MEMORANDUM TA’ SPJEGAZZJONI

1.           KUNTEST TAL-PROPOSTA

Kuntest ġenerali

Il-promozzjoni ta’ ekonomija li tuża r-riżorsi b’mod iżjed effiċjenti, li tkun aktar ekoloġika u li tkun iżjed kompetittiva hija fil-qofol tal-istrateġija Ewropa 2020[1]. F’dan il-kuntest huwa importanti li jitnaqqas aktar it-tniġġis tal-arja sabiex jittejbu s-saħħa tal-bniedem u l-ambjent u jikkontribwixxi għall-kisba ta’ Ewropa iżjed sostenibbli. L-azzjonijiet tal-UE matul dawn l-aħħar għexieren ta’ snin irriżultaw fi tnaqqis konsiderevoli tal-emissjonijiet tal-biċċa l-kbira tas-sustanzi li jniġġsu l-arja, fosthom id-diossidu tal-kubrit (SO2), l-ossidi tan-nitroġenu (NOx), il-komposti organiċi volatili, l-ammonja u l-materja partikulata (PM). L-akbar sehem ta’ dan it-tnaqqis inkiseb minn sorsi ta’ emissjonijiet fuq l-art, bħal impjanti industrijali jew it-trasport bit-triq. L-evidenza turi li tnaqqis ulterjuri ta’ dawn is-sustanzi li jniġġsu joffri benefiċċji sinifikanti għas-saħħa taċ-ċittadini tal-UE, l-ambjent, u l-ekonomija b’mod ġenerali.

Storikament, ingħatat inqas attenzjoni sabiex jiġu indirizzati s-sorsi ta’ emissjonijiet marittimi meta mqabbel mas-sorsi bbażati fuq l-art. Madankollu, billi l-emissjonijiet marittimi tas-sustanzi li jniġġsu l-arja jistgħu jivvjaġġaw distanzi kbar, huma għandhom impatt fuq l-art. Tbassir li sar fl-2005 wera li mingħajr azzjoni regolatorja ulterjuri, sal-2020 iż-żieda kontinwa fl-emissjonijiet ta’ SO2 u NOx mis-settur marittimu se taqbeż l-emissjonijiet totali ta’ dawn is-sustanzi li jniġġsu mis-sorsi kollha bbażati fuq l-art[2].

Raġunijiet għal u għanijiet tal-proposta

Il-kontenut ta’ kubrit ta' fjuwil likwidu jiddetermina l-emissjonijiet ta’ SO2 relatati mal-kombustjoni ta’ dak il-fjuwil, kif ukoll il-formazzjoni ta’ materja partikulata (PM) (sekondarja). Id-Direttiva 1999/32/KE kif emendata, tirregola l-kontenut ta’ kubrit fil-fjuwils użati mit-trasport marittimu u tinkorpora ċerti regoli, maqbula taħt l-Organizzazzjoni Marittima Internazzjonali (IMO), fil-liġi tal-UE. B’mod partikolari, id-Direttiva tinkorpora regoli iżjed stretti dwar il-kontenut ta’ kubrit ta' fjuwils tal-baħar li jkunu se jintużaw f’żoni li jeħtieġu protezzjoni ambjentali speċjali, iż-Żoni ta’ Kontroll tal-Emissjonijiet tal-Kubrit[3] (SECAs).

Mill-emenda tad-Direttiva fl-2005, u b’appoġġ qawwi mill-UE, ir-regoli tal-IMO, fost l-oħrajn fir-rigward tal-SO2, ġew riveduti f’Ottubru 2008. Dawn ir-regoli jinsabu fl-Anness VI tal-Konvenzjoni dwar it-Tniġġis tal-Baħar 73/78 (l-Anness VI rivedut tal-MARPOL)[4]. Diġà fiż-żmien tal-adozzjoni tal-emenda tad-Direttiva li saret fl-2005, il-koleġiżlaturi tal-UE, li kienu qed jistennew il-ħtieġa ta’ iżjed tnaqqis fl-emissjonijiet mit-trasport marittimu, talbu lill-Kummissjoni biex tirrevedi r-rekwiżiti legali fir-rigward tal-kontenut ta’ kubrit tal-fjuwils likwidi.

Konsistenza ma’ politiki u għanijiet oħra tal-Unjoni

Din il-proposta hija konsistenti mal-Artikolu 191 tat-Trattat dwar il-Funzjonament tal-Unjoni Ewropea (TFUE) u għandha l-għan li tipprovdi livell għoli ta’ protezzjoni għas-saħħa tal-bniedem u l-ambjent. Barra minn hekk hija konsistenti mal-Istrateġija UE 2020 u l-inizjattivi ewlenin assoċjati magħha, b’mod partikolari dawk relatati mal-pjanijiet direzzjonali għal soċjetà b’livell baxx ta’ emissjonijiet tal-karbonju u l-unjoni tal-innovazzjoni, kif ukoll l-inizjattivi eżistenti tal-UE għal trasport sostenibbli.

2.           RIŻULTATI TAL-KONSULTAZZJONIJIET MAL-PARTIJIET INTERESSATI U L-VALUTAZZJONI TAL-IMPATT

Konsultazzjoni pubblika

Bi preparazzjoni għal din l-emenda, il-Kummissjoni wettqet konsultazzjoni online miftuħa għall-partijiet kollha interessati (fosthom organizzazzjonijiet, l-Istati Membri, NGOs, il-pubbliku ġenerali) matul il-perjodu mid-29 ta’ Ottubru 2010 sal-5 ta’ Jannar 2011. Il-partijiet interessati ntalbu jesprimu l-opinjonijiet tagħhom dwar l-inkorporazzjoni possibbli tal-aħħar regoli rilevanti tal-IMO fil-leġiżlazzjoni tal-UE. Minbarra l-konsultazzjoni pubblika, il-Kummissjoni kkonsultat ukoll b’mod regolari lir-rappreżentanti tal-Istati Membri u partijiet interessati oħra.

Il-konsultazzjoni pubblika pproduċiet 244 risposta minn diversi organizzazzjonijiet. Il-kontribut importanti tal-Anness VI rivedut tal-MARPOL għat-titjib tal-kwalità tal-arja fl-UE ġie rikonoxxut b’mod estensiv mill-partijiet kollha interessati. Skont il-maġġoranza ta' dawk li wieġbu, id-dispożizzjonijiet tal-UE dwar it-teknoloġiji għat-tnaqqis tal-emissjonijiet għandhom jiġu allinjati mal-Anness VI rivedut tal-MARPOL. Il-firxa wiesgħa ta’ miżuri għat-tnaqqis tal-emissjonijiet għandha fil-fehma tagħhom titħalla, filwaqt li jiġu żgurati salvagwardji xierqa għall-ambjent. B’mod ġenerali dawk li wieġbu qablu wkoll li t-tisħiħ u l-armonizzazzjoni tal-monitoraġġ u l-infurzar tal-istandards dwar il-kubrit huwa strument importanti li jiżgura li jinkiseb it-titjib ambjentali intenzjonat. Xi partijiet interessati esprimew tħassib dwar l-ispejjeż tar-rekwiżiti l-ġodda u r-riskju potenzjali tal-bidliet modali (mit-trasport marittimu fuq distanzi qosra għal trasport bit-trakkijiet), b’mod partikolari f’żoni fejn l-istandards dwar il-kubrit huma iżjed stretti (SECAs). Oħrajn enfasizzaw il-ħtieġa għal azzjoni immedjata tal-UE sabiex tinkoraġġixxi r-rispons mill-industrija u tissalvagwardja l-benefiċċji ambjentali tal-Anness VI rivedut tal-MARPOL.

Informazzjoni iżjed dettaljata dwar ir-riżultati tal-konsultazzjoni pubblika hija ppreżentata fil-Valutazzjoni tal-Impatt li takkumpanja din il-proposta[5].

Għarfien espert estern u informazzjoni pubblika

Saru diversi studji b’appoġġ għax-xogħol ta' tħejjija li wassal għal din il-proposta. Dawn l-istudji saru disponibbli malli tlesta s-sit elettroniku tal-Kummissjoni ddedikat għall-politiki dwar l-emissjonijiet mit-trasport marittimu: http://ec.europa.eu/environment/air/transport/ships_directive.htm.

Ir-riżultati tal-valutazzjoni tal-impatt

Il-valuri tal-limiti internazzjonali l-ġodda għall-kontenut tal-kubrit tal-fjuwils tal-baħar huma mistennija li jnaqqsu b’mod sinifikanti l-emissjonijiet tad-diossidi tal-kubrit mis-settur marittimu. Dan se jikkontribwixxi b’mod konsiderevoli sabiex jintlaħqu l-miri ambjentali ġenerali ddikjarati fl-Istrateġija Tematika tal-2005 dwar it-Tniġġis tal-Arja kif ukoll l-għanijiet speċifiċi indikati fid-Direttiva. Barra minn hekk se jipproduċi benefiċċji anċillari importanti f’termini ta’ tnaqqis tal-materja partikulata u l-NOx (prekursur importanti tal-ożonu fil-livell tal-art). Huwa essenzjali li dawn il-benefiċċji previsti jseħħu, mhux l-anqas sabiex tiġi promossa l-konformità mal-valuri tal-limitu eżistenti dwar il-kwalità tal-arja tal-ambjent.

Il-valutazzjoni tal-impatt tikkonferma l-kosteffettività tal-allinjament sħiħ tad-Direttiva mal-istandards aktar stretti tal-IMO dwar il-fjuwils u r-regoli dwar il-metodi ta’ tnaqqis tal-emissjonijiet. Skont is-sejbiet tagħha, ir-reviżjoni tal-2008 tal-Anness VI tal-MARPOL toffri madwar EUR 15 sa EUR 34 biljun f’benefiċċji għall-UE f’titjib fis-saħħa u tnaqqis fil-mortalità. L-ispejjeż tal-implimentazzjoni tar-reviżjoni jvarjaw minn EUR 2.6 sa EUR 11-il biljun. Bħala tali, ir-reviżjoni toffri benefiċċji li huma minn tlieta sa tlettax-il darba akbar mill-ispejjeż.

