15.12.2009   

MT

Il-Ġurnal Uffiċjali tal-Unjoni Ewropea

C 304/89

RAPPORT

dwar il-kontijiet annwali tal-Aġenzija Ewropea tal-Ferroviji għas-sena finananzjarja 2008, flimkien mar-risposti tal-Aġenzija

2009/C 304/17

WERREJ

 

Paragrafu

Paġna

INTRODUZZJONI…

1-2

90

ID-DIKJARAZZJONI TA’ ASSIGURAZZJONI…

3-12

90

KUMMENTI DWAR IL-ĠESTJONI TAL-BAĠIT U DIK FINANZJARJA…

13

91

KWISTJONIJIET OĦRAJN…

14-17

91

Tabella…

92

Ir-risposti tal-Aġenzija…

94

INTRODUZZJONI

1.

L-Aġenzija Ewropea tal-Ferroviji (minn hawn ‘il quddiem imsejħa “l-Aġenzija”), li tinsab f’Lille-Valenciennes, kienet imwaqqfa mir-Regolament (KE) Nru 881/2004 tal-Parlament Ewropew u tal-Kunsill tad-29 ta’ April 2004 (1). L-għan tal-Aġenzija huwa li ttejjeb il-livell ta’ interoperabilità tas-sistemi tal-ferroviji u li tiżviluppa approċċ komuni dwar is-sigurtà sabiex tikkontribwixxi lejn il-ħolqien ta’ settur Ewropew tal-ferroviji aktar kompetittiv b’livell għoli ta’ sigurtà (2).

2.

Il-baġit tal-Aġenzija għall-2008 ammonta għal 18-il miljun euro meta mqabbel ma’ 16,6 miljun euro s-sena ta’ qabel. L-għadd ta’ persunal impjegat mill-Aġenzija fi tmiem is-sena kien 113 meta mqabbel mas-56 is-sena ta’ qabel.

ID-DIKJARAZZJONI TA’ ASSIGURAZZJONI

3.

Skont id-dispożizzjonijiet tal-Artikolu 248 tat-Trattat il-Qorti vverifikat il-kontijiet annwali tal-Aġenzija (3), li jikkonsistu fir-“rendikonti finanzjarji” (4) u fir-“rapporti dwar l-implimentazzjoni tal-baġit” (5) għas-sena finanzjarja li ntemmet fil-31 ta’ Diċembru 2008 u l-legalità u r-regolarità tat-tranżazzjonijiet li fuqhom huma bbażati dawk il-kontijiet.

4.

Din id-Dikjarazzjoni ta’ Assigurazzjoni hija indirizzata lill-Parlament Ewropew u lill-Kunsill, skont l-Artikolu 185(2) tar-Regolament tal-Kunsill (KE, Euratom) Nru 1605/2002 (6).

Ir-responsabbiltà tad-direttur

5.

Bħala uffiċjal li jawtorizza, id-Direttur jimplimenta d-dħul u l-infiq tal-baġit skont ir-regoli finanzjarji tal-Aġenzija li taqa’ taħt ir-responsabbiltà tiegħu u fi ħdan il-limiti tal-approprijazzjonijiet awtorizzati (7). Id-Direttur huwa responsabbli mit-twaqqif (8) ta’ struttura organizzattiva u s-sistemi u l-proċeduri tal-ġestjoni u l-kontroll interni rilevanti biex jiġu ppreparati kontijiet finali (9) li huma ħielsa minn dikjarazzjoni żbaljata materjali, kemm jekk minħabba frodi jew inkella żball, u biex jiżgura li t-tranżazzjonijiet li fuqhom huma bbażati dawk il-kontijiet huma legali u regolari.

Ir-responsabbiltà tal-qorti

6.

Ir-responsabbiltà tal-Qorti hija li tipprovdi, abbażi tal-verifika tagħha, dikjarazzjoni ta’ assigurazzjoni dwar l-affidabbiltà tal-kontijiet annwali tal-Aġenzija u dwar il-legalità u r-regolarità tat-tranżazzjonijiet li huma bbażati fuqhom.

7.

Il-Qorti wettqet il-verifika tagħha skont l-Istandards Internazzjonali tal-Verifika u l-Kodiċi tal-Etika tal-IFAC u l-ISSAI (10). Dawk l-istandards jitolbu li l-Qorti tikkonforma mar-rekwiżiti tal-etika u li tippjana u twettaq il-verifika biex tikseb assigurazzjoni raġonevoli dwar jekk il-kontijiet humiex ħielsa minn dikjarazzjoni żbaljata materjali u dwar jekk it-tranżazzjonijiet ta’ bażi humiex legali u regolari.

