6.5.2008   

MT

Il-Ġurnal Uffiċjali ta’ l-Unjoni Ewropea

CE 111/10

POŻIZZJONI KOMUNI (KE) Nru 7/2008

adottata mill-Kunsill fl-10 ta' Marzu 2008

bil-ħsieb li tadotta r-Regolament (KE) Nru …/2008 tal-Parlament u tal-Kunsill ta' … li jistabbilixxi proċedura ta' awtorizzazzjoni komuni għall-addittivi, l-enżimi u l-aromatizzanti ta' l-ikel

(Test b'rilevanza għaż-ŻEE)

(2008/C 111 E/02)

IL-PARLAMENT EWROPEW U L-KUNSILL TA' L-UNJONI EWROPEA,

Wara li kkunsidraw it-Trattat li jistabbilixxi l-Komunità Ewropea, u b'mod partikolari l-Artikolu 95 tiegħu,

Wara li kkunsidraw il-proposta mill-Kummissjoni,

Wara li kkunsidraw l-opinjoni tal-Kumitat Ekonomiku u Soċjali Ewropew (1),

Waqt li jaġixxu skond il-proċedura stabbilita fl-Artikolu 251 tat-Trattat (2),

Billi:

(1)

Il-moviment liberu ta' ikel mhux perikoluż u sustanzjuż huwa aspett essenzjali tas-suq intern u jikkontribwixxi b'mod sinifikanti għas-saħħa u għall-benesseri taċ-ċittadini, u għall-interessi soċjali u ekonomiċi tagħhom.

(2)

Livell għoli ta' protezzjoni għall-ħajja u s-saħħa tal-bniedem għandu jiġi żgurat biex titwettaq il-politika tal-Komunità.

(3)

Dan ir-Regolament jieħu post id-Direttivi u d-Deċiżjonijiet preċedenti li jikkonċernaw l-addittivi ta' l-ikel permessi għall-użu fl-ikel, bil-ħsieb li jkunu żgurati l-funzjonament effettiv tas-suq intern u livell għoli ta' protezzjoni għas-saħħa tal-bniedem u għall-interessi tal-konsumaturi permezz ta' proċeduri komprensivi u semplifikati.

(4)

Dan ir-Regolament jarmonizza l-użu ta' l-addittivi ta' l-ikel f'ikel fil-Komunità. Dan jinkludi l-użu ta' addittivi ta' l-ikel f'ikel koperti bid-Direttiva tal-Kunsill 89/398/KEE tat-3 ta' Mejju 1989 dwar l-approssimazzjoni tal-liġijiet ta' l-Istati Membri dwar l-oġġetti ta' l-ikel għal użu ta' nutriment partikolari (3) u l-użu ta' ċerti kuluri ta' l-ikel għall-immarkar tas-saħħa tal-laħam u għat-tiżjin u għall-istampar tal-bajd. Dan jarmonizza wkoll l-użu ta' addittivi ta' l-ikel fl-addittivi ta' l-ikel u fl-enzimi ta' l-ikel, biex b'hekk ikunu żgurati s-sigurtà u l-kwalità tagħhom u jiġu ffaċilitati l-ħażna u l-użu tagħhom. Dan qabel ma kienx regolat fuq livell Komunitarju.

(5)

L-addittivi ta' l-ikel huma sustanzi li normalment ma jkunux ikkonsmati bħala ikel innifsu iżda jiġu miżjuda intenzjonalment ma' l-ikel għal skop teknoloġiku deskritt f'dan ir-Regolament, bħall-preservazzjoni ta' l-ikel. L-addittivi kollha ta' l-ikel għandhom ikunu koperti minn dan ir-Regolament, u għalhekk fid-dawl ta' progress xjentifiku u żvilupp teknoloġiku l-lista ta' klassijiet funzjonali għandha tiġi aġġornata. Madankollu, sustanzi m'għandhomx jitqiesu bħala addittivi ta' l-ikel meta dawn jintużaw għall-iskop li jaromatizzaw u/jew jagħtu togħma jew għal finijiet nutrittivi, bħas-sostituti tal-melħ, il-vitamini u l-minerali. Barra minn hekk, sustanzi meqjusa bħala ikel li jistgħu jintużaw għal funzjoni teknoloġika, bħall-klorur tas-sodju jew iż-żagħfran għall-kulur u l-enzimi ta' l-ikel, ukoll m'għandhomx jaqgħu fl-ambitu ta' dan ir-Regolament. Madankollu, l-preparati li jinkisbu mill-ikel u minn materjali oħrajn li ġejjin minn sorsi naturali, li huma intiżi li jkollhom effett teknoloġiku fl-ikel finali u li jinkisbu mill-estrazzjoni selettiva tal-kostitwenti (eż. pigmenti) relattiva għall-kostitwenti nutrittivi jew aromatiċi għandhom jiġu kkunsidrati addittivi fit-tifsira ta' dan ir-Regolament. Fl-aħħarnett, l-enżimi ta' l-ikel huma koperti bir-Regolament (KE) Nru …/2008 tal-Parlament Ewropew u tal-Kunsill ta' … dwar l-enżimi ta' l-ikel u li jemenda d-Direttiva tal-Kunsill 83/417/KEE, Regolament tal-Kunsill (KE) Nru 1493/1999, Direttiva 2000/13/KE, Direttiva tal-Kunsill 2001/112/KE u Regolament (KE) Nru 258/97 (4), li jeskludi l-applikazzjoni ta' dan ir-Regolament.

(6)

Is-sustanzi li ma jiġux ikkonsmati bħala ikel fihom infushom iżda jintużaw apposta fl-ipproċessar ta' l-ikel, li jibqgħu biss bħala residwi fl-ikel finali u li ma jkollhomx effett teknoloġiku fil-prodott finali (għajnuniet għall-ipproċessar), m'għandhomx ikunu koperti b'dan ir-Regolament.

(7)

L-addittivi ta' l-ikel għandhom jiġu approvati u użati biss jekk dawn jissodisfaw il-kriterji stabbiliti f'dan ir-Regolament. L-addittivi ta' l-ikel m'għandhomx ikunu perikolużi meta jintużaw, għandu jkun hemm ħtieġa teknoloġika għall-użu tagħhom, u l-użu tagħhom m'għandux jiżgwida lill-konsumatur u l-użu tagħhom għandu jkun ta' benefiċċju għall-konsumatur. L-iżgwidar tal-konsumatur jinkludi, iżda mhux limitat għal, kwistjonijiet relatati man-natura, il-freskezza, il-kwalità ta' l-ingredjenti użati, kemm huwa naturali prodott jew il-proċess ta' produzzjoni, jew il-kwalità nutrittiva tal-prodott. L-approvazzjoni ta' l-addittivi ta' l-ikel għandha tieħu kont ukoll ta' fatturi oħrajn rilevanti għall-kwistjoni li tkun qed tiġi kkunsidrata inklużi fatturi soċjetali, ekonomiċi, tradizzjonali, etiċi u ambjentali u l-fattibbiltà tal-kontrolli. L-użu u l-livelli massimi ta' addittiv ta' l-ikel għandhom jieħdu kont tal-konsum ta' l-addittiv ta' l-ikel minn sorsi oħrajn u l-esponiment għall-addittiv ta' l-ikel minn gruppi speċjali ta' konsumaturi (per eżempju konsumaturi allerġiċi).

(8)

L-addittivi ta' l-ikel għandhom jikkonformaw ma' l-ispeċifikazzjonijiet approvati ligħandhom jinkludu informazzjoni biex ikun identifikat b'mod adegwat l-addittiv ta' l-ikel, inkluża l-oriġini u biex ikunu deskritti l-kriterji aċċettabbli ta' purità. L-ispeċifikazzjonijiet żviluppati qabel għall-addittivi ta' l-ikel inklużi fid-Direttiva tal-Kummissjoni 95/31/KE tal-5 ta' Lulju 1995 li tistabbilixxi l-kriterji speċifiċi tal-purità ta' sustanzi li jagħtu l-ħlewwa għall-użu f'oġġetti ta' l-ikel (5), id-Direttiva tal-Kummissjoni 95/45/KE tas-26 ta' Lulju 1995 li tippreskrivi l-kriterji speċifiċi tal-purità ta' sustanzi ta' taħlil għall-użu fl-ikel (6) u d-Direttiva tal-Kummissjoni 96/77/KE tat-2 ta' Diċembru 1996 li tispeċifika l-kriterja tal-purità rigward l-addittivi ta' l-ikel apparti mill-kuluri u s-sustanzi li jagħtu l-ħlewwa (7), għandhom jinżammu sakemm l-addittivi korrispondenti jiġu inklużi fl-Annessi għal dan ir-Regolament. Meta jsir dan, l-ispeċifikazzjonijiet relatati ma' tali addittivi għandhom jitniżżlu f'Regolament. Dawk l-ispeċifikazzjonijiet għandhom jirrelataw direttament ma' l-addittivi inklużi fil-listi Komunitarji fl-Annessi għal dan ir-Regolament. Madankollu, meta jitqiesu n-natura u s-sustanza komplessi ta' tali speċifikazzjonijiet, għall-iskop ta' ċarezza, dawn m'għandhomx jiġu integrati bħala tali fil-listi Komunitarji iżda għandhom jitniżżlu f'Regolament separat wieħed jew aktar.

(9)

Uħud mill-addittivi ta' l-ikel huma permessi għal użi speċifiċi għal ċerta prattika u ċerti proċessi enoloġiċi. L-użu ta' tali addittivi ta' l-ikel għandu jikkonforma ma' dan ir-Regolament u mad-dispożizzjonijiet speċifiċi stabbiliti fil-leġislazzjoni Komunitarja rilevanti.

(10)

Sabiex tkun żgurata l-armonizzazzjoni, il-valutazzjoni tar-riskju u l-approvazzjoni ta' l-addittivi ta' l-ikel għandhom jitwettqu skond il-proċedura stabbilita fir-Regolament (KE) Nru …/2008 tal-Parlament Ewropew u tal-Kunsill ta' … li jistabbilixxi proċedura ta' awtorizzazzjoni komuni għall-addittivi ta' l-ikel, l-enżimi ta' l-ikel u l-aromatizzanti ta' l-ikel (8).

(11)

Taħt ir-Regolament (KE) Nru 178/2002 tal-Parlament Ewropew u tal-Kunsill tat-28 ta' Jannar 2002 li jistabbilixxi l-prinċipji ġenerali u l-ħtiġijiet tal-liġi dwar l-ikel, li jistabbilixxi l-Awtorità Ewropea dwar is-Sigurtà fl-Ikel u jistabbilixxi l-proċeduri fi kwistjonijiet ta' sigurtà ta' l-ikel (9), l-Awtorità Ewropea dwar is-Sigurtà fl-Ikel (minn hawn 'il quddiem imsejħa l-“Awtorità”), għandha tiġi kkonsultata dwar kwistjonijiet li probabbilment jaffettwaw is-saħħa pubblika.

(12)

Addittiv ta' l-ikel li jaqa' fil-kamp ta' applikazzjoni tar-Regolament (KE) Nru 1829/2003 tal-Parlament Ewropew u tal-Kunsill tat-22 ta' Settembru 2003 dwar ikel u għalf modifikat ġenetikament (10), għandu jkun soġġett għall-proċedura ta' awtorizzazzjoni taħt dak ir-Regolament fir-rigward tal-valutazzjoni tas-sigurtà tal-modifika ġenetika, filwaqt li l-awtorizzazzjoni finali ta' l-addittiv ta' l-ikel għandha tingħata taħt dan ir-Regolament.

(13)

Addittiv ta' l-ikel li kien diġà approvat taħt dan ir-Regolament li jitħejja b'metodi ta' produzzjoni jew bl-użu ta' materjali tal-bidu li huma differenti b'mod sinifikanti minn dawk li huma inklużi fil-valutazzjoni tar-riskju ta' l-Awtorità, jew differenti minn dawk koperti mill-ispeċifikazzjonijiet stabbiliti, għandu jiġu sottomess għall-evalwazzjoni mill-Awtorità. Differenti b'mod sinifikanti tista' tfisser inter alia bidla fil-metodu tal-produzzjoni mill-estrazzjoni minn pjanta sal-produzzjoni bil-fermentazzjoni bl-użu ta' mikroorganiżmu jew modifika ġenetika tal-mikroorganiżmu oriġinali, bidla fil-materjali tal-bidu, jew bidla fid-daqs tal-partiċella.

(14)

L-addittivi ta' l-ikel għandhom jinżammu taħt osservazzjoni kontinwa u għandhom ikunu evalwati mill-ġdid kull meta jkun meħtieġ fid-dawl tal-kondizzjonijiet ta' l-użu li jinbidlu u fid-dawl ta' informazzjoni xjentifika ġdida.

(15)

L-Istati Membri li fl-1 ta' Jannar 1992 żammew il-projbizzjonijiet dwar l-użu ta' ċerti addittivi f'ċerti ikel speċifiċi li jitqiesu tradizzjonali u li jiġu prodotti fit-territorju tagħhom għandhom jingħataw il-permess li jkomplu japplikaw dawk il-projbizzjonijiet. Madankollu, fir-rigward ta' prodotti bħall-“Feta” jew is-“Salame cacciatore”, ir-Regolament preżenti għandu jkun mingħajr preġudizzju għal regoli aktar restrittivi li huma marbuta ma' l-użu ta' ċerti denominazzjonijiet taħt ir-Regolament tal-Kunsill (KE) Nru 510/2006 tal-20 ta' Marzu 2006 dwar il-protezzjoni ta' l-indikazzjonijiet ġeografiċi u d-denominazzjoni ta' l-oriġini tal-prodotti agrikoli u l-prodotti ta' l-ikel (11) u r-Regolament tal-Kunsill (KEE) Nru 2082/92 ta' l-14 ta' Lulju 1992 dwar ċertifikati ta' karattru speċifiku għall-prodotti agrikoli u l-prodotti ta' l-ikel (12).

(16)

Sakemm mhux soġġett għal aktar restrizzjonijiet, addittiv jista' jkun preżenti fl-ikel, b'mod ieħor li m'huwiex b'żieda diretta, bħala riżultat ta' riportar minn ingredjent li fih kien permess l-addittiv, sakemm il-livell ta' l-addittiv fl-ikel finali m'huwiex akbar minn dak li kien jiġi introdott bl-użu ta' l-ingredjent taħt kondizzjonijiet teknoloġiċi korretti u prattika tajba ta' manifatturar.

