Pubblikazzjoni ta' applikazzjoni skont l-Artikolu 6(2) tar-Regolament tal-Kunsill (KE) Nru 510/2006 dwar il-protezzjoni tal-indikazzjonijiet ġeografiċi u d-denominazzjonijiet tal-oriġini għall-prodotti agrikoli u tal-ikel

2009/C 186/12

Din il-pubblikazzjoni tikkonferixxi d-dritt għal oġġezzjoni għall-applikazzjoni skont l-Artikolu 7 tar-Regolament tal-Kunsill (KE) Nru 510/2006. Id-dikjarazzjonijiet ta’ oġġezzjoni għandhom jaslu għand il-Kummissjoni fi żmien sitt xhur mid-data ta’ din il-pubblikazzjoni.

SOMMARJU

IR-REGOLAMENT TAL-KUNSILL (KE) Nru 510/2006

“ALUBIA DE LA BAÑEZA-LEÓN”

Nru tal-KE: ES-PGI-0005-0492-06.09.2005

DPO ( ) IĠP ( X )

Dan is-sommarju jippreżenta l-elementi ewlenin tal-ispeċifikazzjoni tal-prodott għal finijiet ta’ informazzjoni biss.

1.   Dipartiment responsabbli fl-Istat Membru:

2.   Grupp:

3.   Tip ta’ prodott:

4.   Speċifikazzjonijiet:

(sinteżi tar-rekwiżiti skont l-Artikolu 4(2) tar-Regolament (KE) Nru 510/2006)

4.1.   Isem il-prodott:

“Alubia de La Bañeza-León”

4.2.   Deskrizzjoni:

Il-prodott kopert jikkonsisti f'żerriegħa niexfa u separata f'miżwed tal-ful (Phaseolus vulgaris L., subspeċi Papilionaceae, legumi, biż-żrieragħ għall-konsum uman) tal-varjetajiet lokali Canela, Plancheta, Riñón menudo u Pinta.

Il-karatteristiċi taż-żrieragħ ta' dawn il-varjetajiet, differenti sew bejniethom, huma:

Il-fażola niexfa tappartjeni għall-kategorija kummerċjali Extra, kif deskritta fl-Orden tas-16 ta' Novembru 1983 li tapprova l-istandards ta' kwalità għal ċerti legumi niexfa (BOE no 275, tas-17 ta' Novembru 1983) jew id-dispożizzjonijiet li jissostitiwuh, titpoġġa f'vażetti bil-polietilene, drapp jew karta u tkun ippreservata f'kundizzjonijiet ambjentali normali.

4.3.   Żona ġeografika:

Iż-żona ta' produzzjoni agrikola, ta' 5 456 kilometru kwadru, jinsabu f'98 muniċipalità tal-provinċja ta' León u jagħmlu mar-reġjuni agrarji ta' Astorga, El Páramo, Esla-Campos, La Bañeza, La Cabrera u Tierras de León, kif ukoll 20 muniċipalità tar-reġjun ta' Benavente-Los Valles, fil-provinċja ta' Zamora, li tmiss ma' dik imsemmija qabel.

Tinkludi l-muniċipalitajiet li ġejjin, miġbura fi gruppi ta' provinċji u reġjuni agrarji:

