[pic] | Il-KUMMISSJONI TAL-KOMUNITAJIET EWROPEJ |

Brussell, 11.3.2008

COM(2008) 144 finali

2006/0144 (COD)

KOMUNIKAZZJONI TAL-KUMMISSJONI LILL-PARLAMENT EWROPEW

skond it-tieni subparagrafu ta' l-Artikolu 251(2) tat-Trattat tal-KE dwar pożizzjoni komuni tal-Kunsill dwar l-adozzjoni ta’ Regolament tal-Parlament Ewropew u tal-Kunsill dwar enzimi fl-ikel u li jemenda d-Direttiva tal-Kunsill 83/417/KEE, Regolament tal-Kunsill (KE) Nru 1493/1999, Direttiva 2000/13/KE, Direttiva tal-Kunsill 2001/112/KE u Regolament (KE) Nru 258/97

2006/0144 (COD)

KOMUNIKAZZJONI TAL-KUMMISSJONI LILL-PARLAMENT EWROPEW

skond it-tieni subparagrafu ta' l-Artikolu 251(2) tat-Trattat tal-KE dwar pożizzjoni komuni tal-Kunsill dwar l-adozzjoni ta’ Regolament tal-Parlament Ewropew u tal-Kunsill dwar enzimi fl-ikel u li jemenda d-Direttiva tal-Kunsill 83/417/KEE, Regolament tal-Kunsill (KE) Nru 1493/1999, Direttiva 2000/13/KE, Direttiva tal-Kunsill 2001/112/KE u Regolament (KE) Nru 258/97

IL-KUNTEST

Id-data ta' trażmissjoni tal-proposta lill-PE u lill-Kunsill (dokument COM(2006) 0425 finali - 2006/0144 (COD): | 28 ta' Lulju 2006. |

Id-data ta' l-opinjoni tal-Kumitat Ekonomiku u Soċjali Ewropew: | 25 ta' April 2007. |

Id-data ta' l-opinjoni tal-Parlament Ewropew, l-ewwel qari: | 10 ta' Lulju 2007. |

Id-data ta' trażmissjoni tal-proposta emendata: Id-data tal-ftehim politiku | 24 ta' Ottubru 2007. 17 ta' Diċembru 2007. |

Id-data ta’ l-adozzjoni tal-pożizzjoni komuni: | 10 ta' Marzu 2008. |

L-GĦAN TAL-PROPOSTA TAL-KUMMISSJONI

Il-Kummissjoni ħabbret fil-White Paper dwar is-Sikurezza fl-Ikel proposta li temenda d-Direttiva qafas 89/107/KEE dwar l-additivi fl-ikel biex jiġu stabbiliti dispożizzjonijiet speċifiċi dwar l-enzimi fl-ikel. Evalwazzjoni fil-fond tal-qagħda wasslet għall-iżvilupp ta' proposta speċifika għal enzimi fl-ikel.

Bħalissa l-ambitu tad-Direttiva 89/107/KEE jkopri biss enzimi użati bħala additivi fl-ikel. L-enzimi li jibqa' mhumiex regolati xejn jew huma regolati bħala għajnuna fl-ipproċessar skond il-leġiżlazzjoni ta' l-Istati Membri, li mhiex l-istess. Fir-rigward tas-sikurezza, la hemm evalwazzjoni tas-sikurezza lanqas awtorizzazzjoni ta' enzimi ta' l-ikel fuq livell Ewropew, għajr għal dawk li jitqiesu bħala additivi fl-ikel. Il-proposta għandha l-għan li tistabbilixxi regoli armonizzati għal enzimi ta' l-ikel f’livell tal-Komunità, biex iġġib 'il quddiem il-kummerċ ġust u t-tħaddim effettiv tas-suq intern u biex tiżgura t-tħaris tas-saħħa tal-bniedem u l-interess tal-konsumaturi.

KUMMENTI DWAR IL-POŻIZZJONI KOMUNI

Kumment ġenerali

Il-Kummissjoni tappoġġja l-pożizzjoni komuni kif adottata mill-Kunsill fl-10 ta' Marzu 2008. Din hija konformi ma’ l-għanijiet u l-approċċ meħud fil-proposta oriġinali tal-Kummissjoni u tirrifletti l-prinċipji ta' ħafna emendi proposti mill-Parlament Ewropew.

