MEMORANDUM TA’ SPJEGAZZJONI

1. IL-KUNTEST TAL-PROPOSTA 1.1. Il-bażi tat-Trattat

L-Artikolu 312 tat-Trattat dwar il-Funzjonament tal-Unjoni Ewropea (minn hawn ‘il quddiem imsejjaħ it-Trattat) jistipula li Regolament tal-Kunsill adottat unanimament għandu jistabbilixxi qafas finanzjarju multiannwali. Huwa għandu jistabbilixxi l-ammonti tal-limiti massimi annwali tal-approprjazzjonijiet għal impenji skont il-kategorija tal-infiq u tal-limitu massimu annwali ta' approprjazzjonijiet għall-pagamenti u għandu jistabbilixxi kwalunkwe dispożizzjoni oħra meħtieġa għat-tħaddim tajjeb tal-proċedura annwali tal-baġit.

L-ewwel qafas finanzjarju multiannwali flimkien mad-dispożizzjonijiet dwar il-koperazzjoni interistituzzjonali u d-dixxiplina baġitarja ġie adottat aktar minn għoxrin sena ilu[1]. Dan il-qafas finanzjarju u dawk ta' warajh ippermettew titjib u ffaċilitar konsiderevoli tal-proċedura baġitarja annwali u l-koperazzjoni bejn l-istituzzjonijiet u, fl-istess waqt, żiedu d-dixxiplina baġitarja.

Billi naqqax il-qafas finanzjarju multiannwali fil-liġi primarja tal-Unjoni, it-Trattat irrikonoxxa l-importanza tiegħu bħala pedament tal-arkitettura baġitarja tal-Unjoni Ewropea.

Il-qafas finanzjarju multiannwali kurrenti għas-snin 2007-2013 ġie miftiehem bejn l-istituzzjonijiet f’Mejju tal-2006 u kien stabbilit fil-Ftehim Interistituzzjonali dwar id-dixxiplina baġitarja u l-ġestjoni finanzjarja tajba[2] (minn hawn 'il quddiem imsejjaħ l-IIA kurrenti)

Sabiex timplimenta d-dispożizzjonijiet tat-Trattat il-ġdid, il-Kummissjoni ppreżentat, fit-3 ta' Marzu 2010, proposta għal Regolament tal-Kunsill li jistabbilixxi qafas finanzjarju multiannwali għall-2007-2013 u għal Ftehim Interistituzzjonali Ġdid dwar il-koperazzjoni fi kwistjonijiet baġitarji[3] (minn hawn 'il quddiem imsejħa l-proposti ta' Marzu 2010). Dawn iż-żewġ proposti, ladarba jiġu adottati, se jieħdu post l-IIA kurrenti u jagħmlu d-dispożizzjonijiet dwar il-qafas finanzjarju 2007-2013 u dwar il-koperazzjoni tal-istituzzjonijiet fil-proċedura baġitarja konformi mat-Trattat. Sadittant, id-dispożizzjonijiet tal-IIA kurrenti li ma tilfux il-validità tagħhom minħabba t-Trattat għadhom validi.

Il-memorandum ta' spjegazzjoni preżenti jittratta l-elementi l-ġodda meta mqabbla mal-proposti ta' Marzu 2010, kemm għall-proposta għal Regolament li jistabbilixxi qafas finanzjarju multiannwali għas-snin 2014-2020 (minn hawn 'il quddiem ir-Regolament tal-MFF) kif ukoll il-Ftehim Interistituzzjonali dwar il-koperazzjoni fi kwistjonijiet baġitarji u ġestjoni finanzjarja tajba (minn hawn 'il quddiem l-abbozz tal-IIA). Il-ġustifikazzjoni għat-tibdil li jirriżulta mid-dħul fis-seħħ tat-Trattat ġiet ipprovduta fil-memorandum ta' spjegazzjoni tal-proposta għar-Regolament li jistabbilixxi l-qafas finanzjarju multiannwali għall-2007 sal-2013 tat-3 ta' Marzu 2010 u ma għandhiex għalfejn tiġi ripetuta hawn.

1.2. Dispożizzjonijiet ġodda proposti għall-qafas finanzjarju tal-2014-2020 1.2.1. Linji gwida politiċi ewlenin

Il-proposta għar-Regolament tal-MFF akkumpanjata mill-abbozz tal-IIA tirrappreżenta t-traspożizzjoni legali tal-Komunikazzjoni tal-Kummissjoni dwar “Baġit għall-Ewropa 2020” adottata [fit-2] ta' Ġunju 2011[4]. Hija se tiġi kkumplimentata minn proposta li temenda l-proposta tal-Kummissjoni għal Regolament dwar ir-regoli finanzjarji applikabbli għall-baġit annwali tal-Unjoni sabiex tintroduċi xi dispożizzjonijiet ġodda li huma parti mill-pakkett ta' proposti għall-qafas finanzjarju 2014-2020.

Il-Komunikazzjoni tippreżenta l-arkitettura u l-elementi prinċipali tal-proposta preżenti – pereżempju t-tul ta' żmien, l-istruttura li tirrifletti l-Istrateġija Ewropa 2020, il-ħtieġa għal aktar flessibbiltà, u l-ammonti previsti għall-qafas finanzjarju nnifsu.

1.2.2. Flessibbiltà

Filwaqt li huwa mmirat sabiex jiżgura d-dixxiplina baġitarja, il-qafas finanzjarju jrid, fl-istess waqt, jipprovdi għal livelli adegwati ta' flessibbiltà sabiex ikun jista' jkun hemm allokazzjoni effettiva tar-riżorsi u rispons rapidu tal-Unjoni għal ċirkostanzi mhux previsti.

Numru ta' parametri, bħat-tul tal-perjodu kopert mill-qafas finanzjarju, in-numru u t-tfassil tal-intestaturi tal-infiq, is-sehem tal-infiq tal-UE preallokat lill-Istati Membri u lir-reġjuni jew predeterminat minn 'ammonti ta' referenza' f'leġiżlazzjoni kodeċiża, il-marġini disponibbli f'kull intestatura tal-infiq, u l-marġini li jibqa' bejn il-limiti massimi tal-qafas finanzjarju u l-limitu massimu tar-riżorsi proprji, l-impatt fuq il-grad tal-flessibbiltà jew ir-riġidità ta' qafas finanzjarju. Waqt li kienet qed telabora l-proposti tagħha għall-qafas finanzjarju li jmiss, il-Kummissjoni qieset dawn l-elementi.

Madankollu, l-esperjenza riċenti turi li l-isfidi li jirriżultaw minn żviluppi mhux previsti b'riperkussjonijiet globali laħqu kwalità ġdida. Sa mill-bidu nett tal-qafas finanzjarju kurrenti, id-dispożizzjonijiet kollha disponibbli tal-flessibbiltà kellhom jiġu mobilizzati, inkluż numru ta' reviżjonijiet tal-qafas innifsu. L-Unjoni se tkun dejjem aktar esposta għall-effetti tal-globalizzazzjoni tal-ekonomija u s-soċjetà, għat-tibdil fil-klima, id-dipendenza fil-qasam tal-enerġija, il-pressjoni migratorja u sfidi globali oħra, li l-biċċa l-kbira minnhom huma f'oqsma li għalihom it-Trattat ta' Lisbona żied ir-responsabbiltà u r-rwol tal-Unjoni.

Li jinstab il-bilanċ ġust bejn, minn naħa waħda, id-dixxiplina baġitarja stretta u l-prevedibbiltà tal-infiq u, min-naħa l-oħra, il-flessibbiltà meħtieġa sabiex l-Unjoni tkun tista' tirrispondi għal sfidi mhux previsti, dejjem se jkun eżerċizzju politiku diffiċli. Fuq il-bażi tal-valutazzjoni tagħha dwar il-funzjonament tal-IIA kurrenti[5] u riflessjonijiet oħra li saru fil-kuntest tar-Reviżjoni tal-Baġit[6], il-Kummissjoni tipproponi titjib limitat iżda mmirat għal dispożizzjonijiet eżistenti tal-flessibbiltà:

1. L-ewwel nett, l-użu wiesa' u regolari li sar mill-Istrument tal-Flessibbiltà u r-Riżerva ta' Għajnuna ta' Emerġenza (EAR) matul il-qafas finanzjarju kurrenti ta prova tal-ħtieġa tagħhom. Fl-istess waqt, l-esperjenza partikolarment bil-ġestjoni tal-Azzjoni Esterna matul l-aħħar ftit snin uriet li l-UE kellha tagħmel użu mhux effiċjenti minn strumenti differenti (bħar-Riżerva tal-Għajnuna ta' Emerġenza, l-Istrument għall-Istabbilità, marġini mhux allokati, u l-Istrument tal-Flessibbiltà) sabiex tindirizza żviluppi internazzjonali u sfidi ġodda.