4.4.   Prova tal-oriġini:

Il-Consejo Regulador (l-organu ta’ spezzjoni) iwettaq il-funzjonijiet ta' sorveljanza u kontroll tal-produzzjoni, il-ħżin, l-ippreservar f'kontenituri u l-kwalità tal-fażola, biex jiżgura li hija skont l-ispeċifikazzjonijiet. Il-fażola tiġi minn biċċiet tar-raba' li jinsabu fiż-żona tal-produzzjoni agrikola, imniżżlin fir-reġistru tal-artijiet tal-Consejo Regulador. Il-fażola tiġi pproċessata biss fl-imħażen u l-azjendi tal-imballaġġ li jkunu mniżżlin minn qabel fir-reġistri tal-Consejo Regulador. Il-biċċiet tar-raba', l-imħażen u l-industriji għandhom ikunu soġġetti għal spezzjoni inizjali qabel ma jiġu rreġistrati, kif ukoll għal evalwazzjonijiet regolari sabiex jibqgħu mniżżla fir-reġistru. Waqt it-trasport mingħand l-agrikultur, għall-imħażen u l-azjendi rreġistrati, il-prodott irid ikollu miegħu d-dokumenti ta' ċirkolazzjoni mibgħuta minn qabel mill-Consejo Regulador. Il-fażola li tgħaddi mill-kontrolli kollha biss toħroġ fis-suq bil-garanzija ta' origini ċertifikata bit-tikketta tal-Consejo Regulador. In-numru ta' tikketti oħra maħruġa mill-Consejo Regulador għall-azjendi tal-imballaġġ u tal-ipproċessar se jkun skont il-kwantitajiet tal-fażola u l-kapaċitajiet tal-kontenituri.

4.5.   Metodu ta' produzzjoni:

Fil-biċċiet tar-raba': Ir-raba' jrid ikun tas-saqwi jew tal-bagħli frisk ħafna. Il-kultivazzjoni tal-fażola għandu jkollha newba kull sentejn bħala massimu. Iż-żrieragħ iridu jkunu ħielsa minn kull “xaħam” u jingħataw trattament kontra l-parassiti, kollox taħt il-kontroll tal-Consejo Regulador. Iż-żrigħ isir fir-Rebbiegħa b'densità sa 190 000 pjanta kull ettaru. Il-ġbir tal-fażola jsir fix-xhur ta' Awwissu, Settembru u Ottubru, meta ż-żerriegħa tilħaq id-daqs matur tal-fiżjoloġija tagħha.

Fl-imħażen: Il-ħżin jista' jsir kemm mill-agrikulturi kif ukoll mill-bqija tal-operaturi filwaqt li jiġi evitat it-taħlit ta' fażola differenti li jkunu miġburin f'lottijiet għalihom u fiżikament separati minn xulxin.

L-imħażen iridu jikkonformaw mar-regolamentazzjoni teknika u sanitarja fis-seħħ.

Fl-azjendi tal-imballaġġ:

Il-fażola tgħaddi minn proċedura ta' kontroll ta' kwalità tal-materja prima, titqassam indaqs f'lottijiet differenti, isir it-tindif tal-bidu, it-trattament kontra l-parassiti, tiġi mgħarbula u kklassifikata, titneħħa l-fażola diffettuża u titqiegħed f'kontenituri permezz ta' dożaturi. Imbaghad isir il-kontroll ta' kwalità tal-aħħar u l-ittikkettar li jinkludi it-tqegħid ta' tikketta oħra li tidentifikahom u li tkun maħruġa mill-Consejo Regulador.

4.6.   Rabta:

Reputazzjoni

Sa mis-sena 1570, fis-swieq famużi ta' Medina del Campo, kien hemm kummerċ tal-fażola Alubias de La Bañeza, miġjuba esklussivament mill-ħaddiema tar-reġjun.

Fi stħarriġ li kien sar fl-1752 imsejjaħ Catastro de Ensenada, hemm referenza li f'La Bañeza kien ikun hemm suq kull nhar ta' Sibt matul is-sena u jikkwota l-fażola bħala waħda mill-prodotti li kienu jinbigħu.