Emendi mwettqa mill-Parlament Ewropew fl-ewwel qari

Emendi aċċettati mill-Kummissjoni u li huma konformi mal-pożizzjoni komuni:

Għal dik li hija bażi legali tar-Regolament propost, il-pożizzjoni komuni ħassret l-Artikolu 37 tat-Trattat u dan huwa konformi ma' l-emenda 35 magħmula mill-Parlament Ewropew (PE) matul l-ewwel qari.

Għal dawk li huma kriterji għall-awtorizzazzjoni ta' enzimi ta' l-ikel il-pożizzjoni komuni tiċċara xi tfisser tqarraq bil-konsumatur (premessa 6) li tindirizza xi uħud mill-konsiderazzjonijiet ta' l-emendi tal-PE 4 u 16.

Il-pożizzjoni komuni introduċiet definizzjoni ta' 'preparazzjoni ta' enzima ta' l-ikel' (Artikolu 3) li hija simili għal talba tal-PE skond l-emenda 14.

L-Artikolu 5, il-ġdid, tal-pożizzjoni komuni ċċara li enzima ta' l-ikel jew ikel li fih tintuża enzima ma għandhiex titqiegħed fis-suq jekk l-enzima jew l-użu tagħha mhux konformi mar-Regolament propost.

Din il-kjarifika ntalbet wkoll mill-PE fl-emenda 15.

Dwar ir-rapport bejn ir-Regolament propost dwar enzimi ta' l-ikel u r-Regolament (KE) Nru 1829/2003 dwar ikel u għalf modifikat ġenetikament, il-PE kien ċċara fl-emendi 7 u 34 li l-proċeduri ta' evalwazzjoni u awtorizzazzjoni skond iż-żewġ Regolamenti għandhom jimxu simultanjament. Il-prinċipju ta' dawn l-emendi huwa rifless fil-pożizzjoni komuni (premessa 11 u l-Artikolu 8).

Il-Premessi 20 u 21 u l-Artikoli 15 u 17 tal-pożizzjoni komuni ġew modifikati biex tiġi introdotta l-proċedura regolatorja bi skrutinju u biex jiġi allineat b'mod ġenerali r-Regolament propost mad-Deċiżjoni tal-Kunsill 2006/512/KE li temenda d-Deċiżjoni 1999/468/KE li tistabbilixxi l-proċeduri għall-eżerċizzju tal-poteri ta' implimentazzjoni mogħtija lill-Kummissjoni. Dawn id-dispożizzjonijiet huma koerenti ma' l-emendi 10,28 u 30 tal-PE.

Għal dak li huwa ttikkettjar ta' enzimi ta' l-ikel mibjugħ minn stabbiliment kummerċjali għal ieħor jew direttament lill-konsumatur aħħari , il-PE adotta fl-ewwel qari għadd ta' emendi bil-ħsieb li jissimplifika d-dispożizzjonijiet dwar l-ittikkettjar. Il-pożizzjoni komuni inkorporat simplifikazzjoni simili. Minkejja d-differenzi fl-istruttura u fil-kliem ir-rekwiżiti dwar l-ittikkettjar għall-enżimi fl-ikel huma b'mod ġenerali l-istess, għajr għad-dispożizzjoni ta' l-emenda 21 tal-PE li teħtieġ informazzjoni dwar "l-effetti kollaterali ta' l-użu tagħhom fi kwantitajiet eċċessivi", li mhiex approvata fil-pożizzjoni komuni. L-għan tad-dispożizzjoni tal-PE skond l-emenda 21, li teħtieġ li l-enzimi ta' l-ikel jiżdiedu ma' l-ikel b'doża strettament neċessarja biss biex jinkiseb l-għan li għalih jintużaw, ġie adottat fil-pożizzjoni komuni skond l-Artikolu 7(2), fejn ġie introdott il-prinċipju tal- quantum satis, kif iddefinit fir-Regolament propost dwar l-addittivi fl-ikel. Il-pożizzjoni komuni marret pass 'il quddiem fl-issemplifikazzjoni tad-dispożizzjonijiet dwar l-ittikkettjar għall-enzimi fl-ikel mibjugħa direttament lill-konsumatur aħħari, billi dawn l-enzimi jitqiesu bħala ikel u għalhekk koperti mid-dispożizzjonijiet dwar l-ittikkettjar tad-Direttiva 2000/13/KE dwar l-ittikkettjar, preżentazzjoni u reklamar tal-prodotti ta' l-ikel (Artikolu 12). Il-proposta emendata tal-Kummissjoni adottat l-ideat ewlenin ta' l-emendi tal-PE u tirrifletti d-dispożizzjonijiet dwar l-ittikkettjar approvati mill-Kunsill fil-pożizzjoni komuni.

