7.7.2012   

MT

Il-Ġurnal Uffiċjali tal-Unjoni Ewropea

CE 199/90

—

wara li kkunsidra l-Artikolu 314 tat-Trattat dwar il-Funzjonament tal-Unjoni Ewropea,

—

wara li kkunsidra l-Ftehim Interistituzzjonali tas-17 ta’ Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-amministrazzjoni finanzjarja tajba (1),

—

wara li kkunsidra d-Deċiżjoni tal-Kunsill 2007/436/KE, Euratom tas-7 ta’ Ġunju 2007 dwar is-sistema tar-riżorsi proprji tal-Komunitajiet Ewropej (2),

—

wara li kkunsidra r-Regolament tal-Kunsill (KE, Euratom) Nru 1605/2002 tal-25 ta’ Ġunju 2002 rigward ir-Regolament Finanzjarju applikabbli għall-baġit ġenerali tal-Komunitajiet Ewropej (3),

—

wara li kkunsidra r-rapport annwali tal-Qorti tal-Awdituri dwar l-implimentazzjoni tal-baġit għas-sena finanzjarja 2009, flimkien mat-tweġibiet tal-istituzzjonijiet li jkunu qed jiġu verifikati (4),

—

wara li kkunsidra l-Artikoli 23(7) u 79 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Baġits (A7-0049/2011),

A.

billi s-sitwazzjoni finanzjarja, ekonomika u soċjali attwali tal-UE tobbliga lill-istituzzjonijiet jirreaġixxu bil-kwalità u l-effiċjenza meħtieġa u li jimpjegaw proċeduri ta’ ġestjoni stretti sabiex jinkiseb l-iffrankar,

B.

billi l-istituzzjonijiet għandhom ikunu pprovduti b’riżorsi biżżejjed, għalkemm fil-kuntest ekonomiku attwali dawn ir-riżorsi għandhom jiġu ġestiti b’rigorożità u b’effiċjenza,

C.

billi f’dan l-istadju tal-proċedura annwali, il-Parlament qed jistenna l-estimi tal-istituzzjonijiet l-oħra u l-proposti tal-Bureau tiegħu stess għall-Baġit 2012,

D.

billi huwa partikolarment mixtieq li l-Kumitat għall-Baġits u l-Bureau jkomplu bil-kooperazzjoni msaħħa bejn iż-żewġ korpi għar-raba’ sena fl-2012, matul il-proċedura baġitarja,

E.

billi, skont l-Artikolu 23 tar-Regoli ta’ Proċedura tal-Parlament, il-Bureau huwa responsabbli sabiex jieħu deċiżjonijiet finanzjarji, organizzattivi u amministrattivi dwar l-organizzazzjoni interna tal-Parlament u l-Kumitat għall-Baġits huwa responsabbli biex jistabbilixxi l-abbozz tal-estimi baġitarji tal-Parlament fil-kuntest tal-proċedura annwali,

F.

billi l-impatt tad-dħul fis-seħħ tat-Trattat ta’ Lisbona fir-rigward tal-intestatura 5 għandu jistabilizza fl-2012, għalkemm, pereżempju, l-SEAE se jkollu impatt li għadu diffiċli biex jiġi kkwantifikat f’dan l-istadju,

G.

billi, bl-adeżjoni tal-Kroazja ppjanata għall-2013, it-tkabbir se jkollu impatt fuq il-baġit għall-2012, partikolarment fir-rigward tar-riżorsi għall-Membri l-ġodda u r-reklutaġġ tal-persunal,

H.

billi fis-snin li għaddew l-awtorità baġitarja qablet li tieħu approċċ prudenti dwar in-nefqa amministrattiva, biex b’hekk jitħalla marġini sinifikanti taħt il-limitu massimu tal-intestatura 5,

I.

billi l-limitu massimu għall-intestatura 5 tal-qafas finanzjarju pluriennali (MFF) għall-baġit tal-UE fl-2012 huwa ta’ EUR 8 754 miljun (li jirrappreżenta żieda ta’ EUR 340 miljun, jew 4 %, meta mqabbel mal-2011, inkluż 2 % għall-inflazzjoni),

