Opinjoni tal-Kumitat Ekonomiku u Soċjali Ewropew dwar “il-Proposta għal Regolament tal-Parlament Ewropew u tal-Kunsill li jemenda r-Regolament (KE) Nru 1080/2006 dwar il-Fond Ewropew għall-Iżvilupp Reġjonali fir-rigward tal-eliġibbiltà tal-interventi għall-akkomodazzjoni favur il-komunitajiet emarġinati”

COM(2009) 382 – 2009/0105 (COD)

(2010/C 128/16)

Relatur ġenerali: is-Sur GRASSO

Nhar il-11 ta’ Settembru 2009, il-Kunsill iddeċieda, b’konformità mal-Artikolu 262 tat-Trattat li jistabbilixxi l-Komunità Ewropea, li jikkonsulta lill-Kumitat Ekonomiku u Soċjali Ewropew dwar

il-Proposta għal Regolament tal-Parlament Ewropew u tal-Kunsill li jemenda r-Regolament (KE) Nru 1080/2006 dwar il-Fond Ewropew għall-Iżvilupp Reġjonali fir-rigward tal-eliġibbiltà tal-interventi għall-akkomodazzjoni favur il-komunitajiet emarġinati

COM(2009) 382 – 2009/0105 (COD).

Nhar id-29 ta’ Settembru 2009, il-Bureau tal-Kumitat inkariga lis-Sezzjoni Speċjalizzata għall-Unjoni Ekonomika u Monetarja, il-Koeżjoni Ekonomika u Soċjali sabiex tipprepara l-ħidma tal-Kumitat dwar is-suġġett.

Minħabba l-urġenza tal-ħidma, il-Kumitat Ekonomiku u Soċjali Ewropew iddeċieda matul l-457 Sessjoni Plenarja tiegħu tal-4 u l-5 ta’ Novembru 2009 (seduta tal-5 ta’ Novembru) li jaħtar lis-Sur Grasso bħala relatur ġenerali, u adotta din l-opinjoni b’70 vot favur, 2 voti kontra u astensjoni waħda.

1.   Konklużjonijiet

1.1.   Il-KESE jieħu nota tal-proposta tal-Kummissjoni sabiex jiġi emendat l-Artikolu 7(2) tar-Regolament tal-FEŻR (1) billi l-esperjenza prattika turi li l-kondizzjonijiet ta’ eliġibbiltà ta’dan ir-regolament ma jindirrizzawx kompletament il-bżonnijiet tal-livell prattiku.

1.2.   Il-KESE japprova l-proposta.

2.   Raġunijiet u rakkomandazzjonijiet

2.1.   Il-KESE jixtieq li d-dispożizzjonijiet ta’ din il-proposta jiġu applikati għal kull komunità ermarġinata, u mhux biss għal dik imsemmija speċifikament fil-premessi tal-proposta. Bħala prinċipju, dawn id-dispożizzjonijiet għandhom japplikaw ukoll fl-Istati Membri kollha tal-Unjoni Ewropea.

2.2.   Il-KESE huwa tal-fehma li jkun siewi li jiġu estiżi d-dispożizzjonijiet ta’ din il-proposta, li għandhom japplikaw kemm għas-sostituzzjoni ta’ djar eżistenti b’bini ġdid, kif ukoll għar-restawr ta’ bini eżistenti, filwaqt li jiġu garantiti ekonomiji tal-enerġija u s-sostenibbiltà.

2.3.   Il-KESE jilqa’ b’mod favorevoli s-semplifikazzjonijiet li qed isiru, iżda b’mod ġenerali jwissi kontra wisq bidliet fil-leġiżlazzjoni tul l-istess perijodu ta’ programmazzjoni billi dan jista’ jwassal għal iktar inċertezza amministrattiva għall-partijiet ikkonċernati meta r-regoli jinbidlu matul dan il-perijodu.

(1)  Ir-Regolament (KE) Nru 1080/2006 tal-Parlament Ewropew u tal-Kunsill tal-5 ta’ Lulju 2006 emendat mir-Regolament (KE) Nru 397/2009, ĠU L 210/1, 31.7.2006.