Minbarra l-allinjament tad-Direttiva mar-regoli tal-IMO, il-valutazzjoni tal-impatt tirrakkomanda li tinżamm ir-rabta bejn l-istandards aktar stretti għall-fjuwils fis-SECAs u dawk applikabbli għall-vapuri tal-passiġġieri fuq servizz regoli barra s-SECAs. Madankollu, l-introduzzjoni ta’ standard SECA ġdid għall-vapuri tal-passiġġieri se tiġi ttardjata b’ħames (5) snin sabiex jiġu evitati problemi potenzjali bid-disponibbiltà tal-fjuwil. Il-proporzjonijiet tal-benefiċċji u l-kostijiet għal din l-għażla jvarjaw minn 1.5 sa 6 (jekk l-istandard ta’ 0.1% jiddaħħal fl-2020) u minn 0.8 sa 10 (jekk l-istandard ta’ 0.1 % jiddaħħal fl-2025).

Barra minn hekk, il-valutazzjoni tal-impatt analizzat il-kwistjonijiet identifikati matul ir-reviżjoni tad-Direttiva. B’mod partikolari, hija wriet li jeżistu ċerti dgħufijiet fid-dispożizzjonijiet dwar l-infurzar tad-Direttiva (b’mod partikolari fir-rigward tat-teħid ta’ kampjuni u r-rappurtar). Il-valutazzjoni tal-impatt tissuġġerixxi li l-ewwel tiġi żviluppata gwida dwar il-monitoraġġ u l-implimentazzjoni tad-Direttiva u, jekk dan l-approċċ ifalli, tiġi kkunsidrata l-adozzjoni ta’ regoli vinkolanti.

Fl-aħħar nett, il-valutazzjoni tal-impatt tirrakkomanda wkoll li l-Kummissjoni Ewropea u l-Istati Membri jużaw u, fejn ikun possibbli u meħtieġ, jadattaw l-istrumenti eżistenti, sabiex jgħinu lill-industrija fit-tranżizzjoni lejn l-aqwa standards teknoloġiċi ġodda disponibbli, inklużi dawk maqbula fl-IMO jew organizzazzjonijiet oħra rilevanti (b’mod partikolari għall-NOx, il-PM, u l-GHG).

3.           ELEMENTI LEGALI TAL-PROPOSTA

Sommarju tal-azzjoni proposta

L-għan ta’ din il-proposta huwa li tiġi riveduta d-Direttiva 99/32/KE dwar il-kontenut tal-kubrit ta' ċerti fjuwils likwidi bl-għan li:

(1) Tallinja d-Direttiva mar-regoli tal-IMO dwar l-istandards tal-fjuwils, fosthom l-istandards applikabbli barra s-SECAs.

(2) Tallinja d-Direttiva mar-regoli tal-IMO dwar il-metodi għat-tnaqqis tal-emissjonijiet.

(3) Iżżomm ir-rabta bejn l-istandards aktar stretti dwar il-fjuwils fis-SECAs (li issa jeħtieġu kontenut massimu ta’ 1.5 % kubrit fil-fjuwil tal-baħar u mill-2015 - 0.1 %) u dawk applikabbli għall-vapuri tal-passiġġieri fuq servizz regolari barra s-SECAs (attwalment 1.5 %).

(4) Issaħħaħ is-sistema ta’ monitoraġġ u infurzar tal-UE.

L-integrazzjoni tal-istandards internazzjonali dwar il-fjuwils fil-liġi tal-UE ssaħħaħ l-effikaċja ta’ dawn l-istandards billi dawn ikunu mmonitorjati u infurzati taħt is-sistema tal-UE, li hija iżjed effettiv mis-sistema tal-infurzar internazzjonali. L-aċċess estiż propost għal, u l-promozzjoni tal-użu ta’ metodi innovattivi għat-tnaqqis tal-emissjonijiet bħala għażla ekwivalenti ta’ konformità, jindirizzaw it-tħassib dwar l-implikazzjonijiet tal-ispejjeż li jirriżultaw mir-regoli l-ġodda tal-IMO għal ċerti industriji. Dan għandu jbaxxi b’mod sinifikanti l-ispejjeż tal-konformità tal-IMO (b’50 % sa 88 %) u jippromwovi soluzzjonijiet innovattivi mill-industrija, bi qbil mal-prijoritajiet tal-Istrateġija Ewropa 2020 u l-Artikolu 3 tat-Trattat dwar l-Unjoni Ewropea (TUE). Barra minn hekk, standards aktar stretti dwar il-fjuwils għall-vapuri tal-passiġġieri fuq servizz regolari, li joperaw l-aktar fil-portijiet jew qrib il-kosta, jiżguraw titjib tal-kwalità tal-arja fiż-żoni kostali. L-introduzzjoni tal-istandard aktar strett tal-fjuwils għall-vapuri tal-passiġġieri sejra tiġi ttardjata b’ħames (5) snin meta mqabbla mas-SECAs, sabiex jiġu evitati l-problemi potenzjali bid-disponibbiltà tal-fjuwils. Fl-aħħar nett, it-tisħiħ tas-sistema ta’ monitoraġġ u infurzar tal-UE huwa partikolarment importanti meta jitqies li l-istandards konsiderevolment aktar stretti dwar il-fjuwils u l-ispejjeż assoċjati tal-konformità jistgħu jżidu l-inċentivi għal evażjoni.

Dawn l-azzjonijiet se jiżguraw implimentazzjoni u infurzar aħjar tad-Direttiva mill-awtoritajiet nazzjonali u konformità iżjed faċli mill-industrija u għandhom iwasslu għal livell għoli ta’ ħarsien ambjentali.

Bażi legali

L-għan primarju tad-Direttiva huwa l-ħarsien tal-ambjent. Din il-proposta għalhekk hija bbażata fuq l-Artikolu 192 tat-TFUE.

Prinċipju tas-sussidjarjetà

Id-dritt tal-UE li tirregola l-kontenut ta’ kubrit ta' fjuwils likwidi li għandhom impatt sinifikanti fuq is-suq intern u l-ambjent huwa stabbilit fit-TFUE. L-Artikolu 3 tat-TUE jistipula li "L-Unjoni għandha tistabbilixxi suq intern. Hija għandha taħdem għall-iżvilupp sostenibbli tal-Ewropa mibni fuq tkabbir ekonomiku bilanċjat u stabbiltà tal-prezzijiet, ekonomija soċjali tas-suq kompetittiva ħafna, intiża li twassal għal livell massimu ta’ impjieg u progress soċjali, u livell għoli ta’ protezzjoni u ta’ titjib tal-kwalità tal-ambjent". Barra minn hekk, l-Artikolu 191 tat-TFUE jsostni li "Il-politika tal-Unjoni dwar l-ambjent għandha tikkontribwixxi sabiex […] is-salvagwardja, il-ħarsien u t-titjib tal-kwalità tal-ambjent, il-ħarsien tas-saħħa tal-bniedem, l-użu għaqli u razzjonali tar-riżorsi naturali, il-promozzjoni ta’ miżuri fil-livell internazzjonali sabiex jitrattaw problemi ambjentali reġjonali jew globali […]".

Id-dimensjoni globali tat-trasport marittimu u impatt transkonfinali tat-tniġġis tal-arja rilaxxat mill-kombustjoni ta’ fjuwils li fihom il-kubrit jesiġu li jiġu stabbiliti regoli komuni għall-Istati Membri kollha. Fin-nuqqas ta’ regoli bħal dawn, japplikaw standards nazzjonali differenti għall-vapuri li joperaw fl-ilmijiet tal-UE. Frammentazzjoni legali bħal din tagħmel it-tħaddim ta’ industrija tat-trasport marittimu fl-UE kkumplikat ħafna u jiswa ħafna flus, u għalhekk tgħawweġ is-suq intern.

Hija biss azzjoni armonizzata fil-livell tal-UE, bis-sistema ta’ monitoraġġ u infurzar tagħha msaħħa, li tista’ tiżgura implimentazzjoni u applikazzjoni effettiva tal-istandards internazzjonali tal-fjuwils fl-Istati Membri kollha[6].

Spjegazzjoni dettaljata tal-proposta

Artikolu 1

Dan l-Artikolu jispjega kull waħda mill-emendi proposti għad-Direttiva 1999/32/KE.

(1) L-Artikolu 2 tad-Direttiva 1999/32/KE ġie emendat sabiex jadatta d-definizzjonijiet ta’ żejt tad-diżil tal-baħar u żejt tal-gass tal-baħar skont l-aħħar standard tal-ISO u sabiex jestendi d-definizzjoni tal-metodu tat-tnaqqis tal-emissjonijiet u jallinjah mad-definizzjoni tal-ekwivalenti fir-Regolament 4 tal-Anness VI rivedut tal-MARPOL.

(2) L-Artikolu 3 ġie emendat sabiex jirrevedi d-dispożizzjonijiet dwar il-kontenut massimu ta’ kubrit taż-żejt tal-fjuwil tqil wara l-adozzjoni tad-Direttiva 2010/75 tal-Parlament Ewropew u tal-Kunsill tal-24 ta’ Novembru 2010 dwar l-emissjonijiet industrijali (il-prevenzjoni u l-kontroll integrati tat-tniġġis)[7], li tirriformula l-leġiżlazzjoni Ewropea dwar l-emissjonijiet industrijali.

