[pic] | KUMMISSJONI TAL-KOMUNITAJIET EWROPEJ | Brussel 6.11.2007 KUMM(2007) 658 finali Proposta għal DEĊIŻJONI TAL-KUNSILL dwar il-prinċipji, il-prijoritajiet u l-kondizzjonijiet li jinsabu fis-Sħubija għall-Adeżjoni mal-Kroazja u li tħassar id-Deċiżjoni 2006/145/KE (preżentata mill-Kummissjoni) MEMORANDUM TA’ SPJEGAZZJONI Il-Kunsill Ewropew ta’ Tessaloniki tad-19 u l-20 ta’ Ġunju 2003 approva “L-Aġenda ta’ Tessaloniki għall-Balkani tal-Punent”, li introduċiet il-partenarjati Ewropej bħala mezz biex titwettaq il-perspettiva Ewropea għall-pajjiżi tal-Balkani tal-Punent. Fl-20 ta' Frar ta' l-2006, il-Kunsill adotta l-Partenarjat ta' Adeżjoni rivedut għall-Kroazja bbażat fuq il-proposta tal-Kummissjoni ppreżentata fid-9 ta' Novembru ta' l-2005 Dan il-partenarjat jinkludi prijoritajiet kemm fuq medda qasira ta' żmien kif ukoll fuq medda twila. Il-pajjiżi huma mistennija li jirrispettaw il-prijoritajiet fuq teminu qasir fi żmien sena sa sentejn. Għalhekk il-Kummissjoni jidhrilha li jkun xieraq li tressaq proposta għal Partenarjat aġġornat għall-Kroazja. Dan il-partenarjat imġedded huwa msejjes fuq id-dispożizzjonijiet tar-Regolament tal-Kunsill (KE) Nru 553/2004 tat-22 ta’ Marzu 2004 u jikkunsidra l-iżviluppi l-ġodda kif imfissra fir-Rapport ta’ Progress ta' l-2007. Il-prijoritajiet elenkati f'dan il-partenarjat intgħażlu fuq il-bażi li huwa realistiku li tistenna li l-Kroazja tista' twassalhom sa tmiemhom jew tmexxihom sostanzjalment 'il quddiem matul is-snin li ġejjin. Biex iwieġbu għall-Partenarjat ta' Adeżjoni, l-awtoritajiet kompetenti tal-Kroazja għandhom jiżviluppaw pjan bi skeda u l-miżuri speċifiċi li l-Kroazja bi ħsiebha tieħu biex timplimenta dan il-pjan. Il-progress fl-implimentazzjoni tal-prijoritajiet ser jiġi segwit regolarment mill-Kummissjoni. Il-prijoritajiet tal-Partenarjat ta' Adeżjoni jiffurmaw il-bażi ta’ l-ipprogrammar ta’ l-għajnuna finanzjarja Komunitarja, li ser tibqa’ tingħata taħt l-istrumenti finanzjarji rilevanti, b'mod partikolari r-Regolament tal-Kunsill (KE) Nru 1085/2006 tas-17 ta’ Lulju ta' l-2006 li jistabbilixxi l-Istrument għall-Għajnuna ta' Qabel l-Adeżjoni (IPA). Id-Deċiżjoni tal-Kunsill proposta m'għandha l-ebda implikazzjonijiet finanzjarji. Fid-dawl ta' dak ta' hawn fuq, Kummissjoni tistieden lill-Kunsill jadotta l-proposta mehmuża għal Deċiżjoni tal-Kunsill. Proposta għal DEĊIŻJONI TAL-KUNSILL dwar il-prinċipji, il-prijoritajiet u l-kondizzjonijiet li jinsabu fis-Sħubija għall-Adeżjoni mal-Kroazja u li tħassar id-Deċiżjoni 2006/145/KE IL-KUNSILL TA' L-UNJONI EWROPEA, Wara li kkunsidra t-Trattat li jistabbilixxi l-Komunità Ewropea, Wara li kkunsidra r-Regolament tal-Kunsill (KE) Nru 533/2004 tat-22 ta’ Marzu 2004 dwar il-ħolqien ta’ partenarjati fil-qafas tal-proċess ta’ stabbilizazzjoni u assoċjazzjoni[1], kif l-aħħar emendat, u b’mod partikolari l-Artikolu 2 tiegħu, Wara li kkunsidra l-proposta tal-Kummissjoni, Billi: (1) Il-Kunsill Ewropew ta’ Tessaloniki tad-19 u l-20 ta’ Ġunju 2003 approva l-introduzzjoni tal-Partenarjati bħala mezz biex isseħħ il-perspettiva Ewropea tal-pajjiżi tal-Balkani tal-Punent. (2) Ir-Regolament (KE) Nru. 533/2004 jipprevedi li l-Kunsill għandu jiddeċiedi dwar il-prinċipji, il-prijoritajiet u l-kundizzjonijiet li għandhom jiġu inklużi fil-partenarjati Ewropej, kif ukoll dwar aġġustamenti sussegwenti. Huwa ddikjarat ukoll li s-segwitu tal-Partenarjati ta' Adeżjoni se jkun żgurat permezz tal-mekkaniżmi stabbiliti skond il-Proċess ta’ Stabilizzazzjoni u Assoċjazzjoni, prinċipalment permezz tar-rapporti annwali ta' progress. (3) Wara t-tiswir tal-Partenarjat Ewropew ta' l-2004, fl-20 ta' Frar ta' l-2006 l-Kunsill adotta l-ewwel Partenarjat ta' Adeżjoni mal-Kroazja[2]. (4) Fit-3 ta' Ottubru 2005, l-Istati Membri bdew in-negozjati mal-Kroazja dwar l-adeżjoni tagħha ma' l-Unjoni Ewropea. Il-mixi tan-negozjati ser jiġi ggwidat mill-progress tal-Kroazja fit-tħejjija għall-adeżjoni, li ser jitqies, inter alia , fuq il-bażi ta' konsiderazzjoni ta' l-implementazzjoni tal-Partenarjat ta' Adeżjoni, skond kif rivedut regolarment. (5) Id-Dokument tal-Kummissjoni dwar l-istrateġija tat-tkabbir u l-isfidi ewlenin għall-2006-2007 jindika li l-partenarjati ser jiġu aġġornati fi tmiem l-2007. (6) Fit-12 ta’ Ġunju ta' l-2006 l-Kunsill adotta r-Regolament (KE) Nru 1085/2006 li jistabbilixxi strument għall-għajnuna ta' qabel l-adeżjoni (IPA)[3], li jġedded il-qafas għall-għajnuna finanzjarja għal pajjiżi ta’ qabel l-adeżjoni. (7) Jixraq għalhekk li jiġi adottat Partenarjat ta' Adeżjoni rivedut li jaġġorna l-partenarjat attwali sabiex jiġu identifikati prijoritajiet imġedda għal xogħol ulterjuri, fuq il-bażi tal-konklużjonijiet tar-Rapport ta' Progress ta' l-2007 dwar it-tħejjijiet tal-Kroazja għal integrazzjoni akbar ma' l-Unjoni