[pic] | KUMMISSJONI TAL-KOMUNITAJIET EWROPEJ |

Brussel 19.7.2006

KUMM(2006) 404 finali

KOMUNIKAZZJONI MILL-KUMMISSJONI LILL-KUNSILL

skond l-Artikolu 27(3) tad-Direttiva 77/388/KEE

1. SFOND

Skond l-Artikolu 27(1) tas-Sitt Direttiva tal-Kunsill 77/388/KEE tas-17 ta' Mejju 1977 dwar l-armonizzazzjoni tal-liġijiet ta’ l-Istati Membri dwar taxxi fuq id-dħul mill-bejgħ - Sistema komuni ta' taxxa fuq il-valur miżjud: bażi uniformi ta’ stima[1], il-Kunsill, huwa u jaġixxi unanimament fuq proposta mill-Kummissjoni, jista’ jawtorizza lil kwalunkwe Stat Membru japplika miżuri speċjali għal deroga minn dik id-Direttiva sabiex jissimplifika l-proċedura għall-ħlas tat-taxxa jew għall-prevenzjoni ta’ ċerti tipi ta’ evażjoni jew evitar tat-taxxa. Minħabba li din il-proċedura tipprovdi għal derogi mill-prinċipji ġenerali armonizzati tal-VAT, skond is-sentenzi konsistenti tal-Qorti Ewropea tal-Ġustizzja, derogi bħal dawn għandhom ikunu ristretti u pproporzjonati.

Permezz ta’ ittra rreġistrata mibgħuta lis-Segretarjat Ġenerali tal-Kummissjoni fis-27 ta’ Ottubru 2005, ir-Repubblika ta’ l-Awstrija talbet awtorizzazzjoni biex tintroduċi miżuri ta' deroga mill-Artikolu 21 tad-Direttiva 77/388/KEE. Skond l-Artikolu 27(2) tad-Direttiva 77/388/KEE, il-Kummissjoni infurmat lill-Istati Membri l-oħra b’ittra li ġġib id-data tat-8 ta’ Ġunju 2006 bit-talba magħmula mill-Awstrija. B’ittra li ġġib id-data tad-9 ta’ Ġunju 2006, il-Kummissjoni nnotifikat lill-Awstrija li kellha l-informazzjoni kollha li dehrilha li kellha bżonn biex tivvaluta t-talba.

Permezz ta’ ittra rreġistrata mibgħuta lis-Segretarjat Ġenerali tal-Kummissjoni fit-18 ta’ April 2006, ir-Repubblika Federali tal-Ġermanja talbet awtorizzazzjoni biex tintroduċi miżuri ta' deroga mill-Artikolu 21 tad-Direttiva 77/388/KEE. Skond l-Artikolu 27(2) tad-Direttiva 77/388/KEE, il-Kummissjoni infurmat lill-Istati Membri l-oħra b’ittra li ġġib id-data tas-7 ta’ Ġunju 2006 bit-talba magħmula mill-Ġermanja. B’ittra li ġġib id-data tat-8 ta' Ġunju 2006, il-Kummissjoni nnotifikat lill-Ġermanja li kellha l-informazzjoni kollha li dehrilha li kellha bżonn biex tivvaluta t-talba.

2. SOMMARJU TAT-TALBIET

2.1. It-Talba ta' l-Awstrija

L-Awstrija tixtieq tintroduċi inverżjoni tal-ħlas fir-rigward ta’ forniment B2B ( Business to Business – minn negozju lil negozju ieħor) ta’ prodotti jew servizzi fejn il-valur tal-fatturazzjoni ikun iktar minn €10,000. Fejn il-valur ta’ fattura individwali tkun inqas minn €10,000, l-inverżjoni tal-ħlas tapplika fejn il-forniment lil klijent ikun iktar minn €40,000 fil-perjodu ta' kontabilità.