(3) L-Artikolu 3a qed jiżdied biex jiżgura li l-fjuwils tal-baħar ma jintużawx jew ma jitqiegħdux fis-suq minn Stati Membri jekk il-kontenut ta' kubrit jaqbeż l-istandard ġenerali ta' 3.5 % skont il-piż. B'mod partikolari din id-dispożizzjoni tindirizza r-riskju li l-possibbiltà li jintuża żejt tal-fjuwil tqil flimkien ma' metodi ta' tnaqqis tal-emissjonijiet minflok distillati ta' fjuwils b'livell baxx ta' kubrit tista' tirriżulta fl-użu u t-tqegħid fis-suq ta' fjuwil ta' kwalità baxxa. Il-metodi tat-tnaqqis tal-emissjonijiet jippermettu d-desulfurizazzjoni ta' fjuwil b’livell għoli ta’ kubrit u t-tnaqqis tal-emissjonijiet ta’ diossidu tal-kubrit fl-arja. Madankollu, jekk għat-tnaqqis jintuża fjuwil ta’ kwalità baxxa b’kontenut għoli ta’ kubrit, dan jista’ jirriżulta fir-rimi ta’ drenaġġ ta’ densità għolja u jkollu effetti negattivi fuq l-ambjent tal-baħar. Il-fatt li tiġi żgurata kwalità minima tal-fjuwil għandu l-għan ukoll li jipprevjeni r-riskju ta’ ħsara fil-magna tal-vapuri;

(4) L-Artikolu 4 dwar il-kontenut massimu ta’ kubrit fiż-żejt tal-gass ġie emendat sabiex jitħassru r-referenzi għad-dati tad-dħul fis-seħħ tal-limiti ta’ kubrit li ma għadhomx validi.

(5) L-Artikolu 4a ġie emendat biex:

– Tiddaħħal dispożizzjoni ġdida dwar l-istandard għall-kubrit fil-fjuwils applikabbli barra s-SECAs ("standard ġenerali");

– L-istandards dwar il-kubrit fil-fjuwils applikabbli fis-SECAs jiġu allinjati mal-Anness VI rivedut tal-MARPOL;

– Fl-2020 jiddaħħal limitu ta’ kubrit ta' 0.1 % għall-vapuri tal-passiġġieri li joperaw barra s-SECAs, u b’hekk terġa’ tiġi stabbilita r-rabta tar-rekwiżiti għall-vapuri tal-passiġġieri li joperaw barra s-SECAs ma’ dawk għas-SECAs;

– Jiġi ċċarat li r-reġistru tal-fornituri lokali ta’ fjuwil tal-baħar li l-Istati Membri huma obbligati li jżommu għandu jkun disponibbli għall-pubbliku;

– Jitneħħew ir-referenzi skaduti;

– Il-Kummissjoni tingħata s-setgħa li tiddeżinja SECAs ġodda fuq il-bażi tad-deċiżjoni tal-IMO.

(6) L-Artikolu 4b ġie emendat sabiex iħassar l-eżenzjoni mill-obbligu stabbilit fl-Artikolu 4b(1) għal ċerti bastimenti li joperaw fir-Repubblika Ellenika, billi l-perjodu li għalih ingħatat skada, u biex jitħassru r-referenzi għad-dati tad-dħul fis-seħħ tal-limiti tal-kubrit li ma għadhomx validi.

(7) L-Artikolu 4c ġie emendat u żdiedu l-Artikoli 4d u 4e sabiex id-Direttiva tiġi allinjata mal-Anness VI rivedut tal-MARPOL u biex tiġi adattata għall-progress tekniku. B’mod partikolari, id-Direttiva proposta tesiġi li l-Istati Membri jippermettu lill-vapuri jużaw metodi ta’ tnaqqis tal-emissjonijiet bħala alternattiva għall-użu ta’ fjuwils tal-baħar b’livell baxx ta’ kubrit bil-kundizzjoni li jiksbu kontinwament tnaqqis fl-emissjonijiet tad-diossidu tal-kubrit li jkunu ekwivalenti għal dawk li jinkisbu bl-użu ta’ fjuwil b’livell baxx ta’ kubrit. L-użu ta’ metodi tat-tnaqqis tal-emissjonijiet huwa suġġett ukoll għal ċerti kriterji sabiex ikun żgurat li dawn il-metodi ma jirriżultawx f'impatti negattivi sinifikanti fuq is-saħħa tal-bniedem u l-ambjent u jkunu ta' riskju għalihom. Il-kriterji se jiġu stabbiliti jew mill-IMO, suġġett għal supplimentazzjoni jew emenda bid-Deċiżjoni tal-Kummissjoni jew, fin-nuqqas tal-istrumenti tal-IMO, mill-Kummissjoni Ewropea. Il-metodi ta’ tnaqqis tal-emissjonijiet għall-użu minn vapuri li jtajru l-bandiera tal-Istati Membri se jiġu approvati jew fuq il-bażi tad-Direttiva 96/98/KE tal-20 ta’ Diċembru 1996 dwar it-tagħmir marittimu[8] jew fuq il-bażi ta’ din id-Direttiva, mill-Kumitat dwar l-Ibħra Protetti [Sikuri] u l-Prevenzjoni ta’ Tniġġis minn Bastimenti li ġie stabbilit bir-Regolament 2099/2002/KE. Il-proċedura u l-kundizzjonijiet għall-ittestjar ta’ metodi ġodda ta' tnaqqis tal-emissjonijiet baqgħu l-istess.

(8) L-Artikolu 6 ġie emendat sabiex jagħti s-setgħa lill-Kummissjoni li tispeċifika l-frekwenza tat-teħid ta’ kampjuni, il-metodi tat-teħid tal-kampjuni u d-definizzjoni ta’ kampjun rappreżentattiv tal-fjuwil eżaminat kif ukoll sabiex tistabbilixxi l-kontenut ta’ kubrit u l-proċedura ta’ verifika tal-fjuwil skont l-istandards tekniċi internazzjonali l-aktar reċenti.

(9) L-Artikolu 7 ġie emendat sabiex jiċċara l-ambitu tar-rapport, li għandu jiġi sottomess lill-Kummissjoni mill-Istati Membri, dwar il-kontenut ta’ kubrit fil-fjuwils koperti mid-Direttiva u biex jagħti s-setgħa lill-Kummissjoni li tispeċifika l-format u l-kontenut tar-rapport. L-emenda tallinja wkoll il-paragrafu 4 tal-Artikolu 7 dwar l-adattamenti tad-dispożizzjonijiet rilevanti tad-Direttiva fir-rigward tal-progress xjentifiku u tekniku mar-regoli l-ġodda ta’ komitoloġija skont it-Trattat ta’ Lisbona.

(10) L-Artikolu 8 għandu jitħassar billi jirreferi għal Direttiva li tħassret.

(11) L-Artikolu 9 għandu jitħassar billi d-Direttiva ma tipprovdix għal atti ta’ implimentazzjoni.

(12) L-Artikolu 9a għandu jiżdied biex jipprovdi għall-kundizzjonijiet għall-eżerċitar tas-setgħa, mill-Kummissjoni Ewropea, li tadotta atti ta' delega.

Artikolu 2

Dan l-Artikolu jesiġi li l-Istati Membri jittrasponu d-Direttiva proposta.

Artikolu 3

Dan l-Artikolu jikkonċerna d-data tad-dħul fis-seħħ tad-Direttiva proposta.

Artikolu 4

Dan l-Artikolu jindirizza d-Direttiva proposta lill-Istati Membri.

4.           IMPLIKAZZJONI BAĠITARJA

Il-proposta ma għandha l-ebda implikazzjoni baġitarja għall-baġit tal-Unjoni.

5.           KUMMENTI OĦRA

Il-proposta tal-Kummissjoni hija akkumpanjata mill-Komunikazzjoni li, fit-taqsima 4, tagħmel suġġerimenti għal strateġiji ta’ konformità u tiddeskrivi l-għodod eżistenti u l-miżuri futuri possibbli li jistgħu jgħinu lill-industrija tilħaq l-isfidi ambjentali tagħha.

Il-Kummissjoni tipprevedi wkoll li tikkodifika d-Direttiva 1999/32/KE u l-emendi sussegwenti tagħha, fosthom din il-proposta għal emenda, ladarba tiġi adottata mill-Parlament Ewropew u l-Kunsill. B'hekk id-Direttiva 1999/32/KE tkun tista' tinqara aktar faċilment u tkun iżjed ċara legalment u tikkontribwixxi għall-kisba tal-istrateġija tal-UE għal regolamentazzjoni aħjar.

2011/0190 (COD)

Proposta għal

DIRETTIVA TAL-PARLAMENT EWROPEW U TAL-KUNSILL

li temenda d-Direttiva 1999/32/KE fir-rigward tal-kontenut ta’ kubrit fil-fjuwils tal-baħar

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 192(1) tiegħu,

Wara li kkunsidraw il-proposta mill-Kummissjoni Ewropea[9],

Wara t-trażmissjoni tal-abbozz ta’ att leġiżlattiv lill-Parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew[10],

Wara li kkunsidraw l-opinjoni tal-Kumitat tar-Reġjuni[11],

Filwaqt li jaġixxu skont il-proċedura leġiżlattiva ordinarja,

Billi:

(1) Il-politika ambjentali tal-Unjoni, kif stabbilita fil-programmi ta’ azzjoni dwar l-ambjent u b’mod partikolari s-Sitt Programm ta’ Azzjoni Ambjentali li ġie adottat bid-Deċiżjoni Nru 1600/2002/KE tal-Parlament Ewropew u tal-Kunsill[12], għandha bħala wieħed mill-għanijiet tagħha l-kisba ta’ livelli ta’ kwalità tal-arja li ma joħolqux impatti negattivi sinifikanti fuq is-saħħa tal-bniedem u l-ambjent kif ukoll li ma jkunux ta' riskju għalihom.

(2) Id-Direttiva tal-Kunsill 1999/32/KE tas-26 ta’ April 1999 dwar it-tnaqqis fil-kontenut tal-kubrit f’ċerti karburanti [fjuwils] likwidi u li temenda d-Direttiva 93/12/KEE[13] tistabbilixxi l-kontenut massimu permess ta’ kubrit ta' żejt tal-fjuwil tqil, iż-żejt tal-gass u ż-żejt tal-gass tal-baħar użati fl-Unjoni.