Għaldaqstant, żieda fl-ammonti massimi disponibbli kull sena hija proposta kemm għall-Istrument tal-Flessibbiltà kif ukoll għall-EAR. Minbarra dan, il-possibilità li jintużaw porzjonijiet mhux użati mill-ammonti massimi annwali fis-snin finanzjarji sussegwenti hija estiża sas-sena n + 3 għall-Istrument tal-Flessibbiltà u introdotta mill-ġdid, sas-sena n+1, għar-Riżerva tal-Ġħajnuna ta' Emerġenza (din tal-aħħar suġġett li ssir dispożizzjoni għal dan fir-Regolament Finanzjarju). L-ambitu tar-Riżerva tal-Għajnuna ta' Emerġenza huwa mwessa' sabiex ikopri wkoll sitwazzjonijiet ta' pressjoni partikolari li jirriżultaw minn flussi migratorji fuq il-fruntieri esterni tal-Unjoni.

Dan għandu jippermetti wkoll liż-żewġ strumenti sabiex jikkontribwixxu aktar għal rispons aktar rapidu tal-Unjoni għal sitwazzjonijiet mhux mistennija ta' skala limitata.

2. It-tieni nett, filwaqt li l-Fond tas-Solidarjetà tal-Unjoni Ewropea u l-Fond Ewropew ta' Aġġustament għall-Globalizzazzjoni (EGF) ippruvaw l-utilità tagħhom, qatt ma ntuża l-ammont annwali massimu previst għall-EGF taħt il-qafas finanzjarju kurrenti (EUR 500 miljun). Tnaqqis żgħir fl-ammont disponibbli għal EUR 429 miljun huwa propost flimkien ma' simplifikazzjoni tal-proċeduri għall-finanzjament u r-rilaxx tal-għajnuna u twessigħ tal-ambitu tal-Fond sabiex jgħin ukoll fil-mitigazzjoni tal-effetti tal-globalizzazzjoni li jaffettwaw il-bdiewa.

3. It-tielet, il-possibilità li jkun hemm differenza mill-ammonti indikattivi fil-programmi kodeċiżi hija proposta li tiżdied minn 5 % għal 10 % sabiex tiżdied il-flessibbiltà fi ħdan l-intestaturi.

4. Ir-raba', il-Kummissjoni se tagħmel proposta għall-introduzzjoni ta' dispożizzjoni ġdida fir-Regolament Finanzjarju bil-għan li tiżdied il-flessibbiltà għal proġetti ffinanzjati taħt il-Faċilità tal-Infrastruttura li għadha kif ġiet stabbilita.

Minħabba n-natura tagħhom, dawk il-proġetti tal-infrastruttura f'ħafna każijiet se jitolbu proċeduri kumplessi għall-kuntratti. Taħt dawk iċ-ċirkostanzi, dewmien anki limitat jista' jwassal għal telf ta' approprjazzjonijiet għall-impenji annwali u jimmina l-vijabbiltà ta' dawk il-proġetti u b'hekk id-determinazzjoni politika tal-Unjoni sabiex timmodernizza n-netwerks u l-infrastruttura tagħha tat-trasport, l-enerġija u t-telekomunikazzjonijiet. Sabiex jevita dan, ir-Regolament Finanzjarju għandu jippermetti riport awtomatiku għas-sena finananzjarja ta' wara ta' approprjazzjonijiet għall-impenji mhux użati fi tmiem ta' sena finanzjarja għal proġetti ffinanzjati taħt il-Faċilità tal-Infrastruttura.

5. Il-ħames, fid-dawl tal-vulnerabbiltà tas-settur agrikolu għal kriżijiet maġġuri, Riżerva Speċjali ġdida għall-kriżijiet fis-settur agrikolu hija proposta b'ammont annwali ta' 500 miljun li għandha tiġi mmobilizzata lil hinn mil-limiti massimi tal-qafas finanzjarju. Il-proċedura għall-mobilizzazzjoni ta' din ir-Riżerva tikkorrispondi għal dik għar-Riżerva għal Għajnuna ta' Emerġenza. Regoli dettaljati għall-eliġibbiltà għall-assistenza minn din ir-Riżerva se jiġu stabbiliti fl-att legali speċifiku tagħhom.

6. Fl-aħħar nett, reviżjoni tal-qafas finanzjarju se tkompli tkun meħtieġa sabiex jiġu ffaċċjati ċirkostanzi mhux previsti b'impatt finanzjarju kbir. Sabiex ikun possibbli livell ta' flessibbiltà simili meta mqabbel mal-IIA kurrenti, huwa propost 'Marġini ta' Kontinġenza' li jista' jiġi mmobilizzat lil hinn mil-limiti massimi tal-qafas finanzjarju fi ħdan il-limiti ta' 0,03% tal-ING tal-UE permezz tal-istess proċedura kif stabbilit taħt il-Punt 22 tal-IIA kurrenti.

Id-dispożizzjonijiet dwar il-flessibbiltà proposti għar-Regolament tal-MFF u l-abbozz tal-IIA isegwu l-approċċ tal-proposti ta' Marzu 2010: l-Artikolu 2 tar-Regolament jipprovdi għall-possibbiltà li jiġu mmobilizzati l-ammonti tal-istrumenti speċjali barra mill-qafas finanzjarju lil hinn mil-limiti massimi stabbiliti mill-qafas finanzjarju. Id-dispożizzjonijiet dwar l-istrumenti nfushom, l-ammonti tagħhom u l-proċeduri tal-mobilizzazzjoni tagħhom huma inklużi fl-IIA. B'dan il-mod, il-koerenza tal-proċeduri u r-rwoli taż-żewġ fergħat tal-awtorità tal-baġit huma żgurati (ara l-Punti 10 sa 15 tal-Abbozz tal-IIA).

1.2.3. Dispożizzjonijiet speċifiċi dwar il-garanziji

Jekk il-ħlas lura ta' self garantit ipprovdut skont il-Faċilità tal-Bilanċ tal-Pagamenti ("BoP") jew skont il-Mekkaniżmu Ewropew għall-Istabbilizzazzjoni Finanzjarja ("EFSM") ikollu jiġi kopert mill-baġit tal-Unjoni, ir-Regolament Nru 1150/2000 jipprevedi l-possibilità li jissejħu riżorsi proprji addizzjonali sabiex jiġi rrispettat l-obbligu legali tal-baġit tal-Unjoni. Din l-operazzjoni ta' flus likwidi jkollha tiġi segwita b'operazzjoni baġitarja – jiġifieri l-introduzzjoni ta' baġit ta' emenda. Kull baġit ta' emenda għandu jikkonforma mal-limiti massimi tal-MFF. Fid-dawl tal-ammonti involuti (is-self garantit tal-EFSM u l-BoP), dan kważi ċertament jitlob reviżjoni tal-MFF.

Huwa improbabbli ħafna li qatt isseħħ din is-sitwazzjoni iżda sabiex tiġi evitata kull diffikultà potenzjali, huwa propost li fir-Regolament tal-MFF tiġi inkluża dispożizzjoni li teskludi din in-nefqa potenzjali mill-qafas finanzjarju (jiġifieri jekk ikun meħtieġ, l-ammonti jiġu mmobilizzati lil hinn mil-limiti massimi tal-qafas finanzjarju).

Il-limitu massimu relevanti li jirrestrinġi l-kapaċità tal-Unjoni sabiex tiggarantixxi s-self mill-baġit tal-Unjoni huwa l-limitu massimu tar-riżorsi proprji u mhux il-limitu massimu tal-MFF. Li tintalab reviżjoni tal-MFF fil-każ ta' attivazzjoni ta' din il-garanzija jidher li jmur kontra l-intenzjonijiet tal-leġiżlatur.

