Pubblikazzjoni ta' applikazzjoni skont l-Artikolu 6(2) tar-Regolament tal-Kunsill (KE) Nru 510/2006 dwar il-protezzjoni ta' indikazzjonijiet ġeografiċi u denominazzjonijiet tal-oriġini tal-prodotti agrikoli u tal-oġġetti tal-ikel

(2009/C 72/10)

Din il-pubblikazzjoni tikkonferixxi d-dritt għal oġġezzjoni għall-applikazzjoni skont l-Artikolu 7 tar-Regolament tal-Kunsill (KE) Nru 510/2006 (1). Id-dikjarazzjonijiet ta' oġġezzjoni għandhom jaslu għand il-Kummissjoni fi żmien sitt xhur mid-data ta' din il-pubblikazzjoni.

SOMMARJU

REGOLAMENT TAL-KUNSILL (KE) Nru 510/2006

“MOUTARDE DE BOURGOGNE”

Nru tal-KE: FR-PGI-005-0503-25.10.2005

DPO ( ) IĠP ( X )

Dan is-sommarju jippreżenta l-elementi ewlenin tal-ispeċifikazzjoni tal-prodott b'finijiet ta' informazzjoni.

1.   Dipartiment responsabbli fl-Istat Membru:

2.   Grupp:

3.   Tip ta' prodott:

Klassi 2.6: “Pejst tal-mustarda”

4.   Speċifikazzjoni:

(Sinteżi tar-rekwiżiti skont l-Artikolu 4(2) tar-Regolament (KE) Nru 510/2006)

4.1.   Isem

“Moutarde de Bourgogne”

4.2.   Deskrizzjoni

Il-mustarda ta' Bourgogne hija mustarda b'togħma qawwija jew qawwija ħafna bl-inbid abjad, ta' lewn isfar ċar u b'konsistenza ħoxna, omoġenea u kremuża. Hija kkaratterizzata minn riħa qawwija u tipika tal-inbid abjad tal-Bourgogne, punġenti u intensa kif ukoll togħma b'saħħitha ta' nbid abjad tal-Bourgogne.

4.2.1   Ingredjenti u addittivi awtorizzati:

4.2.2   Il-karatteristiċi fiżiko-kimiċi tal-Mustarda ta' Bourgogne:

4.3.   Żona ġeografika

Huwa obbligatorju li l-produzzjoni u l-ħżin taż-żrieragħ kif ukoll il-produzzjoni (it-trasformazzjoni) tal-pejst tal-mustarda jitwettqu fiż-żona tal-produzzjoni. Din tinkludi d-dipartimenti li jiffurmaw ir-Reġjun tal-Bourgogne, li huma Côte d'Or, Nièvre, Saône et Loire u Yonne.

Iż-żona ġeografika ġiet stabbilita abbażi tal-għarfien kompetenti lokali partikulari fil-produzzjoni taż-żrieragħ tal-mustarda u tal-inbid prodotti fil-Bourgogne, imbagħad ittrasformati f'pejst tal-mustarda, li jagħti prodott bil-karatteristiċi oriġinali (cf. il-paragrafu 4.6).