Ewropea. (8) Sabiex tħejji għall-adeżjoni, il-Kroazja mistennija tiżviluppa pjan bi programm skedat u b'miżuri speċifiċi li jindirizzaw il-prijoritajiet ta' dan il-Partenarjat ta' Adeżjoni. (9) Id-Deċiżjoni 2006/145/KE għandha titħassar. IDDEĊIEDA KIF ĠEJ: Artikolu 1 Il-prinċipji, il-prijoritajiet u l-kundizzjonijiet fil-Partenarjat ta' Adeżjoni mal-Kroazja huma stabbiliti fl-Anness. Artikolu 2 L-implementazzjoni tal-Partenarjat ta' Adeżjoni għandha tiġi eżaminata u sorveljata permezz tal-mekkaniżmi stabbiliti skond il-Proċess ta' Stabbilizzazzjoni u Assoċjazzjoni, u mill-Kunsill fuq il-bażi tar-rapporti annwali tal-Kummissjoni. Artikolu 3 Id-Deċiżjoni 2006/145/KE għandha tiġi revokata. Artikolu 4 Din id-Deċiżjoni għandha tidħol fis-seħħ fit-tielet jum wara dak tal-pubblikazzjoni tagħha fil- Ġurnal Uffiċjali ta' l-Unjoni Ewropea. Magħmul fi Brussell, Għall-Kunsill Il-President ANNESS: KROAZJA: PARTENARJAT TA' ADEŻJONI 2007 1. DAĦLA Il-verżjoni riveduta proposta tal-Partenarjat ta' Adeżjoni taġġorna l-ewwel verżjoni, fuq il-bażi tas-sejbiet tar-Rapport ta’ Progress ta' l-2007 tal-Kummissjoni dwar il-Kroazja. Hija tidentifika l-prijoritajiet ta’ azzjoni li ġew imġedda kif ukoll dawk li għadhom ma twettqux. Il-prijoritajiet il-ġodda huma adattati għall-ħtiġijiet speċifiċi u l-istadju ta’ tħejjija tal-pajjiż, u jkunu aġġornati skond il-ħtieġa. Is-Sħubija għall-Adeżjoni tipprovdi wkoll gwida għall-assistenza finanzjarja lill-pajjiż. 2. PRINĊIPJI Il-Proċess ta’ Stabbilizazzjoni u Assoċjazzjoni jibqa’ l-qafas għall-mira Ewropea tal-pajjiżi tal-Balkani tal-Punent, matul it-triq kollha li twassal għas-sħubija ġejjiena tagħhom. Il-prijioritajiet ewlenin identifikati għall-Kroazja huma dwar il-kapaċità tiegħu li jissodisfa l-kriterji stabbiliti mill-Kunsill Ewropew ta’ Kopenħagen fl-1993 u l-kundizzjonijiet stabbiliti għall-Proċess ta’ Stabbilizazzjoni u Assoċjazzjoni, speċjalment il-kundizzjonijiet espressi mill-Kunsill fil-Konklużjonijiet tad-29 ta’ April 1997 u l-21 u t-22 ta’ Ġunju 1999, id-dikjarazzjoni finali tas-Samit ta’ Żagreb ta’ l-24 ta’ Novembru 2000 u l-Aġenda ta’ Tessaloniki, kif ukoll ir-rekwiżiti tal-qafas tan-negozjar adottat mill-Kunsill fit-3 ta' Ottubru 2005. 3. PRIJORITAJIET Il-prijoritajiet elenkati f'din is-Sħubija għall-Adeżjoni ġew magħżula fuq il-bażi li huwa realistiku li tistenna li l-Kroazja tista' tlestihom jew tmexxihom sostanzjalment 'il quddiem matul il-ftit snin li ġejjin. Il-prijoritajiet jikkonċernaw kemm il-leġiżlazzjoni kif ukoll l-implementazzjoni tagħha. Minħabba l-ħtieġa ta' l-iffissar tal-prijoritajiet, jidher ċar li hemm ħidmiet oħra li l-Kroazja trid twettaq li jistgħu jsiru prijoritajiet fi kwalunkwe partenarjat ġejjieni, filwaqt li jitqies ukoll il-progress li fil-futur ser tikseb il-Kroazja. Fost il-prijoritajiet, il-prijoritajiet ewlenin ġew identifikati u miġbura flimkien fil-bidu tat-taqsima ta' hawn taħt. L-ordni ta' dawn il-prijoritajiet ewlenin ma timplikax klassifika gradatorja ta' l-importanza tagħhom. Prijoritajiet Ewlenin - L-iżgurar ta' implimentazzjoni xierqa ta' l-impenji kollha sottoskritti fil-Ftehim ta' Stabilizzazzjoni u Assoċjazzjoni. - L-aġġornar u l-implimentar ta' l-istrateġija u l-pjan ta' azzjoni għar-riforma tas-sistema ġudizzjarja; tintgħaġġel ir-riforma ta' l-amministrazzjoni pubblika - L-aġġornar u l-implimentar tal-programm ta' kontra l-korruzzjoni u pjani ta' azzjoni relatati u l-iżgurar ta' sforzi aktar koordinati u proattivi biex tiġi evitata, tinkixef u tkun miġġielda l-korruzzjoni speċjalment fuq livell għoli. - L-implimentar tal-Liġi Kostituzzjonali dwar il-Minoritajiet Nazzjonali, b'attenzjoni partikolari li għandha tingħata lid-dispożizzjonijiet tagħha li jiggarantixxu rappreżentazzjoni proporzjonali tal-minoritajiet fil-qasam ta' l-impjieg. Issir ġlieda fuq medda aktar wiesgħa kontra d-diskriminazzjoni fis-settur pubbliku. - It-twassil sat-tmiem tal-proċess tar-ritorn tar-refuġjati; ir-riżoluzzjoni definittiva tal-problemi kollha ta' forniment ta' akkomodazzjoni lil min kellu dritt għal okkupazzjoni jew kera; it-twassil sat-tmien tar-rikostruzzjoni u l-pussess mill-ġdid tal-proprjetà u tinfetaħ mill-ġdid il-possibbiltà għal talbiet ta' konvalidazzjoni. - Il-prosegwiment ta' sforzi mmirati lejn rikonċiljazzjoni fost iċ-ċittadini fir-reġjun u t-tkabbir ta' l-isforzi biex jinstabu soluzzjonijiet definittivi għall-kwistjonijiet bilaterali pendenti, b'mod partikolari l-kwistjonijiet transkonfinali. - Iż-żamma ta' kooperazzjoni sħiħa mat-Tribunal Kriminali Internazzjonali għall-ex-Jugoslavja u l-iżgurar ta' integrità fil-proċeduri penali nazzjonali kontra l-kriminalitajiet tal-gwerra. - It-titjib fl-ambjent ta' l-impriżi u l-potenzjal tat-tkabbir ekonomiku, b'mod partikolari permezz tat-tnaqqis