Opinjoni tal-Kumitat Ekonomiku u Soċjali Ewropew dwar il- “Proposta għal Direttiva tal-Parlament Ewropew u tal-Kunsill dwar maniġers ta’ fondi ta’ investiment alternattiv u li temenda d-Direttivi 2004/39/KE u 2009/…/KE”

Nhar it-3 ta' Ġunju 2009, il-Kunsill iddeċieda, b'konformità mal-Artikolu 47(2) tat-Trattat li jistabbilixxi l-Komunità Ewropea, li jikkonsulta lill-Kumitat Ekonomiku u Soċjali Ewropew dwar

Proposta għal Direttiva tal-Parlament Ewropew u tal-Kunsill dwar Maniġers ta' Fondi ta' Investiment Alternattivi u li temenda d-Direttiv 2004/39/KE u 2009/…/KE

Is-Sezzjoni Speċjalizzata għas-Suq Uniku, il-Produzzjoni u l-Konsum, inkarigata sabiex tipprepara l-ħidma tal-Kumitat dwar is-suġġett, adottat l-opinjoni tagħha fl-1 ta' Frar 2010. Fis-16 ta' Frar 2010, il-Bureau tal-Kumitat stieden lis-Sezzjoni Speċjalizzata għas-Suq Intern, il-Produzzjoni u l-Konsum teżamina l-opinjoni mill-ġdid.

B'konformità mal-Artikolu 20 u l-Artikolu 57(1) tar-Regoli ta' Proċedura, matul il-462 sessjoni plenarja tiegħu li nżammet fid-29 ta' April 2010, il-Kumitat Ekonomiku u Soċjali Ewropew ħatar lis-Sur Grasso bħala r-relatur ġenerali u adotta din l-opinjoni b'136 voti favur, 2 voti kontra u 3 astensjonijiet.

1.1 Il-Kumitat Ekonomiku u Soċjali Ewropew (KESE) huwa favur il-proposta għal Direttiva. Minkejja li ċerti tipi ta' fondi alternattivi bla dubju kkontribwixxew biex żiedu l-ingranaġġ u l-livell ta' riskju fis-sistema finanzjarja, ma kienx minn dan is-settur li ġew ir-riskji ewlenin għall-istabbiltà u ż-żamma tas-sistema finanzjarja fil-kriżi li bdiet wara d-diffikultajiet li kkaratterizzaw is-suq tal-kreditu subprime. Din il-fehma dan l-aħħar ġiet approvata mill-Awtorità tas-Servizzi Finanzjarji tar-Renju Unit (UK Financial Services Authority (FSA)) fir rapport tagħha ta' Frar 2001 “Assessing the possible sources of systemic risk from hedge funds” fejn hija tistqarr li l-hedge funds ewlenin ma jirrapreżentaw riskju ta' destabilizzazzjoni tal-kreditu tal-kontraparti. Il-KESE ħa nota tad-dibattitu li qajmet il-proposta, b'mod partikolari tal-proposti tal-Kunsill tal-Unjoni Ewropea u tal-Parlament Ewropew (relatur: Gauzès). Min-naħa tiegħu, l-KESE qed iressaq sensiela ta' osservazzjonijiet u suġġerimenti biex jiġu rettifikati ċerti għażliet u direzzjonijiet tal-proposta li, anke jekk ma jwasslux għal benefiċċji rilevanti għall-ħarsien tal-investituri u l-integrità tas-suq, jistgħu jippenalizzaw mhux biss is-settur tal-fondi alternattivi, iżda wkoll is-sistema ekonomika kollha kemm hi. Bħala punt ta' referenza għall-osservazzjonijiet tiegħi, il-KESE jieħu l-Opinjoni (1) li ħarġet fl-2009 dwar il-Hedge Funds u l-Fondi tal-Private Equity li tgħid li fi ħdan il-qafas ekonomiku tal-ekonomija tas-suq Ewropea, l-impatt tagħhom fuq l-impjiegi u l-impatt soċjali huma iktar rilevanti mill-impatt ekonomiku u finanzjarju.