(3) L-emissjonijiet mit-trasport marittimu minħabba l-kombustjoni ta’ fjuwils tal-baħar b’kontenut għoli ta’ kubrit jikkontribwixxu għat-tniġġis tal-arja fil-forma ta’ diossidu tal-kubrit u materja partikulata, li jagħmlu ħsara lis-saħħa tal-bniedem u jikkontribwixxu għall-aċidifikazzjoni.

(4) Skont id-Direttiva 1999/32/KE, il-Kummissjoni trid tirrapporta lill-Parlament Ewropew u lill-Kunsill dwar l-implimentazzjoni tad-Direttiva u tressaq kwalunkwe proposta għal emendi, b’mod partikolari fir-rigward tat-tnaqqis tal-limiti ta’ kubrit għall-fjuwil tal-baħar f’Żoni ta’ Kontroll għall-Emissjonijiet tal-SOx (SECAs), billi tikkunsidra l-ħidma fi ħdan l-Organizzazzjoni Marittima Internazzjonali (IMO).

(5) Fl-2008, ġiet adottata Riżoluzzjoni sabiex jiġi emendat l-Anness VI tal-Protokoll tal-1997 sabiex jemenda l-Konvenzjoni Internazzjonali għall-Prevenzjoni tat-Tniġġis mill-Vapuri, 1973, kif modifikata mill-Protokoll tal-1978 relatat magħha (minn hawn ’il quddiem MARPOL), li tinkludi regolament għall-prevenzjoni tat-tniġġis tal-arja mill-vapuri. L-Anness VI rivedut tal-MARPOL daħal fis-seħħ fl-1 ta’ Lulju 2010.

(6) L-Anness VI rivedut tal-MARPOL jintroduċi, fost l-oħrajn, limiti aktar stretti għall-kubrit tal-fjuwils tal-baħar fis-SECAs (1.00 % mill-1 ta’ Lulju 2010 u 0.10 % mill-1 ta’ Jannar 2015) kif ukoll fiż-żoni tal-baħar barra s-SECAs (3.5 % mill-1 ta’ Jannar 2012 u, fil-prinċipju, 0.50 % mill-1 ta’ Jannar 2020). Il-maġġoranza tal-Istati Membri huma obbligati jesiġu li l-vapuri jużaw fjuwil b’kontenut ta’ kubrit ta’ mhux aktar minn 1.00 % fis-SECAs mill-1 ta’ Lulju 2010 fuq il-bażi tal-impenji internazzjonali tagħhom. Sabiex tiġi żgurata l-koerenza mal-liġi internazzjonali kif ukoll sabiex jiġi żgurat infurzar korrett tal-istandards il-ġodda għall-kubrit li ġew stabbiliti b’mod globali fl-Unjoni, id-dispożizzjonijiet tad-Direttiva 1999/32/KE għandhom jiġu allinjati mal-Anness VI rivedut tal-MARPOL. Sabiex tiġi żgurata l-kwalità minima tal-fjuwil użat mill-vapuri għal konformità abbażi tal-fjuwil jew tat-teknoloġija, ma għandux jitħalla jintuża jew jitqiegħed fis-suq tal-Unjoni fjuwil tal-baħar li l-kontenut ta’ kubrit tiegħu jaqbeż l-istandard ġenerali ta’ 3.5 % skont il-massa.

(7) Il-vapuri tal-passiġġieri joperaw l-aktar fil-portijiet jew qrib żoni kostali u l-impatti tagħhom fuq is-saħħa tal-bniedem u l-ambjent huma sinifikanti. Dawk il-vapuri huma meħtieġa jużaw fjuwil tal-baħar bl-istess kontenut massimu ta’ kubrit kif applikabbli fis-SECAs (1.5 %). Minħabba li se japplikaw standards aktar stretti dwar il-kubrit fis-SECAs, huwa ġustifikat mill-ħtieġa li tittejjeb il-kwalità tal-arja madwar il-portijiet u l-kosti fit-territorji mhux SECA li l-istess standards japplikaw għall-vapuri tal-passiġġieri. Madankollu, l-introduzzjoni ta’ standard SECA ġdid għall-vapuri tal-passiġġieri se tiġi ttardjata b’ħames (5) snin sabiex jiġu evitati problemi potenzjali bid-disponibbiltà tal-fjuwil.

(8) Sabiex jintlaħqu l-għanijiet tad-Direttiva 1999/32/KE huwa meħtieġ infurzar xieraq tal-obbligi fir-rigward tal-kontenut ta’ kubrit fil-fjuwils tal-baħar. L-esperjenza mill-implimentazzjoni ta’ dik id-Direttiva wriet li hemm bżonn ta’ sistema aktar b’saħħitha ta’ monitoraġġ u infurzar sabiex tiġi żgurata implimentazzjoni tajba tad-Direttiva. Għal dak il-għan, huwa meħtieġ li l-Istati Membri jiżguraw teħid ta’ kampjuni suffiċjentement frekwenti u preċiż tal-fjuwil tal-baħar li jitqiegħed fis-suq jew li jintuża abbord il-vapuri kif ukoll verifika regolari tar-reġistri li jinżammu abbord il-vapuri u n-noti ta’ kunsinna tal-bunker. Jeħtieġ ukoll li jistabbilixxu sistema ta’ sanzjonijiet effettivi, proporzjonati u dissważivi għan-nuqqas ta’ konformità mad-dispożizzjonijiet tad-Direttiva 1999/32/KE. Sabiex tkun żgurata trasparenza akbar tal-informazzjoni, huwa xieraq ukoll li jiġi pprovdut li r-reġistru tal-fornituri lokali ta’ fjuwil tal-baħar ikun disponibbli b’mod pubbliku.

(9) Ir-rappurtar mill-Istati Membri skont id-Direttiva 1999/32/KE rriżulta insuffiċjenti għall-iskop ta’ verifika tal-konformità mad-dispożizzjonijiet tad-Direttiva minħabba n-nuqqas ta’ dispożizzjonijiet armonizzati u suffiċjentement preċiżi dwar il-kontenut u l-format tar-rapporti tal-Istati Membri. Għalhekk, huma meħtieġa indikazzjonijiet aktar dettaljati dwar il-kontenut u l-format tar-rapport sabiex ikun żgurat rappurtar iżjed armonizzat.

(10) Wara l-adozzjoni tad-Direttiva 2010/75/UE tal-Parlament Ewropew u tal-Kunsill tal-24 ta’ Novembru 2010 dwar l-emissjonijiet industrijali (il-prevenzjoni u l-kontroll integrati tat-tniġġis)[14], li tirriformula l-leġiżlazzjoni tal-Unjoni dwar l-emissjonijiet industrijali, huwa meħtieġ li d-dispożizzjonijiet tad-Direttiva 1999/32/KE dwar il-kontenut massimu ta’ kubrit taż-żejt tal-fjuwil tqil jiġu riveduti skont dan.

(11) Il-konformità mal-limiti baxxi ta’ kubrit fil-fjuwils, b’mod partikolari fis-SECAs, tista’ twassal għal żieda sinifikanti fil-prezz tal-fjuwils tal-baħar, tal-anqas fuq perjodu qasir, u jista’ jkollha effett negattiv għall-kompetittività tat-trasport marittimu fuq distanzi qosra meta mqabbel ma’ modi oħra tat-trasport kif ukoll għall-kompetittività tal-industriji fil-pajjiżi ta’ madwar is-SECAs. Huma meħtieġa soluzzjonijiet xierqa sabiex jitnaqqsu l-ispejjeż tal-konformità għall-industriji affettwati, ngħidu aħna li jkunu jistgħu jintużaw metodi alternattivi, iżjed kosteffettivi ta’ konformità mill-konformità fuq il-bażi tal-fjuwil u jiġi pprovdut appoġġ, meta jkun meħtieġ. Il-Kummissjoni, abbażi ta' fost l-oħrajn rapporti mill-Istati Membri, se tissorvelja mill-qrib l-impatti tal-konformità tas-settur tat-trasport marittimu mal-istandards il-ġodda tal-kwalità tal-fjuwil, b'mod partikolari f'dak li għandu x'jaqsam ma' tranżizzjoni modali (modal backshift) mit-trasport bil-baħar lura għal dak ibbażat fuq l-art.

(12) Għandu jiġi ffaċilitat l-aċċess għal metodi ta' tnaqqis tal-emissjonijiet. Dawn il-metodi jistgħu jipprovdu tnaqqis fl-emissjonijiet tal-anqas ekwivalenti jew, saħansitra akbar minn dak li jista’ jinkiseb bl-użu ta’ fjuwils b’livell baxx ta’ kubrit, bil-kundizzjoni li ma jkollhomx effetti negattivi sinifikanti fuq l-ambjent, bħall-ekosistemi tal-baħar, u li jiġu żviluppati suġġett għal mekkaniżmi xierqa ta’ approvazzjoni u kontroll. Il-kriterji għall-użu ta’ metodi ta' tnaqqis tal-emissjonijiet għandhom jiġu stabbiliti jew mill-IMO, suġġetti għal supplimentazzjoni jew emendar bid-Deċiżjoni tal-Kummissjoni jew, fin-nuqqas tal-istrumenti tal-IMO, mill-Kummissjoni Ewropea. Il-metodi alternattivi diġà magħrufa, bħall-użu ta’ sistemi abbord għat-tindif tal-gass tal-egżost jew it-taħlita ta’ fjuwil u gass naturali likwifikat (LNG) għandhom jiġu rikonoxxuti fl-Unjoni. Huwa importanti li jiġi promoss l-ittestjar u l-iżvilupp ta’ metodi ġodda għat-tnaqqis tal-emissjonijiet.