(17)

L-addittivi ta' l-ikel jibqgħu soġġetti għall-obbligi ġenerali tat-tikkettjar kif previst fid-Direttiva 2000/13/KE tal-Parlament Ewropew u tal-Kunsill ta' l-20 ta' Marzu 2000 dwar l-approssimazzjoni tal-liġijiet ta' l-Istati Membri li għandhom x'jaqsmu ma' tikkettjar, preżentazzjoni u reklamar ta' prodotti ta' l-ikel (13) u, kif jista' jkun il-każ, fir-Regolament (KE) Nru 1829/2003 u fir-Regolament (KE) Nru 1830/2003 tal-Parlament Ewropew u tal-Kunsill tat-22 ta' Settembru 2003 dwar dwar it-traċċjabilità u l-ittikkettjar ta' organiżmi modifikati ġenetikament u t-traċċjabilità ta' prodotti ta' l-ikel u għalf manifatturati minn organiżmi modifikati ġenetikament (14). Barra minn hekk, f'dan ir-Regolament għandhom jinstabu d-dispożizzjonijiet speċifiċi dwar it-tikkettar ta' l-addittivi ta' l-ikel mibjugħa bħala tali lill-manifattur jew lill-konsumatur finali.

(18)

Sustanzi li jagħtu l-ħlewwa taħt dan ir-Regolament jistgħu jintużaw f'sustanzi li jagħtu l-ħlewwa ta' fuq il-mejda mibjugħa direttament lill-konsumaturi. Il-manifatturi ta' tali prodotti għandhom jagħmlu l-informazzjoni disponibbli lill-konsumatur b'mezzi adegwati sabiex dawn ikunu jistgħu jużaw il-prodotti b'mod sigur. Tali informazzjoni tista' ssir disponibbli b'numru ta' modi inklużi fuq it-tikketti tal-prodotti, siti ta' l-internet, linji telefoniċi ta' informazzjoni għall-konsumatur jew fil-post tal-bejgħ. Sabiex ikun hemm approċċ uniformi rigward l-implimentazzjoni ta' din il-ħtieġa, tista' tkun meħtieġa gwida mfassla fil-livell Komunitarju.

(19)

Il-miżuri meħtieġa għall-implimentazzjoni ta' dan ir-Regolament għandhom jiġu adottati skond id-Deċiżjoni tal-Kunsill 1999/468/KE tat-28 ta' Ġunju 1999 li tipprovdi l-proċeduri għall-eżerċizzju tas-setgħat ta' l-implimentazzjoni konferiti fuq il-Kummissjoni (15).

(20)

B'mod partikolari għandha tingħata s-setgħa lill-Kummissjoni biex temenda l-Annessi ta' dan ir-Regolament u biex tadotta miżuri transitorji xierqa. Peress li dawk il-miżuri għandhom kamp ta' applikazzjoni ġenerali u huma maħsuba biex jemendaw l-elementi mhux essenzjali ta' dan ir-Regolament, inter alia billi jissuplimentawh b' elementi ġodda mhux essenzjali, huma għandhom jiġu adottati skond il-proċedura regolatorja bi skrutinju prevista fl-Artikolu 5a tad-Deċiżjoni 1999/468/KE.

(21)

Għal raġunijiet ta' effiċjenza, il-limiti ta' żmien normali għall-proċedura regolatorja bi skrutinju għandhom ikunu mqassra għall-adozzjoni ta' ċerti emendi għall-Annessi II u III relatati ma' sustanzi diġà awtorizzati taħt leġislazzjoni Komunitarja oħra kif ukoll kwalunkwe miżura transitorja xierqa relatata ma' dawn is-sustanzi.

(22)

Sabiex tkun żviluppata u aġġornata l-leġislazzjoni Komunitarja dwar l-addittivi ta' l-ikel b'mod proporzjonat u effettiv, huwa neċessarju li tinġabar id-data, tiġi kondiviża l-informazzjoni u tkun ikkoordinata l-ħidma bejn l-Istati Membri. Għal dak l-iskop, jista' jkun utli li jsiru studji li jindirizzaw kwistjonijiet speċifiċi bil-ħsieb li jiġi ffaċilitat il-proċess tat-teħid ta' deċiżjonijiet. Huwa xieraq li bħala parti mill-proċedura baġitarja tagħha l-Komunità tkun tista' tiffinanzja tali studji. Il-finanzjament ta' tali miżuri huwa kopert mir-Regolament (KE) Nru 882/2004 tal-Parlament Ewropew u tal-Kunsill tad-29 ta' April 2004 dwar il-kontrolli uffiċjali mwettqa biex tiġi żgurata l-verifika tal-konformità mal-liġi ta' l-għalf u l-ikel, is-saħħa tal-bhejjem u ir-regoli dwar it-trattament xieraq tal-bhejjem (16).

(23)

L-Istati Membri għandhom iwettqu kontrolli uffiċjali biex jinfurzaw il-konformità ma' dan ir-Regolament skond ir-Regolament (KE) Nru 882/2004.

(24)

Minħabba li l-għan ta' dan ir-Regolament, jiġifieri li jkunu stabbiliti r-regoli Komunitarji dwar l-addittivi ta' l-ikel, ma jistax jinkiseb biżżejjed mill-Istati Membri u għalhekk, fl-interessi ta' l-unità tas-suq u minħabba l-livell għoli ta' protezzjoni tal-konsumatur, jista' jinkiseb aħjar fuq livell Komunitarju, il-Komunità tista' tadotta miżuri skond il-prinċipju tas-sussidjarjetà kif stabbilit fl-Artikolu 5 tat-Trattat. Skond il-prinċipju ta' proporzjonalità, stabbilit f'dak l-Artikolu, dan ir-Regolament ma jmurx lil hinn minn dak li huwa meħtieġ sabiex jintlaħqu dawk l-objettivi.

(25)

Wara l-adozzjoni ta' dan ir-Regolament, il-Kummissjoni, megħjuna mill-Kumitat Permanenti dwar il-Katina ta' l-Ikel u s-Saħħa ta' l-Annimali, għandha tirrevedi l-awtorizzazzjonijiet eżistenti kollha għal kriterji, għajr is-sikurezza, bħall-konsum, il-ħtieġa teknoloġika u l-potenzjal li jiġi żgwidat il-konsumatur. L-addittivi kollha ta' l-ikel li ser ikomplu jiġu awtorizzati fil-Komunità għandhom jiġu trasferiti għal-listi Komunitarji fl-Annessi II u III għal dan ir-Regolament. L-Anness III għal dan ir-Regolament għandu jkun ikkompletat bl-addittivi ta' l-ikel l-oħrajn li jintużaw fl-addittivi ta' l-ikel u l-enżimi ta' l-ikel kif ukoll l-aġenti veikoli għan-nutrijenti u l-kondizzjonijiet ta' l-użu tagħhom skond ir-Regolament (KE) Nru …/2008 (17). Biex jippermettu perijodu transitorju xieraq, id-dispożizzjonijiet fl-Anness III, għajr id-dispożizzjonijiet dwar l-aġenti veikoli għall-addittivi ta' l-ikel u l-additivi ta' l-ikel fis-sustanzi aromatizzanti, m'għandhomx japplikaw sa l-1 ta' Jannar 2011.

(26)

Sakemm jiġu stabbiliti l-listi Komunitarji futuri ta' l-addittivi ta' l-ikel, huwa meħtieġ li tiġi pprovduta proċedura simplifikata li tippermetti l-aġġornament tal-listi attwali ta' l-addittivi ta' l-ikel li jinstabu fid-Direttivi eżistenti.

(27)

Mingħajr preġudizzju għar-riżultat tar-reviżjoni imsemmija fil-premessa 25, fi żmien sena wara l-adozzjoni ta' dan ir-Regolament, il-Kummissjoni għandha tistabbilixxi programm ta' evalwazzjoni għall-Awtorità biex tkun ivvalutata mill-ġdid is-sikurezza ta' l-addittivi ta' l-ikel li kienu diġà approvati fil-Komunità. Dak il-programm għandu jiddefinixxi l-ħtiġiet u l-ordni tal-prijoritajiet li skond dawn l-addittivi ta' l-ikel approvati għandhom jiġu eżaminati.

(28)

Dan ir-Regolament jirrevoka u jissostitwixxi l-atti li ġejjin: Id-Direttiva tal-Kunsill 62/2645/KEE dwar l-approssimazzjoni tar-regoli ta' l-Istati Membri dwar materja koloranti awtorizzata għall-użu ta' affarijiet ta' l-ikel maħsuba għal konsum mill-bniedem (18), id-Direttiva tal-Kunsill 65/66/KEE tas-26 ta' Jannar 1965 li tistabbilixxi l-kriterji speċifiċi ta' purità għall-preservattivi awtorizzati għall-użu fl-oġġetti ta' l-ikel maħsuba għall-konsum mill-bniedem (19), id-Direttiva tal-Kunsill 78/663/KEE tal-25 ta' Lulju 1978 li tistabbilixxi l-kriterji speċifiċi ta' purità għall-emulsjonanti, stabilizzaturi, aġenti li jħaxxnu u ta' gelling għall-użu fl-oġġetti ta' l-ikel (20), id-Direttiva tal-Kunsill 78/664/KEE tal-25 ta' Lulju 1978 li tistabbilixxi l-kriterji speċifiċi ta' purità għall-antiossidanti awtorizzati għall-użu fl-oġġetti ta' l-ikel maħsuba għall-konsum mill-bniedem (21), l-Ewwel Direttiva tal-Kummissjoni 81/712/KEE tat-28 ta' Lulju 1981 li tistabbilixxi metodi fil-Komunità ta' analiżi biex jiġi verifikat li ċerti additivi użati fl-ikel jissodisfaw kriterji ta' purità (22), id-Direttiva tal-Kunsill 89/107/KEE tal-21 ta' Diċembru 1988 dwar l-approssimazzjoni tal-liġijiet ta' l-Istati Membri li jirrigwardaw l-addittivi ma' l-ikel awtorizzati għall-użu fl-oġġetti ta' l-ikel maħsuba għall-konsum mill-bniedem (23), id-Direttiva 94/35/KE tal-Parlament Ewropew u tal-Kunsill tat-30 ta' Ġunju 1994 dwar is-sustanzi li jagħtu ħlewwa għall-użu f'oġġetti ta' l-ikel (24), id-Direttiva 94/36/KE tal-Parlament Ewropew u tal-Kunsill tat-30 ta' Ġunju 1994 dwar il-kuluri għall-użu fl-ikel (25), id-Direttiva 95/2/KE tal-Parlament Ewropew u tal-Kunsill ta' l-20 ta' Frar 1995 dwar l-addittivi ta' l-ikel għajr kuluri u sustanzi li jagħtu ħlewwa (26), id-Deċiżjoni 292/97/KE tal-Parlament Ewropew u tal-Kunsill tad-19 ta' Diċembru 1996 dwar iż-żamma tal-liġijiet nazzjonali li jipprojbixxu l-użu ta' ċerti addittivi fil-produzzjoni ta' ċerti oġġetti ta' l-ikel speċifiċi (27) u d-Deċiżjoni tal-Kummissjoni 2002/247/KE tas-27 ta' Marzu 2002 li tissospendi t-tqegħid fis-suq u l-importazzjoni tal-ħelu tal-jelly li jkun fih l-additiv E 425 konjac (28). Madankollu, huwa xieraq li ċerti dispożizzjonijiet ta' dawk l-atti jibqgħu fis-seħħ matul perijodu transitorju biex iħallu żmien għat-tħejjija tal-listi Komunitarji fl-Annessi għar-Regolament preżenti.

ADOTTAW DAN IR-REGOLAMENT:

KAPITOLU I

SUĠĠETT, KAMP TA' APPLIKAZZJONI U DEFINIZZJONIJIET

Artikolu 1

Suġġett

Dan ir-Regolament jistabbilixxi r-regoli dwar l-addittivi ta' l-ikel użati fl-ikel biex jiżguraw il-funzjonament effettiv tas-suq intern u livell għoli ta' protezzjoni tas-saħħa tal-bniedem u protezzjoni ta' l-interessi tal-konsumaturi, inklużi prattika ġusta fil-kummerċ ta' l-ikel, b'kont meħud ta', fejn xieraq, il-protezzjoni ta' l-ambjent.

Għal dawk il-finijiet, dan ir-Regolament jipprovdi għal:

(a)

listi Komunitarji ta' addittivi ta' l-ikel approvati kif imniżżel fl-Annessi II u III;

(b)

kondizzjonijiet ta' l-użu ta' additivi fl-ikel, inkluż f'addittivi ta' l-ikel u f'enzimi ta' l-ikel kif kopert mir-Regolament (KE) Nru …/2008 (29), u ta' aromatizzanti ta' l-ikel kif koperti mir-Regolament (KE) Nru …/2008 tal-Parlament Ewropew u tal-Kunsill ta' … dwar aromatizzanti u ċerti ingredjenti ta' l-ikel b'karatteristiċi aromatizzanti għall-użu fl-ikel u li jemenda Regolament tal-Kunsill (KE) Nru 1576/89 u (KE) Nru 1601/91, Regolament (KE) Nru 2232/96 u Direttiva 2000/13/KE (30);

(c)

ir-regoli dwar l-ittikkettar ta' l-addittivi ta' l-ikel mibjugħa bħala tali.

Artikolu 2

Kamp ta' applikazzjoni

1.   Dan ir-Regolament għandu japplika għall-addittivi ta' l-ikel.

2.   Dan ir-Regolament m'għandux japplika għas-sustanzi li ġejjin sakemm ma jintużawx bħala addittivi ta' l-ikel:

(a)

għajnuniet ta' pproċessar;

(b)

sustanzi li jintużaw għall-protezzjoni tal-pjanti u tal-prodotti tal-pjanti skond ir-regoli Komunitarji li jirrelataw mas-saħħa tal-pjanti;

(c)

sustanzi miżjuda ma' l-ikel bħala nutrijenti;

(d)

sustanzi użati għat-trattament ta' l-ilma għall-konsum mill-bniedem li jaqgħu fil-kamp ta' applikazzjoni tad-Direttiva tal-Kunsill 98/83/KE tat-3 ta' Novembru 1998 dwar il-kwalita' ta' l-ilma maħsub għall-konsum mill-bniedem (31);

(e)

aromatizzanti li jaqgħu fil-kamp ta' applikazzjoni tar-Regolament (KE) Nru …/2008 (32).