8.

Il-verifika tal-Qorti tinvolvi t-twettiq ta’ proċeduri sabiex tinkiseb evidenza tal-verifika dwar l-ammonti u t-tagħrif fil-kontijiet u dwar il-legalità u r-regolarità tat-tranżazzjonijiet li huma bbażati fuqhom. Il-proċeduri magħżula jiddependu fuq l-evalwazzjoni tagħha tal-verifika inkluża l-evalwazzjoni tar-riskji ta’ dikjarazzjoni żbaljata materjali fil-kontijiet jew ta’ tranżazzjonijiet illegali jew irregolari, kemm jekk minħabba frodi jew inkella żball. Meta tagħmel dawk l-evalwazzjonijiet tar-riskju, il-kontroll intern rilevanti għall-preparazzjoni u l-preżentazzjoni tal-kontijiet tal-entità jiġi kkunsidrat sabiex jitfasslu proċeduri tal-verifika li huma xierqa fiċ-ċirkostanzi. Il-verifika tal-Qorti tinkludi wkoll evalwazzjoni tal-adegwatezza tal-politika tal-kontabilità użata, tar-raġonevolezza tal-estimi tal-kontabilità magħmula mill-maniġment u kif ukoll evalwazzjoni tal-preżentazzjoni tal-kontijiet inġenerali.

9.

Il-Qorti tqis li l-evidenza tal-verifika miksuba hija biżżejjed u xierqa biex tipprovdi bażi għall-opinjonijiet t’hawn taħt.

L-opinjoni dwar l-affidabbiltà tal-kontijiet

10.

Fl-opinjoni tal-Qorti, il-Kontijiet Annwali (11) tal-Aġenzija jippreżentaw b’mod ġust, fl-aspetti materjali kollha, il-pożizzjoni finanzjarja tagħha fil-31 ta’ Diċembru 2008 u r-riżultati tal-operazzjonijiet tagħha u tal-likwidità tagħha għas-sena li ntemmet, skont id-dispożizzjonijiet tar-Regolament Finanzjarju tagħha.

L-opinjoni dwar il-legalità u r-regolarità tat-tranżazzjonijiet li fuqhom huma bbażati l-kontijiet

11.

Fl-opinjoni tal-Qorti, it-tranżazzjonijiet li fuqhom huma bbażati l-kontijiet annwali tal-Aġenzija għas-sena finanzjarja li ntemmet fil-31 ta’ Diċembru 2008, fl-aspetti materjali kollha huma legali u regolari.

12.

Il-kummenti li ġejjin ma jpoġġux f’diskussjoni l-opinjonijiet tal-Qorti.

KUMMENTI DWAR IL-ĠESTJONI TAL-BAĠIT U DIK FINANZJARJA

13.

Aktar minn 4,1 miljun euro approprijazzjonijiet ġew trasferiti ’l quddiem għall-2009 (12). Il-verifika ta’ kampjun tal-akbar impenji li l-approprijazzjonijiet korrispondenti tagħhom ġew miġjuba ’l quddiem għall-2009 wriet li dawn kellhom x’jaqsmu ma’ servizzi u xogħolijiet (13) li kienu ordnati tard ħafna fl-2008 u kienu mistennija li jsiru fl-2009. Dan il-livell għoli ta’ approprijazzjonijiet miġjuba ’l quddiem jindika diffikultajiet fl-ipprogrammar u fl-ibbaġitjar tal-attivitajiet tal-Aġenzija.

KWISTJONIJIET OĦRAJN

14.

Ir-reviżjoni tal-programm Annwali ta’ Ħidma tal-Aġenzija wriet diversi nuqqasijiet. L-objettivi mhux dejjem huma fformulati b’mod “SMART” (Speċifiċi, li jistgħu jitkejlu, li jistgħu jintlaħqu, rilevanti, f’waqthom) imma pjuttost b’mod fejn mhux possibli li wieħed jidentifika n-nuqqasijiet meta mqabbla mal-objettivi u li wieħed jevalwa l-kisbiet. L-inkonsistenzi fil-preżentazzjoni tal-figuri li għandhom x’jaqsmu mar-riżorsi tal-persunal u tal-baġit allokati għall-attivitajiet ukoll ġew innutati. Din is-sitwazzjoni, flimkien man-nuqqas ta’ indikaturi tal-prestazzjoni, tfixkel l-evalwazzjoni tal-prestazzjoni annwali tal-Aġenzija.