1.2 Il-kriżi Griega tefgħet id-dawl fuq il-kwistjoni tad-dejn sovran. Il-KESE huwa konxju tad-diversi fehmiet li jeżistu fir-rigward tar-rwol li l-Hedge Funds seta' kellhom biex il-kriżi marret għall-agħar. Il-KESE jqis li dan il-punt jitlob attenzjoni urġenti u li jiġi approfondit.

1.3 Id-Direttiva tintroduċi qafas regolatorju armonizzat għas-settur tal-fondi alternattivi anke b'rabta mal-ħtieġa għal monitoraġġ adegwat tar-riskji makroprudenzjali għas-settur finanzjarju Ewropew. Id-Direttiva fiha wkoll regoli dettaljati li l-KESE jqis li huwa diffiċli li jiġu adattati b'mod effettiv għall-varjetà kbira ta' prodotti li jipproduċi s-settur. Għalhekk, jappella għal approċċ iktar funzjonali biex titqies il-varjetà kbira ta' prodotti li jaqgħu taħt id-definizzjoni ta' “fondi alternattivi”.

1.4 Il-KESE jqis li huwa essenzjali li mingħajr dewmien jinbdew diskussjonijiet mal-awtoritajiet tal-pajjiżi ewlenin li mhumiex fl-UE biex titħeġġeġ l-adozzjoni ta' standards internazzjonali għall-monitoraġġ bankarju tal-fondi ta' investiment alternattivi, fuq il-bażi ta' dak li sar mal-Kumitat ta' Basil fil-qasam bankarju. Jekk dan ma jseħħx, il-leġislazzjoni tkun tista' tiġi evitata faċilment jekk ċertu attivitajiet jiġu trasferiti barra l-qafas leġiżlattiv Ewropew. Dan jipperikola l-kompetittività ta' ċerti setturi importanti tal-industrija finanzjarja Ewropea, b'riperkussjonijiet negattivi kemm fuq l-impjiegi kif ukoll fuq il-ħolqien tal-benesseri u l-ġid. It-twaqqif fil-futur tal-Awtorità Ewropea tat-Titoli u s-Swieq (ESMA) tgħin l-applikazzjoni tar-regolament, speċjalment fil-qasam transkonfinali.

1.5 Fost affarijiet oħra, id-Direttiva tintroduċi l-possibbiltà li jiġu stabbiliti limiti għall-iffinanzjar tad-dejn. Il-KESE mhuwiex kontra din il-pożizzjoni, iżda jitlob li jiġi indikat biċ-ċar abbażi ta' liema kriterji jistgħu jiġu stabbiliti dawn il-limiti għall-varjetajiet differenti ta' prodotti u liema miżuri ser jittieħdu biex jiġi limitat l-effett proċikliku tagħhom.

1.6 Il-KESE jqis li biex jiġu ggarantiti t-trasparenza tas-suq u l-ħarsien tal-investituri, l-obbligu għar-reġistrazzjoni u li jintbagħat pakkett informattiv bażiku għandu jiġi estiż għall-kumpaniji kollha. L-informazzjoni għandha tkun differenzjata skont il-prodotti u l-livelli. Madanakollu, dwar dan is-suġġett il-KESE jqis li hemm bżonn ta' analiżi empirika li tmur aktar fil-fond minn dik li saret s'issa mill-Kummissjoni.

1.7 Għal dak li għandu x'jaqsam mal-obbligi ta' informazzjoni li jġorru l-kumpaniji li jamministraw fondi ta' private equity, il-KESE japprezza l-għan li tiżdied it-trasparenza f'dan ir-rigward, l-aktar jekk l-għan huwa li jitħarsu l-partijiet interessati bħall-azzjonisti f'minoranza u l-ħaddiema. Fl-istess ħin, huwa jqis li dawn ir-regoli m'għandhomx jippenalizzaw iż-żejjed il-fondi ta' private equity favur modi oħra ta' investiment li jkollhom l-investituri privati jew istituzzjonali. Fl-aħħar, il-proposta għal Direttiva tipprevedi l-eżenzjoni ta' dawn l-obbligi għall-fondi li jinvestu biss fl-SMEs. Madanakollu, il-KESE jtenni li l-ħarsien tal-investituri u tal-integrità tas-suq huma prinċipji mhux negozjabbli li għandhom jgħoddu għall-kumpaniji kollha li jamministraw fondi ta' investiment alternattivi.