fis-sussidji, ir-ristrutturar ta' l-impriżi kbar li qed jirreġistraw telf u t-tkabbir fl-effiċjenza tan-nefqa pubblika. Kriterji Politiċi Demokrazija u Stat tad-dritt Amministrazzjoni pubblika - L-implimentazzjoni sħiħa tal-miżuri ta' riforma ta' l-amministrazzjoni pubblika fir-rigward ta' proċeduri amministrattivi u tar-reklutaġġ, il-promozzjoni, it-taħriġ u d-depolitiċiżżazzjoni; it-titjib fil-ġestjoni tar-riżorsi umani fis-setturi ta' l-amministrazzjoni pubblika. Sistema ġudizzjarja - It-tnaqqis sostanzjali tal-każi b'lura fil-qrati u l-iżgurar ta' tul ta' żmien raġonevoli tal-proċeduri ġudizzjarji. - Ir-razzjonalizzazzjoni ta' l-organizzazzjoni tal-qrati, inkluża l-introduzzjoni ta' sistemi moderni tat-teknoloġija ta' l-informatika. - Il-ħolqien ta' sistema ġusta u trasparenti ta' reklutaġġ, evalwazzjoni u promozzjoni u t-tisħiħ tal-professjonaliżmu fil-ġudikatura permezz ta' taħriġ ta' kwalità għolja, b'mod partikolari fil-liġi ta' l-UE. - Miżuri għall-assigurazzjoni ta' l-eżekuzzjoni xierqa u sħiħa tad-deċiżjonijiet tal-qrati. Politika kontra l-korruzzjoni - It-tkomplija ta' l-iżvilupp tal-kodiċi tal-kondotta jew ta' l-etika għall-uffiċjali u r-rappreżentanti eletti kif ukoll pjanijiet ta' azzjoni li jipprevjenu l-korruzzjoni fl-aġenziji rilevanti ta' l-infurzar tal-liġi (il-pulizija tal-fruntieri, il-pulizija, id-dwana, il-ġudikatura). Il-ħolqien ta' unitajiet speċjalizzati għall-ġlieda kontra l-korruzzjoni fi ħdan is-servizzi xierqa permezz ta' mekkaniżmu adegwat ta' koordinazzjoni bejniethom u l-għoti lilhom ta' taħriġ u riżorsi xierqa. - It-teħid ta' passi biex jiġi żgurat li l-qafas legali biex tingħeleb il-korruzzjoni ikun implimentat u infurzat b'mod uniformi. L-assigurazzjoni li jintlaħqu l-istandards stabbiliti minn strumenti internazzjonali, billi jittieħdu l-miżuri leġiżlattivi u amministrattivi xierqa. - L-implimentazzjoni ta' azzjonijiet konkreti sabiex titqajjem kuxjenza pubblika dwar il-korruzzjoni bħala reat kriminali gravi. Drittijiet tal-bniedem u ħarsien tal-minoranzi - L-assigurazzjoni ta' l-aċċessibbiltà għall-ġustizzja u l-għajnuna legali u l-ħolqien ta' disponibbiltà tar-riżorsi korrispondenti mill-budget. - Il-promozzjoni tar-rispett lejn il-minoranzi u l-ħarsien tagħhom skond il-liġi internazzjonali u l-aħjar prattiċi fl-Istati Membri ta' l-UE. - L-inkuraġġiment ta' spirtu ta' tolleranza fir-rigward tal-minoritajiet Serbi u r-Roma u t-teħid ta' miżuri għall-ħarsien ta' membri ta' komunitajiet minoritarji li jistgħu jkunu suġġetti għat-theddid jew atti ta' diskriminazzjoni, ostilità jew vjolenza. - It-tkomplija l-implementazzjoni ta' l-istrateġija u tal-pjan ta' azzjoni għall-protezzjoni u l-integrazzjoni tar-Roma u l-assigurazzjoni tad-disponibbiltà tal-mezzi meħtieġa, speċjalment fir-rigward ta' l-impjieg, l-edukazzjoni u d-djar. - L-adottar u l-implementazzjoni ta' strateġija globali għal kontra d-diskriminazzjoni. Kwistjonijiet reġjonali u obbligi internazzjonali - L-iżgurar ta' l-integrità ta' proċeduri fir-rigward tal-kriminalitajiet tal-gwerra, b'mod partikolari billi tingħata garanzija li jintemm il-preġudizzju etniku kontra s-Serbi, inkluża l-applikazzjoni ta' standard uniformi ta' responsabbiltà kriminali u sigurtà mtejba għax-xhieda u l-informaturi. - L-assigurazzjoni ta' koordinazzjoni u koperazzjoni adegwati bejn l-awtoritajiet kollha rilevanti fil-livelli ċentrali u lokali dwar kwistjonijiet tar-ritorn tar-rifuġjati. - L-intensifikar ta' l-isforzi biex jissolvew mal-ġirien il-problemi kollha li għandhom x'jaqsmu mat-telfien tad-drittijiet ta' okkupazzjoni u l-kera. - Il-ħolqien ta' kundizzjonijiet soċjali u ekonomiċi għat-titjib fil-klima ta' l-integrazzjoni mill-ġdid ta' dawk li jiġu lura u l-aċċettazzjoni tagħhom mill-komunitajiet li jilqgħuhom, anke permezz ta' programmi ta' żvilupp reġjonali fiż-żoni milquta. - Jingħata kontribut għat-tisħiħ tal-kooperazzjoni reġjonali, speċjalment permezz tal-promozzjoni tal-proċess tranżitorju mill-Patt ta' Stabilità għal qafas ta' kooperazzjoni mfassal aktar b'mod partikolari għar-reġjun u l-implimentazzjoni effikaċi tal-Ftehim ta’ Kummerċ Ħieles ta’ l-Ewropa Ċentrali (CEFTA). - L-implementazzjoni sħiħa tal-ftehimiet mal-pajjiżi ġirien, notevolment fir-rigward tal-ġlieda kontra l-kriminalità organizzata, il-ġestjoni tal-fruntieri u r-rijammissjoni, il-kooperazzjoni transkonfinali, u l-kooperazzjoni ġudizzjarja u bejn il-pulizija, anke fir-rigward tal-kriminalitajiet tal-gwerra, u l-konklużjoni ta' ftehimiet bħal dawn fejn tali ftehimiet ikunu għadhom pendenti. - L-issuktar fl-implimentazzjoni tal-ftehim trilaterali ta' Ġunju 2004 sakemm jintlaħaq ftehim komuni dwar iż-żona tal-Kroazja unilateralment iddikjarata bħala żona ekoloġika u tas-sajd protetta. Kriterji ekonomiċi - L-issuktar fl-implimentazzjoni