ANNESS

I.   DESKRIZZJONI TA' L-ATTIVITAJIET U L-AVVENIMENTI

1.   L-ewwel linja: appoġġ għal attivitajiet kulturali

1.1.   Proġetti ta' kooperazzjoni pluriennali

Il-Programm għandu jagħti appoġġ għal proġetti prinċipali ta' kooperazzjoni kulturali sostenibbli u struttutati sabiex iġib flimkien il-kwalità speċifika u l-kompetenza ta' l-operaturi kulturali fl-Ewropa kollha. Dan l-appoġġ huwa maħsub biex jassisti lil dawn il-proġetti ta' kooperazzjoni fil-fażi ta' bidu u strutturazzjoni tagħhom jew fil-fażi ta' estensjoni ġeografika tagħhom. L-għan ghandu jkun li jkunu inkoraġġuti jistabbilixxu pedamenti sostenibbli u jiksbu l-awtonomija finanzjarja.

Kull proġett ta' kooperazzjoni għandu jinvolvi mill-inqas sitt operaturi minn sitt pajjiżi differenti li qed jipparteċipaw fil-Programm. L-għan tiegħu għandu jkun li jiġbor flimkien varjetà ta' operaturi minn wieħed jew bosta setturi madwar attivitajiet diversi jew proġetti pluriennali, li jistgħu jkunu ta' natura settorjali jew trans-settorjali, imma li għandu jkollhom għan komuni.

Kull proġett ta' kooperazzjoni għandu jkun maħsub biex iwettaq numru ta' attivitajiet kulturali li jkunu strutturati u pluriennali. Dawn l-attivitajiet għandhom ikunu implimentati matul il-perijodu kollu tal-finanzjament Komunitarju. Huma għandhom ikollhom minn ta' l-anqas żewġ jew tliet għanijiet speċifiċi indikati fl-Artikolu 3 (2). Prijorità tingħata lill-proġetti ta' kooperazzjoni li għandhom il-ħsieb jiżviluppaw attivitajiet li jilħqu t-tliet għanijiet speċifiċi f'dak l-Artikolu.

Il-proġetti ta' kooperazzjoni għandhom jiġu magħżula wara sejħiet għal proposti skond ir-Regolament Finanzjarju. F'dan il-kuntest, is-selezzjoni ser issir abbażi, fost oħrajn, tal-kompetenza rikonoxxuta tal-ko-organizzaturi fil-qasam ta' attività tagħhom, tal-kapaċità finanzjarja u operattiva tagħhom biex iwettqu l-attivitajiet proposti, u tal-kwalità ta' dawn l-attivitajiet u safejn huma jilħqu l-għan ġenerali u l-għanijiet speċifiċi tal-Programm, kif stabbilit fl-Artikolu 3.

Il-proġetti ta' kooperazzjoni għandhom ikunu mwaqqfa fuq ftehim ta' kooperazzjoni, jiġifieri dokument komuni ta' forma legali f'wieħed mill-pajjiżi parteċipanti u ffirmat mill-ko-organizzaturi kollha.

L-appoġġ Komunitarju ma jistax jaqbeż l-50 % tal-budget tal-proġett u għandu jkun ta' natura digressiva. Huwa ma jistax ikun ta' aktar minn EUR 500 000 fis-sena għall-attivitajiet kollha tal-proġetti ta' kooperazzjoni. Dan l-appoġġ għandu jingħata għal perjodu ta' minn tlieta sa' ħames snin.

Bħala indikazzjoni, madwar 32 % tal-budget kollu allokat għall-Programm huma miżmuma għal dan it-tip ta' appoġġ.

1.2.   Miżuri ta' kooperazzjoni

Il-Programm għandu jagħti appoġġ għall-azzjonijiet ta' kooperazzjoni kulturali ta' natura settorali jew transettorali bejn operaturi Ewropej. Prijorità għandha tingħata lill-kreattività u l-innovazzjoni. L-azzjonijiet li jimmiraw li jesploraw linji għall-kooperazzjoni sabiex jiżviluppawhom fuq perijodu itwal ser ikun partikolarment imħeġġa.

