[pic] | KUMMISSJONI TAL-KOMUNITAJIET EWROPEJ |

Brussel 6.3.2007

KUMM(2007) 90 finali

2007/0037 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jemenda r-Regolament Nru 11 rigward it-tneħħija tad-diskriminazzjoni fir-rati u l-kundizzjonijiet tat-trasport, fl-implimentazzjoni ta’ l-Artikolu 79(3) tat-Trattat li jistabbilixxi l-Komunità Ekonomika Ewropea u r-Regolament (KE) 852/2004 tal-Parlament Ewropew u tal-Kunsill dwar l-iġjene ta’ l-oġġetti ta’ l-ikel {SEG(2007) 301}{SEG(2007) 302}{SEG(2007) 303}{SEG(2007) 304}

(preżentata mill-Kummissjoni)

MEMORANDUM TA’ SPJEGAZZJONI

1. IL-KUNTEST TAL-PROPOSTA

- Ir-raġunijiet għall-proposta u l-għanijiet tagħha

Parti kbira mil-leġiżlazzjoni tal-KE ġiet introdotta biex ikunu kkorreġuti l-fallimenti tas-suq u jkunu żgurati l-istess kondizzjonijiet għal kulħadd. Dawn l-għanijiet setgħu sikwit jinkisbu biss bl-impożizzjoni ta’ impenji fuq kumpaniji biex jipprovdu tagħrif u jirrapportaw dwar l-applikazzjoni tal-leġiżlazzjoni.

Biż-żmien, uħud minn dawn il-proċeduri saru jaħlu ħafna ħin mingħajr bżonn jew skadew. Dawn il-piżijiet amministrattivi għalxejn ixekklu l-attività ekonomika u għandhom impatt negattiv fuq il-kompetittività ta’ l-impriżi Ewropej.

Il-Kummissjoni hija impenjata li tnaqqas dawn il-piżijiet li mhumiex meħtieġa sakemm ikun possibbli. Din hi parti mill-istrateġija għal Regolamentazzjoni Aħjar u hi ta’ importanza kruċjali għall-kisba tal-miri ta’ “Liżbona” tagħna ta’ aktar tkabbir u impjiegi.

- Il-Kuntest Ġenerali

Fl-14 ta’ Novembru 2006, il-Kummissjoni ppreżentat Verifika Strateġika għal Regolamentazzjoni Aħjar fl-Unjoni Ewropea (COM(2006) 689), li tinkludi proposta għal mira biex jitnaqqsu l-piżijiet amministrattivi fuq in-negozji b’25% sa l-2012.

Għaxar proposti konkreti għal “azzjoni mgħaġġla” ġew minnufih identifikati fil-Programm ta’ Azzjoni għat-tnaqqis tal-piżijiet amministrattivi fl-UE (COM(2007) 23), imsejsa fuq il-konsultazzjoni wiesgħa tal-partijiet interessanti u s-suġġerimenti mill-Istati Membri u l-esperti tal-Kummissjoni. L-“azzjonijiet mgħaġġla” jimmiraw li jnaqqsu b’mod sinifikanti l-piżijiet amministrattivi fuq il-kumpaniji permezz ta’ bidliet leġiżlattivi żgħar mingħajr ma jbiddlu l-livell ta’ ħarsien jew l-għan ewlieni tal-leġiżlazzjoni.

