1. Il-finanzjament tal-affarijiet interni 1.1. Il-finanzjament tal-affarijiet interni f'kuntest usa'

Il-ħolqien ta' spazju ta' libertà, sigurtà u ġustizzja huwa sies tal-proġett Ewropew. Il-politiki dwar l-affarijiet interni jikkontribwixxu għal dan il-proġett billi jsawru Ewropa fejn il-persuni jkunu jistgħu jidħlu, jivvjaġġaw u jgħixu b'mod ħieles, bis-serħan il-moħħ li d-drittijiet tagħhom jiġu rrispettati u s-sigurtà tagħhom tiġi garantita. Approċċ integrat għall-migrazzjoni u s-sigurtà jista' jwassal benefiċċji lill-UE u lill-pajjiżi sħab li mhumiex parti mill-UE. L-importanza dejjem tikber tal-politiki tal-affarijiet interni ġiet ikkonfermata mill-Programm ta' Stokkolma[1] u mill-Pjan ta' Azzjoni[2] tagħha. Dan huwa wkoll wieħed mill-oqsma li raw bidliet importanti taħt it-Trattat ta’ Lisbona[3]. Fil-qasam tas-sigurtà interna, il-komunikazzjoni tal-Kummissjoni dwar l-Istrateġija tas-Sigurtà Interna tal-UE fl-Azzjoni[4] tidentifika għanijiet strateġiċi ċari abbażi ta' azzjoni konġunta biex jiġu indirizzati l-isfidi komuni marbuta mas-sigurtà fis-snin li ġejjin. Permezz tal-kooperazzjoni u s-solidarjetà fil-livell tal-UE u ma' pajjiżi li mhumiex fl-UE, inkiseb progress sostanzjali fil-ħolqien ta' Ewropa aktar miftuħa u sigura.

Minkejja dan il-progress, l-Ewropa għadha qed tħabbat wiċċha ma' bosta sfidi. L-isfida tal-migrazzjoni titlob tweġiba komprensiva, koerenti u effettiva. Iċ-ċittadini jistennew ukoll li l-Unjoni tagħti l-kontribut tagħha għas-sigurtà billi tiġġieled il-kriminalità organizzata, it-terroriżmu u theddid ieħor. Il-baġit tal-UE għandu rwol essenzjali biex l-għanijiet tal-Unjoni fil-qasam tal-affarijiet interni jwasslu għal riżultati tanġibbli. Il-ħolqien ta' spazju ta' libertà, sigurtà u ġustizzja jista' jinkiseb permezz ta' firxa ta' 'għodod' fosthom programmi ta' nfiq, netwerks, sistemi tal-IT fuq skala kbira u l-aġenziji tal-UE.

Fil-Komunikazzjoni tad-29 ta' Ġunju tal-2011 dwar il-Qafas Finanzjarju Multiannwali li jmiss[5], il-Kummissjoni pproponiet baġit għall-affarijiet interni li jammonta għal EUR 10.9 biljuni (skont prezzijiet attwali) għall-perjodu bejn l-2014 u l-2020. Dan l-ammont jirrapreżenta kontinwazzjoni tal-livell ta' nfiq imbassar fi tmiem il-qafas finanzjarju 2007-2013 u għadu anqas minn 1% tal-baġit globali tal-UE. Filwaqt li jibni fuq ir-riżultati tal-evalwazzjoni u l-konslutazzjoni mal-partijiet interessati, l-għamla tal-Qafas Finanzjarju Multiannwali li jmiss toffri opportunità biex l-infiq fil-livell tal-UE jkun aktar allinjat mal-għanijiet ta' politika strateġiċi. Dan huwa wkoll ċans kruċjali biex il-mod ta' kif jingħata l-finanzjament jittejjeb u jiġi ssimplifikat. Il-Komunikazzjoni tispjega kif il-Kummissjoni ħatfet dawn l-opportunitajiet fil-qasam tal-affarijiet interni.

1.2. Ħarsa 'l quddiem: l-isfidi fil-qasam tal-affarijiet interni

Fuq l-għexieren ta' snin li ġejjin, l-Unjoni ser tissokta tindirizza sfidi importanti fil-qasam tal-affarijiet interni. Hija ser jeħtiġilha tiġġieled kontra t-traffikar tal-bnedmin u taffaċċja l-migrazzjoni irregolari b'mod xieraq. Fl-istess ħin, l-Unjoni trid tkompli turi solidarjetà ma’ dawk li għandhom bżonn protezzjoni internazzjonali. It-tlestija ta’ Sistema Ewropea Komuni tal-Ażil aktar protettiva u effiċjenti li tirrifletti l-valuri tagħna tibqa’ prijorità.

Minħabba t-tibdil demografiku, it-tibdil strutturali fis-swieq tax-xogħol u fix-xejriet tal-kompetizzjoni għall-ħiliet, element kruċjali li jwassal għat-tisħiħ tal-kompetittività u l-koeżjoni soċjali tal-UE, u li jarrikkixxi s-soċjetajiet tagħna u li joħloq opportunitajiet għal kulħadd ser ikun it-tfassil ta' politiki progressivi dwar l-immigrazzjoni legali u l-integrazzjoni. Dawn għandhom jitpoġġew fil-kuntest tal-seba' inizjattivi ewlenin li ġew ippreżentati fl-Istrateġija Ewropa 2020[6] li għandhom l-għan li jgħinu lill-UE tegħleb il-kriżi finanzjarja u ekonomika ta' bħalissa u tikseb tkabbir intelliġenti, sostenibbli u inklużiv.

L-iżgurar ta' ambjent protett u sigur huwa meħtieġ u ta' benefiċċju għat-tkabbir ekonomiku, kulturali u soċjali tal-UE. L-UE għandha rwol deċiżiv, kemm jekk huwa dak li tindirizza t-theddid ta' kriminalità serja u organizzata, taċ-ċiberkriminalità u t-terroriżmu, u kemm jekk dak li tiżgura l-ġestjoni tal-fruntieri esterni tal-UE jew billi tirreaġixxi malajr għal kriżijiet emerġenti kkawżati minn diżastri naturali jew li jġib b'idejh il-bniedem. Fl-era tal-globalizzazzjoni, fejn it-theddid qiegħed jiżdied u fejn aktar ma jmur aktar qiegħed ikollu dimensjoni tranżnazzjonali, l-ebda Stat Membru ma jista' jirreaġixxi b’mod effettiv għal rasu. Hemm bżonn ta’ tweġiba Ewropea koerenti u komprensiva sabiex jiġi żgurat li l-awtoritajiet tal-infurzar tal-liġi jkunu jistgħu jaħdmu b’mod effettiv transkonfinalment u bejn il-ġuriżdizzjonijiet.

Filwaqt li huma meħtieġa miżuri ta' infurzar li jiggarantixxu s-sigurtà tal-Ewropa, huwa ta' importanza tassew kbira li dawn il-miżuri jkunu jirrispettaw id-drittijiet fundamentali kif inhuma mnaqqxa fil-Karta tad-Drittijiet Fundamentali tal-Unjoni Ewropea.

Il-kooperazzjoni ma' pajjiżi li mhumiex parti mill-Unjoni Ewropea u ma' organizzazzjonijiet internazzjonali hija kruċjali biex jinskibu dawn l-għanijiet. L-avvenimenti li seħħew dan l-aħħar fl-Afrika ta' Fuq urew kemm huwa importanti li l-UE jkollha approċċ komprensiv u koordinat fir-rigward tal-migrazzjoni, il-fruntieri u s-sigurtà. Għaldaqstant, id-dimensjoni esterna tal-poltiki tal-UE dwar l-affarijiet interni, li kull ma jmur aktar qegħdin isiru importanti, għandha tissaħħaħ b'koerenza sħiħa mal-politika barranija tal-Unjoni.

1.3. Il-valur miżjud tal-intervent tal-UE

Il-ġestjoni tal-flussi migratorji u tat-theddid fuq is-sigurtà tippreżenta sfidi li ma jistgħux jiġu indirizzati mill-Istati Membri għal rashom. Il-baġit tal-UE huwa waħda mill-għodod sabiex l-Unjoni tindirizza dawn l-isfidi. Huwa jagħti valur miżjud billi jindirizza s-sejħiet żbilanċjati li jsiru fil-konfront ta' Stati Membri differenti f'Unjoni mingħajr fruntieri interni; u billi jiffinanzja azzjonijiet transkonfinali b'mod aktar effiċjenti milli jkun possibbli fil-livell nazzjonali biss.

