WERREJ

1. Introdu zzjoni 3

2. Konklużjonijiet ġenerali mill-konsultazzjoni pubblika 3

3. L-għan ta’ din il-Komunikazzjoni 4

4. Il-karatteristiċi fundamentali ta’ sistema tal-VAT imfassla mill-ġdid għall-UE 5

4.1. Sistema tal-VAT tal-UE bbażata fuq il-prinċipju tad-destinazzjoni 5

4.2. Sistema tal-VAT aktar sempliċi, effikaċi u robusta 6

5. L-oqsma ta’ prijorità għal aktar ħidma 6

5.1. Lejn sistema tal-VAT aktar sempliċi 6

5.1.1. Il-kunċett ta’ ‘One-Stop-Shop’ 7

5.1.2. Provvista lin-negozji ta’ informazzjoni aħjar u aktar aċċessibbli fil-livell tal-UE 8

5.1.3. Titjib fit-tmexxija tal-VAT fil-livell tal-UE 8

5.1.4. Standardizzazzjoni tal-obbligi tal-VAT 9

5.2. Lejn sistema tal-VAT aktar effikaċi 9

5.2.1. Twessigħ tal-bażi għat-taxxa 9

5.2.2. Reviżjoni tal-istruttura tar-rati 10

5.3. Lejn sistema tal-VAT aktar robusta u li sservi ta’ prova kontra l-frodi 12

5.3.1. Mekkaniżmu ta’ reazzjoni malajr li jindirizza l-frodi mhux mistennija 12

5.3.2. Il-ġlieda kontra l-frodi tal-VAT 13

5.3.3. Reviżjoni tal-mod kif tinġabar u tiġi mmonitorjata l-VAT 15

5.4. Sistema tal-VAT imfassla għas-suq uniku 15

6. Azzjonijiet oħrajn li għandhom jiġu mnedija fuq perjodu ta’ żmien medju 16

7. Konklużjoni 17

INTRODUZZJONI

L-aċċellerazzjoni tal-globalizzazzjoni, il-kompetizzjoni intensifikata minn reġjuni ekonomiċi ewlenin ġodda tad-dinja, kif ukoll il-progress tekniku u l-mudelli kummerċjali li qegħdin jinbidlu malajr, qegħdin jippreżentaw sfidi ġodda għall-effettività u l-effikaċja tas-sistema fiskali Ewropea.

Barra minn hekk, il-kriżi finanzjarja esponiet lill-Istati Membri għal sfida ta’ politika ekonomika doppja: jiġifieri li jrawmu t-tkabbir ekonomiku sostenibbli u li jsaħħu l-finanzi pubbliċi. Kif rikonoxxut fl-Istħarriġ Annwali tat-Tkabbir 2012[1], il-politiki tat-tassazzjoni huma lieva importanti għal dak l-iskop. Hija meħtieġa aktar attenzjoni għat-tfassil u l-istruttura tas-sistemi tat-taxxa sabiex dawn isiru aktar effettivi, effiċjenti u ġusti, u dan huwa partikolarment il-każ fir-rigward tas-sistema tal-VAT tal-UE.

Huwa f’dan il-kuntest li fl-1 ta’ Diċembru 2010 il-Kummissjoni adottat Green Paper dwar il-ġejjieni tal-VAT[2], fejn stiednet lill-partijiet interessati kollha biex jagħtu ħarsa kritika lejn l-aspetti kollha tas-sistema tal-VAT tal-UE li issa ilha fis-seħħ għal aktar minn 40 sena.

Ir-reazzjoni qawwija min-negozji, l-akkademiċi, iċ-ċittadini u l-awtoritajiet tat-taxxa (aktar minn 1 700 kontribuzzjoni)[3] kkonfermat li kien hemm il-ħtieġa ta’ dibattitu bħal dan.

Il-Parlament Ewropew[4], il-Kumitat Ekonomiku u Soċjali Ewropew[5] u l-Grupp tal-Politika Fiskali li jikkonsisti mir-rappreżentanti personali tal-ministri tal-finanzi laqgħu l-Green Paper u kkonfermaw il-ħtieġa ta’ riforma fis-sistema tal-VAT tal-UE.

Bl-istess mod, il-Kummissjoni wettqet evalwazzjoni ekonomika tas-sistema tal-VAT[6] u pproponiet li twaqqaf riżorsa proprja ġdida bbażata fuq il-VAT sabiex tiffinanzja l-baġit tal-UE[7].

KONKLUżJONIJIET ġENERALI MILL-KONSULTAZZJONI PUBBLIKA

Hemm sentiment ġenerali fost il-partijiet interessati li l-frammentazzjoni tas-sistema komuni tal-VAT tal-UE f’27 sistema nazzjonali tal-VAT hija l-ostakolu prinċipali għal kummerċ effikaċi ġewwa l-UE u għalhekk tipprevjeni liċ-ċittadini milli jgawdu l-benefiċċji ta’ suq uniku ġenwin.

In-negozji attivi internazzjonalment iqisu li l-prezz li attwalment qegħdin iħallsu għal dan in-nuqqas ta’ armonizzazzjoni huwa fil-forma ta’ kumplessità, spejjeż ta’ konformità addizzjonali u inċertezza legali. L-SMEs mhux dejjem ikollhom ir-riżorsi meħtieġa biex jittrattaw dawn il-fatturi u għalhekk jispiċċaw joqogħdu lura milli jinvolvu ruħhom f’attivitajiet transkonfinali.

Dawn in-nuqqasijiet għandhom impatt fuq l-imġiba kummerċjali li tista’ tipprevjeni milli jittieħdu l-aktar deċiżjonijiet kummerċjali effettivi. Meta r-regoli fiskali jinfluwenzaw id-deċiżjoni dwar fejn jinxtraw jew jinbiegħu l-prodotti jew is-servizzi, in-newtralità ekonomika tal-VAT ma tibqax garantita u l-funzjonament tas-suq uniku jkun mhedded serjament.

Bosta kontributuri saħansitra rrimarkaw li, b’riżultat ta’ dan, in-negozju ma’ msieħba mhux mill-UE qiegħed isir aktar faċli minn qatt qabel u aktar profittabbli min-negozju ma’ impriżi fl-UE.

Il-partijiet interessati li bħalissa qegħdin jibbenifikaw minn eżenzjonijiet, derogi jew rati mnaqqsa huma ġeneralment favur li dawn jinżammu; oħrajn saħansitra jridu li jestendu dan it-trattament preferenzjali sabiex jinkludu l-attività tagħhom stess.

Kollox ma’ kollox, il-Green Paper iġġenerat aspettattivi kbar għall-bidla. Fl-istess ħin, hemm rikonoxximent ġenerali li reviżjoni fundamentali tal-VAT inevitabbilment sejra tkun proġett fit-tul.

Wieħed jista’ jifhem li l-Istati Membri ma jridux jieħdu riskji li jinħolqu mill-isforzi tar-riforma u li jistgħu jkunu ta’ theddida għad-dħul tal-VAT, li kien jammonta għal madwar EUR 784 biljun fl-2009 jew 21 % tad-dħul fiskali nazzjonali[8]. Għalhekk, jidher li huma lesti biss biex jikkunsidraw bidliet gradwali, li r-riskji, il-benefiċċji u l-ispejjeż għalihom huma ċari, mifhuma tajjeb u vvalutati b’mod sħiħ.

Dawn huma l-aktar konklużjonijiet ġenerali impressjonanti li għandhom jittieħdu mill-konsultazzjoni pubblika; konklużjonijiet aktar speċifiċi ġew inklużi aktar ’l isfel taħt is-suġġetti speċifiċi li huma relatati magħhom.