J.

billi, fil-kapaċità tiegħu bħala kolegiżlatur, il-Parlament iddeċieda li jsib ekwilibriju raġonevoli bejn ir-riżorsi umani u l-kompetenzi ġodda tiegħu wara d-dħul fis-seħħ tat-Trattat ta’ Lisbona (19,67 % tat-total tal-intestatura 5 fl-2009, 19,99 % fl-2010 u 20,03 % fl-2011),

K.

billi huwa essenzjali li l-movimenti fl-infiq tal-intestatura 5 jkunu sorveljati matul l-2011, sabiex tinħoloq previżjoni adegwata għall-baġits li jmiss,

L.

billi permezz ta’ deċiżjoni tal-24 ta’ Marzu 2010, il-Bureau adotta strateġija dwar il-bini tal-Parlament fuq perjodu ta’ żmien medju, li tistabbilixxi xi parametri fundamentali għall-politika tal-proprjetà tiegħu għall-ġejjieni; billi, bħala parti minn din l-istrateġija, il-Parlament iddeċieda li jkompli jagħti prijorità lix-xiri ta’ bini (meta jkun raġonevoli), filwaqt li jiffoka fuq il-konċentrazzjoni ġeografika fil-postijiet tax-xogħol tiegħu; billi ħlas bikri, bil-għan li jitnaqqsu l-ispejjeż ta’ finanzjament, jibqa’ waħda mill-prijoritajiet ewlenin għall-ġejjieni,

1.

Jenfasizza s-sitwazzjoni diffiċli fir-rigward tal-limitu massimu tan-nefqa tal-intestatura 5 għall-2012 u huwa kompletament konxju mill-fatt li l-istituzzjonijiet jistgħu jiltaqgħu ma’ problemi biex jirrikonċiljaw ir-rekwiżiti kollha ta’ finanzjament filwaqt li jżommu d-dixxiplina baġitarja u l-awtokontroll sabiex ikun hemm konformità mal-qafas finanzjarju pluriennali;

2.

Jistabbilixxi l-prinċipju ta’ eċċellenza leġiżlattiva, bħala prijorità, biex tkun żgurata reazzjoni xierqa għall-isfidi politiċi attwali, li jirrikjedu l-konsolidazzjoni tar-riżorsi meħtieġa biex jiġi indirizzat il-qafas istituzzjonali ġdid li jirriżulta mid-dħul fis-seħħ tat-Trattat ta’ Lisbona; hu tal-fehma li l-baġit tal-Parlament u tal-istituzzjonijiet l-oħra għall-2012 għandu jkun baġit ta’ konsolidazzjoni, għaliex jista’ jservi wkoll bħala referenza għall-qafas finanzjarju multiannwali li jmiss;

3.

Jirrimarka li dan l-isforz għall-konsolidazzjoni m’għandux iwaqqaf l-investimenti (eż. fit-teknoloġija) li jwasslu għal frankar fit-tul fil-ġejjieni;

4.

Iqis bħala prijorità oħra l-prinċipji ta’ amministrazzjoni tajba (l-Artikolu 27 tar-Regolament Finanzjarju), jiġifieri l-ekonomija, l-effiċjenza u l-effikaċità; hu tal-fehma li dawn il-prinċipji għandhom ikunu riflessi b’mod ċar, fl-ispirtu ta’ responsabilità, fil-baġits tal-Parlament u tal-istituzzjonijiet l-oħra, kif ukoll fil-kulturi organizzattivi tagħhom; jemmen, għaldaqstant, li fl-implimentazzjoni tal-politiki varji għandhom jitqiesu r-riżultati miksuba u li l-ispejjeż varjabbli għandhom, kull meta jkun possibbli u meta l-iskala tagħhom tirrikjediha, jiġu soġġetti għal evalwazzjonijiet regolari tal-ispejjeż meta mqabbla mal-benefiċċji;

5.