(13) Sabiex tiġi deċiża d-data tal-applikazzjoni tal-limitu ta’ 0.50 % kubrit, sabiex jiġu ddeżinjati SECAs ġodda, biex jiġu approvati metodi alternattivi ġodda għat-tnaqqis tal-emissjonijiet u sabiex jiġu stabbiliti l-kundizzjonijiet xierqa għall-użu tagħhom, sabiex jiġi żgurat monitoraġġ xieraq tal-kontenut ta’ kubrit tal-fjuwils u l-kontenut u l-format armonizzat tar-rapporti tal-Istati Membri u sabiex id-dispożizzjonijiet tad-Direttiva jiġu adattati għall-progress xjentifiku u tekniku, is-setgħa li tadotta atti skont l-Artikolu 290 tat-Trattat dwar il-Funzjonament tal-Unjoni Ewropea għandu jiġi delegat lill-Kummissjoni fir-rigward tal-ispeċifikazzjoni tad-data minn meta għandu japplika fl-Unjoni l-kontenut massimu ta’ kubrit fil-fjuwils ta’ 0.50 % skont il-massa, id-deżinjazzjoni ta’ SECAs ġodda fuq il-bażi tad-deċiżjoni tal-IMO, l-approvazzjoni ta’ metodi ġodda għat-tnaqqis tal-emissjonijiet li mhumiex koperti bid-Direttiva 96/98/EC[15] u l-istabbiliment, is-supplimentazzjoni u l-emendar tal-kundizzjonijiet għall-użu tagħhom, l-ispeċifikazzjoni tal-mezzi għat-teħid ta’ kampjuni u l-monitoraġġ tal-emissjonijiet u l-kontenut u l-format tar-rapport u l-emenda tal-Artikolu 2, il-punti 1, 2, 3, 3a, 3b u 4 jew l-Artikolu 6 l-paragrafu 1(a) u 2 fid-dawl tal-progress xjentifiku u tekniku u, fejn ikun rilevanti, l-istrumenti tal-IMO. Huwa importanti ħafna li l-Kummissjoni twettaq konsultazzjonijiet xierqa matul il-ħidma preparatorja tagħha, inkluż fil-livell ta’ esperti. Il-Kummissjoni, meta tkun qiegħda tipprepara u tfassal atti ta' delega, għandha tiżgura trażmissjoni simultanja, f’waqtha u xierqa tad-dokumenti rilevanti lill-Parlament Ewropew u lill-Kunsill.

(14) Huwa xieraq li l-Kumitat eżistenti dwar l-Ibħra Protetti [Sikuri] u l-Prevenzjoni ta’ Tniġġis minn Bastimenti li ġie stabbilit bir-Regolament (KE) Nru 2099/2002 tal-Parlament Ewropew u tal-Kunsill tal-5 ta’ Novembru 2002 li jistabbilixxi Kumitat dwar l-Ibħra Protetti [Sikuri] u l-Prevenzjoni ta’ Tniġġis minn Bastimenti (COSS) u li jemenda r-Regolamenti dwar is-sigurtà [sikurezza] marittima u l-prevenzjoni ta’ tniġġis minn bastimenti[16] jgħin lill-Kummissjoni fl-approvazzjoni tat-teknoloġiji tat-tnaqqis tal-emissjonijiet li mhumiex koperti bid-Direttiva tal-Kunsill 96/98/KE tal-20 ta’ Diċembru 1996 dwar it-tagħmir marittimu[17]. Id-Direttiva 1999/32/KE għalhekk għandha tiġi emendata skont dan,

ADOTTAW DIN ID-DIRETTIVA:

Artikolu 1

Id-Direttiva 1999/32/KE hija emendata kif ġej:

1.           L-Artikolu 1(2) il-punt (h) għandu jinbidel b’dan li ġej:

"(h) fjuwils użati abbord bastimenti li jużaw metodi ta' tnaqqis tal-emissjonijiet skont l-Artikoli 4c u 4e."

2.           L-Artikolu 2 huwa emendat kif ġej:

(a)     il-punti 3a u 3b għandhom jinbidlu b’dan li ġej:

"'3a. żejt tal-fjuwil tal-baħar tfisser kwalunkwe fjuwil tal-baħar kif iddefinit għall-grad DMB fit-Tabella I tal-ISO 8217 bl-eċċezzjoni tar-referenza għall-kontenut ta’ kubrit;

3b. żejt tal-gass tal-baħar tfisser kwalunkwe fjuwil tal-baħar kif iddefinit għall-gradi DMX, DMA u DMZ fit-Tabella I tal-ISO 8217 bl-eċċezzjoni tar-referenza għall-kontenut ta’ kubrit;"

(b)     il-punt 3m għandu jinbidel b’dan li ġej:

'3m. metodu ta' tnaqqis tal-emissjonijiet tfisser kwalunkwe attrezzatura, materjal, apparat jew strument li għandhom jitwaħħlu fuq vapur jew proċedura oħra, fjuwil alternattiv, jew metodu ta’ konformità, użat bħala alternattiva għal fjuwil tal-baħar b’livell baxx ta’ kubrit li jissodisfa r-rekwiżiti stipulati f’din id-Direttiva, u li jista’ jiġi vverifikat, ikkwantifikat u infurzat;"

3.           L-Artikolu 3 huwa emendat kif ġej:

(a)     il-paragrafi 1 u 2 għandhom jinbidlu b’dan li ġej:

"1.        L-Istati Membri għandhom jiżguraw li ma jintużawx żjut tal-fjuwil tqal fit-territorju tagħhom jekk il-kontenut ta’ kubrit tagħhom jaqbeż 1 % skont il-massa.

2. Sal-31 ta’ Diċembru 2015, suġġett għal monitoraġġ xieraq tal-emissjonijiet mill-awtoritajiet kompetenti, ir-rekwiżit stipulat fil-paragrafu 1 ma għandux japplika għal żjut tal-fjuwil tqal użati:

(a)     f’impjanti ta’ kombustjoni li jaqgħu fl-ambitu tad-Direttiva 2001/80/KE tal-Parlament Ewropew u tal-Kunsill*[DQC1] , li huma suġġetti għall-Artikolu 4(1), 4(2) jew 4(3)(a) ta’ dik id-Direttiva u li huma konformi mal-limiti ta’ emissjonijiet ta’ diossidu tal-kubrit għal tali impjanti kif stipulat f’dik id-Direttiva;

(b)     f’impjanti ta’ kombustjoni li jaqgħu fl-ambitu tad-Direttiva 2001/80/KE, li huma suġġetti għall-Artikolu 4(3)(b) u 4(6) ta’ dik id-Direttiva u li l-emissjonijiet medji tagħhom ta’ diossidu tal-kubrit fix-xahar ma jaqbżux 1 700 mg/Nm³ f’kontenut ta’ ossiġenu fil-gass mit-tromba taċ-ċumnija ta’ 3 % skont il-volum fi stat niexef;

(c)     f’impjanti ta’ kombustjoni li ma jaqgħux taħt il-punti (a) jew (b), u li l-emissjonijiet medji tagħhom ta’ diossidu tal-kubrit fix-xahar ma jaqbżux 1 700 mg/Nm³ f’kontenut ta’ ossiġenu fil-gass mit-tromba taċ-ċumnija ta’ 3 % skont il-volum fi stat niexef;

(d)     għal kombustjoni f'raffineriji, fejn il-medja fix-xahar ta’ emissjonijiet ta’ diossidu tal-kubrit mifruxa fuq l-impjanti ta’ kombustjoni kollha fir-raffinerija, irrispettivament mit-tip ta’ fjuwil jew taħlita ta’ fjuwils li tintuża, iżda li ma tinkludix impjanti li jaqgħu taħt il-punti (a) u (b), turbini tal-gass u magni li jaħdmu bil-gass, ma taqbiżx 1 700 mg/Nm3 f’kontenut ta’ ossiġenu fil-gass mit-tromba taċ-ċumnija ta’ 3 % skont il-volum fi stat niexef.

Mill-1 ta’ Jannar 2016, suġġett għal monitoraġġ xieraq tal-emissjonijiet mill-awtoritajiet kompetenti, ir-rekwiżit stipulat fil-paragrafu 1 ma għandux japplika għal żjut tal-fjuwil tqal użati:

(a)     f’impjanti ta’ kombustjoni li jaqgħu fl-ambitu tal-Kapitolu III tad-Direttiva 2010/75/UE tal-Parlament Ewropew u tal-Kunsill**[DQC2] , u li huma konformi mal-limiti ta’ emissjonijiet ta’ diossidu tal-kubrit għal tali impjanti kif stipulat fl-Anness V ta’ dik id-Direttiva jew, fejn dawk il-valuri tal-limitu ta’ emissjonijiet ma jkunux applikabbli skont dik id-Direttiva, li l-emissjonijiet medji tagħhom ta’ diossidu tal-kubrit fix-xahar ma jaqbżux 1 700 mg/Nm³ f’kontenut ta’ ossiġenu fil-gass mit-tromba taċ-ċumnija ta’ 3 % skont il-volum fi stat niexef;

(b)     f’impjanti ta’ kombustjoni li ma jaqgħux taħt il-punt (a), u li l-emissjonijiet medji tagħhom ta’ diossidu tal-kubrit fix-xahar ma jaqbżux 1 700 mg/Nm3 f’kontenut ta’ ossiġenu fil-gass mit-tromba taċ-ċumnija ta’ 3 % skont il-volum fi stat niexef;

(c)     għal kombustjoni f'raffineriji, fejn il-medja fix-xahar ta’ emissjonijiet ta’ diossidu tal-kubrit mifruxa fuq l-impjanti ta’ kombustjoni kollha fir-raffinerija, irrispettivament mit-tip ta’ fjuwil jew taħlita ta’ fjuwils li tintuża, iżda li ma tinkludix impjanti li jaqgħu taħt il-punt (a), turbini tal-gass u magni li jaħdmu bil-gass, ma taqbiżx 1 700 mg/Nm3 f’kontenut ta’ ossiġenu fil-gass mit-tromba taċ-ċumnija ta’ 3 % skont il-volum fi stat niexef.

L-Istati Membri għandhom jieħdu l-miżuri meħtieġa sabiex jiżguraw li kull impjant ta’ kombustjoni li juża żejt tal-fjuwil tqil b’konċentrazzjoni ta’ kubrit ogħla minn dik imsemmija fil-paragrafu 1, ma jitħaddimx mingħajr permess maħruġ minn awtorità kompetenti, li tispeċifika l-limiti tal-emissjonijiet."