Ir-raġuni li l-Awstrija tat għall-introduzzjoni ta’ din it-talba hija għar-raġuni li hi għodda biex jiġu indirizzati l-frodi “karużell” jew “ missing trader ”, u għaliex kellha esperjenzi pożittivi mill-introduzzjoni ta’ l-inverżjoni tal-ħlas fis-settur tal-bini. L-Awstrija temmen li l-frodi fil-VAT, speċjalment il-frodi “karużell” u frodi permezz ta’ fatturi fittizji, ma jistgħux jiġu evitati iktar bl-użu ta' metodi konvenzjonali. Hija temmen li miżura bħal din tipprevjeni ċerti tipi ta’ evażjoni tat-taxxa u evitar tat-taxxa, bħall-pagamenti parzjali tal-VAT muri fuq fattura jew in-nuqqas tal-ħlas tal-VAT muri fuq fattura minn soġġetti taxxabbli li jisparixxu mingħajr ma jħallsu l-passiv lit-teżor. L-Awstrija temmen ukoll li jekk tapplika l-inverżjoni tal-ħlas din tnaqqas il-piż fuq l-amministrazzjonijiet tat-taxxa li inkella jkollhom jirkupraw it-taxxa dovuta minn soġġetti taxxabbli li ma jkunux imxew mal-liġi jew iwettqu spezzjonijiet qabel ma jagħtu r-rifużjonijiet tal-VAT. Mill-perspettiva tan-negozju, l-Awstrija tisħaq li l-inverżjoni tal-ħlas tkun ta’ benefiċċju għan-negozji għax dawn ma jkollomx bżonn iħallsu l-VAT bil-quddiem[2]. Sabiex tiġu evitata l-possibbiltà ta’ metodi ġodda ta’ frodi, l-Awstrija tixtieq timponi obbligu fuq in-negozji biex jipprovdu l-figuri tad-dħul globali għal kull xahar għal klijenti individwali tan-negozju.

2.2. It-talba tal-Ġermanja

Il-Ġermanja tixtieq tintroduċi l-inverżjoni tal-ħlas fir-rigward ta’ forniment B2B ta’ prodotti jew servizzi fejn il-valur tal-fatturazzjoni huwa ikbar minn €5000. Is-soġġett taxxabbli li jagħmel il-forniment ikollu jikkonferma l-validità tan-numru ta’ identifkazzjoni speċjali tal-VAT tal-klijent qabel ma jagħmel forniment bl-inverżjoni tal-ħlas. Din il-konferma tal-validità tkun tista’ ssir elettronikament u onlajn. Ladarba n-numru tal-klijent jiġi vverifikat bħala validu, il-fornitur ma jiċċarġjax il-VAT fuq il-provvista, iżda x-xerrej ikollu jiddikjara lill-awtoritajiet il-VAT li għandu jħallas li, f’ċirkostanzi normali, jista’ wkoll jiddikjarahom bħala input VAT (VAT imħallas fuq ix-xiri) li jista' jitnaqqas. Barra mill-verifika tan-numru tal-klijent, is-soġġett taxxabbli li jipprovdi l-forniment fuq il-bażi ta’ l-inverżjoni tal-ħlas ikollha tinnotifika l-awtoritajiet tat-taxxa elettronikament kull darba li tagħmel forniment mhux intaxxat u tiddikjara l-valur tal-provvista. Mill-perspettiva tal-klijent, dan ikollu jiddikjara separatament fid-dikjarazzjoni tiegħu il-provvisti li rċieva bl-inverżjoni tal-ħlas. L-amministrazzjoni tat-taxxa jkollha tipproċedi biex tikkonferma l-informazzjoni li tkun waslet elettronikament mill-fornitur bl-informazzjoni ddikjarata mix-xerrej. B’dan il-mod, il-Ġermanja tixtieq tipproteġi lilha nnifisha kontra opportunitajiet ġodda ta’ frodi li jinħolqu mis-sistema ta’ l-inverżjoni tal-ħlas.

Ir-raġuni li l-Ġermanja tat għall-introduzzjoni ta’ din it-talba tixbaħ lil dik ta' l-Awstrija, iżda, bil-kuntrarju ta' l-Awstrija, is-sistema Ġermaniża tipprevedi rappurtaġġ addizzjonali sinifikanti mis-soġġetti taxxabbli.