ta' politika prudenti fis-setturi fiskali, monetarji u finanzjarji bil-għan li tinżamm stabbiltà makroekonomika, inklużi inflazzjoni baxxa, stabbiltà fir-rata tal-kambju u tnaqqis ulterjuri fil-parti tal-PGD rrappreżentata mill-ispiża pubblika globali u mid-defiċit u d-dejn pubbliku. - L-issuktar fir-riformi istituzzjonali fis-settur tal-finanzi pubbliċi bil-għan li titkabbar it-trasparenza fiskali u li jittejbu l-effiċjenza u t-trasparenza tal-ġestjoni tad-dejn pubbliku, u li jitwettaq it-tibdil ippjanat ta' l-irrappurtar tal-baġit għall-allinjament skond il-prinċipji ta' l-ESA 95. - L-issuktar fl-implimentazzjoni tar-riformi globali tas-settur tal-kura tas-saħħa biex tiġi evitata l-akkumulazzjoni ta' arretrati ġodda ta' ħlasijiet fis-sistema tas-saħħa u biex tittejjeb l-effiċjenza ta' l-ispiża fuq is-saħħa. L-issuktar fir-riforma ta' l-ispiża marbuta mal-benefiċċji soċjali. L-iżgurar tas-sostenibbiltà finanazjarja ta' l-ewwel pilastru tas-sistema tal-pensjoni permezz ta' riformi xierqa tal-parametri. - L-issuktar fil-faċilitazzjoni tad-dħul ta' l-impriżi fis-suq permezz ta' aktar tnaqqis fil-ħin u l-proċeduri meħtieġa u l-ispejjeż għall-ħolqien ta' entita' kummerċjali. It-titjib fil-proċeduri tal-falliment biex jitħaffef il-ħruġ mis-suq. - It-titjib fil-qafas istituzzjonali għall-privatizzazzjoni bil-għan li tiġi avvanzata b'mod sinifikanti l-privatizzazzjoni tal-kumpaniji miżmuma taħt il-Fond ta' Privatizzazzjoni ta' l-Istat. L-issuktar fir-ristrutturar ta' l-impriżi ta' sjieda statali li jkunu qed jagħmlu telf u tas-sistema ferrovjarja biex jitnaqqas l-ammont ta' sussidji lis-settur ta' l-impriżi bħala sehem mill-PGD. - It-titjib fis-setturi ta' l-inċentivi u l-flessibbiltà fis-suq tax-xogħol biex tiżdied il-parteċipazzjoni u r-rata ta' l-impjieg. Abbilità għall-irfigħ ta' l-obbligi tas-sħubija Kapitolu 1: Moviment ħieles tal-prodotti - L-adozzjoni u l-implimentazzjoni ta' leġiżlazzjoni qafas orizzontali biex tinkiseb l-infrastruttura meħtieġa, u tiġi żgurata s-separazzjoni tal-ħidmiet bejn id-diversi funzjonijiet (regolatorji, standardizzazzjoni, akkreditazzjoni, metroloġija, evalwazzjoni tal-konformità u sorveljanza tas-suq). - L-adozzjoni u l-implimentazzjoni ta' strateġija globali għat-traspożizzjoni u l-implimentazzjoni tal-leġiżlazzjoni tal-KE għall-organizzazzjoniet orizzontali rilevanti (standardizzazzjoni, akkreditazzjoni, metroloġija u sorveljanza tas-suq) u f'ċerti setturi, kif ukoll it-titjib tal-kapaċità amministrattiva. - L-adottar u l-implimentazzjoni ta' Pjan ta' Azzjoni għal konformità ma' l-Artikoli 28-30 tat-TKE, inkluża l-introduzzjoni ta' klawżoli ta' rikonoxximent reċiproku. - L-issuktar fl-adozzjoni ta' l-istandards Ewropej. L-issuktar fit-tħejjijiet għall-issodisfar tal-kriterji ta' sħubija għall-entitajiet ta' standardizzazzjoni. - L-issuktar fit-traspożizzjoni tad-direttivi ta' Approċċ Ġdid u Approċċ Qadim. Kapitolu 2: Moviment liberu tal-ħaddiema - It-tneħħija ta' kull miżura diskriminatorja lejn l-ħaddiema migranti fl-UE u lejn iċ-ċittadini ta' l-UE. - It-tisħiħ ta' l-istrutturi amministrattivi għall-koordinazzjoni ta' l-iskemi tas-sigurtà soċjali. Kapitolu 3: Dritt ta' l-istabbiliment u libertà għall-provvista ta' servizzi - L-issuktar fl-allinjament tal-leġiżlazzjoni ma' l- acquis fir-rigward tar-rikonoxximent tal-kwalifiki professjonali għaċ-ċittadini ta' l-UE u l-emendar tal-leġiżlazzjoni eżistenti għat-tħassir tal-bqija tar-rekwiżiti relatati man-nazzjonalità, il-lingwa, l-istabbiliment jew l- awtorizzazzjoni għall-eżerċizzju ta' attività kummerċjali għall-fornituri tas-servizzi ta' l-UE. Kapitolu 4: Moviment ħieles tal-kapital - L-issuktar fil-ħolqien ta' mekkaniżmu effikaċi għal kontra l-l-ħasil tal-flus, b'mod partikolari billi jiġi żgurat li l-aġenziji ta' l-infurzar ikunu qed joperaw b'mod sħiħ, ikollhom riżorsi biżżejjed u jkunu kkoordinati tajjeb bil-kontropartijiet tagħhom domestiċi u internazzjonali. - Il-ksib ta' progress ulterjuri fit-tneħħija tar-restrizzjonijiet li fadal fuq il-movimenti tal-kapital; it-tneħħija tar-restrizzjoni kollha fuq ix-xiri ta' proprjetà immobbli miċ-ċittadini ta' l-UE f'konformità ma' l-SAA u l-iżgurar li sadattant l-applikazzjonijiet kollha minn ċittadini ta' l-UE għall-permessi biex jixtru l-proprjetà immobbli jiġu ttrattati bil-ħeffa. Kapitolu 5: Appalti pubbliċi - It-tħollija f'idejn aġenzija responsabbli mill-akkwisti pubbliċi biex tiggarantixxi politika koerenti u tipprovdi direzzjoni fl-implimentazzjoni tagħha fl-oqsma kollha marbuta ma' l-appalti pubbliċi. - L-adottar u l-implimentazzjoni ta' strateġija globali b'perjodi skedati u stadji importanti għall-allinjament tal-leġiżlazzjoni u r-rinfurzar tal-kapaċitajiet fl-oqsma kollha marbuta ma' l-appalti pubbliċi (kuntratti