Jemmen li, minħabba l-implimentazzjoni ta’ dawn il-prinċipji, l-istituzzjonijiet għandhom jippreżentaw pjanijiet biex jitqaċċtu l-ispejjeż; hu tal-fehma, f’dan ir-rigward, li għandhom jiġu eżaminati l-vantaġġi taċ-ċentralizzazzjoni, sabiex jinħolqu ekonomiji ta’ skala (eż: akkwist ċentralizzat, servizzi konġunti bejn l-istituzzjonijiet), kif ukoll dak li għandu jibqa’ jew jiġi deċentralizzat;

6.

Jemmen li l-preċiżjoni, is-sempliċità, iċ-ċarezza u t-trasparenza għandhom ikunu r-riżultat tal-implimentazzjoni tal-prinċipji ta’ amministrazzjoni tajba; jitlob, f’dan ir-rigward, li titressaq organigramma għal kull istituzzjoni, flimkien mal-ispejjeż rispettivi ta’ kull unità kostitwenti; jitlob, barra minn hekk, li kull spiża tkun speċifikata u ġustifikata b’mod ċar, b’distinzjoni ċara bejn l-ispejjeż fissi u varjabbli sabiex jitwettaq il-prinċipju ta’ politika baġitarja b’bażi żero;

7.

Iqis li, sa mhux aktar tard mill-qafas finanzjarju pluriennali li jmiss, il-baġit tal-Parlament u l-baġits tal-istituzzjonijiet l-oħra għandhom ikunu r-riżultat ta’ ppjanar pluriennali li jkopri t-tul tal-qafas;

8.

Jirrimarka li għandhom isiru t-tħejjijiet meħtieġa fil-livell interistituzzjonali sabiex ikun akkomodat il-persunal mill-Kroazja fil-prospettiva ta’ tkabbir possibbli tal-UE;

9.

Hu tal-fehma li l-Parlament u l-istituzzjonijiet l-oħra għandhom iressqu rapporti biannwali dwar l-implimentazzjoni tal-baġits tagħhom, waqt li jagħtu dettalji dwar l-implimentazzjoni ta’ kull linja baġitarja;

10.

Hu tal-fehma li l-politika ambjentali u l-EMAS (5) għandhom ikunu parti mill-kulturi tal-Parlament u l-istituzzjonijiet l-oħra u li, għal dan il-għan, għandhom jiġu ppreżentati miżuri għat-tnaqqis tal-konsum ta’ karti, enerġija, ilma u emissjonijiet;

11.

Itenni li l-kooperazzjoni interistituzzjonali, kull meta possibbli u xierqa, hi essenzjali sabiex ikun hemm skambju tal-aħjar prattiki li jiffavorixxi l-effikaċità u jippermetti l-iffrankar; iqis li l-kooperazzjoni interistituzzjonali għandha tittejjeb fir-rigward tat-traduzzjoni, l-interpretazzjoni, ir-reklutaġġ (EPSO) u l-EMAS u għandha tiġi estiża għal oqsma oħra; jitlob li jkun hemm rieżami bir-reqqa tal-esternalizzazzjoni tat-traduzzjonijiet u r-rwol taċ-ċentru ta’ traduzzjoni;

12.

Ifakkar fil-ħtieġa ta’ sistema integrata bis-sħiħ tal-ġestjoni tal-għerf; jilqa’ l-informazzjoni pprovduta mill-Amministrazzjoni rigward is-sistema tal-ġestjoni tal-għerf; jitlob rapport ta’ progress dwar l-għadd kbir ta’ sorsi/sistemi ta’ informazzjoni disponibbli għall-Membri; jitlob li jiġi stabbilit kalendarju ċar għat-tfassil ta’ prototip; jisħaq fuq il-ħtieġa ta’ implimentazzjoni rapida ta’ politika dwar il-klassifikazzjoni u indiċjar; jirrikjedi informazzjoni dwar kif din is-sistema tista’ ssir faċilment aċċessibbli għaċ-ċittadini Ewropej;

13.