2.1 It-terminu “fondi ta' investiment alternattivi” jirreferi għall-fondi kollha li ma jidħlux fl-ambitu ta' applikazzjoni tad-Direttiva UCITS: pereżempju, il-hedge funds, il-fondi ta' private equity, il-venture capital, il-fondi immobiljari, il-fondi tal-infrastruttura u tal-komoditajiet, li fost oħrajn ikopru s-settur li fit-terminoloġija tar-rapport de Larosière huwa definit bħala “sistema bankarja parallela”.

2.2 Fl-2009, il-KESE kien ħejja opinjoni dwar il-Hedge Funds (HF) u l-Private Equity (PE). L-opinjoni ma kkunsidratx id-Direttiva AIFM. Kienet iffokata biss fuq l-impatt ta' dawn il-fondi fuq il-kwistjonijiet tal-impjieg u dawk soċjali. Aħna ninnotaw li d-Direttiva proposta tal-AIFM iġġenerat dibattitu kbir l-iktar rigward kwistjonijiet tal-impjieg u dawk soċjali. Il-KESE huwa tal-fehma li l-konklużjonijiet u r-rakkomandazzjonijiet ta' dik l-opinjoni huma referenza importanti għad-diskussjoni dwar id-Direttiva.

2.3 Kif ġie enfasizzat ukoll fir-Rapport de Larosière, il-kriżi finanzjarja ġiet megħjuna minn likwidità żejda u minn żbilanċi kbar fis-swieq finanzjarji u tal-komoditajiet u minn fatturi oħra makroekonomiċi. L-ammont kbir ta' likwidità kien wassal biex jiġi ttraskurat ir-riskju li jeżisti fil-likwidità nnifisha, li matul il-proċessi ta' kontroll u tal-immaniġġjar tar-riskji kemm min-naħa tal-operaturi kif ukoll fil-livell ta' regolamentazzjoni prudenzjali, ingħatat inqas attenzjoni minn dik li ngħatat lir-riskji tal-kreditu u tas-suq.

2.4 Illum ma nistgħux nagħmlu tabirruħna ma ġara xejn u ma nitgħallmux minn żball li sewa qares għall-ekonomija dinjija u li seta' tassew ikun fatali. Il-likwidità titlob swieq u sistemi finanzjarji li jkunu trasparenti kemm jista' jkun.

2.5 Id-Direttiva għandha tkun l-okkażjoni biex jittieħed tassew pass 'il quddiem lejn it-trasparenza tas-settur tal-fondi alternattivi, li żgur wera li m'għandux din il-kwalità.

2.6 Il-KESE jqis li dan huwa meħtieġ mhux minħabba t-tort, in-nuqqasijiet jew ir-riskji tas-settur, iżda sempliċement minħabba l-bżonn kruċjali li t-trasparenza u l-likwidità jitpoġġew fuq quddiem tal-aġenda.

2.7 Il-proposti li qed jiġu diskussi bħalissa fl-UE dwar is-superviżjoni finanzjarja Ewropea fil-livell makro u mikro huma assolutament essenzjali biex jiżguraw is-sopravivenza tas-Suq Uniku (2).

2.8 Fl-Istati Uniti, il-President Obama nieda proċess ta' bidliet u innovazzjonijiet radikali fis-sistema tar-regolamentazzjoni u tal-monitoraġġ. Għadu kmieni wisq biex nagħtu ġudizzju dwar ir-riżultati li għandhom jiksbu l-inizjattivi tal-Istati Uniti.