pubbliċi, konċessjonijiet, partenarjati privati-pubbliċi) kif ukoll fejn jidħlu proċeduri u entitajiet ta' kontroll. It-tisħiħ ta' mekkaniżmi ta' l-infurzar ta' entitajiet ta' kontroll. Kapitolu 6: Liġi tal-kumpaniji - L-allinjament ta' l-Att tal-Kumpaniji ma' l- acquis u t-twassil sat-tmien ta' allinjament mad-Direttiva dwar l-offerti pubbliċi għat-teħid ta' kontroll. - L-allinjament tal-leġiżlazzjoni tal-kontabbiltà u l-ivverifikar ma' l- acquis . It-tisħiħ tal-qafas istituzzjonali rilevanti. Kapitolu 7: Liġi dwar il-proprjetà intelletwali - It-twassil sat-tmien ta' l-allinjament ma' l- acquis fejn għandhom x'jaqsmu d-drittijiet ta' l-awtur u d-drittijiet relatati u l-iżgurar ta' l-infurzar tad-drittijiet tal-proprjetà intellettwali permezz tat-tisħiħ tal-kapaċità amministrattiva ta' l-entitajiet rilevanti. - Ir-reġistrazzjoni ta' riżultati disponibbli sodisfaċenti fil-qasam ta' l-investigazzjonijiet, il-prosekuzzjonijiet, u t-trattament ġudizzjarju ta' każi ta' piraterija u ffalsifikar. Kapitolu 8: Politika ta' kompetizzjoni - L-adottar ta' Programm Nazzjonali ta' Ristrutturazzjoni għas-settur ta' l-azzar biex ikunu żgurati l-vijabbiltà tar-regoli ta' l-UE u r-rispett lejhom fejn għandhom x'jaqsmu għajnuniet mill-Istat. L-adottar ta' pjan ta' ristrutturazzjoni individwali għal kull tarzna li tkun tinsab f'diffikultà u l-inkorporazzjoni ta' dawn il-pjani fi Programm Nazzjonali ta' Ristrutturazzjoni f'konformità mar-regoli ta' l-UE fir-rigward ta' l-għajnuniet mill-Istat. - It-twassil sat-tmiem ta' l-allinjament leġiżlattiv mar-regoli ta' l-għajnuna mill-Istat ta' l-UE fis-settur ta' l-għajnuna fiskali u l-allinjament tal-bqija ta' l-iskemi ta' għajnuna l-oħra kollha identifikati fl-inventarju ta' l-għajnuna mill-Istat bħala skemi inkompatibbli mar-regoli ta' l-UE. L-adottar ta' pjan dettaljat għall-għajnuna reġjonali. - L-adottar ta' miżuri leġiżlattivi li jippermettu li jitwettaq kontroll effikaċi ta' l- anti-trust , b'mod partikolari fir-rigward tad-determinazzjoni ta' l-emendi u l-kontroll ġudizzjarju. Kapitolu 9: Servizzi finanzjarji - It-twassil sat-tmiem tat-traspożizzjoni ta' l- acquis dwar ir-rekwiżiti tal-kapital, l-istituzzjonijiet ta' flus elettroniċi, il-konglomerati finanzjarji, il-likwidazzjoni u rijorganizzazzjoni, il-kontijiet bankarji, il-kontijiet fil-fergħat tal-banek u l-iskemi ta' garanzija tad-depożiti. - It-twassil sat-tmiem ta' l-allinjament tal-leġiżlazzjoni relatata mal-marġni ta' solvenza, mas-sorveljanza ta' l-assigurazzjonijiet, mal-medjazzjoni fi kwistjonijiet relatati ma' l-assigurazzjoni u rijassigurazzjoni, ma' l-infrastruttura tas-suq finanzjarju, u mas-swieq ta' l-investimenti u s-sigurtajiet. - Il-ħolqien ta' sistema ta' kumpens għall-investituri f'konformità ma' l- acquis . It-twettiq ta' l-implimentazzjoni ta' rekwiżiti prudenzjali permezz tal-ksib ta' riżultati pożittivi disponibbli. Kapitolu 10: Soċjetà ta’ l-informazzjoni u l-midja - It-twassil sat-tmien ta' l-allinjament ma' l- acquis fejn jikkonċerna l-komunikazzjoni elettronika, il-kummerċ elettroniku, il-firem elettroniċi, is-sigurtà ta' l-informazzjoni u d-Direttiva dwar it-Televiżjoni mingħajr Fruntieri. - L-iżgurar ta' kapaċità amministrattiva suffiċjenti biex jiġi infurzat l- acquis , b'mod partikolari fil-qasam tal-komunikazzjoni elettronika u l-ksib ta' riżultati pożittivi disponibbli fir-rigward ta' l-infurzar ta' l-obbligi imposti fuq l-operaturi li huma b'saħħithom ħafna fis-suq u d-drittijiet ta' dawk li daħlu ġodda fis-suq tal-komunikazzjoni elettronika, inklużi d-drittijiet ta' aċċess, il-kollokalizzazzjoni u l-qsim tar-riżorsi. - It-twassil sat-tmiem tar-reviżjoni prevista tal-leġiżlazzjoni relatata mal-midja awdjoviżiva fuq il-bażi ta' konsultazzjoni pubblika biex tiġi żgurata indipendenza regolatorja u ħarsien kontra ndħil politiku mhux ġustifikat Kapitolu 11: Agrikoltura u żvilupp rurali - It-tisħiħ ta' l-istrutturi amministrattivi u l-kapaċità meħtieġa għall-implementazzjoni tal-politika tas-suq u dik ta' l-iżvilupp rurali, inklużi l-ġbir u l-ipproċessar ta' data dwar l-agrikoltura. - It-twaqqif ta' reġistru ta' l-għelieqi tad-dwieli konformement ma' l-istandards ta' l-UE. - It-tkomplija tat-tħejjijiet għat-twaqqif ta' korpi effettivi u finanzjarjament sodi għall-pagamenti għall-ġestjoni u għall-kontroll tal-fondi agrikoli, konformement mal-ħtiġijiet ta' l-UE u ma' l-istandards internazzjonali ta' verifika. Kapitolu 12: Sigurtà fl-ikel, politika veterinarja u fitosanitarja - It-titjib sostanzjali ta' l-allinjament tal-leġiżlazzjoni relatata mas-settur tas-sikurezza ta' l-ikel, is-settur veterinarju u s-settur fitosanitarju u t-tisħiħ ta' l-istrutturi meħtieġa għall-implimentar, inklużi s-servizzi ta' kontroll u spezzjoni. - L-iżgurar ta' ħolqien ta' sistemi konformi mas-setturi