1.2.4. Kontribuzzjoni għall-finanzjament ta' proġetti fuq skala kbira

Il-karatteristiċi ta' programmi kbar ta' żvilupp teknoloġiku bbażati fuq proġetti tal-infrastruttura fuq skala kbira, b'mod partikolari l-programmi Ewropej tan-navigazzjoni bis-satellita EGNOS u Galileo, jitolbu dispożizzjonijiet speċifiċi mmirati sabiex jiġu 'iżolati' l-ammonti li jikkorrispondu mal-kontribuzzjoni mill-baġit tal-Unjoni. Fid-dawl tal-esperjenza bil-qafas finanzjarju tal-2007-2013, dawn id-dispożizzjonijiet il-ġodda huma meħtieġa sabiex jiġi ssalvagwardjat l-iżvilupp ordnat tal-infiq tal-Unjoni u sabiex il-proċedura baġitarja annwali tiffunzjona mingħajr diffikultajiet.

L-atti leġiżlattivi li jirrigwardaw il-programmi msemmija hawn fuq għandhom jikkonformaw mad-dispożizzjonijiet finanzjarji stabbiliti f'dan ir-Regolament.

2. L-ELEMENTI LEGALI TAL-PROPOSTA 2.1. Ir-Regolament tal-Qafas Finanzjarju Multiannwali

Artikolu 1

Il-formulazzjoni tal-Artikolu 1 jispeċifika t-tul tal-qafas finanzjarju u jirreferi għall-Anness li fih it-tabella tal-qafas finanzjarju.

Artikolu 2 – Konformità mal-limitu massimu tal-MFF

L-ewwel paragrafu tal-Artikolu 2 jistabbilixxi obbligu għall-istituzzjonijiet biex jirrispettaw il-limiti waqt il-proċedura baġitarja f’konformità mad-dispożizzjonijiet tat-Trattat.

It-tieni paragrafu jintroduċi l-possibbiltà li jinqabżu l-limiti massimi, jekk ikun meħtieġ, meta jkunu mmobilizzati l-istrumenti li mhumiex inklużi fil-qafas finanzjarju. Ir-Riżerva tal-Għajnuna ta' Emerġenza, il-Fond tas-Solidarjetà, l-Istrument tal-Flessibbiltà, il-Fond Ewropew tal-Aġġustament għall-Globalizzazzjoni u r-Riżerva li għadha kif inħolqot għall-kriżijiet fis-settur agrikolu u l-Marġini ta' Kontinġenza huma definiti fil-Punti 10 sa 15 tal-abbozz tal-IIA. Huma mhumiex inklużi fil-qafas finanzjarju u jiżguraw li jkun ipprovdut finanzjament f’ċirkostanzi speċifiċi li jaqbeż il-limiti massimu tal-qafas finanzjarju, jekk ikun hemm bżonn. Huma jżidu l-flessibbiltà tal-qafas finanzjarju u huma mmobilizzati b’mod konġunt miż-żewġ fergħat tal-awtorità tal-baġit. Sabiex jinżamm il-livell kurrenti ta’ flessibbiltà u r-rwoli tal-istituzzjonijiet fil-mobilizzazzjoni ta’ dawn l-istrumenti, id-dispożizzjonijiet li jirregolawhom huma inklużi fl-abbozz tal-IIA.

It-tielet paragrafu jeskludi l-proċedura tal-mobilizzazzjoni tal-garanziji mill-baġit tal-Unjoni għas-self ipprovdut taħt il-Faċilità tal-Bilanċ tal-Pagamenti u l-Mekkaniżmu Ewropew tal-Istabbilizzazzjoni Finanzjarja mill-obbligu li tirrispetta l-limiti massimi tal-qafas finanzjarju u għalhekk mill-ħtieġa ta' reviżjoni tal-MFF. Il-limitu massimu relevanti li jeħtieġ li jiġi rrispettat huwa l-limitu massimu tar-riżorsi proprji.

Artikolu 3 – Rispett għal-limitu massimu tar-riżorsi proprji

Hija proposta bidla għal dan l-Artikolu meta mqabbel mal-proposta ta' Marzu 2010 – referenza espliċita għall-fatt li l-użu li jsir mill-istrumenti li jistgħu jiġu mobilizzati minn barra l-qafas finanzjarju u l-garanziji tas-self koperti mill-baġit tal-Unjoni skont ir-Regolament (KE) Nru 332/2002 jew ir-Regolament (UE) Nru 407/2010 wkoll jenħtieġ li jirrispetta l-limitu massimu tar-riżorsi proprji.

Artikolu 4 – Aġġustament tekniku tal-qafas finanzjarju

Il-qafas finanzjarju huwa ppreżentat fi prezzijiet tal-2011. Il-proċedura għall-aġġustament tekniku tiegħu qed tinżamm, flimkien mad-deflatur ta' 2%. Huwa introdott element ġdid fil-paragrafu 1(c) – il-preżentazzjoni tal-ammont assolut tal-Marġini ta' kontinġenza fil-livell ta' 0,03% tal-ING tal-UE kif definit fil-Punt 15 tal-abbozz tal-IIA.

Artikolu 5 – Aġġustament tal-pakketti tal-politika tal-koeżjoni

Il-formulazzjoni ta' dan l-Artikolu tirriproduċi t-test tal-Punt 17 tal-IIA kurrenti u l-Artikolu 5 tal-proposta ta' Marzu 2010. Il-bidliet introdotti jirriflettu l-iskeda tal-qafas finanzjarju tal-2014-2020 u l-bidla fl-istruttura tal-qafas finanzjarju.

Artikolu 6 – Aġġustamenti relatati mal-implimentazzjoni

Il-formulazzjoni ta' dan l-Artikolu, li jistabbilixxi regoli għall-aġġustamenti relatati mal-implimentazzjoni, jikkorrispondi mal-Punt 18 tal-IIA kurrenti. Ma huma proposti l-ebda tibdiliet meta mqabbla mal-proposta ta' Marzu 2010.

Artikolu 7 – Aġġustament tal-Fondi Strutturali, il-Fond ta' Koeżjoni, il-Fond tal-Iżvilupp Rurali u l-Fond Ewropew tas-Sajd

Dan l-Artikolu jirriproduċi t-test ta' Punt 48 tal-IIA kurrenti. It-tħejjija tal-bażijiet legali u mbagħad id-dokumenti tal-ipprogrammar normalment tieħu fit-tul u għalhekk tista' tiġi prevista adozzjoni tard tat-testi legali jew programmi.

Artikolu 8 – Aġġustamenti relatati mad-defiċit eċċessiv tal-gvern

Il-formulazzjoni ta’ dan l-Artikolu, li jistabbilixxi r-regoli għall-aġġustamenti marbuta ma’ defiċit eċċessiv tal-gvern, jirriproduċi t-test ta’ Punt 20 tal-IIA kurrenti u ma nbidilx meta mqabbel mal-proposta ta' Marzu 2010.

Artikolu 9 – Reviżjoni tal-qafas finanzjarju

Il-formulazzjoni ta' dan l-Artikolu jikkorrispondi mal-Punti 21 sa 23 tal-IIA kurrenti u l-Artikolu 8 tal-proposta ta' Marzu 2010. Ġew introdotti xi ftit tibdiliet: 1. ir-regola ġenerali dwar iż-żmien meta ssir il-proposta għar-reviżjoni, kif inkluża fl-Artikolu 8(2) tal-proposta ta' Marzu 2010, tneħħiet billi ma kenitx tikkorrispondi mal-prattika kurrenti fid-dawl tal-ħtieġa li jiġu ffaċċjati ċirkostanzi mhux previsti meta dawn iseħħu; 2. il-possibiltà li l-qafas finanzjarju jiġi adattat b'maġġoranza kwalifikata kif propost fl-Art. 8(3) f'Marzu 2010 ġiet irtirata (fid-dawl tat-twessigħ propost tal-istrumenti tal-flessibiltà, inkluża l-introduzzjoni tal-Marġini ta' Kontinġenza); u 3. ġie introdott paragrafu 5 ġdid li jispeċifika liema mill-aġġustamenti għall-qafas finanzjarju stipulati f'Artikoli oħra għandhom ukoll jitqiesu bħala reviżjoni tal-qafas finanzjarju.

Artikolu 10 - L-aġġustament tal-qafas finanzjarju fil-każ ta’ reviżjoni tat-Trattat

Il-formulazzjoni ta’ dan l-Artikolu, li jistabbilixxi r-regoli għall-aġġustamenti fil-każ ta’ reviżjoni tat-Trattat, jirriproduċi t-test ta’ Punt 4 tal-IIA kurrenti u jikorrispondi mal-Artikolu 9 tal-proposta ta' Marzu 2010.