Ċerti Stati Membri qegħdin iħabbtu wiċċhom ma' pressjoni partikolarment kbira, minħabba s-sitwazzjoni ġeografika tagħhom u t-tul tal-fruntieri esterni tal-Unjoni li hija fir-responsabbiltà tagħhom li jamministrawhom. L-abolizzjoni tal-kontrolli fuq il-fruntieri interni għandha tkun akkumpanjata minn miżuri għall-kontroll u s-sorveljanza effettivi tal-fruntieri esterni tal-Unjoni. Għaldaqstant, il-prinċipju tas-solidarjetà u l-kodiviżjoni ekwa tar-responsabbiltajiet bejn l-Istati Membri jinsab fil-qalba tal-politiki komuni dwar l-ażil, l-immigrazzjoni u l-fruntieri esterni. Il-baġit tal-UE jipprovdi l-mezzi għall-indirizzar tal-implikazzjonijiet finanzjarji ta' dan il-prinċipju. Fil-qasam tas-sigurtà, aktar ma jmur, il-kriminalità serja u organizzata, it-terroriżmu u theddid ieħor relatat mas-sigurtà aktar qegħdin isiru ta' natura transkonfinali. Il-kooperazzjoni u l-koordinazzjoni tranżnazzjonali bejn l-awtoritajiet tal-infurzar tal-liġi huma essenzjali biex din il-kriminalità tiġà miġġielda u ostakolata b'suċċess, pereżempju permezz tal-iskambju ta' informazzjoni, investigazzjonijiet konġunti, attivitajiet ta' taħriġ komuni, teknoloġiji interoperabbli, u valutazzjonijiet komuni tat-theddid u r-riskji.

L-indirizzar tal-flussi migratorji, il-ġestjoni tal-fruntieri esterni tal-UE u s-sigurtà tal-UE jirrekjedu riżorsi u kapaċitajiet essenzjali min-naħa tal-Unjoni, u kif ukoll min-naħa tal-Istati Membri. It-titjib fil-kooperazzjoni u l-koordinazzjoni operazzjonali li jinvolvu l-kondiviżjoni ta' riżorsi f'oqsma bħat-taħriġ u t-tagħmir joħloq ekonomiji tal-kobor u sinerġiji li jiżguraw użu aktar effiċjenti ta' fondi pubbliċi u t-tisħiħ tas-solidarjetà, il-fiduċja reċiproka u l-kondiviżjoni tar-responsabbiltà għall-politiki komuni tal-UE fost l-Istati Membri. Dan huwa rilevanti b’mod partikolari fil-qasam tas-sigurtà, fejn l-appoġġ finanzjarju għas-suriet kollha ta' operazzjonijiet transkonfinali konġunti huma essenzjali għat-titjib tal-kooperazzjoni bejn il-pulizija, id-dwana, il-gwardjani tal-fruntiera u l-awtoritajiet ġudizzjarji.

B'rabta mad-dimensjoni esterna tal-affarijiet interni, l-adozzjoni ta' miżuri u l-kondiviżjoni ta' riżorsi fil-livell tal-UE ser iżid b'mod sinifikanti l-possibbiltà li l-UE tkun tista' tinfluwenza lil pajjiżi terzi biex tikkonvinċihom jimpenjaw ruħhom mal-Unjoni fir-rigward ta' dawn il-kwistjonijiet ta' migrazzjoni u sigurtà li, l-ewwel u qabel kollox, huma fl-interess tal-Unjoni u tal-Istati Membri.

2. Il-prijoritajiet tal-finanzjament 2.1. Daqqa ta' għajn lejn il-baġit ġejjieni tal-qasam tal-affarijiet interni

Fid-29 ta' Ġunju tal-2011, il-Kummissjoni ressqet proposta dwar il-Qafas Finanzjarju Multiannwali. Fil-qasam tal-affarijiet interni, il-Kummissjoni pproponiet baġit globali ta' EUR 10,911 miljuni (skont prezzijiet attwali) għall-perjodu bejn l-2014 u l-2020, żieda konsiderevoli meta mqabbel mal-medja fuq il-Qafas Finanzjarju Multiannwali kurrenti (EUR 6,449 miljuni għall-perjodu bejn l-2007 u l-2013 skont prezzijiet attwali). Din iċ-ċifra mhux biss tkopri l-infiq fuq programmi finanzjarji iżda wkoll finanzjament fuq sistemi tal-IT fuq skala kbira u l-aġenziji tal-UE li huma attivi fil-qasam tal-affarijiet interni[7].

Il-baġit tal-qasam tal-affarijiet interni bejn l-2014 u l-2020 || Miljuni ta' EUR (skont prezzijiet attwali)

Il-Fond għall-Ażil u l-Migrazzjoni fosthom il-Programm dwar ir-Risistemazzjoni u n-Netwerk Ewropew dwar il-Migrazzjoni || 3,869

Il-Fond għas-Sigurtà Interna fosthom sistemi tal-IT fuq skala kbira || 4,648

Sistemi tal-IT fuq skala kbira eżistenti u Aġenzija tal-IT || 822

Subtotal || 9,339

L-Aġenziji (il-Europol, il-Frontex, l-EASO, is-CEPOL u l-EMCDDA) || 1,572

Total || 10,911

2.2. Żewġ Fondi li jappoġġjaw il-politiki dwar l-affarijiet interni

Il-Kummissjoni tipproponi li tissimplifika l-istruttura tal-programmi dwar l-affarijiet interni billi tnaqqas l-għadd ta' Fondi għal tnejn: Fond għall-Ażil u l-Immigrazzjoni u l-Fond għas-Sigurtà Interna. Huma meħtieġa żewġ oqfsa ta' finanzjament komprensivi biex jingħata appoġġ lil żewġ politiki ewlenin fil-qasam tal-politika tal-migrazzjoni u s-sigurtà; politiki li għalkemm huma differenti ħafna minn xulxin huma kumplimentari, għaliex dawn ser ikunu fil-qalba tal-affarijiet interni għall-perjodu wara l-2013. L-arkitettura legali tal-Fondi hija spjegata fl-Anness 1.

B'baġit globali li jlaħħaq it-EUR 3,869 miljuni (skont prezzijiet attwali), il-Fond għall-Ażil u l-Migrazzjoni ser jiffoka fuq il-flussi tal-persuni u fuq il-ġestjoni integrata tal-migrazzjoni. Il-Fond għas-Sigurtà Interna ser ikollu baġit globali ta' EUR 4,648 miljuni (skont prezzijiet attwali) għall-appoġġ tal-implimentazzjoni u l-Istrateġija tas-Sigurtà Interna[8] u approċċ koerenti u komprensiv għall-kooperazzjoni fl-infurzar tal-liġi, fosthom għall-ġestjoni tal-fruntieri esterni tal-UE.

Iż-żewġ Fondi ser ikollhom dimensjoni esterna li tappoġġja azzjonijiet ma' pajjiżi terzi, u kif ukoll b'rabta magħhom, li l-ewwel u qabel kollox ikunu jaqdu l-interessi u l-għanijiet tal-UE, iħallu impatt dirett fuq l-UE u fuq l-Istati Membri tagħha u jiżguraw il-kontinwità mal-attivitajiet implimentati fit-territorju tal-UE. Il-finanzjament ser jitfassal u jiġi implimentat b'mod koerenti mal-azzjoni esterna u l-politika barranija tal-UE. Huwa ma kienx maħsub biex jappoġġja azzjonijiet li huma orjentati lejn l-iżvilupp u, fejn xieraq, ser jikkumplimenta l-assistenza finanzjarja permezz ta' strumenti ta' għajnuna esterna. Filwaqt li dawk l-istrumenti jew jappoġġjaw il-ħtiġijiet ta' żvilupp ta' pajjiżi benefiċjarji jew jappoġġjaw interessi politiċi ġenerali tal-UE ma' sħab strateġiċi, il-fondi tal-affarijiet interni ser isostnu azzjonijiet speċifiċi f'pajjiżi terzi fl-interess tal-politika dwar il-migrazzjoni tal-UE u l-għanijiet tal-UE fir-rigward tas-sigurtà interna. Għaldaqstant huma ser jimlew lakuni speċifiċi u ser jikkontribwixxu għas-sett ta' għodod li jistgħu jintużaw mill-Unjoni.