15.

Verifika ta’ kampjun tal-proċeduri tal-akkwist li twettqet matul is-sena wriet dgħufijiet. Ir-rekwiżiti formali stipulati fl-ispeċifikazzjonijiet tas-sejħa għall-offerti ma kinux osservati u evalwati b’mod konsistenti mill-kumitati tal-evalwazzjoni; fil-livell tal-kriterji tal-għażla (żewġ każijiet) (14) u fil-livell tal-kriterji tal-għotja (każ wieħed) (15). Dan fixkel it-trasparenza tal-proċeduri.

16.

L-Aġenzija għadha twettaq l-operazzjonijiet tagħha f’żewġ postijiet: Lille u Valenciennes. Kif qalet il-Qorti fir-rapport tagħha għas-sena finanzjarja 2006 (16), din is-sitwazzjoni tesponi lill-Aġenzija għal spejjeż żejda sinifikanti (17) li jistgħu jiġu evitati jekk l-operat kollu jkun ikkonċentrat f’post wieħed. Minn dak in-nhar ’l hawn l-Aġenzija ħadet passi biex tifformalizza ftehim dwar is-sede fejn l-ispejjeż żejda minħabba ż-żewġ postijiet jkunu kumpensati mill-Awtoritajiet Franċiżi. Dawn l-isforzi s’issa għad ma kellhomx suċċess.

17.

Fl-2009, l-Aġenzija se tiċċaqlaq għal ġo bini li huwa l-proprjetà tal-muniċipalità ta’ Valenciennes. It-tul tal-kuntratt huwa ta’ 25 sena, sakemm ma jiġix iffirmat ftehim dwar is-sede mal-Ġvern Franċiż. Minħabba li s’issa għadu ma ġie fformalizzat l-ebda ftehim dwar is-sede, l-awtorità tal-baġit (18) illimitat it-tul tal-kuntratt il-ġdid tal-kera għal sena, li jiġġedded awtomatikament għall-massimu ta’ sena oħra. In-nuqqas ta’ ċertezza dwar it-tul tal-kuntratt tfixkel l-ippjanar tal-installazzjoni fil-bini l-ġdid u l-proċeduri ta’ akkwist relatati u, konsegwentement l-ipprogrammar tal-baġit.

Dan ir-rapport ġie adottat mill-Qorti tal-Awdituri fil-Lussemburgu fil-laqgħa tagħha tat-8 ta’ Ottubru 2009.

Għall-Qorti tal-Awdituri

Vítor Manuel da SILVA CALDEIRA

President

Tabella

L-Aġenzija Ewropea tal-Ferroviji (Lille/Valenciennes)

Oqsma ta’ kompetenza Komunitarja stipulati fit-Trattat

Kompetenzi tal-Aġenzija kif ġie definit fir-Regolament (KE) Nru 881/2004 tal-Parlament Ewropew u tal-Kunsill

Tmexxija

Riżorsi disponibbli għall-Aġenzija fl-2008

(Data għall-2007)

Attivitajiet u servizzi mogħtija fl-2008

Politika Komuni tat-Trasport

Bl-iskop li jwettaq l-Artikolu 70, u filwaqt illi jqis il-fatturi partikolari tat-trasport, il-Kunsill, filwaqt li jaġixxi skont il-proċedura msemmija fl-Artikolu 251 u wara li jikkonsulta mal-Kumitat Ekonomiku u Soċjali, u l-Kumitat tar-Reġjuni għandu jistabbilixxi:

(a)

regoli komuni li japplikaw għat-trasport internazzjonali lejn jew mit-territorju ta’ Stat Membru jew li jaqsam it-territorju ta’ Stat Membru wieħed jew aktar;

(b)

il-kundizzjonijiet li jirregolaw il-mod li bih trasportaturi mhux residenti jistgħu joperaw servizzi ta’ trasport f’xi Stat Membru;

(c)

miżuri li jtejbu s-sigurtà fit-trasport;

(d)

kull dispożizzjoni xierqa oħra.

(L-Artikolu 71 tat-Trattat)

Objettivi

Tikkontribwixxi, fi kwistjonijiet tekniċi, lejn l-implimentazzjoni ta’ leġiżlazzjoni Komunitarja mmirata lejn:

—

It-titjib tal-pożizzjoni kompetittiva tas-settur tal-ferroviji.

—

L-iżvilupp ta’ approċċ komuni dwar is-sigurtà fis-sistema Ewropea tal-ferroviji.