3. L-ISFOND GħAT-TALBIET – IL-PROBLEMA BIL-FRODI FIL-VAT

Il-frodi fil-VAT ilu żmien iħasseb lill-Kummissjoni fil-kuntest ta’ l-iżgurar li l-Istati Membri jieħdu l-passi kollha meħtieġa kontra dawk li jwettqu l-frodi biex ikunu evitati d-distorzjonijiet tal-kompetizzjoni fis-Suq Uniku. Minħabba l-problemi baġitarji riċenti, il-frodi fil-VAT saru waħda mill-ikbar punti ta' tħassib ta’ ċerti Stati Membri.

Il-Kummissjoni tilqa' l-fatt li l-Ġermanja u l-Awstrija huma mħassba dwar tip speċifiku ta’ frodi tal-VAT, magħruf bħala frodi “karużell” jew “missing trader”. Dan it-tip ta’ frodi kellu impatt fuq id-dħul mill-VAT hekk kif soġġett taxxabbli jgħaddi kreditu tal-VAT lil soġġett taxxabbli ieħor, u mbagħad dan ta’ l-ewwel jisparixxi mingħajr ma jħallas it-taxxa. Il-Ġermanja u l-Awstrija jemmnu li dan jista’ jissolva billi tiġi applikata l-inverżjoni tal-ħlas bejn is-soġġetti taxxabbli fir-rigward ta’ provvisti domestiċi fl-Istati Membri. Dan ikollu l-effett li jxejjen il-frodi safejn “il-kummerċjant li jisparixxi” potenzjali ma jkollux iħallas VAT. Madankollu, ir-regola ġenerali fl-Istati Membri kollha hija li 80% tal-VAT jitħallas minn inqas minn 10% tas-soġġetti taxxabbli. Dan ifisser li għandu jiġi investit sforz żgħir ħafna ta’ kontroll min-naħa ta’ l-amministrazzjoni tat-taxxa ta' l-Istati Membri biex jiggarantixxu l-parti kbira tad-dħul mill-VAT tagħhom.

Ftit Stati Membri biss ikollhom figuri disponibbli dwar it-telf tal-VAT minħabba l-frodi. L-Awstrija testima li t-telf totali minħabba l-frodi fil-VAT jammontaw għal 4.4% tad-dħul kollu mill-VAT, iżda ma għandhomx stima preċiża dwar liema proporzjoni minn dan huwa attribwit għal frodi MTIC. Il-Ġermanja testima li titlef fir-reġjun ta’ 2% tad-dħul tal-VAT tagħha b’riżultat ta’ frodi tat-tip fejn kummerċjant “jisparixxi”. Dawn mhumiex figuri insinifikanti u jindikaw biċ-ċar l-importanza li għandha tingħata lill-frodi fil-VAT, u l-frodi MTIC partikolarment. Min-naħa tagħha, il-Kummissjoni hija konxja mill-importanza tal-frodi fit-taxxa. Għaldaqstant, it-tnaqqis tal-frodi fit-taxxa huwa għan importanti fi ħdan l-istrateġija ta’ Liżbona, minħabba li l-frodi fit-taxxa mhux biss inaqqsu d-dħul meħtieġ għall-Istati Membri biex jimplimentaw is-servizzi pubbliċi fil-livell nazzjonali; iżda joħloq ukoll kompetizzjoni inġusta bejn il-kummerċjanti. F’dan il-kuntest, il-Kummissjoni, iktar tard din is-sena, biħsiebha tippeżenta Komunikazzjoni lill-Kunsill u l-Parlament Ewropew bil-ħsieb li tiġi żviluppata strateġija kontra l-frodi fuq livell Ewropew. Il-frodi fil-VAT, u l-frodi MTIC partikolarment, se jkunu element ewlieni minn dik il-Komunikazzjoni.

Madankollu, il-figuri għall-frodi fejn “jisparixxi” kummerċjant għandhom jiġu analizzati fil-kuntest tagħhom, partikolarment meta bidla proposta fis-sistema tat-tassazzjoni taffettwa kemm lill-kummerċjanti leġittimi u kemm lil dawk li jisfruttaw l-inkapaċità ta' l-amministrazzjonijiet tat-taxxa li jindirizzawhom malajr u b’mod permanenti.