Kull Fond ser jipprovdi għal reazzjoni rapida fiċ-ċirkostanza ta' emerġenzi biex l-UE tkun tista' twieġeb malajr u b'mod effettiv kriżijiet marbuta mal-migrazzjoni u s-sigurtà.

2.2.1. Il-Fond għall-Ażil u l-Migrazzjoni

Il-Fond għall-Ażil u l-Migrazzjoni ser jiffoka fuq il-ġestjoni integrata ta' flussi migratorji li tkopri aspetti differenti tal-politika komuni tal-UE dwar l-ażil u l-immigrazzjoni. Dan ser isostni azzjonijiet rigward l-ażil, il-migrazzjoni legali u l-integrazzjoni taċ-ċittadini ta' pajjiżi terzi, u operazzjonijiet ta' ritorn. Bħalissa l-finanzjament għal dawn l-attivitajiet huwa kopert minn tliet Fondi separati, il-Fond Ewropew għar-Refuġjati, il-Fond Ewropew għall-Integrazzjoni ta' Ċittadini ta' Pajjiżi Terzi u l-Fond Ewropew għar-Ritorn rispettivament.

Fil-qasam tal-ażil, il-prijorità hija l-iżvilupp tas-Sistema Ewropea Komuni tal-Ażil (SEKA) billi tiġi żgurata l-applikazzjoni effiċjenti u uniformi tal-acquis tal-UE dwar l-ażil. Għalhekk l-appoġġ finanzjarju ser jingħata għal miżuri implimentati biex jittejbu l-kundizzjonijiet ta' akkoljenza ta' applikanti għall-ażil u proċedura tal-ażil fi Stat Membri.

Huwa meħtieġ ukoll li jiżdiedu sforzi biex titwaqqaf sistema aktar effettiva għall-kondiviżjoni tar-responsabbiltà bejn l-Istati Membri u ma' pajjiżi terzi. Għaldaqstant il-Fond ser jappoġġja t-twaqqif ta' Programm tal-Unjoni dwar ir-Risistemazzjoni b'allokazzjoni li tlaħħaq il-EUR 560 miljun. Il-Programm għandu żewġ għanijiet: li jipprovdi soluzzjonijiet dejjiema għall-għadd dejjem jiżdied ta' refuġjati billi jappoġġja t-trasferimenti tagħhom minn territorji barra mill-UE u s-sistemazzjoni tagħhom fi Stat Membru tal-UE; li jwassal għall-aktar impatt strateġiku effettiv tar-risistemazzjoni billi jintlaqtu aħjar dawk il-persuni li l-aktar għandhom bżonn ta' risistemazzjoni abbażi tal-prijoritajiet komuni tal-UE dwar ir-risistemazzjoni. Dawn il-prijoritajiet ser jiġu stabbiliti għal perjodi ta' sentejn bl-involviment tal-Parlament Ewropew u tal-Kunsill u b'kooperazzjoni mal-Kummissarju Għoli tan-Nazzjonijiet Uniti għar-Refuġjati (UNHCR) u mal-Uffiċċju Ewropew ta' Appoġġ fil-Qasam tal-Ażil. Il-Fond ser jappoġġja wkoll it-trasferiment ta' benefiċjarji ta' protezzjoni internazzjonali fl-UE ('rilokazzjoni intra-Ewropea'). Għal dan il-għan, ser jiġu pprovduti inċentivi finanzjarji (ammonti b'rata fissa) lil dawk l-Istati Membri li jikkommettu ruħhom għar-risistemazzjoni u r-rilokazzjoni ta' għadd ta' persuni permezz ta' eżerċizzju ta' 'wegħdiet' kull sentejn abbażi tal-prijoritajiet komuni tal-UE dwar ir-risistemazzjoni. F'dan il-kuntest, il-Fond ser jikkontribwixxi wkoll għat-tisħiħ tal-kapaċitajiet ta' pajjiżi terzi, b'mod partikolari fil-qafas tal-Programmi ta' Protezzjoni Reġjonali.

Fil-qasam tal-integrazzjoni ta' ċittadini ta' pajjiżi terzi, sa issa l-finanzjament appoġġja l-Istati Membri fl-iżviluppar ta' strateġiji nazzjonali għall-integrazzjoni ta' ċittadini ta' pajjiżi terzi jew fit-tisħiħ tal-istrateġiji nazzjonali li diġà jinsabu fis-seħħ. Fil-fażi ta' pprogrammar li jmiss, l-enfasi ser tkun fuq approċċ lokali u aktar iffukat, b'appoġġ għal strateġiji konsistenti mfassla b'mod speċifiku għall-promozzjoni tal-integrazzjoni ta' ċittadini ta' pajjiżi terzi fil-livell lokali jew reġjonali bħal korsijiet ta' orjentazzjoni ċivika, parteċipazzjoni fil-ħajja soċjali u ċivika, aċċess ekwu għal servizzi eċċ. Ser tingħata attenzjoni partikolari għal dawk il-ħtiġijiet speċifiċi tal-aktar gruppi ta' migranti vulnerabbli bħar-refuġjati, il-minorenni mhux akkumpanjati, il-persuni xjuħ u l-vittmi ta' traffikar. Barra minn hekk, il-miżuri ta' qabel l-ammissjoni li jiġu implimentati fil-pajjiżi ta' oriġini wkoll ser jiġu appoġġjati bħala mezz kruċjali tal-faċilitazzjoni tal-migrazzjoni legali lejn l-UE u l-promozzjoni tal-integrazzjoni fi stadju bikri. L-appoġġ mogħti mill-Fond għall-Ażil u l-Migrazzjoni għall-integrazzjoni ta' ċittadini ta' pajjiżi terzi u l-azzjonijiet tal-Fond Soċjali Ewropew għat-titjib tal-ħiliet tal-migranti u l-integrazzjoni fis-suq tax-xogħol ser ikun wieħed kumplimentari.

Sabiex tiġi ffaċilitata l-migrazzjoni legali, il-Fond ser jipprovdi wkoll appoġġ finanzjarju lil pajjiżi terzi sabiex jimplimetaw miżuri fil-qafas ta' Sħubijiet ta' Mobbiltà li jsiru kemm fl-UE u kif ukoll f'pajjiżi terzi u li l-għan primarju tagħhom huwa li jaqdi l-ħtiġijiet u l-prijoritajiet tal-UE.

Fir-rigward tar-ritorn, l-enfasi ser tiċċaqlaq minn fuq il-bini ta' kapaċitajiet għall-ġestjoni tar-ritorn għal fuq appoġġ għal ritorni sostenibbli, megħjuna minn programmi ta' ritorn volontarju (mingħajr ma jiġu esklużi operazzjoni ta' ritorn sfurzat) u miżuri ta' riintegrazzjoni, kif ukoll għat-titjib tat-trattament tal-gruppi kkonċernati matul il-proċess ta' qabel ir-ritorn, partikolarment il-kundizzjonijiet ta' detenzjoni. Il-ftehimiet ta' riammissjoni huma għodda importanti għal ġestjoni effiċjenti tal-flussi migratorji, partikolarment fil-ġlieda kontra l-immigrazzjoni irregolari, u huma komponent importanti għall-politika tal-UE dwar ir-ritorn, għaliex jiffaċilitaw ir-ritorn mgħaġġel ta' migranti irregolari. Għaldaqstant il-finanzjament ser ikun disponibbli biex isaħħaħ il-kapaċitajiet tal-pajjiżi għar-riammissjoni ta' migranti irregolari, kemm f'termini ta' riintegrazzjoni taċ-ċittadini tagħhom stess u kif ukoll għar-riammissjoni ta' ċittadini ta' pajjiżi terzi li mbagħad ikomplu l-vjaġġ tagħhom lejn il-pajjiżi ta' oriġini tagħhom.