Artikolu 11 – Aġġustament tal-qafas finanzarju f'każ ta' tkabbir

Il-formulazzjoni ta' dan l-Artikolu jirriproduċi t-test tal-Punt 29 tal-IIA kurrenti u l-Artikolu 11 tal-proposta ta' Marzu 2010.

Huwa introdott paragrafu ġdid b'referenza partikolari għal soluzzjoni komprensiva possibbli għall-problema ta' Ċipru matul il-perjodu kopert mill-qafas finanzjarju.

Artikolu 12 – Koperazzjoni interistituzzjonali fil-proċedura baġitarja

Id-dispożizzjonijiet ta' dan l-Artikolu jikkorrispondu mal-proposta ta' Marzu 2010. Ir-regoli ġenerali tal-koperazzjoni fil-proċedura baġitarja huma inklużi fir-Regolament tal-MFF, filwaqt li l-abbozz tal-IIA u l-Anness tiegħu fihom dispożizzjonijiet aktar dettaljati.

Artikolu 13 – Finanzjament tal-Politika Estera u tas-Sigurtà Komuni (PESK)

Id-dispożizzjoni tal-proposta ta' Marzu 2010 hija miżmuma bl-eċċezzjoni tal-istabbiliment tal-ammont minimu għall-PESK.

Artikolu 14 – Kontribuzzjoni għall-finanzjament ta' proġetti fuq skala kbira

Huma meħtieġa dispożizzjonijiet speċifiċi għal programmi kbar ta' żvilupp teknoloġiku bbażati fuq proġetti tal-infrastruttura fuq skala kbira, partikolarment il-programmi Ewropej tan-navigazzjoni bis-satellita EGNOS u Galileo. Dawn id-dispożizzjonijiet huma meħtieġa minħabba l-karatteristiċi speċifiċi ta' dawk il-proġetti, jiġifieri tul li fil-biċċa l-kbira jeċċedi l-qafas finanzjarju multiannwali, riskji marbuta mal-proġett li jistgħu jipproduċu eċċessi sostanzjali fl-ispejjeż, parteċipazzjoni limitata jew nuqqas ta' parteċipazzjoni mill-kapital privat, u abilità modesta jew nuqqas ta' abilità li jiġi ġġenerat dħul minn sfruttament kummerċjali fuq perjodu ta' żmien qasir jew ta' tul medju.

Għaldaqstant, id-dispożizzjoni proposta tipprevedi 'iżolament' tal-ammont disponibbli għall-programmi Ewropej tan-navigazzjoni bis-satellita EGNOS u Galileo taħt il-qafas finanzjarju 2014-2020.

Artikolu 15 – Valutazzjoni ta' nofs it-terminu tal-implimentazzjoni tal-qafas finanzjarju

Hija inkluża dispożizzjoni ġdida li tistabbilixxi ż-żmien għal valutazzjoni ta' nofs it-terminu tal-funzjonament tal-qafas finanzjarju. Dispożizzjoni simili ġiet inkluża fl-IIA kurrenti (il-Punt 7 u d-Dikjarazzjoni Nru 1).

Artikolu 16 – Tranżizzjoni lejn il-qafas finanzjarju li jmiss

Dan l-Artikolu jistabbilixxi l-obbligu għall-Kummissjoni li tippreżenta qafas finanzjarju ġdid qabel l-1 ta' Jannar 2018, jiġifieri tliet snin qabel it-tmiem tal-qafas finanzjarju.

It-tieni paragrafu jfakkar fir-regoli fil-każ li ma jintlaħaqx qbil dwar qafas finanzjarju sa tmiem il-qafas finanzjarju kopert mir-Regolament.

Artikolu 17

L-Artikolu finali tar-regolament MFF jiffissa d-data tad-dħul fis-seħħ tar-Regolament. L-IIA għandu jidħol fis-seħħ fl-istess jum billi ż-żewġ testi legali jikkumplimentaw lil xulxin.

2.2. Il-Ftehim Interistituzzjonali dwar il-koperazzjoni fi kwistjonijiet baġitarji u dwar il-ġestjoni finanzjarja tajba

Introduzzjoni – Punti 1 sa 6 tal-abbozz tal-IIA

Il-parti introduttorja tal-abbozz tal-IIA tintroduċi r-referenza tat-Trattat (Art. 295), in-natura vinkolanti ta' dan il-ftehim, il-koerenza tiegħu ma' atti legali oħra marbuta mal-qafas finanzjarju multiannwali u l-proċedura baġitarja, tiddeskrivi l-istruttura tal-Ftehim, u tistipula d-data tad-dħul tiegħu fis-seħħ (l-istess data bħar-Regolament tal-MFF).

Hija tirriproduċi l-formulazzjoni tal-Punti 1 sa 6 tal-proposta ta' Marzu 2010.

Parti I - dispożizzjonijiet marbuta mal-qafas finanzjarju u strumenti speċjali li mhumiex inklużi fil-qafas finanzjarju

A. Dispożizzjonijiet marbuta mal-qafas finanzjarju

Il-Punt 7 jipprovdi għar-regoli dwar il-preżentazzjoni tal- informazzjoni dwar operazzjonijiet li mhumiex inklużi fil-baġit (jiġifieri l-Fond Ewropew għall-Iżvilupp) u dwar l-iżvilupp ta’ kategoriji ta’ riżorsi proprji. Il-prattika li tiġi pprovduta din l-informazzjoni se tinżamm l-istess iżda qed ikun propost li tiġi ppreżentata mhux aktar mal-aġġustament tekniku tal-qafas finanzjarju iżda mad-dokumenti li jakkumpanjaw l-abbozz tal-baġit fejn loġikament hu aktar postha. Iż-żmien tal-preżentazzjoni jibqa' prattikament l-istess (it-tmiem ta' April/il-bidu ta' Mejju). Din il-bidla diġà ġiet inkluża fil-proposta ta' Marzu 2010.

Il-Punt 8 tal-IIA il-ġdid jirrigwarda l-marġini taħt il-limiti massimi. Ir-Regolament tal-MFF jistabbilixxi l-limiti għall-intestaturi kollha li għandhom jiġu rrispettati waqt kull proċedura baġitarja annwali kif mitlub mit-Trattat. Madankollu, għandha tiġi ppriservata l-prattika li wieħed jiżgura kemm jista’ jkun marġini suffiċjenti taħt il-limiti massimi. Dan jikkostitwixxi element tal-koperazzjoni interistituzzjonali u r-rieda tajba min-naħa tal-istituzzjonjiet fil-proċedura baġitarja u bħala tali postu hu fl-IIA. Id-dispożizzjoni qed tinżamm mingħajr tibdil għall-prattika kurrenti u wkoll meta mqabbla mal-proposta ta' Marzu 2010.

Il-Punt 9 jipprovdi għal aġġornament tal-previżjoni għal approprjazzjonijiet għall-ħlasijiet wara l-2020 fir-raba' sena tal-qafas finanzjarju, skont il-prattika kurrenti u l-proposta ta' Marzu 2010.

B. Dispożizzjonijiet relatati mal-istrumenti speċjali li mhumiex inklużi fil-qafas finanzjarju

L-istrumenti eżistenti li mhumiex inklużi fil-qafas finanzjarju (ir-Riżerva dwar l-Għajnuna ta’ Emerġenza, il-Fond ta’ Solidarjetà, l-istrument ta’ Flessibbiltà u l-Fond Ewropew ta’ Aġġustament għall-Globalizzazzjoni) inżammu fl-IIA. Ir-Regolament tal-MFF jinkludi fl-Artikolu 2 il-possibbiltà li dawn jiġu mmobilizzati, jekk ikun meħtieġ, 'il fuq mil-limiti massimi stabbiliti mill-qafas finanzjarju. Dan il-qsim tad-dispożizzjonijiet bejn iż-żewġ atti jikkorrispondi mal-loġika ppreżentata fil-proposti ta' Marzu 2010.