(b)     il-paragrafu 3 għandu jitħassar.

4.           Jiddaħħal l-Artikolu 3a li ġej:

"Artikolu 3a

Kontenut massimu ta’ kubrit fil-fjuwils tal-baħar

L-Istati Membri għandhom jiżguraw li ma jintużawx jew jitqiegħdu fis-suq fjuwils tal-baħar fit-territorju tagħhom jekk il-kontenut ta’ kubrit tagħhom jaqbeż 3.5 % skont il-massa.'

5.           L-Artikolu 4(1) għandu jinbidel b’dan li ġej:

"1. L-Istati Membri għandhom jiżguraw li ma jintużawx żjut tal-gass fit-territorji tagħhom jekk il-kontenut ta’ kubrit tagħhom jaqbeż 0.10 % skont il-massa."

6.           L-Artikolu 4a jiġi emendat kif ġej:

(a)     it-titolu għandu jinbidel b’dan li ġej:

"Il-kontenut massimu ta’ kubrit fi fjuwils tal-baħar użati f’ibħra territorjali, żoni ekonomiċi esklużivi u żoni ta' kontroll tat-tniġġis tal-Istati Membri, fosthom iż-Żoni ta’ Kontroll tal-Emissjonijiet tal-SOx u minn vapuri tal-passiġġieri li joperaw servizzi regolari lejn u minn portijiet tal-Unjoni"

(b)     il-paragrafu 1 għandu jinbidel b’dan li ġej:

'1. L-Istati Membri għandhom jieħdu l-miżuri kollha meħtieġa sabiex jiżguraw li ma jintużawx fjuwils tal-baħar fiż-żoni tal-ibħra territorjali tagħhom, żoni ekonomiċi esklużivi u żoni ta’ kontroll tat-tniġġis li jaqgħu fi ħdan Żoni ta’ Kontroll tal-Emissjonijiet tal-SOx jekk il-kontenut ta’ kubrit ta’ dawk il-fjuwils skont il-massa jaqbeż:

(a) 1.00 % sal-31 ta’ Diċembru 2014;

(b) 0.10 % mill-1 ta’ Jannar 2015.

Dan il-paragrafu għandu japplika għall-bastimenti tal-bnadar kollha, inklużi bastimenti li l-vjaġġ tagħhom ikun beda barra l-Unjoni.

(c)     jiddaħħal il-paragrafu 1a li ġej:

"1a. L-Istati Membri għandhom jieħdu l-miżuri kollha meħtieġa sabiex jiżguraw li ma jintużawx fjuwils tal-baħar fiż-żoni tal-ibħra territorjali tagħhom, żoni ekonomiċi esklużivi u żoni ta' kontroll tat-tniġġis jekk il-kontenut ta’ kubrit ta’ dawk il-fjuwils skont il-massa jaqbeż:

(a) 3.50 % mill-1 ta’ Jannar 2012;

(b) 0.50 % mill-1 ta’ Jannar 2020.

Il-Kummissjoni għandu jkollha s-setgħa li tadotta atti ta' delega skont l-Artikolu 9a ta’ din id-Direttiva rigward id-data li minnha japplika l-istandard dwar il-kubrit li hemm stipulat fil-punt (b) ta’ dan il-paragrafu. Fuq il-bażi tal-valutazzjoni mill-IMO dwar id-disponibbiltà ta’ fjuwil tal-baħar sabiex jiġi osservat il-kontenut massimu ta’ kubrit fil-fjuwil ta’ 0.50 % skont il-massa, li hemm referenza għalih fir-Regolament 14(8) tal-Anness VI tal-MARPOL, din id-data għandha tkun l-1 ta’ Jannar 2020 jew l-1 ta’ Jannar 2025.

Dan il-paragrafu għandu japplika għall-bastimenti kollha tal-bnadar kollha, inklużi l-bastimenti li l-vjaġġ tagħhom ikun beda barra mill-Unjoni, mingħajr preġudizzju għall-paragrafi 1 u 4 u l-Artikolu 4b."

(d)     il-paragrafu 2 għandu jinbidel b’dan li ġej:

"Il-Kummissjoni għandu jkollha s-setgħa li tadotta atti ta' delega skont l-Artikolu 9a ta’ din id-Direttiva fir-rigward tad-deżinjazzjoni ta’ żoni tal-baħar bħalma huma ż-Żoni ta’ Kontroll tal-Emissjonijiet tal-SOx fuq il-bażi tad-deċiżjoni tal-IMO skont ir-Regolament 14(3)(2) tal-Anness VI tal-MARPOL."

(e)     il-paragrafi 4, 5 u 6 għandhom jinbidlu b’dan li ġej:

"4. L-Istati Membri għandhom jieħdu l-miżuri kollha meħtieġa sabiex jiżguraw li ma jintużawx fjuwils tal-baħar fl-ibħra territorjali tagħhom, żoni ekonomiċi esklużivi u żoni ta' kontroll tat-tniġġis li jinsabu barra Żoni ta’ Kontroll tal-Emissjonijiet tal-SOx minn vapuri tal-passiġġieri li joperaw servizzi regolari lejn jew minn kwalunkwe port tal-Unjoni jekk il-kontenut ta’ kubrit ta’ dawk il-fjuwils skont il-massa jaqbeż:

(c) 1.5 %;

(d) 0.10 % mill-1 ta’ Jannar 2020.

5.      L-Istati Membri għandhom jesiġu l-mili korrett tar-reġistri li jinżammu abbord il-vapuri, fosthom l-operazzjonijiet ta’ bdil tal-fjuwil, bħala kundizzjoni għad-dħul tal-vapuri fil-portijiet tal-Unjoni.

6.      L-Istati Membri għandhom, skont ir-Regolament 18 tal-Anness VI tal-MARPOL:

(a) iżommu reġistru pubblikament disponibbli tal-fornituri lokali ta’ fjuwils tal-baħar;

(b) jiżguraw li l-kontenut ta’ kubrit fil-fjuwils tal-baħar kollha mibjugħa fit-territorju tagħhom jiġi ddokumentat mill-fornitur fuq nota ta’ kunsinna tal-bunker, akkumpanjata minn kampjun issiġillat u ffirmat mir-rappreżentant tal-vapur li jirċievi l-fjuwil;

(c) jieħdu azzjoni kontra fornituri ta’ fjuwils tal-baħar li jkunu nstabu li kkonsenjaw fjuwil li ma jaqbilx mal-ispeċifikazzjoni indikata fuq in-nota ta’ kunsinna tal-bunker;

(d) jiżguraw li tittieħed azzjoni ta’ rimedju sabiex kwalunkwe fjuwil tal-baħar li jkun instab li mhux konformi jinġieb f’konformità."

(e) il-paragrafu 8 għandu jitħassar.

7.           L-Artikoli 4b u 4c għandhom jinbidlu b’dan li ġej:

"Artikolu 4b

Kontenut massimu ta’ kubrit fil-fjuwils tal-baħar użati minn vapuri rmiġġjati f’portijiet tal-Unjoni

1. L-Istati Membri għandhom jieħdu l-miżuri kollha meħtieġa sabiex jiżguraw li l-bastimenti li ġejjin ma jużawx fjuwils tal-baħar b’kontenut ta’ kubrit li jaqbeż 0.10 % bil-massa:

(b)     vapuri rmiġġjati f’portijiet tal-Unjoni, filwaqt li jitħalla ħin suffiċjenti għall-ekwipaġġ sabiex ilesti kwalunkwe operazzjoni neċessarja ta’ bdil tal-fjuwil kemm jista’ jkun malajr wara l-irmiġġ u kemm jista’ jkun tard qabel it-tluq.

L-Istati Membri għandhom jesiġu li l-ħin ta’ kwalunkwe operazzjoni ta’ bdil tal-fjuwil jiġi rreġistrat fir-reġistru li jinżamm abbord il-vapuri.

2. Il-paragrafu 1 ma għandux japplika:

(a)     kull meta, skont l-iskedi ppubblikati, il-vapuri jkunu ser jibqgħu rmiġġjati għal inqas minn sagħtejn;

(d)     għal vapuri li jitfu l-magni kollha u jużaw netwerk tal-elettriku terrestri waqt li jkunu rmiġġjati fil-portijiet.

3. L-Istati Membri għandhom jiżguraw li ma jitpoġġewx żjut tal-gass tal-baħar fis-suq fit-territorju tagħhom jekk il-kontenut ta’ kubrit ta’ dawk iż-żjut tal-baħar jaqbeż 0.10 % skont il-massa.

"Artikolu 4c

Metodi ta' tnaqqis tal-emissjonijiet

1.          L-Istati Membri għandhom jippermettu l-użu ta’ metodi ta' tnaqqis tal-emissjonijiet minn vapuri tal-bnadar kollha fil-portijiet, l-ibħra territorjali, iż-żoni ekonomiċi esklużivi u ż-żoni ta’ kontroll tat-tniġġis tagħhom, bħala alternattiva għall-użu ta’ fjuwils tal-baħar li jissodisfaw ir-rekwiżiti tal-Artikoli 4a u 4b, suġġett għad-dispożizzjonijiet tal-paragrafi 2 u 3.

2.          Il-vapuri li jużaw il-metodi ta’ tnaqqis tal-emissjonijiet imsemmija fil-paragrafu 1 għandhom kontinwament jiksbu tnaqqis fl-emissjonijiet ta’ diossidu tal-kubrit li jkun mill-anqas ekwivalenti għat-tnaqqis li jinkiseb bl-użu ta’ fjuwils tal-baħar li jissodisfaw ir-rekwiżiti tal-Artikoli 4a u 4b. L-emissjonijiet ta’ diossidu tal-kubrit li jirriżultaw mill-użu tal-metodi ta' tnaqqis tal-emissjonijiet ma għandhomx jaqbżu l-valuri tal-limitu stipulati fl-Anness 1.