Jenfasizza li huwa importanti li l-Parlament Ewropew u l-istituzzjonijiet l-oħra, jadottaw strateġija diġitali ambizzjuża u b’ambitu estensiv, b’mod partikolari fir-rigward tal-għodda tal-Web 2.0 u n-netwerks soċjali, sabiex tissaħħaħ ir-rabta bejn l-Ewropa u ċ-ċittadini tagħha; iqis ukoll li l-Parlament u l-istituzzjonijiet l-oħra għandhom jiżviluppaw strateġija ta’ governanza elettronika; jitlob li t-teleworking jintuża kull fejn ikun xieraq; jitlob lill-Bureau jikkunsidra l-introduzzjoni ta’ sistema “cloud computing” biex jitnaqqsu l-ispejjeż operattivi tas-sistema informatika, jittejjeb ir-rendiment tagħha u tiġi introdotta mobilità ikbar fil-ħidma tal-Parlament;

14.

Jenfasizza li d-dikjarazzjonijiet finanzjarji u tipi simili ta’ analiżijiet tal-ispejjeż huma tal-akbar importanza għat-teħid tad-deċiżjonijiet fl-istituzzjoni; jinsisti li dawn għandhom jintużaw b’mod sistematiku u għandhom jidentifikaw l-ispejjeż rikorrenti u ta’ darba (i.e. spejjeż fissi u spejjeż varjabbli) li huma direttament marbuta ma’ kull miżura speċifika;

15.

Jitlob li jsiru użu mir-riallokazzjoni tal-persunal u t-taħriġ mill-ġdid sabiex tissaħħaħ il-mobilità; jirrakkomanda li persunal ġdid jiġi reklutat biss wara li l-proċeduri interni ta’ riallokazzjoni tal-persunal u ta’ taħriġ ikunu fallew u fejn l-għażla ta’ akkwist ta’ servizzi esterni ma tkunx xierqa;

16.

Hu tal-fehma li strateġija konġunta u koordinata għall-implimentazzjoni baġitarja għandha tkun miftiehma bejn l-istituzzjonijiet kollha affettwati mill-adeżjoni tal-Kroazja; jitlob li ssir stima tal-implikazzjonijiet għall-intestatura 5;

17.

Jemmen li l-istituzzjonijiet kollha għandu jkollhom politiki attivi kontra d-diskriminazzjoni u għandhom jadattaw u l-politiki tagħhom dwar il-bini u r-riżorsi umani sabiex jiżguraw aċċess iktar faċli għall-persuni b’diżabilità;

18.

Jenfasizza li, f’kuntest ta’ kriżi ekonomika, il-piż tqil tad-dejn pubbliku u t-trażżin fi żminijet l-isforzi ta’ konsolidazzjoni baġitarja nazzjonali li attwalment għaddejjin, il-Parlament Ewropew u l-istituzzjonijiet l-oħra għandhom juru responsabilità baġitarja u awtokontroll;

19.

Hu tal-fehma li l-għan tal-Parlament għandu jkun l-iżvilupp ta’ eċċellenza leġiżlattiva u li kull riżorsa meħtieġa għandha tkun disponibbli għal dan l-iskop, filwaqt li jiġu rispettati l-limiti baġitarji;

20.

Jemmen li l-Parlament għandu juri responsabilità baġitarja u awtokontroll billi jibqa’ qrib tar-rata ta’ inflazzjoni; skont l-orjentament interistituzzjonali, il-ħtiġijiet relatati mat-tkabbir għandhom jiġu integrati jew permezz ta’ ittra ta’ emenda jew ta’ baġit emendatorju; anke l-ħtiġijiet għal 18-il Membru tal-PE ġdid b’segwitu għat-Trattat ta’ Lisbona se jiġu intergrati permezz ta’ ittra ta’ emenda jew ta’ baġit emendatorju;

21.

Iqis li r-riżorsi għall-persunal addizzjonali allokati lill-Amministrazzjoni tal-Parlament biex taffronta l-isfidi l-ġodda li jirriżultaw mit-Trattat ta’ Lisbona issa għandhom jidħlu f’fażi ta’ konsolidament; jinsisti li l-istrutturi organizzattivi għandhom ikunu tali li jrawmu l-ħolqien ta’ sinerġiji billi jissejsu fuq il-kompetenza rispettiva tal-unitajiet speċjalizzati eżistenti;

22.

