26.2.2008 |
MT |
Il-Ġurnal Uffiċjali ta’ l-Unjoni Ewropea |
C 53/40 |
Opinjoni tal-Kumitat tar-Reġjuni dwar Xjuħija tajba fis-Soċjetà ta' l-Informazzjoni
(2008/C 53/07)
IL-KUMITAT TAR-REĠJUNI
— |
iħeġġeġ lill-awtoritajiet lokali u reġjonali fl-Ewropa sabiex jagħmlu użu estensiv ta' l-opportunitajiet ta' l-ICT sabiex ilaħqu ma' l-isfidi ta' popolazzjoni li qed tixjieħ u b'hekk itejbu l-kwalità tal-ħajja ta' persuni mdaħħla fl-età, li jibqgħu integrati fil-komunitajiet lokali u jippromovu l-kompetittività lokali u reġjonali permezz tal-provvediment ta' servizzi personalizzati; |
— |
isejjaħ lill-awtoritajiet lokali u reġjonali sabiex jingħataw rwol ewlieni fit-tfassil ta' programmi u attivitatijiet ta' riċerka nazzjonali u ta' l-UE li huma mmirati lejn soluzzjonijiet ta' l-ICT għax-xjuħija bħala għarfien tal-fatt li l-effetti tat-tixjiħ tal-popolazzjoni huma evidenti l-iktar fuq livell lokali u li l-awtoritajiet lokali u reġjonali huma l-utenti ewlenin ta' dawn is-soluzzjonijiet; |
— |
iħeġġeġ l-awtoritajiet lokali u reġjonali sabiex ixerrdu tagħrif dwar is-suġġett, ifasslu strateġiji dwar l-effetti tax-xjuħija u jorganizzaw il-provvediment tas-servizzi skond iċ-ċirkostanzi ġodda u, kif imsemmi fil-Pjan ta' Azzjoni, iżidu s-sħubija lokali bejn il-partijiet interessati varji; |
— |
jemmen li l-promozzjoni ta' ħajja indipendenti u monitoraġġ tas-saħħa mill-bogħod permezz ta' l-ICT għandhom itejbu l-produttività tas-servizzi soċjali u tal-kura tas-saħħa u jagħtu l-professjonisti iktar ħin biex iwettqu l-ħidmiet li jkunu tħarrġu għalihom. It-teknoloġija għandha tiġi adottata għall-ħtiġijiet ta' l-anzjani u mhux bil-kontra. M'għandhiex twassal għal iżjed iżolament u tirrispetta l-privatezza u d-dinjità tal-persuni anzjani; |
— |
jinnota l-enfasi limitata tal-Pjan ta' Azzjoni fl-eżaminar ta' l-eLearning; hemm il-ħtieġa li jiġi aċċettat il-fatt li t-tagħlim appoġġjat mit-teknoloġija għamel kontribut importanti sabiex l-anzjani jibqgħu kreattivi u attivi fis-soċjetà; |
— |
jaqbel li differenzi fil-mod kif l-Istati Membri japplikaw id-dispożizzjonijiet relatati mad-diżabilità fil-qasam tal-komunikazzjonijiet elettroniċi jfixklu l-aċċess għal servizzi ta' komunikazzjoni u jifframmentaw is-suq Ewropew tat-tekonoloġija. |
Rapporteur |
: |
Is-Sur Risto KOIVISTO (FI/PSE), President tal-Kunsill Reġjonali ta' Tampere |
Dokument ta' Referenza
Komunikazzjoni tal-Kummissjoni Ewropea dwar Xjuħija tajba fis-Soċjetà ta' l-Informazzjoni — Inizjattiva ta' l-i2010: Pjan ta' Azzjoni dwar it-teknoloġiji ta' l-Informazzjoni u l-Komunikazzjoni (TIK) u x-Xjuħija
COM(2007) 332 finali
Rakkomandazzjonijiet ta' politika
IL-KUMITAT TAR-REĠJUNI
1. |