2.9 F'din l-inizjattiva l-UE trid tqum fuq tagħha sabiex fil-livell internazzjonali ssir ħidma bla dewmien favur it-trasparenza u l-integrità tas-suq. Madankollu, huwa jenfasizza li r-regolamentazzjoni waħedha ma tistax issolvi l-problemi li jiddependu anke mill-imġiba xejn prudenti tal-investituri professjonali.

2.10 Il-KESE japprova s-sitt prinċipji ta' livell għoli għar-regolamentazzjoni tal-HF proposti mill-Organizzazzjoni Internazzjonali tal-Kummissjonijiet tas-Sigurtà (International Organisation of Security Commissions (IOSCO)) f'Ġunju 2009. L-IOSCO issa (25 ta' Frar 2010) ippubblikata data dwar il-ħtiġijiet marbuta mar-riskju sistemiku għall-hedge funds. Dawn ikopru ħdax-il kategorija differenti ta' data. Il-KESE jirrakkomanda lill-Kummissjoni li tibbaża ruħha fuq dawn il-prinċipji u timplimentahom għar-regolamentazzjoni tal-AIFM fid-Direttiva proposta.

2.11 Filwaqt li l-IOSCO ffinalizzat analiżi dwar ir-riskju għas-sistema finanzjarja mill-Private Equity, għadha ma saret l-ebda proposta regolatorja. Il-KESE jirrakkomanda li l-Kummissjoni tadatta l-prinċipji tal-HF tal-IOSCO b'tali mod li jadattaw għall-profil tal-Private Equity.

3.1 Il-proposta għal Direttiva qed timmira li tirregola l-maniġers tal-fondi mhux il-prodotti. Ir-rinunzja li jsir intervent dirett fuq il-prodotti hija motivata mill-fatt li l-fondi ta' investiment alternattivi jistgħu jiġu definiti biss bl-esklużjoni, peress li mhumiex fondi armonizzati mid-Direttiva UCITS, u għalhekk il-Kummissjoni ssostni li kwalunkwe intervent li jimmira li jirregola direttament il-prodotti malajr isir skadut u tal-imgħoddi.

3.2 Madanakollu ħafna aspetti tar-regolamentazzjoni tal-maniġers tal-fondi ma jistgħux ma jkollhomx implikazzjonijiet sinifikanti anki fuq il-mod kif jaħdmu u l-karatteristiċi tal-fondi nnifishom.

3.4 Dawn l-għanijiet prinċipali jistgħu jintlaħqu permezz ta' għadd strutturat ta' inizjattivi speċifiċi li jfasslu l-elementi li ġejjin tal-proposta:

3.4.1 Il-maniġers kollha tal-AIFM li l-assi tagħhom jaqbżu ċerti livelli għandhom jiġu soġġetti għal awtorizzazzjoni. L-eżenzjoni mid-dispożizzjonijiet tad-Direttiva hija prevista għall-maniġers li l-assi li jamministraw huma inqas minn EUR 100 miljun. Dan il-limitu jitla' għal EUR 500 miljun jekk il-maniġers jamministraw biss fondi li mhumiex iffinanzjati bid-dejn u l-investituri m'għandhomx dritt għal tifdija fl-ewwel ħames snin tal-eżistenza tal-fondi.

3.4.1.1 L-awtorizzazzjoni tingħata mill-awtoritajiet kompetenti tal-Istat Membru tal-oriġini. L-awtorizzazzjoni hija soġġetta għal rekwiżiti strutturati ħafna tat-tip organizzattiv u tat-trasparenza.

3.4.1.2 Il-maniġers iridu jkunu domiċiljati fl-UE. Dawn jistgħu jiddelegaw il-kompiti amministrattivi lil korpi li mhumiex fl-UE: il-funzjoni ta' depożitarju tista' ssir biss minn istituzzjonijiet ta' kreditu stabbiliti fl-UE. Is-sottodelega hija pprojbita espliċitament, ħlief fil-każ tal-funzjoni tad-depożitarju, iżda f'kull każ taħt kundizzjonijiet stretti.