L-GħAN TA’ DIN IL-KOMUNIKAZZJONI

Meta ninsabu kkonfrontati b’fatti inkwetanti bħal dawn kważi 20 sena wara l-introduzzjoni tas-suq uniku juri b’mod ċar li mhuwiex biżżejjed li sempliċiment nibqgħu fiż-żona ta’ kumdità ta’ ‘negozju bħas-soltu’. L-indirizzar ta’ dawn l-isfidi jitlob riforma aktar ambizzjuża tas-sistema attwali tal-VAT. Riforma bħal din ikollha rwol kruċjali fl-appoġġ għall-ilħuq tal-objettivi tal- Ewropa 2020 [9] u ritorn għat-tkabbir permezz tal-potenzjal tagħha li terġa’ ssaħħaħ is-suq uniku u tappoġġja l-isforzi attwali għall-konsolidazzjoni fiskali fl-Istati Membri.

Din il-Komunikazzjoni — ibbażata fuq l-eżitu tal-konsultazzjoni pubblika, iżda wkoll fuq id-diskussjonijiet mal-Istati Membri u l-opinjonijiet espressi mill-istituzzjonijiet Ewropej — għandha għan doppju:

- Hija tistabbilixxi l-karatteristiċi fundamentali ta’ sistema futura tal-VAT tal-UE li tkun tista’ tkompli taqdi l-funzjoni tagħha li żżid id-dħul, filwaqt li żżid il-kompetittività tal-UE. Dawn il-karatteristiċi bażiċi għandhom ikunu l-objettivi fit-tul li jiggwidaw il-ħidma kollha fuq il-VAT fil-ġejjieni.

- Hija telenka l-oqsma ta’ prijorità għat-teħid ta’ aktar azzjoni fis-snin li ġejjin bil-għan li nimxu fid-direzzjoni ta’ dawn l-objettivi.

IL-KARATTERISTIċI FUNDAMENTALI TA’ SISTEMA TAL-VAT IMFASSLA MILL-ġDID GħALL-UE

Sistema tal-VAT tal-UE bbażata fuq il-prinċipju tad-destinazzjoni

L- Att dwar is-Suq Uniku [10] enfasizza l-importanza fundamentali tat-twaqqif ta’ reġim definittiv tal-VAT li jkun applikabbli għat-tranżazzjonijiet transkonfinali.

Il-Green Paper ipprovdiet opportunità ideali sabiex jiġi eżaminat jekk l-impenn li sar fl-1967[11] sabiex tiġi stabbilita sistema definittiva tal-VAT li topera fi ħdan l-UE bl-istess mod kif topera f’pajjiż wieħed, fuq il-bażi tal-prinċipju tat-tassazzjoni fil-pajjiż tal-oriġini, għadux rilevanti jew le.

Id-diskussjonijiet riċenti mal-Istati Membri kkonfermaw li dan il-prinċipju għadu wieħed li ma jistax jintlaħaq politikament. Dan l-imblokk huwa saħansitra rikonoxxut mill-Parlament Ewropew – li sa issa kien għadu qed jiddefendi bl-aħrax il-prinċipju tal-oriġini – li sejjaħ għal pass lejn il-prinċipju tad-destinazzjoni.

Barra minn hekk, il-partijiet interessati jirrikonoxxu li s-sistema oriġinali, li fit-teorija hija l-aktar għażla attraenti għalihom, mhux sejra tkun tista’ tinkiseb fil-futur prevedibbli. Għalhekk, huma jippromwovu sistema li tiffunzjona sewwa bbażata fuq tassazzjoni fid-destinazzjoni bħala soluzzjoni prammatika u li tista’ tinkiseb politikament.

Għalhekk, il-Kummissjoni waslet għall-konklużjoni li ma għadx hemm raġunijiet validi għaż-żamma ta’ dan l-objettiv, u sejra tipproponi li dan għandu jiġi abbandunat. Tabilħaqq, iż-żamma ta’ dan l-impenn filwaqt li ma jsir ebda progress fuq dan il-binarju politikament jaffettwa l-kredibbiltà tal-proċess Ewropew tat-teħid tad-deċiżjonijiet.

L-abbandun tal-prinċipju tal-oriġini jagħmilha possibbli li jiġu mnedija sforzi sostanzjali sabiex jitfasslu kunċetti alternattivi għal sistema tal-VAT tal-UE li tiffunzjona sewwa bbażata fuq id-destinazzjoni. Għadu ma sar l-ebda xogħol f’dan il-qasam mill-1993, minħabba li dik l-għażla twarrbet biex għamlet spazju għal impenn għall-prinċipju tal-oriġini.

Il-prinċipji gwida ta’ din il-ħidma sejrin ikunu, l-ewwelnett, li t-twettiq tan-negozju madwar l-UE għandu jkun sempliċi u sikur daqs l-involviment f’attivitajiet purament domestiċi u, it-tieni, li għandhom jitnaqqsu l-ispejjeż ta’ konformità tal-VAT għat-twettiq tan-negozju fl-Ewropa. Fi kwalunkwe każ, il-kummerċ transkonfinali ma għandux jiġġenera spejjeż addizzjonali.

Sistema tal-VAT aktar sempliċi, effikaċi u robusta

Il-proċess tar-riforma mniedi mill-Green Paper għandu fl-aħħar mill-aħħar jirriżulta f’sistema tal-VAT li jkollha l-attributi kollha li ġejjin:

- ‘Sempliċi’ : Persuna taxxabbli attiva madwar l-UE għandha tkun iffaċċjata b’sett wieħed ta’ regoli ċari u sempliċi dwar il-VAT: Kodiċi tal-VAT tal-UE. Tali kodiċi għandu jistabbilixxi regoli adattati għall-mudelli kummerċjali moderni, u l-obbligi standardizzati li jieħdu kont sħiħ tal-progress li sar fit-teknoloġiji ġodda. Persuna taxxabbli għandha tittratta biss mal-awtoritajiet tat-taxxa ta’ Stat Membru wieħed;

- ‘Effikaċi u newtrali’ : L-introduzzjoni ta’ bażi fiskali usa’, kif ukoll l-implimentazzjoni tal-prinċipju tat-tassazzjoni bir-rata standard, jiġġeneraw aktar dħul b’inqas spiża, jew inkella jippermettu li r-rata standard titnaqqas b’mod newtrali għad-dħul. Kwalunkwe deroga minn dawk il-prinċipji għandha tkun razzjonali u definita b’mod uniformi. In-newtralità tirrikjedi wkoll regoli ugwali li jirregolaw id-dritt tat-tnaqqis u restrizzjonijiet limitati ħafna fuq l-eżerċizzju ta’ dak id-dritt;

- ‘Robusta u li sservi ta’ prova kontra l-frodi’ : Il-metodi moderni tal-ġbir u l-monitoraġġ tal-VAT għandhom jimmassimizzaw id-dħul attwalment miġbur u jillimitaw il-frodi u l-evitar kemm jista’ jkun. Minbarra li jiffaċilitaw il-konformità għan-negozju, dawn jirrikjedu li l-awtoritajiet nazzjonali tat-taxxa jikkonċentraw fuq imġibiet riskjużi, jimmiraw għal dawk li attwalment iwettqu l-frodi u fl-aħħar mill-aħħar jaġixxu kollettivament bħala awtorità Ewropea tal-VAT. Skambju ta’ informazzjoni intensifikat, awtomatizzat u rapidu bejn l-amministrazzjonijiet nazzjonali tat-taxxa għandu jkun vitali sabiex tintlaħaq din il-mira.