Waħda minn dawn il-proposti għal “azzjoni mgħaġġla” tikkonċerna r-Regolament Nru 11 dwar it-tneħħija tad-diskriminazzjoni fir-rati u l-kondizzjonijiet tat-trasport, fl-implimentazzjoni ta’ l-Artikolu 79(3) tat-Trattat li jistabbilixxi l-Komunità Ekonomika Ewropea. Huwa maħsub li jitneħħew ir-rekwiżiti skaduti u li jiġu emendati ċerti rekwiżiti sabiex jixxejnu l-piżijiet amministrattivi fuq il-kumpaniji. L-Artikolu 5 talab b’mod partikolari lill-impriżi tat-trasport (kif ukoll lill-gvernijiet ta’ l-Istati Membri) sabiex jipprovdu tagħrif fuq it-tariffi, ir-rati u l-kundizzjonijiet tat-trasport qabel l-1 ta’ Lulju 1961. Dan l-Artikolu jista’ jitħassar peress li r-rekwiżiti tat-tagħrif imposti fuq l-impriżi tat-trasport huma skaduti. L-Artikolu 6(1) tar-Regolament jeħtieġ dokument tat-trasport li fih bosta elementi tat-tagħrif li jikkonċernaw lil min jagħmel il-kunsinna, in-natura ta’ l-oġġetti mġorrija, il-post ta’ l-oriġini u d-destinazzjoni ta’ l-oġġetti kif ukoll ir-rotta li se tittieħed jew id-distanza magħmula, kif ukoll, fejn meħtieġ, il-punti fejn tinqasam il-fruntiera. Peress li dawn l-aħħar elementi, jiġifieri r-rotta li se tittieħed jew id-distanza magħmula, kif ukoll il-punti fejn tinqasam il-fruntiera mhumiex indispensabbli iżjed għall-kisba ta’ l-għanijiet tar-Regolament, dawn jistgħu jitħassru. It-tielet sentenza ta’ l-Artikolu 6(2) tar-Regolament teħtieġ lill-ġarrier li jżomm kopja li turi l-ispejjeż kollha tat-trasport finali u kwalunkwe spejjeż oħra u kwalunkwe rifużjonijiet jew fatturi oħra li jaffettwaw ir-rati u l-kondizzjonijiet tat-trasport. Din is-sentenza tista’ titħassar peress li bħalissa, dan it-tagħrif hu disponibbli b’hekk jew b’hekk fis-sistemi ta’ kontabbiltà tal-ġarriera, allura m’hemmx iżjed bżonn għall-ġarriera li jimlew u jżommu dokument separat. L-Artikolu 6(3) se jkollu referenza espliċita għan-noti tal-kunsinna, li huma magħrufa tassew u li huma ta’ spiss użati fis-settur tat-trasport fuq l-art. Din ir-referenza ttejjeb iċ-ċertezza legali għall-impriżi tat-trasport peress li tiċċara li dawn in-noti ta’ kunsinna, jekk ikun fihom id-dettalji kollha meħtieġa mill-paragrafu 1 ta’ l-Artikolu 6, ikunu biżżejjed.

“Azzjoni mgħaġġla” oħra tikkonċerna r-Regolament (KE) Nru 852/2004 tal-Parlament Ewropew u tal-Kunsill dwar l-iġjene ta’ l-oġġetti ta’ l-ikel. L-għan hu li jiġu eżenti l-kumpaniji ta’ l-ikel iż-żgħar li għandhom l-ħila jikkontrollaw l-iġjene ta’ l-ikel billi sempliċiment jimplimentaw r-rekwiżiti l-oħra tar-Regolament (KE) 852/2004 mir-rekwiżit li jwaqqfu, jimplimentaw u jżommu proċedura jew proċeduri permanenti msejsa fuq il-prinċipji ta’ l-analiżi tal-periklu u tal-punti ta’ kontroll kritiċi (("HACCP"). Din l-eżenzjoni tapplika għall-mikro-impriżi[1] li fil-biċċa l-kbira jbigħu l-ikel direttament lill-konsumatur finali. Dawn l-impriżi għandhom inqas minn għaxar impjegati u għandhom fatturat jew total tal-karta tal-bilanċ annwali li ma jaqbiżx iż-2 miljun EUR. Għalhekk, din l-eżenzjoni ma tapplikax għal supermarkets kbar u għal dawk affiljati mal-katina ta’ supermarkets .

- Dispożizzjonijiet eżistenti fil-qasam tal-proposta

Id-dispożizzjonijiet eżistenti ta’ din il-proposta jfittxu li jemendaw l-Artikoli 5 u 6 tar-Regolament Nru 11 rigward it-tneħħija tad-diskriminazzjoni fir-rati u l-kondizzjonijiet tat-trasport, fl-implimentazzjoni ta’ l-Artikolu 79(3) tat-Trattat li jistabbilixxi l-Komunità Ekonomika Ewropea u l-Artikolu 5 tar-Regolament (KE) Nru 852/2004 tal-Parlament Ewropew u tal-Kunsill dwar l-iġjene ta’ l-oġġetti ta’ l-ikel.