3.   Dan ir-Regolament m'għandux japplika għall-enzimi ta' l-ikel li jaqgħu fil-kamp ta' applikazzjoni tar-Regolament (KE) Nru …/2008 (29).

4.   Dan ir-Regolament għandu japplika mingħajr preġudizzju għal kwalunkwe regola Komunitarja speċifika li tikkonċerna l-użu ta' l-addittivi ta' l-ikel:

(a)

f'ikel speċifiku;

(b)

għal finijiet li m'humiex dawk koperti b'dan ir-Regolament.

Artikolu 3

Definizzjonijiet

1.   Għall-iskopijiet ta' dan ir-Regolament, id-definizzjonijiet li ġew stabbiliti fir-Regolamenti (KE) Nri 178/2002 u 1829/2003 għandhom japplikaw.

2.   Għall-finijiet ta' dan ir-Regolament għandhom japplikaw ukoll id-definizzjonijiet li ġejjin:

(a)

“addittiv ta' l-ikel” għandha tfisser kwalunkwe sustanza li normalment ma tkunx ikkonsmata bħala ikel fiha nnifisha u li normalment ma tintużax bħala ingredjent karatteristiku ta' l-ikel, kemm jekk ikollha valur nutrittiv u kemm jekk le, li ż-żieda maħsuba tagħha ma' l-ikel għal għan teknoloġiku fil-manifattura, fl-ipproċessar, fil-preparazzjoni, fit-trattament, fl-ippakkjar, fit-trasport jew fil-ħażna ta' ikel bħal dan tirriżulta, jew wieħed raġonevolment jistenna li tista' tirriżulta, li huwa jew il-prodotti sekondarji tiegħu jsiru direttament jew indirettament komponent ta' ikel bħal dan;

Dawn li ġejjin ma jitqiesux bħala addittivi ta' l-ikel:

(i)

il-monosakkaridi, id-disakkaridi jew l-oligosakkaridi u l-ikel li fih dawn is-sustanzi użati għall-karatteristiċi tagħhom li jagħtu l-ħlewwa;

(ii)

l-ikel, kemm jekk niexef jew f'forma kkonċentrata, inklużi s-sustanzi aromatizzanti inkorporati waqt il-manifattura ta' ikel kompost, minħabba fil-karatteristiċi aromatiċi, bnien jew nutrittivi tagħhom flimkien ma' l-effett sekondarju li jagħtu l-kulur;

(iii)

is-sustanzi li jintużaw biex jgħattu jew jiksu materjali, li ma jifformawx parti mill-ikel u mhumiex maħsuba biex ikunu kkonsmati ma' dak l-ikel;

(iv)

il-prodotti li fihom il-pektin u li huma derivati mill-ilbieba niexfa tat-tuffieħ jew mill-qoxra tal-frott taċ-ċitru jew l-isfraġel, jew minn taħlita tagħhom, permezz ta' l-azzjoni ta' aċidu dilwit segwit min-newtralizzazzjoni parzjali b'melħ tas-sodju jew tal-potassju (“pektin likwidu”);

(v)

il-bażijiet taċ-ċjuwing-gamm;

(vi)

id-destrina bajda jew safra, il-lamtu inkaljat jew destrinat, il-lamtu modifikat bi trattament bl-aċidu jew bl-alkali, il-lamtu bbliċjat, il-lamtu fiżikament modifikat u l-lamtu ttrattat b'enzimi amilolitiċi;

(vii)

il-klorur ta' l-ammonja;

(viii)

il-plasma tad-demm, il-ġelatina li tittiekel, il-proteini idrolisati u l-melħ tagħhom, il-proteina u l-glutina tal-ħalib;

(ix)

l-aċidi amminiċi u l-melħ tagħhom għajr għall-aċidu glutamiku, għall-gliċina, għas-cysteine u għaċ-ċistin u l-melħ tagħhom li m'għandhom l-ebda funzjoni teknoloġika;

(x)

kaseinati u kaseina;

(xi)

l-inulina;

(b)

“għajnuna għall-ipproċessar” tfisser kwalunkwe sustanza li:

(i)

ma tiġix ikkonsmata bħala ikel waħidha;

(ii)

tintuża intenzjonalment fl-ipproċessar ta' materja prima, ta' ikel jew ta' l-ingredjenti tagħhom li mhumiex ipproċessati, biex jiġi sodisfatt ċertu skop teknoloġiku matul it-trattament jew l-ipproċessar; kif ukoll

(iii)

tista' tirriżulta fil-preżenza mhux maħsuba, iżda li teknikament ma tistax tkun evitata fil-prodott finali, ta' residwi tas-sustanza jew tad-derivati tagħha, sakemm ma jippreżentawx kwalunkwe riskju għas-saħħa u ma jkollhom l-ebda effett teknoloġiku fuq il-prodott finali;

(c)

“klassi funzjonali” għandha tfisser waħda mill-kategoriji stabbiliti fl-Anness I li hija bbażata fuq il-funzjoni teknoloġika li jeżerċita addittiv ta' l-ikel fl-oġġett ta' l-ikel;

(d)

“ikel mhux ipproċessat” għandha tfisser ikel li ma jkunx għadda minn kwalunkwe trattament li jirriżulta f'bidla sostanzjali fl-istat oriġinali ta' l-ikel, għal liema skop, dawn li ġejjin b'mod partikolari ma jitqisux bħala li jirriżultaw f'bidla sostanzjali: il-qsim, il-ferqien, il-qtugħ, it-tneħħija ta' l-għadam, l-ikkapuljar, it-tqaxxir tal-ġilda, il-qtugħ tat-truf, it-tqaxxir tal-qoxra, it-titħin, il-qtugħ, it-tindif, it-tirqim, id-deep-freezing, l-iffriżar, it-tkessiħ, it-titħin f'mitħna, it-tneħħija tal-ħliefa, l-ippakkjar jew l-ispakkjar;

(e)

“ikel bla zokkor miżjud” għandha tfisser ikel mingħajr dawn li ġejjin:

(i)

kwalunkwe monosakkaridi jew disakkaridi miżjudin;

(ii)

kwalunkwe ikel li fih monosakkaridi, jew disakkaridi li jintuża għall-karatteristiċi tiegħu li jagħti l-ħlewwa;

(f)

“ikel b'valur enerġetiku mnaqqas” għandha tfisser ikel b'valur enerġetiku mnaqqas b'mill-inqas 30 % meta mqabbel ma' l-ikel oriġinali jew ma' prodotti simili;

(g)

“sustanzi li jagħtu l-ħlewwa ta' fuq il-mejda” għandha tfisser preparati ta' sustanzi li jagħtu ħlewwa permessi, li jista' jkun fihom addittivi ta' l-ikel u/jew ingredjenti ta' l-ikel oħrajn u li huma maħsuba għall-bejgħ lill-konsumatur finali bħala sostitut għaz-zokkor;

(h)

“quantum satis” għandha tfisser li l-ebda livell numeriku massimu m'hu speċifikat u s-sustanzi għandhom ikunu użati skond il-prattika ta' manifattura tajba, f'livell li ma jkunx ogħla minn dak meħtieġ biex jinkiseb l-iskop maħsub u sakemm il-konsumatur ma jiġix żgwidat.

KAPITOLU II

LISTI KOMUNITARJI TA' ADDITTIVI TA' L-IKEL APPROVATI

Artikolu 4

Listi Komunitarji ta' addittivi ta' l-ikel

1.   L-addittivi ta' l-ikel inklużi fil-lista Komunitarja fl-Anness II biss jistgħu jitqiegħdu fuq is-suq bħala tali u jintużaw fl-ikel taħt il-kondizzjonijiet ta' użu speċifikati hemmhekk.

2.   L-addittivi ta' l-ikel inklużi fil-lista Komunitarja fl-Anness III biss jistgħu jintużaw fl-addittivi ta' l-ikel u, fl-enżimi ta' l-ikel u fl-aromatizzanti ta' l-ikel taħt il-kondizzjonijiet ta' użu speċifikati hemmhekk.

3.   L-addittivi ta' l-ikel fl-Anness II għandhom jiġu elenkati fuq il-bażi tal-kategoriji ta' l-ikel li magħhom jistgħu jiġu miżjuda.

4.   L-addittivi ta' l-ikel fl-Anness III għandhom jiġu elenkati fuq il-bażi ta' l-addittivi ta' l-ikel, l-enżimi ta' l-ikel, l-aromatizzanti ta' l-ikel u n-nutrijenti jew il-kategoriji tagħhom li magħhom jistgħu jiġu miżjuda.

5.   L-addittivi ta' l-ikel għandhom ikunu konformi ma' l-ispeċifikazzjonijiet kif imsemmija fl-Artikolu 13.

Artikolu 5

Projbizzjoni ta' addittivi ta' l-ikel mhux konformi u/jew -ikel mhux konformi

L-ebda persuna ma għandha tqiegħed fuq is-suq addittiv ta' l-ikel jew kwalunkwe ikel li fih huwa preżenti tali addittiv ta' l-ikel jekk l-użu ta' l-addittiv ta' l-ikel ma jikkonformax ma' dan ir-Regolament.

Artikolu 6

Kondizzjonijiet ġenerali għall-inklużjoni u l-użu ta' l-addittivi ta' l-ikel fil-listi Komunitarji

1.   Addittiv ta' l-ikel jista' jiġi inkluż fil-listi Komunitarji fl-Annessi II u III biss jekk dan jissodisfa l-kondizzjonijiet li ġejjin u fejn rilevanti fatturi leġittimi oħrajn:

(a)

fuq il-bażi ta' l-evidenza xjentifika disponibbli, dan ma joħloqx tħassib għas-sikurezza tas-saħħa tal-konsumatur fil-livell ta' l-użu propost u

(b)

hemm ħtieġa teknoloġika raġonevoli li ma tistax tinkiseb permezz ta' mezzi oħrajn li huma ekonomikament u teknoloġikament prattikabbli u

(c)

l-użu tiegħu ma jiżgwidax lill-konsumatur.

2.   Biex jiġi inkluż fil-listi Komunitarji fl-Annessi II u III, addittiv ta' l-ikel irid ikollu vantaġġi u benefiċċji għall-konsumatur, u għalhekk jaqdi wieħed mill-iskopijiet li ġejjin jew aktar:

(a)

jippreserva l-kwalità nutrizzjonali ta' l-ikel;

(b)

jipprovdi l-ingredjenti jew il-kostitwenti meħtieġa għall-ikel li jkun manifatturat għal gruppi ta' konsumaturi bi bżonnijiet ta' dieta speċjali;

(c)

ikabbar il-kwalità jew l-istabbiltà taż-żamma ta' ikel jew itejjeb il-karatteristiċi organolettiċi tiegħu, sakemm in-natura, is-sustanza jew il-kwalità ta' l-ikel ma tinbidilx b'tali mod li tiżgwida lill-konsumatur;

(d)

jgħin fil-manifattura, l-ipproċessar, il-preparazzjoni, it-trattament, l-ippakkjar, it-trasport jew il-ħżin ta' l-ikel, inklużi l-addittivi ta' l-ikel, l-enżimi ta' l-ikel u l-aromatizzanti ta' l-ikel, sakemm l-addittiv ta' l-ikel ma jintużax biex jaħbi l-effetti ta' l-użu ta' materji primi difettużi jew ta' xi prattika jew teknika mhux mixtieqa, inkluża prattika jew teknika mhux iġjenika, matul kwalunkwe tali attività.

3.   Bħala deroga mill-paragrafu 2(a), addittiv ta' l-ikel li jnaqqas il-kwalità nutrizzjonali ta' ikel jista' jiġi inkluż fil-lista Komunitarja fl-Anness II sakemm:

(a)

l-ikel ma jikkostitwixxix komponent sinifikanti ta' dieta normali; jew

(b)

l-addittiv ta' l-ikel huwa meħtieġ għall-produzzjoni ta' l-ikel għal gruppi ta' konsumaturi bi bżonnijiet ta' dieta speċjali.

Artikolu 7

Kondizzjonijiet speċifiċi għas-sustanzi li jagħtu l-ħlewwa

Addittiv ta' l-ikel jista' jkun inkluż fil-lista Komunitarja fl-Anness II għall-klassi funzjonali ta' sustanza li tagħti l-ħlewwa biss jekk, barra milli jaqdi waħda jew aktar mill-finijiet imniżżla fl-Artikolu 6(2), huwa jaqdi wkoll waħda jew aktar mill-finijiet li ġejjin:

(a)

jissostitwixxi z-zokkor għall-produzzjoni ta' ikel b'valur enerġetiku mnaqqas, ta' ikel mhux karjoġeniku jew ta' ikel bla zokkor miżjud, jew

(b)

jissostitwixxi z-zokkor fejn dan jippermetti żieda fit-tul ta' żmien qabel jiskadi l-ikel, jew

(c)

jipproduċi ikel maħsub għal użi nutrizzjonali partikolari kif iddefinit fl-Artikolu 1 (2)(a) tad-Direttiva 89/398/KEE.

Artikolu 8

Kondizzjonijiet speċifiċi għall-kuluri

Addittiv ta' l-ikel jista' jiġi inkluż fil-lista Komunitarja fl-Anness II għall-klassi funzjonali ta' kulur biss jekk, barra milli jaqdi waħda jew aktar mill-finijiet imniżżla fl-Artikolu 6(2), huwa jaqdi waħda mill-finijiet li ġejjin:

(a)

jerġa' jagħti d-dehra oriġinali ta' l-ikel li l-kulur tiegħu ġie affettwat bl-ipproċessar, bil-ħażna, bl-ippakkjar u bid-distribuzzjoni, li fejn setgħet tgħarrqet l-aċċettabilità viżwali;

(b)

jagħmel l-ikel aktar attraenti viżwalment u jgħin biex jiġu identifikati aromi normalment assoċjati ma' ikel partikolari;

(c)

jagħti l-kulur lill-ikel li kieku jkun bla kulur.

Artikolu 9

Klassijiet funzjonali ta' l-addittivi ta' l-ikel

1.   L-addittivi ta' l-ikel jistgħu jiġu assenjati fl-Annessi II u III lil waħda mill-klassijiet funzjonali fl-Anness I abbażi tal-funzjoni teknoloġika prinċipali ta' l-addittiv ta' l-ikel.

L-allokazzjoni ta' addittiv ta' l-ikel fi klassi funzjonali m'għandhiex tipprekludih milli jintuża għal diversi funzjonijiet.