Kull azzjoni għandha tkun imfassla u mwettqa f'sħubija bejn minn ta' l-inqas tliet operaturi kulturali fi tliet pajjiżi parteċipanti differenti, kemm jekk dawn l-operaturi jkunu ġejjin minn wieħed jew minn bosta setturi.

L-azzjonijiet għandhom ikunu magħżula wara sejħiet għal proposti skond ir-Regolament Finanzjarju. F'dan il-kuntest, is-selezzjoni ser issir abbażi tal-kompetenza rikonoxxuta tal-ko-organizzaturi, tal-kapaċità finanzjarja u operattiva tagħhom li jwettqu l-attivitajiet proposti, tal-kwalità ta' dawn l-attivitajiet u safejn dawn jilħqu l-għan ġenerali u l-għanijiet speċifiċi tal-Programm, kif stabbilit fl-Artikolu 3.

L-appoġġ Komunitarju ma jistax jaqbeż il-50 % tal-budget tal-proġett. Ma jistax ikun anqas minn EUR 50 000 u lanqas aktar minn EUR 200 000. Dan l-appoġġ għandu jingħata għal perjodu massimu ta' 24 xahar.

Il-kondizzjonijiet stabbiliti għal din l-azzjoni dwar in-numru minimu ta' operaturi meħtieġa sabiex jiġu ppreżentati proġetti, kif ukoll l-ammonti minimi u massimi għall-appoġġ Komunitarju, jistgħu jiġu adottati biex jieħdu kont tal-kondizzjonijiet speċifiċi tat-traduzzjoni litterarja.

Bħala indikazzjoni, madwar 29 % tal-budget kollu allokat għall-Programm huma miżmuma għal dan it-tip ta' appoġġ.

1.3.   Azzjonijiet speċjali

Il-Programm għandu jagħti wkoll appoġġ għal azzjonijiet speċjali. Dawn l-azzjonijiet huma speċjali minħabba li għandhom jieħdu dimensjoni u firxa sostanzjali, ikollhom impatt sinifikattiv fuq il-popli ta' l-Ewropa u jgħinu biex jiżdied is-sens ta' appartenenza tagħhom għall-istess komunità, u jqajmu l-kuxjenza tagħhom dwar id-diversità kulturali ta' l-Istati Membri, kif ukoll jikkontribwixxu għad-djalogu interkulturali u internazzjonali. Għandhom jilħqu minn ta' l-inqas tnejn mit-tliet għanijiet speċifiċi stabbiliti fl-Artikolu 3.

Dawn l-azzjonijiet speċjali għandhom ukoll jgħinu sabiex tiżdied il-viżibbiltà ta' l-azzjoni kulturali Komunitarja kemm fi ħdan u 'lil hinn mill-Unjoni Ewropea. Għandhom ukoll jikkontribwixxu biex tiżdied il-kuxjenza globali tar-rikkezza u d-diversità tal-kultura Ewropea.

Appoġġ sinjifikanti ser tingħata lill-“Bliet Kapitali Ewropej tal-Kultura” sabiex jgħinu biex jiġu implimentati attivitajiet li jisħqu dwar il-viżibbiltà Ewropea u l-kooperazzjoni kulturali trans-Ewropea.

Azzjonijiet speċjali jistgħu wkoll jinkludu l-għoti ta' premjijiet, sakemm dawn jenfasizzaw artisti, xogħlijiet jew kisbiet kulturali jew artistiċi, jagħmluhom magħrufa lil hinn mill-fruntieri nazzjonali u b'hekk iħeġġu l-mobbiltà u l-iskambji.

F'dan il-kuntest, jista' jingħata wkoll appoġġ għall-kooperazzjoni ma' pajjiżi terzi u organizzazzjonijiet internazzjonali, hekk kif stabbilit fl-Artikolu 5(2), u fl-Artikolu 6.

L-eżempji mogħtija hawn fuq ma jiffurmawx lista kompluta ta' miżuri li x'aktarx jingħataw appoġġ taħt din it-taqsima ta' linja tal-Programm.