L-OQSMA TA’ PRIJORITÀ GħAL AKTAR ħIDMA

Is-suġġetti ta’ prijorità varji huma miġbura flimkien hawn isfel taħt erba’ intestaturi. Madankollu, huma interkonnessi mill-qrib: sistema tal-VAT aktar sempliċi għal tranżazzjonijiet domestiċi kkombinati ma’ tranżazzjonijiet ġewwa l-UE tagħmel il-konformità aktar faċli u għalhekk tikkontribwixxi għar-robustezza tagħha.

Uħud mill-azzjonijiet ewlenin korrispondenti jistgħu jiġu implimentati relattivament malajr, filwaqt li hemm oħrajn li ovvjament ikunu jeħtieġu aktar żmien. Fejn xieraq, il-Kummissjoni se twettaq il-valutazzjoni tal-impatt tas-soltu.

Lejn sistema tal-VAT aktar sempliċi

Ir-reazzjonijiet għall-konsultazzjoni pubblika fihom sejħa qawwija u urġenti għal simplifikazzjoni. Din id-domanda tkopri kwistjonijiet relatati mal-leġiżlazzjoni tal-VAT tal-UE, iżda wkoll l-hekk imsejħa kwistjonijiet tal-amministrazzjoni fiskali. Il-prattiċi diverġenti fil-livell nazzjonali qegħdin dejjem aktar jiġu enfasizzati bħala piż frustranti. Għalkemm l-amministrazzjoni fiskali hija qasam li primarjament jaqa’ fi ħdan il-kompetenza tal-Istati Membri, l-għan tal-Kummissjoni sejjer ikun li ttejjeb sostanzjalment l-isforzi tal-koordinazzjoni u l-kooperazzjoni f’dan il-qasam.

L-evalwazzjoni ekonomika tikkonkludi li l-ispejjeż tal-konformità għan-negozji huma għoljin, b’estimi li jvarjaw minn 2 % sa xejn inqas minn 8 % tal-VAT miġbura. Negozji iżgħar huma mgħobbija ferm aktar milli jifilħu, u dawn l-ispejjeż mhumiex sejrin jonqsu maż-żmien jekk ma titteħidx azzjoni ta’ politika mmirata.

Barra minn hekk, in-negozji jiġu kkonfrontati b’piżijiet addizzjonali meta jinvolvu ruħhom f’kummerċ ġewwa l-UE. L-evalwazzjoni ekonomika tissuġġerixxi li t-tneħħija tal-obbligi nazzjonali li jmorru ’lil hinn mir-rekwiżiti tal-UE jew tnaqqis ta’ 10 % fin-nuqqas ta’ qbil bejn l-Istati Membri fil-proċeduri amministrattivi jistgħu joħolqu żieda fil-kummerċ ġewwa l-UE ta’ 2.6% u 3.7% rispettivament, filwaqt li l-PDG reali jista’ jiżdied b’0.2% u b’0.4%. Għalkemm ir-rapport jammetti li dawn il-figuri jistgħu jkunu esaġerati, madankollu, huma jindikaw li l-armonizzazzjoni tal-proċeduri tal-VAT tista’ ġġib magħha profitti sostanzjali fil-kummerċ u fil-PDG.

L-SMEs għandhom jibbenifikaw b’mod partikolari mill-azzjonijiet stabbiliti hawn taħt. Huma għandhom inqas riżorsi biex ilaħħqu mad-diffikultajiet li jirriżultaw mid-differenzi fir-regoli u fl-obbligi. L-evalwazzjoni ekonomika turi li l-ispiża hija proporzjonalment ogħla għalihom ukoll.

L-għoti ta’ prijorità lis-simplifikazzjoni fis-snin li ġejjin huwa konformi mal-prinċipju ‘Aħseb l-Ewwel fiż-Żgħir’ tal-‘Att dwar in-Negozji ż-Żgħar għall-Ewropa’[12], li jippromwovi l-użu tas-soluzzjonijiet tal-gvern elettroniku u tal-‘one-stop-shop’ għas-simplifikazzjoni tal-ambjent regolatorju u amministrattiv fejn joperaw l-SMEs.

Il-kunċett ta’ ‘One-Stop-Shop’

Minħabba d-diffikultajiet imsemmija minn negozji li jagħmlu kummerċ f’bosta Stati Membri, il-‘One-Stop-Shop’ (OSS) – miżura proposta fil-pjan tal-Kummissjoni biex jitnaqqsu l-piżijiet amministrattivi[13] u appoġġjata mill-Grupp ta’ Livell Għoli ta’ Partijiet Interessati Indipendenti dwar il-Piżijiet Amministrattivi[14] − ovvjament għadu prijorità għolja.

Il-provvista ta’ OSS żgħir għall-fornituri mill-UE ta’ servizzi tat-telekomunikazzjoni, tax-xandir u servizzi elettroniċi pprovduti lill-konsumaturi finali fl-UE sejra tidħol fis-seħħ fl-2015. Xi negozji – esposti għal kummerċ transkonfinali – ma jifhmux għaliex l-attivitajiet tagħhom kienu esklużi minn din il-faċilità, minkejja l-fatt li huma jiffaċċjaw l-istess diffikultajiet.

L-implimentazzjoni tal-OSS żgħir titqies minn ħafna Stati Membri u min-negozju bħala pass kbir. Il-funzjonament bla xkiel tiegħu għandu jifrex it-triq għal użu aktar ġenerali ta’ dan il-kunċett. Madankollu, minħabba n-nuqqas ta’ esperjenza ta’ OSS għall-kummerċ ġewwa l-UE, l-Istati Membri jidhru li huma kemmxejn riluttanti li jikkunsidraw li jwessgħu l-ambitu tiegħu fi stadju hekk bikri.

Il-Kummissjoni għadha konvinta li, f’sistema tal-VAT ibbażata fuq it-tassazzjoni fid-destinazzjoni, OSS huwa strument kruċjali biex jiffaċilita l-aċċess għas-suq uniku, b’mod partikolari għall-SMEs.

1. L-iżgurar tal-introduzzjoni bla xkiel tal-OSS żgħir fl-2015 huwa prijorità għolja għall-Kummissjoni, u hija qiegħda tiddependi fuq l-Istati Membri biex tagħmel ir-riżorsi meħtieġa disponibbli.

2. Mill-2015 ’il quddiem, il-Kummissjoni sejra tipprevedi twessigħ ġestit tal-kunċett matul iż-żmien.

Provvista lin-negozji ta’ informazzjoni aħjar u aktar aċċessibbli fil-livell tal-UE

Il-partijiet interessati enfasizzaw li d-disponibbiltà ta’ informazzjoni preċiża, affidabbli u f’waqtha dwar id-dettalji tas-sistemi tal-VAT fis-seħħ bħalissa fl-Istati Membri hija fattur prinċipali fl-iffaċilitar tal-konformità għan-negozji sa dak iż-żmien li jkun hemm regoli simili madwar l-UE kollha. Barra minn hekk, il-lingwa għadha titqies bħala ostakolu għall-kummerċ ġewwa l-UE.

Il-Kummissjoni tqis li portal fuq l-internet, li jipprovdi tali informazzjoni f’bosta lingwi dwar kwistjonijiet bħar-reġistrazzjoni, il-ħruġ ta’ fatturi, id-denunzji tal-VAT, ir-rati tal-VAT, obbligi speċjali u limitazzjonijiet għad-dritt tat-tnaqqis, huwa s-soluzzjoni ovvja għall-ġejjieni. In-negozji nfushom jista’ jkollhom irwol fid-definizzjoni tal-informazzjoni meħtieġa.