2.   Fejn meħtieġ, bħala riżultat ta' progress xjentifiku jew żvilupp teknoloġiku, il-miżuri, maħsuba biex jemendaw l-elementi mhux essenzjali ta' dan ir-Regolament, relatati ma' klassijiet funzjonali addizzjonali li jistgħu jiżdiedu ma' l-Anness I għandhom jiġu adottati skond il-proċedura regolatorja bi skrutinju msemmija fl-Artikolu 26(3).

Artikolu 10

Il-kontenut tal-listi Komunitarji ta' l-addittivi ta' l-ikel

1.   Skond il-proċedura li ġiet imsemmija fir-Regolament (KE) Nru …/2008 (17), addittiv ta' l-ikel li jikkonforma mal-kondizzjonijiet imsemmija fl-Artikoli 6, 7 u 8, jista' jiġi inkluż fi:

(a)

il-lista Komunitarja fl-Anness II għar-Regolament preżenti; u/jew

(b)

il-lista Komunitarja fl-Anness III għar-Regolament preżenti.

2.   L-inklużjoni ta' addittiv ta' l-ikel fil-listi Komunitarji fl-Annessi II u III għandha tispeċifika:

(a)

l-isem ta' l-addittiv ta' l-ikel u n-numru E tiegħu;

(b)

l-ikel li miegħu jista' jiġi miżjud l-addittiv ta' l-ikel;

(c)

il-kondizzjonijiet li fihom jista' jintuża l-addittiv ta' l-ikel;

(d)

jekk xieraq, jekk ikunx hemm xi restrizzjonijiet dwar il-bejgħ ta' l-addittiv ta' l-ikel direttament lill-konsumatur finali.

3.   Il-listi Komunitarji fl-Annessi II u III għandhom jiġu emendati skond il-proċedura msemmija fir-Regolament (KE) Nru …/2008 (17).

Artikolu 11

Livelli ta' l-użu ta' l-addittivi ta' l-ikel

1.   Meta jiġu stabbiliti l-kondizzjonijiet ta' l-użu li jissemmew fl-Artikolu 10(2)(c):

(a)

il-livell ta' l-użu għandu jiġi ffissat fl-iktar livell baxx meħtieġ biex jinkiseb l-effett mixtieq;

(b)

il-livelli għandhom jieħdu kont ta':

(i)

kwalunkwe konsum aċċettabbli ta' kuljum, jew valutazzjoni ekwivalenti, li ġiet stabbilita għall-addittiv ta' l-ikel u l-konsum probabbli ta' kuljum tiegħu mis-sorsi kollha;

(ii)

fejn l-addittiv ta' l-ikel ser jintuża fl-ikel li jittiekel minn gruppi speċjali ta' konsumaturi, il-konsum possibbli ta' kuljum ta' l-addittiv ta' l-ikel mill-konsumaturi f'dawk il-gruppi.

2.   Fejn xieraq, m'għandu jiġi ffissat l-ebda livell numeriku massimu għal addittiv ta' l-ikel (quantum satis). F'dak il-każ, l-addittiv ta' l-ikel għandu jintuża skond il-prinċipju ta' quantum satis.

3.   Il-livelli massimi ta' addittivi ta' l-ikel imniżżla fl-Anness II għandhom japplikaw għall-ikel kif ikkummerċjalizzat, sakemm ma jkunx iddikjarat mod ieħor. B'deroga minn dan il-prinċipju, għall-ikel niexef u/jew ikkonċentrat li jeħtieġ jiġi rikostitwit għandhom japplikaw il-livelli massimi għall-ikel kif rikostitwit skond l-istruzzjonijiet fuq it-tikketta, b'kont meħud tal-fattur ta' dilwizzjoni minima.

4.   Il-livelli massimi għall-kuluri stabbiliti fl-Anness II għandhom japplikaw għall-kwantitajiet ta' kostitwenti koloranti li hemm fil-preparazzjoni tas-sustanza koloranti, sakemm ma jkunx iddikjarat mod ieħor.

Artikolu 12

Addittivi ta' l-ikel li jaqgħu fil-kamp ta' applikazzjoni tar-Regolament (KE) Nru 1829/2003

Addittiv ta' l-ikel li jaqa' fil-kamp ta' applikazzjoni tar-Regolament (KE) Nru 1829/2003 jista' jiġi inkluż fil-listi Komunitarji fl-Annessi II u III skond ir-Regolament preżenti biss meta jkun kopert minn awtorizzazzjoni skond ir-Regolament (KE) Nru 1829/2003.

Artikolu 13

Specifikazzjonijiet ta' l-addittivi ta' l-ikel

L-ispeċifikazzjonijiet ta' l-addittivi ta' l-ikel li jirrelataw, b'mod partikolari, ma' l-oriġini, il-kriterji tal-purità u kwalunkwe informazzjoni meħtieġa oħra, għandhom jiġu adottati meta l-addittiv ta' l-ikel ikun inkluż għall-ewwel darba fil-listi Komunitarji fl-Annessi II u III, skond il-proċedura msemmija fir-Regolament (KE) Nru …/2008 (17).

KAPITOLU III

UŻU TA' ADDITTIVI TA' L-IKEL FL-IKEL

Artikolu 14

Użu ta' addittivi ta' l-ikel fl-ikel mhux ipproċessat

L-addittivi ta' l-ikel m'għandhomx jintużaw fl-ikel mhux ipproċessat, ħlief fejn tali użu jkun speċifikament previst fl-Anness II.

Artikolu 15

Uzu ta' addittivi ta' l-ikel fl-ikel għat-trabi u għat-tfal żgħar

Addittivi ta' l-ikel m'għandhomx jintużaw f'ikel għat-trabi u għat-tfal żgħar kif imsemmi fid-Direttiva 89/398/KEE, inkluż ikel tad-dieta għat-trabi u għat-tfal żgħar għal finijiet mediċi speċjali, ħlief fejn speċifikament previst fl-Anness II għal dan ir-Regolament.

Artikolu 16

Uzu ta' kuluri għall-immarkar

Il-kuluri ta' l-ikel li huma elenkati fl-Anness II għal dan ir-Regolament biss jistgħu jintużaw għall-iskop ta' l-immarkar tas-saħħa kif previst fid-Direttiva tal-Kunsill 91/497/KEE tad-29 ta' Lulju 1991 li temenda u tikkonsolida d-Direttiva 64/433/KEE dwar problemi tas-saħħa li jaffettwaw il-kummerċ intra-Komunitarju f'laħam frisk sabiex tiġi estiża għall-produzzjoni u t-tqeghid fis-suq ta' laħam frisk (33) u għal immarkar ieħor meħtieġ fuq il-prodotti tal-laħam, għall-kuluri li jintużaw għad-dekorazzjoni tal-qxur tal-bajd u għall-istampar tal-qxur tal-bajd kif previst fir-Regolament (KE) Nru 853/2004 tal-Parlament Ewropew u tal-Kunsill tad-29 ta' April 2004 li jistabbilixxi ċerti regoli speċifiċi ta' iġjene għall-ikel li joriġina mill-annimali (34).

Artikolu 17

Principju ta' trasferiment

1.   Il-preżenza ta' addittiv ta' l-ikel għandha tkun permezz:

(a)

f'ikel kompost għajr minn kif jissemma fl-Anness II, fejn l-addittiv ta' l-ikel ikun permess f'wieħed mill-ingredjenti ta' l-ikel kompost;

(b)

f'ikel li miegħu jkun ġie miżjud addittiv ta' l-ikel, enzima ta' l-ikel jew sustanza aromatizzanti, fejn l-addittiv ta' l-ikel:

(i)

huwa permess fl-addittiv ta' l-ikel, fl-enżima ta' l-ikel jew fl-aromatizzanti ta' l-ikel skond dan ir-Regolament u

(ii)

ġie trasferit fl-ikel permezz ta' l-addittiv ta' l-ikel, l-enżima ta' l-ikel jew l-aromatizzanti ta' l-ikel u

(iii)

m'għandu l-ebda funzjoni teknoloġika fl-ikel finali;

(c)

f'ikel li se jintuża biss fil-preparazzjoni ta' ikel kompost u sakemm l-ikel kompost ikun konformi ma' dan ir-Regolament.

2.   Il-paragrafu 1 m'għandux japplika għall-formulae tat-trabi, għal formulae tal-prosegwiment, għal ikel proċessat ibbażat fuq iċ-ċereali u għal ikel għat-trabi u għal ikel tad-dieta għal skopijiet mediċi speċjali maħsub għat-trabi u għat-tfal żgħar kif jissemma fid-Direttiva 89/398/KEE, ħlief fejn ikun provdut speċifikament.

3.   Fejn addittiv ta' l-ikel f'aromatizzanti ta' l-ikel, f'addittiv ta' l-ikel jew f'enżima ta' l-ikel jiġi miżjud ma' l-ikel u jkollu funzjoni teknoloġika f'dak l-ikel, dan għandu għalhekk jitqies bħala addittiv ta' l-ikel ta' dak l-ikel u mhux addittiv ta' l-ikel tal-aromatizzanti, l-addittiv ta' l-ikel jew l-enżima ta' l-ikel miżjuda, u għandu għalhekk ikun konformi mal-kondizzjonijiet ta' l-użu għal dak l-ikel kif previst.

4.   Mingħajr preġudizzju għall-paragrafu 1, il-preżenza ta' addittiv ta' l-ikel użat bħala sustanza li tagħti l-ħlewwa għandha tkun permessa f'ikel kompost bla zokkor miżjud, f'ikel kompost b'valur enerġetiku mnaqqas, f'ikel kompost tad-dieta maħsub għal dieti b'ammont baxx ta' kaloriji, f'ikel kompost mhux karjoġeniku, u f'ikel kompost li għandu tul iżjed ta' żmien qabel jiskadi, sakemm dik is-sustanza li tagħti l-ħlewwa tkun permessa f'wieħed mill-ingredjenti ta' l-ikel kompost.

Artikolu 18

Deċiżjonijiet għall-interpretazzjoni

Fejn meħtieġ, skond il-proċedura regolatorja msemmija fl-Artikolu 26(2) jista' jiġi deċiż jekk:

(a)

ikel partikolari jappartjenix lil kategorija ta' ikel li tissemma fl-Anness II jew le; jew

(b)

addittiv ta' l-ikel elenkat fl-Annessi II u III u permess fi quantum satis jintużax skond il-kriterji msemmija fl-Artikolu 11(2); jew

(c)

sustanza partikolari tissodisfax id-definizzjoni ta' addittiv ta' l-ikel fl-Artikolu 3.

Artikolu 19

Ikel tradizzjonali

L-Istati Membri elenkati fl-Anness IV jistgħu jkomplu jipprojbixxu l-użu ta' ċerti kategoriji ta' addittivi ta' l-ikel fl-ikel tradizzjonali li jiġi prodott fit-territorju tagħhom kif elenkat f'dak l-Anness.

KAPITOLU IV

TIKKETTAR

Artikolu 20

Tikkettar ta' l-addittivi ta' l-ikel mhux maħsuba għall-bejgħ lill-konsumatur finali

1.   L-addittivi ta' l-ikel li m'humiex maħsuba għall-bejgħ lill-konsumatur finali, kemm jekk jinbiegħu wieħed wieħed jew jekk imħalltin flimkien u/jew ma' ingredjenti, kif iddefinit fl-Artikolu 6(4) tad-Direttiva 2000/13/KE, jistgħu jiġu kummerċjalizzati biss bit-tikkettar previst fl-Artikolu 21 ta' dan ir-Regolament, li trid tkun tidher faċilment, tinqara b'mod ċar u ma titħassarx. L-informazzjoni għandha tkun f'lingwa li tiftiehem faċilment mix-xerrejja.

2.   Fit-territorju tiegħu stess, l-Istat Membru li fih il-prodott jiġi kummerċjalizzat jista', skond it-Trattat, jistipula li din l-informazzjoni prevista fl-Artikolu 21 għandha tingħata f'waħda jew aktar mil-lingwi uffiċjali tal-Komunità, li għandha tiġi ddeterminata minn dak l-Istat Membru. Dan m'għandux jipprekludi li tali informazzjoni tiġi indikata f'diversi lingwi.

Artikolu 21

Ħtiġiet ġenerali tat-tikkettar għall-addittivi ta' l-ikel li m'humiex maħsuba għall-bejgħ lill-konsumatur finali

1.   Fejn l-addittivi ta' l-ikel m'humiex maħsuba għall-bejgħ lill-konsumatur finali, jinbiegħu wieħed wieħed jew imħalltin flimkien u/jew ma ingredjenti ta' l-ikel oħrajn u/jew ma'sustanzi oħrajn miżjuda magħhom, l-imballaġġ jew kontenitur għandu jkollu fuqu l-informazzjoni li ġejja:

(a)

l-isem u/jew in-numru E stabbiliti f'dan ir-Regolament fir-rigward ta' kull addittiv ta' l-ikel jew deskrizzjoni tal-bejgħ li tinkludi l-isem u/jew in-numru E ta' kull addittiv ta' l-ikel;

(b)

id-dikjarazzjoni “għall-ikel” jew id-dikjarazzjoni “użu ristrett fl-ikel” jew referenza aktar speċifika dwar l-użu maħsub tagħhom fl-ikel;

(c)

jekk meħtieġ, il-kondizzjonijiet speċjali tal-ħżin u/jew ta' l-użu;

(d)

marka li tidentifika l-lott;

(e)

l-istruzzjonijiet għall-użu, jekk l-ommissjoni tagħhom għandha tipprekludi l-użu xieraq ta' l-addittiv ta' l-ikel;

(f)

l-isem jew l-isem kummerċjali u l-indirizz tal-manifattur, ta' min jippakkja jew tal-bejjiegħ;

(g)

indikazzjoni tal-kwantità massima ta' kull komponent jew grupp ta' komponenti soġġetti għal-limitu kwantitattiv fl-ikel u/jew informazzjoni xierqa f'termini ċari u li jiftiehmu faċilment li jippermettu lix-xerrej jikkonforma ma' dan ir-Regolament jew ma' liġi Komunitarja rilevanti oħra; fejn l-istess limitu fuq il-kwantità japplika għal grupp ta' komponenti li jintużaw wieħed wieħed jew f'taħlita, il-persentaġġ kombinat jista' jingħata bħala ċifra waħda; il-limitu tal-kwantità għandu jkun espress jew numerikament jew skond il-prinċipju quantum satis;

(h)

il-kwantità netta;

(i)

id-data ta' durabbiltà minima jew id-data sa meta tista' tintuża l-aħħar;

(j)

fejn rilevanti, l-informazzjoni dwar l-addittiv ta' l-ikel jew sustanzi oħrajn imsemmija f'dan l-Artikolu u elenkati fl-Anness IIIa għad-Direttiva 2000/13/KE fir-rigward ta' l-indikazzjoni ta' l-ingredjenti preżenti fl-oġġetti ta' l-ikel.