3.4.1.3 Id-direttiva tagħti lill-Kummissjoni l-kompitu li tistipula limiti għall-ingranaġġ (leverage) sabiex jiġu żgurati l-istabbiltà u l-integrità tas-sistema finanzjarja.

3.4.2 Jekk l-obbligi previsti mid-Direttiva jiġu rispettati, il-maniġers ikunu jistgħu jbiegħu l-prodotti tagħhom liberament lill-investituri professjonali (skont id-definizzjoni tad-Direttiva MiFID) fl-Istati Membri kollha. Il-maniġers jistgħu anke jiddistribwixxu fondi domiċiljati f'pajjiżi terzi, iżda fuq dawn jiġu imposti sensiela ta' kundizzjonijiet biex jiġi evitat li fis-swieq jiddaħħlu aktar riskji jew li jkun hemm distorsjoni fis-sistemi tat-taxxa.

4.1 Il-KESE diġà tkellem dwar ir-rakkomandazzjonijiet (3) tal-Grupp de Larosière permezz ta' opinioni u jaqbel bis-sħiħ mal-ħtieġa għal monitoraġġ sopranazzjonali, li, iżda, jitlob li qafas leġiżlattiv li sa ċertu punt ikun l-istess għal kulħadd. Anke wara t-twaqqif tal-awtoritajiet superviżorji Ewropej, il-monitoraġġ tas-suġġetti individwali ser jibqa' kompitu għall-korpi nazzjonali tal-monitoraġġ. Għalhekk, peress li l-ħolqien tal-awtoritajiet superviżorji ġodda ma jeskludix il-kompetenza tal-awtoritajiet superviżorji nazzjonali, huwa importanti li l-awtoritajiet superviżorji Ewropej ikollhom “sett ta' regoli komuni għall-interpretazzjoni” dwar il-viġilanza. Għarfien u trasparenza akbar fis-settur tal-fondi alternattivi jista' jkun importanti għat-titjib tal-integrità tas-suq, il-protezzjoni tal-investituri u biex jiġi stabbilit monitoraġġ makroprudenzjali effikaċi. Id-direttiva tista' tkun l-okkażjoni biex nippruvaw nilħqu dan l-għan importanti, bil-kundizzjoni li jiġu evitati restrizzjonijiet li jippenalizzaw bla bżonn. Għal din ir-raġuni l-Kumitat jirrakkomanda kawtela u attenzjoni partikolari meta t-talbiet tal-leġislazzjoni jmorru lil hinn mill-qafas tal-informazzjoni minimu li hu meħtieġ biex isir il-monitoraġġ makroprudenzjali.

4.2 Il-KESE jqis li b'mod urġenti għandu jiġi determinat qafas leġiżlattiv li jsaħħaħ il-kundizzjonijiet biex ikun hemm kwalità aħjar tal-kriterji ta' governanza tal-maniġers tal-fondi alternattivi. Din il-kundizzjoni hija aktar importanti minn ħafna leġislazzjonijiet dettaljati oħra li jispiċċaw biex iżidu l-ispejjeż għall-kumpaniji mingħajr ma neċessarjament jilħqu l-għan li jiżdiedu l-garanziji għas-suq, kif ġie enfasizzat b'mod qawwi fir-Rakkomandazzjoni Nru 1 tar-rapport tal-Grupp de Larosière.