3. Bl-għajnuna tal-Istati Membri, il-Kummissjoni sejra tistabbilixxi portal fuq l-internet għall-VAT tal-UE. Hija qiegħda tistieden lill-Istati Membri biex jikkonfermaw ir-rieda tagħhom murija fil-Grupp dwar il-Politika Fiskali billi jimpenjaw ruħhom li jipprovdu l-informazzjoni meħtieġa u li jżommuha aġġornata f’manjiera f’waqtha.

Titjib fit-tmexxija tal-VAT fil-livell tal-UE

Il-partijiet interessati jridu involviment akbar u aktar trasparenza fil-proċess tat-twaqqif u l-interpretazzjoni tal-liġi tal-VAT tal-UE.

Il-Kummissjoni sejra tassumi r-responsabbiltajiet tagħha u tirrispondi b’mod pożittiv għal din is-sejħa. L-iskambji ta’ opinjonijiet bejn il-Kummissjoni u l-partijiet interessati sejrin jiġu organizzati b’mod aktar strutturat. Il-Kummissjoni sejra tiżgura li aktar informazzjoni relatata mal-liġi dwar il-VAT tal-UE tkun disponibbli għall-pubbliku.

Madankollu, is-sejħa sabiex tittejjeb it-tmexxija hija wkoll parzjalment fil-mira tal-Kunsill, minħabba li l-qafas legali li jirregola l-adozzjoni tal-proposti leġiżlattivi jmur ’lil hinn mill-mandat tal-Kummissjoni. Għalhekk, il-Kummissjoni tistieden lill-Kunsill biex jikkunsidra l-aħjar mod kif jinvolvi lill-partijiet interessati meta jkunu qegħdin jiġu nnegozjati l-proposti.

Il-partijiet interessati esprimew ruħhom favur it-twaqqif ta’ kanal ta’ informazzjoni fil-livell tal-UE fejn l-awtoritajiet tat-taxxa, il-Kummissjoni u r-rappreżentanti tan-negozju jkunu jistgħu jiskambjaw opinjonijiet dwar kwistjonijiet prattiċi ta’ amministrazzjoni tal-VAT. Bħalissa huma jistgħu jiddiskutu dawn il-kwistjonijiet mal-awtoritajiet nazzjonali tat-taxxa, iżda ma għandhomx forum usa’ li jinvolvi lill-awtoritajiet kollha tat-taxxa, b’mod partikolari dwar kwistjonijiet transkonfinali.

L-Istati Membri wrew rieda li jipparteċipaw f’forum bħal dan. L-identifikazzjoni tal-aqwa prattiċi tista’ tikkontribwixxi għar-razzjonalizzazzjoni tas-sistema tal-VAT u b’hekk għat-tnaqqis tal-ispejjeż tal-konformità, filwaqt li fl-istess ħin tiżgura d-dħul mill-ġbir tal-VAT.

4. Fl-2012 il-Kummissjoni sejra tippubblika l-linji gwida miftiehma mill-Kumitat tal-VAT dwar il-leġiżlazzjoni tal-UE u, meta jkun xieraq, noti ta’ spjegazzjoni dwar il-leġiżlazzjoni l-ġdida qabel id-dħul fis-seħħ tagħha sabiex tinforma lin-negozji u tippromwovi applikazzjoni aktar konsistenti.

5. Matul l-2012 il-Kummissjoni sejra twaqqaf forum tripartitiku dwar il-VAT tal-UE (il-Kummissjoni, l-Istati Membri, partijiet interessati).

Standardizzazzjoni tal-obbligi tal-VAT

Ir-regoli dwar il-ħruġ tal-fatturi dan l-aħħar komplew jiġu armonizzati u l-prinċipju tat-trattament indaqs tal-fatturi tal-karta u dawk elettroniċi huwa inkorporat fil-leġiżlazzjoni dwar il-VAT. Madankollu, id-differenzi f’obbligi oħrajn tal-VAT għadhom jobbligaw lin-negozji biex ifasslu l-ispeċifikazzjonijiet u l-proċeduri tal-IT għal kull Stat Membru fejn joperaw. Dan idgħajjef il-benefiċċji taċ-ċentri ta’ servizzi kondiviżi għall-obbligi fiskali u ta’ kontabilità madwar l-UE kollha.

6. Fl-2013 il-Kummissjoni sejra tipproponi li dikjarazzjoni standardizzata tal-VAT għandha tkun disponibbli bil-lingwi kollha u fakultattiva għan-negozji madwar l-UE.

7. L-istess approċċ ta’ standardizzazzjoni jista’ mbagħad jiġi segwit fir-rigward ta’ obbligi oħrajn bħar-reġistrazzjoni, il-ħruġ ta’ fatturi u l-evidenza sabiex tiġi ġġustifikata eżenzjoni jew ir-‘reverse charge’.

Lejn sistema tal-VAT aktar effikaċi

It-twessigħ tal-bażi għat-taxxa u r-restrizzjoni fuq l-użu ta’ rati mnaqqsa jiġġeneraw flussi ta’ dħul ġodda b’inqas spiża jew inkella jippermettu tnaqqis sinjifikanti fir-rata standard fis-seħħ bħalissa, li jkun newtrali għad-dħul. Għalhekk, sistema tal-VAT aktar effikaċi hija primarjament fl-interess tal-Istati Membri, iżda għandha wkoll tnaqqas il-piżijiet amministrattivi għan-negozji.

Twessigħ tal-bażi għat-taxxa

Korpi pubbliċi

Studju riċenti dwar il-VAT fis-settur pubbliku u l-eżenzjonijiet fl-interess pubbliku[15] enfasizza n-nuqqasijiet tar-regoli attwali minn perspettiva ekonomika – jiġifieri, in-nuqqas ta’ newtralità tagħhom, id-distorsjonijiet tal-kompetizzjoni li joħolqu u l-kumplessità tagħhom. Barra minn hekk, il-privatizzazzjoni u d-deregulazzjoni ta’ spiss irriżultaw f’sitwazzjonijiet fejn korpi pubbliċi jikkompetu ma’ kumpaniji privati.

Meta wieħed iqis l-impatt potenzjalment sinifikanti f’termini tal-ispiża tal-oġġetti pubbliċi jew fuq is-sigurtà soċjali tat-tneħħija gradwali tal-eżenzjonijiet eżistenti fuq skala kbira bħal fuq l-edukazzjoni jew is-saħħa, approċċ gradwali lejn it-tassazzjoni se jiġi kkunsidrat bir-reqqa.

8. Il-Kummissjoni sejra tressaq proposta li tikkonċentra fuq attivitajiet b’livell akbar ta’ involviment fis-settur privat u riskju għoli ta’ distorsjoni tal-kompetizzjoni.

Servizzi ta’ trasport għall-passiġġieri

Il-Parlament Ewropew jemmen, u l-eżitu tal-konsultazzjoni pubblika jikkonferma li l-fatt li s-servizzi ta’ trasport għall-passiġġieri huma eżentati f’ċerti Stati Membri, jiddependi mill-mezzi ta’ trasport użati, joħloq distorsjonijiet tal-kompetizzjoni fi ħdan is-suq uniku. Meta l-eżenzjoni ma tapplikax, il-kumplessità tar-regoli attwali dwar il-post tal-provvista żżid l-ispejjeż tal-konformità tan-negozji li joperaw f’bosta Stati Membri u tista’ tirriżulta fi żbalji u saħansitra evażjoni.

Il-konsultazzjoni pubblika tiżvela żewġ strateġiji konfliġġenti: iż-żamma tal-istatus quo jew l-abolizzjoni tal-eżenzjoni, bl-għażla tal-aħħar tkun konformi mal-għan li jiżdiedu n-newtralità u l-effikaċja tat-taxxa.