L-ewwel tagħlimiet li ttieħdu mill-avvenimenti fin-Nofsinhar tal-Mediterran juru li l-UE jeħtiġilha tkun kapaċi tirrispondi b'mod rapidu u aktar effettiv għal sitwazzjoni ta' kriżi u wasliet għal għarrieda ta' għadd kbir ta' persuni, fosthom flussi mħallta. Il-Fond jinkludi riżorsi finanzjarji li jista' jsir użu rapidu minnhom bħala tweġiba għal tipi differenti ta' kriżijiet relatati mal-migrazzjoni. It-twessigħ tal-kamp ta' applikazzjoni tar-Riżerva għal Għajnuna ta' Emerġenza, jekk jintlaħaq qbil dwarha bejn il-Kummissjoni, il-Parlament Ewropew u l-Kunsill fil-kuntest tal-abbozz ta' Ftehim Interistituzzjonali dwar il-kooperazjoni fi kwistjonijiet baġitarji u dwar il-ġestjoni finanzjarja tajba[9], ukoll jista' jikkontribwixxi mezzi finanzjarji fil-każ ta' emerġenzi.

2.2.2. Il-Fond għas-Sigurtà Interna

Il-Fond għas-Sigurtà Interna[10] iwieġeb għas-sejħa li saret fil-Programm ta' Stokkolma għall-ħolqien ta' Fond li jappoġġja l-implimentazzjoni tal-Istrateġija tas-Sigurtà Interna u approċċ koerenti u komprensiv għall-kooperazzjoni fl-infurzar tal-liġi, fosthom għall-ġestjoni tal-fruntieri esterni tal-Unjoni. Għaldaqstant l-attivitajiet li huma appoġġjati bħalissa mill-Programmi Speċifiċi tal-ISEC (il-Prevenzjoni u l-ġlieda kontra l-Kriminalità) u s-CIPS (il-Prevenzjoni, it-Tħejjija u l-ġestjoni tal-konsegwenzi tat-Terroriżmu u riskji oħrajn relatati mas-Sigurtà) ser ikunu koperti mill-Fond għas-Sigurtà Interna, kif ukoll dawk li jappoġġjaw il-Fond għall-Fruntieri Esterni.

Fir-rigward tas-sigurtà interna, il-Fond ser jipprovdi appoġġ finanzjarju għall-kooperazzjoni bejn il-pulizija, il-prevenzjoni tal-kriminalità u l-ġlieda kontra l-kriminalità transkonfinali serja, u kif ukoll għall-ġestjoni tal-kriżijiet u l-protezzjoni tal-infrastruttura kritika tal-UE. Il-Fond ser jgħin fil-ġlieda tal-kriminalità serja u organizzata fil-bosta suriet li tieħu permezz tat-tisħiħ tal-kooperazzjoni prattika fil-qasam tal-infurzar tal-liġi, pereżempju, appoġġ finanzjarju għal operazzjonijiet konġunti ta' awtoritajiet tal-infurzar tal-liġi (fosthom it-Timijiet Investigattivi Konġunti), għall-kondiviżjoni ta' riżorsi, l-iskambju ta' informazzjoni u l-aħjar prattiki jew taħriġ għall-komunità tal-infurzar tal-liġi.

Il-fondi ser jipprovdu wkoll għall-iżvilupp ta' għodod komuni, fosthom sistemi interoperabbli tal-IT u kanali ta' komunikazzjoni siguri fil-livell tal-Istati Membri. Dawn huma essenzjali għall-kooperazzjoni fil-qasam tal-infurzar tal-liġi. B'rabta mal-ġlieda kontra t-theddida dejjem tikber taċ-ċiberkriminalità, ser jingħata appoġġ finanzjarju għat-twaqqif ta' Ċentru taċ-Ċiberkriminalità li permezz tiegħu l-Istati Membri u l-istituzzjonijiet tal-UE ser ikunu jistgħu jibnu kapaċità operazzjonali u analitika għal investigazzjonijiet u kooperazzjoni ma' pajjiżi sħab fil-livell internazzjonali. Barra minn hekk, qiegħed jingħata finanzjament għal proġetti partikolarment innovattivi li l-għan tagħhom huwa l-iżvilupp ta' metodi jew teknoloġiji ġodda, speċjalment l-ittestjar u l-validazzjoni tar-riżultati ta' riċerka dwar is-sigurtà ffinanzjata mill-UE. Dan ser jgħin biex jitqarrbu d-differenzi bejn ir-riżultati tar-riċerka miksuba b'appoġġ mit-8 Programm Qafas u l-applikazzjoni serjali tagħhom fil-prattika għall-benefiċċju tal-komunità tal-infurzar tal-liġi.

Ser jiġi pprovdut ukoll appoġġ finanzjarju għall-protezzjoni ta' infrastruttura kritika u għat-titjib tal-kapaċità tal-Istati Membri u tal-UE fil-ġestjoni ta' riskji relatati mat-terroriżmu u ma' fatturi oħrajn relatati mas-sigurtà u ta' sitwazzjonijiet ta' kriżi. Il-Fond ser jappoġġja wkoll miżuri li jagħlqu l-aċċess għal fondi min-naħa tat-terroristi, fosthom permezz tat-twaqqif ta' Sistema Ewropea għat-Traċċar ta' Finanzjament tat-Terroriżmu (TFTS Ewropea)[11], splussivi u sustanzi Kimiċi, Bijloġiċi, Radjoloġiċi u Nukleari (CBRN). Ser jiġi pprovdut ukoll finanzjament għall-promozzjoni ta' azzjonijiet li jindirizzaw il-kwistjoni tar-radikalizzazzjoni vjolenti u r-reklutaġġ u għall-appoġġ ta' vittmi tat-terroriżmu.

Appoġġ ieħor ser jingħata fil-qasam tal-politika tad-dimensjoni esterna tas-sigurtà interna pereżempju favur il-kooperazzjoni ma' pajjiżi terzi fuq kwistjonijiet li jolqtu lill-Unjoni b'mod dirett bħat-traffikar tal-bnedmin, tad-drogi u tal-armi, l-iżmantellar tal-netwerks kriminali internazzjonali, il-prevenzjoni tat-terroriżmu u riskji oħrajn relatati mas-sigurtà.

Barra minn hekk, fil-qasam tas-sigurtà interna, jista' jkun hemm inċidenti jew theddid ġdid li jitolbu reazzjoni rapida u effettiva fil-livell tal-UE, pereżempju attakki terroristiċi jew attakki ċibernetiċi fuq skala kbira. Għaldaqstant il-Fond għas-Sigurtà Interna ġie mogħni b'mekkaniżmu ta' reazzjoni ta' emerġenza li jippermetti lill-UE tirrilaxxa fondi għal intervent inizjali rapidu f'kollaborazzjoni mal-Istati Membri kkonċernati. Dan il-mekkaniżmu ser jikkumplimenta l-fondi disponibbli mill-Fond tal-UE ta' Solidarjetà, maħluq apposta biex jgħin lil kwalunkwe wieħed mill-Istati Membri fl-eventwalità ta' diżastru naturali jew ikkaġunat mill-bniedem, u l-finanzjament taħt l-Istrument Finanzjarju għall-Protezzjoni Ċivili li jindirizza diżastri naturali u kkaġunati mill-bniedem (inċidenti).

Fil-qasam tal-fruntieri esterni, wasal iż-żmien li, permezz tal-baġit tal-UE, tiżdied l-għajnuna li tingħata favur l-isforzi tal-Istati Membri fuq il-kontroll tal-fruntieri, u li dan isir b'mod aktar konsistenti u sistematiku, imsejjes fuq il-kunċett tal-kontroll tal-fruntieri bħala 'servizz pubbliku' mwettaq mill-Istati Membri fl-interess u f'isem l-UE. Il-Fond ser jipprovdi appoġġ operattiv li jikkumpensa għall-isforzi li jsiru mill-Istati Membri għas-sigurtà tal-fruntieri esterni tal-Unjoni. Ser ikun hemm ukoll id-disponibbiltà ta' fondi għall-implimentazzjoni msaħħa tal-acquis ta' Schengen, il-kooperazzjoni konsulari dwar il-viżi (eż. iż-żieda fit-traffiku lokali tal-fruntiera u l-ħolqien ta' ċentri komuni ta' applikazzjoni għall-viża) u l-iżvilupp ulterjuri ta' sistema ta' ġestjoni integrata tal-fruntieri permezz tat-tisħiħ u t-titjib ta' tagħmir/infrastruttura għall-viża u l-fruntieri f'konformità ma' żviluppi teknoloġiċi ġodda. B'mod partikolari dan ikun jinkludi t-titjib tal-kapaċiitajiet operazzjonali tal-Istati Membri fi ħdan il-qafas tal-istandards tal-EUROSUR.

