċ.

Għal dan il-għan, il-Kummissjoni għandha tippubblika avviż f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

Għall-Parlament Ewropew                           Għall-Kunsill

Il–President                                                   Il-President

[1]               ĠU L 327, 28.11.1997, p. 3.

[2]               ĠU L 300, 17.11.2007, p. 52.

[3]               ĠU L 300, 17.11.2007, p. 1.