Id-“Diccionario geográfico, estadístico e histórico de España y sus posesiones de ultramar (1846-1850)”, (Dizzjunarju ġeografiku, statistiku u storiku ta' Spanja u l-proprjetà tagħha 'l barra minn xtutha (1846-1850)) ta' Pascual Madoz jagħti dan it-tagħrif dwar il-kultivazzjoni tal-ful fil-provinċja ta' León skont iċ-ċensiment tal-1799: “ir-reġjun għandu produzzjoni ta' 2 102 fanegas (kontenitur li jesa' 126 120 kg) ta' fażola, li jiswew 63 060 reales”. Jagħti wkoll ċifri tal-konsum fil-belt ta' León għal perjodu ta' ħames snin bejn 1835-1839. Il-fażola hija l-legum tal-ogħla konsum (0,21 fanegas/12,6 kg għal kull abitant fis-sena), warajha hemm iċ-ċiċri (0,09 fanegas/5,4 kg) u ċ-ċiċri tat-tip Lathyrus cicera (0,03 fanegas/1,8 kg).

L-Anuario General de España tal-1912, ta' Bailly-Baillière, apparti milli jsemmi l-fażola bħala wieħed mill-prodotti ewlenin f'diversi muniċipalitajiet taż-żona rurali ta' La Bañeza, jinkludi riklam bil-kliem li ġej: “Ceferino Martín – La Bañeza – Ċereali, Legumi, Suf, Stoppa, Patata u Ful klassifikati, ippremjati b'medalja tad-deheb”.

Ir-Reġjun ta' León (Gwida ġenerali), xogħol ta’ José Mourille López tal-1928: dwar iż-żona ta' La Bañeza jindika li “il-fażola, li tiġi esportata fi kwantitajiet kbar, jagħtu fama lil dan ir-reġjun”.

Illum il-ġurnata din ir-reputazzjoni hija pprovata, fost l-oħrajn bl-inklużjoni ta' dan il-prodott f'diversi katalgi uffiċjali tal-kwalità tal-ikel, pereżempju l-Inventario Español de Productos Tradicionales (Inventarju Spanjol tal-Prodotti Tradizzjonali) tal-Ministeru tal-Agrikultura, Sajd u Ikel tas-sena 1996, iffinanzjat mill-Kummissjoni Ewropea.

Bl-istess mod, l-Inventario de Productos Agroalimentarios de Calidad, de la Junta de Castilla y León (L-Inventarju tal-Prodotti Agroalimentri ta' Kwalità tal-Gvern lokali ta' Castilla y León, tas-sena 2001), jiddedika żewġ paġni lil dan il-prodott.

Iktar ricenti, il-Gwida għall-ikel ta' kwalità tar-reġjun ta' León, li ġġib l-isem ta' “León al Gusto”, iffinanzjata mill-FAEG-Gwida, iddedikat erba' paġni lil din il-fażola.

U fuq livell ta' pubbliċità barra l-pajjiż, il-Gwida għall-Aqwa Frott u Ħxejjex, tal-Ministeru tal-Agrikultura, iddedikatilha wkoll żewġ paġni.

Fuq l-internet, meta wieħed ifittex bil-Google jitilgħu mill-inqas 300 referenza, l-iktar f'paġni tal-gastronomija, tat-turiżmu, Wikipedia, eċċ. L-importanza ta' dan il-prodott fl-ambitu soċjali hija pprovata wkoll mill-eżistenza tal-Museo de la Alubia en la Bañeza (Mużew tal-fażola f'La Bañeza) u l-eżistenza ta' Għaqda Gastronomica tal-Alubia de La Bañeza León, li l-President tagħha bħalissa huwa wkoll il-President tal-Qorti tal-Awdituri.

Fis-swieq, ir-reputazzjoni u l-valur tagħha għall-konsumaturi huma pprovati permezz tad-differenza importanti li hemm fil-prezz meta mqabbel mal-prezz ta' fażola oħra li mhix koperta minn indikazzjoni ġeografika protetta.

Fatturi naturali

Il-karatteristiċi tal-fażola f'La Bañeza-León huma marbutin mal-karatteristiċi klimatiċi u edafoloġiċi taż-żona u tal-materjal veġetali adattat għall-ambjent.