Jinnota li l-baġit tal-Parlament għall-2011 jammonta għal EUR 1 685 miljun, li jirrappreżenta 20,03 % tal-intestatura 5;

23.

Jistenna li l-Bureau jippreżenta talbiet realistiċi meta jiġi biex jippreżenta l-estimi; jinsab lest li jeżamina l-proposti tiegħu bbażati għal kollox fuq il-ħtiġijiet u fuq bażi prudenti sabiex jiġi żgurat funzjonament xieraq u effiċjenti tal-istituzzjoni; jisħaq li l-għan tal-ittra ta’ emenda ppreżentata mill-Bureau lill-Kumitat għall-Baġits f’Settembru hu li jitqiesu ħtiġijiet li ma kinux previsti fiż-żmien meta tfasslu l-estimi, u jisħaq fuq il-fatt li din m’għandhiex titqies bħala opportunità biex jiġġeddu l-estimi li dwarhom kien sar qbil qabel; skont l-orjentament interistituzzjonali, il-ħtiġijiet relatati mat-tkabbir għandhom jiġu integrati jew permezz ta’ ittra ta’ emenda jew ta’ baġit emendatorju; anke l-ħtiġijiet għal 18-il Membru tal-PE ġdid b’segwitu għat-Trattat ta’ Lisbona se jiġu intergrati permezz ta’ ittra ta’ emenda jew ta’ baġit emendatorju;

24.

Jitlob ħarsa ġenerali dettaljata u ċara ta’ dawk il-punti baġitarji li ma kinux implimentati biżżejjed fl-2010 u jistenna bil-ħerqa li janalizza r-raġunijiet għal dan; jixtieq ukoll li jingħata rendikont tat-trasferimenti kollha li tħallew għas-sena ta’ wara u l-użu tagħhom fl-2010, kif ukoll aġġornament dwar id-dħul finali assenjat imqabbel mal-ammonti li ġew ibbaġitjati;

25.

Iqis li l-Membri għandhom jingħataw aċċess għal servizzi ta’ kwalità sabiex ikunu jistgħu jwettqu dmirijithom fuq livell ta’ parità; jenfasizza, għalhekk, l-importanza ta’ trattament ugwali għall-Membri tan-nazzjonalitajiet u l-lingwi kollha fir-rigward tal-possibilità tagħhom li jwettqu dmirijithom u l-attività poltika li hi r-responsabilità tagħhom fil-lingwa tagħhom stess jekk huma hekk jridu; iħoss, pereżempju, li n-nuqqas ta’ interpretazzjoni fil-laqgħat tal-kumitati hu inaċċettabbli; jemmen li hemm bżonn li l-prinċipju ta’ amministrazzjoni finanzjarja soda japplika għall-interpretazzjoni u għat-traduzzjoni wkoll;

26.

Hu wkoll tal-opinjoni li għandu jsir kull sforz sabiex tiżdied il-flessibbiltà fl-interpretazzjoni bħala pass kruċjali biex tiġi żgurata prassi tajba ta’ xogħol u jinnota li, f’ħafna każi, jistgħu jiġu evitati l-problemi u l-ħela finanzjarja jekk ikun hemm il-possibilità li jinbidlu l-lingwi bi preavviż qasir fuq il-bażi tal-attendenza attwali għall-laqgħat, iktar milli fuq il-bażi tal-attendenza ppjanata;

27.

Iħeġġeġ sabiex jiġi implimentat rieżami bir-reqqa dwar jekk id-dritt għal libertà ta’ aċċess għaċ-ċittadini Ewropej biex jiltaqgħu mar-rappreżentanti Ewropej tagħhom jistax jitqabbel b’mod aktar effikaċi mal-ħtieġa urġenti li tiġi provduta sigurtà għal dawk li jaħdmu fl-istituzzjonijiet; jitlob lis-Segretarju Ġenerali jippreżenta rapport ta’ dan it-tip sat-30 ta’ Ġunju 2011;

28.