2. KONSULTAZZJONI MAL-PARTIJIET INTERESSATI U L-ISTIMA TA’ L-IMPATT

Konsultazzjoni mal-partijiet interessati |

- Metodi ta’ konsultazzjoni

Fil-Programm ta’ Azzjoni ta’ l-24 ta’ Jannar 2007, il-Kummissjoni ppreżentat għaxar proposti konkreti għal “azzjonijiet mgħaġġla”. Dawn il-proposti ssejsu fuq konsultazzjonijiet ma’ esperti u b’mod partikolari fuq proġett pilota li jqabbel il-kejl ta’ bażi tal-piżijiet amministrattiva fir-Repubblika Ċeka, id-Danimarka, l-Olanda u r-Renju Unit fl-2006.

Waħda minn dawn “l-azzjonijiet mgħaġġla” ikkonċernat is-settur tat-trasport u pproponiet li “tnaqqas ċerti obbligi sabiex tiġi pprovduta l-istatistika tat-trasport". Ir-Regolament Nru 11 dwar it-tneħħija tad-diskriminazzjoni fir-rati u l-kundizzjonijiet tat-trasport, fl-implimentazzjoni ta’ l-Artikolu 79(3) tat-Trattat li jistabbilixxi l-Komunità Ekonomika Ewropea li teħtieġ lill-ġarriera li jġorru dokument tat-trasport li jindika inter alia distanzi, rotot u punti fejn jinqasmu l-fruntiera.

“Azzjoni mgħaġġla” oħra tikkonċerna l-iġjene ta’ l-ikel, li tipproponi li “teżenta l-kumpaniji ż-żgħar minn ċerti rekwiżiti ta’ l-HACCP (analiżi tal-periklu u punti ta’ kontroll kritiċi)”. L-Artikolu 5 tar-Regolament (KE) Nru 852/2004 jeħtieġ li l-operaturi kollha tal-kumpaniji ta’ l-ikel iwaqqfu, jimplimentaw u jżommu proċedura msejsa fuq il-prinċipji ta’ l-HACCP (Analiżi tal-Periklu u Punti ta’ Kontroll Kritiċi).

Taqsira tat-tweġibiet

L-esperti u l-industrija wrew tħassib li dawn ir-rekwiżiti mill-1960 fir-Regolament Nru 11 huma skaduti fis-settur tassew liberalizzat tat-trasport. Ċerti artikoli huma skaduti filwaqt li oħrajn jimponu piżijiet bla bżonn fuq il-kumpaniji.

Ir-rappreżentanti tal-kumpaniji ż-żgħar urew tħassib rigward l-implimentazzjoni ġenerali tas-sistema HACCP fil-kumpaniji ta’ l-ikel kollha. Minkejja l-flessibbiltà li ddaħħlet fir-Regolament, intalbet kjarifika. Il-Kummissjoni organizzat serje ta’ laqgħat ma’ l-esperti mill-Istati Membri. Barra minn hekk, u fl-interess tat-trasparenza, il-Kummissjoni ħeġġet diskussjoni mal-partijiet interessati sabiex tippermetti lill-interessi soċjo-ekonomiċi differenti li jleħħnu l-opinjoni tagħhom. Għal dan il-għan, ġiet organizzata laqgħa mar-rappreżentanti tal-produtturi, ta’ l-industrija, tal-kummerċ u tal-konsumaturi biex jiddiskutu kwistjonijiet li għandhom x’jaqsmu ma’ l-implimentazzjoni tal-proċeduri msejsa fuq l-HACCP u l-flessibbiltà ta’ l-HACCP. Ir-riżultati ta’ dawn id-diskussjonijiet huma stipulati fid-dokument ta’ gwida li ġie approvat mill-Kumitat Permanenti tal-Katina ta’ l-Ikel u s-Saħħa ta’ l-Annimali u ppubblikat fuq:

http://ec.europa.eu/food/food/biosafety/hygienelegislation/guidance_doc_haccp_en.pdf