huwa tal-fehma li l-Pjan ta' Azzjoni dwar xjuħija tajba fis-soċjetà ta' l-informazzjoni huwa pass importanti ħafna fl-iżvilupp tas-soċjetà ta' l-informazzjoni Ewropea. L-investiment fl-ICT jipprovdi għodda ewlenija għar-reġjuni u l-bliet fl-isforzi tagħhom sabiex jiffaċċjaw l-isfida tat-tixjiħ tal-popolazzjoni. Investiment bħal dan jista' jsaħħaħ il-kwalità tal-ħajja ta' persuni ta' età avvanzata, jappoġġja l-inklużjoni soċjali, jippermettilhom jikkontribwixxu l-esperjenza u l-ħiliet akkumulati tagħhom lejn l-iżvilupp tas-soċjetà u jistimula l-kompetittività u t-tkabbir fil-livell lokali u reġjonali permezz ta' prodotti u servizzi ġodda. F'opinjoni preċedenti dwar l-istrateġija i2010 għal soċjetà Ewropea ta' l-informazzjoni, il-Kumitat laqa' l-identifikazzjoni tal-ħtiġijiet tas-soċjetà li qiegħda tixjieħ bħala waħda mit-tliet prijoritajiet ta' l-istrateġija (1). |
2. |
jinnota li l-komunikazzjoni u l-Pjan ta' Azzjoni jappoġġjaw ukoll il-proposti ppreżentati fl-opinjonijiet tal-Kumitat dwar, inter alia, il-ġejjieni demografika ta' l-Ewropa (2), miżuri prattiċi relatati ma' soċjetà ta' l-informazzjoni ekwitabbli (3), ir-riċerka fl-ICT (4), l-impjegar ta' ħaddiema ta' età avvanzata (5) u l-qagħda ta' persuni b'diżabilitajiet (6). |
3. |
jenfasizza li l-awtoritajiet lokali u reġjonali għandhom interess u rwol importanti fl-oqsma kollha koperti mill-Pjan ta' Azzjoni tal-Kummissjoni:
|
4. |
jenfasizza d-differenzi ewlenin li jeżistu bejn reġjuni fl-Ewropa u jiġbed l-attenzjoni għall-problemi li jiffaċċjaw l-awtoritajiet lokali u reġjonali, b'mod partikolari f'oqsma fejn il-migrazzjoni 'l barra taż-żgħażagħ qiegħda twassal sabiex l-età medja titla' b'rata iktar mgħaġġla minn kull post ieħor. |
5. |
jirrimarka li l-varjazzjoni fl-użu ta' l-Internet fl-Ewropa hija l-iktar minħabba d-differenzi relatati mal-qagħda finanzjarja, il-ħiliet u l-post ta' residenza, li m'humiex ir-riżultat dirett tax-xjuħija iżda li huma iktar evidenti fost l-anzjani. Iż-żieda fl-opportunitajiet fuq livell lokali sabiex jiġu implimentati proġetti ta' taħriġ, ta' broadband u oħrajn ta' interess ġenerali li jippromovu soċjetà ta' l-informazzjoni ekwitabbli jistgħu jgħinu sabiex itejbu wkoll il-qagħda ta' l-anzjani. |
6. |
jaqbel mal-Kummissjoni li s-suq ta' l-ICT għall-prodotti u s-servizzi relatati max-xjuħija għadu fis-stadji bikrija. Huwa importanti għall-kompetittività ta' l-UE li l-kumpaniji Ewropej jakkwistaw mill-iktar fis pożizzjoni fuq quddiem nett f'dan is-suq li qiegħed jikber tant malajr. |
Il-ħolqien ta' kuxjenza u l-bini ta' strateġiji komuni
7. |
jappoġġja l-iskambju ta' politiki u esperjenzi prattiċi, it-tkattir ta' l-aħjar prattika, it-tfassil ta' normi ta' referenza madwar ir-reġjuni u l-bliet ta' l-Istati Membri u, b'mod partikolari, il-ħolqien ta' netwerk reġjonali madwar l-Ewropa kollha li jista' jintuża sabiex iżid u jtejjeb l-opportunitajiet tar-reġjuni sabiex jieħdu sehem fi proġetti ta' kooperazzjoni. Ir-reġjuni u l-bliet diġà għandhom l-esperjenzi tagħhom x'joffru lil netwerks, b'mod speċjali fl-oqsma tat-telemediċina u s-servizzi u t-teknoloġiji li jappoġġjaw ħajja indipendenti. |