Huwa mistenni li joħorġu forom u xejriet ġodda ta’ frodi wara l-introduzzjoni ta’ sistema iktar ġeneralizzata ta’ inverżjoni tal-ħlas. Meta l-passiv jingħadda minn kummerċjant għall-ieħor, l-aħħar negozju fil-katina tal-provvista jkollu inċentiv ikbar biex jisparixxi. Wieħed għandu jinnota wkoll li l-mekkaniżmu ta' l-inverżjoni tal-ħlas mhuwiex risposta għal " black sales " (i.e. bejgħ mhux irreġistrat) li jibqgħu barra miċ-ċirkuwitu uffiċjali. Għal soġġett taxxabbli, li għandu jiddebita l-VAT fi tmiem il-katina tal-provvista, l-inċentiv biex jikseb provvisti “illegali” jiżdied għax ikollu jipprovdi għall-ammont totali tal-VAT u mhux biss għall-parti li tikkorrispondi għall-“valur miżjud” tiegħu.

4. L-INVERżJONI TAL-ĦLAS BħALA KUNċETT

Ġeneralment, fir-rigward tal-provvisti ta’ prodotti u servizzi fi ħdan Stat Membru, il-VAT jiġi ddebitat mill-fornitur. Jekk il-klijent ikun soġġett taxxabbli, dan ta' l-aħħar jista' jirkupra l-VAT iddebitat billi jiddikjara t-taxxa mħallsa fuq ix-xiri fid-dikjarazzjoni perjodika tal-VAT tiegħu. It-tnaqqis ikun immedjat, jiġifieri ma jiddependix fuq jekk il-fornitur ikunx ħallas il-VAT lit-teżor jew le. Il-problema hija li jekk il-persuna li toħroġ il-fattura fil-fatt ma tħallasx il-VAT lit-teżor, it-teżor imbagħad jagħti kreditu għat-taxxa tal-VAT imħallsa fuq ix-xiri li qatt ma jkun irċieva. Barra mill-likwidazzjonijiet/fallimenti, l-Istati Membri esperjenzaw problemi b'kummerċjanti li jinnegozjaw għal żmien qasir, jiddebitaw il-VAT u mbagħad jisparixxu mingħajr ma jħallsu l-VAT, iżda fil-biċċa l-kbira tal-każijiet (90% sa 95% skond l-Istat Membru), l-ammont korrett tal-VAT jitħallas f'waqtu lill-awtoritajiet.

Bħalissa, proporzjon kbira tal-VAT miġbura minn kull Stat Membru jitħallas minn grupp żgħir ħafna ta' soġġetti taxxabbli kbar li jirrespettaw il-leġiżlazzjoni fiskali. L-applikazzjoni ġeneralizzata ta’ l-inverżjoni tal-ħlas tfisser li t-taxxa tinġabar minn grupp ferm ikbar ta' persuni li jħallsu t-taxxa, u l-kontroll isir proporzjonalment iktar diffiċli.

L-applikazzjoni ta' l-inverżjoni tal-ħlas tat-tip li qed jikkunsidraw il-Ġermanja u l-Awstrija tkun teħtieġ li fornitur jiċċekkja dwar l-istatus ta’ klijent biex jistabbilixxi jekk huwiex soġġett taxxabbli jew le u, għalhekk, jekk il-VAT għandhiex tiġi ddebitata jew le. Is-sistema attwali tal-VAT ma tirrikjedix li jsir kontroll bħal dan, għaliex il-VAT ġeneralment tiġi ddebitata indipendentement mill-istatus tal-klijent. Bl-istess mod, ir-rekwiżiti biex ikunu pprovduti l-figuri globali tad-dħul għal klijenti tan-negozju individwali (fil-każ ta’ l-Awstrija) u biex l-awtoritajiet tat-taxxa jiġu nnotifikati elettronikament u biex jiddikjaraw il-valur ta’ kull provvista mhux intaxxata (fil-każ tal-Ġermanja) jkunu rekwiżiti ġodda u addizzjonali.