Tikkontribwixxi għall-ħolqien ta’ żona Ewropea tal-ferroviji mingħajr fruntieri u tiggarantixxi livell għoli ta’ sigurtà.

Kompiti:

1 -   Tindirizza rakkomandazzjonijiet lill-Kummissjoni dwar

—

il-metodi ta’ sigurtà komuni (CMS) u l-miri ta’ sigurtà komuni (CSTs) stipulati fid-Direttiva dwar is-Sigurtà Ferrovjarja (2004/49/KE);

—

iċ-ċertifikati ta’ sigurtà u miżuri fil-qasam tas-sigurtà;

—

l-iżvilupp ta’ speċifikazzjonijiet Tekniċi dwar l-Interoperabilità;

—

il-monitoraġġ tal-interoperabilità;

—

iċ-ċertifikazzjoni tal-postijiet fejn issir il-manutenzjoni;

—

il-kompetenzi professjonali;

—

ir-reġistrazzjoni ta’ vetturi ferrovjarji.

2 -   Tagħti opinjonijiet dwar

—

ir-regoli nazzjonali tas-sigurtà;

—

il-monitoraġġ tal-kwalità tax-xogħol ta’ korpi innotifikati;

—

l-interoperabilità tan-netwerk trans-Ewropew.

3 -   Il-Koordinazzjoni tal-korpi nazzjonali

—

il-koordinazzjoni ta’ awtoritajiet ta’ sigurtà nazzjonali u l-korpi investigattivi nazzjonali (kif deskritti fid-Direttiva 2004/49/KE, l-Artikoli 17 u 21).

4 -   Il-pubblikazzjonijiet u d-databases

—

rapport dwar il-prestazzjoni tas-sigurtà (kull sentejn);

—

rapport dwar il-progress fir-rigward tal-interoperabilità (kull sentejn);

—

database pubblika ta’ dokumenti ta’ sigurtà;

—

reġistru pubbliku ta’ dokumenti dwar l-interoperabilità.

1 -   Il-Bord tat-Tmexxija

Jikkonsisti f’rappreżentant minn kull Stat Membru, erba’ rappreżentanti mill-Kummissjoni, u sitt rappreżentanti, mingħajr id-dritt tal-vot, mis-setturi professjonali kkonċernati.

2 -   Id-Direttur

Maħtur mill-Bord tat-Tmexxija fuq proposta mill-Kummissjoni.

3 -   Il-Verifika esterna

Il-Qorti tal-Awdituri.

4 -   L-Awtorità ta’ Kwittanza

Il-Parlament, fuq rakkomandazzjoni tal-Kunsill.

Baġit

18-il miljun euro

(16,6 miljun euro)

Persunal fil-31 ta’ Diċembru 2008

Karigi elenkati fil-pjan ta’ stabbiliment: 116 (116)

Karigi okkupati fil-31.12.2008: 106 (95)

Persunal ieħor: 7 (4)

Total tal-Persunal: 113 (99)

assenjati:

—

kompiti operazzjonali: 69 (66)

—

kompiti amministrattivi: 44 (33)

—

Rakkomandazzjoni dwar il-Metodi ta’ Sigurtà Komuni li jridu jintużaw fil-qafas ta’ miri komuni tas-sigurtà;

—

Rakkomandazzjoni dwar ir-reviżjoni tal-Anness I tad-Direttiva 2004/49/KE;

—

L-ewwel rapport ta’ kull sentejn dwar il-Prestazzjoni tas-Sigurtà tal-ferroviji fl-Unjoni Ewropea;

—

Rakkomandazzjoni dwar format komuni għal-liċenzji u r-reġistri tas-sewwieqa tal-ferroviji;

—

Rakkomandazzjoni dwar ir-rekwiżiti armonizzati tal-Parti B taċ-Ċertifikati tas-Sigurtà;

—

Rakkomandazzjoni dwar l-Ispeċifikazzjonijiet Tekniċi ta’ Interoperabilità (TSI) tal-Ferroviji Konvenzjonali - l-Infrastruttura;

—

Rakkomandazzjoni dwar l-enerġija TSI tal-ferroviji konvenzjonali;

—

Rakkomandazzjoni dwar iċ-ċertifikazzjoni tal-postijiet fejn issir il-Manutenzjoni;

—

Rakkomandazzjoni dwar l-Ispeċifikazzjoni tar-Rekwiżiti tas-Sistema għal-linja bażi 3 għall-ispeċifikazzjoni tas-Sistema Ewropea tat-Tmexxija tat-Traffiku Ferrovjarju (ERTMS);