Il-proċeduri ta' selezzjoni għal azzjonijiet speċjali ser jiddependu fuq l-azzjoni in kwistjoni. Il-finanzjamenti ser jingħataw wara sejħiet għal proposti u sejħiet għal offerti, ħlief fil-każijiet imsemmija fl-Artikoli 54 u 168 tar-Regolament Finanzjarju. Ser jitqies wkoll safejn kull azzjoni tilħaq l-għan ġenerali u l-għanijiet speċifiċi tal-Programm, kif stabbilit fl-Artikolu 3 ta' din id-Deċiżjoni.

L-appoġġ Komunitarju ma jistax jaqbeż is-60 % tal-budget tal-proġett.

Bħala indikazzjoni, madwar 16 % tal-budget kollu allokat għall-programm huma miżmuma għal dan it-tip ta' appoġġ.

2.   It-tieni linja: appoġġ għal korpi attivi fuq livell Ewropew fil-qasam tal-kultura

Dan l-appoġġ għandu jieħu l-forma ta' għotja għall-operazzjoni biex jiġi ko-finanzjat infiq assoċjat mal-programm ta' ħidma permanenti ta' korp li jfittex għan ta' interess ġenerali Ewropew fil-qasam tal-kultura jew għan li jagħmel parti mill-politika ta' l-Unjoni f'dan il-qasam.

Għandha ssir disposizzjoni biex dawn l-għotjiet jingħataw fuq il-bażi ta' sejħiet għal proposti annwali.

Bħala indikazzjoni, madwar 10 % tal-budget kollu allokat għall-Programm għandu jingħata lil din il-linja.

L-appoġġ jista' jingħata lil korpi li qed jaħdmu għal kooperazzjoni kulturali f'wieħed jew iżjed mill-modi li ġejjin:

—	jipprovdu rappreżentazzjoni fuq il-livell Komunitarju,

—	jiġbru u jxerrdu informazzjoni għall-faċilitazzjoni tal-kooperazzjoni kulturali trans-Komunità Ewropea,

—	jagħmlu networking fil-livell Ewropew għal korpi attivi fil-qasam tal-kultura;

—	jipparteċipaw fi proġetti ta' kooperazzjoni kulturali jew jaġixxu bħala ambaxxaturi għall-kultura Ewropea .

Dawn il-korpi jridu juru dimensjoni tassew Ewropea. F'dan ir-rigward, huma għandhom jeżerċitaw l-attivitajiet tagħhom fuq il-livell Ewropew, waħedhom jew taħt forma ta' diversi assoċjazzjonijiet ikkoordinati, u l-istruttura (il-membri reġistrati) u l-attivitajiet tagħhom għandhom ikollhom influwenza potenzjali fuq il-livell ta' l-Unjoni Ewropea jew jilħqu għall-inqas seba' pajjiżi Ewropej.

L-għażla tal-benefiċjarji ta' dawn l-għotjiet ta' funzjonament għandha ssir permezz ta' sejħa għal proposti. Din għandha ssir abbażi ta' tqabbil tal-programm ta' ħidma tal-korp ma' l-għanijiet speċifiċi stabbiliti fl-Artikolu 3.

It-total ta' għotja ta' funzjonament mogħtija taħt din il-linja ma tistax taqbeż 80 % ta' l-ispejjeż eliġibbli tal-korp għas-sena li għaliha ngħatat l-għotja.

3   It-Tielet linja: appoġġ għal analiżi kif ukoll għall-ġbir u t-tixrid ta' informazzjoni u għall-massimizzazzjoni ta' l-impatt ta' proġetti fil-qasam tal-kooperazzjoni kulturali

Bħala indikazzjoni, madwar 5 % tal-budget kollu allokat għall-programm għandu jingħata lil din il-linja.

3.1.   Appoġġ għall-punti ta' kuntatt kulturali

Sabiex jiġi żgurat tixrid immirat, effikaċi u qrib tas-sitwazzjoni ta' informazzjoni prattika dwar il-Programm, għandu jipprevedi appoġġ minn punti ta' kuntatt tal-kultura. Dawn il-korpi, filwaqt li jaġixxu fuq il-livell nazzjonali, għandhom jiġu stabbilti fuq bażi volontarja skond l-Artikolu 39 tar-Regolament (KE, Euratom) Nru 2342/2002.