B'rabta mad-dimensjoni esterna tal-ġestjoni tal-fruntieri, il-Fond ser jipprovdi appoġġ immirat għat-titjib tal-kooperazzjoni ma' pajjiżi terzi u għat-tisħiħ ta' ċerti aspetti ewlenin tal-kapaċitajiet tagħhom ta' kontroll u ġestjoni tal-fruntiera f'oqsma li huma ta' interess partikolari għall-UE u li jħallu impatt dirett fuqha. Pereżempju, fil-qafas tal-EUROSUR, jista' jkun hemm id-disponibbiltà ta' fondi biex tinħoloq konnessjoni bejn is-sistemi u l-infrastrutturi ta' pajjiżi terzi ma' dawk tal-UE sabiex ikun jista' jsir skambju regolari ta' informazzjoni.

Sistema tal-IT fuq skala kbira: sfida partikolari

Is-sistemi tal-IT fuq skala kbira li jsostnu l-ġestjoni ta' flussi migratorji fil-fruntieri esterni tal-Unjoni huma ta' valur miżjud għoli għall-UE. Madanakollu, l-esperjenza turi li l-iżvilupp u l-ġestjoni ta' sistema bħal din tista' tkun sfida partikolari. Fil-Komunikazzjoni tagħha ta' Ġunju tal-2011, il-Kummissjoni pproponiet li twarrab pakkett separat ta' EUR 822 miljun (skont prezzijiet attwali) għall-ġestjoni ta' sistemi tal-IT fuq skala kbira li jinsabu fis-seħħ (is-Sistema ta' Informazzjoni ta' Schengen II, is-Sistema ta' Informazzjoni dwar il-Viża u l-Eurodac). Il-ġestjoni ta' dawn is-sistemi ser tiġi ttrasferita mill-Kummissjoni lejn l-Aġenzija l-ġdida responsabbli mill-IT li ser tibda topera fl-2012.

Fir-rigward ta' sistemi ġodda tal-IT, qiegħed jinħoloq programm speċifiku b'baġit ta' EUR 1.1 biljun (skont prezzijiet attwali) fi ħdan il-Fond għas-Sigurtà Interna bil-għan tal-iżvilupp ta' sistemi ġejjiena tal-IT mill-Kummissjoni u fl-Istati Membri, bħal pereżempju s-Sistema ta' Dħul/Ħruġ u l-Programm ta' Vjaġġaturi Rreġistrati (il-pakkett tal-'fruntieri intelliġenti')[12]. L-iżviluppar ta' dawn is-sistemi ġodda mhuwiex ser jibda qabel ma l-Parlament Ewropew u l-Kunsill jadottaw il-bażi legali tas-sistemi li tistabbilixxi l-ispeċifikazzjonijiet tagħhom b'mod ċar. Għaldaqstant mhija mistennija li ssir l-ebda nefqa qabel l-2015, u l-Kummissjoni qiegħda tipprevedi li ser li tafda l-iżviluppar tas-sistemi f'idejn l-Aġenzija tal-IT. L-azzjonijiet ewlenin li ser jitwettqu, il-baġit għalihom u l-iskeda tal-implimentazzjoni tagħhom ser jiġu stabbiliti f'qafas multiannwali strateġiku. Sabiex jiġu ffrankati l-kostijiet u tiġi żgurata l-konsistenza teknika u l-implimentazzjoni mingħajr diffikultajiet, il-Fond ser ikopri l-kostijiet għall-iżviluppar tal-komponenti ċentrali u nazzjonali tas-sistemi l-ġodda. Meta dawn is-sistemi jibdew jaħdmu, l-appoġġ għall-kostijiet operazzjonali fil-livell ċentrali jiġu ttrasferiti lejn l-Aġenzija tal-IT. L-Istati Membri ser ikunu jistgħu jużaw l-appoġġ operattiv ipprovdut mill-programmi multiannwali biex ikopru l-kostijiet ta' dawn is-sistemi fil-livell nazzjonali.

3. Finanzjament li jingħata aħjar 3.1. L-ipprogrammar u l-ġestjoni tal-fondi għall-affarijiet interni: enfasi fuq il-flessibbiltà u r-riżultati

Il-maġġorparti tal-fondi għall-affarijiet interni ser jiġu implimentati skont il-metodu ta' ġestjoni kondiviża, jiġifieri fi sħubija mal-Istati Membri. Għaldaqstant, il-ġestjoni kondiviża ser issir il-mekkaniżmu ewlieni tal-għoti ta' fondi għall-politiki kollha fil-qasam tal-affarijiet interni, fosthom għas-sigurtà interna. Madanakollu, din mhijiex ser tkun biss kontinwazzjoni tas-sistema ta' ġestjoni kondiviża li tinsab fis-seħħ bħalissa iżda ser tkun tiffoka iżjed fuq ġestjoni kondiviża orjentata lejn ir-riżultati u ssimplifikata.

Il-ġestjoni diretta u indiretta ser tibqa' tintuża għall-assistenza teknika, għal proġetti tranżnazzjonali speċifiċi jew proġetti partikolarment innovattivi u għall-parti l-kbira tal-azzjonijiet f'pajjiżi terzi jew li jirrigwardawhom, u kif ukoll biex jingħata appoġġ li atturi mhux statali, bħall-promozzjoni ta' avvenimenti u studji u għar-rilaxx mgħaġġel ta' fondi fil-każ ta' emerġenzi.

Matul il-konsultazzjoni pubblika dwar il-ġejjieni tal-finanzjament tal-affarijiet interni, il-partijiet interessati ressqu talbiet għas-simplifikazzjoni u l-aċċess aktar faċli għall-fondi. Dawn it-talbiet ingħataw kont tagħhom fit-tfassil tal-Fondi l-ġodda għall-affarijiet interni. Fir-riżoluzzjoni tiegħu tat-8 ta' Ġunju tal-2011, il-Parlament Ewropew laqa' tajjeb l-intenzjoni tal-Kummissjoni li tnaqqas l-għadd ta' strumenti finanzjarji għall-affarijiet interni għal struttura ta' Fondi mibnija fuq żewġ fergħat u fejn huwa possibbli li tintuża l-ġestjoni kondiviża, għaliex jemmen li dan l-approċċ jikkontribwixxi b'mod sinfikanti għal aktar simplifikazzjoni, razzjonalizzazzjoni, konsolidazzjoni u trasparenza fil-finanzjament tal-affarijiet interni[13].

Arranġamenti b'saħħithom għall-monitoraġġ u l-evalwazzjoni huma essenzjali sabiex sabiex ikun jista' jitkejjel il-progress li jkun sar fl-implimentazzjoni tal-Fondi. Madanakollu, il-migrazzjoni u s-sigurtà huma oqsma li ma tantx jistgħu jitkejlu skont id-definizzjoni u l-użu ta' indikaturi preċiżi għaliex essenzjalment dawn huma miftuħa għal fatturi esterni u għaldaqstant huwa diffiċli li jiwettaq il-monitoraġġ tagħhom. Pereżempju, l-għadd ta' applikanti għall-ażil li jaslu fl-UE jiddependi fuq l-instabbiltà politika f'pajjiżi terzi u huwa diffiċli li jsir kejl dwar id-daqs tal-immigrazzjoni irregolari minħabba n-natura klandestina tagħha. Għaldaqstant, il-livelli tal-infiq fl-oqsma tal-migrazzjoni u s-sigurtà ma għandhomx ikunu jiddependu fuq dejta numerika li mhux bilfors tkun tirrefletti s-sitwazzjoni fil-post jew li tintlaqat minn fatturi esterni. Għal din ir-raġuni, l-arranġamenti ta' evalwazzjoni u monitoraġġ li ġew proposti għaż-żewġ Fondi huma msejsa fuq valutazzjonijiet kwantitattivi u kwalitattivi (fosthom valutazzjonijiet tar-riskju) li jqisu firxa sħiħa ta' indikaturi.