4.3 Il-KESE jiġbed l-attenzjoni wkoll għal żewġ punti mqajma mir-Rapport de Larosière li, fil-kuntest tal-evalwazzjoni tal-qafas Basel 2, jenfasizza l-fatt li mill-kriżi finanzjarja ħarġu żewġ tagħlimiet importanti:

4.3.1 Il-proposta li jitpoġġew limiti fuq id-dejn u fuq il-lieva finanzjarja tal-fondi (l-hekk imsejħa leverage cap) qed tersaq lejn id-direzzjoni mixtieqa – dik li jiżdiedu r-rekwiżiti tal-kapital tal-ishma. Fil-fatt il-KESE jaqsam it-tħassib dwar ir-riskji li jġib miegħu d-dejn eċċessiv fis-sistema finanzjarja: iżda s-suġġett tad-dejn eċċessiv għandu jiġi indirizzat billi nżommu f'moħħna anke karatteristiċi oħra tal-fondi, bħal pereżempju d-daqs. Il-KESE jagħmel sejħa biex tiġi valutata l-possibbiltà li jiġi stabbilit livell definit b'mod ċar għal-lieva finanzjarja massima.

4.3.2 Biex ir-riskju sistematiku jinżamm taħt kontroll, irridu nżommu f'moħħna li l-ikbar banek ta' sikwit huma primary brokers u għalhekk isellfu l-fondi għall-hedge funds. Il-kontroll ta' dawn il-primary brokers huwa importanti daqs dak tal-funds borrowers. Fir-reviżjonijiet tad-Direttivi dwar ir-Rekwiżiti Kapitali tal-banek, l-awtoritajiet rilevanti għandhom jiggarantixxu li dan is-self ikun kopert minn biżżejjed kapital.

4.3.3 Fl-aħħar, irid jitqies li l-leverage cap għandha t-tendenza tkun proċiklika. Fil-fatt huwa probabbli li l-leverage cap jinqabeż meta l-valur tal-investimenti jonqos, bil-konsegwenza li biex jerġa' jidħol fil-limitu, il-maniġer jista' jkun imġiegħel jillikwida l-assi tiegħu biex b'hekk inaqqsilhom terġa' aktar il-valur tagħhom tas-suq. Fl-opinjoni tiegħu fir-rigward tar-Rapport de Larosière dwar il-kwistjoni tal-proċiklità tal-qafas leġiżlattiv, il-KESE diġà stqarr dak li jaħseb: minkejja li jagħraf li huwa diffiċli li jiġi stabbilit meta għandhom jitnaqqsu jew jiġu ssikkati r-restrizzjonijiet, huwa jaħseb li ċerta flessibbiltà f'uħud mir-restrizzjonijiet tista' tillimita l-proċiklità tal-leġislazzjoni.

4.4 Il-KESE jinsab perpless dwar il-kwistjoni tal-livelli de minimis li taħthom il-kumpaniji jkunu esklużi mir-regoli tad-direttiva. Bħala prinċipju l-KESE jqis li l-kumpaniji kollha għandhom ikunu soġġetti għal obbligu għar-reġistrazzjoni u b'konsegwenza t'hekk, li jintbagħat sett bit-tagħrif bażiku meħtieġ biex jiġu żgurati l-kundizzjonijiet minimi indispensabbli għal trasparenza tas-suq effettiva għall-ħarsien tal-investituri.

4.4.1 Sabiex jiġu żgurati t-trasparenza u l-protezzjoni tal-investituri għandha tkun meħtieġa iktar informazzjoni, possibbilment skont il-prodotti u l-limiti stabbilit. Madankollu, il-KESE jqis li hemm bżonn ta' analiżi xjentifika aktar fil-fond minn dik li saret diġà mill-Kummissjoni biex jinstab kriterju adegwat biex jiġu stabbiliti dawn il-limiti.

4.4.2 Il-KESE jemmen li d-data dwar il-ħtiġijiet marbuta mar-riskju sistemiku li għadha kif ħarpet l-IOSCO għall-hedge funds (li jistgħu jiġu adattati għal AIF oħra) tipprovdi triq 'il quddiem. Hemm ħdax-il kategorija speċifikati, minn informazzjoni dwar l-amministrazzjoni u l-konsulenti, li għandhom jinħtieġu mill-fondi kollha, sa informazzjoni dwar il-self, ir-riksju u l-iskopertura tal-kontropartijiet, li jkunu l-iktar meħtieġa mill-fondi l-kbar li jkunu ffinanzjati bid-dejn. Dawn il-linji gwida għand l-appoġġ internazzjonali, jinbtu mill-inizjattivi tal-G20 u l-FSB u ser jidħlu fis-seħħ f'Settembru 2010.