3. Il-metodi ta' tnaqqis tal-emissjonijiet imsemmija fil-paragrafu 1 għandhom ikunu konformi mal-kriterji speċifikati fl-istrumenti msemmija fl-Anness 2.1, sakemm ma jkunux sostitwiti jew supplimentati mill-kriterji stipulati fl-Anness 2.2.

4.          Il-Kummissjoni għandu jkollha s-setgħa li tadotta atti ta' delega skont l-Artikolu 9a fir-rigward ta’:

– l-emendar jew is-supplimentazzjoni tal-valuri stipulati fl-Anness 1;

– l-emendar jew is-supplimentazzjoni tal-lista ta’ strumenti msemmija fl-Anness 2.1;

– l-istabbiliment, l-emendar jew is-supplimentazzjoni tal-kriterji msemmija fl-Anness 2.2.; u

– rekwiżiti dettaljati għall-monitoraġġ tal-emissjonijiet, fejn rilevanti.

Il-Kummissjoni għandha tikkunsidra, fost l-oħrajn, il-progress xjentifiku u teknoloġiku kif ukoll l-istrumenti u l-istandards rilevanti adottati mill-Organizzazzjoni Marittima Internazzjonali."

8.           Jiddaħħlu l-Artikoli 4d u 4e li ġejjin:

"Artikolu 4d

Approvazzjoni ta’ metodi ta' tnaqqis tal-emissjonijiet għall-użu fuq vapuri li jtajru l-bandiera

ta’ Stat Membru

1. Il-metodi ta' tnaqqis tal-emissjonijiet li jaqgħu fil-kamp ta' applikazzjoni tad-Direttiva tal-Kunsill 96/98/KE*[DQC3] għandhom jiġu approvati skont id-dispożizzjonijiet ta’ dik id-Direttiva.

2. Il-metodi ta' tnaqqis tal-emissjonijiet li ma jkunux koperti mill-paragrafu 1 għandhom jiġu approvati skont il-proċedura msemmija fl-Artikolu 3(2) tar-Regolament 2099/2002/KE tal-Parlament Ewropew u tal-Kunsill tal-5 ta’ Novembru 2002 li jistabbilixxi Kumitat dwar l-Ibħra Protetti u l-Prevenzjoni ta’ Tniġġis minn Bastimenti (COSS)**[DQC4] , billi jiġu kkunsidrati:

(a) il-linji gwida żviluppati mill-IMO;

(b) ir-riżultati ta’ kwalunkwe prova mwettqa skont l-Artikolu 4e;

(c) l-effetti fuq l-ambjent, inkluż it-tnaqqis tal-emissjonijiet li jista’ jinkiseb, u l-impatti fuq ekosistemi f’portijiet u estwarji magħluqa;

(d) il-fattibbiltà tal-monitoraġġ u l-verifika."

"Artikolu 4e

Provi ta’ metodi ġodda ta' tnaqqis tal-emissjonijiet

L-Istati Membri jistgħu, b’kooperazzjoni ma’ Stati Membri oħra, kif ikun xieraq, japprovaw il-provi ta’ metodi ta' tnaqqis tal-emissjonijiet mill-vapuri, fuq bastimenti li jtajru l-bandiera tagħhom, jew f’żoni tal-baħar li jaqgħu taħt il-ġurisdizzjoni tagħhom. Matul dawk il-provi, ma għandux ikun obbligatorju l-użu ta’ fjuwils tal-baħar li jissodisfaw ir-rekwiżiti tal-Artikoli 4a u 4b, sakemm jiġu ssodisfati l-kundizzjonijiet kollha li ġejjin:

(1) il-Kummissjoni u kwalunkwe Stat portwali kkonċernat jiġu nnotifikati bil-miktub mill-anqas sitt xhur qabel jibdew il-provi;

(2) il-permessi għall-provi ma jkunux għal iżjed minn 18-il xahar;

(3) il-vapuri kollha involuti jinstallaw tagħmir li ma jistax jitbagħbas għall-monitoraġġ kontinwu tal-emissjonijiet ta’ gass miċ-ċumnija u jużawh matul il-perjodu kollu tal-prova;

(4) il-vapuri kollha involuti jiksbu tnaqqis fl-emissjonijiet li jkun tal-anqas ekwivalenti għal dak li kieku jintlaħaq bil-limiti fuq il-kubrit fil-fjuwil speċifikat f’din id-Direttiva;

(5) matul il-perjodu kollu tal-prova jkun hemm implimentati sistemi tajbin għall-immaniġġjar tal-iskart għal kwalunkwe skart iġġenerat mill-metodi ta' tnaqqis tal-emissjonijiet;

(6) matul il-perjodu kollu tal-prova ssir stima tal-impatti fuq l-ambjent tal-baħar, b’mod partikolari fuq ekosistemi f’portijiet u estwarji magħluqa;

(7) ir-riżultati sħaħ jiġu pprovduti lill-Kummissjoni, u jsiru pubblikament disponibbli fi żmien sitt xhur mit-tmiem tal-provi."

9.           L-Artikolu 6 huwa emendat kif ġej:

(a)     il-paragrafu 1 għandu jinbidel b’dan li ġej:

'1. L-Istati Membri għandhom jieħdu l-miżuri kollha meħtieġa biex jiċċekkjaw permezz ta’ teħid tal-kampjuni li l-kontenut ta’ kubrit fil-fjuwils użati huwa konformi mal-Artikoli 3, 3a, 4, 4a u 4b. It-teħid tal-kampjuni għandu jibda fid-data li fiha jidħol fis-seħħ il-limitu rilevanti għall-kontenut massimu ta’ kubrit fil-fjuwil. Dan għandu jsir bi frekwenza suffiċjenti u b’mod li l-kampjuni jkunu rappreżentattivi tal-fjuwil eżaminat, u fil-każ ta’ fjuwil tal-baħar, tal-fjuwil li jkun qiegħed jintuża mill-bastimenti waqt li jkunu f’żoni tal-baħar jew f’portijiet rilevanti.

Għandhom jintużaw kull wieħed mill-mezzi li ġejjin ta’ teħid tal-kampjuni, analiżi u spezzjoni ta’ fjuwils tal-baħar:

(a) it-teħid ta’ kampjuni tal-fjuwil tal-baħar għal kombustjoni abbord waqt li jkun qed jiġi kkonsenjat lill-vapuri, skont il-Linji gwida għat-teħid ta’ kampjuni ta’ żejt tal-fjuwil sabiex tiġi ddeterminata l-konformità tiegħu mal-Anness VI rivedut tal-MARPOL*[DQC5] , u analiżi tal-kontenut ta’ kubrit tiegħu;

(b) it-teħid ta’ kampjuni u analiżi tal-kontenut ta’ kubrit ta' fjuwils tal-baħar għal kombustjoni abbord li jkun jinsab f’tankijiet u f’kampjuni tal-bunker issiġillati abbord il-vapuri;

(c) l-ispezzjoni tar-reġistri li jinżammu abbord il-vapuri u n-noti ta’ kunsinna tal-bunker.

Il-Kummissjoni għandu jkollha s-setgħa li tadotta atti ta' delega skont l-Artikolu 9a fir-rigward ta’:

(i) il-frekwenza tat-teħid tal-kampjuni;

(ii) il-metodi ta’ teħid tal-kampjuni;

(iii) id-definizzjoni ta’ kampjun rappreżentattiv tal-fjuwil eżaminat;

(iv) l-informazzjoni li għandha tiġi inkluża fir-reġistri li jinżammu abbord il-vapuri u fin-noti ta’ kunsinna tal-bunker."

(b)     il-paragrafu 1a għandu jitħassar.

(c)     il-paragrafu 2 għandu jinbidel b’dan li ġej:

'2. Il-metodu ta’ referenza adottat sabiex jiġi stabbilit il-kontenut ta’ kubrit għandu jkun il-metodu ISO 8754 (2003).

Sabiex jiġi stabbilit jekk il-fjuwil tal-baħar ikkonsenjat lill-vapuri u użat abbord dawn il-vapuri huwiex konformi mal-limiti ta’ kubrit meħtieġa skont l-Artikoli 3, 3a, 4, 4a u 4b għandha tintuża l-Proċedura ta’ Verifika tal-Fjuwil għall-Kampjuni ta’ Żejt tal-Fjuwil skont l-Anness VI tal-MARPOL**[DQC6] ."

10.         L-Artikolu 7 huwa emendat kif ġej:

(a)     il-paragrafu 1 għandu jinbidel b’dan li ġej:

"1. Fuq il-bażi tar-riżultati tat-teħid ta’ kampjuni, analiżi u spezzjonijiet imwettqa skont l-Artikolu 6, l-Istati Membri għandhom, sat-30 ta’ Ġunju ta’ kull sena, jissottomettu rapport lill-Kummissjoni dwar il-konformità mal-istandards tal-kubrit stipulati f’din id-Direttiva għas-sena preċedenti."

(b)     jiddaħħal il-paragrafu 1a li ġej:

"1a. Il-Kummissjoni għandu jkollha s-setgħa li tadotta atti ta' delega skont l-Artikolu 9a rigward l-informazzjoni li għandha tiġi inkluża fir-rapport u l-format tar-rapport."

(c)     il-paragrafi 2 u 3 għandhom jitħassru.

(d)     il-paragrafu 4 għandu jinbidel b’dan li ġej:

"4.        Il-Kummissjoni għandu jkollha s-setgħa li tadotta atti ta' delega skont l-Artikolu 9a fir-rigward tal-adattamenti tal-Artikolu 2, il-punti 1, 2, 3, 3a, 3b u 4, l-Artikolu 6 l-paragrafu 1(a) u (2) għall-progress xjentifiku u tekniku."

11.         L-Artikolu 8 għandu jitħassar.

12.         L-Artikolu 9 għandu jitħassar.

13.         Jiddaħħal l-Artikolu 9a li ġej:

"Artikolu 9a

Eżerċizzju tad-delega

1.      Is-setgħa li tadotta atti ta' delega hija kkonferita lill-Kummissjoni suġġett għall-kundizzjonijiet stipulati f’dan l-Artikolu.