Iż-żrieragħ tal-mustarda prodotti fil-Bourgogne għandhom kwalitajiet partikulari. Dawn il-kwalitajiet ġew magħrufa matul is-sekli. It-tabib ta' François I, Charles Estienne, jisħaq li l-mustarda prodotta fil-Bourgogne hija ta' kwalità aħjar minħabba s-sénevé (l-isem komuni tal-pjanta taż-żrieragħ tal-mustarda). Sat-tieni gwerra dinjija, is-sénevé ġiet imkabbra fil-foresti u fl-ispazji vojta għall-faħam. Wara s-sajran tal-faħam tal-kannol f'dawn l-ispazji vojta, il-ħamrija kellha abbundanza ta' potassju u kienet tajba għat-tkabbir tal-mustarda (u għar-rikkezza taż-żrieragħ bl-essenza tal-mustarda) li min jieħu ħsieb il-faħam ikun ħawwel f'Marzu u ħasad f'Awwissu. Barra minn hekk, il-klima tal-Bourgogne hija semi-kontinentali u pjuttost omoġenea u għalhekk adattata għat-tkabbir tal-mustarda. Fil-fatt, it-tkabbir tal-mustarda ma jeħtieġx kwantità kbira ta' ilma. Hija tadatta ruħha tajjeb għan-nuqqas ta' ilma u għat-temperaturi għoljin. It-tmiem tal-ħarifa li jkun umdu wisq mhux tajjeb għaliha. Wara bosta deċennji fejn it-tkabbir tal-mustarda mar lura, dan reġa' ħa r-ruħ fil-Bourgogne b'inizjattiva tal- produtturi industrijali tal-pejst tal-mustarda bil-ħsieb li jikkontrollaw il-kwalità tal-produzzjoni tal-materja prima u jtejbu l-kwalità tal-prodott aħħari. Dan il-programm ta' qawmien mill-ġdid tat-tkabbir tal-mustarda jgħaqqad flimkien entitajiet ta' riċerka, il-Kamra tal-Agrikoltura tal-Côte d'Or, l-entitajiet reġjonali tal-ħżin, il-bdiewa u l-proċessuri. Ġew magħżula xi varjetajiet b'karatteristiċi speċifiċi sabiex iwieġbu kemm għall-ispeċifikazzjonijiet pedoklimatiċi tal-Bourgogne kif ukoll għall-esiġenzi kwalitattivi tal-proċessuri.

Madankollu, ġo dan l-ispazju ġiet delimitata żona fejn jista' jsir it-tkabbir taż-żerriegħa tal-mustarda. Dan l-ispazju huwa definit fir-rigward tal-kriterji ġeoloġiċi u pedoloġiċi maħsubin għall-aħjar ambjenti fejn tikber il-mustarda, jiġifieri esklużi l-ħamrija kannella u aċiduża kif ukoll il-ħamrija podolizzata mill-altitudni. It-testijiet tat-tkabbir urew li hemm limitu potenzjali f'din il-ħamrija marbut ma' mili mill-ġdid ħażin taż-żerriegħa u ż-żamma insuffiċjenti tal-Iżotjoċjanat volatili li ma jwasslux għall-pejst karatteristiku tal-mustarda.

4.4.   Prova tal-oriġini

It-traċċabbiltà hija assigurata matul il-proċess tal-produzzjoni tal-mustarda tal-Bourgogne, mill-qasam sal-pejst ikkundizzjonat, permezz ta' dokumenti kkodifikati. Iż-żrieragħ tal-mustarda jinġabru biss mill-oqsma li huma parti miż-żona tat-tkabbir permessi għall-IĠP. Dawn l-oqsma għandhom jirrispettaw il-kriterji tal-għażla stabbiliti mill-pjan tal-produzzjoni. Il-bdiewa iwasslu l-produzzjoni tagħhom lil entitajiet tal-ħżin li jinsabu fil-Bourgogne. Il-ħaddiema kollha involuti fil-produzzjoni taż-żrieragħ tal-mustarda, il-ħżin u l-proċess huma marbuta b'dokumenti kkodifikati. Rigward iż-żrieragħ tal-mustarda u l-pejst ikkundizzjonat, jiġu mwettqa eżaminazzjonijiet analitiċi matul il-fabbrikazzjoni.

4.5.   Metodu ta' produzzjoni

Il-varjetajiet taż-żrieragħ magħżula mill-Assoċjazzjoni tal-Mustarda ta' Bourgogne (AMB) u li ġejjin mill-ispeċi Brassica juncea b'“tegument kannella”, Brassica juncea b'“tegument bjond” u Brassica nigra biss huma awtorizzati għat-tkabbir taż-żerriegħa tal-mustarda. Ġie stabbilit pjan ta' produzzjoni li jerġa' jara l-uċuħ għat-tkabbir, l-għażla tal-oqsma u t-taħwil fiż-żona tal-IĠP. Waqt il-ħsad, iż-żrieragħ jaslu għand entità tal-ħżin li tinsab fil-Bourgogne u li tiżgura t-traċċabbiltà, it-tindif u l-ħżin taż-żrieragħ.