5. IL-FEHMA TAL-KUMMISSJONI DWAR IT-TALBIET

Meta l-Kummissjoni tirċievi talbiet skond l-Artikolu 27, din teżamina dawn it-talbiet biex tiżgura li l-kundizzjonijiet bażiċi biex jintlaqgħu dawn it-talbiet ikunu sodisfatti, jiġifieri, jekk il- miżura speċifika proposta tissimplifikax il-proċeduri għas-soġġetti taxxabbli u/jew l-amministrazzjoni tat-taxxa jew jekk il-proposta tipprevjenix ċerti tipi ta’ evażjoni jew evitar tat-taxxa . F’dan il-kuntest, il-Kummissjoni dejjem ħadet approċċ limitat u prudenti biex tiżgura li d-derogi ma jdgħajfux it-tħaddim tas-sistema ġenerali tal-VAT. Kien f’dan il-kuntest li għamlet il-proposta[3] fl-2005 bl-iskop li temenda d-Direttiva 77/388/KEE fir-rigward ta’ ċerti miżuri biex jissimplifikaw il-proċedura biex tiġi ddebitata t-taxxa fuq il-valur miżjud u biex jgħinu fit-trażżin ta' l-evażjoni u l-evitar tat-taxxa, u li tirrevoka ċerti Deċiżjonijiet li jagħtu derogi li jippermettu lill-Istati Membri japplikaw derogi li wrew li huma utli u effettivi.

Filwaqt li l-iskema speċjali għad-deheb kif prevista fl-Artikolu 26 b tas-Sitt Direttiva dwar il-VAT tista’ tiġi deskritta bħala sistema stabbilita ta’ l-inverżjoni tal-ħlas, l-applikazzjoni ta’ dawn id-dispożizzjonijiet hija mmirata bir-reqqa u llimitata fl-ambitu u fid-daqs u ma tistax titqabbel mat-talbiet attwali.

5.1. It-talbiet tal-Ġermanja u ta’ l-Awstrija

Fil-fehma tal-Kummissjoni, it-talbiet li waslu mingħand il-Ġermanja u l-Awstrija jippruvaw jagħmlu użu mill-Artikolu 27 tas-Sitt Direttiva dwar il-VAT bl-iskop li jagħmlu bdil fundamentali lis-sistema tal-VAT, u b'hekk, jeliminaw waħda mill-karatteristiċi tagħha, li huwa l-ħlas frazzjonali. Il-kuntest wara dawn it-talbiet huwa l-kapaċità, mid-dehra insuffiċjenti, tal-Ġermanja u ta’ l-Awstrija li jikkontrollaw in-negozji li jwettqu frodi fejn kummerċjant “jisparixxi”, li fil-Ġermanja u l-Awstrija jirriżultaw f’telf stmat għal 2% mid-dħul totali tal-VAT. Il-Ġermanja u l-Awstrija għandhom l-opinjoni li jekk negozju effettivament ma jkunx permess jiddebita l-VAT, l-inċentiva biex “jisparixxi” tispiċċa.

L-Awstrija testima li r-riżultat ta’ applikazzjoni ta’ sistema ġeneralizzata ristretta ta’ l-inverżjoni tal-ħlas lis-soġġetti taxxabbli Awstrijaċi jaffettwa 7 miljun fattura li jinħarġu fl-Awstrija, filwaqt li l-Ġermanja testima li l-proposta tagħhom kieku taffettwa 0.5% tal-fatturi kollha maħruġa fil-Ġermanja li, madankollu, jirrappreżentaw madwar 130 miljun fattura. Madankollu, kwalunkwe soġġett taxxabbli x’aktarx ikun affettwat u obbligat jimplimenta l-inverżjoni tal-ħlas b’mod paralleli mar-regoli “normali” tal-VAT.

6. KONKLUżJONI

It-talbiet li waslu mingħand il-Ġermanja u l-Awstrija jippruvaw jagħmlu użu mill-Artikolu 27 tas-Sitt Direttiva dwar il-VAT bl-iskop li jagħmlu bdil fundamentali lis-sistema tal-VAT fis-sens ta' inverżjoni tal-ħlas ġeneralizzata, u b'hekk, jeliminaw waħda mill-karatteristiċi tagħha, li huwa l-ħlas frazzjonali. Dan ifisser ukoll li s-soġġetti taxxabbli effettivament ikollhom japplikaw tliet tipi differenti ta’ sistemi tat-taxxa:

- Is-sistema “klassika” tal-VAT

- Is-sistema ta’ l-inverżjoni tal-ħlas għal provvisti B2B fejn ikunu sodisfatti ċerti kriterji

- Is-sistema intra-Komunitarja

Dan iżid saff ieħor ta’ diffikultà mal-piżijiet ta’ kontabilità li diġà jiffaċċjaw in-negozji. Bl-istess mod, il-piżijiet addizzjonali ta’ konformità (il-verifika tan-natura tal-klijenti u r-rappurtar tat-tranżazzjonijiet) ikunu imposti fuq negozjanti onesti li joperaw f’żoni fejn il-frodi ma humiex prevalenti. Barra minn hekk, l-amministrazzjonijiet tat-taxxa tal-Ġermanja u l-Awstrija jkollhom jinvestu ħafna iktar riżorsi biex jikkontrollaw il-VAT minħabba li n-numru ta’ soġġetti taxxabbli li jħallsu l-biċċa l-kbira tal-VAT jinbidel minn minoranza ta’ soġġetti taxxabbli għal maġġoranza.

Il-Kummissjoni temmen li dawn it-talbiet ma jgħaddux mit-testijiet rikjesti mill-Artikolu 27 għaliex jagħmlu l-ħajja iktar ikkumplikata, minflok iktar sempliċi, kemm għas-soġġetti taxxabbli, kif ukoll għall-amministrazzjonijiet tat-taxxa minbarra li jipprovdu iktar opportunitajiet għall-evażjoni tat-taxxa, minflok inqas.

Il-Kummissjoni tqis li l- Artikolu 27 mhuwiex bażi ġuridika korretta biex wieħed jipproponi sistema ġeneralizzata ta’ inverżjoni tal-ħlas tat-tip proposta mill-Ġermanja u l-Awstrija. Il-Kummissjoni kienet ipproponiet lill-Kunsill li l-Istati Membri jiġu awtorizzati japplikaw l-inverżjoni tal-ħlas, iżda l-applikazzjonijiet preċedenti ġeneralment kienu differenti għaliex dawn kienu japplikaw għal setturi speċifiċi (il-bini, l-iskart, l-injam, eċċ), u l-inverżjoni tal-ħlas dejjem imxiet ‘il fuq fil-katina tal-forniment (u b’hekk jiġi eliminat biss il-livell dgħajjef fil-bidu tal-katina), sabiex in-negozju żgħir u effimeru li huwa aktar riskjuż ma jiddebitax il-VAT, iżda dan jitħallas min-negozji ikbar u li huma iktar faċli biex wieħed jikkontrollahom. L-uniku eżempju ta’ prodott jikkonċerna d-deheb iżda anki dan jibqa’ prodott wieħed u mhux firxa sħiħa ta’ prodotti li jikkonċernaw lil setturi varji. Barra minn hekk, il-miżuri previsti mill-Ġermanja u l-Awstrija jaffettwaw it-tranżazzjonijiet kollha fis-setturi ekonomiċi kollha, inklużi s-setturi li qatt ma ġew issuspettati li huma soġġetti għal frodi “karużel” jew fejn il-kummerċjant “jisparixxi”. Il-Kummissjoni tqis li d-derogi bħal dawk rikjesti mill-Ġermanja u l-Awstrija ma jirrispettawx il-prinċipju tal-proporzjonalità kif stipulat f’diversi każijiet tal-Qorti.

Barra minn hekk, jekk tkun permessa l-applikazzjoni minn Stati Membri individwali ta’ miżuri speċjali ta’ ambitu u impatt bħal dawn, din twassal għal diżintegrazzjoni tas-suq intern għall-iskopijiet tal-VAT. Fil-fatt, skond il-valur tal-provvista, it-tip ta’ prodott jew kwalunkwe kriterju ieħor li jista’ jiġi previst, in-negozji jkollhom jiffaċċjaw regoli u proċeduri differenti applikabbli għall-provvisti interni fi Stati Membi differenti. Għal din ir-raġuni, dawn il-miżuri jmorru lil hinn ferm mill-ambitu ta’ l-Artikolu 27 tas-Sitt Direttiva tal-VAT.