2.   Fejn l-addittivi ta' l-ikel jinbiegħu mħalltin flimkien u/jew ma' ingredjenti ta' l-ikel oħrajn, l-imballaġġ jew il-kontenituri tagħhom għandu jkollhom fuqhom lista ta' l-ingredjenti kollha f'ordni mill-kbir saż-żgħir tal-persentaġġ tagħhom bil-piż mit-total.

3.   Fejn sustanzi (inklużi addittivi ta' l-ikel jew ingredjenti ta' l-ikel oħrajn) jiġu miżjuda ma' l-addittivi ta' l-ikel biex jiffaċilitaw il-ħżin, il-bejgħ, l-istandardizzazzjoni, id-dilwizzjoni jew it-taħlil tagħhom, l-imballaġġ jew il-kontenituri għandu jkollhom fuqhom lista ta' tali sustanzi kollha f'ordni mill-kbir saż-żgħir tal-persentaġġ tagħhom bil-piż mit-total.

4.   B'deroga mill-paragrafi 1, 2 u 3, l-informazzjoni meħtieġa fil-paragrafu 1 il-punti (e) sa (g) u fil-paragrafi 2 u 3 tista' tidher sempliċiment fuq id-dokumenti relatati mal-kunsinna li għandhom jiġu pprovduti ma' jew qabel il-kunsinna, sakemm l-indikazzjoni “mhux għall-bejgħ bl-imnut” tidher fuq parti li tidher faċilment ta' l-imballaġġ jew tal-kontenitur tal-prodott ikkonċernat.

5.   B'deroga mill-paragrafi 1, 2 u 3, fejn l-addittivi ta' l-ikel huma pprovduti f'tankers, l-informazzjoni kollha tista' tidher sempliċiment fuq id-dokumenti mehmuża relatati mal-kunsinna li għandhom jiġu pprovduti mal-kunsinna.

Artikolu 22

Tikkettar ta' l-addittivi ta' l-ikel maħsuba għall-bejgħ lill-konsumatur finali

1.   Mingħajr preġudizzju għad-Direttiva 2000/13/KE, id-Direttiva tal-Kunsill 89/396/KEE ta' l-14 ta' Ġunju 1989 dwar l-indikazzjonijiet jew il-marki li jidentifikaw il-lott li għalih jappartjeni oġġett ta' l-ikel (35) u għar-Regolament (KE) Nru 1829/2003, l-addittivi ta' l-ikel li jinbiegħu wieħed wieħed jew imħalltin flimkien u/jew ma' ingredjenti ta' l-ikel oħrajn li huma maħsuba għall-bejgħ lill-konsumatur finali jistgħu jiġu kummerċjalizzati biss jekk l-imballaġġ tagħhom ikun fih l-informazzjoni li ġejja:

(a)

l-isem u n-numru E stabbiliti f'dan ir-Regolament fir-rigward ta' kull addittiv ta' l-ikel jew deskrizzjoni tal-bejgħ li tinkludi l-isem u n-numru E ta' kull addittiv ta' l-ikel;

(b)

id-dikjarazzjoni “għall-ikel” jew id-dikjarazzjoni “użu ristrett fl-ikel” jew referenza aktar speċifika dwar l-użu maħsub tagħhom fl-ikel.

2.   B'deroga mill-paragrafu 1 (a), id-deskrizzjoni tal-bejgħ ta' sustanza li tagħti l-ħlewwa ta' fuq il-mejda għandha tinkludi t-terminu “… sustanza li tagħti l-ħlewwa ta' fuq il-mejda bbażata fuq …”, bl-użu ta' l-isem(ismijiet) tas-sustanza(i) li tagħti(jagħtu) l-ħlewwa użata(i) fil-kompożizzjoni tagħha.

3.   It-tikkettar ta' sustanza li tagħti l-ħlewwa ta' fuq il-mejda li jkun fiha polijoli u/jew aspartame u/jew il-melħ ta' l-aspartame-aċesulfame għandu jkollu fuqu t-twissijiet li ġejjin:

(a)

polioli: “konsum żejjed jista' jikkaġuna effetti lassattivi”;

(b)

aspartame/melħ ta' l-aspartame-acesulfame: “fih sors ta' fenilalanin”.

4.   Il-manifatturi ta' sustanzi li jagħtu l-ħlewwa ta' fuq il-mejda għandhom jagħmlu l-informazzjoni meħtieġa disponibbli lill-konsumatur b'mezzi adegwati sabiex dawn ikunu jistgħu jużaw il-prodotti b'mod sigur. Il-gwida għall-implimentazzjoni ta' dan il-paragrafu tista' tiġi adottata skond il-proċedura regolatorja bu skrutinju msemmija fl-Artikolu 26(3).

5.   Għall-informazzjoni prevista fil-paragrafi 1 sa 3 ta' dan l-Artikolu, għandu japplika kif meħtieġ l-Artikolu 13(2) tad-Direttiva 2000/13/KE.

Artikolu 23

Ħtiġiet oħrajn tat-tikkettar

L-Artikoli 20, 21 u 22 għandhom ikunu mingħajr preġudizzju għal-liġijiet, ir-regolamenti jew id-dispożizzjonijiet amministrattivi aktar dettaljati jew aktar estensivi rigward il-piżijiet u l-miżuri jew li japplikaw għall-preżentazzjoni, il-klassifikazzjoni, l-imballaġġ u t-tikkettar ta' sustanzi u preparati perikolużi jew li japplikaw għat-trasport ta' tali sustanzi.

KAPITOLU V

DISPOŻIZZJONIJIET PROĊEDURALI U IMPLIMENTAZZJONI

Artikolu 24

Obbligu ta' l-informazzjoni

1.   Produttur jew utent ta' addittiv ta' l-ikel għandu jinforma lill-Kummissjoni minnufih bi kwalunkwe informazzjoni xjentifika jew teknika ġdida li tista' taffettwa l-valutazzjoni tas-sigurtà ta' l-addittiv ta' l-ikel.

2.   Għal addittiv ta' l-ikel diġà approvat taħt dan ir-Regolament li jitħejja b'metodi ta' produzzjoni jew bl-użu ta'materjali tal-bidu li huma differenti b'mod sinifikanti minn dawk inklużi fil-valutazzjoni ta' riskju ta' l-Awtorità Ewropea dwar is-Sigurtà ta' l-Ikel (minn hawn 'il quddiem imsejħa l-“Awtorità”), produttur jew utent għandu, qabel il-kummerċjalizzazzjoni ta' addittiv ta' l-ikel, jissottometti lill-Kummissjoni d-data meħtieġa biex tippermetti evalwazzjoni ta' l-addittiv ta' l-ikel fir-rigward tal-metodu ta' produzzjoni jew karatteristiċi modifikati li għandha titwettaq mill-Awtorità.

3.   Fuq it-talba tal-Kummissjoni, produttur jew utent ta' addittiv ta' l-ikel għandu jinformaha dwar l-użu effettiv ta' l-addittiv ta' l-ikel. Tali informazzjoni għandha ssir disponibbli għall-Istati Membri mill-Kummissjoni.

Artikolu 25

Monitoraġġ tal-konsum ta' l-addittiv ta' l-ikel

1.   L-Istati Membri għandhom iżommu sistemi għall-monitoraġġ tal-konsum u l-użu ta' l-addittivi ta' l-ikel fuq approċċ ibbażat fuq ir-riskju u għandhom jirrapportaw is-sejbiet tagħhom bi frekwenza adatta lill-Kummissjoni u lill-Awtorità.

2.   Skond il-proċedura regolatorja imsemmija fl-Artikolu 26(2), wara li l-Awtorità tkun ġiet ikkonsultata tista' tiġi adottata metodoloġija komuni biex tinġabar informazzjoni mill-Istati Membri dwar il-konsum fid-dieta ta' l-addittivi ta' l-ikel fil-Komunuità.

Artikolu 26

Kumitat

1.   Il-Kummissjoni għandha tkun mgħejuna mill-Kumitat Permanenti tal-Katina Alimentari u s-Saħħa ta' l-Annimali.

2.   Fejn issir referenza għal dan il-paragrafu, għandhom japplikaw l-Artikoli 5 u 7 tad-Deċiżjoni 1999/468/KE, filwaqt li jiġu kkunsidrati d-dispożizzjonijiet ta' l-Artikolu 8 tagħha.

Il-perjodu taż-żmien stabbilit fl-Artikolu 5(6) tad-Deċiżjoni 1999/468/KE għandu jiġi ffissat għal tliet xhur.

3.   Fejn issir referenza għal dan il-paragrafu, għandhom japplikaw l-Artikolu 5a (1) sa (4) u l-Artikolu 7 tad-Deċiżjoni 1999/468/KE, filwaqt li jiġu kkunsidrati d-dispożizzjonijiet ta' l-Artikolu 8 tagħha.

4.   Fejn issir referenza għal dan il-paragrafu, għandhom japplikaw l-Artikolu 5a(1) sa (4) u (5)(b) u l-Artikolu 7 tad-Deċiżjoni 1999/468/KE, b'kunsiderazzjoni għad-dispożizzjonijiet ta' l-Artikolu 8 tagħha.

Il-limiti ta' żmien stabbiliti fl-Artikolu 5a(3)(c) u (4)(b) u (e) tad-Deċiżjoni 1999/468/KE għandhom ikunu xahrejn, xahrejn u 4 xhur rispettivament.

Artikolu 27

Finanzjament Komunitarju tal-politika armonizzata

Il-bażi legali għall-finanzjament tal-miżuri li jirriżultaw minn dan ir-Regolament hija l-Artikolu 66(1)(c) tar-Regolament (KE) Nru 882/2004.

KAPITOLU VI

DISPOŻIZZJONIJIET TRANSITORJI U FINALI

Artikolu 28

Stabbiliment tal-listi Komunitarji ta' l-addittivi ta' l-ikel

1.   L-addittivi ta' l-ikel li huma permessi għall-użu fl-ikel taħt id-Direttivi 94/35/KE, 94/36/KE u 95/2/KE, kif emendati abbażi ta' l-Artikolu 29 ta' dan ir-Regolament u l-kondizzjonijiet ta' l-użu tagħhom għandhom jiġu inklużi fl-Anness II għar-Regolament preżenti wara reviżjoni tal-konformità tagħhom ma' l-Artikoli 6, 7 u 8 tiegħu. Il-miżuri relatati ma' l-inklużjoni ta' tali addittivi fl-Anness II, li huma maħsuba biex jemendaw l-elementi mhux essenzjali ta' dan ir-Regolament, għandhom jiġu adottati skond il-proċedura regolatorja bi skrutinju msemmija fl-Artikolu 28(4). Ir-reviżjoni m'għandiex tinkludi valutazzjoni tar-riskju ġdida mill-Awtorità. Ir-reviżjoni għandha titwettaq sa … (36).

Additivi u użi ta' l-ikel li mhumiex iżjed meħtieġa m'għandhomx jiddaħħlu fl-Anness II.

2.   L-addittivi ta' l-ikel li huma awtorizzati għall-użu fl-addittivi ta' l-ikel fid-Direttiva 95/2/KE u l-kondizzjonijiet ta' l-użu tagħhom għandhom jiġu inklużi fil-Parti I ta' l-Anness III, ta' dan ir-Regolament wara reviżjoni tal-konformità tagħhom ma' l-Artikolu 6 tiegħu. Il-miżuri relatati ma' l-inklużjoni ta' tali addittivi fl-Anness III, li huma maħsuba biex jemendaw l-elementi mhux essenzjali ta' dan ir-Regolament, għandhom jiġu adottati skond il-proċedura regolatorja bi skrutinju msemmija fl-Artikolu 26(4). Ir-reviżjoni m'għandiex tinkludi valutazzjoni tar-riskju ġdida mill-Awtorità. Ir-reviżjoni għandha titwettaq sa … (36).

Additivi u użi ta' l-ikel li mhumiex iżjed meħtieġa m'għandhomx jiddaħħlu fl-Anness III.

3.   L-addittivi ta' l-ikel li huma awtorizzati għall-użu fl-aromatizzanti ta' l-ikel fid-Direttiva 95/2/KE u l-kondizzjonijiet ta' l-użu tagħhom għandhom jiġu inklużi fil-Parti 4 ta' l-Anness III, ta' dan ir-Regolament wara reviżjoni tal-konformità tagħhom ma' l-Artikolu 6 tiegħu. Il-miżuri relatati ma' l-inklużjoni ta' tali addittivi fl-Anness III, li huma maħsuba biex jemendaw l-elementi mhux essenzjali ta' dan ir-Regolament, għandhom jiġu adottati skond il-proċedura regolatorja bi skrutinju msemmija fl-Artikolu 26(4). Ir-reviżjoni m'għandiex tinkludi valutazzjoni tar-riskju ġdida mill-Awtorità. Ir-reviżjoni għandha titwettaq sa … (36).

Additivi u użi ta' l-ikel li mhumiex iżjed meħtieġa m'għandhomx jiddaħħlu fl-Anness III.

4   Skond ir-Regolament (KE) Nru …/2008 (17), għandhom ikunu adottati l-ispeċifikazzjonijiet ta' l-addittivi ta' l-ikel li huma koperti taħt il-paragrafi 1 sa 3 ta' dan l-Artikolu, fil-mument li dawk l-addittivi ta' l-ikel jiġu inklużi fl-Annessi skond dawk il-paragrafi.

5.   Il-miżuri relatati ma' kwalunkwe miżura transitorja xierqa, li huma maħsuba biex jemendaw l-elementi mhux essenzjali ta' dan ir-Regolament, fost l-oħrajn billi jissupplimentawh, għandhom jiġu adottati skond il-proċedura regolatorja bi skrutinju msemmija fl-Artikolu 26(3).

Artikolu 29

Miżuri transitorji

Sakemm jitlesta l-istabbiliment tal-listi Komunitarji ta' l-addittivi ta' l-ikel kif previst fl-Artikolu 28, l-Annessi għad-Direttivi 94/35/KE, 94/36/KE u 95/2/KE għandhom jiġu emendati fejn meħtieġ, b'miżuri, mfassla biex jemendaw elementi mhux essenzjali ta' dawk id-Direttivi, adottati mill-Kummissjoni skond il-proċedura regolatorja bi skrutinju msemmija fl-Artikolu 26(4).