—

Abbozz tat-TSI tal-Lokomotivi u l-Vetturi Ferrovjarji tal-Passiġġieri;

—

L-ewwel abbozz tar-rakkomandazzjoni tat-Taqsima 1 tal-Anness VII tad-Direttiva 2008/57/KE (lista ta’ kontroll ta’ aċċettazzjoni reċiproka);

—

Rapport intermedju dwar l-Applikazzjonijiet Telematiċi tat-TSI għall-Passiġġieri;

—

Studju ta’ vijabilità dwar l-interoperabilità tas-sistema tal-linji tal-ferroviji ta’ 1 520 mm;

—

Evalwazzjoni tan-notifika tal-listi tar-regoli tekniċi nazzjonali;

—

Abbozz ta’ rapport dwar il-mod kif jiġu ppubblikati u magħmula disponibbli r-regoli nazzjonali ta’ sigurtà;

—

Abbozz ta’ rapport dwar l-evalwazzjoni tal-impatt u r-rakkomandazzjonijiet dwar il-ħtieġa tal-identifikazzjoni ta’ każijiet fejn il-ferrovija taqbeż ’l barra mil-linji propost mill-kumitat dwar l-oġġetti perikolużi;

—

Stabbiliment ta’ reġistru ta’ dokumenti fuq l-interoperabilità;

—

Konferenza kull sentejn dwar is-sigurtà.

Sors: Informazzjoni mogħtija mill-Aġenzija.

IR-RISPOSTI TAL-AĠENZIJA

13.

Mill-4,1 miljun Euro f’approprjazzjonijiet li ġew trasferiti mill-2008 għall-2009, aktar minn 1,5 miljuni jirrigwardaw kuntratti ffirmati fl-aħħar xahrejn tal-2008. L-iffirmar tard huwa konsegwenza ta’ dewmien fil-proċeduri tal-akkwisti u tat-trasferimenti li saru fl-aħħar ta’ Ottubru 2008 wara analiżi tal-eżekuzzjoni tal-baġit. It-2,6 miljuni l-oħra jirrigwardaw kuntratti li jkunu għaddejjin li l-fatturi tagħhom kienu għadhom ma waslux u impenni provviżorji li jkopru l-ispejjeż relatati mal-missjonijiet tal-persunal u ma’ esperti. L-Aġenzija sejra tkompli tagħmel sforzi sabiex ittejjeb l-ippjanar tal-proċeduri ta’ akkwist u l-monitoraġġ tal-eżekuzzjoni tal-baġit matul is-sena.

14.

Mill-proċedura tal-baġit tal-2010, l-AFE introduċiet proċess li permezz tiegħu, kemm it-tħejjija tal-baġit annwali kif ukoll il-programm ta’ ħidma huma integrati b’mod sħiħ sabiex tkun assigurata konsistenza massima. Barra minn hekk l-AFE sejra tistinka sabiex tkun dejjem aktar eżatta fid-definizzjoni tal-objettivi, l-attivitajiet u l-iskeda ta’ żmien tagħhom.

Mill-2009 ’il quddiem, kwalunkwe bidla sinjifikanti fil-prijoritajiet tiġi rrappurtata lill-Bord Amministrattiv u tiġi riflessa fi proposta biex il-programm ta’ ħidma jiġi emendat skont dan. Barra minn hekk, mill-2009, DĠ TREN talab lill- AFE u lill-aġenziji l-oħra li jaqgħu fil-kamp tiegħu sabiex jiddefinixxu indikaturi ta’ prestazzjoni u jirrappurtaw dwarhom b’mod regolari.

15.

Fuq il-bażi tal-analiżi ta’ diffikultajiet li nqalgħu fil-passat fil-qasam tal-akkwisti, ġie stabbilit pjan ta’ azzjoni. L-azzjonijiet jinkludu inter alia taħriġ u għajnuna lill-membri tal-kumitati għall-valutazzjoni u armonizzazzjoni tal-mod kif l-offerti jiġu vvalutati bl-użu ta’ listi ta’ kontroll.

16.

L-Aġenzija tagħmel l-isforzi kollha possibbli sabiex tikkonkludi Ftehim dwar is-Sede mal-Istat Ospitu. Madankollu, s’issa ma waslet l-ebda reazzjoni formali għall-proposta tal-AFE għal ftehim.

17.