tas-sikurezza ta' l-ikel, u s-setturi vetenirarji u fitosanitarji, inkluża sistema għall-identifikazzjoni ta' l-annimali u r-reġistrazzjoni tal-moviment, it-trattament tal-prodotti sekondarji mill-annimali, il-modernizzazzjoni ta' l-istabbilimenti agroalimentari, is-saħħa ta' l-annimali u programmi għall-kontroll tal-mard ta' l-annimali, il-kontrol ta' l-annimali u l-prodotti ta' l-annimali fil-postijiet ta' spezzjoni fuq il-fruntieri, il-kontroll fuq is-saħħa tal-pjanti, l-awtorizzazzjoni tal-prodotti għall-ħarsien tal-pjanti u l-kontroll fuq ir-residwi tagħhom kif ukoll il-kwalità taż-żrieragħ u tal-materjal għall-propagazzjoni tal-pjanti. Kapitolu 13: Sajd - It-tisħiħ ta' l-istrutturi amministrattivi u, b'mod partikolari, l-istrutturi ta' spezzjoni, meħtieġa għat-twettiq tal-politika tas-sajd u t-titjib fil-ġbir tad- data dwar il-qbid u l-iżbarkamenti. - It-tlestija tat-twaqqif ta' reġistru kompjuterizzat tal-bastimenti tas-sajd u ta' sistema ta' monitoraġġ bis-satellita tal-bastimenti. Kapitolu 14: Politika tat-trasport - It-twassil sat-tmiem ta' l-allinjament ma' l- acquis ta' l-UE u t-tisħiħ tal-kapaċità amministrattiva fis-settur tat-trasport stradali (inkluża l-implimentazzjoni tat-takografu diġitali), it-trasport bl-ajru, it-trasport bil-baħar u fis-settur tan-navigazzjoni interna, b'mod partikolari fir-rigward tas-sikurezza tan-navigazzjoni u tas-Servizzi ta' Informazzjoni dwar ix-Xmajjar. - L-adozzjoni ta' leġiżlazzjoni għall-implementazzjoni għat-trasport bil-ferrovija, b'mod partikolari dispożizzjonijiet ta' interoperabbiltà u l-allokazzjoni indipendenti tal-kapaċità. Il-pubblikazzjoni ta' verżjoni finali tad-dokument ta' referenza dwar in-netwerk. - L-implimentazzjoni ta' l-ewwel fażi tranżitorja tal-Ftehim dwar l-Ispazju ta' l-Ajru Komuni ta' l-Ewropa (ECAA) u r-ratifika tiegħu. Kapitolu 15: Enerġija - L-issodisfar ta' l-obbligi li joħorġu mit-Trattat li jistabbilixxi l-Komunità ta' l-Enerġija. - It-tisħiħ tal-kapaċità amministrattiva u t-twassil sat-tmiem ta' l-allinjament ma' l- acquis ta' l-UE fl-oqsma tas-sigurtà tal-forniment, l-effiċjenza enerġetika u s-sorsi rinnovabbli ta' l-enerġija, is-suq intern ta' l-enerġija (elettriku u gass) u l-qasam ta' l-enerġija nukleari. Kapitolu 16: Tassazzjoni - It-tħaffif fit-twettiq ta' l-allinjament tal-leġiżlazzjoni fiskali ma' l- acquis b'attenzjoni partikolari biex jiġu inklużi żoni franki fl-applikazzjoni territorjali tas-sistema tal-VAT, biex jitneħħew il-kwoti żero eżistenti tal-VAT, u biex tiġi eleminata t-tassazzjoni diskriminatorja fuq is-sigaretti u biex titwettaq armonizzazzjoni ulterjuri fis-sistema tat-taxxa tas-sisa. - Tisħiħ sinifikattiv tal-kapaċità għall-infurzar ta' l-amministrazzjonijiet fiskali u doganali, b'mod partikolari fir-rigward tal-funzjonijiet ta' ġbir u kontroll u l-iżviluppar tas-sistemi informatiċi meħtieġa; l-issuktar tax-xogħol fuq il-ħolqien ta' servizz tas-sisa li jiffunzjona u li jkollu persunal suffiċjenti; l-issimplifikar tal-proċeduri r-rinfurzar tal-kontrolli biex titwettaq prosekuzzjoni effikaċi kontra l-frodi fiskali. - L-impenn favur il-prinċipji tal-Kodiċi ta' Kondotta fil-qasam tat-tassazzjoni ta' l-intrapriżi u l-assigurazzjoni tal-konformità ta' miżuri ġodda tat-taxxa ma' dawn il-prinċipji. Kapitolu 17: Unjoni Ekonomika u Monetarja - L-allinjament tal-qafas legali sabiex tiġi żgurata l-indipendenza sħiħa tal-bank ċentrali, u l-għoti tal-possibbiltà ta' integrazzjoni sħiħa ta' dan fis-Sistema Ewropea tal-Banek Ċentrali (SEBĊ). Kapitolu 18: Statistika - It-tisħiħ tal-kapaċità amministrattiva ta' l-Uffiċċju ta' l-Istatistika, ir-riformar ta' l-uffiċċji reġjonali tiegħu u t-titjib tal-koordinazzjoni ma' produtturi oħra ta' statistika uffiċjali. - L-issuktar fl-iżvilupp ta' l-istatistika agrikola, makroekonomika u ta' l-impriżi. Kapitolu 19: Politika soċjali u impjieg - Allinjament ulterjuri ma' l- acquis u t-tisħiħ ta' l-istrutturi relatati amministrattivi u ta' infurzar, inklużi l-ispettorati tax-xogħol, f'assoċjazzjoni ma' l-imsieħba soċjali. - L-implimentazzjoni effikaċi tal-Memorandum Konġunt dwar l-Integrazzjoni Soċjali (JIM) u, ġaladarba jiġi adottat, id-Dokument Konġunt ta' Valutazzjoni dwar il-Prijoritajiet tal-Politika ta' l-Impjieg (JAP). Kapitolu 20: Politika industrijali u għall-impriżi - L-implimentazzjoni ta' strateġija ta' politika industrijali globali, b'enfażi partikolari fuq ir-ristrutturar ta' setturi ewlenin li qed jagħmlu t-telf u kumpaniji individwali, inklużi dawk ta' l-azzar u t-tarznar. Kapitolu 21: Netwerks tranżewropej - Iż-żieda fl-interkonnessjonijiet tal-gass u l-elettriku ma' pajjiżi ġirien. Kapitolu 22: Politika reġjonali u koordinazzjoni ta' strumenti strutturali - L-adottar u t-tnedija ta' l-implimentazzjoni ta' plan ta' azzjoni li jistipula