2.      Id-delega tas-setgħa msemmija fl-Artikoli 4a(1a) u (2), 4c(4), 6(1), 7(1a) u 7(4) għandha tiġi kkonferita lill-Kummissjoni għal perjodu ta’ żmien indeterminat minn [id-data tad-dħul fis-seħħ ta’ din id-Direttiva].

3.      Id-delega tas-setgħa msemmija fl-Artikoli 4a(1a) u (2), 4c(4), 6(1), 7(1a) u 7(4) tista’ tiġi rrevokata fi kwalunkwe ħin mill-Parlament Ewropew jew mill-Kunsill. Deċiżjoni ta’ revoka għandha ttemm id-delega tas-setgħat speċifikati f’dik id-deċiżjoni. Hija għandha tidħol fis-seħħ l-għada tal-pubblikazzjoni tad-deċiżjoni f'Il-Ġurnal Uffiċjali tal-Unjoni Ewropea jew f’data aktar tard speċifikata fiha. Hija ma għandhiex taffettwa l-validità ta’ kwalunkwe att ta' delega li diġà jkun fis-seħħ.

4.      Malli tadotta att ta' delega, il-Kummissjoni għandha fl-istess ħin tinnotifika lill-Parlament Ewropew u lill-Kunsill dwar dan.

5.      Att ta' delegat adottat skont l-Artikoli 4a(1a) u (2), 4c(4), 6(1), 7(1a) u 7(4) għandu jidħol fis-seħħ biss jekk ma tkun ġiet espressa l-ebda oġġezzjoni mill-Parlament Ewropew jew mill-Kunsill fi żmien xahrejn min-notifika ta’ dak l-att lill-Parlament Ewropew u lill-Kunsill jew jekk, qabel l-iskadenza ta’ dak il-perjodu, il-Parlament Ewropew u l-Kunsill ikunu t-tnejn infurmaw lill-Kummissjoni li mhux se joġġezzjonaw. Dak il-perjodu għandu jiġi estiż b’xahrejn fuq inizjattiva tal-Parlament Ewropew jew tal-Kunsill.'

14.         L-Anness għad-Direttiva 1999/32/KE għandu jinbidel bl-Anness għal din id-Direttiva.

Artikolu 2

Traspożizzjoni

1.           L-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattivi meħtieġa sabiex jikkonformaw ma’ din id-Direttiva sa mhux aktar tard minn [12-il xahar wara d-dħul fis-seħħ ta’ din id-Direttiva]. Huma għandhom jikkomunikaw minnufih lill-Kummissjoni t-test ta’ dawk id-dispożizzjonijiet u tabella ta’ korrelazzjoni bejn dawk id-dispożizzjonijiet u din id-Direttiva.

Meta l-Istati Membri jadottaw dawk id-dispożizzjonijiet, huma għandhom jinkludu referenza għal din id-Direttiva jew ikunu akkumpanjati minn tali referenza fl-okkażjoni tal-pubblikazzjoni uffiċjali tagħhom. L-Istati Membri għandhom jiddeċiedu kif issir din ir-referenza.

2.           L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li huma jadottaw fil-qasam kopert b'din id-Direttiva.

Artikolu 3

Dħul fis-seħħ

Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f'Il-Ġurnal Uffiċjali tal-Unjoni Ewropea.

Artikolu 4

Din id-Direttiva hija indirizzata lill-Istati Membri.

Magħmul fi […],

Għall-Parlament Ewropew                           Għall-Kunsill

Il-President                                                    Il-President

ANNESS

"ANNESS 1

Valuri massimi ta’ emissjonijiet għall-metodi ta’ tnaqqis kif imsemmi fl-Artikolu 4c(2)

              Limiti ta’ kubrit fil-fjuwil tal-baħar imsemmija fl-Artikoli 4a u 4b u r-Regolamenti 14.1 u 14.4 tal-Anness VI tal-MARPOL u l-valuri tal-limitu ta’ emissjonijiet korrispondenti msemmija fl-Artikolu 4c(2)

Kontenut ta’ Kubrit ta' fjuwils tal-baħar (% m/m) || Proporzjon ta’ Emissjonijiet ta' SO2(ppm)/CO2(% v/v)

4.50 || 195.0

3.50 || 151.7

1.50 || 65.0

1.00 || 43.3

0.50 || 21.7

0.10 || 4.3

Nota:    -L-użu tal-limiti tal-Proporzjon ta’ Emissjonijiet japplika biss meta jintuża Distillat ibbażat fuq il-petroleum jew Żjut tal-Fjuwil Residwi.

             - Fil-każ ta' sistemi ta' tindif ta' gass tal-egżost li jassorbu l-CO2 waqt il-proċess tat-tindif tal-gass jeħtieġ li l-CO2 jitkejjel        qabel il-proċess tat-tindif u tintuża l-konċentrazzjoni ta' CO2 qabel it-tindif mal-konċentrazzjoni tal-SO2 wara t-tindif."

"ANNESS 2

Kriterji għall-użu tal-metodi tat-tnaqqis tal-emissjonijiet imsemmija fl-Artikolu 4c(3)

1. Il-metodi tat-tnaqqis tal-emissjonijiet imsemmija fl-Artikolu 4c għandhom tal-anqas jikkonformaw mal-kriterji speċifikati fl-istrumenti li ġejjin, kif applikabbli:

Metodu għat-tnaqqis tal-emissjonijiet || Id-deċiżjoni rilevanti tal-Kummissjoni

Taħlita ta’ fjuwil tal-baħar u gass li jevapora (boil-off gas) || Id-Deċiżjoni tal-Kummissjoni 2010/769/UE tat-13 ta’ Diċembru 2010 dwar l-iffissar ta’ kriterji għall-użu ta’ metodi teknoloġiċi minn trasportaturi tal-gass naturali likwifikat bħala alternattiva għall-użu ta’ karburanti [fjuwils] għal użu marittimu b’kontenut ta’ kubrit baxx li jissodisfa r-rekwiżiti tal-Artikolu 4b tad-Direttiva tal-Kunsill 1999/32/KE dwar it-tnaqqis tal-kontenut tal-kubrit f’ċerti karburanti [fjuwils] likwidi kif emendata bid-Direttiva 2005/33/KE tal-Parlament Ewropew u tal-Kunsill dwar il-kontenut ta’ kubrit f’karburanti [fi fjuwils] għal użu marittimu (ĠU L 328, 14.12.2010, p. 15).

Sistemi ta' tindif tal-gass tal-egżost || RIŻOLUZZJONI TAL-IMO MEPC.184(59) adottata fis-17 ta’ Lulju 2009

2. Vapuri li jużaw metodi tat-tnaqqis tal-emissjonijiet skont l-Artikolu 4c għandhom:

– jimmonitorjaw u jirreġistraw kontinwament l-emissjonijiet tad-diossidu tal-kubrit, u

– jiddokumentaw b'mod preċiż li kwalunkwe fluss ta’ skart li jintrema fil-baħar, inklużi portijiet u estwarji magħluqa ma jkollux impatti negattivi sinifikanti fuq, u ma joħloqx riskji għas-saħħa tal-bniedem u l-ambjent."

[1]               Komunikazzjoni mill-Kummissjoni, “Ewropa 2020: Strateġija għal tkabbir intelliġenti, sostenibbli u inklussiv, COM(2010) 2020 finali.

[2]               SEC (2005) 1133: Dokument ta’ Ħidma tal-Persunal tal-Kummissjoni li jakkumpanja l-Komunikazzjoni dwar Strateġija Tematika dwar it-Tniġġis tal-Arja (COM(2005)446 finali), id-Direttiva dwar il-Kwalità tal-Arja tal-Ambjent u Arja Iktar Nadifa għall-Ewropa (COM(2005)447 finali) u d-Dokument ta’ ħidma tal-Persunal tal-Kummissjoni dwar l-implimentazzjoni tal-Politika dwar il-Kwalità tal-Arja tal-UE u li tipprepara għar-reviżjoni komprensiva tagħha, SEC(2011)342 finali.

[3]               Fl-UE, is-SECAs ikopru l-Baħar Baltiku u l-Baħar tat-Tramuntana, kif ukoll il-Fliegu Ingliż.

[4]               Riżoluzzjoni MEPC.176(58) adottata fl-10 ta’ Ottubru 2008 (l-Anness VI rivedut tal-MARPOL).

[5]               SEC [referenza]

[6]               Spjegazzjoni iżjed dettaljata dwar il-prinċipju tas-sussidjarjetà hija disponibbli fil-Valutazzjoni tal-Impatt li takkumpanja din il-proposta.

[7]               ĠU L 334, 17.12.2010, p. 17.

[8]               ĠU L 46, 17.02.1997, p. 25.

[9]               ĠU C , , p. .

[10]             ĠU C , , p. .

[11]             ĠU C , , p.

[12]             ĠU L 242, 10.9.2002, p. 1.

[13]             ĠU L 121, 11.5.1999, p. 13.

[14]             ĠU L 334, 17.12.2010, p. 17.

[15]             ĠU L 241, 29.8.1998, p. 27.

[16]             ĠU L 324, 29.11.2002, p. 1.

[17]             ĠU L 46, 17.02.1997, p. 25.

*               ĠU L 309, 27.11.2001, p. 1.

**             ĠU L 334, 17.12.2010, p. 17.

*               ĠU L 241, 29.8.1998, p. 27.

**             ĠU L 324, 29.11.2002, p. 1.

*               Riżoluzzjoni MEPC.182(59), adottata fis-17.07.2009.

**             L-Appendiċi VI għar-Riżoluzzjoni MEPC.176(58) adottata fl-10 ta' Ottubru 2008 (L-Anness VI rivedut tal-MARPOL).

[DQC1]Warning: Footnote has custom reference mark

[DQC2]Warning: Footnote has custom reference mark

[DQC3]Warning: Footnote has custom reference mark

[DQC4]Warning: Footnote has custom reference mark

[DQC5]Warning: Footnote has custom reference mark

[DQC6]Warning: Footnote has custom reference mark