L-ikel li tqiegħed fis-suq jew ġie ttikkettat qabel … (37) li ma jikkonformax ma' l-Artikolu 21(1)(i) (4) ta' dan ir-Regolament jista' jiġi kkumerċjalizzat sad-data ta' durabbiltà minima tiegħu jew sad-data sa meta jista' jintuża l-aħħar.

Artikolu 30

Evalwazzjoni mill-ġdid ta' l-addittivi ta' l-ikel approvati

1.   L-addittivi ta' l-ikel li kienu permessi qabel … (38) għandhom ikunu soġġetti għal valutazzjoni ta' riskju ġdida li titwettaq mill-Awtorità.

2.   Wara konsultazzjoni ma' l-Awtorità, għandu jiġi adottat programm ta' evalwazzjoni għal dawk l-addittivi sa … (39), skond il-proċedura regolatorja msemmija fl-Artikolu 26(2). Il-programm ta' evalwazzjoni għandu jiġi ppubblikat fil-Ġurnal Uffiċjali ta' l-Unjoni Ewropea.

Artikolu 31

Revoki

1.   L-atti li ġejjin għandhom jiġu revokati:

(a)

Id-Direttiva 62/2645/KEE;

(b)

Id-Direttiva 65/66/KEE;

(c)

Id-Direttiva 78/663/KEE;

(d)

Id-Direttiva 78/664/KEE;

(e)

Id-Direttiva 81/712/KEE;

(f)

Id-Direttiva 89/107/KEE;

(g)

Direttiva 94/35/KE;

(h)

Direttiva 94/36/KE;

(i)

Direttiva 95/2/KE;

(j)

Id-Deċiżjoni 292/97/KE;

(k)

Id-Deċiżjoni 2002/247/KE.

2.   Ir-referenzi għall-atti rrevokati għandhom jiġu interpretati bħala referenzi għal dan ir-Regolament.

Artikolu 32

Dispożizzjonijiet transitorji

B'deroga mill-Artikolu 31, id-dispożizzjonijiet li ġejjin għandhom ikomplu japplikaw sa meta jitlesta t-trasferiment taħt l-Artikolu 28 (1), (2) (3) ta' dan ir-Regolament ta' l-addittivi ta' l-ikel diġà permessi fid-Direttivi 94/35/KE, 94/36/KE u 95/2/KE:

(a)

L-Artikolu 2 (1), (2) u (4) tad-Direttiva 94/35/KE u l-Anness għaliha;

(b)

L-Artikolu 2(1) sa (6), (8), (9) u (10) tad-Direttiva 94/36/KE u l-Annessi I sa V għaliha;

(c)

L-Artikoli 2 u 4 tad-Direttiva 95/2/KE u l-Annessi I sa VI għaliha.

Minkejja l-punt (c), l-awtorizzazzjonijiet għall-E 1103 Invertase u l-E 1105 Lysozyme stabbiliti fid-Direttiva 95/2/KE huma revokati b'effett mid-data ta' applikazzjoni tal-lista Komunitarja dwar l-enżimi ta' l-ikel skond l-Artikolu 17 ta'Regolament (KE) Nru …/2008 (29).

Artikolu 33

Dħul fis-seħħ

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu fil-Ġurnal Uffiċjali ta' l-Unjoni Ewropea.

Huwa għandu japplika minn … (39).

Madankollu, l-Artikolu 4(2) għandu japplika għall-Partijiet 2, 3 u 5 ta' l-Anness III mill- 1 ta' Jannar 2011 u l-Artikolu 22(4) għandu japplika minn … (36). L-Artikolu 29 għandu japplika minn … (38).

Dan ir-Regolament għandu jorbot fl-intier tiegħu u għandu jkun direttament applikabbli fl-Istati Membri kollha.

Magħmul fi Brussell, …

Għall-Parlament Ewropew

Il-President

Għall-Kunsill

Il-President

(1)  ĠU C 168, 20.7.2007, p. 34.

(2)  Opinjoni tal-Parlament Ewropew ta' l-10 ta' Lulju 2007 (għadha mhijiex ippublikata fil-Ġurnal Uffiċjali) u Pożizzjoni Komuni tal-Kunsill ta' 10 ta' Marzu 2008, Pożizzjoni tal-Parlament Ewropew ta' … (għadha mhijiex ippublikata fil-Ġurnal Uffiċjali) u Deċiżjoni tal-Kunsill ta' …

(3)  ĠU L 186, 30.6.1989, p. 27. Direttiva kif l-aħħar emendata bir-Regolament (KE) Nru 1882/2003 tal-Parlament Ewropew u tal-Kunsill (ĠU L 284, 31.10.2003, p. 1).

(4)  Ara paġna 32 ta' dan il-Ġurnal Uffiċjali.

(5)  ĠU L 178, 28.7.1995, p. 1. Id-Direttiva kif l-aħħar emendata bid-Direttiva 2006/128/KE (ĠU L 346, 9.12.2006, p. 6).

(6)  ĠU L 226, 22.9.1995, p. 1. Id-Direttiva kif l-aħħar emendata bid-Direttiva 2006/33/KE (ĠU L 82, 21.3.2006, p. 10).

(7)  ĠU L 339, 30.12.1996, p. 1. Id-Direttiva kif l-aħħar emendata bid-Direttiva 2006/129/KE (ĠU L 346, 9.12.2006, p. 15).

(8)  Ara paġna 1 ta' dan il-Ġurnal Uffiċjali.

(9)  ĠU L 31, 1.2.2002, p. 1. Ir-Regolament kif emendat l-aħħar bir-Regolament (KE) Nru 575/2006 (ĠU L 100, 8.4.2006, p. 3).

(10)  ĠU L 268, 18.10.2003, p. 1.

(11)  ĠU L 93, 31.3.2006, p. 12. Ir-Regolament kif emendat l-aħħar bir-Regolament (KE) Nru 1791/2006 (ĠU L 363, 20.12.2006, p. 1).

(12)  ĠU L 208, 24.7.1992, p. 9. Ir-Regolament kif imħassar bir-Regolament (KE) Nru 509/2006 (ĠU L 93, 31.3.2006, p. 1).

(13)  ĠU L 109, 6.5.2000, p. 29. Id-Direttiva kif emendata l-aħħar bid-Direttiva 2007/68/KE (ĠU L 310, 28.11.2007, p. 11).

(14)  ĠU L 268, 18.10.2003, p. 24.

(15)  ĠU L 184, 17.7.1989, p. 23. Id-Deċiżjoni kif emendata bid-Deċiżjoni tal-Kunsill 2006/512/KE (ĠU L 200, 22.7.2006, p. 11).

(16)  ĠU L 165, 17.7.1989, p. 1. Verżjoni kkoreġuta (ĠU L 191, 28.5.2004, p. 1). Regolament kif emendat bir-Regolament tal-Kunsill (KE) Nru 1791/2006.

(17)  Ara paġna 1 ta' dan il-Ġurnal Uffiċjali.

(18)  ĠU 115, 11.11.1962, p. 2645/62. Id-Direttiva kif l-aħħar emendata bid-Direttiva 95/45/KE (ĠU L 226, 22.9.1995, p. 1).

(19)  ĠU 22, 9.2.1965, p. 373/65. Id-Direttiva kif l-aħħar emendata bid-Direttiva 96/77/KE (ĠU L 339, 30.12.1996, p. 1).

(20)  ĠU L 223, 14.8.1978, p. 7. Id-Direttiva kif emendata bid-Direttiva tal-Kummissjoni 92/4/KEE (ĠU L 55, 29.2.1992, p. 96).

(21)  ĠU L 223, 14.8.1978, p. 30. Id-Direttiva kif emendata bid-Direttiva tal-Kummissjoni 96/77/KEE.

(22)  ĠU L 257, 10.9.1981. p. 1.

(23)  ĠU L 40, 11.2.1989, p. 27. Id-Direttiva kif emendata l-aħħar bir-Regolament (KE) Nru 1882/2003 tal-Parlament Ewropew u tal-Kunsill.

(24)  ĠU L 237, 10.9.1994, p. 3. Id-Direttiva kif emendata l-aħħar bid-Direttiva 2006/52/KE (ĠU L 204, 26.7.2006, p. 10).

(25)  ĠU L 237, 10.9.1994, p. 13. Id-Direttiva kif emendata bir-Regolament (KE) 1882/2003.

(26)  ĠU L 61, 18.3.1995, p. 1. Id-Direttiva kif emendata l-aħħar bid-Direttiva 2006/52/KE.

(27)  ĠU L 48, 19.2.1997, p. 13.

(28)  ĠU L 84, 28.3.2002, p. 69.

(29)  Ara paġna 32 ta' dan il-Ġurnal Uffiċjali.

(30)  Ara paġna 46 ta' dan il-Ġurnal Uffiċjali.

(31)  ĠU L 330, 5.12.1998, p. 32. Direttiva kif emendata bir-Regolament (KE) Nru 1882/2003 tal-Parlament Ewropew u tal-Kunsill.

(32)  Ara paġna 46 ta' dan il-Ġurnal Uffiċjali.

(33)  ĠU L 268, 24.9.1991, p. 69. Direttiva kif emendata bir-Regolament (KE) Nru 806/2003 (ĠU L 122, 16.5.2003, p. 1).

(34)  ĠU L 139, 30.4.2004, p. 55. Verżjoni korretta f'ĠU L 226, 25.6.2004, p. 22. Regolament kif emendat l-aħħar bir-Regolament tal-Kummissjoni (KE) Nru 1243/2007 (ĠU L 281, 25.10.2007, p. 8).

(35)  ĠU L 186, 30.6.1989, p. 21. Direttivi kif emendata l-aħħar bid-Direttiva 92/11/KEE (ĠU L 65, 11.3.1992, p. 32).

(36)  Sentejn wara d-data tad-dħul fis-seħħ ta' dan ir-Regolament.

(37)  12-il xahar wara d-dħul fis-seħħ ta' dan ir-Regolament.

(38)  Id-data tad-dħul fis-seħħ ta' dan ir-Regolament.

(39)  Sena wara d-data tad-dħul fis-seħħ ta' dan ir-Regolament.

ANNESS I

IL-KLASSIJIET FUNZJONALI TA' L-ADDITTIVI TA' L-IKEL FL-IKEL U TA' L-ADDITTIVI TA' L-IKEL FL-ADDITTIVI TA' L-IKEL U FL-ENŻIMI TA' L-IKEL

1.

“Sustanzi li jagħtu l-ħlewwa” huma sustanzi użati biex jagħtu togħma ħelwa lill-ikel jew f'sustanzi li jagħtu l-ħlewwa ta' fuq il-mejda.

2.

“Kuluri” huma sustanzi li jżidu jew jerġgħu jagħtu l-kulur fl-ikel, u jinkludu kostitwenti naturali ta' l-ikel u sorsi naturali li normalment ma jkunux ikkonsmati bħala ikel u li normalment ma jintużawx bħala ingredjenti karatteristiċi ta' l-ikel. Il-preparati li jinkisbu mill-ikel u minn materjali oħrajn li jittieklu ġejjin minn sorsi naturali li jinkisbu mill-estrazzjoni fiżika u/jew kimika li tirriżulta f'estrazzjoni selettiva tal-pigmenti relattiva għall-kostitwenti nutrittivi jew aromatiċi, huma kuluri fit-tifsira ta' dan ir-Regolament.

3.

“Preservattivi” huma sustanzi li jżidu t-tul ta' żmien qabel jiskadi l-ikel billi jipproteġuh kontra d-deterjorazzjoni kkawżata mill-mikro-organiżmi u/jew li jipproteġu kontra l-iżvilupp ta' mikro-organiżmi patoġeniċi.

4.

“Antiossidanti” huma sustanzi li jtawlu l-perjodu ta' qabel l-iskadenza ta' l-ikel billi jipproteġuh mid-deterjorazzjoni kkawżata mill-ossidazzjoni, bħal snuħija tax-xaħam u tibdiliet fil-kulur.

5.

“Aġenti veikoli” huma sustanzi li jintużaw għat-taħlil, id-dilwizzjoni, it-tixrid jew il-modifikazzjoni fiżika b'xi mod ieħor ta' addittiv ta' l-ikel jew aromatizzanti, enżima ta' l-ikel, nutrijent u/jew sustanzi oħra miżjuda għal finijiet nutrittivi jew fisjoloġiċi għal ikel mingħajr ma jbiddlu l-funzjoni tiegħu (u mingħajr ma jeżerċitaw l-ebda effett teknoloġiku huma nfushom) sabiex jiffaċilitaw l-immaniġġjar, l-applikazzjoni jew l-użu tiegħu.

6.

“Aċidi” huma sustanzi li jżidu l-aċidità ta' oġġett ta' l-ikel u/jew jagħtuh togħma qarsa.

7.

“Regolaturi ta” l-aċidità' huma sustanzi li jbiddlu jew jikkontrollaw l-aċidità jew l-alkalinità ta' oġġett ta' l-ikel.

8.

“Aġenti ta' kontra t-tgħaqid” huma sustanzi li jnaqqsu t-tendenza tal-partiċelli individwali ta' oġġett ta' l-ikel milli jeħlu ma' xulxin.

9.

“Aġenti għal kontra r-ragħwa” huma sustanzi li jipprevjenu jew inaqqsu r-ragħwa.

10.

“Aġenti li jagħtu l-massa” huma sustanzi li jikkontribwixxu għall-volum ta' oġġett ta' l-ikel mingħajr ma jikkontribwixxu b'mod sinifikanti għall-valur ta' l-enerġija disponibbli tiegħu.

11.

“Emulsjonanti” huma sustanzi li jagħmluha possibbli li tkun ifformata jew li tinżamm taħlita omoġenja ta' żewġ fażijiet jew iktar li ma jitħalltux bħaż-żejt u l-ilma f'oġġett ta' l-ikel.

12.

“Melħ emulsifikat” huma sustanzi li jaqilbu l-proteini fil-ġobon f'forma mxerrda, u b'hekk ikun hemm distribuzzjoni omoġenja ta' xaħam u komponenti oħra.

13.

“Aġenti li jissodaw” huma sustanzi li jagħmlu jew iżommu t-tessuti tal-frott jew tal-ħaxix sodi jew iqarmċu, jew jinteraġixxu ma' aġenti li jgħaqqdu biex jipproduċu jew isaħħu ġel.

14.