L-emenda 31 tal-PE temenda r-Regolament (KE) Nru 258/97 dwar ikel ġdid biex tiċċara li l-enzimi ta' l-ikel li huma koperti mir-Regolament propost dwar l-enzimi ta' l-ikel se jiġu esklużi mill-ambitu tar-Regolament dwar ikel ġdid. Din l-emenda hija approvata fl-Artikolu 23 tal-pożizzjoni komuni.

Il- miżuri tranżitorji addizzjonali inkorporati fl-Artikolu 18 tal-pożizzjoni komuni jirriflettu totalment l-emenda 36 tal-PE.

Emendi mhux inkorporati fil-pożizzjoni komuni, li huma madankollu aċċettati mill-Kummissjoni fil-proposta emendata bħala tali jew soġġetti għal tibdil fil-mod kif inhuma miktuba:

L-emendi tal-PE 2, 8 u 17 itejbu l-proposta mill-punt tekniku (per eżempju l-introduzzjoni ta' definizzjoni ta' enzima) u editorjali u huma inkorporati fil-proposta emendata tal-Kummissjoni.

Il-PE ċċara li r-regolament propost ma japplikax għal enzimi ta' l-ikel maħsuba għal konsum dirett mill-bniedem, bħal enzimi għal għanijiet ta' nutriment jew enzimi użati bħala għajnuna għad-diġestjoni. Din il-kjarifika hija konformi mal-proposta tal-Kummissjoni u għalhekk ġiet aċċettata fil-proposta emendata. Il-Kunsill ma daħħalx kjarifika bħal din fil-pożizzjoni komuni.

Għar-rigward ta' enzimi fl-ikel li diġà jinsabu fis-suq, il-PE pproponihom biex jiġu trasferiti direttament fil-lista tal-Komunità (' awtorizzazzjoni mgħaġġla' ), jekk l-Awtorità Ewropea dwar is-Sikurezza fl-Ikel (EFSA) tkun sodisfatta bl-evalwazzjoni ta' qabel dwar is-sikurezza mwettqa fil-livell nazzjonali jew tal-Komunità. Il-Kummissjoni kienet tal-fehma li trasferiment awtomatiku ta' enzimi ta' l-ikel fil-lista tal-Komunità, mingħajr evalwazzjoni minn qabel mill-EFSA, mhix ħaġa xierqa. Iżda, hija prassi normali li meta l-EFSA tevalwa sustanzi hija tikkonsidra kull stima xjentifika rilevanti li titwettaq minn istituzzjonijiet oħra. Il-Kummissjoni għalhekk introduċiet fil-proposta emendata kliem li jiċċara li l-EFSA tista' tikkonsidra opinjonijiet attwali bħala parti mill-evalwazzjoni tagħha.