Il-punti ta' kuntatt tal-kultura għandhom il-kompitu li:

—	jippromovu l-Programm,

—	jiffaċilitaw l-aċċess għall-Programm, u jħeġġu l-parteċipazzjoni fl-attivitajiet tagħhom ta' l-ikbar numru possibbli ta' nies professjonali u ta' operaturi fil-qasam kulturali permezz ta' tixrid effettiv ta' informazzjoni u l-iżvilupp ta' inizjattivi xierqa ta' networking bejniethom infushom;

—	jipprovdu konnessjoni effiċjenti ma' l-istituzzjonijiet differenti li jkunu qed jagħtu għajnuna lis-settur kulturali fl-Istati Membri, u b'hekk jikkontribwixxu għall-komplimentarjetà bejn il-miżuri meħuda taħt il-Programm u l-miżuri nazzjonali ta' appoġġ;

—	jipprovdu informazzjoni dwar programmi Komunitarji oħra miftuħa għal proġetti kulturali jekk meħtieġ.

3.2.   Appoġġ għal xogħlijiet ta' analiżi fil-qasam tal-kooperazzjoni kulturali

Il-Programm għandu jagħti appoġġ għat-twettiq ta' studji u xogħlijiet ta' analiżi fil-qasam tal-koperazzjoni kulturali Ewropea u l-iżvilupp tal-politika kulturali Ewropea. Din l-għajnuna għandha l-għan li żżid il-volum u l-kwalità ta' l-informazzjoni u data għall-iżvilupp ta' data u analiżi komparattivi dwar il-kooperazzjoni kulturali fuq il-livell Ewropew, b'mod partikolari f'dak li għandu x'jaqsam mal-mobbiltà ta' kreaturi u atturi kulturali, il-moviment ta' xogħlijiet ta' l-arti u prodotti artistiċi u kulturali u d-djalogu interkulturali.

Din il-linja tista' tagħti appoġġ lil studji u xogħlijiet ta' analiżi li jikkontribwixxu għat-tkabbir tat-tagħrif dwar il-fenomenu tal-kooperazzjoni kulturali trans-Ewropea u għall-ħolqien ta' kondizzjonijiet favorevoli biex tiżviluppa. B'mod partikulari għandhom jiġu mħeġġa l-proġetti li għandhom il-għan li jiġbru u janalizzaw l-istatistika.

3.3.   Appoġġ għall-ġbir u t-tixrid ta' informazzjoni u għall-massimizzazzjoni ta' l-impatt ta' proġetti fil-qasam tal-kooperazzjoni kulturali

Il-Programm għandu jagħti appoġġ lill-ġbir u t-tixrid ta' informazzjoni u attivitajiet ta' massimizzazzjoni ta' l-impatt ta' proġetti permezz ta' l-iżvilupp ta' għodda fuq l-Internet immirata għall-ħtiġiet tan-nies professjonali tal-kultura fil-qasam tal-kooperazzjoni kulturali trans-Ewropea.

Din l-għodda għandha tippermetti l-iskambju ta' esperjenzi u prattika tajba u t-tixrid ta' informazzjoni li tikkonċerna l-programm kif ukoll il-kooperazzjoni kulturali trans-Ewropea fis-sens wiesa'.

II.   L-AMMINISTRAZZJONI TAL-PROGRAMM

L-allokazzjoni finanzjarja tal-Programm tista' wkoll tkopri spejjeż relatati ma' attivitajiet ta' tħejjija, ta' monitoraġġ, ta' kontroll, ta' verifika u ta' evalwazzjoni, li huma direttament meħtieġa għall-amministrazzjoni tal-Programm u għat-twettiq ta' l-għanijiet tiegħu, b'mod partikolari, studji, laqgħat, azzjonijiet ta' informazzjoni u ta' pubblikazzjoni, spejjeż marbuta ma' networks informatiċi li jiffukaw fuq l-iskambju ta' informazzjoni, flimkien ma' kull spiża oħra ta' assistenza amministrattiva u teknika li għaliha tista' tirrikorri l-Kummissjoni għall-amministrazzjoni tal-programm.

III.   KONTROLLI U VERIFIKI

Għandha tiġi stabbilita sistema ta' verifika ta' kampjuni għall-proġetti magħżula skond il-proċedura deskritta fl-Artikolu 11(2).