4.5 L-argumenti t'hawn fuq huma marbuta mal-fatt li s-settur tal-fondi alternattivi huwa varjat wisq biex ikun jista' jiġi impost qafas leġiżlattiv li jkun eżattament l-istess għal kulħadd għat-tipi differenti kollha ta' prodotti li jkopri. Fil-prattika, il-kumpaniji tal-immaniġġjar huma speċjalizzati f'oqsma partikolari (pereżempju, il-fondi immobiljari, il-hedge funds u l-fondi tal-private equity). Il-proposta għal Direttiva tiffoka biss fuq il-fondi li jirrikorru għal-lieva finanzjarja u dawk tal-private equity. Kif ġie enfasizzat fl-opinjoni tal-KESE dwar l-impatt tal-fondi fuq il-bidliet industrijali (relatur: is-Sur Morgan), id-diversità tal-fondi alternattivi huma tali li jeħtieġu approċċ aktar differenzjat.

4.6 Il-KESE jittama li l-inizjattiva tal-Kummissarju Barnier li jiġi introdott passaport Ewropew uniku estiż ukoll għall-maniġers u l-fondi li mhumiex domiċiljati fl-UE tista' tirrappreżenta l-bidu ta' soluzzjonijiet internazzjonali kondiviżi.

4.6.1 Il-KESE jaqbel mal-possibbiltà offruta li l-fondi domiċiljati barra mill-UE jitpoġġew fuq l-istess livell. Il-KESE jagħmel sejħa biex il-Kummissjoni tiżgura li l-istandards ta' kwalità u tat-trasparenza tal-maniġers u tal-fondi li mhumiex fl-UE jkunu tassew ekwivalenti għall-istandards fl-UE.

4.6.2 Peress li l-proposta għal direttiva għandha tkun l-okkażjoni t-tajba biex jiżdied il-livell tal-garanziji offruti anke mill-fondi barra mill-UE, iżda mhux biex jiġu penalizzati u għaldaqstant esklużi mis-suq uniku, il-KESE jsejjaħ għal ċarezza ikbar dwar ir-rekwiżiti li dawn il-fondi ser ikollhom jilħqu biex ikunu offruti liberament fis-suq uniku.

4.7 Il-KESE jqis li jekk l-adozzjoni tad-direttiva ma tkunx akkumpanjata minn interventi simili fil-livell tal-pajjiżi ewlenin li mhumiex fl-Ewropa, ir-regoli ser jiġu evitati faċilment billi ċerti attivitajiet jiġu trasferiti barra ż-żona li taqa' taħt ir-regolamentazzjoni Ewropea. Dan jipperikola l-kompetittività ta' ċerti setturi importanti tal-industrija finanzjarja Ewropea, b'riperkussjonijiet negattivi kemm fuq l-impjiegi kif ukoll fuq il-ħolqien tal-benesseri u l-ġid.

4.8 Il-KESE jistaqsi x'inhi r-raġuni wara r-regola li timponi li d-depożitarju jrid ikun istituzzjoni tal-kreditu. Depożitarji indipendenti jistgħu jkunu garanzija importanti kontra prattiki frodulenti jew dannużi għall-investituri. Mingħajr l-ebda dubju, huwa tajjeb li jiddaħħlu regoli aktar stretti. Madankollu, il-KESE jitlob li jiġi ċċarat għaliex hemm l-intenzjoni li l-funzjoni ta' depożitarju tiġi limitata biss għall-istituzzjonijiet tal-kreditu, anke fid-dawl tal-fatt li d-Direttiva MIFID tawtorizza sensara oħra biex jieħdu l-kustodja tan-negozju tal-klijenti.