3.1.1. Il-ġestjoni kondiviża

Għal dawk ir-riżorsi implimentati b'ġestjoni kondiviża, huma meħtieġa pprogrammar flessibbli u ċiklu ta' rappurtar li jiżguraw li l-programmi nazzjonali tal-Istati Membri jkunu allinjati mal-prijoritajiet u l-għanijiet fil-livell tal-UE.

Il-Kummissjoni qiegħda tipproponi li minflok is-sistema attwali ta' programmar annwali fi ħdan qafas multiannwali konformi mal-prijoritajiet politiċi mfissra b'mod wiesa' jintuża programmar multiannwali ppreċedut minn 'djalogu dwar il-politika'. Fil-bidu tal-Qafas Finanzjarju Multiannwali li jmiss, il-Kummissjoni ser tiftaħ djalogu dwar il-politika wieħed f'livell għoli dwar il-finanzjament għall-affarijiet interni mal-Istati Membri individwali u, fil-każ ta' xi partijiet tal-Fond għas-Sigurtà Interna, mal-istati assoċjati ta' Schengen, qabel in-negozjati dwar il-programmi multiannwali tagħhom. Billi jinvolvi l-awtorità ċentrali responsabbli ta' kull Stat parteċipanti u jiffoka dwar kif il-fondi tal-UE ser jintużaw biex jingħata kontribut għall-ksib tal-għanijiet kollha tal-UE fil-qasam tal-affarijiet interni, id-djalogu dwar il-politika ser iwassal għal enfasi aħjar fuq l-għanijiet, ir-riżultati u l-impatti (u mhux fuq l-inputs u l-outputs). Il-Kummissjoni ser tinforma lill-Parlament Ewropew bir-riżultat ta' dan id-djalogu.

Bħala regola, it-tqassim ta' fondi bejn l-Istati Membri ser ikun ibbażat fuq taħlita bejn ammont bażiku u ieħor flessibbli. L-ammont bażiku, ikkalkolat abbażi ta' kriterji oġġettivi u l-ħtiġijiet tal-Istati Membri, ser jiġi allokat lill-Istati Membri fil-bidu tal-Qafas Finanzjarju Multiannwali li jmiss. Dan ser jiżgura l-kontinwità tal-finanzjament u lill-Istati Membri jagħtihom il-prevedibbiltà li għandhom bżonn biex jippjanaw il-programmi nazzjonali tagħhom b'mod xieraq. L-ammont bażiku ser jinżied b'ammont flessibbli li jiddependi fuq ir-rieda ta' kull wieħed mill-Istati Membri li, fil-kuntest tal-programm nazzjonali tiegħu, jiffinanzja azzjonijiet li jwieġbu għal prijoritajiet speċifiċi tal-UE (u li għandha ssir distinzjoni bejniethom u bejn l-'azzjonijiet tal-Unjoni' b'ġestjoni ċentralizzata). Il-finanzjament jiġi allokat f'żewġ fażijiet, matul id-djalogu dwar il-politika fil-bidu tal-Qafas Finanazjarju Multiannwali u wara li ssir analiżi ta' nofs it-terminu fl-2017. Il-pakkett li twarrab għal attivitajiet ta' risistemazzjoni u/jew rilokazzjoni taħt il-Fond għall-Ażil u l-Migrazzjoni ser jitqassam bejn l-Istati Membri abbażi ta' eżerċizzju fejn jiġu mwiegħda fondi kull sentejn.

B'kunsiderazzjoni tar-riżultati ta' dawn id-djalogi dwar il-politika, il-programmi multiannwali nazzjonali ser jiddeskrivu s-sitwazzjoni bażi; jistabbilixxu l-għanijiet ġenerali li l-Istati Membri jixtiequ jiksbu fil-qasam tal-affarijiet interni u l-għanijiet speċifiċi li bi ħsiebhom jiksbu mir-riżorsi tal-Fond. Għal dawn l-għanijiet, il-programm ser jidentifika miri u eżempji ta' azzjonijiet ewlenin. Barra minn hekk, pjan finanzjarju ser jindika kif ir-riżorsi allokati ser jiġu impenjati u minfuqa fuq il-perjodu ta' seba' snin kollu.

Sabiex jiġi vvalutat il-progress, l-Istati Membri ser ikollhom jirrappurtaw kull sena dwar ir-riżultati li jinkisbu fil-programmi tagħhom u dwar il-ġestjoni finanzjarja. Il-djalogu ta' politika jitkompla fiċ-ċirkostanza li Stat Membru jitlob li jsir tibdil fuq il-programm multiannwali tiegħu. L-analiżi ta' nofs it-terminu li ser issir fl-2017 ser tkun l-okkazjoni biex terġa ssir eżaminazzjoni tas-sitwazzjoni fl-Istati Membri, it-twettiq tal-programmi sa dak iż-żmien, u biex jiġu allokati riżorsi ġodda għall-aħħar tliet snin tal-Qafas Finanzjarju Multiannwali li jmiss (2018-2020). Dawn ir-riżorsi addizzjonali ser ikunu disponibbli b'kunsiderazzjoni għall-valutazzjoni tar-riskji/ħtiġijiet u/jew tibdil fil-prijoritajiet tal-UE. Il-Kummissjoni ser tinforma lill-Parlament Ewropew dwar tibdil sinifikati fuq il-programmi multiannwali u dwar il-progress li jsir fl-implimentazzjoni tal-programmi b'mod ġenerali.

Is-sistemi ta' ġestjoni u kontroll li għandhom jitwaqqfu mill-Istati parteċipanti għandhom jiġu ssimplifikati. F'konformità mal-verżjoni riveduta tar-Regolament Finanzjarju, dawn ser ikollhom l-għan li jsaħħu l-obbligi ta' rendikont billi r-responsabbiltà mill-ġestjoni finanzjarja tingħata lil awtorità waħda, jitnaqqas l-għadd ta' livelli ta' kontroll u jingħata kontribut għall-assigurazzjoni tal-kontijiet, l-iffunzjonar xieraq tas-sistema, il-legalità u r-regolarità ta' tranżazzjonijiet u r-rispett tal-prinċipju ta' ġestjoni finanzjarja tajba.

3.1.2. Il-ġestjoni ċentralizzata (diretta u indiretta)

Il-fondi li ser jingħaddew permezz tal-programmi multiannwali nazzjonali tal-Istati Membri ser jiġu kkumplimentati b'approprjazzjonijiet allokati għal attivitajiet immexxija mill-politika u li għandhom jiġu ġestiti b'ġestjoni diretta u indiretta.

L-azzjonijiet eliġibbli huma definiti b'mod wiesa' sabiex jipprovdu għal firxa ta' għodod għal koordinazzjoni tat-tfassil u l-koordinazzjoni tal-politika. L-hekk imsejħa 'Azzjonijiet tal-Unjoni' ser jipprovdu appoġġ għal azzjonijiet tranżnazzjonali, partikolarment għal azzjonijiet innovattivi u għall-parti l-kbira tal-azzjonijiet f'pajjiżi terzi jew relatati magħhom (id-dimensjoni esterna). Ser ikun jista' jingħata finanzjament ukoll għal azzjonijiet ta' emerġenza implimentati permezz ta' mekkaniżmu rapidu ta' emerġenza, biex jingħata appoġġ lil netwerks bħan-Netwerk Ewropew dwar il-Migrazzjoni, assistenza teknika, studji u avvenimenti, kif ukoll l-iżviluppar, taħt ir-responsabbiltà tal-Kummissjoni, ta' sistemi ġodda tal-IT għall-ġestjoni ta' flussi migratorji bejn il-fruntieri esterni tal-Unjoni.

Dawn l-allokazzjonijiet ser jitqiesu bħala pakkett wieħed, bil-għan li jintefqu skont l-iżviluppi ta' politika jew is-sitwazzjoni fi Stati Membri jew f'pajjiżi terzi. Għaldaqstant huwa possibbli li f'sena partikolari l-pakkett kollu jintefaq biss fuq tip wieħed ta' azzjonijiet, pereżempju fuq azzjonijiet ta' emerġenza.