“Sustanzi li jtejbu l-aroma” huma sustanzi li jtejbu t-togħma u/jew ir-riħa eżistenti ta' oġġett ta' l-ikel.

15.

“Aġenti li jagħmlu r-ragħwa” huma sustanzi li jagħmluha possibbli li jkun ifformat tixrid omoġenju ta' fażi gassuża f'oġġett ta' l-ikel likwidu jew solidu.

16.

“Aġenti li jgħaqqdu” huma sustanzi li jagħtu lill-oġġett ta' l-ikel konsistenza bil-formazzjoni ta' ġel.

17.

“Aġenti għall-igglejżjar” (inklużi lubrikanti) huma sustanzi li, meta jkunu applikati lill-uċuħ esterni ta' oġġett ta' l-ikel, jagħtu dehra tleqq jew jipprovdu kisja protettiva.

18.

“Humectants” huma sustanzi li ma jħallux l-ikel jinxef billi jopponu l-effett ta' atmosfera li għandha grad baxx ta' umdità, jew jippromwovu t-taħlil ta' trab f'mezz milwiem.

19.

“Lamti modifikati” huma sustanzi miksuba permezz ta' trattament kimiku wieħed jew aktar ta' lamti li jittieklu, li setgħu għaddew minn trattament fiżiku jew enzimatiku, u li jistgħu jkunu mraqqa jew ibbliċjati b'aċidu jew b'alkali.

20.

“Gassijiet ta' l-ippakkjar” huma gassijiet għajr l-arja, li jiġu introdotti f'kontenitur qabel, matul jew wara t-tqegħid ta' oġġett ta' l-ikel f'dak il-kontenitur.

21.

“Propellanti” huma gassijiet għajr l-arja li jixħtu 'il barra oġġett ta' l-ikel minn kontenitur.

22.

“Aġenti li jgħollu” huma sustanzi jew taħlit ta' sustanzi li jilliberaw gass u b'hekk iżidu l-volum ta' għaġina jew ta' taħlita ta' dqiq, bajd eċċ.

23.

“Sekwestranti” huma sustanzi li jifformaw komplessi kimiċi b'jonji metalliċi.

24.

“Stabilizzaturi” huma sustanzi li jagħmluha possibbli li jinżamm l-istat fiżiku-kimiku ta' oġġett ta' l-ikel; l-istabbilizzaturi jinkludu sustanzi li jippermettu li jinżamm tixrid omoġenju ta' żewġ sustanzi jew aktar li ma jitħalltux f'oġġett ta' l-ikel, sustanzi li jistabbilizzaw, iżommu jew jintensifikaw kulur eżistenti ta' oġġett ta' l-ikel, u sustanzi li jżidu l-kapaċità ta' taqħqid ta' l-ikel, inkluża l-formazzjoni ta' rabtiet bejn il-proteini li jippermettu t-tagħqid ta' biċċiet ta' l-ikel f'ikel rikostitwit.

25.

“Sustanzi li jħaxxnu” huma sustanzi li jkabbru l-viskożità ta' oġġett ta' l-ikel.

26.

“Sustanzi li jittrattaw id-dqiq” huma sustanzi, għajr għall-emulsjonanti, li jiġu miżjuda mad-dqiq jew ma' l-għaġina sabiex itejbu l-kwalità tal-ħami tiegħu.

ANNESS II

Il-lista Komunitarja ta' l-addittivi ta' l-ikel approvati biex jintużaw fl-ikel u l-kondizzjonijiet ta' l-użu.

ANNESS III

Il-lista Komunitarja ta' l-addittivi ta' l-ikel approvati għall-użu fl-addittivi ta' l-ikel, fl-enżimi ta' l-ikel u fl-aromatizzanti ta' l-ikel, u l-kondizzjonijiet ta' l-użu tagħhom.

Lista Komunitarja ta' aġenti veikoli u l-kondizzjonijiet ta' l-użu tagħhom.

Parti 1

L-aġenti veikoli fl-addittivi ta' l-ikel

Parti 2

L-addittivi ta' l-ikel għajr għall-aġenti veikoli fl-addittivi ta' l-ikel

Parti 3

Addittivi ta' l-ikel inklużi aġenti veikoli fl-enżimi ta' l-ikel

Parti 4

Addittivi ta' l-ikel inklużi aġenti veikoli fl-aromatizzanti ta' l-ikel

Parti 5

Aġenti veikoli f'nutrijenti u sustanzi oħra miżjuda għal finijiet nutrittivi u/jew għal finijiet fisjoloġiċi oħra

ANNESS IV

IKEL TRADIZZJONALI LI GĦALIH ĊERTI STATI MEMBRI JISTGĦU JKOMPLU JIPPROJBIXXU L-UŻU TA' ĊERTI KATEGORIJI TA' ADDITTIVI TA' L-IKEL

Stat Membru

L-ikel

Il-kategoriji ta' l-addittivi li jistgħu jkomplu jiġu pprojbiti b'mod uffiċjali

Ġermanja

Il-birra tradizzjonali Ġermaniża (“Bier nach deutschem Reinheitsgebot gebraut”)

Kollha għajr il-gassijiet propellanti

Franza

Il-ħobż tradizzjonali Franċiż

Kollha

Franza

It-tartuf tradizzjonali Franċiż ippreservat

Kollha

Franza

Il-bebbux tradizzjonali Franċiż ippreservat

Kollha

Franza

Il-priservijiet tradizzjonali Franċiżi tal-wiżż u tal-papri (“confit”)

Kollha

Awstrija

Il-“Bergkäse” tradizzjonali Awstrijak

Kollha ħlief il-preservattivi

Finlandja

Il-“Mämmi” tradizzjonali Finlandiż

Kollha ħlief il-preservattivi

Svezja

Finlandja

Il-ġuleppijiet tal-frott tradizzjonali Svediżi u Finlandiżi

Il-kuluri

Danimarka

Il-“Kødboller” tradizzjonali Daniż

Il-preservattivi u l-kuluri

Danimarka

Il-“Leverpostej” tradizzjonali Daniż

Il-preservattivi (għajr l-aċidu żorbiku) u l-kuluri

Spanja

Il-“Lomo embuchado” tradizzjonali Spanjol

Kollha ħlief il-preservattivi u l-antiossidanti

Italja

Il-“Mortadella” tradizzjonali Taljana

Kollha ħlief il-preservattivi, l-antiossidanti, l-aġenti li jaġġustaw il-pH, is-sustanzi li jtejbu l-aroma, l-istabilizzaturi u l-gass ta' l-ippakkjar

Italja

Il-“Cotechino e zampone” tradizzjonali Taljan

Kollha ħlief il-preservattivi, l-antiossidanti, l-aġenti li jaġġustaw il-pH, is-sustanzi li jtejbu l-aroma, l-istabilizzaturi u l-gass ta' l-ippakkjar

DIKJARAZZJONI TAR-RAĠUNIJIET TAL-KUNSILL

I.   INTRODUZZJONI

Fit-28 ta' Lulju 2006, il-Kummissjoni adottat il-proposta għal Regolament dwar addittivi ta' l-ikel (1). Il-proposta hija bbażata fuq l-Artikolu 95 tat-Trattat li jistabbilixxi l-Komunità Ewropea.

Il-Parlament Ewropew adotta l-Opinjoni tiegħu fl-ewwel qari fl-10 ta' Lulju 2007 (2).

Wara l-opinjoni ta' l-ewwel qari tal-Parlament Ewropew, il-Kummissjoni ppreżentat proposta emendata fl-24 ta' Ottubru 2007 (3).

Fl-10 ta' Marzu 2008, il-Kunsill adotta l-pożizzjoni komuni tiegħu skond l-Artikolu 251(2) tat-Trattat.

Fit-twettiq tal-ħidma tiegħu, il-Kunsill ħa kont ukoll ta' l-opinjoni tal-Kumitat Ekonomiku u Soċjali adottata fil-25 ta' April 2007 (4).

II.   OBJETTIV

Ir-Regolament propost, bħala parti minn erba' proposti mfassla biex jibdlu r-regoli Komunitarji dwar aġenti għat-titjib ta' l-ikel, għandha taġġorna u tissimplifika l-leġislazzjoni eżistenti tal-Komunità fir-rigward ta' l-addittivi ta' l-ikel.

Fir-Regolament propost, ser tiġi stabbilita lista Komunitarja ta' addittivi ta' l-ikel u addittivi ta' l-ikel approvati għall-użu fl-addittivi ta' l-ikel, fl-enżimi ta' l-ikel u fil-ħwawar ta' l-ikel inklużi l-kondizzjonijiet ta' l-użu tagħhom. Ir-Regolament propost ser jistabbilixxi wkoll regoli dwar it-tikkettar ta' addittivi ta' l-ikel.

L-objettiv tar-Regolament propost huwa li jiġi żgurat il-funzjonament xieraq tas-suq intern, inklużi prassi ġusti fil-kummerċ ta' l-ikel, u livell għoli ta' protezzjoni tas-saħħa tal-bniedem, ta' l-interessi tal-konsumatur u ta' l-ambjent.

III.   ANALIŻI TAL-POŻIZZJONI KOMUNI

1.   Rimarki introduttorji

Il-pożizzjoni komuni tirrifletti r-riżultat ta' l-eżami tal-proposta tal-Kummissjoni mill-Kunsill. Il-Kunsill introduċa għadd ta' modifiki fit-test, xi wħud minnhom ispirati mill-emendi proposti mill-Parlament Ewropew. Fuq inizjattiva tiegħu stess, il-Kunsill introduċa xi wħud mill-emendi tal-Parlament Ewropew f'kull waħda mit-tliet proposti settorjali, bil-ħsieb li jiġu armonizzati d-dispożizzjonijiet tagħhom. Il-modifiki introdotti mill-Kunsill jistgħu jiġu miġbura kif ġej:

—   “L-iżgwidar tal-konsumatur”(f'konformità ma' l-emendi 3 u 26)

Fil-premessa 7 u l-Artikolu 6, il-Kunsill inkluda elementi li jintegraw il-kunċett ta' l-iżgwidar tal-konsumatur.

—   Protezzjoni ta' l-ambjent (f'konformità ma' l-emendi 1 u 7)

Il-Kunsill ikkunsidra li, minbarra evidenza xjentifika, l-awtorizzazzjoni ta' l-addittivi ta' l-ikel għandha tieħu wkoll kont ta' fatturi rilevanti oħrajn, bħall-protezzjoni ta' l-ambjent. Il-Kunsill inkluda wkoll referenza għall-protezzjoni ta' l-ambjent fost l-objettivi tar-Regolament propost.

—   Protezzjoni tal-konsumaturi b'intolleranza għall-ikel jew allerġija (f'konformità ma' l-emenda 1)

Il-Kunsill irrikonoxxa li l-użu u l-livelli massimi ta' addittivi ta' l-ikel għandhom jieħdu kont ta' l-esponiment ta' gruppi speċjali ta' konsumaturi, eż. konsumaturi b'allerġiji.

—   Proċedura ta' komitoloġija regolatorja bi skrutinju (f'konformità ma' l-emendi 48, 51, 64/rev, 67/rev, 68/rev, 79 u 80)

Il-Kunsill adatta l-proposta għar-regoli ġodda ta' proċedura ta' komitoloġija, li jeħtieġu l-proċedura regolatorja bi skrutinju li għandha tiġi applikata għall-adozzjoni ta' miżuri li jissupplimentaw ir-Regolament propost.

Għal raġunijiet ta' effiċjenza, il-Kunsill iddeċieda li juża l-proċedura regolatorja bi skrutinju b'limiti ta' żmien mqassra għall-istabbiliment tal-listi Komunitarji ta' addittivi u għal miżuri transitorji, sakemm jiġu stabbiliti listi Komunitarji, għall-emendar ta' l-Annessi għad-Direttivi 94/35/KE, 94/36/KE u 95/2/KE.

—   Deċiżjonijiet ta' interpretazzjoni

Il-Kunsill ġabar mill-ġdid id-dispożizzjonijiet kollha dwar deċiżjonijiet ta' interpretazzjoni f'artikolu uniku ġdid u, peress li dawn ma jissupplimentawx ir-Regolament, ħallihom soġġetti għall-proċedura ta' komitoloġija regolatorja mingħajr skrutinju.

—   Dispożizzjoni li tipprojbixxi t-tqegħid fis-suq ta' addittivi ta' l-ikel mhux konformi (f'konformità ma' l-emendi 9 u 22)

Għal raġunijiet ta' ċarezza, ċertezza legali u funzjonament xieraq tas-suq, il-Kunsill daħħal artikolu dwar il-projbizzjoni għat-tqegħid fis-suq ta' addittivi ta' l-ikel mhux konformi. Dan huwa konsistenti mal-proposti dwar ħwawar u dwar enżimi ta' l-ikel.

—   Awtorizzazzjoni ta' addittivi li jaqgħu taħt il-kamp ta' applikazzjoni tar-Regolament (KE) Nru 1829/2003 tal-Parlament Ewropew u tal-Kunsill tat-22 ta' Settembru 2003 dwar ikel u għalf modifikat ġenetikament (5) (f'konformità ma' l-emenda 4)

Il-Kunsill qabel li ż-żewġ proċeduri ta' awtorizzazzjoni għal kwalunkwe sustanza jistgħu jitwettqu simultanjament, għalkemm l-awtorizzazzjoni finali għandha tingħata taħt ir-Regolament dwar l-addittivi. Il-Kunsill issoġġetta dak il-prinċipju għal xi bdil ta' abbozzar sabiex id-dispożizzjoni ssir aktar kompatibbli mar-Regolament (KE) Nru 1829/2003.

—   Miżuri transitorji għal prodotti diġà fis-suq (f'konformità ma' l-emenda 56)

Il-Kunsill ippreveda perijodu ta' transizzjoni ta' sena waħda mid-data tad-dħul fis-seħħ tar-Regolament. L-ikel imqiegħed fis-suq legalment jew ittikkettat matul din is-sena jista' jitqiegħed fis-suq sad-data tiegħu ta' durabbiltà minima jew id-data ta' l-użu.

—   L-ittikkettar

Il-Kunsill irrazzjonalizza d-dispożizzjonijiet ta' l-ittikkettar sabiex jiġu dupplikati d-dispożizzjonijiet diġà stabbiliti bid-Direttiva 2000/13/KE, b'rispett lejn id-distinzjoni bejn l-ittikkettar “negozju għal negozju” u l-ħtiġiet ta' l-ittikkettar għal prodotti ntiżi għall-bejgħ lill-konsumatur finali. Għalkemm il-Kunsill organizza l-kapitolu dwar l-ittikkettar b'mod differenti minn dak propost mill-Parlament Ewropew, il-prinċipji sottolinjati fil-kontenut tiegħu huma konformi ma' l-emendi 42 u 44.