Dispożizzjonijiet ġodda introdotti mill-Kunsill

Il-pożizzjoni komuni (Artikolu 2) teskludi mill- ambitu tar-Regolament propost, enzimi ta' l-ikel użati esklużivament fil-produzzjoni ta' sustanzi li jgħinu fl-ipproċessar, filwaqt li min-naħa l-oħra tinkludi fi ħdan l-ambitu enzimi użati fil-produzzjoni ta' ikel ġdid u fil-produzzjoni ta' ħwawar . Il-Kunsill kien tal-fehma li l-esklużjoni inizjali proposta ta' enzimi għal ħwawar mhiex ġustifikata billi xi ħwawar, bħal per eżempju preparazzjonijiet ta' ħwawar minn sorsi ta' l-ikel, mhumiex evalwati għas-sikurezza tagħhom. Il-Kummissjoni qajmet tħassib li miżura bħal din tkun bla proporzjon meta titqies il-kwantità żgħira ta' enzimi użati fil-produzzjoni ta' ħwawar li min-naħa tagħhom jiżdiedu f'ammonti żgħar fl-ikel. Iżda, billi l-biċċa l-kbira ta' l-enzimi użati fil-produzzjoni ta' ħwawar jidher li huma l-istess bħall-enzimi użati f'affarijiet oħra ta' l-ikel, din l-emenda ma jkollhiex impatt prattiku ewlieni, meta jitqies l-għadd żgħir ta' enzimi kkonċernati u tista' tiġi aċċettata mill-Kummissjoni.

Il-pożizzjoni komuni saħħet ir-rekwiżit stabbilit diġà fil-proposta tal-Kummissjoni li enzimi prodotti minn metodi ta' produzzjoni differenti għandhom jiġu evalwati għas-sikurezza tagħhom qabel ma jistgħu jintużaw. Il-pożizzjoni komuni ssaħħaħ il-proposta billi ttenni t-test ta' premessa f'artikolu (Artikolu 14(2)). Il-proposta emendata tal-Kummissjoni inkludiet artikolu ġdid għal dan il-għan.

Il-Kunsill iċċara fil-pożizzjoni komuni l-prinċipju diġà inkluż fil-Liġi dwar l-Ikel Ġenerali (ir-Regolament (KE) Nru 178/2002) li r-regoli dwar enzimi ta' l-ikel se jiżguraw it-tħaddim effettiv tas-suq intern u livell għoli ta' ħarsien tas-saħħa tal-bniedem u ħarsien ta' l-interessi tal-konsumaturi, inkluża prassi ġusta fil-kummerċ ta' l-ikel, filwaqt li jitqies, fejn huwa xieraq, il-ħarsien ta' l-ambjent. Dan it-tibdil iżomm ukoll il-konsistenza mar-Regolament propost dwar l-additivi fl-ikel u emendi rilevanti tal-PE dwar din il-proposta. Il-Kummissjoni tista' taċċetta dan it-tibdil.

Dwar ir-rapport bejn ir-Regolament propost dwar enzimi ta' l-ikel u r-Regolament (KE) Nru 1830/2003 fir-rigward ta' l-identifikatur uniku attribwit lil OMĠ, il-PE ċċara d-dispożizzjoni rilevanti tal-proposta. Il-Kummissjoni aċċettat din il-kjarifika fil-proposta emendata. Il-Kunsill ħassar id-dispożizzjonijiet rilevanti għall-identifikatur uniku mill-premessa 8 u l-Artikolu 7(2) tal-pożizzjoni komuni. Dan it-tħassir huwa teknikament korrett u jista' jkollu l-appoġġ tal-Kummissjoni.

Il-Kunsill inkluda wkoll fil-pożizzjoni komuni Artikolu ġdid, l-Artikolu 9, biex jipprovdi, fejn meħtieġ, għal deċiżjonijiet ta' interpretazzjoni skond il-proċedura regolatorja dwar jekk ċerta sustanza hiex enzima ta' l-ikel jew jekk ikel partikolari jagħmilx parti minn kategorija ta' l-ikel fil-lista tal-Komunità.

Fl-aħħarnett il-pożizzjoni komuni mmodifikat aktar id-Direttiva 2000/13/KE biex teskludi mill-ittekkettar fl-ikel fi stadju aħħari ta' sustanzi użati fi kwantitajiet strettament meħtieġa bħala solventi jew mezzi għal enzimi, kif inhu l-każ bħalissa għal addittivi u ħwawar. Dan huwa teknikament korrett.

4. KONKLUŻJONI

Il-Kummissjoni jidhrilha li l-pożizzjoni komuni tirrifletti għal kollox l-elementi ewlenin tal-proposta inizjali u ta' l-ispirtu ta' ħafna mill-emendi tal-Parlament Ewropew magħmula fl-ewwel qari.

Il-Kummissjoni għalhekk taqbel mal-pożizzjoni komuni kif adottata mill-Kunsill b'mod unanimu.