Minħabba l-impatt sinifikanti fuq l-SMEs li applikazzjoni riġida tar-rekwiżiti ta’ l-HACCP tista’ twassal għaliha u l-fatt li ċerti kumpaniji jistgħu jipprovdu l-istess livell ta’ ħarsien iġjeniku bl-implimentazzjoni tar-rekwiżiti l-oħra kollha tar-Regolament (KE) Nru 852/2004, mingħajr ma jkun hemm il-bżonn li jiġu implimentati l-proċeduri HACCP sħaħ u minkejja d-dokument ta’ gwida li jispjega sa liema punt għandha tiġi applikata l-flessibbiltà rigward l-HACCP, hemm ħtieġa ta’ eżenzjoni għal ċerti impriżi mir-rekwiżiti kollha ta’ l-HACCP. Madankollu, għandu jitqies li eżenzjoni m’għandhiex tapplika għal kumpaniji li l-attività tagħhom tolqot pubbliku wiesa’. Għalhekk, l-eżenzjoni għandha tkun limitata għal kumpaniji li għandhom inqas minn 10 impjegati li jistgħu jiġu kklassifikati bħala mikro-impriżi bit-tifsira tar-Rakkomandazzjoni tal-Kummissjoni 2003/361/KE tas-6 ta’ Mejju rigward id-definizzjoni ta’ impriżi mikro, żgħar u ta’ daqs medju.

- Stima ta’ l-impatt

L-istima ta’ l-impatt li tikkonċerna r-Regolament Nru 11 tqies żewġ għażliet:

Għażla 1 L-ebda bidla politika

Għażla 2 It-tneħħija ta’ l-obbligi li jingħata tagħrif dwar ir-rotti, id-distanzi, ir-rati u kundizzjonijiet oħra ta-trasport, u li jiġi permess l-użu ta’ noti dwar il-kunsinna biex jingħata t-tagħrif dwar ir-rekwiżiti li jifdal marbuta mad-dokument tat-trasport attwali.

L-għażla 2 kienet l-għażla preferuta peress li tipprovdi tnaqqis tal-piżijiet amministrattivi mhux meħtieġa filwaqt li jinżamm l-istess livell ta’ tagħrif essenzjali.

L-istima ta’ l-impatt li tikkonċerna r-Regolament (KE) Nru 852./2004 tqis tliet għażliet:

Għażla 1 L-ebda bidla politika

Għażla 2 Eżenzjoni ta’ ċerti kumpaniji mir-rekwiżiti ta’ l-HACCP.

Għażla 3 Tneħħija tal-proċeduri HACCP mill-kumpaniji kollha.

L-għażla 2 kienet l-għażla preferuta peress li tipprovdi għal bilanċ sod bejn it-tnaqqis tal-piżijiet amministrattivi fuq il-kumpaniji filwaqt li żżomm il-livell għoli ta’ ħarsien tal-konsumaturi.

3. ELEMENTI ġURIDIċI TAL-PROPOSTA

- Taqsira ta’ l-azzjoni proposta

L-għan ta’ l-azzjoni rigward ir-Regolament Nru 11 hu li jnaqqas il-piżijiet amministrattivi għall-impriżi tat-trasport billi jitneħħew ir-rekwiżiti tad-dokumenti skaduti rigward ir-rotta li għandha tittieħed, id-distanza li għandha ssir, il-punti fejn jinqasmu l-fruntieri eċċ.

L-azzjonijiet rigward ir-rekwiżiti ta’ l-HACCP jimmiraw li jdaħħlu emenda għar-Regolament KE) Nru 852/2004 li teskludi l-impriżi mikro mir-rekwiżit li jwaqqfu, jimplimentaw u jżommu proċedura jew proċeduri permanenti msejsa fuq il-prinċipji ta’ l-HACCP. Din l-eżenzjoni tapplika għall-kumpaniji b’inqas minn 10 impjegati li fil-biċċa l-kbira jbigħu l-ikel direttament lill-konsumatur finali.

- Il-bażi legali

Il-bażi legali ta’ l-azzjoni Komunitarja fil-qasam tat-Trasport hu stipulat fl-Artikolu 75 tat-Trattat KE, u l-bażi legali ta’ l-azzjoni Komunitarja fil-qasam ta’ l-Iġjene ta’ l-ikel hi stipulata fl-Artikoli 95 u 152(4)(b) tat-Trattat KE.

