MEMORANDUM TA’ SPJEGAZZJONI Sabiex jissaħħaħ il-profil tas-sostenibbiltà tal-Portugall u jittaffew il-bżonnijiet ta’ likwidità tal-programm ekonomiku tiegħu u f’konformità mad-dikjarazzjoni li l-Kapijiet tal-Istat u tal-Gvern tal-pajjiżi taż-żona tal-euro u l-istituzzjonijiet Ewropej għamlu fil-21 ta’ Lulju 2011, id-Deċiżjoni ta’ Implimentazzjoni tal-Kunsill dwar l-għoti ta’ assistenza finanzjarja tal-Unjoni lill-Portugall (id-Deċiżjoni 2011/344/UE) għandha tiġi emendata. Dawn l-emendi għandhom x’jaqsmu, b’mod partikulari: i) mat-tnaqqis tal-marġni tal-imgħax għal żero, sabiex dan jinġieb f’konformità mal-faċilità tal-bilanċ tal-pagamenti, u ii) mal-estensjoni tal-maturità medja tal-faċilità kollha minn “sa 7,5 snin” għal “sa 12,5 snin”, billi l-maturitajiet tal-iżborżi individwali jiġu estiżi sabiex il-flus ikunu jistgħu jittieħdu skont il-programm tal-mekkaniżmu Ewropew ta’ stabbilizzazzjoni finanzjarja (l-EFSM) b’maturità massima ta’ 30 sena. It-tnaqqis fil-marġni se japplika għall-iżborżi kollha (jiġifieri kemm dawk li saru diġà kif ukoll dawk li għad iridu jsiru) u l-estensjoni tal-maturità medja se tinkiseb billi l-ammonti li se jitħallsu fil-ġejjieni jitħallsu abbażi ta’ maturitajiet itwal. Għall-ammonti li diġà tħallsu, il-maturitajiet ma jistgħux jiġu estiżi, minħabba li s-self tal-UE huwa tat-tip “back-to-back” (jiġifieri s-self mogħti jikkorrispondi għas-self meħud). Il-Kummissjoni se tiżgura li l-maturità tal-iżborżi fil-ġejjieni tipprovdi għall-ġestjoni t-tajba tal-marġni tal-baġit tal-UE. Bħalissa, is-self tal-EFSM mogħti lill-Portugall għandu marġni ta’ 215-il punt bażi u jippermetti maturità medja massima tal-faċilità kollha ta’ 7,5 snin, u l-iżborżi individwali għandhom maturitajiet li jvarjaw minn sentejn għal 15-il sena. Il-Portugall s’issa rċieva żewġ żborżi b’dawn it-termini li jimmaturaw fl-2021 (b’kupun ta’ 3,5 %) u fl-2016 (b’kupun ta’ 2,75%). Il-maturità medja tal-iżborżi tal-EFSM li l-Portugall ingħata s’issa hija ta’ 6,35 sena. Ta’ min jinnota li l-iffrankar li mistenni jkun hemm mit-tali emendi se jsaħħaħ is-sostenibbiltà u jtejjeb il-prospetti ta’ likwidità tal-programm. Barra minn hekk, hemm ukoll effetti indiretti marbutin mal-kunfidenza minħabba li l-implimentazzjoni tal-programm se ssir iktar kredibbli. Dan se jwassal għal kundizzjonijiet aħjar għas-self għall-istat li jkun qed jissellef, kif ukoll għal effetti sekondarji fis-settur privat. Dawn l-effetti indiretti huma ta’ benefiċċju kemm għall-pajjiżi li huma debituri kif ukoll għal dawk li huma kredituri. Fid-dawl tal-ispjegazzjonijiet mogħtija hawn fuq, il-Kummissjoni tħoss li dan it-tibdil, jiġifieri t-tnaqqis fil-marġni u l-estensjoni tal-maturità medja tas-self tal-EFSM mogħti lill-Portugall, huwa ta’ benefiċċju sabiex jinkisbu l-għanijiet tal-programm. 