It-tibdiliet imqabbla mal-proposta ta' Marzu 2010 jikkonsistu f'żieda fl-ammonti għall-Istrument tal-Flessibbiltà u r-Riżerva għal Għajnuna ta' Emerġenza, tnaqqis tal-ammont tal-Fond Ewropew tal-Aġġustament għall-Globalizzazzjoni, l-introduzzjoni, suġġett għal dispożizzjoni li għandha tiġi introdotta fir-Regolament Finanzjarju, tal-possibilità li jintużaw porzjonijiet mhux użati tal-ammonti annwali disponibbli taħt l-EAR sas-sena n+1 u t-twessigħ tal-ambitu tiegħu sabiex ikopri wkoll sitwazzjonijiet ta' pressjoni partikolari li tirriżulta minn flussi migratorji fuq il-fruntieri esterni tal-Unjoni, il-prolongament ta' dik il-possibilità għall-Istrument tal-flessibbiltà mis-sena n+2 għas-sena n+3, kif ukoll it-tħassir tad-dispożizzjonijiet li jillimitaw l-ammonti annwali disponibbli taħt il-Fond Ewropew ta' Aġġustament għall-Globalizzazzjoni (EGF) għad-disponibbiltà tal-ammonti mhux minfuqa u diżimpenjati mis-sentejn preċedenti u t-twessigħ tal-ambitu tiegħu sabiex jgħin fil-mitigazzjoni tal-effetti tal-globalizzazzjoni li jaffettwaw il-bdiewa. L-ammonti kollha huma espressi fi prezzijiet tal-2011 sabiex ikunu koerenti mal-preżentazzjoni globali tal-qafas finanzjarju. Il-proċeduri tal-mobilizzazzjoni huma ssimplifikati meta mqabbla mal-prattika kurrenti.

Hija proposta riżerva ġdida għal kriżijiet kbar fis-settur agrikolu. Regoli dettaljati għall-eliġibbiltà tal-għajnuna minn din ir-Riżerva se jiġu stabbiliti f'bażi legali speċifika. L-IIA jiddefinixxi l-ammont u r-regoli għall-mobilizzazzjoni tagħha.

Huwa propost strument ġdid barra mill-qafas finanzjarju – il-'Marġini ta' Kontinġenza'. Il-formulazzjoni tikkorrispondi, fis-sustanza, mad-dispożizzjonijiet adottati mill-Kunsill fil-pożizzjoni tiegħu tat-18 ta' Jannar 2011 dwar il-proposti ta' Marzu 2010. Madankollu, il-qsim tad-dispożizzjonijiet fuq il-Marġini tal-Kontinġenza jikkorrispondi mal-loġika tal-proposti ta' Marzu 2010 – jiġifieri ż-żamma fl-IIA tad-dispożizzjonijiet kollha relatati mal-istrumenti speċjali barra mill-qafas finanzjarju.

Parti II - titjib tal-koperazzjoni interistituzzjonali fil-proċedura baġitarja.

A. Il-proċedura tal- kollaborazzjoni interistituzzjonali

Id-dispożizzjonijiet dwar il-koperazzjoni interistituzzjonali fil-proċedura baġitarja ġew emendati b'mod sinifikanti meta mqabbla mar-regoli kurrenti sabiex jikkonformaw mal-proċedura baġitarja l-ġdida introdotta mit-Trattat. Id-dispożizzjonijiet kollha huma inklużi fl-Anness tal-IIA kif propost f'Marzu 2010.

Id-dispożizzjonijiet inklużi fl-anness jikkorrispondu mal-proposta ta' Marzu 2010 iżda jinkorporaw it-tibdiliet miftiehma ladarba minn dak iż-żmien 'l hawn fid-Dikjarazzjonijiet tal-istituzzjonijiet.

B. Inkorporazzjoni tad-dispożizzjonijiet finanzjarji f'atti leġiżlattivi

Id-dispożizzjonijiet tal-IIA kurrenti u b'hekk ukoll tal-proposta ta' Marzu 2010 huma miżmuma. Il-possibilità li wieħed jitbiegħed mill-ammonti inklużi fl-atti leġiżlattivi hija miżjuda minn 5% għal 10% sabiex tiżdied il-flessibbiltà fi ħdan l-intestaturi. Din id-dispożizzjoni ma tapplikax għal ammont preallokat lill-Istati Membri għat-tul kollu tal-qafas finanzjarju u issa għall-proġett fuq skala kbira definit fl-Artikolu 13 tar-Regolament tal-MFF.

C. Infiq rigward ftehimiet dwar is-sajd

Qed jiġi propost li jiġu allinjati d-dispożizzjonijiet tal-IIA il-ġdid dwar in-nefqa relatata mal-ftehimiet dwar is-sajd mar-regoli baġitarji l-ġodda. It-tibdil propost fil-formulazzjoni jirrifletti dawk il-partijiet tat-test eżistenti li għadhom relevanti u jirrigwarda purament il-koperazzjoni tajba u li l-istituzzjonijiet jinżammu infurmati bl-iżviluppi. Id-dispożizzjonijiet jikkorrispondu mal-proposta ta' Marzu 2010, u l-ebda tibdil ma tqies bħala neċessarju.

D. Il-finanzjament tal-Politika Estera u ta’ Sigurtà Komuni

Id-dispożizzjonijiet jikkorrispondu mal-proposta ta' Marzu 2010, u l-ebda tibdil ma tqies bħala neċessarju.

E. Involviment tal-istituzzjonijiet fil-ġestjoni tal-Fond Ewropew għall-Iżvilupp

Sabiex jittejjeb l-iskrutinju parlamentari tal-Fond Ewropew għall-Iżvilupp (EDF) u dan jinġieb iqreb lejn ir-regoli tal-Koperazzjoni għall-Iżvilupp iffinanzjata mill-baġit tal-Unjoni, huwa propost li tiġi introdotta dispożizzjoni ġdida dwar id-djalogu mal-Parlament Ewropew dwar id-dokumenti tal-ipprogrammar li għandhom jiġu ffinanzjati mill-EDF.

F. Il-koperazzjoni tal-istituzzjonijiet fil-proċedura baġitarja dwar in-nefqa amministrattiva

Hija introdotta dispożizzjoni ġdida mmirata sabiex jiġi żgurat li l-istituzzjonijiet jiftiehmu kull sena fi stadju bikri tal-proċedura baġitarja (iż-żmien huwa introdott fl-Anness) dwar il-qsim tal-infiq amministrattiv; il-varjazzjoni annwali fil-livell tal-infiq amministrattiv għal kull istituzzjoni għandu wkoll jirrifletti l-impatt baġitarju possibbli minn tibdiliet għad-dispożizzjonijiet tar-regolamenti tal-persunal u l-impatt tat-tnaqqis progressiv tal-livelli tal-persunal b'5% bejn l-2013 u l-2018 fl-istituzzjonijiet, il-korpi u l-aġenziji kollha.

Parti III - Tmexxija finanzjarja tajba tal-fondi tal-UE

Din il-parti tirriproduċi t-test tal-proposta ta' Marzu 2010 dwar l-Ipprogrammar finanzjarju (bi ftit aġġustamenti sabiex it-test jitqarreb lejn il-prattika kurrenti), u dwar l-Aġenziji u l-Iskejjel Ewropej (b'addizzjoni li ssegwi l-istess regoli għat-twaqqif ta' xi Aġenzija ġdida għall-modifika tal-att legali relevanti jew il-modifika tal-inkarigi ta' xi aġenzija u speċifikazzjoni dwar id-dettalji tal-valutazzjoni tal-impatt li għandha ssir mill-Kummissjoni qabel ma tippreżenta l-proposta għat-twaqqif ta' Aġenzija ġdida jew Skola Ewropea ġdida).

It-taqsima dwar Strumenti Finanzjarji Ġodda jew Innovattivi ma għadhiex neċessarja billi r-Regolament Finanzjarju se jinkludi Titolu ġdid iddedikat għal kollox għall-istrumenti finanzjarji u b'regoli dettaljati għar-rappurtar dwar dawk l-istrumenti.