għanijiet ċari u programm skedat relatat sabiex jiġu ssodisfati r-rekwiżiti regolatorji u operattivi mnissla mill-politika Komunitarja ta' koeżjoni, inkluż it-tisħiħ tal-kapaċità fuq il-livelli ċentrali, reġjonali, u lokali. - L-iżgurar ta' distribuzzjoni ċara tar-responsabbiltajiet u t-tisħiħ tal-kapaċità ta' l-awtoritajiet/strutturi ta' implimentazzjoni maħtura u tal-koordinazzjoni bejniethom, inklużi l-awtoritajiet lokali. - L-adottar ta' l-Att dwar l-Iżvilupp Reġjonali. - Ir-rinfurzar tal-kapaċità għall-ipprogrammar, it-tħejjija tal-proġetti, is-sorveljar, l-ivvalutar u l-ġestjonar u l-kontroll finanzjarju, partikolarment tal-Ministeri responsabbli, biex jiġu implimentati l-programmi Komunitarji ta' qabel l-adeżjoni bħala tħejjija għall-politika Komunitarja tal-koeżjoni. Kapitolu 23: Sistema ġudizzjarja u drittijiet fundamentali - L-issuktar fl-implimentazzjoni tal-liġi naturali dwar il-ħarsien tad- data personali f'konformità ma' l- acquis u l-iżgurar ta' sorveljar u infurzar effiċjenti. - Għal prijoritajiet oħra ara t-taqsima dwar il-kriterji politiċi. Kapitolu 24: Ġustizzja, libertà u sigurtà - L-issuktar fir-reviżjoni tal-leġiżlazzjoni ewlenija għall-allinjament ma' l- acquis ta' Schengen u l-estenzjoni ta' l-investimenti fuq livell lokali f'termini ta' tagħmir informatiku u taħriġ ulterjuri għall-pulizija. - L-issuktar fit-tħejjijiet għall-implimentazzjoni ta' l- acquis ta' Schengen permezz ta' żieda fil-livelli tal-persunal u t-taħriġ tal-gwardjani tal-fruntieri, aktar investiment fit-tagħmir inkluża l-estenzjoni tas-Sistema Nazzjoni għall-Ġestjoni tal-Fruntieri u l-iżgurar tal-kompatibbiltà tagħha mas-Sistema ta' l-Informazzjoni ta' Schengen tat-tieni ġenerazzjoni (SIS II). It-titjib fil-kapaċità amministrattiva u ta' infurzar tal-pulizija tal-fruntieri permezz tat-tkabbir tal-kooperazzjoni bejn l-aġenziji. - L-issuktar fl-allinjament mal-politika Komunitarja dwar il-viżi, inkluża l-introduzzjoni ta' identifikaturi bijometriċi fid-dokumenti ta' l-ivvjaġġar u t-tħejjijiet għas-sistema ta' Informazzjoni dwar il-Viżi. - L-introduzzjoni ta' leġiżlazzjoni sekondarja għall-implimentazzjoni ta' l-Att dwar l-Ażil u l-Att dwar il-Persuni Barranin. - L-iżgurar ta' kompatibbiltà tal-leġiżlazzjoni ma' l- acquis f'kooperazzjoni ġuridika f'materji ċivili u kriminali u t-tisħiħ tal-kapaċità tal-ġudikatura biex tapplika l- acquis . Kapitolu 25: Xjenza u riċerka - L-iżgurar ta' kapaċità xierqa biex jintrefa' l-piż ta' proġetti ta' riċerka ffinanzjati mill-UE. - L-issuktar fit-teħid u l-implimentazzjoni ta' azzjonijiet biex tiġi ffaċilitata l-integrazzjoni fi ħdan iż-Żona Ewropea ta' Riċerka. Kapitolu 26: Edukazzjoni u kultura - L-iżgurar ta' kapaċità xierqa għall-ġestjoni tal-programmi Edukazzjoni u Taħriġ għal matul il-Ħajja Kollha ( Lifelong Learning ) u Żgħożija fl-Azzjoni ( Youth in Action ). - L-allinjament ma' l- acquis fir-rigward tan-non-diskriminazzjoni bejn iċ-ċittadini ta' l-UE u l-Kroazja fl-aċċess għall-edukazzjoni kif ukoll mad-Direttiva dwar l-edukazzjoni tat-tfal tal-ħaddiema migrati. Kapitolu 27: Ambjent - It-tkomplija fil-ħidma fuq it-traspożizzjoni u l-implimentazzjoni ta' l-acquis ta' l-UE, b'enfasi partikolari fuq il-ġestjoni ta' l-iskart, il-kwalità ta' l-ilma, il-kwalità ta' l-arja, il-ħarsien tan-natura u l-prevenzjoni u l-kontroll integrati tat-tniġġis. - L-adozzjoni u l-implimentazzjoni ta' pjan globali għall-istituzzjoni tal-kapaċità amministrattiva u r-riżorsi finanzjarji meħtieġa biex jiġi implimentat l- acquis dwar l-ambjent. - It-tkabbir ta' l-investimenti fl-infrastruttura ambjentali, b'enfasi partikolari fuq il-ġbir u t-trattament ta' l-ilma mormi, il-provvista ta' l-ilma tax-xorb u l-ġestjoni ta' l-iskart. - It-tnedija ta' l-implimentazzjoni tal-Protokoll ta' Kjoto. - L-iżgurar ta' l-integrazzjoni ta' rekwiżiti għall-ħarsien ta' l-ambjent fid-definizzjoni u l-implemetazzjoni ta' linji politiċi settorjali oħrajn u l-promozzjoni ta' l-iżvilupp sostenibbli. Kapitolu 28: Protezzjoni tal-konsumatur u s-saħħa - L-allinjament ulterjuri ma' l- acquis relatat mal-konsumatur u s-saħħa, speċjalment fis-setturi tat-tessuti u ċ-ċelluli umani kif ukoll fis-settur tat-tabakk, u l-iżgurar li jkun hemm strutturi amministrattivi u kapaċità għall-infurzar xierqa. - Fil-qasam tas-saħħa mentali, l-iżvilupp ta' serviżżi bbażati fil-komunità bħala alternattiva għall-istituzzjonalizzazzjoni, u l-iżgurar ta' l-allokazzjoni ta' riżorsi finanzjarji biżżejjed għall-kura tas-saħħa mentali. Kapitolu 29: Unjoni doganali - L-issuktar fl-adozzjoni ta' leġiżlazzjoni fl-għadd limitat ta' setturi li fadal fejn hu meħtieġ allinjament ulterjuri, b'mod partikolari fir-rigward ta' regoli ta' oriġini mhux preferenzjali u l-applikazzjoni tat-tariffi. - L-applikazzjoni ta' regolai