F'dan l-istadju l-lottijiet taż-żrieragħ ikunu suġġetti għall-approvazzjoni li tara li l-kriterji li ġejjin ikunu rispettati:

Wara din l-approvazzjoni, iż-żrieragħ jiġu mħejjija u mibgħuta lill-produtturi industrijali li jinsabu fiż-żona ġeografika. Iż-żrieragħ jiġu mitħuna u jitpoġġew flimkien ma' likwidu għad-dilwizzjoni (ilma+inbid). L-inbid użat huwa inbid abjad ta' denominazzjoni tal-oriġini kkontrollata prodott fid-dwieli tal-Bourgogne. Dan l-istadju jippermetti l-estrazzjoni tal-għadma taż-żerriegħa u jikkostitwixxi l-ewwel pejst tal-mustarda. Dan il-pejst jiġi mgħarbel sabiex jiġu eliminati t-tegumenti taż-żerriegħa. B'hekk jinkiseb il-pejst ta' lewn isfar ċar b'konsistenza ħoxna, omoġenea u kremuża u li tiġi ''diżarjata''. Wara dan l-istadju jkun hemm waqfa li tagħti lok għall-iżvilupp tat-togħma punġenti li jkollha l-mustarda. Imbagħad, il-pejst jiġi maħżun u kkundizzjonat.

4.6.   Rabta

Ir-rabta mal-oriġini ġeografika qiegħda fl-għarfien kompetenti reġjonali antik, it-tkabbir storiku taż-żerriegħa tal-mustarda fil-Bourgogne, rabta storika b'saħħitha bejn il-mustarda u l-vinja tal-Bourgogne, kif ukoll reputazzjoni antika.

4.6.1   Kwalità determinata

Il-“Moutarde de Bourgogne”, ikkaratterizzata minn togħma punġenti u intensa, tinkiseb bit-taħlit taż-żrieragħ tal-mustarda prodotti u maħżuna fil-Bourgogne, u likwidu għad-dilwizzjoni magħmul mill-ilma, mill-melħ, zokkor, ħwawar u mill-inqas 25 % ta' nbejjed bojod mhux ħelwin li ġejjin mid-dwieli tradizzjonali tal-Bourgogne. Dawn l-inbejjed bojod huma kkaratterizzati mit-togħma aromatika u qawwija tagħhom u mid-dewmien tagħhom fuq il-palat, u lill-mustarda tal-Bourgogne jagħtuha r-riħa qawwija u tipika tagħha kif ukoll it-togħma b'saħħitha tal-inbid abjad tal-Bourgogne li tiddistingwiha minn mustardi oħra. L-estratt li ma jkunx ħelu u l-lipidi li ġejjin miż-żrieragħ iridu jkunu superjuri għal 24 % u 9 % rispettivament.

4.6.2   Reputazzjoni

Ir-rabtiet storiċi bejn il-Bourgogne u l-mustarda huma stretti. Jingħad li fl-1336, waqt festa organizzata f'Rouvres mid-Duka Eudes IV tal-Bourgogne, għall-unur ta' Filippu VI, ġiet ikkunsmata “poinçon” mustarda (206,75 l). Sa mis-seklu XVI, l-istatuti jiddefinixxu l-korporazzjoni ta' min jagħmel il-mustarda (dawk tal-belt ta' Dijon fl-1634 jew dawk tal-Belt ta' Beaune fl-1647). Sas-seklu XIX, il-fabbrikazzjoni baqgħet attiva fil-ħwienet żgħar tax-xogħol. Wara dan, ir-rivoluzzjoni industrijali laqtet l-industrija tal-mustarda. Il-fabbrikanti tal-Bourgogne kienu jgħaddu lil kulħadd fl-inġenjożità, u wieħed jista' jsemmi lil M. Grey, fabbrikant minn Dijon li fl-1850 għarraf lill-Akkademja tal-Arti, tax-Xjenza u tal-Letteratura b'makkinarju li jżid il-produttività b'mod sinifikanti. Bejn l-1750 u l-1984 kien hemm 263 fabbrikant tal-mustarda. Din id-densità ma tinsab fl-ebda reġjun Franċiż ieħor.