9. Il-Kummissjoni sejra tipproponi qafas aktar newtrali u sempliċi tal-VAT għall-attivitajiet ta’ trasport għall-passiġġieri.

Eżenzjonijiet oħrajn

Sejrin jiġu eżaminati eżenzjonijiet oħrajn li jaġixxu bħala restrizzjonijiet fil-bażi għat-taxxa u li jistgħu joħolqu distorsjonijiet sabiex jiġi vverifikat jekk ir-raġunijiet ekonomiċi, soċjali jew tekniċi għalihom għadhomx validi u jekk il-mod kif inhuma applikati jistax jittejjeb. Fil-kuntest tat-twessigħ tal-bażi għat-taxxa, f’dan l-istadju ma għandha tiġi eliminata l-ebda għażla. Madankollu, xi partijiet interessati esprimew ruħhom favur iż-żamma jew saħansitra t-twessigħ tal-ambitu ta’ ċerti eżenzjonijiet.

It-trattament tal-VAT ta’ organizzazzjonijiet mingħajr skop ta’ qligħ wassal għal għadd numeruż ta’ reazzjonijiet. Madankollu, dawk l-organizzazzjonijiet diġà jibbenifikaw minn eżenzjoni li tkopri l-attivitajiet tagħhom fl-interess ġenerali. L-attivitajiet residwi mhux koperti minn din l-eżenzjoni huma l-unika kawża ta’ tħassib. Madankollu, dawn l-attivitajiet jistgħu jiġu koperti mill-iskema ta’ eżenzjoni ġenerali għal negozji żgħar li għandhom fatturat taħt ċertu limitu u permezz ta’ miżuri u proċeduri ta’ simplifikazzjoni ulterjuri li jistgħu jintroduċu l-Istati Membri. L-Istati Membri jistgħu wkoll jintroduċu mekkaniżmi ta’ kumpens immirati, barra mis-sistema tal-VAT, sabiex itaffu l-ispiża tal-VAT fuq l-akkwiżizzjonijiet tagħhom.

10. Il-Kummissjoni titlob lill-Istati Membri biex jagħmlu użu mill-għażliet eżistenti sabiex itaffu l-piż tal-VAT fuq organizzazzjonijiet mingħajr skop ta’ qligħ. Hija tista’ tipprovdilhom gwida dwar is-sistema tal-VAT applikabbli għalihom.

Reviżjoni tal-istruttura tar-rati

Ħafna partijiet interessati rrimarkaw li d-differenzi fir-rati tal-VAT iwasslu għal spejjeż ta’ konformità addizzjonali. L-evalwazzjoni ekonomika tipprovdi stima ta’ dan l-impatt. Hija stabbilixxiet li t-tnaqqis b’50% tad-dissimilarità tal-istruttura tar-rati tal-VAT bejn l-Istati Membri jista’ jwassal għal żieda ta’ 9.8% fil-kummerċ ġewwa l-UE u għal żieda fil-PDG ta’ 1.1%, iżda fl-istess ħin indikat li dawn il-figuri jistgħu jkunu esaġerati.

L-evalwazzjoni ekonomika kkonfermat ukoll l-opinjonijiet diġà espressi fl-istudji ekonomiċi[16] li saru qabel li l-użu ta’ rati mnaqqsa bosta drabi ma jkunx l-aktar strument xieraq sabiex jiġu segwiti l-għanijiet ta’ politika, partikolarment biex tiġi żgurata d-distribuzzjoni mill-ġdid lil familji foqra jew biex jiġi inkoraġġit il-konsum ta’ prodott li jitqies bħala mixtieq mis-soċjetà.

Il-partijiet interessati li jibbenifikaw minn rati mnaqqsa jinvokaw dawk l-għanijiet biex jiġġustifikaw ir-rati mnaqqsa eżistenti jew saħansitra biex jestenduhom b’mod partikolari għal prodotti li ma jagħmlux ħsara lill-ambjent. Barra minn hekk, il-kwistjoni tat-trattament indaqs għal prodotti li huma disponibbli kemm f’format tradizzjonali kif ukoll f’format fuq l-internet ipprovokat reazzjonijiet konsiderevoli fil-konsultazzjoni pubblika. Dawk il-kwistjonijiet jeħtieġ li jiġu indirizzati.

Ta’ min jinnota li l-applikazzjoni diġà eżistenti tar-rati mnaqqsa tirriżulta f’sussidji sinjifikanti. Il-kobor tagħha tvarja ħafna bejn l-Istati Membri, jiddependi mill-użu li jsir mir-rati mnaqqsa. L-evalwazzjoni ekonomika kkalkulat li, għal kampjun ta’ 9 Stati Membri[17], dawn is-sussidji jirrappreżentaw bejn 8.2% u 53.3 % tad-dħul mill-ġbir tal-VAT ta’ dawk l-Istati Membri. L-abolizzjoni tar-rati mnaqqsa teoretikament tagħti lok sabiex ir-rata standard titnaqqas b’bejn 1.9 u 7.5 punti perċentwali.

L-applikazzjoni tar-rata standard tibqa’ l-prinċipju bażiku u d-Direttiva dwar il-VAT ma tisforzax lill-Istati Membri biex jagħmlu użu mir-rati mnaqqsa. Għalhekk, l-Istati Membri huma primarjament responsabbli biex jillimitaw kemm jista’ jkun l-ambitu ta’ dawn ir-rati fejn dawn ikunu jikkostitwixxu ħelsien mhux ġustifikat mit-taxxa. Il-kuntest ekonomiku u finanzjarju attwali, li jitlob konsolidazzjoni fiskali qawwija tal-baġits nazzjonali, huwa raġuni oħra għal-limitazzjoni tal-użu tagħhom meta mqabbel maż-żieda tar-rati standard. Madankollu, il-benefiċċji potenzjali tal-użu limitat tar-rati mnaqqsa, jekk definiti u applikati b'mod razzjonali, ma għandhomx jiġu injorati.

Għalhekk, hemm għadd ta’ fatturi li jiġġustifikaw reviżjoni tal-istruttura tar-rati tal-VAT attwali. Il-Kummissjoni temmen li din ir-reviżjoni għandha tkun ibbażata fuq valutazzjoni tal-impatt komprensiva li tkopri l-aspetti kollha u fuq il-prinċipji gwida li ġejjin:

- L-abolizzjoni ta’ dawk ir-rati mnaqqsa li jikkostitwixxu ostakolu għall-funzjonament xieraq tas-suq intern. Ir-rati mnaqqsa li kienu ġustifikati fil-passat jista’ jkollhom effetti ta’ distorsjoni llum minħabba li l-ambjenti ekonomiċi, kummerċjali u legali nbidlu matul iż-żmien;

- L-abolizzjoni tar-rati mnaqqsa fuq prodotti u servizzi li l-konsum tagħhom huwa skoraġġit minn politiki oħrajn tal-UE. B’mod partikolari, dan jista’ jkun il-każ għal prodotti u servizzi li huma perikolużi għall-ambjent, għas-saħħa u għall-benesseri;

- Prodotti u servizzi simili għandhom ikunu soġġetti għall-istess rata ta’ VAT, filwaqt li f’dan ir-rigward għandu jittieħed kont tal-progress li sar fit-teknoloġija, sabiex tiġi indirizzata l-isfida tal-konverġenza bejn l-ambjent onlajn u dak fiżiku.