Hu tal-fehma, kif diġà deċiż, li għandu jiġi implimentat servizz wifi li jiffunzjona bis-sħiħ sabiex jippermetti li jintlaħaq l-għan li jitnaqqas l-użu tal-karti; jikkunsidra li l-użu tal-vidjokonferenzi għal-laqgħat għandu jitħeġġeġ, kif ukoll l-użu ta’ teknoloġiji ġodda li jirrispettaw l-ambjent; jitlob analiżi tal-ispejjeż meta mqabbla mal-benefiċċji ta’ tali miżuri;

29.

Jinnota, f’dak li għandu x’jaqsam mal-politika tal-bini, li l-Parlament qed jirsisti biex jirrazzjonalizza l-allokazzjoni tal-ispazju eżistenti tiegħu u biex jikseb iffrankar ta’ flus u ekonomiji ta’ skala; jieħu nota tal-fatt li l-proġett ta’ estensjoni tal-KAD li jinsab attwalment għaddej, u li l-ispiża tiegħu hi stmata għal madwar EUR 549,6 miljun (skont il-prezzijiet tal-2016), se jippermetti l-konċentrazzjoni ġeografika tal-Amministrazzjoni tal-Parlament fil-Lussemburgu, u li l-bini l-ieħor li bħalissa qed jinkera fil-Lussemburgu gradwalment se jitbattal sabiex b’hekk ikun possibbli iffrankar sostanzjali ladarba l-proġett ikun finalizzat; jiġbed l-attenzjoni għall-fatt li l-finanzjament ta’ dan il-proġett ta’ bini jista’ jirrikjedi t-twaqqif ta’ strutturi legali speċjalizzati (strument bi skopijiet speċjali), peress li r-Regolament Finanzjarju jipprojbixxi s-self dirett, u li l-iffrankar fl-ispejjeż jista’ jinkiseb jekk dan il-proġett kellu jiġi ffinanzjat direttament mill-baġit jew permezz ta’ self dirett, li juri biċ-ċar il-ħtieġa ta’ aġġustamenti għar-Regolament Finanzjarju sabiex tkun garantita implimentazzjoni aktar trasparenti u aktar diretta tal-proġetti ta’ bini fil-futur;

30.

Jilqa’ d-deċiżjonijiet meħuda mill-Bureau fl-24 ta’ Marzu 2010; itenni t-talba tiegħu għall-iżvilupp ta’ strateġija tal-bini fuq żmien medju u fit-tul; hu tal-fehma li din l-istrateġija għandha tkun intenzjonata biex tinstab l-aħjar soluzzjoni, waqt li jitqiesu l-prinċipji ta’ amministrazzjoni tajba u l-ħtieġa li jiġu vvalutati d-diversi għażliet u l-possibilitajiet ta’ finanzjament alternattiv; jiġbed l-attenzjoni għall-proposta fid-deċiżjoni msemmija hawn fuq biex jintuża d-dħul assenjat mill-gvern Belġjan bħala investiment fl-infrastruttura għall-spazju għall-uffiċċji ġdid għall-assistenti tal-Membri tal-PE; jitlob informazzjoni addizzjonali dwar l-użu ta’ dan id-dħul assenjat għat-tali skop, u informazzjoni ddettaljata dwar l-għażliet altarnattivi qabel ma tittieħed kwalunkwe deċiżjoni;

31.

Jenfasizza l-bżonn ta’ aktar informazzjoni dwar id-Dar tal-Istorja Ewropea; b’mod partikolari, jitlob li jiġi ppreżentat pjan kummerċjali dettaljat lill-Kumitat għall-Baġits; itenni l-bżonn li jirċievi informazzjoni dwar il-kost globali ta’ dan il-proġett kif ukoll l-implikazzjonijiet finanzjarji u legali futuri għall-PE u jitlob aktar informazzjoni dwar il-kompetizzjoni għad-disinn arkitettoniku li ilha għaddejja mill-2009; jenfasizza li d-deċiżjonijiet kollha relatati mal-proġett huma suġġetti għall-proċedura parlamentari standard;

32.