2011/0177 (APP)

Proposta għal

REGOLAMENT TAL-KUNSILL

li jistabbilixxi l-qafas finanzjarju multiannwali għas-snin 2014-2020

IL-KUNSILL TAL-UNJONI EWROPEA,

Wara li kkunsidra t-Trattat dwar il-funzjonament tal-Unjoni Ewropea, u b'mod partikolari l-Artikolu 312 tiegħu, flimkien mat-Trattat li jistabbilixxi l-Komunità Ewropea għall-Enerġija Atomika, u b'mod partikolari l-Artikolu 106a tiegħu,

Wara li kkunsidra l-proposta mill-Kummissjoni Ewropea[7],

Wara li kkunsidra l-kunsens tal-Parlament Ewropew[8],

Wara t-trażmissjoni tal-abbozz tal-att leġiżlattiv lill-Parlamenti nazzjonali,

Filwaqt li jaġixxi skont il-proċedura leġiżlattiva speċjali,

Billi:

(1) Il-limiti massimi annwali tal-approprjazzjonijiet għall-impenji skont il-kategorija tan-nefqa u l-limiti massimi annwali dwar l-approprjazzjonijiet għall-ħlasijiet stabbiliti minn dan ir-Regolament għandhom jirrispettaw il-limiti massimi stabbiliti għall-impenji u r-riżorsi proprji fid-[Deċiżjoni tal-Kunsill XXXX/XX/UE, Euratom].

(2) Meta titqies il-ħtieġa ta' livell adegwat ta' prevedibbiltà għat-tħejjija u l-implimentazzjoni ta' investimenti fuq perjodu ta' tul medju, it-tul tal-qafas finanzjarju għandu jiġi stabbilit għal seba' snin li jibdew mill-1 ta' Jannar 2014, b'valutazzjoni tal-implimentazzjoni tal-qafas finanzjarju f'nofs dan il-perjodu. Ir-riżultati ta' din il-valutazzjoni għandhom jitqiesu matul l-aħħar tliet snin tal-ħajja tal-qafas finanzjarju.

(3) Strumenti speċjali, ir-Riżerva għall-Għajnuna ta’ Emerġenza, il-Fond tas-Solidarjetà tal-Unjoni Ewropea, l-Istrument tal-Flessibbiltà, il-Fond Ewropew ta’ Aġġustament għall-Globalizzazzjoni, ir-Riżerva għall-kriżijiet fis-settur agrikolu u l-Marġini ta' Kontinġenza huma meħtieġa biex jippermettu lill-Unjoni tirreaġixxi għal ċirkostanzi speċifiċi mhux previsti jew biex jippermettu l-finanzjament ta’ infiq identifikat b’mod ċar li ma setax jiġi ffinanzjat fi ħdan il-limiti massimi disponibbli għal intestatura waħda jew aktar kif stabbilit fil-qafas finanzjarju. Għalhekk hu neċessarju li jkun hemm provvediment għal possibbiltà li jiddaħħlu fil-baġit approprjazzjonijiet għall-impenji 'l fuq mil-limiti massimi stabbiliti fil-qafas finanzjarju fejn hu meħtieġ li jintużaw strumenti speċjali.

(4) Jekk ikun meħtieġ li jiġu mmobilizzati l-garanziji baġitarji tal-Unjoni għas-self ipprovdut taħt il-Faċilità tal-Bilanċ tal-Pagamenti u l-Mekkaniżmu Ewropew tal-Istabbilizzazzjoni Finanzjarja stabbilit fir-Regolament tal-Kunsill (KE) Nru 332/2002 tat-18 ta' Frar 2002 li jistabbilixxi faċilità li tipprovdi assistenza finanzjarja għal perjodu ta' tul medju għall-bilanċi tal-pagamenti tal-Istati Membri[9] u fir-Regolament tal-Kunsill (UE) Nru 407/2010 tal-11 ta' Mejju 2010 li jistabbilixxi mekkaniżmu Ewropew tal-istabbilizzazzjoni finanzjarja[10], l-ammont neċessarju għandu jiġi mmobilizzat 'il fuq mil-limitu massimu tal-approprjazzjonijiet għall-impenji u għall-ħlasijiet tal-qafas finanzjarju filwaqt li jiġi rrispettat il-limitu massimu tar-riżorsi proprji.

(5) Il-qafas finanzjarju għandu jiġi stabbilit bil-prezzijiet tal-2011. Ir-regoli għall-aġġustamenti tekniċi tal-qafas finanzjarju biex jiġu kkalkulati mill-ġdid il-limiti massimi u l-marġini disponibbli għandhom jiġu stabbiliti wkoll.

(6) Il-qafas finanzjarju ma għandux iqis il-partiti tal-baġit iffinanzjati mid-dħul assenjat fit-tifsira tar-Regolament (UE) Nru [xxx/201x] tal-Parlament Ewropew u tal-Kunsill ta' […] dwar ir-regoli finanzjarji applikabbli għall-baġit annwali tal-Unjoni[11].

(7) Għandhom jiġu stabbiliti regoli għal sitwazzjonijiet oħra li jistgħu jitolbu aġġustament tal-qafas finanzjarju. Dawn l-aġġustamenti jistgħu jkunu relatati mal-implimentazzjoni tal-baġit, defiċit eċċessiv tal-gvern, reviżjoni tat-Trattati, tkabbir jew adozzjoni tard ta' regoli ġodda li jirrigwardaw ċerti oqsma ta' politika.

(8) Il-pakketti nazzjonali għall-Koeżjoni għat-tkabbir u l-impjiegi huma stabbiliti fuq il-bażi tal-previżjoni għall-Prodott Domestiku Gross (minn hawn 'il quddiem il-"PDG") tar-rebbiegħa 2011. Fid-dawl tal-inċertezzi fit-tbassir u l-impatt għall-Istati Membri b'limitu massimu, għandha ssir valutazzjoni f'nofs it-terminu sabiex tqabbel il-PDG imbassar u dak reali u l-impatt tiegħu fuq il-pakketti. Fil-każ li l-PDG għall-2014-2016 jitbiegħed b'aktar minn +/- 5% mill-previżjoni użata fl-2011, il-pakketti għall-2018-2020 għall-Istati Membri kkonċernati jkun jenħtieġ li jiġu aġġustati. Huwa meħtieġ li jiġu stipulati r-regoli għal dan l-aġġustament.

(9) Jista' jkun meħtieġ li l-qafas finanzjarju jiġi revedut fil-każ ta' ċirkostanzi mhux previsti li ma jistgħux jiġu trattati fi ħdan il-limiti massimi stabbiliti tal-qafas finanzjarju. Għalhekk, huwa neċessarju li jkun hemm dispożizzjoni għal reviżjoni tal-qafas finanzjarju f'każijiet bħal dawn.

(10) Hu meħtieġ li jkun hemm provvedimenti għal regoli ġenerali dwar koperazzjoni interistituzzjonali fil-proċedura baġitarja.

(11) Sabiex il-proċedura baġitarja tkun tista' timxi mingħajr skossi, hu meħtieġ li jiġu stipulati r-regoli bażiċi għall-ibbaġittjar tan-nefqa għall-Politika Estera u ta’ Sigurtà Komuni u ammont globali għall-perjodu kopert mill-qafas finanzjarju.

(12) Arranġamenti ddettaljati dwar koperazzjoni interistituzzjonali fil-proċedura baġitarja u dwar l-ibbaġittjar tan-nefqa għall-Politika Estera u ta’ Sigurtà Komuni huma stipulati fil-Ftehim Interistituzzjonali ta’ […] 201x bejn il-Parlament Ewropew, il-Kunsill u l-Kummissjoni dwar il-ġestjoni finanzjarja tajba u l-koperazzjoni fi kwistjonijiet baġitarji[12].

(13) Huma meħtieġa wkoll regoli speċifiċi sabiex wieħed jittratta l-proġetti l-kbar tal-infrastruttura li l-ħajja tagħhom testendi sostanzjalment lil hinn mill-perjodu stabbilit għall-qafas finanzjarju. Huwa neċessarju li jiġu stabbiliti ammonti massimi għall-kontribuzzjonijiet mill-baġit tal-Unjoni għal dawk il-proġetti. Dawk it-talbiet ma għandhom ikollhom l-ebda impatt fuq proġetti oħra ffinanzjati mill-baġit tal-Unjoni.

(14) Il-Kummissjoni għandha tippreżenta proposta għal qafas finanzjarju multiannwali ġdid qabel l-1 ta' Jannar 2018 biex tagħmilha possibbli għall-istituzzjonijiet li jadottawh kmieni biżżejjed qabel jibda l-qafas finanzjarju li jmiss. Il-qafas finanzjarju stabbilit f’dan ir-Regolament għandu jibqa’ japplika jekk il-qafas finanzjarju l-ġdid ma jiġix adottat qabel it-tmiem tat-terminu tal-qafas finanzjarju stabbilit f'dan ir-Regolament,

ADOTTA DAN IR-REGOLAMENT:

Artikolu 1 Il-Qafas Finanzjarju Multiannwali

Il-qafas finanzjarju multiannwali għall-perjodu 2014-2020 (minn issa ’l quddiem imsejjaħ il-qafas finanzjarju) hu stabbilit fl-Anness.