Ara t-tweġiba għal paragrafu 16. Sakemm il-ftehim dwar is-sede ma jiġix iffirmat, l-Aġenzija taqbel li sejra tiffaċċja problemi kbar rigward il-proċeduri ta’ akkwist tagħha, b’mod partikolari rigward dawk relatati mal-bini f’Valenciennes.

(1)  ĠU L 220, 21.6.2004, p. 3.

(2)  It-Tabella tagħti sommarju tal-kompetenzi u l-attivitajiet tal-Aġenzija. Tiġi ppreżentata għal-skopijiet ta’ informazzjoni.

(3)  Dawn il-kontijiet huma akkumpanjati minn rapport dwar il-ġestjoni tal-baġit u dik finanzjarja matul is-sena li, fost l-oħrajn, jagħti rendikont tar-rata ta’ implimentazzjoni tal-approprijazzjonijiet flimkien ma’ informazzjoni fil-qosor dwar it-trasferimenti ta’ approprijazzjonijiet fost il-partiti varji tal-baġit.

(4)  Ir-rendikonti finanzjarji jinkludu l-karta tal-bilanċ u l-kont tar-riżultat ekonomiku, it-tabella tal-likwidità, ir-rendikont tat-tibdil fil-kapital u l-anness għar-rendikonti finanzjarji li jinkludu d-deskrizzjoni tal-politika tal-kontabilità prinċipali u informazzjoni oħra ta’ spjegazzjoni.

(5)  Ir-rapporti tal-implimentazzjoni tal-baġit jikkonsistu fil-kont tar-riżultat tal-baġit u fl-anness tiegħu.

(6)  ĠU L 248, 16.9.2002, p. 1.

(7)  L-Artikolu 33 tar-Regolament tal-Kummissjoni (KE, Euratom) Nru 2343/2002 tat-23 ta’ Diċembru 2002 (ĠU L 357, 31.12.2002, p. 72).

(8)  L-Artikolu 38 tar-Regolament tal-Kummissjoni (KE, Euratom) Nru 2343/2002.

(9)  Ir-regoli dwar il-preżentazzjoni tal-kontijiet u tal-kontabilità mill-Aġenziji huma stabbiliti fil-Kapitolu 1 tat-Titolu VII tar-Regolament tal-Kummissjoni (KE, Euratom) Nru 2343/2002 kif l-aħħar emendat bir-Regolament tal-Kummissjoni (KE, Euratom) Nru 652/2008 tad-9 ta’ Lulju 2008 (ĠU L 181, 10.7.2008, p. 23) u huma fil-fatt integrati fir-Regolament Finanzjarju tal-Aġenzija.

(10)  Il-Federazzjoni Internazzjonali tal-Kontabilisti (IFAC) u l-Istandards Internazzjonali tal-Istituzzjonijiet Supremi tal-Verifiki (ISSAI).

(11)  Il-Kontijiet Annwali Finali kienu ppreparati fis-26 ta’ Ġunju 2009 u rċevuti mill-Qorti fit-2 ta’ Lulju 2009. Il-Kontijiet Annwali Finali, konsolidati ma’ dawk tal-Kummissjoni huma ppubblikati fil-Ġurnal Uffiċjali tal-Unjoni Ewropea sal-15 ta’ Novembru tas-sena ta’ wara. Dawn jistgħu jinstabu fuq il-websajt li ġej http://eca.europa.eu jew www.era.europa.eu

(12)  Madwar 3,9 miljun euro approprijazzjonijiet trasferiti ’l quddiem għall-2009 għandhom x’jaqsmu ma’ nefqa amministrattiva u operazzjonali. Dan jirrappreżenta 57 % tal-baġit annwali ta’ 6,9 miljun euro għall-Approprijazzjonijiet tat-Titolu II u t-Titolu III.

(13)  Dawn għandhom x’jaqsmu fost oħrajn ma’ studji fuq kuntratt, nefqa relatata mal-IT u mal-għammar tal-bini.

(14)  Valur totali : 334 000 euro.

(15)  Valur: 800 000 euro fuq 4 snin.

(16)  Il-paragrafu 8 (ĠU C 309, 19.12.2007, p. 68).

(17)  Fl-2006, dawn l-ispejjeż żejda kienu meqjusa għal aktar minn 400 000 euro.

(18)  Ittra mill-President tal-Kumitat tal-Parlament dwar il-Baġits lill-President tal-Bord Amministrattiv tal-Aġenzija ddatata is-26 ta’ Novembru 2008, ref D(2008) 67307.