Klima: Din tippreżenta differenzi ċari bejn il-livelli tat-temperatura u l-umdità taż-żona tal-Lvant, u fil-livell tal-umdità maż-żoni tat-Tramuntana u tal-Punent. L-indiċi medju tal-inżul tax-xita waqt iż-żmien tal-kultivazzjoni tal-fażola huwa biżżejjed għall-iżvilupp tajjeb tal-pjanta tal-fażola minħabba li din tikber f'raba' saqwi jew bagħli frisk ħafna. Il-livell moderat tal-umdità, ġeneralment, jippreżenta diffikultà għall-iżvilupp ta' mard mikotiku, dejjem jekk il-kultivazzjoni in ġenerali u l-irrigazzjoni b'mod partikolari, jiġu mmaniġġjati sew.

Art: Fiż-żona hemm ħafna għamliet ta' ħamrija mhux kompatta u mhux kompatta bir-ramel b'kontenut moderat ta' tafal, newtri tal-pH jew aċidi, rikki fil-materja organika u b'livelli ta' karbonat baxxi ħafna. Ġeneralment dawn l-artijiet jagħtu lill-fażola assorbiment tal-ilma elevat, livelli baxxi ta' rmied u kwalitajiet organolettiċi aħjar wara t-tisjir, l-iktar ġilda iktar lixxa u albumina inqas imrammla u li tixbah iktar lid-dqiq.

Il-materjal veġetali: Il-fatt li l-kultivazzjoni ta' din il-varjetà ta' fażola hija drawwa li ilha sejra għal ħafna snin, ifisser li għaddiet minn proċess selettiv li sar mill-ambjent agroklimatiku fejn l-agrikulturi dejjem għażlu l-aqwa biċċiet tar-raba' biex ikabbru fażola tal-ifjen kwalità u iktar uniformi għaż-żrigħ li jkun imiss.

Fatturi umani

L-agrikulturi, permezz tal-esperjenza li ġabru matul diversi ġenerazzjonijiet, huma kapaċi jagħrfu l-aqwa biċċiet tar-raba' għall-kultivazzjoni tal-fażola u jafu jadattaw il-prattiki tat-tkabbir tagħhom biex jiksbu fażola tal-aqwa kwalità.

4.7.   Organu ta’ spezzjoni:

Il-Consejo Regulador tal-Protezzjoni tal-Indikazzjonijiet Ġeografiċi “Alubia de La Bañeza-León” huwa konformi mal-istandard EN-45011, il-verżjoni tal-1998.

4.8.   Tikkettar:

It-tikketti kummerċjali jew dawk maħruġa minn kull azjenda tal-imballaġġ jew tal-ipproċessar għandhom ikunu approvati mill-Consejo Regulador. Fuq it-tikketti jeħtieġ li jkun jidher dan li ġej: Indikazzjoni Ġeografika Protetta “Alubia de La Bañeza-León” flimkien mal-logo tal-Consejo Regulador. It-tikketta sekondarja li tingħaraf minn kodiċi alfanumeriku tinħareġ mill-Consejo Regulador.

Il-logo tal-Consejo Regulador huwa:

Dawk il-prodotti li fihom l-Alubia de La Bañeza-León tintuża bħala materja prima, anke wara li jkunu ġew prodotti u pproċessati, jistgħu jitqiegħdu għall-bejgħ f'kontenituri li jirreferu għad-denominazzjoni msemmija bil-kliem “Elaborado con Indicación Geográfica Protegida Alubia de La Bañeza-León” mingħajr ma jkun jidher il-logo tal-Komunità, sakemm:

Meta l-prodott ma jkunx qed juża l-Alubia de La Bañeza-León biss, l-użu tad-denominazzjoni protetta jista' jiġi indikat biss fil-lista ta' ingredjenti tal-prodott li tkun tagħmel parti minnu jew li tkun ir-riżultat ta' produzzjoni jew ta' pproċessar.