Il-benefiċjarju ta' għotja għandu jipprovdi lill-Kummissjoni bid-dokumenti kollha ta' appoġġ li għandhom x'jaqsmu ma' l-infiq għal perijodu ta' ħames snin ikkalkolati mid-data ta' l-aħħar ħlas. Il-benefiċjarju ta' għotja għandu jiżgura li, fejn dan japplika, dokumenti ta' appoġġ f'idejn sħab jew membri jkunu disponibbli wkoll għall-Kummissjoni.

Il-Kummissjoni tista' tagħmel li verifika ta' l-użu magħmul mill-għotja titwettaq direttament mill-persunal tagħha jew minn kwalunkwe korp minn barra kwalifikat ta' l-għażla tagħha. Dawn il-verifiki jistgħu jitwettqu tul il-ħajja tal-kuntratt u għal perijodu ta' ħames snin mid-data li fiha jitħallas il-bilanċ. Fejn xieraq, is-sejbiet mill-verifika jistgħu jwasslu għal deċiżjonijiet ta' rkupru mill-Kummissjoni.

Il-persunal tal-Kummissjoni u persunal minn barra awtorizzat mill-Kummissjoni għandu jkollu aċċess xieraq għall-uffiċċji tal-benefiċjarju u għall-informazzjoni kollha, inkluż informazzjoni f'verżjoni elettronika, meħtieġa sabiex jiġu kondotti dawn il-verifiki.

Il-Qorti ta' l-Awdituri u l-Uffiċċju Ewropew għall-Ġlieda kontra l-Frodi (OLAF) għandhom igawdu mill-istess drittijiet, speċjalment dawk ta' aċċess, bħall-Kummissjoni.

Sabiex jiġu protetti l-interessi finanzjarji tal-Komunita' kontra l-frodi u irregolaritajiet oħra, il-Kummissjoni tista' twettaq kontrolli u spezzjonijiet fil-post taħt dan il-programm skond ir-Regolament tal-Kunsill (Euratom, KE) Nru 2185/96 (1). Fejn xieraq, l-investigazzjonijiet għandhom jitwettqu mill- OLAF skond ir-Regolament (KE) Nru 1073/1999 tal-Parlament Ewropew u tal-Kunsill (2).

IV.   INFORMAZZJONI, KOMUNIKAZZJONI U ATTIVITAJIET IMMIRATI LEJN IL-MASSIMIZZAZZJONI TA' L-IMPATT TA' PROĠETTI

1.   Kummissjoni

Il-Kummissjoni tista' torganizza seminars, konferenzi jew laqgħat sabiex tiffaċilita l-implimentazzjoni tal-Programm, u biex twettaq attivitajiet ta' informazzjoni, pubblikazzjoni, tixrid u attivitajiet oħra ta' massimizzazzjoni ta' l-impatt ta' proġetti kif ikun xieraq, kif ukoll għall-monitoraġġ u l-evalwazzjoni tal-Programm. Attivitajiet bħal dawn jistgħu jiġu ffinanzjati permezz ta' għotjiet, jew il-proċedura ta' akkwist pubbliku, jew jiġu organizzati u ffinanzjati direttament mill-Kummissjoni.

2.   Punti ta' kuntatt

Il-Kummissjoni u l-Istati Membri għandhom jorganizzaw fuq bażi volontarja u jsaħħu l-iskambju ta' informazzjoni utli għall-implimentazzjoni tal-Programm permezz tal-punti ta' kuntatt tal-kultura li jaġixxu bħala korpi ta' implimentazzjoni fuq il-livell nazzjonali, skond l-Artikolu 54(2)(ċ) u (3) tar-Regolament Finanzjarju.

3.   Stati Membri

Mingħajr preġudizzju għall-Artikolu 87 tat-Trattat, l-Istati Membri jistgħu, jekk meħtieġ, jistabbilixxu skemi ta' appoġġ għall-mobilità individwali ta' l-atturi kulturali sabiex tiġi indirizzata l-parteċipazzjoni baxxa tagħhom fil-Programm. Dan l-appoġġ jista' jkun fil-forma ta' għotjiet għall-ivvjaġġar għal operaturi kulturali sabiex tiġi faċilitata l-fażi ta' tħejjija ta' proġetti kulturali trans-nazzjonali.