tad-dwana b'mod konsistenti u omoġenju fl-uffiċċji kollha tad-dwana, speċjalment fis-setturi ta' l-ipproċessar tad-dikjarazzjonijiet, l-oriġini, il-proċeduri ssimplifikati, il-falsifikazzjoni u s-selettività tal-kontrolli; l-iżgurar ta' l-applikazzjoni ta' proċeduri ta' analiżi tar-riskju moderni u konsistenti fl-uffiċċji kollha. - fuq il-bażi ta' strateġija globali u koerenti, il-ksib ta' progress suffiċjenti fl-iżviluppar ta' l-interkonnettività fis-sistemi informatiċi kollha. Kapitolu 30: Relazzjonijiet esterni - It-tħejjija għall-allinjament tal-ftehim internazzjonali rilevanti kollu ma' pajjiżi terzi u t-tisħiħ tal-kapaċitajiet amministrattivi u ta' kontroll previsti għall-qafas tal-politika kummerċjali komuni Kapitolu 31: Politika barranija, ta’ sigurtà u ta’ difiża - It-tisħiħ tal-mekkaniżmi għall-implimentazzjoni u l-infurzar tal-kontroll ta' l-armi u t-titjib ulterjuri fil-kapaċità għal implimentazzjoni sħiħa tas-CFSP-ESDP. Kapitolu 32: Kontroll finanzjarju - L-adottar u l-implimentazzjoni tal-leġiżlazzjoni relatata mal-PIFC u tal-politika inerenti sostnuta minn kapaċità xierqa għall-implimentazzjoni. - Il-protezzjoni ta' l-indipendenza funzjonali u finanzjarja ta' l-Istituzzjoni tal-Verifika ta' l-Istat permezz ta' emendi għad-dispożizzjonijiet kostituzzjonali jew ta' leġiżlazzjoni nazzjonali li jkollha effett ekwivalenti, u l-adottar u l-implimentazzjoni tal-leġiżlazzjoni meħtieġa ta' akkumpanjament. - L-allinjament tal-Kodiċi Kriminali ma' l- acquis dwar il-ħarsien ta' l-interessi finanzjarji ta' l-UE kif ukoll mal-konvenzjoni dwar il-ħarsien ta' l-interessi finanzjarji u l-protokolli tagħha. - Il-ħolqien ta' servizz ta' koordinazzjoni effikaċi u effiċjenti biex jiggarantixxi l-issodisfar ta' l-obbligi li jqumu mill-[Artikolu 280 (3) tat-]Trattat tal-KE u l-applikazzjoni ta' l- acquis fir-rigward ta' l-iċċekkjar u l-ispezzjonar fuq il-post imwettqa mill-Kummissjoni, partikolarment l-obbligu biex tingħata għajnuna lill-ispetturi tal-Kummissjoni. - It-teħid ta' miżuri leġiżlattivi u amministrattivi biex tintlaħaq konformità ma' l- acquis dwar il-ħarsien ta' l-Ewro kontra l-iffalsifikar. Kapitolu 33: Dispożizzjoniiet finanzjarji u dwar il-budget - It-tkabbir tal-kapaċità amministrattiva u t-tħejjija tar-regoli proċedurali biex tiġi żgurata, sa mill-adeżjoni, il-korrettezza fil-kalkolu, it-tbassir, il-ġbir, il-ħlas u l-kontroll tar-riżorsi proprji u r-rappurtar dwarhom lill-UE. 4. IPPROGRAMMAR Tingħata għajnuna Komunitarja permezz ta' l-istrument ta' qabel l-adeżjoni (IPA) u, għall-programmi adottati qabel l-2007, ir-Regolament tal-Kunsill Nru 2666/2000 tal-5 ta' Diċembru tas-sena 2000 (ir-regolament CARDS)[4]. Għalhekk, din id-Deċiżjoni mhux se jkollha implikazzjonijiet finanzjarji. Il-ftehimiet finanzjarji jservu bħala bażi legali għall-implimentazzjoni tal-programmi konkreti. Il-Kroazja tista' ssib aċċess għal finanzjamenti minn programmi multinazzjonali u orizzontali. 5. KUNDIZZJONALITÀ L-assistenza għall-pajjiżi tal-Balkani tal-Punent tingħata bil-kondizzjoni li jsir iktar progress fl-issodisfar tal-kriterji ta' Kopenħagen kif ukoll tar-rekwiżiti tal-Ftehim ta' Stabilizzazzjoni u Assoċjazzjoni u prijoritajiet speċifiċi ta' dan il-Partenarjat ta' Adeżjoni. Nuqqas ta' rispett lejn dawn il-kundizzjonijiet jista' jwassal biex il-Kunsill jieħu miżuri xierqa fuq il-bażi ta' l-Artikolu 21 tar-Regolament tal-Kunsill (KE) Nru 1085/2006 jew, fil-każ ta' programmi ta qabel l-2007, fuq il-bażi ta' l-Artikolu 5 tar-Regolament (KE) Nru 2666/2000. L-assistenza hija wkoll suġġetta għall-kundizzjonijiet definiti mill-Kunsill fil-Konklużjonijiet tiegħu tad-29 ta' April ta' l-1997, b’mod partikulari fir-rigward ta' l-impenn tar-riċevituri li jwettqu r-riformi demokratiċi, ekonomiċi u istituzzjonali. Kundizzjonijiet speċifiċi huma ukoll inklużi fil-programmi individwali ta' kull sena. Id-deċizjonijiet finanzjarji ser jiġu segwiti bl-iffirmar ta' ftehim finanzjarju mal-Kroazja. 6. SORVELJAR L-implimentazzjoni tal-Partenarjat ta' Adeżjoni għandha tiġi eżaminata fil-qafas tal-Proċess ta' Stabilizzazzjoni u Assoċjazzjoni, speċjalment permezz tar-Rapporti Annwali sottomessi mill-Kummissjoni, fil-kuntest tad-djalogi politiċi u ekonomiċi, kif ukoll fuq il-bażi tat-tagħrif ipprovdut fil-konferenza ta' l-adeżjoni. [1] ĠU L 86, 24.3.2004, p. 1. Ir-Regolament kif l-aħħar emendat l-bir-Regolament (KE) Nru 269/2006 (ĠU L 47, tas-17.2.2006, p. 7). [2] Id-Deċiżjoni tal-Kunsill 2006/145/KE ta' l-20 ta' Frar 2006 dwar il-prinċipji, il-prijoritajiet u l-kondizzjonijiet li jinsabu fil-Partenarjat ta' Adeżjoni mal-Kroazja (ĠU L 55, 25.2.2006, p. 30). [3] ĠU L 210, 31.7.2006, p. 82. [4] ĠU L 306, 7.12.2000, p. 1. Ir-Regolament kif emendat l-aħħar bir-Regolament (KE) Nru 2112/2005 (ĠU L 344, 27.5.2005).