4.9 Fost il-fondi alternattivi hemm dawk l-hekk imsejħa private equity li jinvestu f'ishma tal-kapital ta' kumpaniji li mhumiex ikkwotati.

4.9.1 Il-private equity huwa għajn importanti ta' kapital ta' riskju għall-intrapriżi start-up u innovattivi, minbarra għal intrapriżi li qed jikbru jew li qed jagħmlu ristrutturar. Il-KESE diġà ddiskuta (4) s-suġġett tal-impatt li l-fondi private equity jista' jkollhom fuq is-sistema ekonomika u fuq il-bidliet industrijali.

4.9.2 Il-proposta għal Direttiva tiddedika għadd ta' artikoli (Kapitolu V, Taqsima 2) speċifikament għall-fondi li jiksbu l-kontroll ta' kumpaniji mhux ikkwotati (aktar speċifikament għall-fondi li jiksbu mill-inqas 30 % tad-drittijiet tal-votazzjoni).

4.9.3 L-informazzjoni li trid tiġi pprovduta hija pjuttost dettaljata u f'ħafna aspetti hija mfassla speċifikament fuq il-ħtiġijiet tal-informazzjoni mitluba fil-każ tal-akkwist tal-kontroll ta' kumpaniji kkwotati. Minbarra dan, hemm ukoll il-bżonn ta' kodiċi ta' governanza tal-impriżi li tkun fl-istess livell ta' dak mitlub mill-kumpaniji kkwotati. Din l-informazzjoni kollha trid tkun ipprovduta lill-kumpanija, lill-azzjonisti, lir-rappreżentanti tal-ħaddiema u lill-ħaddiema nfushom.

4.9.4 Il-KESE jaqbel mal-ambitu u l-fond tal-obbligi proposti fir-rigward tal-governanza, tal-informazzjoni u tal-komunikazzjoni, speċjalment jekk huma indirizzati biex iħarsu l-interessi tal-partijiet interessati bħall-azzjonisti f'minoranza u l-impjegati. Huwa jqis ukoll li dawn ir-regoli m'għandhomx jippenalizzaw il-fondi ta' private equity favur modi oħra ta' investiment li jkollhom l-investituri privati jew istituzzjonali.

4.9.5 Il-KESE jappella sabiex dawn ir-regoli jiġu applikati minn 25 % tal-voti 'l fuq u sabiex il-kodiċi tal-governanza tal-impriżi tħares b'mod espliċitu l-ftehim kollettiv tax-xogħol fis-seħħ. Il-konsegwenzi potenzjali għall-impjegati għandhom ikunu ċari u l-informazzjoni għandha tingħata b'mod li jirrifletti l-verità u mingħajr l-ebda dewmien. In-nuqqas ta' konformità mar-rekwiżitu tal-informazzjoni u l-konsultazzjoni jġib miegħu l-konsegwenza li l-ebda deċiżjoni li tittieħed mill-AIFM u/jew kumpanija identifikata ma jkollha effetta legali.

4.9.6 Il-KESE jirrakkomanda li d-Direttiva għandha tintroduċi livell minimu ta' solvenza u rata ta' likwidità għall-kumpaniji identifikati. Il-ħlasijiet tad-dividenti għandhom ikunu limitati għal pagament wieħed fis-sena u m'għandux jaqbeż id-dħul. Il-kumpaniji li ma jissodisfawx ir-rati minimi m'għandhom jingħataw l-ebda ħlas tad-dividendi.

4.10 Dawn l-obbligi ta' informazzjoni ma japplikawx għall-akkwist ta' kontroll ta' SMEs. Madankollu, il-KESE jikkritika dan il-punt tad-Direttiva għax il-ħarsien tal-investituri u l-integrità tas-suq huma prinċipji mhux negozjabbli li għandhom jiġu applikati għall-kumpaniji kollha li jamministraw fondi ta' investiment alternattivi.

Brussell, 29 ta’ April 2010.

Il-President tal-Kumitat Ekonomiku u Soċjali Ewropew

Mario SEPI