- Prinċipju tas-sussidjarjetà

L-azzjoni meħuda mill-Istati Membri jaf ma tkunx biżżejjed biex tnaqqas il-piżijiet amministrattivi f’dawn l-oqsma peress li r-rekwiżiti tat-tagħrif ġew imposti għall-impriżi tat-trasport u l-kumpaniji ta’ l-ikel skond ir-Regolamenti KE. Għalhekk tnaqqis jista’ jinkiseb biss permezz ta’ emendi tar-Regolamenti kkonċernati fuq livell ta’ l-Unjoni Ewropea. |

L-azzjoni ta’ l-UE se tiżgura li l-impriżi Ewropej kollha tat-trasport u l-kumpaniji ta’ l-ikel ikkonċernati jistgħu jibbenefikaw minn dan it-tnaqqis tal-piżijiet amministrattivi. |

Għaldaqstant, il-proposta tikkonforma mal-prinċipju tas-sussidjarjetà. |

- Prinċipju tal-proporzjonalità

Il-proposta hija konformi mal-prinċipju tal-proporzjonalità għar-raġuni(jiet) li ġejja/in.

L-għan li jitnaqqsu l-piżijiet amministrativi kkaġunati mir-rekwiżiti tat-tagħrif imposti mir-Regolament Nru 11 u r-Regolament (KE) Nru 852/2004 jista’ jintlaħaq biss jekk jiġu emendati dawn ir-Regolamenti, li jista’ jsir biss permezz ta’ strument legali tal-KE li jorbot, ta’ l-istess livell, jiġifieri Regolament. Dan hu ’b’konformità mal-prinċipju ta’ proporzjonalità li jinsab fl-Artikolu 5 tat-Trattat KE.

Din il-proposta tiżgura li l-piżijiet amministrattivi li jaqgħu f’idejn l-impriżi tat-trasport u l-kumpaniji ta’ l-ikel ikkaġunati mir-rekwiżiti tat-tagħrif li jinsabu fir-Regolamenti Nru 11 u (KE) Nru 852/2004 jixxejnu.

- L-għażla ta’ l-istrumenti

Strumenti proposti: Regolament.

Mezzi oħra ma jkunux tajbin għar-raġuni(jiet) li ġejja/in.

L-għan li jitnaqqsu l-piżijiet amministrativi kkaġunati mir-rekwiżiti tat-tagħrif imposti mir-Regolament Nru 11 u r-Regolament (KE) Nru 852/2004 jista’ jintlaħaq biss jekk jiġu emendati dawn ir-Regolamenti, li jista’ jsir biss permezz ta’ strument legali tal-KE li jorbot, ta’ l-istess tip u livell, jiġifieri Regolament.

4. L-IMPLIKAZZJONI GħALL-BAġIT

Din il-proposta ma għandha l-ebda implikazzjoni għall-baġit tal-Komunità.

5. INFORMAZZJONI SUPPLIMENTARI

- Simplifikazzjoni

Il-proposta tipprovdi għal simplifikazzjoni ta’ proċeduri amministrattivi għall-partijiet privati.

Il-proċedura amministrattiva li għandha tiġi segwita mill-impriżi tat-trasport se tiġi ssimplifikata fis-sens li ċerti rekwiżiti tad-dokumenti li mhumiex indispensabbli għal kollox rigward ir-rotta li għandha tittieħed, id-distanza li għandha ssir, u l-punti fejn jinqasmu l-fruntieri se jitneħħew. Il-proċeduri amministrattivi għal kumpaniji ta’ l-ikel iż-żgħar kapaċi li jikkontrollaw l-iġjene ta’ l-ikel sempliċiment billi jimplimentaw ir-rekwiżiti l-oħra tar-Regolament (KE) Nru 852/2004 se jiġu ssimplifikati peress li l-mikro-impriżi li fil-biċċa l-kbira jbigħu l-ikel direttament lill-konsumatur se jiġu eżenti mir-rekwiżit li jwaqqfu, jimplimentaw u jżommu proċedura jew proċeduri permanenti msejsa fuq il-prinċipji ta’ l-HACCP.

- Iż-Żona Ekonomika Ewropea

Dan l-att propost jolqot kwistjoni rilevanti għaż-ŻEE, u għalhekk għandu jestendi għaż-Żona Ekonomika Ewropea.