- Sabiex tiżdied l-effikaċja tas-sistema tal-VAT, il-Kummissjoni hija favur użu ristrett tar-rati tal-VAT. Hija sejra tniedi fl-2012 valutazzjoni tal-istruttura r-rati tal-VAT attwali fid-dawl tal-prinċipji gwida msemmija fuq u sussegwentement tagħmel proposti fuq dawk il-linji wara konsultazzjoni wiesgħa mal-partijiet interessati u l-Istati Membri sa tmiem l-2013.

- Sabiex tindirizza l-inċertezza legali u l-ispejjeż tal-konformità li jirriżultaw mis-27 struttura tar-rati differenti, il-Kummissjoni sejra tipproponi li fil-portal fuq l-internet tal-VAT tal-UE tinkludi informazzjoni ċara u vinkolanti dwar il-lista tal-prodotti u s-servizzi li mhumiex koperti mir-rati standard f’kull Stat Membru. Għal dan il-għan, tista’ tintuża n-Nomenklatura kkombinata.

Lejn sistema tal-VAT aktar robusta u li sservi ta’ prova kontra l-frodi

Studju mwettaq f’isem il-Kummissjoni xi snin ilu wera li, ġeneralment, 12% tal-VAT teoretika ma tinġabarx. Il-frodi huwa aspett importanti tal-hekk imsejħa diskrepanza tal-VAT, iżda din id-diskrepanza tikkonsisti wkoll minn aspetti oħrajn, bħal VAT li ma tinġabarx minħabba żbalji, negliġenza u falliment.

Huwa għalhekk li l-Kummissjoni temmen li, minbarra l-ħtieġa kontinwa li nindirizzaw il-frodi tal-VAT, jeħtieġ ukoll li nħarsu lejn l-istampa usa’ u nesploraw modi aħjar kif niġbru u nimmonitorjaw il-VAT.

Mekkaniżmu ta’ reazzjoni malajr li jindirizza l-frodi mhux mistennija

L-esperjenza riċenti bl-iskemi tal-frodi organizzati, kbar u mhux mistennija tal-VAT, uriet li l-proċedura għall-emendar tal-leġiżlazzjoni jew għall-għoti ta’ derogi lill-Istati Membri mhux dejjem tkun flessibbli biżżejjed sabiex tiżgura reazzjoni xierqa u fil-pront.

Ħafna Stati Membri laqgħu l-possibbiltà li jkollhom bażi legali biex jieħdu miżuri nazzjonali immedjati, għalkemm fuq bażi temporanja, bil-għan li jwaqqfu ċerti prattiċi qarrieqa.

11. Il-Kummissjoni sejra tressaq proposta għal mekkaniżmu ta’ reazzjoni malajr fl-2012.

Il-ġlieda kontra l-frodi tal-VAT

L-‘Istrateġija Kontra l-Frodi’ mnedija fl-2006[18] irriżultat fi pjan ta’ azzjoni għal perjodu ta’ żmien qasir li kien ippreżentat mill-Kummissjoni f’Diċembru 2008[19]. Minn dakinhar, il-Kummissjoni ressqet il-proposti leġiżlattivi kollha mħabbra f’dan il-pjan ta’ azzjoni u l-Kunsill adottahom kważi kollha.

Ir-riżultat huwa firxa ta’ miżuri ġodda bħall-ħolqien tal-Eurofisc[20] u aktar skambji ta’ informazzjoni awtomatizzati, li waslu biex jidħlu fis-seħħ jew li daħlu fis-seħħ dan l-aħħar.

L-effikaċja tagħhom f’dak li għandu x’jaqsam mat-tnaqqis tal-frodi tal-VAT sejra tiġi vvalutata bir-reqqa, iżda dan jista’ jsir biss ladarba jkunu implimentati għal kollox il-miżuri kollha. Jistgħu jkunu meħtieġa inizjattivi ġodda jekk jintwera li dawn il-miżuri mhumiex biżżejjed.

Xi wħud mill-miżuri proposti ma ġewx adottati jew tnaqqsu sabiex inkisbet l-unanimità fil-Kunsill, u dawn jinkludu l-aċċess awtomatizzat għall-informazzjoni. Il-Kummissjoni se terġa' tħares lejn dawn il-miżuri bil-għan li tikseb kunens dwarhom. B'mod partikolari, hija se tesplora estensjoni tal-informazzjoni li għaliha jingħata aċċess bejn dawk l-Istati Membri li jkunu lesti li jagħmlu dan.

Il-kontrolli multilaterali rriżultaw bħala għodda utli ħafna biex jiġu ttrattati sitwazzjonijiet ta' frodi kumplessi li jinvolvu operaturi fi Stati Membri differenti. Aktar fit-tul, jista' jiġi kkunsidrat tim tal-awditjar transkonfinali tal-UE, assoċjat ma' Eurofisc, li jikkonsisti f'esperti minn awtoritajiet tat-taxxa nazzjonali. Dan jista' jwassal għal awditjar transkonfinali aktar sistematiku u jibbenefika mill-għarfien u l-esperjenza diġà miksuba mill-awdituri u l-koordinaturi tal-MLC f'dan il-qasam.

12. Il-Kummissjoni sejra tiżgura u timmonitorja l-implimentazzjoni sħiħa tal-miżuri ta' Kontra l-Frodi u tirrapporta dwar l-effikaċja tagħhom u l-ħtieġa li tittieħed aktar azzjoni fl-2014.

13. Il-Kummissjoni tinkoraġġixxi lill-Kunsill sabiex jipprogressa fl-adozzjoni tal-proposti li għadhom fuq il-mejda. Hija se teżamina modi kif twessa' b'mod sinifikanti l-aċċess awtomatizzat għall-informazzjoni.

14. Il-Kummissjoni se tesplora l-possibiltà li twaqqaf tim tal-awditjar transkonfinali tal-UE sabiex tiffaċilita u ttejjeb il-kontrolli multilaterali.

Is-suċċess ta’ kwalunkwe miżura kontra l-frodi jiddependi direttament fuq il-kapaċità amministrattiva tal-awtoritajiet nazzjonali tat-taxxa. Dan sar aktar evidenti fid-dawl tad-diffikultajiet baġitarji attwali li qegħdin jiffaċċjaw bosta Stati Membri u li għalihom issemmiet il-ħtieġa ta’ amministrazzjoni fiskali effikaċi u effettiva.

Skont ir-Regolament attwali tar-riżorsi proprji tal-VAT[21], il-Kummissjoni trid tirrapporta fuq bażi regolari dwar il-proċeduri applikati mill-Istati Membri biex jamministraw u jikkontrollaw il-VAT u jeżaminaw it-titjib possibbli (ir-Rapport tal-"Artikolu 12").

Fir-rapport li jmiss, il-Kummissjoni sejra tistabbilixxi xi punti ta’ riferiment biex tkejjel il-prestazzjoni ta’ kull amministrazzjoni tat-taxxa. Dan l-approċċ għandu jippermetti lill-Istati Membri jippożizzjonaw ruħhom kif imqabbla mal-medji tal-UE.

Approċċi b'suċċess minn ċerti Stati Membri f'setturi sensittivi għall-frodi għandhom jiġu maqsuma b'mod aktar metodiku. L-awtoritajiet tat-taxxa qed jiffaċċjaw problemi komuni u jistgħu jiksbu benefiċċji kbar f'termini ta riżorsi milli jkunu jistgħu jibnu l-azzjoni tagħhom fuq l-esperjenza mill-Istati Membri l-oħra. F'dan il-kuntest, il-Kummissjoni se ssegwi wkoll mill-qrib l-attivitajiet tal-Eurofisc, aktar speċifikament il-qasam tax-xogħol tagħha li jittratta xejriet ġodda tal-frodi (l-Osservatorju tal-VAT).