Barra minn hekk, taħt is-sistema ta’ l-inverżjoni tal-ħlas, ir-riskju finanzjarju li joħroġ min-nuqqas ta’ ħlas tal-VAT jiġi ttrasferit mit-teżor lin-negożji. Huma dawn ta’ l-aħħar li jġorru r-riskju meta jkunu qed jiddeċiedu jekk jiddebitawx jew le l-VAT fuq il-bażi tal-validazzjoni ta’ l-istatus tal-klijenti tagħhom bħala soġġett taxxabbli ġenwin. Dan iċ-ċaqliq tar-responsabbiltà mill-amministrazzjoni tat-taxxa għan-negozju b'potenzjal ta' spejjeż għan-negozju jmur kontra l-għanijiet ta' Liżbona.

Barra minn hekk, sistema ta’ inverżjoni tal-ħlas iddgħajjef konsiderevolment il-kontroll lejn it-tarf tal-katina tad-distribuzzjoni. Konsegwentement, l-amministrazzjonijiet tat-taxxa jkollhom iżidu konsiderevolment l-ammont ta' uffiċjali biex jindirizzaw ir-riskju akbar li jirriżulta mill-fatt li d-dejn tat-taxxa jkun mifrux fuq numru ikbar ta' soġġetti taxxabbli. Barra minn hekk, ir-riżultat ta’ estensjoni ta’ l-inverżjoni tal-ħlas proposta mill-Ġermanja u l-Awstrija effettivament tintroduċi sistema alternattiva ħafna iktar ikkumplikata mill-iskema normali tal-VAT.

It-talbiet li waslu mill-Ġermanja u l-Awstrija jippruvaw jagħmlu użu mill-Artikolu 27 tas-Sitt Direttiva dwar il-VAT bl-iskop li jagħmlu bdil fundamentali lis-sistema tal-VAT, u b'hekk, jeliminaw waħda mill-karatteristiċi tagħha, li hija l-ħlas frammentarju. It-talbiet saru fuq il-preżunzjoni li jekk negozju ma jkunx permess jiddebita l-VAT, l-inċentiv li dan “jisparixxi” jispiċċa, u dan għandu jirriżulta fi dħul addizzjonali mill-VAT.

Madankollu, filwaqt li l-Kummissjoni għadha temmen li s-soluzzjoni għall-frodi fejn il-kummerċjant “jisparixxi" tista’ tinsab b’kontroll ikbar tal-VAT ibbażat fuq l-analiżi tar-riskju milli fuq it-tibdil tar-regoli bażiċi tat-taxxa, mhijiex kontra l-fatt li jiġu eżaminati strumenti komplementarji jew anki alternattivi. Meta wieħed iqis il-fatt li l-Awstrija u l-Ġermanja jqisu li jeżistu d-dgħufiji fis-sistema attwali tal-VAT, il-Kummissjoni se tinvesti iktar sforzi sabiex jiġi iddeterminat jekk hijiex meħtieġa iktar azzjoni ġenerali fil-qafas tas-Sitt Direttiva tal-VAT.

Fuq din il-bażi, il-Kummissjoni temmen li l-bażi ġuridika korretta li tippermetti lill-Istati Membri jintroduċu miżuri wiesgħa ħafna maħsuba biex jegħlbu l-frodi ta’ l-evitar tat-taxxa tal-VAT tkun l-Artikolu 93 tat-Trattat.

Skond dan, il-Kummissjoni tikkonkludi li t-talbiet tal-Ġermanja u l-Awstrija ma jaqgħux fl-ambitu ta’ l-Artikolu 27 tas-Sitt Direttiva tal-VAT, u għalhekk, il-Kummissjoni toġġezzjona għad-derogi mitluba.

[1] ĠU L 145, 13.6.1977, p.1. Id-Direttiva kif emendata l-aħħar bid-Direttiva 2006/18/KE (ĠU L 51, 22.02.2006, p.12).

[2] Skond il-kundizzjonijiet ta’ kreditu li jingħataw lill-klijenti, u l-perjodiċità tad-dikjarazzjonijiet tal-VAT, is-soġġetti taxxabbli ta’ spiss ikollhom iħallsu l-VAT lit-teżor qabel ma’ jiġbruha mill-klijenti tagħhom.

[3] COM (2005) 89, 16.3.2005.