Artikolu 2 Il-Konformità mal-limiti massimi tal-qafas finanzjarju

1. Il-Parlament Ewropew, il-Kunsill u l-Kummissjoni għandhom jikkonformaw mal-limiti massimi tan-nefqa annwali, stabbiliti fil-qafas finanzjarju, waqt kull proċedura baġitarja u meta jimplimentaw il-baġit għas-sena kkonċernata.

2. L-approprjazzjonijiet għall-impenji jistgħu jiddaħħlu fil-baġit lil hinn mil-limiti massimi tal-intestaturi relevanti stabbiliti fil-qafas finanzjarju fejn huwa neċessarju li jintużaw ir-riżorsi mir-Riżerva tal-Għajnuna ta' Emerġenza, il-Fond tas-Solidarjetà tal-Unjoni Ewropea, l-Istrument tal-Flessibbiltà, il-Fond Ewropew tal-Aġġustament għall-Globalizzazzjoni, ir-Riżerva għall-kriżijiet fis-settur agrikolu u l-Marġini ta' Kontinġenza f'konformità mar-Regolament tal-Kunsill (KE) Nru 2012/2002[13], ir-Regolament (KE) Nru 1927/2006 tal-Parlament Ewropew u tal-Kunsill[14], ir-Regolament Nru xxxx/201x tal-Parlament Ewropew u tal-Kunsill[15] u l-Ftehim Interistituzzjonali ta' […] 201x dwar il-koperazzjoni fi kwistjonijiet baġitarji u l-ġestjoni finanzjarja tajba (minn hawn 'il quddiem il-Ftehim Interistituzzjonali).

3. Fejn ikun meħtieġ li tiġi mmobilizzata garanzija għal self koperta mill-baġit tal-Unjoni skont ir-Regolament (KE) Nru 332/2002 jew ir-Regolament (UE) Nru 407/2010, din għandha tkun lil hinn mil-limiti massimi stabbiliti fil-qafas finananzjarju.

Artikolu 3 Ir-Rispett tal-limitu massimu tar-riżorsi proprji

1.           Għal kull waħda mis-snin koperti mill-qafas finanzjarju, l-approprjazzjonijiet totali għall-ħlasijiet meħtieġa, wara li jsir l-aġġustament annwali u wara li jitqiesu aġġustamenti jew reviżjonijiet oħra, kif ukoll l-applikazzjoni tal-paragrafi 2 u 3 tal-Artikolu 2, ma għandhomx ikunu tali li jipproduċu rata ta' ġbir tar-riżorsi proprji li taqbeż il-limitu tar-riżorsi proprji stabbilit skont id- [Deċiżjoni XXXX/XX/UE, Euratom].

2.           Fejn ikun meħtieġ, il-limiti stabbiliti fil-qafas finanzjarju għandhom jitbaxxew sabiex tiġi żgurata konformità mal-limiti massimi tar-riżorsi proprji stabbiliti skont id-[Deċiżjoni XXXX/XX/UE, Euratom].

Artikolu 4 Aġġustamenti tekniċi

1.           Kull sena, il-Kummissjoni, li għandha taġixxi qabel il-proċedura baġitarja għas-sena n+1, għandha tagħmel l-aġġustamenti tekniċi li ġejjin għall-qafas finanzjarju:

(a)     rivalutazzjoni, skont il-prezzijiet tas-sena n+1, tal-limiti massimi u tal-figuri ġenerali għall-approprjazzjonijiet għall-impenji kif ukoll għall-approprjazzjonijiet għall-ħlasijiet;

(b)     kalkolu tal-marġini disponibbli taħt il-limitu massimu tar-riżorsi proprji stabbilit skont id-[Deċiżjoni XXXX/XX/UE, Euratom];

(c)     kalkolu tal-ammont assolut tal-Marġini ta' Kontinġenza stipulat fil-Punt 15 tal-Ftehim Interistituzzjonali.

2.           Il-Kummissjoni għandha twettaq dawn l-aġġustamenti tekniċi msemmija fil-paragrafu 1 fuq il-bażi ta’ deflatur fiss ta’ 2% kull sena.

3.           Il-Kummissjoni għandha tikkomunika lill-Parlament Ewropew u lill-Kunsill ir-riżultati tal-aġġustamenti tekniċi msemmija f’paragrafu 1 u l-previżjonijiet ekonomiċi li fuqhom ikunu bbażati.

4.           Ma jista' jsir l-ebda aġġustament tekniku ieħor dwar is-sena in kwistjoni, la matul is-sena u lanqas bħala korezzjonijiet wara l-fatt fi snin sussegwenti.

Artikolu 5 Aġġustament tal-pakketti tal-politika tal-koeżjoni

1. Fl-aġġustament tekniku tiegħu għas-sena 2018, jekk jiġi stabbilit li l-Prodott Domestiku Gross ("PDG") kumulattiv ta' xi Stat Membru għas-snin 2014-2016 ikun tbiegħed b'aktar minn +/- 5 % mill-PDG kumulattiv stmat fl-2011 għall-istabbiliment tal-pakketti tal-politika ta' koeżjoni għall-Istati Membri għall-perjodu 2014-2020, il-Kummissjoni għandha taġġusta l-ammonti allokati mill-fondi li jappoġġjaw il-koeżjoni għall-Istat Membru kkonċernat għal dak il-perjodu.

2. L-effett nett totali, kemm jekk pożittiv kif ukoll jekk negattiv, tal-aġġustamenti msemmija fil-paragrafu 1 ma jistax jaqbeż it-EUR 3 biljun.

3. L-aġġustamenti meħtieġa għandhom jitqassmu fi proporzjonijiet ugwali fuq is-snin 2018-2020 u l-limiti massimi li jikkorrispondu magħhom tal-qafas finanzjarju għandhom jiġu mmodifikati skont dan.

Artikolu 6 Aġġustamenti relatati mal-implimentazzjoni

Meta tinnotifika lill-Parlament Ewropew u lill-Kunsill bir-riżultati tal-aġġustamenti tekniċi tal-qafas finanzjarju, il-Kummissjoni għandha tippreżenta kwalunkwe proposta għall-aġġustamenti għall-approprjazzjonijiet totali għall-ħlasijiet li din tkun tqis bħala meħtieġa, fid-dawl tal-implimentazzjoni, biex tkun żgurata progressjoni bl-ordni fir-rigward tal-approprjazzjonijiet għall-impenji. Id-deċiżjonijiet dwar dawn il-proposti għandhom jittieħdu qabel l-1 ta’ Mejju tas-sena n.

Artikolu 7 Aġġustament tal-Fondi Strutturali, il-Fond ta' Koeżjoni, il-Fond tal-Iżvilupp Rurali u l-Fond Ewropew tas-Sajd.

1. Fil-każ tal-adozzjoni wara l-1 ta' Jannar 2014 ta' regoli jew programmi ġodda li jiggvernaw il-Fondi Strutturali, il-Fond ta' Koeżjoni, il-Fond tal-Iżvilupp Rurali u l-Fond Ewropew għas-Sajd, il-qafas finanzjarju għandu jiġi aġġustat sabiex jittrasferixxi għal snin sussegwenti, lil hinn mil-limiti tal-infiq relevanti, l-allokazzjonijiet mhux użati fl-2014.

2. L-aġġustament dwar it-trasferiment ta' allokazzjoni mhux użata għas-sena 2014 għandu jiġi adottat qabel l-1 ta' Mejju 2015.

Artikolu 8 Aġġustamenti marbuta ma’ defiċit eċċessiv tal-gvern

Fil-każ tat-tneħħija ta' sospensjoni tal-impenji baġitarji li jirrigwardaw il-Fond ta' Koeżjoni fil-kuntest ta' proċedura ta' defiċit eċċessiv tal-gvern, il-Kunsill, f'konformità mat-Trattat u mal-att bażiku relevanti, għandu jiddeċiedi dwar trasferiment ta’ impenji sospiżi għas-snin ta’ wara. L-impenji sospiżi tas-sena n ma jistgħux jerġgħu jidħlu fil-baġit ta’ wara s-sena n+2.