V.   TQASSIM ĠENERALI TAL-BUDGET

Tqassim tal-budget annwali għall-Programm

	Persentaġġ tal-budget
Linja 1 (appoġġ għal azzjonijiet kulturali)	Bejn wieħed u ieħor 77 %
— proġetti ta' kooperazzjoni	Bejn wieħed u ieħor 32 %
— miżuri ta' kooperazzjoni	Bejn wieħed u ieħor 29 %
— azzjonijiet speċjali	Bejn wieħed u ieħor 16 %
Linja 2 (appoġġ għal korpi attivi fil-livell Ewropew fil-qasam tal-kultura)	Bejn wieħed u ieħor 10 %
Linja 3 (appoġġ għal analiżi, ġabra u tixrid ta' informazzjoni)	Bejn wieħed u ieħor 5 %
Nefqa totali operattiva	Bejn wieħed u ieħor 92 %
L-amministrazzjoni tal-programm	Bejn wieħed u ieħor 8 %

Dawn il-persentaġġi huma indikattivi u huma soġġetti għal bidla mill-Kumitat previst fl-Artikolu 9 skond il-proċedura msemmija fl-Artikolu 9(2).

---

(1)  ĠU L 292, 21.6.2003, p. 2.

(2)  ĠU L 136, 21.6.2003, p. 1.

DIKJARAZZJONI TAR-RAĠUNIJIET TAL-KUNSILL

I.   INTRODUZZJONI

1.	Fil-15 ta' Lulju 2004 l-Kummissjoni ppreżentat lill-Parlament Ewropew u lill-Kunsill proposta għal deċiżjoni, ibbażata fuq l-Artikolu 151 tat-Trattat tal-KE, li tistabbilixxi l-Programm Kultura 2007 (2007-2013).

2.	Il-Kumitat tar-Reġjuni ta l-opinjoni tiegħu fit-23 ta' Frar 2005.

3.	Il-Parlament Ewropew ta l-Opinjoni tiegħu fl-ewwel qari fil-25 ta' Ottubru 2005.

4.	Fit-tmintax ta' Lulju 2006, il-Kunsill adotta l-pożizzjoni komuni tiegħu skond l-Artikolu 251 (2) tat-Trattat tal-KE.

II.   OBJETTIV

Il-proposta hija maħsuba biex tissostitwixxi l-programm Kultura 2000 u d-Deċiżjoni dwar l-appoġġ għall-korpi kulturali fuq livell Ewropew u għandha l-objettivi ewlenin li ġejjin:

—	li tippromwovi l-mobbiltà transnazzjonali ta' persuni li jaħdmu fis-settur kulturali,

—	li tinkoraġġixxi ċ-ċirkolazzjoni transnazzjonali ta' opri ta' l-arti u prodotti kulturali u artistiċi,

—	li tistimola djalogu interkulturali.

III.   ANALIŻI TAL-POŻIZZJONI KOMUNI

1.   Kummenti ġenerali

Il-pożizzjoni komuni tal-Kunsill tibqa' l-biċċa l-kbira f'konformità mal-proposta oriġinali tal-Kummissjoni. Il-Kunsill żamm it-tliet objettivi ewlenin tal-programm, waqt li enfasizza li hu għandu jkun miftuħ għas-setturi u għall-kategoriji kulturali kollha ta' operaturi kulturali. Hu ssottolinja f'bosta partijiet mit-test l-importanza tal-wirt kulturali iżda kien attent li jżomm il-karattru mhux settorjali u miftuħ tal-programm.

Il-baġit ta' EUR 354 miljun (f'prezzijiet ta' l-2004, jiġifieri EUR 400 miljun f'prezzijiet kurrenti) ġie maqbul mit-tliet istituzzjonijiet fil-kuntest tal-ftehim interistituzzjonali dwar il-Kwadru finanzjarju għall-2007-2013.

2.   Elementi ġodda li jinsabu fil-pożizzjoni komuni kif imqabbla mal-proposta tal-Kummissjoni

Il-Kunsill, bi qbil mal-Kummissjoni u mal-Parlament Ewropew, ittrasferixxa l-appoġġ għal azzjonijiet għall-preservazzjoni ta' memorjali għall-Programm propost “Ċittadini għall-Ewropa”.