—   Nanoteknoloġija (f'konformità ma' l-emenda 35)

L-istess bħall-proposta tal-Parlament Ewropew, il-Kunsill ikkunsidra li evalwazzjoni mill-ġdid ta' addittivi ta' l-ikel hija meħtieġa jekk addittiv ta' l-ikel jiġi prodott b'metodi ta' prodozzjoni sinifikament differenti minn dawk inklużi fil-valutazzjoni tar-riskju preċedenti. Jistgħu jiġu imposti kondizzjonijiet differenti b'konsegwenza ta' l-evalwazzjoni ġdida.

Il-Kummissjoni aċċettat il-pożizzjoni komuni maqbula mill-Kunsill.

2.   L-emendi tal-Parlament Ewropew

Fil-vot Plenarju tiegħu, fl-10 ta' Lulju 2007, il-Parlament Ewropew adotta 59 emenda għall-proposta.

Fil-pożizzjoni komuni tiegħu, il-Kunsill, inkorpora, b'mod sħiħ jew fil-prinċipju, 33 emenda.

a)   Emendi inkorporati fil-pożizzjoni komuni

Minbarra l-emendi diġa msemmijin fil-parti 1 hawn fuq, il-pożizzjoni komuni tinkorpora emendi oħrajn tal-Parlament Ewropew fl-ewwel qari, b'mod sħiħ jew parti, li huma ta' natura teknika/editorjali u mmirati lejn it-titjib taċ-ċarezza tat-test tal-proposta (emendi 8, 13, 14, 18, 19, 21, 36, 37, 39, 46, 55, 57, 58, 59, 60).

b)   Emendi li ma ġewx introdotti (6)

Il-Kunsill ma setax jaċċetta l-emendi kollha, minħabba r-raġunijiet li ġejjin:

—   Prinċipju ta' prekawzjoni (emenda 78 — premessa 10)

Il-prinċipju ta' prekawzjoni huwa wieħed mill-prinċipji ġenerali li jissottolinjaw tal-liġi ġenerali dwar l-ikel (7). Konsegwentement, huwa japplika għar-regolament propost mingħajr il-bżonn ta' referenza speċifika għalih. Barra minn hekk, fil-qafas ta' l-analiżi tar-riskju, il-prinċipju ta' prekawzjoni jista' jittieħed biss kont tiegħu fil-kuntest tal-ġestjoni tar-riskju, qatt fil-fażi tal-valutazzjoni tar-riskju, kif issuġġerit mill-Parlament Ewropew.

—   Addittivi ta' l-ikel li m'għandhomx jintużaw ma' addittivi oħrajn ta' l-ikel (emenda 34 — artikolu 10(2))

L-Artikoli 1 u 10(2)(c) diġà jistipulaw li l-kondizzjonijiet ta' l-użu ta' addittivi ta' l-ikel għandhom jiġu speċifikati fil-lista Komunitarja, għalhekk l-emenda 34 hija superfluwa.

—   Programm ta' evalwazzjoni mill-ġdid għar-reviżjoni ta' awtorizzazzjonijiet (emendi 5, 54 — premessa 14, Artikolu 30(2a ġdid))

Għall-Kunsill, sistema ta' osservazzjoni kontinwa u ta' evalwazzjoni mill-ġdid kull meta meħtieġ fid-dawl tal-kondizzjonijiet li qed jinbidlu u ta' informazzjoni xjentifika ġdida, ser tiggarantixxi s-sigurtà fl-ikel. Reviżjoni addizzjonali għandha tirrappreżenta piż amministrattiv mhux meħtieġ għall-produtturi, l-utenti, l-EFSA, il-Kummissjoni u l-Istati Membri.

—   Reviżjoni ta' awtorizzazzjonijiet eżistenti (emendi 6, 52, 69rev — premessa 21, Artikolu 30(1) u (2))

Il-Kunsill isostni li l-addittivi diġà awtorizzati għandhom jiġu trasferiti fil-lista ta' addittivi awtorizzati wara reviżjoni tal-kriterji minbarra s-sigurtà. Madankollu, l-EFSA għandha l-kompitu tivverifika l-evalwazzjoni mill-ġdid ta' addittivi ta' l-ikel awtorizzati attwalment fir-rigward tas-sigurtà tagħhom. Mhuwiex xieraq li dawn iż-żewġ reviżjonijiet jintrabtu flimkien.

—   Definizzjoni ta' l-addittivi ta' l-ikel u l-kamp ta' applikazzjoni tar-Regolament propost

—

fil-kamp ta' applikazzjoni għandhom jiġu nklużi l-prodotti għall-protezzjoni tal-pjanti wara l-ħsad (emenda 10 — Artikolu 2(b)): Il-prodotti għall-protezzjoni tal-pjanti użati għat-trattament wara l-ħsad huma soġġetti għad-Direttiva 91/414/KEE, li diġà tipprevedi li jekk prodott għall-protezzjoni tal-pjanti jaqa' taħt id-definizzjoni ta' liġi Komunitarja oħra, ser tkun applikabbli din ta' l-aħħar.

—

fil-kamp ta' applikazzjoni għandhom jiġu esklużi kulturi mikrobjali (emenda 11 — Artikolu 2(da) ġdid): Xi kulturi jiżdiedu ma' l-ikel lejn it-tmiem tal-manifattura tagħhom maħsuba biex jagħtu effett preservattiv u għalhekk jistgħu jitqiesu bħala addittivi ta' l-ikel. Għal dik ir-raġuni, huma m'għandhomx jiġu esklużi mill-kamp ta' applikazzjoni tar-Regolament propost.

—

Il-proteini fid-demm m'għandhomx jiġu kkunsidrati bħala addittiv (emenda 16 — Artikolu 3(2)(a)(viii)): Fil-preżent is-sustanzi li jikkonsistu mill-proteini fid-demm huma kkunsidrati li jaqgħu taħt il-kamp ta' applikazzjoni tal-liġi Komunitarja dwar l-addittivi ta' l-ikel. Il-Kunsill jikkunsidra li l-esklużjoni tal-proteini fid-demm bħala addittiv fl-artikolu 3(2) mhix xierqa.

—   Deċiżjonijiet ippreżentati għall-proċedura ta' komitoloġija regolatorja (emendi 12, 40, 47 — Artikoli 2(5), 18(c) introduzzjoni, 25(2))

Id-Deċiżjonijiet dwar jekk sustanza partikolari taqax jew le fil-kamp ta' applikazzjoni tar-Regolament huma ta' natura sempliċiment interpretattiva. Għalhekk, huma ma jaqgħux fil-kamp ta' applikazzjoni tal-proċedura ta' komitoloġija regolatorja bi skrutinju.

—   Definizzjonijiet u esklużjonijiet (effett teknoloġiku addizzjonali) (emenda 15 — Artikolu 3(2)(a)(ii))

Il-Kunsill jikkunsidra li l-addizzjoni ta' “effett teknoloġiku addizzjonali” fl-Artikolu 3 (2)(a)(ii) hija ġenerali wisq u jista' jeskludi mid-definizzjoni sustanzi użati bħala addittivi ta' l-ikel.

—   Ikel b'inqas zokkor (emendi 20, 29 — Artikoli 3(2)(i), 7(a))

L-introduzzjoni ta' dan il-kunċett fir-Regolament għandu jirriżulta f'żieda ta' varjetà ta' prodotti fejn jistgħu jintużaw ħlewwiet u jistgħu jwasslu għall-konsum miżjud ta' tali addittivi, li ma jibbenefikawx minnhom il-konsumaturi.

—   Benefiċċji għall-konsumatur (emenda 24 — Artikolu 6(1)(b))

L-emenda 24 tipprevedi li waħda mill-kondizzjonijiet għall-inklużjoni ta' addittiv ta' l-ikel fil-lista Komunitarja għandha tkun ħtieġa teknoloġika raġjonevoli f'termini ta' benefiċċji għall-konsumatur. Madankollu, l-Artikolu 6(2)(c) diġà jistipula li addittiv jeħtieġ li jkollu benefiċċji u vantaġġi għall-konsumaturi sabiex jiġi nkluż fil-lista Komunitarja. Għalhekk, l-emenda 24 mhix meħtieġa.

—   Spjegazzjoni tal-bażi għad-deċiżjoni finali (emenda 28 — Artikolu 6(3a ġdid))

Id-deċiżjoni dwar jekk l-addittivi ta' l-ikel jiġux inklużi fil-lista Komunitarja jew le tittieħed permezz tal-proċedura regolatorja bi skrutinju abbażi tal-proposta mill-Kummissjoni. Dawn il-proposti jinkludu premessi li jispjegaw l-isfond tagħhom, għalhekk l-emenda 28 hija superfluwa.

—   Kondizzjonijiet speċifiċi għall-ħlewwiet (emenda 73 — Artikolu 7(b))

Il-Kunsill ikkunsidra li t-tħassir tas-sentenza jkun restrittiv wisq.

—   Addittivi li potenzjalment jiżgwidaw lill-konsumaturi (eż. kuluri) (emenda 30 — Artikolu 8(1a ġdid))

Id-dispożizzjoni fl-Artikolu 6 rigward il-kondizzjonijiet ġenerali għall-awtorizzazzjoni ta' addittivi ta' l-ikel tipprevedi li addittiv m'għandux jiżgwida lill-konsumatur. Barra minn hekk il-Kunsill, sabiex jiddefinixxi t-terminu “jiżgwidaw lill-konsumaturi” kkjarifika dan il-kunċett fil-premessa 7.

—   Speċifikazzjonijiet fil-listi Komunitarji:

—

Identifikazzjoni tal-grupp ta' l-addittivi (emenda 33 — Artikolu 10(2)(a)): L-Artikolu 9 jipprevedi li addittiv ta' l-ikel ser jiġi allokat għal klassi funzjonali. Peress li addittiv jista' jaqa' f'diversi klassijiet funzjonali, il-Kunsill ma setax jappoġġa tali emenda li teħtieġ l-identifikazzjoni tal-klassijiet kollha li addittiv jista' jifforma parti minnhom.

—

Speċifikazzjoni tas-sustanzi li jistgħu jiżdiedu magħhom addittivi (emenda 33 — Artikolu 10(2)(b)): L-emenda mhix meħtieġa peress li enżimi, ħwawar u addittivi huma kkunsidrati bħala ikel.

—   L-ittikkettar ta' organiżmi modifikati ġenetikament (GMOs) (emendi 38 u 63 — Artikolu 12)

Kif imsemmi fil-premessa 16, l-addittivi ta' l-ikel jibqgħu soġġetti għad-dispożizzjonijiet ta' l-ittikkettar definiti fid-Direttiva 2000/13/KE tal-Parlament Ewropew u tal-Kunsill ta' l-20 ta' Marzu 2000 dwar l-approssimazzjoni tal-liġijiet ta' l-Istati Membri li għandhom x'jaqsmu ma' tikkettjar, preżentazzjoni u reklamar ta' oġġetti ta' l-ikel (8) u fir-Regolament (KE) Nru 1829/2003 u r-Regolament (KE) Nru 1830/2003 tal-Parlament Ewropew u tal-Kunsill tat-22 ta' Settembru 2003 dwar ikel u għalf modifikat ġenetikament (9) (L-ittikkettar ta' ingredjenti ta' l-ikel, inklużi addittivi, prodotti minn, li fihom u jikkonsisti f'GMO's, huwa previst fl-Artikoli 12 u 13 tar-Regolament (KE) Nru 1829/2003). Il-Kunsill adotta approċċ prudenti, mingħajr ma aċċetta emendi li jistgħu jinterferixxu mal-kamp ta' applikazzjoni tar-Regolamenti orizzontali fis-seħħ.

—   L-ittikkettar (emendi 43 u 45 — Artikolu 21(4), 22(3a ġdid))

L-ewwelnett, il-Kunsill ikkunsidra li ċertu informazzjoni biss tista' tiġi pprovduta bid-dokumenti li jakkumpanjaw fornuti mal-kunsinna jew qabel. It-tieninett, peress li diġà hemm dispożizzjonijiet dwar l-ittikkettar ta' allerġeni, li huma elenkati fl-Anness IIIa tad-Direttiva 2000/13/KE, il-Kunsill ikkunsidra li mhuwiex xieraq li wieħed imur lil hinn minn dawk id-dispożizzjonijiet f'dan l-att leġislattiv.

IV.   KONKLUŻJONIJIET

Il-Kunsill jemmen li l-pożizzjoni komuni tirrappreżenta bilanċ ta' interessi li jirrispetta l-objettivi tar-Regolament. Huwa jħares 'l quddiem lejn diskussjonijiet kostruttivi mal-Parlament Ewropew bil-ħsieb ta' l-adozzjoni bikrija tar-Regolament, li jiżgura livell għoli tas-saħħa tal-bniedem u l-protezzjoni tal-konsumatur.

(1)  COM(2006) 428 final.

(2)  Dok. 11640/07 CODEC 776.

(3)  COM(2007) 673 final.

(4)  ĠU C 168, 20.7.2007, p. 29.

(5)  ĠU L 268, 18.10.2003, p. 1.

(6)  In-numerazzjoni ta' l-Artikoli f'din il-parti tirreferi għat-test tal-pożizzjoni komuni.

(7)  Regolament (KE) Nru 178/2002 tal-Parlament Ewropew u tal-Kunsill tat-28 ta' Jannar 2002 li jistabbilixxi l-prinċipji ġenerali u l-ħtiġijiet tal-liġi dwar l-ikel, li jistabbilixxi l-Awtorità Ewropea għas-Sigurtà fl-Ikel u jistabbilixxi l-proċeduri fi kwistjonijiet ta' sigurtà ta' l-ikel (ĠU L 31, 1.2.2002, p. 1). Regolament kif emendat l-aħħar bir-Regolament (KE) Nru 575/2006 (ĠU L 100, 8.4.2006, p. 34).

(8)  ĠU L 109, 6.5.2000, p. 29. Direttiva kif emendata l-aħħar bid-Direttiva 2007/68/KE (ĠU L 310, 28.11.2007, p. 11).

(9)  ĠU L 31, 1.2.2002, p. 1. Regolament kif l-aħħar emendat mir-Regolament (KE) Nru 575/2006 (ĠU L 100, 8.4.2006, p. 34).