Artikolu 9 Reviżjoni tal-qafas finanzjarju

1. F'każ ta' ċirkostanzi mhux previsti, il-qafas finanzjarju jista' jiġi revedut f'konformità mal-limitu massimu tar-riżorsi proprji stabbilit f'konformità mad-[Deċiżjoni XXXX/XX/UE, Euratom].

2. Kwalunkwe proposta għal reviżjoni tal-qafas finanzjarju f'konformità mal-paragrafu 1 għandha tqis il-potenzjal għar-riallokazzjoni tan-nefqa bejn il-programmi koperti mill-intestatura kkonċernata bir-reviżjoni, b’referenza partikolari għal kwalunkwe sottoutilizzazzjoni mistennija tal-approprjazzjonijiet. Fejn ikun possibbli, ammont sinifikanti, f'termini assoluti u bħala persentaġġ tan-nefqa l-ġdida ppjanata, għandu jkun taħt il-limitu massimu eżistenti għall-intestatura.

3. Kwalunkwe reviżjoni tal-qafas finanzjarju f'konformità mal-paragrafu 1 għandha tqis il-possibilitajiet għal kumpens għal kull żieda fil-limitu massimu għal intestatura waħda bit-tnaqqis tal-limitu massimu għal oħra.

4. Kwalunkwe reviżjoni fil-qafas finanzjarju f'konformità mal-paragrafu 1 għandha żżomm relazzjoni xierqa bejn l-impenji u l-ħlasijiet.

5. L-aġġustamenti msemmija fl-Artikolu 3(2), 6, 7, 8, 10, 11 u 16 ukoll jikkostitwixxu reviżjoni tal-qafas finanzjarju.

Artikolu10 L-aġġustament tal-qafas finanazjarju fil-każ ta’ reviżjoni tat-Trattati

Jekk isseħħ reviżjoni tat-Trattat b'implikazzjonijiet baġitarji waqt il-qafas finanzjarju, l-aġġustamenti meħtieġa għall-qafas finanzjarju għandhom isiru skont dan.

Artikolu 11 L-aġġustament tal-qafas finanzjarju fil-każ ta' tkabbir u tal-unifikazzjoni ta' Ċipru

Jekk Stati Membri ġodda jissieħbu fl-Unjoni waqt il-perjodu kopert bil-qafas finanzjarju, il-qafas finanzjarju għandu jkun aġġustat biex jitqiesu l-ħtiġijiet tan-nefqa li jirriżultaw mill-eżitu tan-negozjati għad-dħul.

Fil-każ tal-unifikazzjoni ta' Ċipru matul il-perjodu kopert mill-qafas finanzjarju, dan tal-aħħar għandu jiġi aġġustat sabiex iqis il-ftehim komprensiv dwar il-problema ta' Ċipru u l-ħtiġijiet finanzjarji addizzjonali li jirriżultaw mill-unifikazzjoni.

Artikolu12 Koperazzjoni interistituzzjonali fil-proċedura baġitarja

Il-Parlament Ewropew, il-Kunsill u l-Kummissjoni (minn hawn 'il quddiem l-istituzzjonijiet) għandhom jieħdu kwalunkwe miżura biex jiffaċilitaw il-proċedura baġitarja annwali.

L-istituzzjonijiet għandhom jikkoperaw b’rieda tajba matul il-proċedura bil-għan li jirrikonċiljaw il-pożizzjonijiet tagħhom. L-Istituzzjonijiet għandhom jikkoperaw permezz ta’ kuntatti interistituzzjonali xierqa biex isegwu l-progress tax-xogħol u janalizzaw il-grad ta’ konverġenza fl-istadji kollha tal-proċedura.

L-istituzzjonijiet għandhom jiżguraw li l-kalendarji tax-xogħol rispettivi tagħhom ikunu kkoordinati kemm jista' jkun sabiex ikun possibbli li l-proċedimenti jitwettqu b'manjiera koerenti u konverġenti, u jwasslu għall-adozzjoni finali tal-baġit.

Jistgħu jitlaqqgħu trilogi f’kull stadju tal-proċedura u fil-livelli differenti tar-rappreżentazzjoni, skont in-natura tad-diskussjoni mistennija. Kull istituzzjoni, f'konformità mar-regoli ta’ proċedura tagħha, għandha taħtar il-parteċipanti tagħha fil-laqgħat, tiddefinixxi l-mandat tagħha għan-negozjati u tinforma lill-istituzzjonijiet l-oħra bl-arranġamenti għal-laqgħat fi żmien adegwat.

Artikolu 13 Il-finanzjament tal-Politika Estera u ta’ Sigurtà Komuni

L-ammont totali tan-nefqa operattiva tal-Politika estera u ta’ sigurtà komuni (minn issa ’l quddiem “il-PESK”) għandha tiddaħħal kollha kemm hi f’kapitolu wieħed tal-baġit, intitolat PESK. Dak l-ammont għandu jkopri l-bżonnijiet reali prevedibbli, evalwati fil-qafas tal-istabbiliment tal-abbozz tal-baġit, fuq il-bażi ta’ previżjonijiet imfassla kull sena mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà, u marġini raġonevoli għall-azzjonijiet mhux previsti. L-ebda fondi ma jistgħu jiddaħħlu f'riżerva.

Artikolu 14 Kontribuzzjoni għall-finanzjament ta' proġetti fuq skala kbira

Ammont massimu ta' EUR 7 000 miljun fi prezzijiet tal-2011 għandu jkun disponibbli għall-programmi Ewropej tan-navigazzjoni bis-satellita (EGNOS u Galileo) mill-baġit tal-UE għall-perjodu 2014-2020.

Artikolu 15 Valutazzjoni ta' nofs it-terminu tal-implimentazzjoni tal-qafas finanzjarju

Fl-2016, il-Kummissjoni għandha tippreżenta valutazzjoni tal-implimentazzjoni tal-qafas finanzjarju, bi proposti relevanti fejn ikun neċessarju.

Artikolu 16 Tranżizzjoni lejn il-qafas finanzjarju li jmiss

Qabel l-1 ta’ Jannar 2018, il-Kummissjoni għandha tippreżenta proposta għal qafas finanzjarju multiannwali ġdid.

Jekk ma jiġi adottat l-ebda regolament tal-Kunsill li jiddetermina qafas finanzjarju multiannwali ġdid qabel il-31 ta' Diċembru 2020, il-limiti massimi u d-dispożizzjonijiet l-oħra li jikkorrispondu għall-aħħar sena tal-qafas finanzjarju eżistenti għandhom jiġu estiżi sakemm jiġi adottat regolament li jiddetermina qafas finanzjarju ġdid. Jekk Stati Membri ġodda jidħlu fl-Unjoni wara l-2020, il-qafas finanzjarju estiż għandu, jekk meħtieġ, jiġi aġġustat sabiex iqis ir-riżultati tan-negozjati tal-adeżjoni.

Artikolu 17 Dħul fis-seħħ

Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu f' Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u jkun direttament applikabbli fl-Istati Membri kollha.

Magħmul fi ….

                                                                       Għall-Kunsill

                                                                       Il-President                                                                       

ANNESS

Tabella tal-Qafas Finanzjarju Multiannwali

[1]               Ftehim Interistituzzjonali dwar dixxiplina baġitarja u titjib tal-proċedura baġitarja, iffirmat mill-Parlament, il-Kunsill u l-Kummissjoni fid-29 ta’ Ġunju 1988, (ĠU L 185, 15.7.1988, p.33).

[2]               Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja tajba (ĠU C 139, 14.6.2006, p. 1).

[3]               COM(2010) 72 u COM(2010) 73

[4]               COM(2011) 500, 29.6.2011.

[5]               COM(2010) 185 finali tas-27.4.2010, kapitolu 2 (paġni 4 sa 13).

[6]               COM(2010) 700 finali tad-19.10.2010, b'mod partikolari t-taqsima 4.5 sa 4.7 (paġni 23 sa 25).

[7]               ĠU C , , p. .

[8]               ĠU C , , p. .

[9]               ĠU L 53, 23.2.2002, p. 1

[10]             ĠU L 118, 12.5.2010, p. 1.

[11]             ĠU L .

[12]             ĠU C …

[13]             ĠU L 311, 14.11.2002, p. 3.

[14]             ĠU L 406, 30.12.2006, p. 1.

[15]             ĠU L , , p.