8. |
ifakkar li dawk responsabbli għall-iżvilupp u l-ġestjoni ta' servizzi pubbliċi jeħtieġu wkoll programmi ta' żvilupp ta' ħiliet ġodda, li jinkorporaw perspettivi differenti, sabiex il-miżuri ppreżentati fil-Pjan ta' Azzjoni jkunu jistgħu jiġu implimentati. |
It-tnedija ta' kundizzjonijiet li joħolqu possibilitajiet
9. |
jinnota li sabiex tiżdied ir-rata ta' impjieg ta' ħaddiema imdaħħla fl-età huwa essenzjali li jiġu promossi arranġamenti ta' xogħol aktar flessibbli, bilanċ tajjeb bejn ix-xogħol u l-ħajja privata, kundizzjonijiet adattati ta' saħħa u sikurezza fil-post tax-xogħol u t-tagħlim għal tul il-ħajja kollha. B'hekk il-Kumitat tar-Reġjuni jappoġġja l-fehma tal-Kummissjoni li soluzzjonijiet ta' ICT innovattivi li jappoġġjaw, per eżempju it-teleworking u t-taħriġ, huma modi ewlenin kif jistgħu jintlaħqu l-għanijiet ta' dawn it-tendenzi ġodda fil-ħajja tax-xogħol. |
10. |
jappoġġja l-pjan tal-Kummissjoni għar-reviżjoni ta' politiki li jippromovu kompetenzi diġitali fl-2007-2008. Prijorità waħda għandha tkun li l-awtoritajiet lokali u reġjonali jirċievu l-għajnuna fl-isforzi tagħhom biex jagħmlu użu massimu tal-Fondi Strutturali u, inter alia, il-Programm ta' Tagħlim tul il-Ħajja Kollha sabiex jiġu żviluppati l-kompetenzi ta'l-anzjani u jibbenefikaw mill-esperjenza tajba miksuba permezz ta' taħriġ bejn persuni pari (peer training) fost persuni mdaħħla fl-età. |
11. |
jiġbed l-attenzjoni għal kif is-soċjetà ta' l-informazzjoni (b'mod partikolari t-telefons ċellulari u l-Internet) bidlet il-lingwa, il-kultura, il-midja u s-soċjetà kollha kemm hi. Għaldaqstant, il-problema ta' firda diġitali ma tikkonċernax biss l-opportunità sabiex wieħed juża l-kompjuter. Proġetti konġunti li jinvolvu l-anzjani u ż-żgħazagħ jistgħu jkunu mod wieħed kif din il-firda tkun tista' titnaqqas. |
12. |
jenfasizza li, minkejja problemi ta' interoperabilità u differenzi fil-forniment ta' servizzi tal-kura tas-saħħa u tal-kura fid-dar imsemmija fil-komunikazzjoni, il-potenzjal għall-iżvilupp u l-adozzjoni ta' prodotti Ewropej, per eżempju f'applikazzjonijiet intelliġenti għad-djar (smart homes applications), diġà huwa tajjeb. |
13. |
jikkunsidra li huwa importanti li l-partijiet interessati varji (inklużi l-anzjani nfushom u l-fornituri ta' servizzi soċjali u tal-kura tas-saħħa) ikunu jistgħu jistabbilixxu pożizzjoni komuni u b'hekk jeliminaw xkiel legali, tekniku, ta' aċċessibilità u kwalunkwe xkiel ieħor li qiegħed jostakola l-iżvilupp ta' soluzzjonijiet ta' l-ICT għal xjuħija tajba. |
Il-promozzjoni ta' l-adozzjoni
14. |
jaqsam mal-Kummissjoni it-tħassib li bħalissa mhux qiegħed isir biżżejjed sabiex ikun żgurat li innovazzjonijiet teknoloġiċi jiġu trasformati fi prodotti prattiċi li jkunu disponibbli bi prezz aċċessibbli għal kullħadd. Ir-reġjuni u l-bliet jistgħu jgħinu sabiex tiġi indirizzata s-sitwazzjoni, mhux biss billi jakkwistaw u jiżviluppaw dawn il-prodotti iżda wkoll billi jrawmu ambjent ekonomiku li jagħti lin-negozji opportunitajiet aħjar sabiex ikollhom aċċess għal swieq ikbar. |