2007/0037 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

li jemenda r-Regolament Nru 11 rigward it-tneħħija tad-diskriminazzjoni fir-rati u l-kundizzjonijiet tat-trasport, fl-implimentazzjoni ta’ l-Artikolu 79(3) tat-Trattat li jistabbilixxi l-Komunità Ekonomika Ewropea u r-Regolament (KE) 852/2004 tal-Parlament Ewropew u tal-Kunsill dwar l-iġjene ta’ l-oġġetti ta’ l-ikel

IL-PARLAMENT EWROPEW U L-KUNSILL TA’ L-UNJONI EWROPEA,

Wara li kkunsidraw it-Trattat li jistabbilixxi l-Komunità Ewropea, u b’mod partikolari l-Artikolu 75(3), l-Artikolu 95 u l-Artikolu 152(4) tiegħu,

Wara li kkunsidraw il-proposta mill-Kummissjoni[2],

Wara li kkunsidraw l-opinjoni tal-Kumitat Ekonomiku u Soċjali[3],

Wara li kkunsidraw l-opinjoni tal-Kumitat tar-Reġjuni[4],

Filwaqt li jaġixxu skond il-proċedura stipulata fl-Artikolu 251 tat-Trattat[5],

Billi:

(1) Il-politiki tal-Komunità dwar Regolamentazzjoni Aħjar, b’mod partikolari il-Komunikazzjoni mill-Kummissjoni lill-Kunsill, lill-Parlament Ewropew, lill-Kumitat Ekonomiku u Soċjali Ewropew u lill-Kumitat tar-Reġjuni: “Valutazzjon strateġika għal Regolamentazzjoni Aħjar fl-Unjoni Ewropea[6], u l-Komunikazzjoni mill-Kummissjoni lill-Kunsill, lill-Parlament Ewropew, lill-Kumitat Ekonomiku u Soċjali Ewropew u lill-Kumitat tar-Reġjuni: “Il-Programm ta’ Azzjoni għat-Tnaqqis tal-Piżijiet Amministrattivi fl-Unjoni Ewropea”[7], jisħaq l-importanza tat-tnaqqis tal-piżijiet amministrattivi imposti fuq l-impriżi bil-leġiżlazzjoni eżistenti ta’ element kruċjali għat-titjib tal-kompetittività tagħhom u għall-kisba ta’ l-għanijiet ta’ l-aġenda ta’ Liżbona.

(2) Ir-regoli Komunitarji meħtieġa skond l-Artikolu 75 tat-Trattat KE sabiex jitneħħew ċerti tipi ta’ diskriminazzjoni, rigward it-trasport fuq l-arti fi ħdan il-Komunità, ġew stipulati fir-Regolament Nru 11[8]. Sabiex jitnaqqsu l-piżijiet amministrattivi fuq il-kumpaniji, dan ir-Regolament għandu jiġi ssimplifikat billi jitneħħew ir-rekwiżiti skaduti u mhux meħtieġa u b’mod partikolari, ir-rekwiżit li jinżamm bil-miktub ċertu tagħrif li, minħabba progress tekniku, issa hu disponibbli fis-sistemi tal-kontabbiltà tal-ġarriera.

(3) L-Artikolu 5(1) tar-Regolament (KE) Nru 852/2004[9] jeħtieġ li l-operaturi kollha tal-kumpaniji ta’ l-ikel iwaqqfu, jimplimentaw u jżommu proċedura msejsa fuq il-prinċipji ta’ l-Analiżi tal-Periklu u l-Punti ta’ Kontroll Kritiċi (HACCP).

(4) L-esperjenza wriet li f’ċerti kumpaniji ta’ l-ikel, l-iġjene ta’ l-ikel jista’ jiġi żgurat permezz ta’ l-implimentazzjoni korretta tar-rekwiżiti ta’ l-iġjene ta’ l-ikel stipulati fir-Regolament (KE) Nru 852/2004 mingħajr ma jsir użu tas-sistema ta’ l-HACCP. Il-kumpaniji kkonċernati huma b’mod partikolari kumpaniji żgħar li fil-biċċa l-kbira jbigħu l-prodotti tagħhom direttament lill-konsumatur finali, bħal tal-ħobż, tal-laħam, tal-growser, tal-monti, ir-restaurants, u l-bars, li huma mikro-impriżi skond it-tifsira tar-Rakkomandazzjoni tal-Kummissjoni 2003/361/KE tas-6 ta’ Mejju 2003 rigward id-definizzjoni ta’ l-impriżi mikro, żgħar u ta’ daqs medju[10].