2011/0246 (NLE) Proposta għal DEĊIŻJONI TA’ IMPLIMENTAZZJONI TAL-KUNSILL li temenda d-Deċiżjoni ta’ Implimentazzjoni tal-Kunsill 2011/344/UE dwar l-għoti ta’ assistenza finanzjarja tal-Unjoni lill-Portugall IL-KUNSILL TAL-UNJONI EWROPEA, Wara li kkunsidra t-Trattat dwar il-Funzjonament tal-Unjoni Ewropea, Wara li kkunsidra r-Regolament tal-Kunsill (UE) Nru 407/2010 tal-11 ta’ Mejju 2010 li jistabbilixxi mekkaniżmu Ewropew ta’ stabbilizzazzjoni finanzjarja[1], u b’mod partikulari l-Artikolu 3(2) tiegħu, Wara li kkunsidra l-proposta tal-Kummissjoni Ewropea, Billi: 1. Fuq talba tal-Portugall, il-Kunsill ta assistenza finanzjarja lill-Portugall (id-Deċiżjoni ta’ Implimentazzjoni tal-Kunsill 2011/344/UE[2]) b’appoġġ għal programm b’saħħtu ta’ riforma ekonomika u finanzjarja bil-għan li tinkiseb il-fiduċja mill-ġdid biex b’hekk l-ekonomija tkun tista’ terġa’ lura għal sitwazzjoni ta’ tkabbir sostenibbli, u bil-għan li titħares l-istabbiltà finanzjarja fil-Portugall, fiż-żona tal-euro u fl-Unjoni Ewropea. 2. Estensjoni tal-maturitajiet u tnaqqis fil-marġni tal-imgħax se jkunu ta’ benefiċċju sabiex jinkisbu l-għanijiet tal-programm, skont il-konklużjonijiet tal-Kapijiet tal-Istat u tal-Gvern tal-pajjiżi taż-żona tal-euro u tal-istituzzjonijiet Ewropej tal-21 ta’ Lulju 2011. 3. Sabiex jissaħħu l-għanijiet tal-likwidità u tas-sostenibbiltà, din id-Deċiżjoni għandha tapplika wkoll għall-ħlasijiet individwali li saru diġà. 4. Fil-kuntest ta’ dawn l-iżviluppi, id-Deċiżjoni ta’ Implimentazzjoni tal-Kunsill 2011/344/UE għandha tiġi emendata, ADOTTA DIN ID-DEĊIŻJONI: Artikolu 1 L-Artikolu 1 tad-Deċiżjoni ta’ Implimentazzjoni tal-Kunsill 2011/344/UE għandu jiġi emendat kif ġej: (1) Il-paragrafu 1 għandu jinbidel b’dan li ġej: “1. L-Unjoni għandha tqiegħed għad-dispożizzjoni tal-Portugall self ta’ ammont massimu ta’ EUR 26 biljun, b’maturità medja massima ta’ 12,5 snin. Kull wieħed mill-ħlasijiet individwali tas-self jista’ jkollu maturità ta’ mhux aktar minn 30 sena.” (2) Il-paragrafu 5 għandu jinbidel b’dan li ġej: “5. Għal kull ħlas individwali, il-Portugall għandu jħallas l-ispiża tal-finanzjament tal-Unjoni.” Artikolu 2 L-ewwel sentenza tal-Artikolu 1(1) u l-Artikolu 1(2) għandhom japplikaw ukoll għall-ħlasijiet individwali tas-self li saru qabel id-dħul fis-seħħ ta’ din id-Deċiżjoni. Artikolu 3 Din id-Deċiżjoni hija indirizzata lir-Repubblika Portugiża. Artikolu 4 Din id-Deċiżjoni għandha tiġi ppubblikata f’ Il-Ġurnal Uffiċjali tal-Unjoni Ewropea . Magħmul fi Brussell, Għall-Kunsill Il-President [1] ĠU L 118, 12.5.2010, p. 1. [2] ĠU L 159, 17.6.2011, p. 88.