Fi żmien meta l-Kummissjoni qiegħda tistenna tnaqqis fir-riżorsi umani u amministrattivi disponibbli għaliha, ser jintużaw ħafna anqas riżorsi fuq sejħiet għal proposti li jitolbu ħafna ħin u ħafna xogħol. Biex tiġi żgurata l-flessibbiltà u l-għoti rapidu u effiċjenti ta' fondi, l-azzjonijiet ta' emerġenza u l-'Azzjonijiet tal-Unjoni' ser jiġu implimentati permezz ta' firxa ta' atturi bħal organizzazzjonijiet internazzjonali (ftehimiet ta' kontribuzzjoni) u organizzazzjonijiet tas-soċjetà ċivili (sħubijiet qafas) jew billi ċerti kompiti jiġu fdati lil aġenziji eżistenti tal-UE bħall-Frontex, il-Europol u l-EASO; filwaqt li dawn tal-aħħar għandhom iżommu f'moħħhom li huma wkoll suġġetti għal tnaqqis tal-persunal.

4. X'tibdil qiegħed isir? L-innovazzjonijiet ewlenin

Fost it-tħassib maġġuri tal-partijiet interessati hemm is-simplifikazzjoni. Il-Programm ta' Stokkolma jsejjaħ biex il-benefiċjarji jkollhom "aċċess aħjar/aktar sempliċi" għal fondi tal-affarijiet interni. Matul il-konsultazzjoni pubblika dwar il-fondi tal-ġejjieni fil-qasam tal-affarijiet interni, il-partijiet interessati enfasizzaw ukoll il-ħtieġa li jitnaqqas il-piż amministrattiv filwaqt li l-proċess jiġi ssimplifikat.

Għaldaqstant saru sforzi konsiderevoli biex jiġi żgurat li l-Fondi l-ġodda jitfasslu b'mod li l-għoti tagħhom ikunu jista' jsir bl-aħjar mod. Din hija r-raġuni għaliex hemm differenzi sinifikanti bejn l-arkitettura u l-qafas regolatorju tal-Fondi l-ġodda u l-organizzazzjoni tal-ġenerazzjoni attwali ta' programmi ta' nfiq fil-qasam tal-affarijiet interni. L-innovazzjonijiet ewlenin huma:

Fond għall-Ażil u l-Immigrazzjoni u l-Fond għas-Sigurtà Interna. It-tnaqqis tal-għadd ta' Fondi tal-affarijiet interni għal żewġ oqfsa finanzjarji komprensivi jiffaċilita approċċ integrat għall-infiq fuq il-migrazzjoni u s-sigurtà, u b'hekk jagħmilha aktar faċli li jiġu ffinanzjati azzjonijiet li jinsabu fuq il-konnessjoni bejn l-istrumenti finanzjarji. Pereżempju, minħabba d-definizzjoni ristretta tal-gruppi fil-mira li jistgħu jibbenefikaw minn assistenza, bħalissa l-appoġġ għat-titjib ta' ċentri ta' akkoljenza u detenzjoni jinsab mifrux bejn il-Fond Ewropew għar-Refuġjati u l-Fond għar-Ritorn, skont it-tip ta' grupp li jkun fil-mira li jibbenefika mit-titjib (applikanti għal ażil jew dawk li jkunu qegħdin jistennew ir-ritorn). Permezz tal-appoġġ għal miżuri bħal dawn flimkien taħt Fond wieħed għall-Ażil u l-Migrazzjoni, jistgħu jinħolqu sinerġiji u fl-aħħar mill-aħħar, ekonomiji tal-kobor. It-tnaqqis tal-għadd ta' programmi ta' nfiq iżid ukoll il-viżibbiltà tal-fondi tal-affarijiet interni u għaldaqstant jiżgura li l-impatti u l-valur miżjud tal-infiq fuq l-affarijiet interni jiġu apprezzati kif xieraq. L-azzjonijiet iffinanzjati mill-Fondi tal-affarijiet interni ser ikollhom l-għan tal-koerenza sħiħa ma' politki oħrajn tal-UE, bħall-politika ta' koeżjoni u l-ġustizzja u ċ-ċittadinanza, u ser jiġu implimentati flimkien mal-assistenza finanzjarja li tingħata permezz ta' strumenti tal-UE li jappoġġjaw dawn il-politiki.

Qafas regolatorju komuni. Sett ta' regoli kondiviż dwar l-ipprogrammar, ir-rappurtar, il-ġestjoni finanzjarja, il-kontrolli u l-evalwazzjoni ser jiġġenera komprensjoni aħjar tar-regoli mill-partijiet interessati kollha u ser jiżgura grad ogħla ta' koerenza u konsistenza. Il-koerenza ser tissaħħaħ ukoll permezz tal-allinjament tal-qafas regolatorju tal-Fondi tal-affarijiet interni mar-Regolament Finanzjarju rivedut, ir-regoli ta' implimentazzjoni u r-regoli li ser japplikaw għal strumenti oħrajn tal-UE b'ġestjoni kondiviża, partikolarment dawk koperti mill-Qafas Strateġiku Komuni.

Djalogu dwar il-politika għal ġestjoni kondiviża mtejba u orjentata lejn ir-riżultati. Il-qalba, b'ġestjoni kondiviża, lejn programmar multiannwali bi djalogu dwar il-politika f'livell għoli ser tiżgura li l-programmi nazzjonali tal-Istati Membri jkunu allinjati bis-sħiħ tal-għanijiet u l-prijoritajiet ta' politika tal-UE u tiffoka fuq il-ksib ta' riżultati u impatti. Il-fatt li l-programmi annwali ser jitwaqqfu ser inaqqas b'mod sinfikanti l-piż amministrattiv għall-Kummissjoni, l-Istati Membri u l-benefiċjarji. It-tqassim ta' approprjazzjonijiet bejn l-Istati Membri abbażi ta' taħlita ta' ammonti bażiċi u flessibbli ser ilaqqa' l-bżonn għal kontinwità u stabbiltà mal-bżonn għal flessibbiltà u adattament għat-tibdil li jsir.

Dimensjoni esterna. Il-komponenti tad-dimensjoni esterna f'kull Fond ser jagħtu l-mezzi lill-UE biex twettaq ħidma u tikseb il-prijoritajiet ta' politika tal-UE fil-qasam tal-affarijiet interni u primarjament ser jaqdu l-interessi u l-għanijiet tal-UE. Dawn ser jappoġġjaw azzjonijiet f'pajjiżi terzi li jkollhom impatt dirett fl-UE u fl-Istati Membri tagħha. Billi tiġi żgurata l-kontinwità tal-finanzjament, b'bidu fl-UE li jibqa' għaddej f'pajjiżi terzi u viċi versa, l-aspetti interni u esterni tal-ġestjoni tal-migrazzjoni u tas-sigurtà interna ser jiġu indirizzata b'mod aktar koerenti, pereżempju, fir-rigward tar-risistemazzjoni ta' refuġjati, l-implimentazzjoni ta' ftehimiet ta' riammissjoni, il-programmi ta' protezzjoni reġjonali, kif ukoll il-kooperazzjoni ma' pajjiżi terzi fil-ġlieda kontra t-traffikar tal-bnedmin, il-prevenzjoni tat-terroriżmu u t-tisħiħ tal-fruntieri esterni. Għajr għal xi azzjonijiet speċifiċi, partikolarment il-Fond għall-Migrazzjoni u l-Ażil, dawn l-attivitajiet ser jiġu implimentati mill-Kummissjoni (ġestjoni ċentralizzata) fi sħubija ma' pajjiżi terzi u ma' organizzazzjonijiet internazzjonali ewlenin u b'koerenza u kumplimentarità sħaħ mal-politika barranija tal-Unjoni u mal-fondi pprovvduti permezz ta' programmi ta' għajnuna esterna tal-UE. L-istrumenti ta' għajnuna esterna tal-UE ser jibqgħu l-għajn ewlenija ta' finanzjament biex pajjiżi terzi jiġu megħjuna jibnu l-kapaċitajiet fl-oqsma tal-migrazzjoni u s-sigurtà.