15. Il-Kummissjoni sejra ssaħħaħ il-monitoraġġ tal-effikaċja u l-effettività tal-amministrazzjonijiet tat-taxxa tal-Istati Membri fir-Rapport tal-Artikolu 12 li jmiss.

16. Il-Kummissjoni sejra, bl-għajnuna tal-Istati Membri, tintensifika l-iskambju tal-aħjar prattiki fil-ġlieda kontra l-frodi f'setturi ta' riskju għoli.

17. Il-Kummissjoni se tkompli ssegwi l-ħidma tal-Eurofisc u tinkoraġġixxi lill-Istati Membri sabiex ikomplu jiżviluppaw din l-għodda sabiex jippruvaw isibu skemi ġodda ta' frodi jew iwaqqfuhom milli jiżviluppaw .

Il-Kummissjoni tqis ukoll approċċ ta’ ‘liġi flessibbli’ (amministrazzjoni tat-taxxa) bħala pass promettenti ’l quddiem fil-ġlieda kontra l-frodi tal-VAT. Għalhekk, l-Istati Membri sejrin jiġu mħeġġa jiffokaw fuq iż-żieda ta’ konformità volontarja billi jtejbu r-relazzjoni tagħhom man-negozji u l-proċeduri tagħhom relatati mal-VAT.

Approċċ bħal dan jimmira, b’mod partikolari, li jipprevjeni lill-persuni potenzjali li jwettqu frodi milli jidħlu fis-sistema tal-VAT u jagħti ċ-ċans lill-awtoritajiet fiskali jirrilokaw ħaddiema biex jikkumbattu mġiba li ma tkunx konformi.

18. Il-Kummissjoni sejra tappoġġja lill-Istati Membri fl-isforzi tagħhom li jtejbu l-konformità bl-użu tal-forum tal-VAT tal-UE imsemmi fil-punt 5.1.3

Bill x-xejriet tal-frodi jinbidlu malajr ħafna u jinkludu pajjiżi terzi, impetu ġdid se jkun meħtieġ sabiex tiġi indirizzata l-ħtieġa għal koperazzjoni akbar u kkoordinata ma' dawn il-pajjiżi. It-tibdil fix-xejriet tal-frodi jitolbu wkoll koperazzjoni aktar qawwija u skambju ta' informazzjoni bejn l-awtoritajiet tat-taxxa u tad-dwana.

19. Il-Kummissjoni se tesplora l-possibiltajiet ta' koperazzjoni msaħħa ma' pajjiżi terzi bil-għan li tiġi skambjata informazzjoni fil-qasam tat-tassazzjoni indiretta billi jintalab mandat tal-UE sabiex isiru ftehimiet ma' pajjiżi terzi.

20. Il-Kummissjoni se tinizja u tiffaċilita inizjattivi għal koperazzjoni msaħħa bejn l-awtoritajiet tat-taxxa u tad-dwana.

Reviżjoni tal-mod kif tinġabar u tiġi mmonitorjata l-VAT

Il-metodi ġodda ta’ ġbir imsemmija fil-Green Paper kienu s-suġġett li probabbilment ipprovoka l-aktar reazzjonijiet ċari u tondi.

B’mod partikolari, il-mudell ta’ ħlas maqsum[22], li kien meqjus bħala l-aktar bidla estensiva u importanti, wassal għal reazzjonijiet ġeneralment negattivi min-negozji u mill-prattikanti fiskali. Dawn tal-aħħar kienu mħassba dwar l-impatt tal-metodu fir-rigward tal-likwidità, l-ispejjeż ta’ konformità u kwistjonijiet kummerċjali. Barra minn hekk, huma kellhom dubji dwar l-abbiltà tiegħu li tassew inaqqas id-diskrepanza tal-VAT. Madankollu, xi Stati Membri għad għandhom interess biex ikomplu jesplorawh.

In-nuqqas ta’ informazzjoni dettaljata dwar l-impatt tiegħu u n-nuqqas ta’ preċiżjoni dwar il-funzjonijiet tiegħu jistgħu jaslu biex jispjegaw din il-kritika. Għalhekk, il-Kummissjoni temmen li huwa prematur li dan il-mudell jitwarrab.

Fir-rigward tal-mudell tal-maħżen tad-dejta (SAFT)[23], li huwa diġà implimentat minn xi Stati Membri, ħafna partijiet interessati talbu biex l-implimentazzjoni tiegħu ssir aktar faċli u uniformi.

21. Il-Kummissjoni sejra tkompli tanalizza l-fattibilità tal-ħlas maqsum u d-disinn tiegħu sabiex ittaffi t-tħassib espress, bil-għan li tkun tista’ tiddeċiedi dwar is-segwitu xieraq fi stadju aktar tard.

22. Il-Kummissjoni sejra tfittex approċċ komuni fil-livell tal-UE dwar is-SAFT sabiex tissimplifika l-implimentazzjoni tiegħu.

Sistema tal-VAT imfassla għas-suq uniku

Il-Green Paper iddeskriviet bosta modi kif tista’ tinkiseb it-tassazzjoni fid-destinazzjoni. B’rabta ma’ dan, jeħtieġ li jiġu indirizzati żewġ kwistjonijiet fundamentali: l-ewwelnett, id-definizzjoni tal-post tad-destinazzjoni u, it-tieni, jekk il-fornitur jitlobx VAT fuq tranżazzjonijiet ġewwa l-UE jew jekk minflok ikunx l-akkwirent responsabbli għall-VAT ( reverse charge ).

L-arranġamenti tranżitorji attwali tal-VAT għat-tranżazzjonijiet B2B ġewwa l-UE huma diġà bbażati fuq it-tassazzjoni fid-destinazzjoni. Madankollu, minħabba n-nuqqasijiet deskritti taħt il-punt 2, ħafna mill-partijiet interessati huma kontra li jagħmluhom is-sistema definittiva. Fil-forma attwali tagħhom, huma mhumiex konformi mal-għan fundamentali li t-tranżazzjonijiet transkonfinali ma għandhomx jiġu ttrattati b’mod differenti mit-tranżazzjonijiet domestiċi.

Il-partijiet interessati min-negozji u l-Parlament Ewropew talbu sabiex il-kunċett tat-tassazzjoni fil-post tal-istabbiliment tal-klijent ikompli jiġi esplorat. Dan għandu jiżgura li l-provvisti ta’ prodotti u servizzi jiġu ttrattati bl-istess mod. Id-diżakkoppjar tar-regoli tat-tassazzjoni mill-fluss fiżiku tal-prodotti, filwaqt li jiġu konnessi mal-fluss kuntrattwali, jidher bħala approċċ promettenti li jimmerita aktar eżaminazzjoni.

Fir-rigward tat-tieni kwistjoni, l-iċċarġjar tal-VAT mill-fornitur fuq provvisti B2B transkonfinali jista’ jwassal għal trattament indaqs għat-tranżazzjonijiet domestiċi u dawk transkonfinali. Il-prinċipju ta’ ħlas maqsum tal-VAT għandu jerġa’ jiddaħħal minħabba li japplika kemm għat-tranżazzjonijiet domestiċi kif ukoll għal dawk ġewwa l-UE. Għalhekk, approċċ bħal dan jittratta l-vulnerabbiltà attwali tas-sistema tal-VAT għall-frodi.