Il-Kunsill fittex li jikseb il-bilanċ ġust bejn proġetti fuq skala żgħira u kbira, u li jiffaċilita l-aċċess għall-programm minn operaturi żgħar. Għal dan l-effett, u f'konformità ma' l-approċċ tal-Parlament Ewropew, hu baxxa l-appoġġ Komunitarju minimu minn EUR 60 000 għal EUR 50 000 u naqqas in-numru minimu ta' operaturi minn 4 għal 3 għall-miżuri ta' kooperazzjoni.

Bl-istess objettiv li l-programm jinfetaħ għal operaturi kulturali żgħar, it-tqassim indikattiv tal-baġit fil-pożizzjoni komuni tal-Kunsill jagħti aktar riżorsi għall-miżuri ta' kooperazzjoni (proġetti fuq skala żgħira) meta mqabbla ma' proġetti ta' kooperazzjoni pluriennali (proġetti fuq skala kbira). Il-persentaġġi li ntlaħqu, jiġifieri 32 % għall-proġetti ta' kooperazzjoni pluriennali u 29 % għall-miżuri ta' kooperazzjoni, jirrappreżentaw triq tan-nofs bejn il-proposta oriġinali tal-Kummissjoni u l-opinjoni tal-Parlament.

Konformi ma' l-opinjoni tal-PE, il-Kunsill introduċa flessibbiltà akbar fit-tul ta' żmien taż-żewġ proġetti ta' kooperazzjoni pluriennali (3 sa 5 snin) u miżuri ta' kooperazzjoni (sena sa sentejn).

Il-Kunsill introduċa proċedura tal-kumitat ta' tmexxija għal proġetti b'kontribut Komunitarju totali li jaqbeż EUR 200 000.

3.   Emendi tal-Parlament Ewropew

3.1.   Emendi aċċettati b'mod sħiħ, parzjalment jew fil-prinċipju

Il-Kunsill seta' jaċċetta numru konsiderevoli mill-emendi tal-Parlament Ewropew b'mod sħiħ jew parzjalment.

L-emendi 1, 2, 3, 4, 6, 7, 11, 13, 15, 20, 23, 27, 33, 41, 43, 47, 51 u 52 ġew inklużi b'mod sħiħ. L-emendi 14, 19, 26 (li ddaħħlet fl-Artikolu 7), 34, 53, 55, 56 u 59 ġew ifformulati mill-ġdid.

Il-Kunsill inkluda f'parti l-emendi 8, 10, 16 (bl-eċċezzjoni tar-referenza għall-proġetti speċifiċi), 24 (mingħajr referenza għall-oqsma speċifiċi ta' attività), 62 u 49 (bl-eċċezzjoni għat-tismija ta' korpi speċifiċi), 38 u 42 (il-parti taż-żewġ emendi dwar it-tul ta' żmien tal-proġetti ġiet aċċettata).

3.2.   Emendi li ma ġewx inkorporati

Waqt li ma jistax jaċċetta t-tqassim indikattiv tal-baġit bejn il-linji differenti proposti mill-Parlament fl-emendi 39, 44, 47, 48, 54, 60, il-Kunsill fittex li japprossimizza l-pożizzjonijiet mal-PE meta mqabbla mal-proposta oriġinali tal-Kummissjoni, kif inhu indikat hawn fuq. Dwar il-linja 2, appoġġ għall-korpi, il-Kunsill jikkunsidra li l-għoti ta' 14 % mill-baġit għal dik il-linja jkun eċċessiv, b'mod partikolari peress illi azzjoni waħda taħt il-linja 2 (memorjali) ġiet trasferita għal programm ieħor. L-emenda 21 dwar il-baġit ġenerali ma ġietx aċċettata fid-dawl tal-ftehim interistituzzjonali dwar il-Kwadru Finanzjarju kif imsemmi hawn fuq.