15. |
jilqa'b'mod partikolari r-referenza speċifika fil-Pjan ta' l-Azzjoni li proġetti pilota għandhom jitmexxew ukoll minn awtoritajiet lokali u reġjonali. |
16. |
jappoġġja l-pjanijiet tal-Kummissjoni sabiex tinkoraġġixxi l-gvernijiet, fuq livell lokali, reġjonali u nazzjonali, biex jisfruttaw il-potenzjal ta' akkwist pubbliku innovattiv, iżda jkollu jirrimarka li l-awtoritajiet lokali u reġjonali jeħtieġu li jiġu pprovduti bi proċeduri ċari dwar kif għandu jitmexxa l-akkwist innovattiv fil-kuntest tal-qafas tar-regoli ġenerali dwar l-akkwist pubbliku. |
Tħejjija għall-ġejjieni
17. |
jinnota li jappoġġja bis-sħiħ is-spinta sinifikanti li ngħatat lir-riċerka multi-dixxiplinarja dwar ix-xjuħija fis-7 Programm Qafas tar-Riċerka. |
18. |
jemmen li l-enfasi tal-Pjan ta' Azzjoni fuq ir-riċerka mqassma, il-ġbir komuni ta' riżorsi u aġendi komuni tirrifletti b'mod ċar it-talbiet preċedenti tal-Kumitat sabiex tissaħħaħ il-koordinazzjoni ta' programmi nazzjonali ta' riċerka dwar ix-xjuħija fuq livell Ewropew permezz ta' kooperazzjoni interreġjonali taħt l-iskema msaħħa ta'l-ERA-NET. |
19. |
jenfasizza li kooperazzjoni mill-qrib bejn riċerkaturi, kumpaniji ta' daqs differenti, it-tielet settur, l-awtoritajiet lokali u reġjonali, u b'mod partikolari, persuni mdaħħla fl-età, hija prerekwiżit sabiex ir-riċerka u l-iżvilupp ikunu ta' suċċess fil-qasam ta' soluzzjonijiet ICT għax-xjuħija. |
20. |
ifakkar li l-awtoritajiet lokali u reġjonali jistgħu joħolqu ambjent ta' riċerka innovattiva u jesploraw mezzi ġodda għal kooperazzjoni interistituzzjonali bejn is-settur pubbliku u s-settur privat u kooperazzjoni reġjonali transkonfinali. Barra minn investiment mill-awtoritajiet lokali u reġjonali, dan jesiġi wkoll appoġġ finanzjarju mill-Istati Membri u mill-UE. |
Fehmiet ewlenin tal-Kumitat tar-Reġjuni
21. |
jemmen li tenħtieġ iktar informazzjoni dwar id-differenzi kbar li jeżistu bejn ir-reġjuni sabiex ikunu jistgħu jitfasslu konklużjonijiet korretti u jkun żgurat li jittieħdu miżuri li huma effettivi biżżejjed. |
22. |
jinnota l-enfasi limitata tal-komunikazzjoni fl-eżaminar tat-tagħlim li huwa msaħħaħ minn ICT (eLearning) li tittratta l-iktar mil-lat ta' l-iżvilupp tad-dinja tax-xogħol. Fil-preparazzjoni għall-implimentazzjoni tal-Pjan ta' Azzjoni, hemm il-ħtieġa li jiġi adottat il-fatt li f'ħafna pajjiżi, persuni rtirati diġà huma grupp ta' klijenti mdaqqas fil-qasam ta' l-edukazzjoni għall-adulti pprovdut mill-awtoritajiet lokali u reġjonali u li t-tagħlim bl-appoġġ tat-teknoloġija għamel kontribut importanti sabiex jgħin lill-anzjani jibqgħu kreattivi u attivi fis-soċjetà. |
23. |