It-tkabbir taż-żerriegħa tal-mustarda fil-Bourgogne għandu wkoll storja b'għeruq f'saħħithom ladarba Charles Estienne, it-tabib ta' Francois I, kien iqis li l-kwalità tal-mustarda tal-Bourgogne hija ferm aqwa minħabba li fiha s-sénevé“li jaħseb li huwa l-aqwa fil-pajjiżi kollha”.

L-inbid u l-mustarda għandhom rabta b'saħħitha bejniethom. Fl-1911, A. Berthiot jattribwixxi l-fama tal-mustarda għall-kwalità tal-fabbrikazzjoni tagħha li, skont hu, tinkludi t-tħin tal-aqwa żrieragħ u l-emulsjoni ġo likwidu speċjali tal-Bourgogne: il-verjus, xorta ta' nbid aħdar ħafna, li jinkiseb bl-ippressar tal-għeneb abjad mhux totalment misjur. Wara li l-pjanti li jipproduċu dan l-għeneb inqerdu bil-Phylloxera, il-fabbrikanti daru għall-inbejjed bojod żgħar u aċidużi. Dawn għebu wkoll, u ġew mibdula ma' dwieli nobbli u mlaqqma. L-użu tal-inbid abjad, minflok il-ħall, jagħti l-karatteristiċi organolettiċi tipiċi tal-mustarda.

Dawk li jagħmlu l-mustarda bdew jużaw l-isem “Moutarde de Bourgogne” minn kmieni. Għaldaqstant wieħed jista' jsib ir-reġistrazzjoni fl-1891 fil-Qorti ta' Sens (89) tat-tikketta “Moutarde de Bourgogne, extra-blanche supérieure” (Mustarda ta' Bourgogne, bajda ħafna u superjuri) u fl-1903, fil-Qorti Kummerċjali ta' Dijon instabet it-tikketta “Moutarde Jacquemart au pur verjus de Bourgogne” (Il-Mustarda Jacquemart bil-verjus pur tal-Bourgogne). Barra mid-denominazzjoni, il-ħsieb wara r-referenza għall-Bourgogne u l-istorja tagħha fl-għażla tat-tikketti juri l-importanza li dejjem kellha l-mustarda tal-Bourgogne. Wieħed jista' jikkwota t-tikketti “Jean sans Peur”, “Téméraire”, “Moutarde à la cuillère de la Belle Bourguignonne”, “La Bourguignonne” .

4.6.3   Xi fatturi umani, għarfien espert partikulari

Sat-tieni gwerra dinjija, it-tkabbir taż-żerriegħa tal-mustarda fil-Bourgogne jibqa' importanti. Wara l-1945, il-produtturi industrijali jippruvaw iżommu din il-produzzjoni fir-reġjun. F'dan ir-rigward is-sindikat tal-fabbrikanti tal-mustarda ppubblika fuljett fuq it-tkabbir tal-mustarda. Il-kompetizzjoni tal-pjanti taż-żejt l-oħra u s-suq dinji xprunaw dawn l-inizjattivi.

Wieħed għandu jistenna l-bidu tas-snin 90 sabiex it-tkabbir taż-żerriegħa jerġa' jieħu r-ruħ b'mod sinifikanti. Bħalissa, fit-tħassib tas-settur jingħaqdu:

Għalhekk ġie mwaqqaf kumitat ta' direzzjoni sabiex imexxi u jara li jirnexxa r-rilanċ tat-tkabbir:

Din il-kooperazzjoni tat lok għar-referenza ta' żewġ varjetajiet għas-sistema tal-IĠP.

Parallela ma' din ir-riċerka, il-produzzjoni żviluppat billi bejn wieħed u ieħor fl-1993 għaddiet minn 350 ettaru għal 1 230 ettaru fl-2003.

4.7.   Organu ta' spezzjoni

4.8.   Tikkettar

It-tikkettar għandu jinkludi l-informazzjoni li ġejja:

(1)  ĠU L 93, 31.3.2006, p. 12.