Li l-baġit minimu għall-miżuri ta' kooperazzjoni jitbaxxa għal EUR 30 000, kif propost fl-emenda 42, kien ikkunisdrat eċċessiv peress illi l-livell massimu kien diġà ġie stabbilit għal EUR 50 000 fil-programm preżenti. Madankollu, il-Kunsill qorob lejn il-pożizzjoni tal-Parlament billi naqqas il-livell massimu minn EUR 60 000 għal EUR 50 000.

Il-Kunsill ma aċċettax l-emenda 36 li tnaqqas in-numru minimu ta' operaturi minn pajjiżi differenti involuti f'proġetti ta' kooperazzjoni pluriennali minn 6 għal 4 sabiex jiġi ppreservat il-karattru multilaterali tal-proġetti. F'kuntrast ma' dan, għall-miżuri ta' kooperazzjoni ta' daqs iżgħar, hu aċċetta l-emenda 41 li tnaqqas in-numru ta' operaturi.

L-emendi kollha li jintroduċu prijoritajiet settorjali, li jzidu objettivi settorjali jew li jenfasizzaw l-appoġġ għal setturi jew korpi speċifiċi (l-emendi 61, 5, 9, 12, 64, 65 u l-emendi relatati 37 and 45, 25, 40 u 46) ma ġewx aċċettati sabiex tinżamm il-konsistenza ma' l-objettivi tal-programm u biex ma jonqosx mill-karattru miftuħ tal-programm billi jiġu pprijoritizzati l-oqsma differenti ta' l-attivitajiet kulturali. L-istess konsiderazzjoni pprevaliet għall-emendi 16, 24 u 49, li ġew aċċettati parzjalment.

Iż-żieda fis-sehem ta' l-appoġġ Komunitarju minn 50 % għal 70 % kif ipprovdut fl-ewwel parti ta' l-emendi 38 u 42 ġiet ikkunsidrata bħala eċċessiva.

Waqt li jaqbel ma' l-ispirtu ta' l-emendi 29, 31 u 32 (dwar il-kontribuzzjoni għal objettivi Komunitarji oħrajn), il-Kunsill ikkunsidra li dawn diġà kienu koperti mill-premessi jew mid-dispożizzjonijiet l-oħrajn tat-test leġislattiv. Bl-istess mod, il-Kunsill ikkunsidra li l-emenda 18 (dwar riżorsi xierqa) ma kinitx toqgħod fit-test leġislattiv u li l-emenda 17 (dwar il-Konvenzjoni ta' l-Unesco dwar id-diversità kulturali) ma kinitx tidħol fil-kamp ta' applikazzjoni tad-Deċiżjoni.

Il-Kunsill ma kkunsidrax li kien meħtieġ li jiġu inklużi l-emendi 28 u 50 dwar il-miżuri ta' trasparenza u l-emendi għas-sħubiji pluriennali, peress li dawk id-dispożizzjonijiet huma koperti mir-regolament finanzjarju u l-premessa 29 diġà tipprovdi għall-adozzjoni ta' deċiżjonijiet ta' implimentazzjoni skond ir-regolament finanzjarju. L-emenda 35 dwar l-evalwazzjoni ġiet ikkunsidrata bħala superfluwa peress li l-evalwazzjoni nnifisha għandha tkun esterna u indipendenti. L-emenda 72 dwar il-parteċipazzjoni għall-Programm mill-pajjiżi koperti mill-Politika Ewropea tal-Viċinat ma setgħetx tiġi aċċettata, u l-emenda 57 dwar il-bini tal-Punti ta' Kuntatt Kulturali (PKK) ġiet ikkunsidrata bħala diffiċli biex tiġi implimentata peress li l-PKK normalment ikunu parti minn strutturi nazzjonali.

IV.   KONKLUŻJONI

Il-Kunsill jikkunsidra li l-pożizzjoni komuni tiegħu tikkostitwixxi test ibbilanċjat, li jipprovdi bażi tajba biex jiġi mniedi dan l-istrument, li b'hekk jiffaċilita l-kooperazzjoni fis-settur kulturali f'kull parti ta' l-Ewropa. F'dan l-isfond, il-Kunsill jistenna bil-ħerqa li jilħaq qbil mal-Parlament fil-futur qrib bil-ħsieb ta' l-adozzjoni bikrija tad-Deċiżjoni.