jirrakkomanda li s-servizzi ta' l-ICT għal persuni imdaħħla fl-età jingħataw rwol iktar prominenti fl-inizjattivi tar-Reġjuni għall-Bidla Ekonomika. |
24. |
isejjaħ lill-awtoritajiet lokali u reġjonali sabiex jingħataw rwol ewlieni fit-tfassil ta' programmi u attivitatijiet ta' riċerka nazzjonali u ta' l-UE li huma mmirati lejn soluzzjonijiet ta' l-ICT għax-xjuħija bħala għarfien tal-fatt li l-effetti tat-tixjiħ tal-popolazzjoni huma evidenti l-iktar fuq livell lokali u li l-awtoritajiet lokali u reġjonali huma l-utenti ewlenin ta' dawn is-soluzzjonijiet. |
25. |
jemmen li huwa importanti ħafna li meta ssir l-għażla tal-proġetti msemmija fil-Pjan ta' Azzjoni għall-promozzjoni ta' ħajja indipendenti u l-monitoraġġ tas-saħħa mill-bogħod jiqiesu wkoll il-kriterji li ġejjin:
|
26. |
jaqbel mad-dikjarazzjoni tal-Kummissjoni li differenzi fil-mod kif l-Istati Membri japplikaw id-dispożizzjonijiet relatati mad-diżabilità fil-qafas regolatorju għal komunikazzjonijiet elettroniċi jfixklu l-aċċess għal servizzi ta' komunikazzjoni u jifframmentaw is-suq Ewropew tat-tekonoloġija, iżda fl-istess waqt jenfasizza li persuni b'diżabilitajiet ma għandhomx jitħallew jiddipendu biss fuq servizzi elettroniċi; anzi, l-enfasi għandha tkun fuq l-isfruttar tat-teknoloġija sabiex ikun hemm appoġġ għall-aċċess għal servizzi permezz ta' ħafna mezzi differenti. |
27. |
ifakkar li l-iżivilupp ta' l-ICT jirrappreżenta opportunità li jiltaqgħu flimkien il-ħtiġijiet ta' l-anzjani li għandhom bżonn ta' aċċess għas-servizzi informatiċi u tal-komunikazzjoni u dawk taż-żgħażagħ li għandhom bżonn ta' opportunitajiet tax-xogħol u dan jikkontribwixxi lejn id-djalogu inter-ġenerazzjonali. |
28. |
barra minn hekk jixtieq ifakkar li, irrispettivament minn jew flimkien ma', programmi finanzjarji ta' l-UE jew programmi oħrajn, l-awtoritajiet lokali u reġjonali għandhom:
|
29. |
iħeġġeġ l-awtoritajiet lokali u reġjonali sabiex ixerrdu tagħrif dwar is-suġġett, ifasslu strateġiji dwar l-effetti tax-xjuħija u jorganizzaw il-provvediment tas-servizzi skond iċ-ċirkostanzi ġodda u, kif imsemmi fil-Pjan ta' Azzjoni, iżidu s-sħubija lokali bejn il-partijiet interessati varji. |
30. |
iħeġġeġ lill-awtoritajiet lokali u reġjonali fl-Ewropa sabiex jagħmlu użu estensiv ta' l-opportunitajiet ta' l-ICT sabiex ilaħqu ma' l-isfidi ta' popolazzjoni li qed tixjieħ u b'hekk itejbu l-kwalità tal-ħajja ta' persuni mdaħħla fl-età, li jibqgħu integrati fil-komunitajiet lokali u jippromovu l-kompetittività lokali u reġjonali permezz tal-provvediment ta' servizzi personalizzati. |
Brussell, it-28 ta' Novembru 2007.
Il-President
tal-Kumitat tar-Reġjuni
Michel DELEBARRE
(1) CdR 252/2005 fin.
(2) CdR 341/2006 fin.
(3) CdR 272/2006 fin, CdR 252/2005 fin, CdR 256/2004 fin, CdR 193/2004 fin, CdR 136/2002 fin u CdR 303/2000 fin.
(4) CdR 155/2005 u CdR 150/2005 fin.
(5) CdR 151/2004 fin.
(6) CdR 312/2003 fin.