Madankollu, il-kummerċ ġewwa l-UE jirrappreżenta madwar EUR 2 500 biljun, li jfisser li jridu jitħallsu bosta mijiet ta’ biljuni ta’ VAT fuq tranżazzjonijiet fejn l-akkwirent bħalissa huwa responsabbli biss mill-VAT. L-impatt fuq in-negozji, partikolarment f’dak li għandu x’jaqsam mal-likwidità transkonfinali, sejjer ikun sostanzjali. Fir-rigward tal-awtoritajiet tat-taxxa, in-negozju li huwa responsabbli għall-ħlas tat-taxxa ma jibqax dak stabbilit fl-Istat Membru fejn għandha titħallas it-taxxa.

F’dak li għandu x’jaqsam mal-ispejjeż ta’ konformità, l-iċċarġjar tal-VAT fuq dawn il-provvisti jkun jeħtieġ l-implimentazzjoni ta’ One-Stop-Shop komprensiv. Għall-iskop li jkun żgurat id-dħul, jistgħu jkunu meħtieġa miżuri jew garanziji addizzjonali.

23. Il-Kummissjoni sejra tipproċedi b’ħidma teknika komprensiva u bi djalogu wiesa’ mal-Istati Membri fil-Grupp dwar il-ġejjieni tal-VAT u mal-partijiet interessati fil-grupp ta’ esperti tal-VAT bil-għan li jiġu eżaminati fid-dettall il-modi possibbli differenti għall-implimentazzjoni tal-prinċipju tad-destinazzjoni.

24. Fl-ewwel nofs tal-2014 il-Kummissjoni sejra tressaq proposta leġiżlattiva li tistabbilixxi s-sistema definittiva tat-tassazzjoni fuq il-kummerċ ġewwa l-UE.

AZZJONIJIET OħRAJN LI GħANDHOM JIġU MNEDIJA FUQ PERJODU TA’ żMIEN MEDJU

Il-Komunikazzjoni issa stabbilixxiet il-prijoritajiet u programm ta’ ħidma prattiku għas-snin li ġejjin b’diversi proposti, leġiżlattivi u mhux leġiżlattivi, kif ukoll għadd ta’ studji profondi li għandhom jiġu mnedija bil-għan li jitħejjew aktar proposti.

Dawn l-inizjattivi ta’ prijorità huma koerenti u għandhom ukoll isaħħu l-iżvilupp propost ta’ riżorsa proprja ġdida bbażata fuq il-VAT. It-twessigħ tal-bażi għat-taxxa, ir-restrizzjoni fuq l-użu ta’ rati mnaqqsa u t-tnaqqis tal-ambitu għall-frodi jistgħu jżidu d-dħul għall-Istati Membri. Parti minn dawn il-profitti tista’ tiġi attribwita għal-livell tal-UE, u dawn il-profitti jistgħu jkomplu jiżdiedu permezz tat-titjib tal-prestazzjoni tas-sistema tal-VAT.

Aspetti oħrajn tal-VAT tal-UE li tqajmu diġà fil-Green Paper sejrin jiġu indirizzati fuq perjodu ta’ żmien medju.

Għadd ta’ dispożizzjonijiet fid-Direttiva tal-VAT ma għadhomx jgħoddu u ma jieħdux kont tal-aspett tas-suq uniku. Dan huwa partikolarment il-każ għall-iskema tan-negozji żgħar u għad-dispożizzjonijiet tal-gruppi tal-VAT.

Sabiex tiġi żgurata aħjar in-newtralità tat-taxxa, sejjer ikun meħtieġ ukoll li jiġu riveduti r-regoli kumplessi u diverġenti dwar id-dritt tat-tnaqqis u li jiġi pprovdut mekkaniżmu biex jiġu solvuti l-kwistjonijiet ta’ tassazzjoni doppja.

Għandhom jiġu żgurati wkoll kundizzjonijiet indaqs għall-fornituri mill-UE u għal dawk li mhumiex mill-UE. It-trattament ta’ kunsinni żgħar u ta’ bejgħ ieħor minn fuq l-internet għandu jiġi indirizzat f’dan il-kuntest.

KONKLUżJONI

Il-Komunikazzjoni fasslet triq ’il quddiem sabiex tinkiseb sistema tal-VAT aktar sempliċi, robusta u effikaċi, adattata għas-suq uniku.

Il-Kummissjoni tistieden lill-Kunsill, lill-Parlament Ewropew u lill-Kumitat Ekonomiku u Soċjali Ewropew biex jipprovdu gwida politika, fejn jikkonfermaw ir-rieda tagħhom li jesploraw id-direzzjonijiet stabbiliti f’din il-Komunikazzjoni.

Sabiex tiġi żgurata tmexxija kontinwa tar-reviżjoni tas-sistema tal-VAT tal-UE, il-Kummissjoni sejra tirrapporta regolarment dwar il-qagħda attwali ta’ din ir-reviżjoni u tistabbilixxi azzjonijiet ġodda.

[1] COM(2011) 815, 23.11.2011.

[2] COM(2010) 695, Dokument ta’ Ħidma tal-Persunal tal-Kummissjoni, SEC(2010) 1455, 1.12.2010.

[3] Dawn huma disponibbli flimkien ma’ rapport li jiġbor fil-qosor l-elementi ewlenin tagħhom fuq http://ec.europa.eu/taxation_customs/common/consultations/tax/2010_11_future_vat_en.htm

[4] Riżoluzzjoni tat-13 ta’ Ottubru 2011, P7_TA(2011)0436.

[5] ĠU Ċ 318, 29.10.2011, p. 87.

[6] http://ec.europa.eu/taxation_customs/common/publications/studies/index_en.htm

[7] COM(2011) 510, 29.6.2011.

[8] Inklużi kontribuzzjonijiet tas-sigurtà soċjali, Ix-xejriet tat-tassazzjoni fl-Unjoni Ewropea , 2011, anness A, tabella 8.

[9] COM(2010) 2020, 3.3.2010.

[10] COM(2011) 206 , 13.4.2011.

[11] L-Ewwel Direttiva tal-Kunsill 67/227/KEE u t-Tieni Direttiva tal-Kunsill 67/228/KEE tal-11 ta’ April 1967.

[12] COM(2008) 394, 25.6.2008.

[13] COM(2009) 544, 22.10.2009, Anness, p. 83.

[14] http://ec.europa.eu/enterprise/policies/better-regulation/administrative-burdens/high-level-group/index_en.htm

[15] http://ec.europa.eu/taxation_customs/resources/documents/common/publications/studies/ vat_public_sector.pdf.

[16] Copenhagen Economics, Study on reduced VAT applied to goods and services in the Member States of the European Union , Rapport Finali, 21.6.2007.

[17] Il-Belġju, Franza, il-Ġermanja, il-Greċja, l-Ungerija, l-Italja, il-Polonja, Spanja u r-Renju Unit.

[18] COM(2006) 254, 31.5.2006; COM(2007) 758, 23.11.2007.

[19] COM(2008) 870, 1.12.2008.

[20] Regolament tal-Kunsill (UE) Nru 904/2010 tas-7 ta’ Ottubru 2010.

[21] Regolament tal-Kunsill Nru 1553/89 tad-29 ta’ Mejju 1989.

[22] Mudell fejn ix-xerrej iħallas il-VAT f’kont bankarju tal-VAT ibblokkat mal-bank tal-awtoritajiet tat-taxxa li jista’ jintuża biss mill-fornitur biex iħallas il-VAT fil-kont bankarju tal-VAT ibblokkat tal-fornituri tiegħu.

[23] Mudell li permezz tiegħu l-persuna taxxabbli ttella’ dejta ta’ tranżazzjoni predefinita strutturata f’format miftiehem f’maħżen assigurat ta’ dejta dwar il-VAT li jinżamm mill-persuna taxxabbli u li jkun aċċessibbli għall-awtoritajiet tat-taxxa.