Jemmen li, kif inhu l-każ għall-organizzazzjonijiet il-kbar kollha, xi kultant hemm bżonn ta’ perspettiva esterna indipendenti dwar kif qed jintużaw ir-riżorsi u kif inhu organizzat ix-xogħol u li din tista’ tkun ta’ benefiċċju biss jekk tiġi trattata b’mod korrett; filwaqt li jenfasizza li istituzzjoni politika Ewropea bħal ma hu l-Parlament hija unika fin-natura tagħha, iqis li, fit-tul, għandha tingħata kunsiderazzjoni għat-twettiq ta’ tali analiżi esterna tal-organizzazzjoni u l-ġestjoni tiegħu; jemmen li fl-2012 xi setturi speċifiċi jistgħu jkunu identifikati u eżaminati b’dan il-mod;

33.

Jirrimarka li l-politika ta’ informazzjoni u komunikazzjoni tal-Parlament hi importanti u għandha tilħaq liċ-ċittadini Ewropej kollha kif ukoll ittejjeb il-kapaċità taċ-ċittadini li jinteraġixxu direttament mal-Parlament, u għalhekk jitlob li r-riżultati miksuba permezz ta’ din il-politika jiġu evalwati;

34.

Jappoġġa l-isforzi kollha biex ikunu modernizzati s-sistemi informatiċi finanzjarji tal- Parlament;

35.

Jappoġġa bis-sħiħ l-isforzi kollha biex tiġi segwita politika tal-persunal aktar effikaċi u professjonali, inkluż ir-riallokazzjoni tal-persunal fi ħdan u bejn id-direttorati ġenerali;

36.

Iqis li l-azzjoni ta’ segwitu hi importanti fir-rigward ta’ għadd ta’ politiki b’implikazzjonijiet finanzjarji, bħall-EMAS, l-akkwist pubbliku u l-azzjoni meħuda bħala reazzjoni għar-rakkomandazzjonijiet għal kwittanza baġitarja; jenfasizza l-ħtieġa li jkun hemm segwitu u analiżi kontinwi tal-implimentazzjoni tal-baġit min-naħa tal-Parlament b’mod ġenerali;

37.

Hu mħasseb dwar il-proposta li tinħoloq Unità għall-Valutazzjoni tal-Valur Miżjud Ewropew sabiex jiġu kkalkulati l-kosts ta’ nuqqas ta’ intervent Ewropew; jiddubita l-ħtieġa ta’ tali uffiċċju; jitlob informazzjoni aktar dettaljata dwar il-ħolqien ta’ dan l-uffiċċju;

38.

Jitlob għal rikjesti baġitarji realistiċi u bbażati fuq l-ispejjeż mill-istituzzjonijiet l-oħra li jqisu b’mod sħiħ il-ħtieġa li r-riżorsi skarsi jiġu ġestiti bl-aħjar mod possibbli; jilqa’ t-twaqqif tat-Taqsima X ġdida fil-baġit tal-UE dwar is-Servizz Ewropew għall-Azzjoni Esterna, b’allokazzjoni ta’ EUR 464 miljun, u hu lest jeżamina l-bżonnijiet tas-SEAE fir-rigward kemm tal-proprjetà immobbli u l-persunal u hu determinat li jissorvelja mill-qrib l-impatt tiegħu fuq l-intestatura 5, peress li l-ħolqien tas-servizz kien maħsub li se jkun effett newtrali fuq il-baġit; mhuwiex lest jipperikola l-bżonnijiet tal-istituzzjonijiet eżistenti;

39.

Jemmen li t-twaqqif tat-Taqsima X ġdida fil-baġit tal-UE għas-Servizz Ewropew għall-Azzjoni Esterna jissodisfa l-bżonn li l-Unjoni Ewropea tiġi pprovduta b’qafas istituzzjonali li, flimkien mad-dispożizzjonijiet PESK/PSDK il-ġodda, tista’ ssostni l-ambizzjonijiet tal-UE fir-rigward tal-politika barranija;

40.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-Qorti tal-Ġustizzja, lill-Qorti ta’ l-Awdituri, lill-Kumitat Ekonomiku u Soċjali Ewropew, lill-Kumitat tar-Reġjuni, lill-Ombudsman Ewropew, kif ukoll lill-Kontrollur Ewropew għall-Protezzjoni tad-Data.