Użu aħjar tal-għarfien espert tal-aġenziji responsabbli mill-affarijiet interni. L-aġenziji responsabbli mill-affarijiet interni għandhom rwol importanti billi jagħtu appoġġ prattiku bejn l-Istati Membri. Biex il-kompetenzi u l-għarfien espert tal-aġenziji tal-affarijiet interni jintużaw b'mod aktar effettiv, il-Kummissjoni qiegħda tipprevedi l-użu tal-possibbiltà offruta mir-Regolament Finanzjarju biex l-aġenziji jiġu fdati b'kompiti speċifiċi fil-qafas tal-missjonijiet tagħhom, b'konformità mal-bażijiet legali tagħhom u flimkien mal-programmi ta' ħidma tagħhom. Dan ikun il-każ għal azzjonijiet li huma ta natura ad hoc u fejn l-implimentazzjoni tajba tagħhom tiddependi fuq l-għarfien espert operazzjonali u tekniku ta' dawn l-aġenziji. Dan isir bla ħsara għat-tnaqqis globali ta' persunal li huwa mbassar.

Reazzjoni effettiva u rapida għall-kriżijiet. L-avvenimenti reċenti fl-Afrika ta' Fuq juru kemm huwa importanti li l-UE tkun tista' tirreaġixxi malajr u b'mod effettiv f'sitwazzjonijiet ta' kriżi li jevolvu b'mod mgħaġġel. Il-mekkaniżmu ta' reazzjoni ta' emerġenza fiż-żewġ Fondi ser jippermetti lill-UE li twieġeb b'mod xieraq għal flussi migratorji mħallta u għal kriżijiet fil-qasam tas-sigurtà interna, bħal attakki terroristiċi u attakki ċibernetiċi. Il-proċeduri mgħaġġla ser jiżguraw li l-fondi jkunu jistgħu jiġu rrilaxxati fi ftit jiem. Fil-qafas tal-ġestjoni kondiviża, l-Istati Membri għandhom ukoll il-possibbiltà li jinkludu ammont ta' riżerva għal ċirkostanzi li ma jkunux ġew previsti fil-programm multiannwali tagħhom. L-Istatu Membru jintalab jinnotifika lill-Kummissjoni dwar l-intenzjoni tiegħu li juża din ir-riżerva iżda ma tkun meħtieġa l-ebda reviżjoni tal-programm multiannwali, u b'hekk ikun hemm aktar flessibbiltà fl-eventwalità ta' kriżi.

Anness 1

L-arkitettura legali taż-żewġ Fondi

Skont it-Trattat, huma meħtieġa erba' proposti leġiżlattivi li jistabbilixxu żewġ Fondi li jkunu jistgħu jkopru l-għanijiet ta' politika tal-migrazzjoni u s-sigurtà b'manjiera komprensiva, u biex il-ħidma taż-żewġ Fondi tintrifed b'mod xieraq permezz ta' qafas komuni u sempliċi.

Bil-kontra tal-Fond għall-Ażil u l-Migrazzjoni, li huwa stabbilit permezz ta' Regolament wieħed, il-kriterju tal-Fond għas-Sigurtà Interna jirrekjedi l-adozzjoni ta' żewġ strumenti leġiżlattivi. Dan jgħodd għad-dispożizzjonijiet tat-Trattat li japplikaw għall-qasam tal-affarijiet interni, partikolarment regoli differenti dwar l-voti li jittieħdu fil-Kunsill u li huma msejsa fuq il-ġeometrija varjabbli skont il-Protokolli 19 (dwar l-acquis ta' Schengen), 21 (il-pożizzjoni tar-Renju Unit u l-Irlanda fil-qasam tal-Libertà, is-Sigurtà u l-Ġustizzja) u 22 (dwar il-pożizzjoni tad-Danimarka, fosthom fir-rigward tat-Titolu V, parti tlieta tat-Trattat).

Għaldaqstant il-Fond għas-Sigurtà Interna nħoloq bħala qafas ta' finanzjament komprensiv li huwa magħmul minn żewġ atti separati, li jistabbilixxi l-komponenti differenti tal-Fond u li jistabbilixxi l-għanijiet, l-azzjonijiet eliġibbli u l-pakketti għal kull komponent:

· Regolament li jistabbilixxi, bħala parti mill-Fond tas-Sigurtà Interna, l-istrument għal appoġġ finanzjarju tal-kooperazzjoni bejn il-pulizija, il-prevenzjoni u l-ġlieda kontra l-kriminalità, u l-ġestjoni ta' kriżijiet;

· Regolament li jistabbilixxi, bħala parti mill-Fond tas-Sigurtà Interna, strument għall-appoġġ finanzjarju għall-fruntieri esterni u l-viża.

Kemm jista' jkun possibbli dawn iż-żewġ Fondi għandhom jaħdmu permezz ta' mekkaniżmi identiċi fir-rigward tat-twettiq u jkollhom struttura li kemm jista' jkun tixbah lil strumenti finanzjarji oħrajn tal-UE b'ġestjoni kondiviża, partikolarment il-fondi koperti mill-Qafas Strateġiku Komuni. Dan jinkiseb permezz tal-ħolqien ta' strument orizzontali, applikabbli għall-Fond għall-Ażil u l-Migrazzjoni u għaż-żewġ komponenti kollha tal-Fond għas-Sigurtà Interna (kemm b'mod dirett jew b'kontroreferenzi), li jistabbilixxi r-regoli dwar l-ipprogrammar, il-ġestjoni u l-kontroll, ir-rappurtar u l-evalwazzjoni tal-ġestjoni finanzjarja. Dan ser jipprovdi wkoll għall-ħolqien ta' Kumitat komuni.

Il-ħolqien ta' dan l-istrument komuni jippreżenta tliet vantaġġi distinti. L-ewwel, jevita d-duplikazzjoni u jnaqqas b'mod sinifikanti l-għadd ta' dispożizzjonijiet (li mingħajru jkunu l-istess u paralleli ma' xulxin) fiż-żewġ Fondi. It-tieni, jikseb simplifikazzjoni u konsistenza għaliex l-istess regoli jkunu japplikaw għall-benefiċjarji kollha, indipendentement minn liema strument tal-affarijiet interni jkun ġej il-finanzjament, u għalhekk jiffaċilita l-komprensjoni tal-Fondi u l-aċċess għalihom. It-tielet, il-ħolqien ta' Kumitat komuni għaż-żewġ Fondi ser jinkoraġġixxi lil kull Stat parteċipanti biex jaħtar interlokutur wieħed għall-politika kollha fil-qasam tal-affarijiet interni.

[1]               Id-dokument tal-Kunsill 17024/09 tal-1 u t-2 ta' Diċembru tal-2009

[2]               COM(2010) 171 finali tal-20 ta' April tal-2010

[3]               ĠU 2008 C115 tad-9 ta' Mejju tal-2008

[4]               COM(2010)673 finali tat-22 ta’ Novembru tal-2010

[5]               COM(2011)500 finali tad-29 ta’ ta' Ġunju tal-2011

[6]               COM(2010)2020 finali tat-3 ta' Marzu tal-2010

[7]               L-Uffiċċju Ewropew tal-Pulizija (EUROPOL), il-Kulleġġ Ewropew tal-Pulizija (CEPOL), l-Aġenzija Ewropea għall-Ġestjoni tal-Kooperazzjoni Operazzjonali fil-Fruntieri Esterni (FRONTEX), l-Uffiċċju Ewropew ta' Appoġġ fil-Qasam tal-Ażil (EASO), iċ-Ċentru Ewropew għall-Monitoraġġ tad-Droga u d-Dipendenza fuq id-Droga (EMCDDA)

[8]               COM(2010) 673 finali tat-22 ta’ Novembru tal-2010

[9]               COM(2011) 403 finali tad-29 ta’ ta' Ġunju tal-2011

[10]             Għar-raġunijiet stabbiliti fl-Anness 1, il-Fond għas-Sigurtà Interna qiegħed jitwaqqaf permezz ta' żewġ strumenti separati li flimkien jikkostitwixxu l-Fond.

[11]             COM(2011) 429 finali tat-13 ta' Lulju tal-2011

[12]             COM(2011) 630 finali tal-25 ta’ Ottubru tal-2011

[13]             P7_TA(2011)0266 tat-8 ta' Ġunju tal-2011