(5) Għalhekk, jeħtieġ li tiġi pprovduta eżenzjoni lil dawn il-kumpaniji mir-rekwiżit ta’ l-Artikolu 5(1) tar-Regolament (KE) Nru 852/2004. Dan ifisser li huma għandhom jikkonformaw mar-rekwiżiti l-oħra kollha ta’ dan ir-Regolament.

(6) Peress li l-emenda tar-Regolament (KE) Nru 852/2004 u dik tar-Regolament Nru 11 għandhom l-għan komuni li jnaqqsu l-piżijiet amministrattivi fuq il-kumpaniji, mingħajr ma jbiddlu l-proposta bażi ta’ dawn ir-Regolamenti, jeħtieġ li dawn l-emendi jingħaqdu f’Regolament wieħed.

ADOTTAW DAN IR-REGOLAMENT:

Artikolu 1

Ir-Regolament Nru 11 huwa emendat kif ġej:

(1) L-Artikolu 5 jitħassar.

(2) L-Artikolu 6 huwa emendat kif ġej:

(a) Fil-parargafu 1, jitħassru l-ħames u s-sitt inċiżi;

(b) Fil-paragrafu 2, titħassar it-tielet sentenza.

(ċ) Il-paragrafu 3 qiegħed jinbidel b’dan li ġej:

"3. Meta d-dokumenti eżistenti bħan-noti tal-kunsinna jew kwalunkwe dokument tat-trasport ieħor li jagħti d-dettalji kollha speċifikati fil-paragrafu 1 u, f’rabta mas-sistemi tar-reġistri u l-kontabbiltà tal-ġarriera, jippermettu li ssir verifika sħiħa tar-rati u l-kondizzjonijiet tat-trasport, sabiex il-forom ta’ diskriminazzjoni msemmija fl-Artikolu 75(1) tat-Trattat jistgħu għalhekk jitneħħew jew jiġu evitati, il-ġarriera mhumiex meħtieġa jintroduċu dokumenti ġodda.

Artikolu 2

Fl-Artikolu 5(3) tar-Regolament (KE) Nru 852/2004, is-sentenza li ġejja tiżdied:

Mingħajr ħsara għar-rekwiżiti l-oħra ta’ dan ir-Regolament, il-paragrafu 1 mhux se japplika għall-kumpaniji li huma mikro-impriżi skond it-tifsira tar-Rakkomandazzjoni tal-Kummissjoni 2003/361/KE tas-6 ta’ Mejju 2003[11], u l-attivitajiet li jikkonsistu fil-biċċa l-kbira fil-bejgħ dirett ta’ l-ikel lill-konsumatur finali.”

Artikolu 3

Dan ir-Regolament għandu jidħol fis-seħħ fl-għoxrin ġurnata wara dik tal-pubblikazzjoni tiegħu fil- Ġurnal Uffiċjali ta’ l-Unjoni Ewropea .

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell,

Għall-Parlament Ewropew Għall-Kunsill

Il-President Il-President

[1] Skond it-tifsira tar-Rakkomandazzjoni tal-Kummissjoni 2003/361/KE li tikkonċerna d-definizzjoni ta’ l-impriżi mikro, żgħar jew ta’ daqs medju tas-6 ta’ Mejju 2003, C(2003) 1422 ĠU L 124/36.

[2] ĠU C […], […], p. […].

[3] ĠU C […], […], p. […].

[4] ĠU C […], […], p. […].

[5] ĠU C […], […], p. […].

[6] COM(2006) 689.

[7] COM(2007) 23.

[8] ĠU 52, 16.8.1960, p. 1121. Ir-Regolament kif emendat l-aħħar bir-Regolament (KEE) Nru 3626/84 (ĠU L 335, 22.12.1984, p. 4).

[9] ĠU L 139, 30.4.2004, p. 1; verżjoni kkoreġuta fil-ĠU L 226, 25.6.2004, p. 3.

[10] ĠU L 124, 20.5.2003, p. 36.

[11] ĠU L 124, 20.5.2003, p. 36.